Misheppnuð stækkun

  Fyrir 100 árum eða svo fann Marís M. Gilsfjörð upp aðferð og smíðaði frumstætt tæki til að stækka fólk.  Tækið var nánast aukaatriði.  Galdraþulur voru í aðalhlutverki.  Hann gat hvort heldur sem var lengt fólk eða stækkað á þverveginn.  Á þessum árum voru Íslendingar almennt nettir.  Það þótti ókostur í vindasömu veðri.  Einkum í smalamennsku og göngum í hvassviðri. 

  Einn af þeim sem Marís stækkaði var ungur maður úr Svarfaðardal,  Jóhann að nafni.  Svo klaufalega vildi til að Marís sofnaði í miðju stækkunarferli (illar tungur segja vegna ölvunar).  Þegar Marís rankaði við sér var Jóhann orðinn 2,34 metrar á hæð.  Þaðan í frá gekk Jóhann undir nafninu Jói risi.  Stærðinni fylgdu ókostir.  Það þurfti að sérsauma á hann allan fatnað og skó.  Hann fékk þó vinnu við að sýna sig í sirkusum í útlöndum.  Marís gaf foreldrum Jóhanns 5% afslátt á taxta vegna mistakanna.  Að auki gaf hann þeim stimpil með mynd af stjörnu og annan með broskalli.

   Marís dró sig í hlé í kjölfar þessa atburðar.  Sumir héldu því fram að hann skammaðist sín dálítið.  

 

Kvikmyndarumsögn

 - Titill:  Djúpið

 - Leikstjóri:  Kormákur Baltasar

 - Helstu leikendur:  Ólafur Darri Ólafsson,  Jóhann G. Jóhannsson,  Þrúður Vilhjálmsdóttir...

 - Einkunn:  **** (af 5)

  Handritið er byggt á samnefndu leikverki Jóns Atla Jónassonar.  Leikverkið og myndin segja frá raunverulegum atburði:  Þegar bátur frá Vestmannaeyjum sökk í hafið og öll áhöfn fórst að unandskildum Guðlaugi Friðþórssyni.  Hann synti á sex klukkutímum röska 5 kílómetra í köldum sjó og gekk síðan berfættur yfir oddhvassa hraunbreiðu í einhverja klukkutíma til viðbótar.

  Afrekið er einstakt á heimsvísu.  Ekki aðeins var líkamlega þolið ótrúlegt heldur einnig andlega þolið.  Hann gerði allt rétt og yfirvegað.

  Myndin nær að koma þessu öllu frábærlega vel til skila.  Þó er myndin ekki gallalaus.  Hljóð er ekki upp á það besta í upphafi.  Tal er óskýrt og sömuleiðis ýmis skot af sjálfu slysinu og eftirmálum á hafi úti.  Sá hluti myndarinnar er dimmur, drungalegur og óskýr á köflum.  Það er samt ekki beinlínis ókostur.  Nær eiginlega frekar að laða fram tilfinninguna fyrir upplifun Guðlaugs.  Þetta er allt mjög trúverðugt og ekta.  Verulegur hluti af öllu dæminu er myndað í raunverulegum sjó.  Þar hefur myndin sannfæringarkraft umfram sjóslysamyndir framleiddar í Hollywood (þar sem senur eru vandræðalega sundlaugalegar,  samanber Títanic-viðbjóðinn).  Myndin er raunsæ og skandínavísk hvað það og fleira varðar.  Til að mynda er hún hæg (en ekki langdregin, vel að merkja).  Hver sena fær sinn tíma til að fanga andrúmsloftið.

  Fyrri hluti myndarinnar er um sjóslysið og þrekraun Guðlaugs.  Seinni hlutinn segir frá eftirleiknum.  Fjölmiðlaumfjöllun og tilraunum til að útskýra hvernig Guðlaugi var kleift að afreka þetta.

  Það er styrkur myndarinnar að gera því góð skil.  Ólafur Darri vinnur leiksigur í hlutverki Guðlaugs.  Hann er afar trúverðugur og hefur klárlega þurft að leggja mikið á sig í þessu hlutverki. 

  Myndin skilur mikið eftir sig.  Maður er dolfallinn og hugsandi yfir afreki Guðlaugs.  Þetta er áhrifamikil mynd.      

Veitingahússumsögn

 - Réttur:  Sænskt hlaðborð

 - Veitingastaður:  Fljótt & Gott,  BSÍ

 - Verð:  1995 kr.

 - Einkunn:  ***1/2 (af 5)

  Þegar tal berst að sænskum mat koma sænskar kjötbollur upp í hugann.  Þær eru ekki veislumatur en ágætar hvunndags.  Það á við um fleira á sænska hlaðborðinu á Fljótt & Gott á BSÍ.  Þar má finna steiktar smápylsur (korv), niðurskornar pylsur í brúnsósu, beikon,  hakkbuff með lauki og þess háttar.  Sumt er meira framandi, svo sem innbakaður lax.  Hann er ekki það besta á hlaðborðinu.

  Þetta og ýmislegt fleira eru aðalréttir.  Forréttirnir eru meira veisluborð.  Þar má upp telja síldarrétti,  lifrakæfu,  roastbeef, skinku og svo framvegis.  Þeir eru á veislulegum bökkum ásamt grænmeti, ávöxtum og einhverju svoleiðis.  Meðlæti með forréttum og aðalréttum er fjölbreytt.  Til að mynda bragðgott kartöflugratín og steiktir kartöfluplattar sem kallast raggmunk.  Þeir eru steiktir upp úr eggjahræru og snæddir með títuberjasósu.  Algjört nammi sem smellpassar með beikoni. 

  Í eftirrétt er einhverskonar kókoskaka.  Ég smakkaði hana ekki en borðfélagar mínir gáfu henni hæstu einkunn. 

  Þeir,  eins og ég, voru ánægðir með sænska hlaðborðið.  Það er gaman að smakka sitt lítið af hverju í fyrstu umferð og fá sér síðan meira af því sem best bragðast.  Verðið er fínt.  Það er vel að þessu staðið.  Réttirnir eru merktir bæði með sænskum heitum og íslenskum.  Það er til fyrirmyndar.  Ég var á báðum áttum með það hvort sanngjarnt væri að gefa hlaðborðinu 4 stjörnur eða 3 og hálfa.  Nákvæmasta einkunn er 7,5 (af 10). 

  Ég mæli með sænska hlaðborðinu á BSÍ.  Allir finna sitthvað fyrir sína bragðlauka.  

  Sænska hlaðborðið er í boði til og með 2. október.  Ég á eftir að heimsækja það oftar.  Mun oftar.  Ég hef þegar sótt það tvívegis.  Það segir sína sögu.  Ég fagna þessu uppátæki hjá Fljótt & Gott:  Að bjóða okkur upp á spennandi sænskt hlaðborð á góðu verði og standa glæsilega að því.

  Það myndi skerpa á stemmningunni að spila músík sungna á sænsku.  Íslendingar þekkja og kunna vel við svoleiðis músík,  allt frá söngvunum um Emil í Kattholti og Línu Langsokk til Sven Ingvars og Black Ingvar.  Ég er mest fyrir Entombed - þó að þeir laumist stundum til að syngja á ensku.

 

 

 

Varúð! Ódýr eftirlíking í umferð

  Sumar tölvur eru dýrari en aðrar.  Sennilega er það ástæðan fyrir því að óheiðarlegir svindlarar - ólíkt heiðarlegum svindlurum - hafa leiðst út á glæpabraut.  Þeir hafa gert sér lítið fyrir og selt háu verði ódýrar eftirlíkingar af dýrum tölvum.  Drengurinn á myndinni hér fyrir neðan er meðal margra fórnarlamba.  Honum var seld þessi tölva sem Apple tölva í Kolaportinu með 5% afslætti frá búðarverði.  En þetta er ekki Apple tölva.  Ef vel er að gáð má greina að það vantar laufblað á Apple merkið.

Ódýr og hraðvirk detox aðferð

  Detox nýtur gríðarlega mikilla vinsælda hérlendis og í Póllandi.  Detox nær yfir sérstakt mataræði og fleiri aðferðir til að hreinsa líkamann að innan.  Hápunkturinn er svokölluð stólpípa.  Það er eitthvað klósetttæki sem tekur til í skottinu á fólki.  Sumir verða háðir stólpípunni.  Verða stólpípufíklar og fara aftur og aftur í detox.

  Það er dýrt og umdeilt.  Í Asíu er hægt að komast í hræódýra detox meðferð.  Þar er fíll staðgengill stólpípunnar.  Það þarf ekkert að leggjast inn á stofu eða neitt.  Fólk leggst bara á teppi á jörðinni og fílarnir afgreiða dæmið úti í guðs grænni náttúrunni.  Til öryggis þarf hraustan mann og annan fíl til að vera viðbúnir að halda viðskiptavininum í skefjum ef fíllinn hnerrar. 

„Samkvæmt BMI-stuðlinum er ég offitusjúklingur“

Klúður í tónlistarverðlaunum

  Bandarísku tónlistarverðlaunin Grammy hafa iðulega verið aðhlátursefni.  Þetta eru samt tónlistarverðlaun sem vekja ætíð heimsathygli.  Þeim er gert hátt undir höfði í bandarískum fjölmiðlum.  Líka í heimspressunni.  Það að vera tilnefndur til Grammy verðlauna er rosalega öflug auglýsing.  Það er ávísun á góða plötusölu.  Að landa Grammy verðlaunum er ennþá öflugri auglýsing og skilar ennþá meiri plötusölu.  Grammy verðlaunahafi stimplar sig rækilega inn í tónlistarsöguna.

. 

  Klúðrin eru samt mörg.  Bandarískir lykilmenn í tónlist eru stundum úti á þekju.

  Grammy er stytting á orðinu "gramaphone" (hljómplötur).  Ég er ekki með það á hreinu hverjir í bandaríska músíkbransanum tilnefna nöfn og kjósa sigurvegara.  Sennilega eru það fulltrúar plötuútgefenda og plötusala.

.

  Dæmi um Grammy-klúður er að margra ára gamlar plötur hafa verið verðlaunaðar sem besta plata ársins.  Rótgrónir tónlistarmenn með langan og farsælan feril að baki eru verðlaunaðir sem bestu nýliðar ársins.  Frægasta klúðrið er þegar breska folk-blús prog-hljómsveitin Jethro Tull var 1989 verðlaunuð sem besta hard rock/heavy metal hljómsveitin.  Og það mörgum árum eftir blómaskeið hljómsveitarinnar.  Liðsmenn JT (og fleirir) eru ennþá að hlæja sig máttlausa yfir verðlaununum.

  Bandaríska tónlistarmyndbandsstöðin MTV er stórveldi í tónlist.  Árleg MTV verðlaun eru um margt brennd sama marki og klúður Grammy. 

  Næst söluhæsta rokktímarit Bandaríkjanna hefur tekið saman lista yfir klúður MTV-verðlauna:

  Framan af ferli sýndi MTV ekki myndbönd með blökkumönnum.  Rökin voru þau að blökkumannamyndbönd myndu fæla auglýsendur frá.  Plötufyrirtækið CBS (í eigu japanska fyrirtækisins Sony) fór þá verkfall.  Tók öll sín myndbönd úr spilun á MTV þangað til stöðin myndi sýna myndbönd með Michael Jackson.  Þetta var á þeim tímapunkti sem aðal skjólstæðingur CBS var Brúsi frændi (Bruce Springsteen) og hann á hátindi frægðarinnar.  Seint og síðar meir gaf MTV sig og setti myndbönd með Michael Jackson á næturdagskrá MTV.  Þá brá svo við að áhorf á MTV tók risastökk upp á við og auglýsingum rigndi inn.  Leikar fóru þannig að blökkumannamyndbönd urðu meðal vinsælustu myndbanda á MTV og auglýsendur dældu inn auglýsingum vegna aukins áhorfs.

.

  Þó var það svo að vinsælasta myndbandið á MTV, "Thriller" með Michael Jackson, laut í lægra hald sem myndband ársins 1984 fyrir löngu gleymdu myndbandi með The Cars,  "You Might Think".

  1992 sló lagið og myndbandið "Smells Like Teen Spirit" með Nirvana rækilega í gegn á heimsmarkaði.  Lagið skóp nýja rokkbylgju, gruggið (grunge).  Gruggið varð málið og hérlendis ól það af sér meðal annars hljómsveitir eins og Botnleðju og The Noice. Gruggið varð stórveldi með hljómsveitum á borð við Pearl Jam og Soundgarden.  Nirvana varð eitt stærsta nafnið í sögu rokksins. En MTV verðlaunaði löngu gleymt myndband með Van Halen,  "Right Now", sem myndband ársins 1992.

  1995 verðlaunaði MTV myndbandið "Hold My Hand" með Hootie & the Blowfish sem besta myndband ársins.  Myndband sem keppti við "Last Goodbuy" með Jeff Buckley og "Sour Times (Nobody Loves Me)" með Portishead.  Myndbandið með Hootie & the Blowfish er í dag löngu gleymt.

  Þetta eru aðeins örfá klúður dæmi af mörgum sem Spin tiltekur. 

.     

Eivör á góðu flugi - með eina bestu plötu ársins!

  Íslendingar - eins og fleiri - hafa tekið nýju plötu færeysku álfadrottningarinnar,  Eivarar, Room,  afskaplega vel.  Platan náði 1. sæti íslenska vinsældalistans (söluhæst) og er nú í 2. sæti.  Lagið  Rain  hefur verið ofarlega á vinsældalista rásar 2 og Bylgjunnar.  Trausti Júlíusson á Fréttablaðinu gaf plötunni 4 stjörnur (****).  Það sama gerði Dr. Gunni á Fréttatímanum (****).  Einnig Helgi Snær Sigurðsson á Morgunblaðinu (****).  Ég gaf plötunni 4 og hálfa stjörnu (****1/2):  http://www.jensgud.blog.is/blog/jensgud/entry/1256404/

  Andrea Jónsdóttir á rás 2 gaf  Room  einkunnina 9,9 af 10.  Það er ljóst að  Room  er ein af bestu plötum ársins 2012.

  Bókin um Eivöru kemur út í lok október (ef allt gengur samkvæmt áætlun). 

Skemmtileg húðflúr

  Rauðhálsar (rednecks) eru þeir kallaðir.  Uppruni nafnsins er óljós.  Sumir rekja hann til sólbrenndra hálsa á fátækum, ómenntuðum hvítum bændum, bograndi á ökrum í suðurríkjum Bandaríkja Norður-Ameríku.  Aðrir telja nafnið tengjast rauðum hálsklútum sem innflytjendur frá Skotlandi báru. 

  Hver sem uppruni nafnsins er þá nær það ennþá yfir fátækt, ómenntað hvítt Suðurríkjafólk.  Þetta fólk er stolt af því að vera rauðhálsar, ómenntað og finnst upphefð af fáfræði sinni.  Það fylgist ekkert með fréttum og fréttatengdu efni.  Það veit fátt um heiminn utan síns ranns,  en fyrirlítur norðurríki Bandaríkjanna, Obama, útlönd, lögguna og er bullandi rasistar.  Jafnframt afar kirkjurækið og kristið.

  Norðurríkjamenn og fleiri gera grín að rauðhálsum. "Hafnarfjarðarbrandarar" um rauðhálsana fljúga þvers og kruss um netheima og út um allt.  Enda af nógu að taka.  Rauðhálsarnir sjálfir eru ólatir við að pósta á netið ljósmyndum af því hvað þeir eru útsjónarsamir við að "redda hlutunum".  Þegar eitthvað bilar þá lagar rauðhálsinn það með því sem hendi er næst.  Hann leggur ekkert upp úr því að fínpússa hlutina.  Þvert á móti vill hann rígmontinn að allir sjái hvernig hann reddaði málunum. 

  Það er gaman að spjalla við rauðhálsa.  Fáfræði þeirra og ranghugmyndir um heiminn gera mann af og til orðlausan.  En þetta er ljúft fólk og almennilegt - svo framarlega sem viðmælandinn er hvítur. 

  Í sjónvarpsþáttum og kvikmyndum sýndum hérlendis er nafnið redneck oftast þýtt sem sveitalubbi. 

  Það er gaman að húðflúrum rauðhálsa.  Þau einkennast af því að vera klaufalega unnin.  Hér er dæmi:

   Ég verð að hafa myndina svona stóra til að listaverkið njóti sín.  Rauðhálsinn teiknar sín húðflúr sjálfur. 

 

  Þessi teiknaði mynd af hundinum sínum.  Efst setti hann upphafsstafi síns nafns.  Þannig túlkar hann hvað þeir félagarnir eru góðir vinir.

   Ég er ekki klár á því hvað Rebelicious þýðir.  Mér dettur í hug að þetta sé afbrigði af orðinu rebellious (uppreisnarseggur).  Rauðhálsar vilja gjarnan skilgreina sig sem uppreisnarmenn.  Þeir telja sig vera í uppreisn gegn ríkisvaldinu, stjórnvöldum og ýmsu öðru.  Þeir hampa víða slagorðinu "Suðurríkin munu rísa á ný" (The South Will Rise Again).  Þeir álíta sig vera kúgaða af Norðurríkjunum (damn Yankees) og það situr í þeim að þrælahald var bannað. 

  Þetta er ekki versta stafagerðin á húðflúri rauðháls.  Að vísu er ósamræmi í hæð stafanna og útliti.  R,D og N eru þykkir hlunkar en E, C og K léttir, opnir og töluvert efnisminni.

  Daman sem ber þetta húðflúr teiknaði það til minningar um látinn föður sinn.  Hún kemur þarna fyrir fæðingardegi hans og dánardegi;  uppáhalds hattinum hans, byssu og veiðistöng.  Til að túlka veiðivatnið í nágrenninu sýnir hún grænan fisk stökkva upp úr því.  Á fésbókarsíðu hennar rigndi inn hrósyrðum fyrir þessa snilli.  Jafn glæsilegt húðflúr hafði enginn séð.

  Texas-kántrý:

Furðulegt og óvænt veðurfar

  Rok hefur breyst mjög mikið á síðustu árum.  Ég veit ekki hvort það er vegna loftslagsbreytinga eða af öðrum ástæðum.  Þegar brunalið var í miðju kafi - akkurat búið með fyrri helminginn - að sprauta vatni á þetta hús í Frakklandi þá fauk það óvænt í burtu. Í gær fauk gömul kona í Kópavogi.  Það sem verra var er að hún fauk í vitlausa átt.

.

Gátan leyst!

  Margir hafa velt því fyrir sér hvernig heppilegast sé að ná handalausri manneskju upp úr sundlaug.  Flestir gera sér grein fyrir því að slíkt er vandkvæðum bundið.  Einkum ef handalausa manneskjan vill ekki fara upp úr lauginni.  Ef hún hinsvegar fellst á að fara upp úr með góðu þá er þetta rétta handbragðið:

Magnað sjónarspil í London

Sparnaðarráð: Sparaðu tugi þúsunda króna!

  Margar konur kaupa sér pils á 20 - 30 þúsund kall.  Og nokkrir kallar líka.  Ýmsir,  kallar og konur,  verja álíka upphæð í að kaupa handa konum (og nokkrum köllum) pils til jólagjafa,  afmælisgjafa og annarra tækifærisgjafa.  Ég hef fundið leið til að lágmarka þennan kostnað við upphæð sem er innan við 1000 kall.

  Í Rúmfatalagernum,  Europrice og fleiri búðum má finna kodda sem kosta undir 1000 kr.  Ráðið er að klippa ofan af þessum koddum og neðan af þeim.  Henda svampi sem er innan í koddunum og eftir stendur glæsilegt pils í fallegum litum og með myndum eða munstri.

Bráðfyndið samtal í Hagkaup

  Ég gerði mér ferð í Hagkaup í Skeifunni.  Ég var þyrstur og langaði í Malt.  Þegar gengið er inn í verslunina blasir við horn sem er blanda af upplýsingaborði og sjoppu.  Ég bar upp erindið.  Afgreiðsludaman var í þann mund að sinna því þegar háöldruð kona ruddist upp að hlið mér og kallaði á dömuna:  "Getur þú hringt á leigubíl fyrir mig?"

  "Alveg sjálfsagt,"  svaraði afgreiðsludaman glaðlega.  Hún gerði þegar í stað hlé á samskiptum við mig og tók upp símtól.  Sú gamla snérist á hæl og þrammaði í átt að útidyrunum.  Hún fór hægt yfir.  Afgreiðsludaman kallaði á eftir henni:  "Hvert er nafnið?"

  Sú gamla hægði á ferðinni og kallaði um öxl:  "Ertu að tala við mig?"

  Afgreiðsludaman kannaðist við það og ítrekaði spurninguna:  "Já,  ég er að spyrja um nafnið."

  "Hreyfill,"  hrópaði sú gamla um leið og hún hvarf út um dyrnar.  

Plötuumsögn

 - Titill:  Room

 - Flytjandi:  Eivör

 - Einkunn:  ****1/2 (af 5)

  Þetta er fyrsta plata Eivarar sem er öll hljóðrituð í Færeyjum.  Hugsanlega hefur það gefið aukið svigrúm fyrir nostur við að fínpússa flutninginn.  Að minnsta kosti er þar ekki kastað til höndum.

 Platan hefst á ljúfri píanóballöðu,  Green Garden.  Píanóleikurinn er afar nettur og snyrtilegur. Þannig er píanóleikur afgreiddur hvar sem hann hljómar á plötunni.  Annar hljóðfæraleikur er sömuleiðis einfaldur og látlaus.  Útsetningar eru samt á köflum íburðarmiklar - þrátt fyrir einfaldleika hvers hljóðfæris fyrir sig. 

.

  Room  er mildari plata og lágstemmdari en síðasta platan,  Larva.  Room hljómar eins og Eivör hafi stigið eitt skref frá  Larva  og snúið aftur - að hluta - til sinnar ljúfu og notalegu þjóðlagakenndu tónlistar (folk).  

  Áferð plötunnar er þannig að í rökréttri plöturöð gæti ókunnugur haldið að Room væri brúin frá  Mannabarni  og  Live  yfir í  Larva. 

  Eivör þenur röddina aðeins í örfáum lögum.  Hún er oftar hálf hvíslandi í vögguvísustíl.  Eins og í laginu   I Know  (sem iTune og tonlist.is kaupendur plötunnar geta niðurhalað ókeypis með færeyska textanum  Ég veit).

  Kraftmesta og flottasta lag plötunnar er  Night´s Body.  Lag sem getur á hljómleikum leyst af hólmi  Nú brennur tú í mér  sem dúndrandi síðasta lag er skilur salinn eftir á suðupunkti.  Night´s Body er ólíkt öðrum lögum plötunnar - án þess að stinga í stúf.  Inngangur lagsins og síðari kaflar eru ágengt píanóstef með rokkuðu undirspili til skiptis við blíða kafla.  Magnað lag og ferskur tónn frá Eivöru.

  Það er tölvupoppsstemmning í sumum lögum. Til að mynda í titillaginu,  Room.

  Lagasmíðar eru að sumu leyti "þroskaðri" og úthugsaðri (þróaðri og "dýpri") en áður hjá Eivöru.  Þetta á einnig við um útsetningarnar.  Hver tónn er þaulútfærður.  Inn á milli eru einfaldari lög sem flæða létt og grípandi eins og samin fyrirhafnarlaust.

  Á  Larva  hljómaði söngur Eivarar á köflum líkur Kate Bush.  Eivör gerir það líka stundum á Room.   Söngur Eivarar er blæbrigðaríkari.  Með fullri virðingu fyrir Kate Bush þá er Eivör betri og fjölhæfari söngkona.  Það er samt ástæðulaust að bera þær saman.  Nema kannski til að leiðrétta algengan misskilning um að Eivör sé svo ákafur aðdáandi að hún hermi eftir Kötu.  Þann misskilning má rekja til þess að á  Larva  syngur Eivör lag eftir Kötu. 

  Það var að tillögu bassaleikarans Mikaels Blaks.  Eivör þekkti ekki lagið og varð að fletta því upp á þútúpunni til að læra það.  Hitt er annað mál að Eivör hefði ekki fallist á uppástungu Mikaels nema vegna þess að hún hreyfst að laginu.  Eivör er alveg hrifin af tónlist Kate Bush en Eivör er ekki að herma eftir henni.  Það sama er að segja um þann grun sumra annarra að á  Larva  væri Eivör að færa sig í átt að tölvupoppi Bjarkar.  Eivör er aðdáandi Bjarkar.  En Eivör er ekki í því hlutverki að herma eftir öðrum. 

.

   Room  er tileinkuð föður hennar sem féll óvænt frá snemma árs í fyrra.  Mörg lögin voru samin með hann í huga.  Far Away er minningaróður um hann og platan er tileinkuð honum.   Það er saknaðartónn í ljóðrænum textunum. 

 .

Viltu græða hellings pening?

  Ég er með frábæra viðskiptahugmynd.  Hún mun klárlega færa þeim góðar tekjur sem á hana stekkur og hrindir í framkvæmd.  Viðkomandi verður það sem kallast auðmaður.  Eða því sem næst.  Sjálfur er ég upptekinn í öðrum verkefnum.  Þess vegna velti ég hugmyndinni til ykkar.

  Þetta er málið:  Íslendingar eru æstir í pylsu,  "eina með öllu", eins og það kallast.  Það sem fyrst þarf að finna er plastumbúðir sem henta undir "eina með öllu".  Næsta skref er að sjóða nokkrar pylsur.  Til þess þarf aðeins kaffikönnu:

  Síðan er pylsa sett í pylsubrauð ásamt meðlæti.  Þetta er sett í plastbakka og selt í verslanir sem selja samlokur.  Þar sómir pylsan sér vel innan um langlokur,  horn,  pastabakka og slíkt. 

  Virkar þetta?  Kaupir fólk "eina með öllu" úr kæliborði verslana?  Já.  Þetta gengur vel í Frakklandi.  Ég sá það í verslunum í París. 

  Þar er pylsan seld með sinnepi, osti og einhverju svoleiðis.  Hérlendis þarf að hafa tómatsósu og lauk með.  Fyrir Akureyrarmarkað þarf að hafa rauðkál að auki.

Íslenskir þingmenn sluppu fyrir horn

  Samkvæmt frétt á mbl.is lentu fjórir íslenskir þingmenn í hrakningum er þeir ætluðu að taka þátt í fundi Vestnorræna ráðsins í Þórshöfn í Færeyjum.  Lending flugvélarinnar sem þeir voru í gat ekki lent í Þórshöfn vegna veðurs, samkvæmt fréttinni.  Flugvélin neyddist til að lenda í Haugasundi í Noregi í staðinn.

  Út af fyrir sig var það gæfa að flugvélin reyndi ekki lendingu í Þórshöfn.  Þar eru engin skilyrði fyrir flugvél að lenda.  Hvorki vegna veðurs né annarra lendingaraðstæðna.  Færeyingar hafa til fjölda ára varið yfir 1000 milljónum í leit að flugvelli utan Voga.  Án árangurs.  Eini flugvöllurinn í Færeyjum er í Vogum.  Þaðan þurfa farþegar að koma sér frá og til flugvallar í rútu,  leigubíl eða í bílaleigubíl (orðið bílaleigubíll er dálítið skrítið) ef þeir eiga erindi til Þórshafnar á annarri eyju,  Straumey.  Það hefði endað með ósköpum ef reynt hefði verið að lenda flugvél í Þórshöfn.   

Ætluðu til Færeyja en enduðu í Noregi

Wow sló í gegn

 

  Ég skrapp til Parísar í Frakklandi.  Fyrst og fremst til að gera úttekt á Wow flugfélaginu.  Í stuttu máli þá sló Wow í gegn hjá mér.  Ég hef ekki áður skemmt mér jafn vel í millilandaflugi.  Flugfreyjurnar hjá Wow fóru á kostum.  Stemmningin um borð var ólík því sem maður á að venjast.

  Öll þekkjum við flugáhöfn í svörtum og blásvörtum klæðnaði, virðugheit,  alvörugefnar upplýsingar frá flugstjóra og flugáhöfn.  Mónótónískar upplýsingar í hátalarakerfi um öryggisbúnað, flughæð, veður á áfangastað og annað í þeim dúr.

  Þið þekkið þetta:  "Það er flugstjórinn sem talar.  Við fljúgum í 30 þúsund feta hæð.  Veður í París er 25 stiga hiti, sól og bla, bla, bla."

  Farþeginn lokar eyrum fyrir svona og les dagblöð,  fer að ráða krossgátur og eða sofnar.

  Flugfreyjur Wow voru í öðrum gír.  Þær voru ærslafullar og "bulluðu" í jákvæðri merkingu.  Lásu ekki upp þurran texta af blaði heldur mæltu af munni fram galsafengnar lýsingar.  Þær lýsingar eru kannski ekki fyndnar í endursögn.  En þær voru verulega fyndnar í því andrúmslofti sem ríkti um borð.  Þetta voru ekki staðlaðir brandarar heldur spunninn texti á staðnum.  Brandararnir voru ekki þeir sömu á flugleið frá Íslandi til Parísar né á leið frá París til Íslands.  Ekki heldur voru brandarar endurteknir í texta á íslensku og á ensku. 

  Flugfreyjurnar voru í fanta stuði.  Dæmi:  Þegar lagt var af stað frá París oftaldi flugfreyja farþega.  Tala hennar passaði ekki við farþegalista.  Þá voru tvær flugfreyjur látnar endurtelja.  Að talningu lokinni passaði tala þeirra saman og passaði við farþegalista.  Viðbrögð flugfreyjanna voru að stökkva í loft upp og slá saman lófum í hárri fimmu (high five).

  Á leiðinni út til Parísar þuldi flugþjónn upp þessar helstu vanalegu upplýsingar um flugferðina.  Hann nefndi að flugtíminn væri 2 klukkustundir og 10 mínútur og bætti við:  "Ég hef aldrei á ævinni heyrt um jafn stuttan flugtíma til Parísar."

  Á bakaleiðinni frá París var galsinn ennþá meiri.  Það hljómaði líkt og verið væri að kynna Bítlana á svið þegar flugfreyja tilkynnti með tilþrifum:  "Og nú er komið að því sem allir hafa beðið eftir:  Við förum yfir öryggisbúnað um borð!"

  Við tóku upplýsingar um björgunarvesti,  súrefnisgrímur og það allt.  Þegar upp var talið hvað gerist ef flugvélin hrapar var nefnt að súrefnisgrímur falli ofan í sætin,  Það var útlistað þannig:  "Þá skaltu hætta að öskra og setja á þig grímuna.  Síðan aðstoðar þú börn þín við að setja á þau grímur."  Í ensku upplýsingunum var bætt við:  "Þegar þú hefur komið grímunni fyrir á þér og börnunum skaltu aðstoða ósjálfbjarga eiginmanninn við að koma grímunni á hann!"

  Þannig var öllum upplýsingum komið á framfæri af gáska.  Stundum jaðraði textinn við bull en í samhengi við alvörugefnar upplýsingar var þetta verulega fyndið.  "Ef við stöndum ykkur að því að tala í farsíma eða reykja um borð eruð þið í verulega vondum málum.  Nei, ég segi nú bara si sona.  Þetta er smá grín."

  Í upptalningu á öllu sem er bannað um borð (farsímanotkun,  reykingar...) slæddist með:  "Það er bannað að reyna að fella okkur í gólfið!"

  Þetta hljómaði verulega spaugilegt þegar það var fléttað inn í alvörugefnar upplýsingar en er ekki fyndið í þessum skrifaða texta mínum.  Það var þetta skemmtilega andrúmsloft og kátína sem skapaði góða stemmningu um borð.

  Flugfreyjurnar voru allar ungar (sem svo sem skiptir ekki máli) og klæddar smart fjólubláum klæðnaði.  Á flugvellinum í París skáru fjólubláar merkingar á flugvél Wow sig frá öðrum flugvélum.  Hressilegar og áberandi.  Nafnið Wow er sérkennilegt og óhátíðlegt.  Allt í stíl.  Fjörlegum stíl.

  Tímasetningar stóðust upp á mínútu.  Það var pínulítið sérkennilegt að flugvél Iceland Express fór í loftið örfáum mínútum á undan flugvél Wow.  Það færi betur á að möguleiki væri á að velja á milli flugs að degi til annars vegar og kvöldflugi hinsvegar.  Kannski er eitthvað hagkvæmt við að vera svo gott sem í samfloti.  Það getur verið hagkvæmt þegar um strætisvagna er að ræða í slæmri færð.  En varla í flugi.  Þó veit ég ekki með það. 

  Ég gef Wow hæstu einkunn.  Frábærar flugfreyjur og sérlega fyndnar.  100% tímaáætlun.  Frábær stemmning um borð.  Galsi út í eitt.  Góð tilbreyting frá formlegheitum og alvörugefnum upplýsingum.  Það var góð skemmtun að fljúga með Wow.  Tekið skal fram að ég þekki engan persónulega sem vinnur hjá Wow eða tengist því fyrirtæki.   

WOW air flýgur frá Akureyri

Hjá góðu fólki - og vondu

 

  Ég var að leita að gistingu í miðborg Parísar.  Úr vöndu var að velja.  Gestir gefa þeim mörgum svo góða einkunn og láta vel af starfsfólki.  Að lokum leist mér best á hótel sem heitir því hrífandi nafni Smart Place Paris.  Starfsfólk þess fær meðaleinkunnina 95,2%.  Ummæli eru á einn veg.  Svo ég taki aðeins þau 10 nýjustu:

 "Starfsfólk var virkilega indælt."

  "Einstaklega vinalegt og hjálplegt starfsfólk."

  "Starfsfólkið er vinsamlegt og aðstoðar þig þegar um er beðið."

  "Starfsfólkið var vingjarnlegt, þrátt fyrir að ábendingar þess um matsölustaði og fleira væru ómarkvissar." 

  "Mjög hjálplegt starfsfólk."

  "Starfsfólkið er vinsamlegt."

  "Afskaplega indælt fólk."

  "Starfsfólkið virtist kunna sitt fag."

  "Notalegt starfsfólk."

  "Frábærlega hjálplegt starfsfólk."

  Það þarf ekki að velja úr umsögnum til að fá þessar lýsingar.  Þær eru allar samhljóða.  Þetta er töluvert frábrugðið umsögnum gesta á Travel-Inn í Reykjavík.  Starfsfólkið þar fær meðaleinkunnina 4,8 á booking.com.  Mestu skiptir hvort gestir eiga samskipti við eigandann eða ekki.  Honum er lýst sem dónalegum og ósvífnum skapofsamanni.  Um hann má lesa með því að smella á þennan hlekk:

http://jensgud.blog.is/blog/jensgud/entry/1253295/ 

http://jensgud.blog.is/blog/jensgud/entry/1253128/

  Á booking.com má lesa eftirfarandi lýsingar fyrrverandi gesta Travel-Inn:

Stefanía (heldra par frá Ítalíu):  "Rúmföt voru blóðug.  Enginn starfsmaður finnanlegur. Fann sjálf hrein rúmföt og skipti um.  Eigandinn varð mjög reiður við mig. Handklæðin voru óhrein.  Eigandinn sagði að það væri aðeins andlitsfarði á þeim.  Ég skipti um handklæði. Eigandinn fór að gráta og bölvaði."

.

Yves (barnafjölskylda frá Belgíu):  "Starfsfólk er ekki vingjarnlegt, ekki hjálplegt, ekki áhugasamt.  Rúmföt voru óhrein og blóðug.  Herbergið var óhreint."

.

Carolyn (frá Edinborg):  "Þegar ég sá herbergið vildi ég afbóka það.  Eigandinn sagðist taka samt fulla greiðslu af kortinu mínu. Herbergið var neðanjarðar, rakt og ljóslaust.  Vegglampi virkaði ekki, kannski til að leyna hryllilegum rúmfötunum.  Á 20 ára ferðaflakki var þetta í fyrsta skipti sem ég varð að hylja koddann með jakkanum mínum!  Morgunverður er auglýstur frá kl. 7.30.  Ég þurfti að taka rútu kl. 8.30.  Þegar á reyndi var kominn miði á eldhúsdyrnar með skilaboðum um að morgunverður væri kl 8.30.  Ógeðslegur staður!

.

Pia (fjölskylda frá Danmörku):  "Bókið aldrei hér!"

.

Shuchen (frá Þýskalandi):  "Nánast allt í herberginu var í ólagi."

.

Francisco (vinahópur frá Spáni):  "Eigandinn var afar dónalegur í tvígang.  Í fyrra skiptið þegar uppgötvaðist að við höfðum verið sett í rangt herbergi.  Hann baðst ekki afsökunar þó að mistökin væru hans.  Í hitt skiptið reyndi hann að rukka okkur fyrir bílastæði,  sem eru gjaldfrí úti á götu."

.

Aina (heldra par frá Spáni):  "Við völdum þetta gistiheimili vegna þess að það er staðsett við hliðina á Umferðarmiðstöðinni og við þurftum að taka rútu snemma morguninn eftir. Við innritun var okkur tjáð að gistiheimilið væri ofbókað og við vorum flutt á annað gistiheimili í 1,5 km fjarlægð frá Umferðarmiðstöðinni."

.

Portúgali:  "Eigandinn er afskaplega ókurteis gamall kall. Rúmið var brotið. Ég var þarna í 4 daga og fékk aldrei hreint handklæði og herbergið var aldrei þrifið."

.

Vinahópur frá Þýskalandi:  "Baðherbergið var viðbjóður. Við urðum að stela klósettpappír frá öðru herbergi því enginn pappír var hjá okkur."

.

Englendingur: "Starfsfólk var ekki sérlega vingjarnlegt né ég boðin velkomin. Ég bókaði 2ja manna herbergi þó að ég væri ein. Mér var komið fyrir í pínulitlu eins manns herbergi. Herbergið sem ég bókaði stóð autt á meðan."

.

Ungt par frá Ísrael: "Af 6 gistiheimilum sem við dvöldum á í fríi okkar á Íslandi var þjónustan verst hér. Starfsfólkið er óvinsamlegt, þar með talinn forstjórinn. Þegar misskilningur kom upp varðandi greiðslu öskraði hann á okkur án þess að biðjast afsökunar." 

.

Bresk fjölskylda:  "Illa lyktandi herbergi, óhrein rúmföt, ómerkilegur morgunverður."

.

Finni:  "Götótt rúmföt, brakandi rúm, hörð dýna. Baðherbergisofninn bilaður. Sjónvarpið bilað."

.

Rússenskt par:  "Hrokafullt og dónalegt starfsfólk."

.

Lis (danskur vinahópur):  "Í tvö af þremur skiptum sem við fórum í morgunverð var unga stelpan sem sá um hann í þvílíkt brjáluðu skapi að það hálfa væri nóg."

.

   Það verður varla sagt um Travel-Inn að það gistiheimili sé Íslendingum og íslenskri ferðaþjónustu til sóma.  Þegar skemmtistað er hleypt af stokkum þarf vottorð og úttekt frá yfir 20 embættum.  Þetta eru Heilbrigðiseftirlit, brunavarnaeftirlit og allskonar.  Ég kann ekki nöfnin á þessu batteríum.  Þetta er allt mjög þungt í vöfum. Það tekur marga mánuði að afla allra þeirra vottorða sem þarf til.  Hvernig er þetta með gistiheimili?  Vegna Travel-Inn vakna spurningar um hvernig staðan er í þeirri deild.  Ég veit að það eru til Samtök gistihúsaeigenda.  Ég veit ekki hvert hlutverk þeirra er.  Einhver fleiri samtök eru til sem heyra undir ferðaþjónustu.  Eru gistihús eftirlitslaus?  Svo virðist vera.    

Merkilegar upplýsingar um mótorhjólafólk

 

  Þetta eru niðurstöður úr samantekt bresks tryggingarfélags.  Ég veit ekki hvað má heimafæra margar af þessu upplýsingum yfir á íslenska mótorhjólagarpa.  Reyndar snúa margir af þessum punktum ekki að breskum mótorhjólamönnum.  Þetta er forvitnileg samantekt frá ýmsum heimshornum.

- Flestir sem gera kröfu á hendur breskra tryggingarfélaga vegna mótorhjólaóhappa bera nafnið Davíð.  Næstir koma Páll (Paul) og Andrés (Andrew).

- Að meðaltali verða 78 mótorhjólaóhöpp í Bretlandi dag hvern.

- Á Deili á Indlandi eru konur á mótorhjóli undanþegnar því að bera hjálm.

- Sá sem tekinn hefur verið fyrir glannalegasta hraðakstur á mótorhjóli í Bretlandi var á 175 km hraða.  Mig minnir að ég hafi heyrt um meiri hraða hérlendis.

- Sá sem fer út í umferðina á mótorhjóli er 50 sinnum líklegri til að lenda í lífshættulegu umferðaróhappi en sá sem er í bíl.

- 2009 mótmæltu mótorhjólamenn í Nigeríu nýjum lögum sem skylduðu þá til að vera með hjálm.  Mótmælendur báru hjálma sem voru búnir til úr graskerum.  Dálítið kjánalegt.  

Gróft einelti í auglýsingu

  Mér er hlýtt til ritfangaverslunarinnar Griffils.  Þegar ég vann í Síðumúla verslaði ég oft í Griffli sem var þá einnig í Síðumúla.  Það var alltaf gaman að koma í Griffil.  Eigandinn skemmtilegur (við spjölluðum oft um Bítlana) og starfsfólkið þægilegt.  Vöruúrval fínt og ágæt verð.  Svo urðu eigendaskipti og verslunin flutt niður í Skeifu.  Ég held - en er ekki viss - að eigendaskipti hafi orðið fleiri. 

  Núna auglýsir Griffill að ég kaupi skólavörur í Griffli.  Auglýsingarnar hefjast á orðunum "Þú kaupir skólavörurnar í Griffli."  Þetta er ekki rétt.  Ég kaupi engar skólavörur.  Hvorki í Griffli né annars staðar.  Mér er svo sem alveg sama um þessa röngu fullyrðingu.  Verra þykir mér að í næstu setningu er fullyrt að sonur Egils versli ekki í Griffli heldur borgi meira fyrir skólavörur annars staðar.  Svo er spurt:  "Hvað er að syni Egils?"

  Sonur Egils kaupir skólavörur í ritfangaverslunum í sínu hverfi.  Bensín er dýrt og væri fljótt að éta upp sparnað af því að fara langt yfir skammt til að kaupa ódýrari skólavörur.  Þar fyrir utan er því ranglega haldið fram í auglýsingum að Griffill sé alltaf ódýrastur.

  Samkvæmt nýjustu verðlagskönnun ASÍ eru tvær ritfangaverslanir ódýrari en Griffill.  Sonur Egils hefur sjálfur sagt mér að 12 trélitir í pakka sem hann keypti í Europrice kosti 499 kr. en 699 kr. í Griffli.  Á sama stað keypti hann stílabækur á 180 kr. sem eru ódýrastar á 285 kr. í Griffli.

  Það er ekkert að syni Egils.  Þetta er skýr drengur og klár.  Hann má þola það að daglega dynja á honum og skólasystkinum hans auglýsingar frá Griffli um að það sé eitthvað að honum.  Þetta er einelti.   

Tónlistarhátíðin Gæran að hefjast!

 

  Á fimmtudaginn (21. ágúst) hefst tónlistarhátíðin Gæran á Sauðárkróki.  Síðan tekur við stanslaust fjör fram á sunnudagsmorgunn.  Hver stórstjarnan tekur við af annarri,  allt verður á suðupunkti og Krókurinn mun iða af lífi og fjöri.  Meira að segja færeyska álfadrottingin,  Eivör,  treður upp og verður með splunkunýjan og flottan disk, Room, í farteskinu.  Þessi magnaði diskur kemur ekki út á heimsmarkað fyrr en í næsta mánuði.  Íslendingar fá forskot á sæluna af því að við erum í klíkunni.

  Gildran og Dimma afgreiða rokkið meðal annarra.  Brother Grass afgreiðir blúgrassið (sjá:  http://www.jensgud.blog.is/blog/jensgud/entry/1249208/ ).  Contagen Funural sjá um blúsinn.  Geirmundur Valtýs sér um skagfirsku sveifluna.  Skytturnar rappa.  Dúkkulísurnar syngja um svart-hvíta hetju og sápuóperuna Dallas (sem er víst komin á dagskrá hjá Stöð 2).  Þá er fátt eitt upp talið.

  Miðinn fyrir alla dagana kostar aðeins 5000 kall.  Það er eins og inn á staka hljómleika í Hörpu og víðar.  Miðasala er á midi.is og Kaffi Króki.

  Dagskrá Gærunnar hefst klukkan 20.00 á fimmtudaginn á Mælifelli við Aðalgötu.  Þar koma fram eftirtaldir sólóskemmtikraftar:   

* Dana Ýr
* Sóla og Sunna
* Sveinn Rúnar
* Þorgerður Jóhanna
* Fúsi Ben og Vordísin
* Myrra Rós
* Gillon
* Joe Dúbíus
* InkCity

Á föstudeginum spilar þessi fríði flokkur:

* Rock to the moon
* Brother Grass
* Sverrir Bergmann og Munaðarleysingjarnir
* Eldar
* Gildran
* Hide your kids
* Eivör Pálsdóttir
* Sing for me Sandra
* Dimma
* Hljómsveit Geirmundar Valtýssonar

Ball með Gildrunni á Mælifell strax eftir að hljómleikadagskrá lýkur.

Á laugardeginum sjá eftirtaldar hljómsveitir um herlegheitin:

* Art Factory Party
* Nóra
* Bee Bee and the Bluebirds
* The Wicked Stragners
* Dúkkulísurnar
* Lockerbie
* Death by toaster
* Skúli Mennski
* Skytturnar
* Contalgen Funeral

Ball á Mælifell strax eftir að hljómleikadagskrá lýkur.

Það er gaman á Króknum.  Skagfirðingar kunna að skemmta sér og öðrum og sletta úr klaufunum flestum betur.