Notaðu eggjaskerann

13.10.2011 | 03:28

Á öllum heimilum er til skemmtilegt verkfæri sem heitir eggjaskeri. Hann kemur sér iðulega vel þegar skera á niður egg. Aðallega soðin egg, vel að merkja. Það sem færri vita er að eggjaskerann er hægt að nota til fleiri hluta. Þar ber hæst að sneiða niður soðnar kartöflur. Það ættu allir að gera í hvert sinn sem kartöflur eru í matinn.

Ávinningurinn er þríþættur:

- Í fyrsta lagi sparar þetta notkun á hnífum alveg gríðarlega. Fyrir bragðið endast hnífarnir miklu lengur.

- Í öðru lagi dregur þetta verulega úr slysahættu. Fólk er alltaf að skera í puttana sína í ógáti og hugsunarleysi með hnífum. Enginn slasar sig á eggjaskera ef fyllstu varúðar er gætt í hvívetna.

- Í þriðja lagi verður þykkt kartöflusneiðanna jöfn. Það auðveldar fólki ótrúlega vel að átta sig á hvað heppilegt er að stinga upp í sig miklu magni af kartöflu í einu. Aldrei meira en hálfri sneið. Aldrei minna en hálfri sneið. Það er skelfilegt að horfa upp á fólk sem stingur upp í sig hálfri stórri kartöflu í einum bita, liggur við köfnun og þarf að rífa út úr sér gervigómana til að rýma fyrir kartöflunni. Næst fær það sér svo örlítinn kartöflubita og tekur eiginlega ekki eftir því að hann sé kominn upp í munninn. Þá heldur viðkomandi að bitinn hafi dottið á gólfið og verður miður sín af skömm. Missir matarlyst og fer svangur í háttinn.

Meginflokkur: Matur og drykkur | Aukaflokkar: Heilbrigðismál, Lífstíll, Spil og leikir | Breytt s.d. kl. 12:30 | Facebook

Athugasemdir

Eggjaskerinn minn er í raun tómataskeri, dulbúinn sem eggjaskeri og virkar líka sem bananaskeri. Og þú gleymdir að nefna sem ávinning að eitt það besta við þetta verkfæri er að hann sparar manni talsvert tygg.

Smyrill (IP-tala skráð) 13.10.2011 kl. 04:30

Ásdís Sigurðardóttir, 13.10.2011 kl. 14:48

Guð minn góður, þú ert alltaf með svo góðar hugmyndir. Nú geta þeir sem kasta eggjum á þingheim harðsoðið þau og skorið, svo þau dreifist á fleiri en veikbyggða skalla úr VG. Minni hætta verður af þessu fyrir þingmenn og svo er líka hægt að kast kartöflusneiðum í liðið. Ég mæli með tómötum og gúrkusneiðum með.

I Færeyjum, í kjölfar kreppu þeirra hér um árið, vissi ég til þess að eggjasneiðara eru notaðir í byrjendakennslu á gítar og hörpu. Minnir mig að hin margnefnd Eyvör þín hafi lært á eggjasneiðara.

Í Klakksvík er árlega haldin keppni í lofteggjasneiðara.

Vilhjálmur Örn Vilhjálmsson, 13.10.2011 kl. 20:57

Smyrill, þetta eru góðir punktar. Ég fatta reyndar ekki af hverju þarf að sneiða banana niður.

Jens Guð, 13.10.2011 kl. 22:16

Ásdís, takk fyrir innleggið.

Jens Guð, 13.10.2011 kl. 22:16

Vilhjálmur Örn, það er um að gera að hafa matinn fjölbreyttan hvort sem hann er borðaður eða honum hent í þingmenn.

Í kjölfar bankahrunsins hafa eggjaskerar einnig verið teknir upp í byrjendakennslu í íslenskum tónlistarskólum - ásamt hárgreiðum, pottum og pönnum. Þetta hefur verið kallað búsáhaldabylting.

Jens Guð, 13.10.2011 kl. 22:23