Saga breska pönksins VIII

 

  Hróður bresku pönkbylgjunnar fór að berast til annarra landa er leið á árið 1977.  The Damned fór í hljómleikaferð til Bandaríkjanna um miðjan apríl.  Var þar með fyrst breskra pönkhljómsveita til að spila utanlands.  Þrátt fyrir ítrekað frumkvöðlastarf á upphafsárum pönksins stóð The Damned alltaf í skugga The Sex Pistols og The Clash hvað varðaði vinsældir og áhrif.

  Í lok apríl var The Clash aðalnúmer á hljómleikahátíð í París,  Nuites de Punk.  Um svipað leyti sendi The Jam frá sér jómfrúarlag sitt,   In the City.  Það er á myndbandinu hér að ofan.  Viku síðar kom út samnefnd stór plata frá The Jam.  Lagið fór í 40.  sæti breska vinsældalistans og platan í 20.  sæti. 

  Nokkrum dögum síðar fór The Clash í vel sótta og stórbrotna hljómleikaferð um Bretland,  White Riot Tour.  Með í för voru The Jam,  Buzzcocks,  The Slits og Subway Sect.  Hljómleikaferðin bar nafn með rentu.  Strax á fyrstu hljómleikunum,  í The Rainbow Theatre í London,  varð allt brjálað.  Í hamagangnum voru 200 sæti eyðilögð. 

  The Jam skar sig frá öðrum pönksveitum.  Bæði tónlist og klæðaburður drógu dám af mod-rokki (frægasta mod-sveit sögunnar er The Who).  Eins og í tilfelli The Stranglers gaf það pönkbyltingunni aukið vægi og dýpt að þessar hljómsveitir voru ekki alveg eins og The Sex Pistols og The Clash.

 

  Í júlí sendi The Jam frá sér smáskífuna  All around the World / Carnaby Street.  Hvorugt lagið var á stóru plötunni  In The City.  Smáskífan fór í 13.  sæti breska vinsældalistans.  Þar með var The Jam komin í hóp þeirra stærstu í pönkinu ásamt The Sex Pistols,  The Clash og The Stranglers.  Mest áberandi fylgihnettir voru The Damned og Buzzcocks.  Pönkið var orðið stórveldi sem óx jafnt og þétt.  Hér flytur The Jam  Carnaby Street.

-------

Fyrri færslur um breska pönkið í réttri tímaröð:

Fyrsta breska pönklagið:  http://jensgud.blog.is/blog/jensgud/entry/743999

Næst - II:  http://jensgud.blog.is/blog/jensgud/entry/744949

III: http://www.jensgud.blog.is/blog/jensgud/entry/746033/

IV: http://jensgud.blog.is/blog/jensgud/entry/747161

V:  http://www.jensgud.blog.is/blog/jensgud/entry/750862/

VI:  http://jensgud.blog.is/blog/jensgud/entry/753972/

VII:  http://jensgud.blog.is/blog/jensgud/entry/791397 

Athugasemdir

[Stefán (IP-tala skráð) 6.3.2009 kl. 09:04]

The Jam voru undir mestum áhrifum frá hljómsveitunum Who, Small Faces, Kinks og Beatles og þeir fóru ekki í launkofa með áhuga sinn á tónlist þeirra frábæru hljómsveita. Sex Pistols höfðu líka áhrif á tónlist The Jam, en umfram flestar pönkhljómsveitir, þá voru meðlimir The Jam hörkugóðir hljóðfæraleikarar. Önnur slík undantekning er hljómsveitin The Clash eftir að einn besti trommari rokksins, Topper Headon settist þar við trommusettið. The Clash duttu fljótt að mestu út úr pönktónlist rétt eins og The Jam og sóttu m.a. mikil áhrif í bandaríska tónlistarmenn, svo sem Bob Dylan, The Stooges, New York Dolls og Ramones. Þá sóttu þeir í reggae tónlist Bob Marley og Jimmy Cliff. Bresku hljómsveitirnar Mott the Hoople, The Who og jafnvel Roxy Music höfðu líka greinileg áhrif á tónlistarsköpun the Clash.