Sérkennilegt en spennandi stríð í Bretlandi

  Í Bretlandi geisar nú hatrammt og sérkennilegt stríð sem snýst um það hvaða dægurlag verður jólalagið 2009.  Það er að segja hvaða lag verður í 1.  sæti breska vinsældalistans yfir jólin.  Jólalag hvers árs hefur alltaf skipt miklu máli í Bretlandi.  Það er spilað í tætlur í útvarpi og sjónvarpi og verður jafnan ódauðlegt (klassík).

   Stríðið í ár stendur á milli lags með sigurvegara sjónvarpsþáttarins X-factors annarsvegar og hinsvegar 17 ára gamals lags með bandarísku rokksveitinni Rage against the Machine,  Killing in the Name.

  Ég veit ekki hvernig þetta stríð hófst en skilst að yfirlýsingagleði X-factor mógúlsins,  Simons Cowells,  spili inn í.  Hann hefur fullyrt að ef nýjasti sigurvegari X-factors eigi jólalag ársins muni það breyta öllu til frambúðar.

  Ástæðan fyrir því að  Killing in the Name  er sett til höfuðs X-factor er að í viðlagi þess segir:  Fuck you,  I won´t do what you tell me! (Farðu til fjandans,  ég vil ekki að gera eins og þú segir). 

  Simon er öskureiður yfir uppátækinu með  Killing in the Name.  Hann segir það vera ekkert annað en heimskulegt.  Áróðurinn fyrir  Killing in the Name  er meðal annars rekinn á heimasíðunni www.ragefactor.co.uk en einnig í ljósvakamiðlum og prentmiðlum.  Einkum poppblöðum.  Fjöldi poppara hefur blandað sér í umræðuna.  Þar á meðal eldri sigurvegarar X-factors.  Þeir og fleiri hafa lúmskt gaman af.  Enda er þetta fyrst og fremst grín - þó öllu gamni fylgi einhver alvara.

  Slagurinn hefst formlega á miðnætti í kvöld og stendur til miðnættis 19.  des.  Hann snýst um hvort lagið verður söluhærra á þessu tímabili.  Jólavinsældalistinn verður síðan opinber 20.  des.  Íslendingar geta tekið þátt í slagnum með því að panta  Killing in the Name  á iTunes í Bretlandi eða We7. 

Athugasemdir

[Guðmundur Júlíusson, 12.12.2009 kl. 21:53]

Þetta er náttúrlega skelfilegt rokklag eða þannig, að tengja það við jól er jafnmikið út í hött og að segja að kisa elski voffa!!! en þetta er mín hugmynd um jólalag:

http://www.youtube.com/watch?v=30snxfW8B5k

[Jens Guð, 12.12.2009 kl. 22:12]

  Guðmundur,  það sem Bretar kalla "jólalagið" er sjaldnast eiginlegt jólalag.  Þó það komi samt fyrir.  "Jólalagið" er söluhæsta lagið á breska vinsældalistanum síðustu viku fyrir jól og er því í 1. sæti á vinsældalistanum sem gildir yfir jólin.  "Jólalagið"  þarf ekki að tengjast jólunum á neinn annan hátt.

  Sjálfur er ég lítið fyrir eiginleg jólalög.  Þykir þau flest verulega leiðinleg.  Með örfáum undantekningum.  Eina jólaplatan sem ég á er  Hvít er borg og bær.  Þar syngja Megas,  Björk og fleiri jólalög eftir Ingibjörgu Þorbergs.  Fín plata.  En sennilega ætti ég hana ekki nema vegna þess að ég gerði umslagið. 

[Guðmundur Júlíusson (IP-tala skráð) 12.12.2009 kl. 22:47]

hahaha, það skil ég vel Jens.

[Ari (IP-tala skráð) 12.12.2009 kl. 23:43]

Gummi það er ekki verið að tengja lagið við jólin,  því er hins vegar stefnt á hins vegar að vinna keppnina um vinsælasta lagið um jólin.

NME maður gagnrýnir þetta(er ekki alveg sammála honum þarna):

http://www.nme.com/blog/index.php?blog=10&title=rage_against_the_machine_for_christmas_n&more=1&c=1&tb=1&pb=1

Hér er fésbókargrúppan um þetta http://www.facebook.com/group.php?gid=2228594104

[Jens Guð, 13.12.2009 kl. 00:52]

  Guðmundur,  takk fyrir það.

[Jens Guð, 13.12.2009 kl. 01:01]

  Ari,  takk fyrir þessa hlekki.  Rosaleg lunta er í þessum blaðamanni NME.  Hann er samt með einn góðan punkt:  Það er innbyrðis mótsögn í að hvetja fólk til að kaupa lag með viðlagi sem segir:  Fuck you, I won´t do what you tell me.  Hehehe!  En þetta er hvort sem er sprell. 

  Engu að síður;  ég var að lesa á einhverri netsíðunni að 600.000 manns séu búnir að skrá sig til þátttöku í að kaupa þetta lag.  Í grein blaðamanns NME er talan sögð vera 300.000.  Sem er áreiðanlega rétt tala þegar hann skrifaði greinina.  En ef rétt er að 600.000 manns séu búnir að skrá sig til þátttöku er dæmið orðið raunhæft.  Að vísu er nokkuð klárt að allur sá hópur mun ekki standa við sitt.  En samt.  Svo er þetta spurning hvort aðdáendum X-factors hleypur kapp í kinn og bregðast til varnar með því að hamstra X-factor lagið.