Bókarumsögn

 - Titill:  Ég hef nú sjaldan verið algild - Ævisaga Önnu á Hesteyri

 - Höfundur:  Rannveig Þórhallsdóttir

 - Útgefandi:  Hólar bókaútgáfa

 - Einkunn: **** (af 5) 

  Faðir Önnu á Hesteyri og afi minn voru bræður.  Ég hef þekkt Önnu frá því ég fæddist.  Þessi frábæra kona verður áttræð á næsta ári.  Hún er einstakt náttúrubarn.  Hún hefur sterkar skoðanir sem sumar koma stundum skemmtilega á óvart.  Spjall við Önnu er ætíð uppspretta kátínu og gleði.  Eitthvað sem gaman er að segja öðrum frá.

  Í áratugi hafa ættingjar okkar Önnu skiptst á ævintýralegum sögum af henni.  Oft hefur þá verið nefnt að einhver verði að safna þessum sögum saman og gefa út á bók. 

  Í fyrravor er ég byrjaði að blogga hef ég rifjað upp nokkrar sögur af Önnu.  Það skiptir ekki máli hvort fólk þekkir Önnu eða ekki.  Sögurnar eru jafn skemmtilegar fyrir ókunnuga.

  Það var mikið fagnaðarefni þegar fréttist af því að Rannveig Þórhallsdóttir,  bókmenntafræðingur,  væri farin að skrásetja ævisögu Önnu.  Bók um Önnu gat ekki orðið annað en bráðskemmtileg.  Eina áhyggjuefni ættingjanna var að broslegar sögur af Önnu kæmu ekki almennilega til skila hvað þetta er merkileg manneskja.  Að þær myndu draga upp mynd af Önnu sem "fígúru" sem er hlegið að á kostnað þess að sögurnar séu afgreiddar þannig að hlegið sé með Önnu.

  Rannveigu hefur tekist virkilega vel að draga upp rétta mynd af Önnu.  Koma til skila hversu heilsteypt og áhugaverð þessi manneskja er.  Manneskja sem auðvelt er að bera mikla virðingu fyrir.  Um leið og bókin er sneisafull af sprenghlægilegum sögum.      

  Þegar ég fékk bókina í hendur fletti ég henni fram og til baka og greip niður í hana hér og þar.  Allsstaðar kom ég niður á mergjaðar smásögur.  Síðan las ég bókina í tvígang frá upphafi til enda.  Eftir það hef ég nokkrum sinnum haldið áfram að glugga í hana og rifja upp broslegar frásagnir.

  Þetta er bók sem fólk á að kaupa handa sjálfum sér til að komast í gott skap um jólin.  Og líka til að gleðja vini sína.  Bókin er í 5.  sæti yfir söluhæstu ævisögur.  Mér skilst að hálft sjötta þúsund eintaka af bókinni séu komin í dreyfingu.  Þar af séu um 5000 eintök seld.  Það þýðir að margir munu skemmta sér konunglega við lestur þessarar bókar um jólin um hið kostulega náttúrubarn,  Önnu á Hesteyri.  Ekki láta bókina framhjá þér fara.

Athugasemdir

[Þorsteinn Briem, 21.12.2008 kl. 23:51]

Eitt sinn var ég í Bandaríkjunum að taka viðtal fyrir Moggann við íslenskan forstjóra þar og þá segir hann si svona við mig: "Þú ert greinilega mikið náttúrubarn."

Ég var nú dáldið lengi að velta þessu fyrir mér. Ef til eru náttúrubörn hljóta einnig að vera til náttúrulaus börn. Frikki Sóf er þá náttúrulaust barn.

Bara svona smá pæling. Annars allt í góðu.

[Jens Guð, 22.12.2008 kl. 00:04]

  Steini,  takk fyrir þennan fróðleiksmola.  Frikki Sóf er náttúrulaust barn.  Þannig lagað.

[Jóna Kolbrún Garðarsdóttir, 22.12.2008 kl. 01:27]

Ég hlakka til þess að lesa bókina. 

[Sigurgeir Orri Sigurgeirsson, 22.12.2008 kl. 07:13]

Ég pantaði bókina hjá pöntunarþjónustu Jens en fékk aldrei senda. Það gerir ekkert til. Ég pantaði hana í staðinn í jólagjöf hjá einum í fjölskyldunni.

Þegar ég handlék bókina áttaði ég mig á því að þetta er konan sem Sævar Síelskandi dvaldist hjá um skeið. Er það ekki annars rétt?

Ég hlakka meira til jólanna en oft áður. Og ég þekki meira að segja höfundinn. Við vorum saman í bókmenntafræðinni! Rannveig sæta maður.

[Jens Guð, 22.12.2008 kl. 10:51]

  Jóna,  þér er óhætt að hlakka til.  Þú verður ekki fyrir vonbrigðum.

  Sigurgeir,  ég er ekki með neina pöntunarþjónustu.  Hinsvegar gaf ég upp netfang og símanúmer hjá útgáfunni því hún bauð og býður lesendum þessa bloggs bókina á afsláttarverði.

  Það er rétt að Sævar bjó hjá Önnu um tíma.  Það alltsaman er tíundað í bókinni.