Hvað varð um allar fréttirnar af gengisvísitölum?

  Fyrir örfáum árum voru allir fréttatímar í útvarpi og sjónvarpi undirlagðir glóðvolgum fréttum af vísitölum og gengi á hinum ýmsu hlutabréfum,  verðbréfum og öðru því tengdu.  Aðrar fréttir voru hornreka á meðan þessar markaðsfréttir þóttu þær merkilegustu.  Að sjálfsögðu gáfu dagblöðin ljósvakamiðlum hvergi eftir í fréttaflutningi af gengisvísitölum.

  Almenningur var svo spenntur fyrir þessum fréttum að vinna lagðist niður í flestum fyrirtækjum á meðan í fréttatímum var þulin löng upptalning á því að gengi í FL-group,  Glitni,  De Code og hvað þetta heitir allt hafði hækkað eða lækkað um 0,1% frá því daginn áður eða fyrir lokun markaða.  Minnisblokkir og pennar seldust eins og heitar lummur því fólk var viðþolslaust að skrifa hjá sér hverja hreyfingu á gengi hlutabréfa.

  Einhverra hluta vegna eru þessar fréttir horfnar úr fréttatímum.  Renningar með upplýsingum um gengi hlutabréfa sjást ekki lengur neðst á sjónvarpsskjá í fréttatímum.  Í útvarpsfréttum er ekki lengur haldið úti sérstöku fréttahorni um gengisvísitölur.  Hvert er farið blómið blátt?  Fréttir eru ekki lengur svipur hjá sjón.  Það er ekkert gaman að þeim lengur.      

  Hér er smá upprifjun til að ylja sér við:

  Hlutabréf í deCODE genetics inc. hafa lækkað um 20% frá í gær á NASDAQ. Þetta er þvert á væntingar hluthafa. Gengi hlutabréfa stoðtækjafyrirtækisins Össurar hækkaði um 0,13 prósent í Kauphöllinni í dag og Marel um 0,11 prósent. Úrvalsvísitalan hækkaði um 0,14 prósent í dag. Gengi hlutabréfa í Bakkavör ruku upp um 0,5 prósent í Kauphöllinni í dag. Gengi bréfa í Century Aluminum féll um 2,33 prósent í gær, gengi bréfa Færeyjabanka lækkaði um 0,83 prósent.  Gamla Úrvalsvísitalan (OMXI15) stendur óbreytt frá í gær. Hækkanir voru í Asíu í nótt. Í Evrópu hefur breska FTSE-vísitalan hækkað um 0,1%, franska CAC um 0,5% og þýska Dax hlutabréfavísitalan um 1%. Í Bandaríkjunum hefur Dow Jones og Nasdaq vísitölurnar hækkað um 0.06%

.

Netherferð til að bjarga bankamanni

Athugasemdir

[Hörður Halldórsson, 5.2.2010 kl. 13:03]

Sýnist þetta vera gamalt línurit ,því hér er farið upp fjallið .Því síðan hefst skíðaferðin niður 2008.

[Jens Guð, 5.2.2010 kl. 14:57]

  Hörður,  þetta línurit sýnir stöðuna 2005 - 2006.

[Jens Guð, 5.2.2010 kl. 14:58]

...þegar fólk var að komast upp á lag með að falsa afkomutölur...

[Brjánn Guðjónsson, 5.2.2010 kl. 15:06]

hahahah einmitt.

man eftir þessu.
óþolandi fjármálafréttir sem ég held að fæstir höfðu nokkurn einasta áhuga á.
velti tilgangi þeirra oft fyrir mér á sínum tíma.

[Jens Guð, 5.2.2010 kl. 15:17]

  Brjánn,  einhverjir hljóta að hafa haft áhuga á þessu.   Á tímabili voru eftirsóttustu fréttamenn landsins þeir sem gátu sagt fréttir af hækkun og lækkun hlutabréfa.  Mér skilst að kókaín-sniffarar hafi almennt verið mjög spenntir fyrir þessum fréttum. 

[Kama Sutra, 5.2.2010 kl. 21:44]

[Jens Guð, 5.2.2010 kl. 21:59]

  Kama Sutra,  ertu ekki með fráhvarfseinkenni?

[Kama Sutra, 5.2.2010 kl. 22:08]

Júbb

Svo er alltaf tilkomumeira og tignarlegra að hafa ris á hlutunum heldur en linkulegt sig ...

[Jens Guð, 5.2.2010 kl. 22:25]

  Kama Sutra,  það var áreiðanlega meira gaman að heyra að einhver vísitala hækkaði um 0,1% en lækkun upp á 0,1%. 

[Jens Guð, 5.2.2010 kl. 22:27]

  Skemmtilegast þótti mér þó að heyra í útvarpsþættinum  Orð skulu standa  að karlkynsorðið uppstúfur sé íslenska orðið yfir viagra.

[Kama Sutra, 5.2.2010 kl. 22:32]

Já, ég heyrði það líka.   Uppstúfur er frábært orð.   Ég ætla að nota það framvegis.