Saga breska pönksins VII

  Á fyrstu mánuðum ársins 1977 var pönkið ennþá að springa út og ekki búið að ná fullri stærð.  Nýjar pönksveitir spruttu upp eins og gorkúlur.  Sumar sendu frá sér lög og plötur en fæstar urðu nöfn sem settu mark á söguna.  En voru jafn mikilvægar í heildarmyndinni eins og hvert korn sem myndar sand.

  Sumar af þeim hljómsveitum sem komu fram á þessum tímapunkti urðu síðar stór nöfn.  Ég var áður búinn að fjalla um The Stranglers og setja inn myndband við lagið  (Get a) Grip (on Yourself)  á þeirra fyrstu smáskífu.  Hún kom út í janúar 1977.  Um miðjan apríl kom út fyrsta breiðskífan frá The Stranglers,  Stranglers IV -Rattus Norvegius.  Hún fór í 4.  sæti breska vinsældalistans.  Það var besti árangur pönkhljómsveitar til þessa.  Uppsveifla pönksins var hröð.  Pönkið hækkaði jafnt og þétt á breska vinsældalistanum.

  Í janúar hafði smáskífa The Stranglers náð 44.  sætinu.  Í mars fór smáskífa með The Clash í 38.  sæti.  Í aprílbyrjun fór breiðskífa The Clash í 12.  sæti. 

  The Stranglers voru ekki dæmigerðir pönkarar.  En þeir tilheyrðu svo sannarlega senunni og gáfu pönkinu vídd.  Á myndbandinu efst flytja þeir  Hanging Around  af fyrstu breiðskífunni.  Á neðra myndbandinu flytja þeir  Go Buddy Go  af annarri smáskífu sinni.  Hún kom út í maí 1977 og fór í 8.  sæti breska vinsældalistans.  Framan af ferlinum seldust breiðskífur The Stranglers betur en smáskífur þeirra.  Það var ekki fyrr en 1982 sem þessi regla breyttist (með laginu  Golden Brown).

Fyrri færslur um breska pönkið í réttri tímaröð:

Fyrsta breska pönklagið:  http://jensgud.blog.is/blog/jensgud/entry/743999

Næst - II:  http://jensgud.blog.is/blog/jensgud/entry/744949

III: http://www.jensgud.blog.is/blog/jensgud/entry/746033/

IV: http://jensgud.blog.is/blog/jensgud/entry/747161

V:  http://www.jensgud.blog.is/blog/jensgud/entry/750862/

VI:  http://jensgud.blog.is/blog/jensgud/entry/753972/

Athugasemdir

[Frikkinn, 31.1.2009 kl. 22:52]

Skemmtileg upprifjun, ég fór á tónleikana með The Stranglers 1978 í Laugardalshöll og hef alltaf verið aðdáandi þeirra. The Clash sá ég á tónleikum í Finnlandi 1980, þar tróðu þeir upp á skemmtistað. Frábærir . Pönkið lifir alltaf hjá manni en krakkarnir mínir segja oj barasta. Kveðja

[Jens Guð, 31.1.2009 kl. 23:12]

  Frikkinn,  ég var líka á hljómleikum The Stranglers 1978 og fór sömuleiðis á hljómleika hjá The Clash 1980.  Reyndar ekki í Finnlandi heldur í Reykjavík.

  Mér þykir rosalega gaman að velta mér upp úr þessum upphafsárum pönksins.  Ég var um tvítugt þegar pönkbyltingin gekk í garð.  Það var mikið ævintýri að upplifa þá gífurlegu uppstokkun sem átti sér þá stað í rokkinu og þá endurskoðun sem rokkunnendur urðu að takast á við. 

[Ár & síð, 31.1.2009 kl. 23:13]

Virðuleg frú sem ég þekki var á leið heim með vél frá Flugleiðum árið 1978. Hún sat á Saga-Class, við hlið hennar sat enskur herramaður en í grennd við hann nokkrir félagar hans. Þau röbbuðu saman um allt mögulegt, bókmenntir og heimsfréttir, það fór vel á með þeim og leið tíminn hratt.
Þegar vélin lenti og ók að gömlu flugstöðinni sást óvenju stór hópur fólks við hana og ríkti þar greinilega nokkur spenningur svo hún sagði í hálfkæringi við sessunautinn: ,Og þarna eru aðdáendur mínir mættir." Þá svaraði hann: ,,Þetta eru nú frekar MÍNIR aðdáendur, hugsa ég!" Sessunauturinn var nefnilega Hugh Cornwell en hún hafði ekki hugmynd um hver hann var eða The Stranglers yfir höfuð.

Annars komst ég næst pönkinu þegar ég tók lyftu með Johnny Rotten í Helsinki sumarið 1988.

[Jens Guð, 31.1.2009 kl. 23:20]

  Ár og síð,  takk fyrir að deila með okkur þessari skemmtilegu sögu.

[Bara Steini, 1.2.2009 kl. 02:43]

Gaur þú ert einfaldlega bestur...Ekkert annað....

[doddý, 1.2.2009 kl. 14:08]

hæ jens og takk fyrir þennan frábæra pistil 

eldri systir mín gróðursetti paunk í hjarta mitt. paunk var mesti hvatinn að því að ég hitti núverandi eiginmann og sálufélaga. paunk er það sem gerir mig að því sem ég er. lifi paunkið.  kv d

[Jens Guð, 1.2.2009 kl. 22:17]

  Bara Steini,  það er pönkið sem er best.

  Doddý,  þú átt góða systir.