Þetta vissir þú ekki um Dave Grohl, trommara Nirvana og framvörð Foo Fighters

 

 Dave Grohl var boðin staða í bandarísku Seattle-gruggsveitinni Nirvana áður en hún sló í gegn.  Hann hafði einu sinni séð hljómsveitina á hljómleikum.  Og var heillaður.  Hann var þá í hljómsveitinni Scream sem var stærra nafn en Nirvana.  

 

  - Dave er af slóvenskum ættum.  Bassaleikari Nirvana er af króatískum ættum  (áður hluti af Júgóslavíu).  

 

  - Dave hefur ekki hlustað á plötur Nirvana síðan forsprakki hljómsveitarinnar,  Kurt Cobain,  svipti sig lífi.  Minningarnar eru honum of sárar.

 

  - Dave hefur hlotið Grammy-verðlaun.  Hann ber litla virðingu fyrir þeirri upphefð.  Lengst af notaði hann verðlaunagripinn fyrir hurðarstoppara.  Núna er hann hinvegqar uppi í hillu.

 

  - Dave er frá borginni Warren í Ohio.  Þar ber gata nafn hans,  Dave Grohl Alley.

 

  - Dave er ofvirkur.  Sem barn mátti hann varla vera að því að sofa.  Hann vaknaði fyrir allar aldir því að það var svo margt sem hann langaði að gera.  

 

  - Fyrir 15 árum var Dave í Ástralíu sviptur ökuleyfi vegna ölvunaraksturs.  Hann var fullur á skellinöðru.

 

  - Sem unglingur vann Dave í plötubúð.  Hann hataði vinnuna þar. Það er furðulegt.  Ég rak plötubúð í nokkur ár og það var rosalega gaman. 

 

  - Frambjóðendur republikana í Bandaríkjum Norður-Ameríku eru stöðugt ótrúlega klaufalegir við val á baráttusöngvum.  2004 gerði Brúskur (George W. Bush) lag Davíðs,  "Time Like These",   að baráttulagi sínu.  Dave mótmælti því opinberlega með yfirlýsingu um að hann styddi frambjóðanda demókrata,  John Kerry.  Hann fylgdi yfirlýsingunni eftir með því að troða upp á kosningafundum Jóns Kerrys.     

  

  - Dave þykir súrrealískt að vera auðmaður.  Rauðháls (redneck) frá Suðurríkjum Bandaríkjanna. Dæmigerði rauðhálsinn er blanki sveitalubbinn sem reddar sér fyrir horn (og er aðhlátursefni fyrir bragðið). 

 

  - Dave spilaði á öll hljóðfæri og söng á fyrstu plötu Foo Fighters,  hljómsveitarinnar sem hann stofnaði eftir að dagar Nirvana voru taldir.

 

  -  Þegar Foo Fighters spilaði á Íslandi fyrir nokkrum árum uppgötvaði Dave íslensku hljómsveitina Nilfisk.   Hann fékk dálæti á hljómsveitinni.  Bauð henni að hita upp fyrir Foo Fighters og henni eru gerð skil á DVD heimildarmynd um Foo Fighters. 

 

  - Dave hefur spilað með mörgum hljómsveitum og tónlistarmönnum.  Þar á meðal Killing Joke,  Queens of the Stone Age og Paul McCartney.  

 

  

 

  

Courtney Love og dóttirin sameinaðar á ný

Athugasemdir

[Stefán (IP-tala skráð) 27.1.2015 kl. 08:56]

Ég elska að hlusta á Dave Grohl tromma og syngja, en ég hata að hlusta á Sigmund Dave bulla og froðusnakka.

[Þorkell (IP-tala skráð) 27.1.2015 kl. 13:29]

Ekki má svo gleyma að Jimmy Page og John Paul Jones hafa troðið upp með Foo Fighters

[Jens Guð, 27.1.2015 kl. 22:53]

  Stefán,  ég er sammála.

[Jens Guð, 27.1.2015 kl. 22:54]

Þorkell,  ég vissi af Jimmy Page en ekki af Robert Plant.  Takk fyrir upplýsingarnar.

[Arnar (IP-tala skráð) 28.1.2015 kl. 00:59]

Jens, kíktu á mynd sem Dave leikstýrir og framleiðir en hún heitir Sound City og er um samnefnt stúdíó í Los Angeles. Frægir listamenn og hljómsveitir líkt og Guns N´Roses (þrátt fyrir að útgáfurnar af lögunum sem voru tekin þar upp voru ekki notuð á endanum á plötunum heldur bara sem prufutökur), Neil Young, RHCP og Nirvana, svo fáeinir séu nefndir. 

Hér geturðu nálgast auglýsingu um myndina (trailer heitir það víst á ensku): 
https://www.youtube.com/watch?v=HQoOfiLz1G4 

[Jens Guð, 28.1.2015 kl. 17:30]

Arnar,  takk fyrir ábendinguna.