Ólafur F. fór á kostum

 

  Það var áhugavert að fylgjast með umræðum í borgarstjórn í fyrradag.  Ekki síst þann hluta fundarins er snérist um skýrslu rannsóknarnefndar Alþingis.  Ólafur F. Magnússon,  fyrrverandi borgarstjóri,  fór á kostum,  eins og oft áður.  Hér er fundargerðin,  nokkuð stytt.  Fundurinn stóð í 7 klukkutíma.


Ár 2010, þriðjudaginn 20. apríl, var haldinn reglulegur fundur í Borgarstjórn Reykjavíkur. Fundurinn var haldinn í Ráðhúsi Reykjavíkur og hófst kl. 14.00.

Þetta gerðist:

1. Lögð fram svohljóðandi tillaga borgarfulltrúa Vinstri grænna:

Borgarstjórn samþykkir að veita kr. 20.000.000 til eflingar á skapandi sumarstörfum á vegum Hins hússins sumarið 2010. Þannig skapist svigrúm fyrir fleiri einstaklinga í þessum eftirsóttu og mikilvægu störfum fyrir ungt fólk í Reykjavík. Að sama skapi verði fjármagnið nýtt til að lengja starfstíma þeirra verkefna sem þörf er á, til að efla og styrkja ferðamannaþjónustu í Reykjavík.

Ólafur F. Magnússon óskar bókað:

Framkominni tillögu er fagnað en jafnframt vakin athygli á því, að allur fjórflokkurinn, þ.ám. Vinstri grænir, hefur sýnt mikið óréttlæti í forgangsröðun sinni. Um það vitna m.a. tugmilljarða framlög til tónlistar- og ráðstefnuhúss við höfnina á meðan skorið er niður í velferðar- og mennntakerfi borgarinnar.

Samþykkt með 15 samhljóða atkvæðum að vísa tillögunni til íþrótta- og tómstundasviðs til umsagnar.

2. Lögð fram svohljóðandi tillaga borgarfulltrúa Vinstri grænna:

Lagt er til að þeir íbúar borgarinnar sem eru atvinnulausir og þeir sem þiggja fjárhagsaðstoð fái frítt á sundstaði borgarinnar og frí notendakort að þjónustu Borgarbókasafns út árið 2010. Borgarstjóri útfæri nánar framkvæmd tillögunnar.

Ólafur F. Magnússon óskar bókað:

Á tuttugu ára borgarstjórnarferli mínum hef ég flutt fjölda tillagna í borgarstjórn um lækkun eða niðurfellingu gjalds hjá borginni fyrir börn, unglinga, aldraða, öryrkja og þá sem lakar standa í fjárhagslegu og atvinnulegu tilliti. Þó að tillagan sem hér er borin fram varði aðeins lítið brot af þeim tillögum sem ég hef flutt um þessi mál þá fagna ég engu að síður framkominni tillögu. Ég minni enn og aftur á alvarlegan skort á því að fjórflokkurinn forgangsraði til velferðar- og öryggismála í borginni.

Tillagan er samþykkt með 15 samhljóða atkvæðum.

Borgarfulltrúar Vinstri grænna óska bókað:

3. Fram fer umræða um skýrslu rannsóknarnefndar Alþingis.

Ólafur F. Magnússon óskar bókað:

Í 16. passíusálmi séra Hallgríms Péturssonar, 8. versi, sem ritað var fyrir meira en 350 árum er undirrót þess ástands sem nú ríkir meðal þjóðarinnar lýst með eftirfarandi orðum:

Undirrót allra lasta/ ágirndin kölluð er./ Frómleika frá sér kasta/ fjárplógsmenn ágjarnir,/ sem freklega elska féð,/ auði með okri safna,/ andlegri blessun hafna,/ en setja sál í veð.

Á borgarstjórnarfundi fyrr á þessu ári lagði ég fram fjárhags- og eignastöðu mína. Enn stendur á því að aðrir borgarfulltrúar geri slíkt hið sama. Rannsóknarskýrsla Alþingis beinlínis æpir á það að kjörnir fulltrúar almennings geri hreint fyrir sínum dyrum.

Sparnaðarráð

  Núna á þessum þrengingartímum er áríðandi að hafa ráð undir rifi hverju.  Eða svoleiðis.  Beita öllum ráðum sem hugsast getur til að ná fram ýtrasta sparnaði.  Sýna samstöðu og skiptast á sparnaðarráðum.  Hér er eitt sem getur sparað heimili þínu gífurlega háar upphæðir með tíð og tíma:

  Þegar þú átt leið í matvöruverslun er best að velja háannatíma.  Þú væflast eins og illa gerð tuska svo lítið ber á í nálægð við útgöngudyrnar.  Ekki líður á löngu þangað til kúnni gengur hjá og hendir í leiðinni kassakvittuninni.  Þá er lag.  Þú tekur kassakvittunina upp,  snarast inn í búð og verslar allt það sama og sá sem henti kvittuninni.  Góssinu stingurðu í góðan margnota innkaupapoka og þvælist með þetta út á leið.  Þá pípar þjófavarnarkerfið og starfsmaður kemur hlaupandi.  Þú sýnir honum kvittunina og biður hann um að fara yfir innihald pokans.  Allt stemmir eins og stafur á bók og þú ert beðin/n afsökunar á ónæðinu.

  Þetta sparnaðarráð er ekki frá mér komið og ég fordæmi það.  Hér eru fleiri sparnaðarráð:

http://jensgud.blog.is/blog/jensgud/entry/665336

http://jensgud.blog.is/blog/jensgud/entry/640833

http://jensgud.blog.is/blog/jensgud/entry/530712

http://jensgud.blog.is/blog/jensgud/entry/537968

http://jensgud.blog.is/blog/jensgud/entry/501251

http://jensgud.blog.is/blog/jensgud/entry/686753

 

Dregið úr vægi verðtryggingar

Eiturlyfjasalar grunaðir um ólöglega starfshætti

  Starfsmenn SÁÁ fylgjast glöggt með þróun verðlags á vinsælustu eiturlyfjum.  Verðið er samviskusamlega uppfært á heimasíðu félagsins.  Verðsveiflurnar eru hinar fróðlegustu og vekja spurningar.  Þannig kemur fram að verð á amfetamíni var 6200 kr.  í desember en hefur lækkað niður í 5470 kr.  Grasið hefur lækkað úr 4800 kr.  í 3710.  Kókaínið úr 18.300 í 12.420.  Þannig mætti áfram telja. 

  Athygli vekur að þróun hefur orðið sú að verð á eiturlyfjum er orðið nákvæmara.  Það er ekki lengur "rúnnað" við 100 kallinn heldur 10 kalla.  Bankastarfsmenn hafa orðið varir við þetta.  Eiturlyfjasalarnir koma í hópum í bankana til að skipta 1000 köllum í 10 kalla.  Á skemmtistöðum má jafnframt þekkja eiturlyfjasala úr vegna þess að vasar þeirra eru bólgnir af 10 köllum.

  Nákvæm verðlagning bendir sterklega til þess að eiturlyfjasalar stundi verðsamráð.  Það er stranglega bannað.  Samkeppnisstofnun verður að taka snöfurlega á því.  Þangað til Samkeppnisstofnun hefur fellt dóm yfir eiturlyfjasölum og sektað þá fyrir ólöglegt verðsamráð er brýnt fyrir eiturlyfjakaupendur að fá nótu fyrir öllum kaupum.  Svo getur farið að þeir eigi skaðabótarétt gagnvart eiturlyfjasölunum.  Verðlækkun á eiturlyfjum væri hugsanlega mun meiri ef ekki væri um verðsamráð að ræða.  Einkum er líklegt að verð á kókaíni væri ennþá lægra vegna þess að flestir útrásarvillingarnir og fylgihnettir þeirra eru fluttir til útlanda.  Eftirspurn er því lítil miðað við það sem áður var.

     

Handtekinn á leið heim úr fangelsinu

Pálmi Haraldsson er fórnarlamb

  Það er gífurlega fróðlegt að lesa í helgarblaði DV 5 blaðsíðna viðtal við Pálma Haraldsson,  kenndan.  Afsakið.  Ég fékk óvænt hóstakast.  Já,  kenndan við Fons,  Iceland Express,  Skeljung,  Securitas,  Sterling,  FL Group,  matvörukeðjuna Iceland,  Feng og Sölufélag garðyrkjumanna.

  Pálmi iðrast:

  "Ég iðrast þess að hafa verið þátttakandi."

  "Ég axla mína ábyrgð... Ég var þátttakandi í þessu."

  "Ég ætla ekki að draga úr minni ábyrgð... Ég var þátttakandi í þessu."

   "Ég var drifinn áfram af græðgi."

   "Auðvitað gerði ég mistök."

   "Eins og fáráðlingur keypti ég mér einkaþotu 2006."

    "Við verðum að axla okkar ábyrgð."

    "Við fórum fram úr okkur."

    "Við hegðuðum okkur bara eins og fífl og ég tók þátt í því."

    "Við höfum algjörlega misstigið okkur og orðið okkur til skammar."

    "Það var ekkert sem stenst skoðun í því máli siðferðislega séð."

    "Við hlupum fram úr okkur."

    "Algjörlega fram úr hófi."

    "Menn fóru fram úr sér."  

    "Það er alveg ljóst að við fórum fram úr okkur."

    "Þetta var ekki heilbrigt."

    "Það var algjörlega galið og engan veginn réttlætanlegt."

    "Margföldunarstuðlarnir sem notaðir voru til að reikna virði fyrirtækja 2002 til 2008 standast ekki skoðun.  Það var út úr kortinu hvernig fyrirtækin voru verðmetin."

    "Sú eignabóla sem myndaðist stóðst ekki neina skoðun."

    "Frá öllum sjónarhornum fór risna fyrirtækja algjörlega fram úr öllu hófi."

   "Sé ég eftir mannorði mínu?  Já, alveg gríðarlega."

  Pálmi er þó ekki alveg til í taka á sig alla sök þegar betur er að gáð.  Enda engin ástæða til:

    "Ég er fórnarlamb."

    "Ég fór eftir þeim siðferðisreglum sem voru í gildi.  Þær voru galnar."

    "Þú ert í viðskiptum og það er ákveðið siðferði í gangi."

    "Ég var bara þátttakandi í því að fara út á miðin og veiða alveg upp að landhelgi því að það var ekkert sem bannaði það.""

    "Ég braut engin lög."

    "Ég var þátttakandi í leiknum."

    "Ég var þátttakandi í útrásinni.

    "Ég ber ekki ábyrgð á hruninu,  en ég tók þátt í að tjakka upp blöðruna."

    "Það voru einfaldlega gerð mistök."

    "Þetta voru bara þeir tímar sem voru í gangi þá.

    "Þetta voru þeir stuðlar sem voru í gangi þá."

    "Þetta voru þær reglur sem voru í gildi."

    "Þetta voru þær leikreglur sem voru í gangi,  skrifaðar sem óskrifaðar."

    "Við fórum eftir þeim reglum sem voru í gildi á þeim tíma."

     "Við vorum bara að vinna eftir þeim reglum og lögum sem voru í gildi þá."

    "Við tókum þátt í viðskiptalífinu eftir þeim reglum sem voru í gildi þá."

    "Flestir í samfélaginu voru þátttakendur í kerfinu."

    "Myndir þú ekki taka þátt ef bankinn kæmi til þín og biðja þig um að taka lánið gegn 5 milljón króna þóknun fyrirfram auk þess sem þú myndir fá helminginn af hækkun hlutabréfanna?" 

  Hverjum eru hinir raunverulegu sökudólgar?  Pálmi er með það á hreinu:

   "Stjórnvöld settu reglurnar."

    "Ég er ekki í vafa um hverjir brugðust.  Að sjálfsögðu eftirlitsstofnanirnar.  Sá sem setur lög og reglu."

    "Ráðandi aðilar í bönkunum og í atvinnulífinu höfðu langmest áhrif á hvernig staðan var orðin."

    "Seðlabankinn og hið opinbera völdu langversta kostinn."

    "Ég held að Davíð,  Geir og Árni hafi engan veginn gert sér grein fyrir því hvaða afleiðingar þessi ákvörðun þeirra myndi hafa."

    "Það er alveg ljóst hverjir bera ábyrgð á ástandinu.  Það eru að sjálfsögðu þeir þingmenn sem voru í meirihluta á Alþingi þegar leikreglurnar í viðskiptalífinu voru búnar til.  Það eru að sjálfsögðu eftirlitsaðilarnir,  Seðlabankinn og Fjármálaeftirlitið.  Það eru eigendur og stjórnendur bankanna...Forystumenn í atvinnulífinu og samtök þeirra." 

    "Þetta var mjög öfgafullt hagkerfi sem orðið var til á Íslandi."

    "Þetta var einfaldlega bara typpakeppni."

   "Íslensku bankarnir voru engan veginn hæfir til að taka við þessu fjármagni og koma því í umferð."

    "Allir eiga þar hlut að máli sem voru í viðskiptum."

 

Ekki enn vor á Íslandi

Hannes grét

  Eftirfarandi er tekið af bloggi Valgerðar Bjarnadóttur á Eyjunni.  Þetta er frásögn Hreins Loftssonar,  fyrrum formanns einkavinavæðingarnefndar Davíðs Oddssonar á bönkum þjóðarinnar.  Frásögnin er lítillega stytt af mér (einkennd með þrípunktum).  Hún gefur skarpa mynd af stemmningunni:

  "...þegar Falun Gong kom til landsins... til að vekja athygli á harðneskju kínverskra stjórnvalda gegn andófsmönnum í Kína í tilefni af opinberri heimsókn kínverska forsetans, Jiangs Zemin, til Íslands... Davíð Oddsson var forsætisráðherra...

Hannes H. Gissurarson... vildi setja nafn sitt á auglýsingu til að mótmæla framkomu íslenskra stjórnvalda gagnvart Falun Gong. ...þeir fengu ekki að koma til landsins og voru... settir í einhvers konar búðir í Njarðvík, áður en þeim var snúið til baka, þeim, sem á annað borð komust til landsins. Mótmæli Falun Gong felast í ákveðnum æfingum og eru án ofbeldis.

Hannes hringdi í mig vegna þess að hann óttaðist um sinn hag. Ef hann myndi setja nafn sitt á auglýsinguna myndi hann falla í ónáð hjá leiðtoga sínum, Davíð Oddssyni. Ég sagði honum, að Davíð gæti ekki og mætti ekki hafa þau áhrif á hann, þennan mikla andstæðing kommúnisma og fasisma, lærisvein Hayeks, að hann þyrði ekki að standa með sannfæringu sinni gegn ofríki kommúnismans. Okkur bæri skylda til að taka stöðu með andófsmönnum kommúnismans. Davíð hlyti að skilja þetta. Hannes væri einn helsti hugmyndafræðingur íslenskrar frjálshyggju... Ég hvatti hann eindregið til að setja nafn sitt á auglýsinguna. Hannes gerði það líka...

Nokkrum dögum síðar hringdi Hannes grátandi, ég meina ekki kjökrandi heldur háskælandi í mig vegna þess, að hann næði engu sambandi við Davíð... Davíð svaraði ekki skilaboðum, tæki ekki símann og virti hann ekki viðlits. Mér brá. Var þetta virkilega Hannes H. Gissurarson, vinur minn og félagi í baráttunni gegn hinum alþjóðlega kommúnisma? Maðurinn, sem ég hafði litið upp til öll þessi ár? Var þetta þá styrkurinn, sannfæringin? Grátandi af ótta við að missa stöðu hjá leiðtoga sínum?

Ég sagði Hannesi þá skoðun mína, að hann yrði að herða upp hugann og standa á sannfæringu sinni. Ef Davíð... væri ekki stærri maður en þetta, ef hann skyldi ekki stöðu Hannesar gagnvart svona einföldu máli, þá yrði hann að una því. Davíð væri þá einfaldlega ekki stuðnings okkar virði.

Ég heyrði ekki frá Hannesi í nokkra daga eftir þetta símtal... Það er erfitt að hlusta á fullorðinn mann gráta. Örfáum dögum síðar hringdi Hannes aftur og þá lá vel á honum. Hann sagði, að hann hefði loksins náð sambandi við Davíð, sem hefði skammað sig hraustlega fyrir að taka stöðu með andstæðingum sínum með því að mótmæla meðferðinni á Falun Gong. Það skyldi hann ekki gera aftur. Hann hefði hlaupið á sig. Að sjálfsögðu hefði verið nauðsynlegt að taka hart á þessu fólki... Íslensk stjórnvöld gætu ekki með öðrum hætti tekið á svona mótmælendum... Hannes(i)... leið... vel, að vera kominn í náðina á nýjan leik..."

Svar komið vegna Icesave

Kvikmyndarumsögn

 - Titill:  Maybe I Should Have

 - Höfundur og leikstjóri:  Gunnar Sigurðsson

 - Einkunn:  ***1/2 (af 5)

  Þetta er önnur heimildarmyndin um íslenska bankahrunið.  efnahagskreppuna,  búsáhaldabyltinguna og það allt.  Sú fyrri var  Guð blessi Ísland.  Óneitanlega svipar myndunum saman hvað örfá atriði varðar.  Eitthvað er um líkar eða sömu klippur úr sjónvarpsfréttum,  frá borgarafundum,  mótmælafundum og svo framvegis.

  Maybe I Should Have  segir sögu Gunnars Sigurðssonar,  leikstjóra.  Það fer vel á því.  Hann var í góðum málum fyrir bankahrunið.  Var með leiksýningu í útrás.  Lífið gekk sinn vanagang.  En efnahagskreppan,  hrun krónunnar og uppskrúfun vaxta keyrði hann í gjaldþrot.

  Hann sat ekki með hendur í skauti heldur blés til borgarafunda og tók þátt í stofnun nýs stjórnmálaflokks,  Borgarahreyfingarinnar.  

  Í myndinni reynir Gunnar að finna út hvað varð um peningana sem soguðust út úr bönkunum.  Sögulegra skýringa er leitað í spillingunni á Íslandi,  helmingaskiptareglunni og því öllu.  Síðan er farið til Englands,  Lúxemborgar og Tortóla.  Einnig er stofnunin í Þýskalandi heimsótt sem vottað hefur árum saman að Ísland sé eitt af minnst spilltu löndum heims. 

  Allt er þetta hið fróðlegasta.  Það er létt yfir myndinni.  Mörgu spaugilegu er velt upp.  Meðal annars með skreytingum úr gömlum kvikmyndum.  Það er grátbroslegt að rifja upp afneitun stjórnvalda í aðdraganda bankahrunsins og vandræðagangi.  Ingibjörg Sólrún veruleikafirrt,  Geir Haarde ráðalaus og hræddur,  kúlulánadrottningin Þorgerður Katrín kotrösk er hún blæs á varnarorð útlends hagfræðings með þeim orðum að hann þurfi í endurhæfingu.

  Ég sakna þess að ekki sé þjarmað að kókaín-sniffandi guttunum sem fóru fremstir í útrásinni.  Björgólfur yngri gerir þó sitt besta til að útskýra stöðuna.  Ja,  kannski ekki alveg sitt besta.  Og þó.  Jú,  kannski hans besta.  Í  Guð blessi Ísland  sagði hann að gamla hagfræðin um að peningar skipti um hendur sé úrelt.  Þess í stað visni þeir eins og blóm og hverfi.  

  Í  Maybe I Should Have  segir hann peningana fara til "peningahimna".  Þegar hann er spurður hverju hann vilji svara þeim sem kalla hann glæpamann segist hann ekki vilja svara þeim.  Svo sprettur hann á fætur,  rífur af sér hljóðnemann og segist þurfa að hlaupa burt með hraði. 

  Tónlistin í  Maybe I Should Have  er eðal:  Magnús Þór og Fjallabræður;  KK,  Hjálmar,  Dikta...

  Ég hvet fólk eindregið til að skella sér á  Maybe I Should Have.  Þetta er fróðleg mynd,  "skemmtileg",  góð upprifjun á atburðum og vekur til umhugsunar.                

Hvað varð um allar fréttirnar af gengisvísitölum?

  Fyrir örfáum árum voru allir fréttatímar í útvarpi og sjónvarpi undirlagðir glóðvolgum fréttum af vísitölum og gengi á hinum ýmsu hlutabréfum,  verðbréfum og öðru því tengdu.  Aðrar fréttir voru hornreka á meðan þessar markaðsfréttir þóttu þær merkilegustu.  Að sjálfsögðu gáfu dagblöðin ljósvakamiðlum hvergi eftir í fréttaflutningi af gengisvísitölum.

  Almenningur var svo spenntur fyrir þessum fréttum að vinna lagðist niður í flestum fyrirtækjum á meðan í fréttatímum var þulin löng upptalning á því að gengi í FL-group,  Glitni,  De Code og hvað þetta heitir allt hafði hækkað eða lækkað um 0,1% frá því daginn áður eða fyrir lokun markaða.  Minnisblokkir og pennar seldust eins og heitar lummur því fólk var viðþolslaust að skrifa hjá sér hverja hreyfingu á gengi hlutabréfa.

  Einhverra hluta vegna eru þessar fréttir horfnar úr fréttatímum.  Renningar með upplýsingum um gengi hlutabréfa sjást ekki lengur neðst á sjónvarpsskjá í fréttatímum.  Í útvarpsfréttum er ekki lengur haldið úti sérstöku fréttahorni um gengisvísitölur.  Hvert er farið blómið blátt?  Fréttir eru ekki lengur svipur hjá sjón.  Það er ekkert gaman að þeim lengur.      

  Hér er smá upprifjun til að ylja sér við:

  Hlutabréf í deCODE genetics inc. hafa lækkað um 20% frá í gær á NASDAQ. Þetta er þvert á væntingar hluthafa. Gengi hlutabréfa stoðtækjafyrirtækisins Össurar hækkaði um 0,13 prósent í Kauphöllinni í dag og Marel um 0,11 prósent. Úrvalsvísitalan hækkaði um 0,14 prósent í dag. Gengi hlutabréfa í Bakkavör ruku upp um 0,5 prósent í Kauphöllinni í dag. Gengi bréfa í Century Aluminum féll um 2,33 prósent í gær, gengi bréfa Færeyjabanka lækkaði um 0,83 prósent.  Gamla Úrvalsvísitalan (OMXI15) stendur óbreytt frá í gær. Hækkanir voru í Asíu í nótt. Í Evrópu hefur breska FTSE-vísitalan hækkað um 0,1%, franska CAC um 0,5% og þýska Dax hlutabréfavísitalan um 1%. Í Bandaríkjunum hefur Dow Jones og Nasdaq vísitölurnar hækkað um 0.06%

.

Netherferð til að bjarga bankamanni

Gátlisti til að finna siðblinda

  Þau eru hræðileg tíðindin sem Nanna Briem geðlæknir bar á borð í dag í fyrirlestri um siðblindu í Háskólanum í Reykjavík.  Fyrirlesturinn fjallaði ekki um siðblindu í Háskólanum í Reykjavík sérstaklega heldur var fyrirlesturinn í Háskólanum.   Tíðindin hræðilegu eru þau að siðblindir einstaklingar eru ekki alfarið einskorðaðir við banka og fjármálafyrirtæki.   Samtals er um 1500 - 3000 Íslendinga að ræða.

  Til að verjast samskiptum við siðblinda er brýnt að prenta út eftirfarandi gátlista.  Síðan er listinn settur í ljósritunarvél og fjölfaldaður í 5 - 500 eintökum (ræðst af því hvað samskipti eru við marga einstaklinga).  Þegar einhver samskipti eiga sér stað við aðra persónu er upplagt að bregða sér afsíðis í kjölfarið svo lítið beri á og merkja við hvort einhver einkenni um siðblindingja eigi við um viðkomandi.

  Tekið skal fram að ekki er hægt að brúka gátlistann á sjálfan sig.  Siðblindingi er svo siðblindur að hann blekkir sjálfan sig svo rækilega að hann hefur ekki hugmynd um siðblindu sína.  Þvert á móti telur siðblindinginn sig vera með gott og heilbrigt siðferði. 

Persónueinkenni siðblindingja (sækópata / border line):

_  Á auðvelt með að koma vel fyrir og gefa af sér góðan þokka

_  Er sjálfmiðaður og telur sig vera mikilvægan

_  Sækir í hvatningu og örvun.  Annars leiðist honum.

_  Beitir blekkingum og lygum eins og ekkert sé eðlilegra

_  Svíkur og svindlar eins og það sé sjálfsagðasti hlutur í heimi

_  Iðrast varla eða einskis og finnur vart til samviskubits þegar gerðir hans bitna á öðrum

_  Sýnir lítil sem engin tilfinningaviðbrögð við óförum annarra

_  Er harðbrjósta og á erfitt með að finna til samúðar

_  Laginn við að notfæra sér annað fólk hvort sem er fjárhagslega eða á annan hátt

_  Hömlulaus á mörgum sviðum

_  Lauslátur og óábyrgur í kynferðismálum

_  Á einhver hegðunarvandamál að baki

_  Hefur ekki þolinmæði né skilning á langtímamarkmiðum.  Hlutirnir verða að gerast strax.

_  Hvatvís lífstíll

_  Kennir öðrum um

_  Ástarsambönd endast ekki til lengri tíma

_  Lenti í vandræði á unglingsárum

_  Brýtur boð og bönn og skilorð þegar um slíkt er að ræða

_  Brot hans eru ekki bundin við eitthvað tiltekið svið.  Þau spanna ýmis svið.  

  Við hvert atriði skal merkja tölustaf:  2 (algjörlega) eða 1 (að hluta) eða 0 (alls ekki).  Síðan eru stigin talin saman.

0 - 10 stig = Það er allt í fínu með siðferðisvitund þína.

11 - 17 stig = Þú hefur persónuleikagalla en ert ekki siðblind/ur.

18 - 29 stig = Þú ert siðblind/ur og þarft að leita þér hjálpar.

30 - 36 stig = Þú ert fárveik/ur.  Bullandi siðblind/ur og hættuleg/ur samfélaginu.

 

 

.

Siðblinda finnst allsstaðar

Spilling og barátta gegn spillingu

  Ólafur F.  Magnússon,  fyrrverandi borgarstjóri,  hefur farið fremstur í flokki gegn spillingu í íslenskum stjórnmálum.  Fyrir þá sem misstu af verulega áhugaverðri umræðum í borgarstjórn í dag birti ég hér fundargerð dagsins (örlítið stytta.  Hlaupið yfir óþörf formlegheit): 

 Ár 2010, þriðjudaginn 2. febrúar, var haldinn reglulegur fundur í Borgarstjórn Reykjavíkur. Voru þá komnir til fundar, auk borgarstjóra, eftirtaldir borgarfulltrúar og varaborgarfulltrúar: Vilhjálmur Þ. Vilhjálmsson, Hermann Valsson, Þorleifur Gunnlaugsson, Dofri Hermannsson, Björk Vilhelmsdóttir, Oddný Sturludóttir, Dagur B. Eggertsson, Ólafur F. Magnússon, Júlíus Vífill Ingvarsson, Kjartan Magnússon, Sif Sigfúsdóttir, Gísli Marteinn Baldursson, Óskar Bergsson og Marta Guðjónsdóttir.
Fundarritari var Ólafur Kr. Hjörleifsson.

1. Í upphafi fundar kveður Ólafur F. Magnússon sér hljóðs og ræðir fundarsköp.

2. Lögð fram tillaga að hjólreiðaáætlun fyrir Reykjavík.  

        Borgarfulltrúar Framsóknarflokks, Samfylkingar, Sjálfstæðisflokks og Vinstri grænna óska bókað:

Með samþykkt fyrstu hjólreiðaáætlunar Reykjavíkurborgar, Hjólaborgin Reykjavík, eru stigin stór græn skref í átt að umhverfisvænni borg. Markmiðið er að gera fólki kleift að ferðast um borgina á þann hátt sem það kýs. Góð aðstaða til hjólreiða á að hvetja borgarbúa til að njóta útivistar jafnframt því að sinna erindum sínum á reiðhjólum. Þúsundir Reykvíkinga hjóla nú þegar á hverjum degi enda er Reykjavík að mörgu leyti mjög hentug hjólaborg. Reykjavíkurborg hefur það nú að leiðarljósi að huga að hjólreiðum við gerð allra umferðarmannvirkja. Það er eitt af Grænu skrefunum í Reykjavík að stórauka hlutdeild hjólreiða með því að leggja fleiri og betri hjólastíga og bæta aðstöðu fyrir hjólreiðafólk. Áætlunin Hjólaborgin Reykjavík leggur drög að framkvæmdum fyrir næstu ár. Borgarstjórn samþykkti í september 2007 tillögu Árna Þórs Sigurðssonar fyrrverandi borgarfulltrúa um að vinna ætti sérstaka hjólreiðaáætlun fyrir Reykjavík til að gera hjólreiðar að fullgildum og viðurkenndum samgöngumáta fyrir Reykvíkinga. Hjólaborgin Reykjavík er afrakstur vinnu starfshóps meiri- og minnihluta, sem vann að áætluninni í samráði við hagsmunaaðila og fagfólk.

        Ólafur F. Magnússon óskar bókað:

Tillaga um hjólreiðaáætlun í Reykjavík er í sjálfu sér hið besta mál. Um árabil hef ég barist einn á vettvangi Borgarstjórnar Reykjavíkur fyrir breyttri forgangsröðum, þar sem velferðar- og sérstaklega öryggismál eru höfð í öndvegi. Forgangsröðun fjórflokksins hefur ætíð verið önnur. Ég sit því hjá.

3. Fram fer umræða um fjárhagslega hagsmuni borgarfulltrúa.

        Ólafur F. Magnússon óskar bókað:

Að minni ósk fer hér fram umræða um fjárhagslega hagsmuni borgarfulltrúa, þar með talið eignastöðu þeirra og fjárhagsleg tengsl. Eins og segir í auglýsingu borgarmálafélags F-listans í Fréttablaðinu í dag þá mun ég gera ýtarlega grein fyrir eignastöðu minni á borgarstjórnarfundi í dag og krefjast þess að aðrir borgarfulltrúar geri slíkt hið sama. Mikill fjáraustur sumra sigursælla frambjóðenda í prófkjöri Sjálfstæðisflokksins rennir stoðum undir vísbendingar um að fjárhagsleg tengsl og eignastaða þeirra gerir þá vanhæfa til að gegna trúnaðarstörfum sem kjörnir fulltrúar Reykvíkinga. Um sl. áramót var eignastaða mín með eftirfarandi hætti:
1. Fasteignin Vogaland 5 í Reykjavík, helmingseignarhluti. Fasteignamat eignarinnar skv. mati sem tók gildi 31. desember sl. var kr. 71.250.000 og er helmingshluti þess 35.625.000. Á eigninni hvíla tvö lán, frá Lífeyrissjóði lækna annars vegar og frá Spron, síðar Kaupþing og Arionbanki hins vegar. Upphafleg staða lánanna við kaup á húsinu var kr. 3.800.000 en er nú um kr. 1.000.000 og verða lánin fullgreidd á þessu ári.
2. Bifreiðin KEK 56 sem er af gerðinni Toyota Rav 4, árgerð 2007. Kaupverð í nóvember 2007 var um kr. 3.300.000.
3. Launareikningur minn hjá Arionbanka nr. 554482 vegna borgarfulltrúastarfsins. inneign um sl áramót var kr. 583.000.
4. Viðskipta- og launareikningurinn hjá Arionbanka nr. 004482 vegna læknisstarfsins. Staða reikningsins um sl. áramót var kr. 277.000 að teknu tilliti til yfirdráttarheimildar, sem er kr. 1.500.000, þannig að raunstaða reikningsins var neikvæð um rösklega kr. 1.200.000.

        Ólafur F. Magnússon leggur fram svohljóðandi tillögu:

Borgarstjórn Reykjavíkur samþykkir að frambjóðendum til borgarstjórnar í vor ásamt sitjandi borgarfulltrúum sé gert skylt að gera grein fyrir eignastöðu sinni, bæði fasteignum, bifreiðaeign og bankainnistæðum.

        Samþykkt með samhljóða atkvæðum að taka tillöguna á dagskrá.
Tillögu Ólafs F. Magnússonar er vísað til forsætisnefndar með 15 samhljóða atkvæðum.

Að beiðni Ólafs F. Magnússonar ákveður forseti að fresta umræðu skv. 3. lið útsendrar dagskrár þar til í lok fundar og umræðu skv. 4. lið til næsta fundir.

4. Lagðar fram fundargerðir borgarráðs frá 22. og 28. janúar. 

5. Lagðar fram fundargerðir forsætisnefndar frá 29. janúar, framkvæmda- og eignaráðs frá 25. janúar.

6. Fram fer umræða um ráðstöfun styrkja til stjórnmálasamtaka og upplýsingaskyldu þar um.

        Ólafur F. Magnússon óskar bókað:

Árið 2007 lét fjórflokkurinn í Borgarstjórn Reykjavíkur hækka framlög til sín frá borginni úr kr. 13.900.000 í kr. 32.750.000 eða um 130% eða 2,3 földun. Á tímabilinu 2006-2010 ætlar fjórflokkurinn sér 90% af áætluðum framlögum borgarinnar til stjórnmálasamtaka, sem eru 90% af kr. 143.000.00 eða kr. 129.000.000. F-listinn í borgarstjórn hefur þegar lagt fram reikninga sína í borgarráði vegna einu greiðslunnar sem hann hefur fengið á kjörtímabilinu um kr. 3.400.000. Farið er fram á að önnur framboð taki borgarstjórnarflokk F-listans til fyrirmyndar á þessu sviði sem öðrum. F-listinn vill að framlög sem honum voru ætluð vegna árann 2009 og 2010 renni til líknar- og velferðarmála og skorar á hin framboðin að gera slíkt hið sama.

        Ólafur F. Magnússon leggur fram svohljóðandi tillögu:

Borgarstjórn Reykjavíkur samþykkir að öllum borgarstjórnarframboðum sé gert skylt að gera grein fyrir því hvernig framlögum borgarinnar til þeirra hefur verið varið á þessu kjörtímabili, nánar tiltekið framlög borgarinnar árin 2006-2009.

        Samþykkt með 15 samhljóða atkvæðum að taka tillöguna á dagskrá.

        Borgarfulltrúar Vinstri grænna óska bókað:

Borgarfulltrúar VG lögðu það til við gerð fjárhagsáætlunar í desember að styrkir Reykjavíkurborgar til stjórnmálaflokka yrði lækkaðir um helming en þeir nema nú tæplega 30 milljónum. Tillagan er til afgreiðslu í forsætisnefnd. Fram hefur komið að greiðsla Reykjavíkurborgar til stjórnmálasamtaka hækkaði úr 13,9 milljónum króna árið 2006 í 32,75 milljónir árið 2007. Undanfari þessarar hækkunar var að árið 2006 var ákveðið að ýmis kostnaður sem áður féll á sveitarfélög við alþingis- og forsetakosningar skyldi framvegis greiddur af ríkissjóði en vafasamt er að réttlæta það að þessar breytingar leiddu af sér færslu fjármuna til stjórnmálaflokka í Reykjavík. Það hefur einnig komið fram að framlög Reykjavíkurborgar til stjórnmálasamtaka eru meira en helmingi hærri en framlög annarra sveitarfélaga, svo sem Kópavogs, Akureyrar og Garðabæjar ef miðað er við höfðatölu. Það er hinsvegar ljóst að Reykjavíkurborg er skylt skv. lögum að veita þeim stjórnmálasamtökum, sem uppfylla skilyrði ákvæðisins, fjárframlög til starfsemi sinnar, og skal heildarfjárhæðinni skipti milli þeirra í hlutfalli við atkvæðamagn í næstliðnum borgarstjórnarkosningum en í lögum er ekki getið um upphæð framlagsins. Færa má rök fyrir því að borgarstjórnaflokkar, sérstaklega þeir sem eru í minnihluta, þurfi á fjárframlögum að halda til þess að sækja sérfræðiaðstoð en sú mikla hækkun sem orðið hefur á framlögum undanfarin ár er langt umfram þá þörf. Lækkun framlaga til stjórnmálaflokka svarar kalli tímans þegar mikill niðurskurður kallar á forgangsröðun í þágu velferðarmála. Skerðing á fjármagni til stjórnmálaflokka, hvort sem það er frá einkafyrirtækjum eða opinberum aðilum, færir þá nær þeim tíma þegar starfsemin var fyrst og fremst byggð á félögunum í flokkunum sjálfum.


Tillögu Ólafs F. Magnússonar er vísað til forsætisnefndar með 15 samhljóða atkvæðum.

Vísar ásökunum um lygar á bug

Gölluð skoðanakönnun

  Það er sitthvað gallað við könnun Gallup á hvaða flokk borgarbúar hyggjast kjósa í vor.  Reyndar er fagnaðarefni að Framsóknarflokkurinn detti út úr borgarstjórn.  Framsóknarflokkurinn hefur haft fátt að bjóða í Reykjavík annað en spillingu og aftur spillingu.  Hitt er verra að þátttakendur í skoðanakönnunni hafa ekki forsendur til að gera upp hug sinn á þessum tímapunkti.  Besti flokkurinn hefur ekki ennþá kynnt framboðslista sinn.  Hugsanlega mun Frjálslyndi flokkurinn bjóða fram til borgarstjórnar.  Nokkuð víst er að Ólafur F.  Magnússon fer fram með H-lista.  Óvíst er hverjir verða með honum á framboðslistanum.  Ólafur F.  hefur ítrekað verið afskrifaður í skoðanakönnunum.  En ætíð átt miklu fylgi að fagna þegar talið er upp úr kjörkössunum.

    

Sjálfstæðisflokkur í sókn