Klámmynd Önnu frænku á Hesteyri

  Anna frænka á Hesteyri var viðkvæm fyrir nekt.  Svo mjög að hún svaf kappklædd.   Hún var stór og mikil um sig.  Stundum fór hún í megrun.  Það breytti litlu.

  Einu sinni sem oftar hringdi hún í apótekið á Neskaupstað.  Að þessu sinni falaðist hún eftir megrunardufti,  Nupo-létt.  Henni var illa brugðið er duftið barst með póstinum.  Á umbúðunum blasti við mynd af frægu málverki af nakinni konu. 

  Anna hringdi í geðshræringu í apótekarann.  Hún krafðist þess að sölu á duftinu yrði þegar í stað hætt.  Ella neyddist hún til að kæra apótekið fyrir dreifingu á klámi.

  Apótekarinn tók erindinu vel.  Hann þekkti frúna.  Hann þakkaði kærlega fyrir ábendinguna.  Hann myndi sjá til þess að myndinni yrði umsvifalaust breytt. 

  Nokkrum vikum síðar hringdi Anna.  Hún spurði hvort búið væri að fjarlægja klámmyndina.  Apótekarinn játti því.  Anna pantaði meira duft.  Tússpenni var dreginn fram og svartur síðkjóll teiknaður á nöktu konuna. 

  Anna var hin ánægðasta með útkomuna.  Hún hældi sér af því að hafa forðað apótekinu á Neskaupstað frá dreifingu á klámmynd.  

 

Athugasemdir

[Ólafur (IP-tala skráð) 17.11.2023 kl. 22:21]

Anna var mjög góð í sinni barnslegu einlægni og að mörgu leiti mjög klár og á undan sinni samtíð,til dæmis varaðandi dýravernd.

[Jens Guð, 18.11.2023 kl. 08:43]

Ólafur,  ég tek undir hvert orð!

[Stefán (IP-tala skráð) 18.11.2023 kl. 13:32]

,, Morgungolan svala svalar,

syndugum hugsunum.

Sínu máli talar talan,

talan úr buxunum ,,.

   Þura í Garði

[Jens Guð, 18.11.2023 kl. 16:30]

Stefán,  flott staka!

[Jóhann Elíasson, 19.11.2023 kl. 12:36]

Eins Ólafur segir svo vel, þá var hún Anna á Hesteyri þekkt fyrir sína barnslegu einlægni og það  sem meira er HÚN TRÚÐI EINLÆGLEGA Á ÞAÐ GÓÐA Í ÖLLUM og gott dæmi er um það að hún skaut skjólshúsi yfir nokkra "ógæfumenn" og ALLIR báru þeir henni góða sögun og þeir undu hag sínum vel hjá henni.....

[Jens Guð, 19.11.2023 kl. 16:59]

Jóhann,  þetta er satt og rétt hjá þér.