Skelfileg upplifun í bíl

  Bíllinn minn er 14 ára.  Reyndar eiginlega 13 ára.  Hann á 14 ára afmæli eftir nokkra daga.  Hann ber aldurinn frekar illa.  Hann hefur áráttu til að bila.  Það er eins og þráhyggja hjá honum að komast sem oftast á verkstæði.  Iðulega ljómar mælaborðið eins og jólasería.  Ljósin eru rauð og gul og appelsínugul. Aðallega rauð.  Það er flott yfir jól og áramót. 

  Í dag átti ég erindi í bílinn.  Um leið og ég startaði honum hentist hann til og frá.  Ég sannfærðist þegar í stað um að nú væri sá gamli að gefa upp öndina.  Mér var mjög brugðið.  Maður sem hefur atvinnu af því að selja sólkrem er ekki vel staðsettur í Covid-19 launamálum.

  Mér fannst hamagangurinn standa yfir í hálfa mínútu.  Kannski varði hann skemur.  Síðar kom í ljós að um jarðskjálfta var að ræða.  Þá tókum við bíllinn gleði á ný.  

 

 

 

      

Athugasemdir

[Sigurður I B Guðmundsson, 21.10.2020 kl. 11:00]

Það virðist nú samt vera ágæt dekk undir honum!!

[Jens Guð, 21.10.2020 kl. 11:05]

Sigurður I B,  dekkin eru nánast stofustáss.

[Stefán (IP-tala skráð) 21.10.2020 kl. 12:31]

Bíllinn virðist samt vera hreyfanlegri en forseti Alþingis. Já, sem sem barðist manna mest gegn því að íslendingar mættu drekka bjór. Afturhaldsöfl eru sjaldan hreyfanleg. Þú ættir kanski að hella bjór í bílinn Jens og sjá hvort hann verður ekki sprækari.  

[Þorsteinn Briem, 21.10.2020 kl. 13:15]

Ólíkt flestum Mörlendingum á þessari öld gengur stafkarlinn Steingrímur Joð ekki fyrir bjór og honum þarf að snúa í gang eins og gömlum Willys jeppa.

[Jens Guð, 21.10.2020 kl. 14:25]

Stefán,  gott ráð!

[Jens Guð, 21.10.2020 kl. 14:26]

Steini,  alltaf góður!

[Sigurður I B Guðmundsson, 21.10.2020 kl. 16:57]

Talandi um Steingrím J. þá held ég að ástæðan fyrir því að hann hljóp ekki með Helga er að hann er orðinn gróinn við stólinn!!

[Jens Guð, 21.10.2020 kl. 17:18]

Sigurður I B (# 7),  þetta er mjög sennileg skýring!

[Þorsteinn Siglaugsson, 21.10.2020 kl. 22:39]

Bíllinn er flottur. Þarf bara smá málningu og teip, þá verður hann eins og nýr.

[Jens Guð, 22.10.2020 kl. 06:25]

Þorsteinn Siglaugsson,  útlitið er alveg ljómandi en innvolsið er frekt á viðgerðir.

[Sigurður I B Guðmundsson, 22.10.2020 kl. 10:39]

En hvað með bílstjórann??

[Jens Guð, 22.10.2020 kl. 10:44]

Sigurður I B (# 11),  hann er eldri en bíllinn og hrörlegur eftir því. 

[Jósef Smári Ásmundsson (IP-tala skráð) 22.10.2020 kl. 17:33]

Fyrir um það bil mánuði síðan bar á reimleikum í húsum á Sauðárkróki. Húsin skulfu og nötruðu , húsgögn færðust til og hrundi úr hillum. Það var nóg að gera hjá sálarrannsóknarfélagi skagafjarðar að sinna öllum útköllum sem það fékk.

[Jens Guð, 22.10.2020 kl. 18:20]

Jósef Smári,  Sálarrannsóknarfélag Skagafjarðar klikkar aldrei;  hvorki þegar kljást er við drauga,  uppvakninga eða jarðskjálfta. 

[Stefán (IP-tala skráð) 24.10.2020 kl. 20:22]

Ætli stjórnendur hjá Gunnvöru geti fengið þetta sálarrannsóknarfélag til að skoða sálir sínar ? 

[Jens Guð, 25.10.2020 kl. 06:19]

Stefán,  þer eru sálarlausir.

[Stefán (IP-tala skráð) 25.10.2020 kl. 15:33]

Nákvæmlega Jens. Eftirfarandi setningu las ég á netinu í dag.  ,, Í Norður Kóreu eru fangar minna virði en dýr ,, Hvernig rímar þetta við atburðina á togara Gunnvarar ?  Þú upplifðir skelfilega upplifun í bíl Jens, en varst ekki fangi í bílnum og vaggaðir ekki fárveikur í fangabúðum / þrælabúðum í togara. Þessir skelfilegu atburðir þarna fyrir vestan hljóta að fara í heimsfréttir.

[Jens Guð, 25.10.2020 kl. 17:48]

Stefán (# 17),  einhver hjá útgrðarfyrirtækinu hefur játað að að einhver hafi gert mistök.

[Stefán (IP-tala skráð) 26.10.2020 kl. 12:00]

Lögreglan er að rannsaka þetta sem sakamál.

[Jens Guð, 26.10.2020 kl. 16:37]

Stefán,  enda er þetta sakamál.

[Stefán (IP-tala skráð) 26.10.2020 kl. 19:36]

Það spá því margir að skipstjórinn verði sviptur skipstjórnarréttindum í einhver ár. Það er heldur ekki trúverðugt þegar vélstjóri tjáir sig um það sem fram fer á dekki og í vinnslusal.