Veitingahússumsögn: Skötuveisla

-  Staður:  Studio 29

-  Staðsetning:  Snorrabraut 29

-  Réttur:  Skötuveisla

-  Verð:  1500 kr.

-  Einkunn:  **1/2  (af 5)

  Studio 29 er á horni Laugavegs og Snorrabrautar.  Þetta er millifínn veitingastaður.  Þar er nú boðið upp á skötuveislu alla daga fram til klukkan 9 á kvöldin.  Gestir skammta sér sjálfir af hlaðborði á diska.  Í boði er kæst beinhreinsuð skata,  saltfiskur,  rófur,  kartöflur,  hamsaflot,  hangiflot og rúgbrauð með smjöri.  Fyrir þetta eru greiddar 1500 krónur.  Það er gott verð.  Maturinn er einnig góður.  Nema skatan.  Hún er ansi bragðdauf.  Eiginlega bragðlaus.  Ég fæ mér ekki aftur skötu þarna.  Hinsvegar er alveg upplagt að fá sér saltfisk og meðlæti. 

  Fyrir þá sem hræðast kæsta skötu er ágætt að prófa hana í Studio 29.  Hún bítur ekki. 

  Hér má sjá umsögn um skötuveislu á Sjávarbarnum:  http://www.jensgud.blog.is/blog/jensgud/entry/1211935/

Óhuggandi sértrúarsöfnuður

  Íslendingar hafa löngum undrast tíð grátköst þátttakenda í bandarískum raunveruleikasjónvarpsþáttum.  Táraflóðið í þeim þáttum kemst þó hvergi með tær þar sem n-kóreskir grátkórar hafa hæla þessa dagana.  Við fráfall Kims Jong-il,  leiðtoga landsins,  hefur gripið um sig óhemjuleg móðursýki.  Þegnarnir hágráta örvilnaðir.

  Vegna einangrunar frá umheiminum,  stöðugrar innrætingar (heilaþvottur),  ofurstrangrar ritskoðunar og allskonar bulls eru íbúar N-Kóreu 20 milljón manna sértrúarsöfnuður.  Öfgafullur sértrúarsöfnuður þar sem guðirnir eru Kim-feðgarnir.  Söfnuðurinn trúir því að þegar Kim Jong-il fæddist þá hafi 2 eða 3 regnbogar myndast yfir heilögu fjalli, allir fuglar heims tekið upp á því að syngja á kóresku;  skær leiðarstjarna hafi birst á himni.  Hún leiddi 3 vitfirringa úr austri að hrörlegum bjálkakofa.  Þar lá í einskonar jötu nýfæddur Kim Jong-il.  Vitfirringarnir færðu honum reykelsi,  myrru og bull að gjöf.

   Skömmu síðar og fram á dauðadag gerði Kim Jong-il fátt annað en drekka koníak og stríplast.  Þess á milli horfði hann á hluti.  Það eru til heilu ljósmyndasöfnin sem sýna myndir af honum horfa á hluti.  Allt frá skóm til sólgleraugna.  Á hátíðisdögum horfði hann á kvikmyndir um Rambó.  Þannig að ekki var kvikmyndasmekkurinn góður.  Hinsvegar samdi hann flestar eða allar bestu óperur heimssögunnar.  Fyrir örfáum árum fann hann upp spennandi skyndibita.  Rétturinn er svo einfaldur að allir geta matreitt hann:  Fyrst er hamborgarakjöt steikt beggja vegna.  Síðan er það lagt á hamborgarabrauð.  Hamborgarasósu er sprautað yfir og efri sneið hamborgarabrauðsins lögð ofan á.  Kosturinn við þennan byltingarkennda skyndibita er sá að hvorki þarf að brúka hníf né gaffal.  Það sparar uppvask.

  Kim fann einnig upp hátíðarútgáfu af þessum nýja rétti.  Hún er ekki fyrir almenning.  Aðeins fyrir útvalda sem komast yfir ferskt grænmeti og fleira.  Í hátíðarútgáfunni er einnig tómatsósa,  sinnep,  tómatar,  hrár laukur,  steiktir sveppir,  paprika og salatblað.  Hér er opinbera ljósmyndin af hátíðarréttinum:

Alþýðurétturinn er ekki síður girnilegur.  Galdurinn felst í því að bruðla ekki með hamborgarasósuna og fara sparlega með kjötið. 

   

  Því hefur verið spáð í n-koreskum fjölmiðlum að þessi frumlegi skyndibiti Kims eigi eftir að njóta vinsælda utan N-Kóreu.

  Um daginn kynntist ég í Noregi s-kóreskum fyrrverandi hermanni.  Hann stóð á sínum tíma vakt á landamærum kóresku ríkjanna.  10 metrar skilja landamæravörsluna að.  Hann kynntist ágætlega n-kóresku hermönnunum og átti vinsamleg samskipti við þá.  Þó eru nú einhver átök þarna á milli án þess að umræddur flæktist inn í það.  Hann kynntist aðeins glaðværu hlið á varðstöðunni.  Hermenn beggja liða göntuðust og grínuðust í léttum nótum og varð vel til vina.  Enda áttu sumir ættingja hinu megin víglínunnar. 

  Þessi kunningi minn fór meðal annars í fjallaferð með n-kóreskum hermönnum þarna við landamærin.  Þetta var skemmtiferð á sama tíma og knattspyrnulið þeirra öttu kappi á,  ja,  gott ef ekki Ólympíuleikum eða heimsmeistarakeppni eða eitthvað svoleiðis.  N-kóreska liðið koltapaði.  N-kóresku hermennirnir brustu í grát.  Þeir hágrétu.  S-kóresku hermennirnir reyndu að útskýra fyrir þeim að þarna væri aðeins um léttan samkvæmisleik að ræða.  Skemmtunin gengi út á að vera með og hafa gaman af.  Úrslitin væru aukaatriði.  Huggunarorðin náðu ekki í gegn.  Þeir n-kóresku voru óhuggandi.  Það var ofar þeirra skilningi að margblessað knattspyrnulið þeirra gæti farið halloka í fótboltaleik.

  Annað:  Kóreski drengurinn keðjureykti Kent sígarettur.  Á fílter sígarettnanna er táknmynd af lykli.  Til að hægt sé að reykja sígaretturnar þarf að bíta fast í lykilinn.  Þá heyrist smellur.  Án þess að rjúfa læsinguna er ekki hægt að reykja sígarettuna.  Þetta er til þess að ungir óvitar geti ekki reykt sígaretturnar.  Sinn er siður í hverju landi.

  Til gamans má geta að kóreski kunningi minn hefur verið ólatur við að senda mér í tölvupósti ljómandi skemmtilegt kóreskt pönkrokk og dauðarokk.

Fiskurinn var svooona stór!

 

.

Kim Jong-il látinn

Fésbókin virkar! Stolinn bíll fannst með hraði!

  Í nótt fletti ég upp á Fésbókinni.  Mér lék forvitni á að vita hvað Fésbókarvinir væru að skrifa þar,  pósta inn myndböndum eða öðru.  Þar sá ég að Guðmundur Benediktsson,  hress og nýrekinn frá útvarpinu,  var að deila ljósmynd af stolnum bíl.  Í gærkvöldi hafði óprúttinn stolið bíl í eigu Agnars Más Magnússonar.

  Mér þótti sjálfsagt að leggja leitinni lið.  Ég stökk út á götu og skimaði eftir bílnum.  Hann var hvergi sjáanlegur.  Þá deildi ég upplýsingunum áfram inn á mína Fésbókarsíðu.  Nokkrum mínum síðar kíkti Ari Egilsson á síðuna.  Hann sá auglýsinguna og hóf þegar í stað að skima eftir bílnum.  Og kom auga á hann við Hallveigarstaði í Garðastræti.  Ari hringdi í Agnar Má (þó klukkan væri 2 í nótt).  Eftir smá stund var löggan mætt og skömmu síðar Agnar Már.  Urðu þar fagnaðarfundir.

.

  Það má draga lærdóm af þessu:  Fésbókin virkar.  Það eru kannski ekki margir sem lesa færslur hvers og eins.  En þegar fólk deilir upplýsingum þá verða margföldunaráhrif.  Á örfáum klukkutímum sjá þúsundir og aftur þúsundir upplýsingarnar.  Jafnvel 100 þúsund manns.  Eða 200 þúsund.  En ekki milljón.  Sem er allt í lagi.  Það er nóg að 100 - 200 þúsund leiti að stolnum bíl.

  Svo er bara gaman að þessi litla aðgerð,  að smella á takkann "Deila",  skuli hafa leitt til þess að stolinn bíll fannst með hraði.

Jólarokk

  Fyrir nokkrum dögum leyfði ég ykkur að heyra bráðskemmtilegt jólalag,  Pakkaþukl,  með nettum þungarokkskeim.  Það vakti gríðar mikla lukku og kom mörgum í rétta jólagírinn.  Sem var afar heppilegt á þessum árstíma.  Þeir sem misstu af því eða vilja rifja dæmið upp geta smellt á þessa slóð:  http://www.jensgud.blog.is/blog/jensgud/entry/1210619/  Þar er einnig hægt að komast í upplýsingar um flytjendur.

  Það er ekki hægt að láta staðar numið þarna.  Hér fyrir ofan er meira Pakkaþuklsrokk.  Að þessu sinni er sungið um raunir jólasveinsins Stúfs.  Svo er bara að taka undir í viðlaginu:  "Við viljum gjöf!"  Það er rífandi stemmning.

Þrjú börn villtust í jólaskóginum

Eivör, Kór Langholtskirkju, Graduelakórinn...

.

- Viðburður:  Jólasöngvar í Langholtskirkju

- Flytjendur:  Kór Langholtskirkju,  Graduelakór Langholtskirkju,  einsöngvarar,  hljóðfæraleikarar og Táknmálskórinn

- Stjórnandi:  Jón Stefánsson

- Einkunn:  ****

.

  Það eru þrennir hljómleikar eftir:  Tveir í kvöld og lokahljómleikarnir á sunnudag.

  Dagskráin er fjölbreytt og spannar hátt í hálfan annan tíma (með hléi).  Á efnisskrá eru allt frá laufléttum þekktum jólapoppssöngvum (Ljósadýrð loftin fyllir,  Jólasnjór - Meiri snjó!  og fleiri) til hátíðlegustu jólasálma.  Þar á milli er m.a. boðið upp á bandarískan negrasálm (Go, Tell It On The Mountain  með íslenskum texta),  samsöng með áheyrendum á þekktum jólalögum,  djössuð lög (m.a.  Hvít jól) og frumsamda jólasöngva eftir Eivöru.  Flytjendur eru hátt í hundrað.  Þar af þrír kórar:  Kór Langholtskirkju,  Graduelakór Langholtskirkju og Táknmálskórinn.

  Sérviskulegur músíksmekkur minn og lauflétt popplög eiga sjaldan samleið en skemmta öðrum þeim mun meira.  Fyrir mig bættu hinsvegar hátíðlegri jólasálmarnir um betur.

  Einn af hápunktum hljómleikanna er magnþrunginn flutningur Ólafar Kolbrúnar Harðardóttur,  hljómsveitar og kóra á  Ó, helga nótt.  

  Andri Björn Róbertsson er eini karlkyns einsöngvarinn.  Hann syngur hljómfagran bassa-barítón.  Kvenkyns einsöngvararnir eru 7.

  Á engan er hallað þó að Eivör sé sögð stjarna hljómleikanna.  Jólasöngvar hennar tveir eru í flokki með hennar best sömdu.  Er þó af nógu að taka í þeim efnum.  Hátíðleg umgjörðin í Langholtskirkju spilar inn í og liðsinni kóranna.  Þar fyrir utan hefur Eivör einstaklega góðan og sterkan sviðsljóma.  Svo ekki sé minnst á blæbrigðaríka,  stóra og fagra söngröddina.  

  Auk frumsömdu söngvanna syngur Eivör  Pie Jesu  eftir Andrew Lloyd Webber.  

  7 manna hljómsveitin er sparlega notuð. Yfirleitt er ekki spilað á nema 2 - 3 hljóðfæri í hverju lagi.  Það undirstrikar fjölbreytileikann í tónlistinni.  Orgel er stundum í aðalhlutverki.  Í öðrum tilfellum eru það tvær flautur eða harpa eða píanó og Eivör spilar á kassagítarinn sinn.  

  Táknmálskórinn setur svip á hljómleikana og minnir okkur á þau forréttindi að heyra.   

  Einu atriði þarf að kippa í lag:  Það snýr að heitu súkkulaði sem boðið er upp á í hléi og piparkökum.  Þannig háttar til að veitingarnar standa á þremur langborðum í hliðarsal.  Fyrstir hrúgast að borðum þeir sem sitja niðri.  Það er þröngt á þingi.  Þegar þeir sem sátu á svölum komust að voru allir súkkulaðikönnurnar tómar.  Þær voru þó fjöldamargar.  En dugðu ekki fyrir fulla kirkju (560 sæti).  Heyra mátti grát og gnístan tanna þegar svalagestir gerðu örvæntingafulla en árangurslausa leit að könnu með heitu súkkulaði.  Þessi lýsing er kannski full yfirdrifin hjá mér og seinni hluti hljómleikanna varð áreiðanlega til þess að þeir súkkulaðilausu tóku gleði sína á ný.  Allir fóru sælir og glaðir heim af hljómleikunum.  Það þarf samt að gera ráðstafandir til að allir fái heitt súkkulaði í hléi.    

  Það er ekki hægt að pósta hér inn myndbandi af Eivöru og Gradúelakórnum flytja  Jólaminningu.  Engu að síður er mögulegt að sjá og heyra það með því að smella á þennan hlekk:  http://www.youtube.com/watch?feature=player_embedded&v=YDrGYqc_eMw

Veitingahússumsögn: Skötuveisla

- Veitingastaður:  Sjávarbarinn

- Staðsetning:  Grandagarði 9

- Réttur:  Skötuveisla

- Verð:  2490

- Einkunn: ***** (af 5)

.

  Í gær (fimmtudag) þjófstartaði Magnús Ingi Magnússon,  matreiðslumeistari,  skötuveislu á Sjávarbarnum:  degi fyrir auglýsta dagsetningu.  Kæsingin á skötunni er milli sterk.  Óvanir þurfa samt ekki að hræðast kæsta bragðið.  Kúnstin er að stinga upp í sig hlutfallslega stórum bita af rófu,  kartöflu,  rófustöppu eða öðru af margvíslegu meðlæti ásamt litlum skötubita.  Ferskt og bragðgott rúgbrauð,  bakað á staðnum,  mildar sömuleiðis bragðið.  

  Þeir sem kjósa að láta skötuna rífa í bragðlaukana fá sér hlutfallslega stærri bita af skötunni og skerpa á með hnoðmör. 

  Það er einnig hægt að velja um tvær tegundir af skötustöppu.  Það er hvítlaukskeimur af annarri þeirra. 

  Skötuveislan er hluti af veglegu og fjölbreyttu hlaðborði.  Þar er á boðstólum meðal annars saltfiskur,  plokkfiskur,  graflax,  grafinn karfi,  síldarréttir,  allra handa salöt,  sósur,  hamsar og margt margt fleira. Útilokað er að komast yfir að bragða á öllu úrvalinu í einni heimsókn.  Þetta er alvöru veisluhlaðborð.  Innifalið í hóflegu verði er afskaplega ljúffeng sjávarréttasúpa.  Bragðið er snarpt og frábrugðið öðrum sjávarréttasúpum.  Það er að segja þekktum og algengum sjávarréttasúpum.  Í þessari eru hnetur og fleira sem gerir hana framandi og spennandi. 

  Skötuhlaðborðið er á borðum í hádegi og á kvöldin (lokað á sunnudaginn).  Það er dásamleg tilbreyting frá jólahlaðborðunum að komast þetta tímanlega í skötuveislu. 

  Sjávarbarinn er í millifínum klassa.  Sem er besti kostur.  Borð eru blessunarlega laus við þykka taudúka,  munnþurrkur úr sama efni,  kertaflóð,  blóm í vasa og þjóna hlaupandi á milli borða til að spyrja hvort allt sé í lagi.  Matreiðslumeistarinn hefur aftur á móti áhuga á að vita hvernig viðskiptavinum líkar kræsingarnar.  Sennilega tekur hann mark á athugasemdum því að einhverjar breytingar gerir hann jafnan á skötuveislunni á milli ára. 

  Málverkasýning Bjarmars Guðlaugssonar upp um alla veggi rammar glæsileika skötuveislunnar rækilega inn.  Hún (bæði málverkasýningin og skötuveislan) er góð skemmtun.

  Ólíklegt er að á suðvesturhorninu finnist veitingastaður sem býður upp á mikið ódýrari skötuveislu.  Og pottþétt enginn sem býður upp á jafn íburðarmikið og föngulegt skötuhlaðborð og Sjávarbarinn.

Óvenjulegt markaðsátak 365

  365 miðlar eru stærsta fjölmiðlasamsteypa landsins.  Þeir reka meðal annars Stöð 2,  Stöð 2 Sport,  Stöð 2 Extra,  Stöð 2 Bíó,  Nova TV,  Bylgjuna,  FM957 og nokkrar fleiri útvarpsstöðvar,  netmiðilinn Vísi og gefa út Fréttablaðið.  Skráður eigandi er Ingibjörg Pálmadóttir,  eiginkona Jóns Ásgeirs Jóhannessonar,  lengst af kenndan við Baug. 

  Víkur þá sögu að markaðsráðgjafa 365 miðla,  Kristjáni Óla Sigurðssyni.  Samkvæmt opinberri starfsmannastefnu 365 miðla er leitast við að ráða starfsmenn sem eru frumlegir og útsjónarsamir,  traustir og áreiðanlegir.

  Kristján Óli stendur bærilega undir því að vera frumlegur og útsjónarsamur.  Um það vitnar nýjasta markaðsátak hans.  Það felst í því að hann kemur fram undir nafni 365 og leggst af fullum þunga á DV með kröfu um að blaðið birti nafn 18 ára stelpukrakka sem kærði mann á fertugsaldri og konu fyrir nauðgun. 

  Frumleikinn í gjörningnum er margþættur.  Fram til þessa hefur fólk ekki haft hugmyndaflug til að velta fyrir sér hvort undir einhverjum kringumstæðum eigi fjölmiðlar að birta nafn stelpukrakka sem kærir hópnauðgun.  Það þarf frumleika og kaldrifjaðar hvatir til að láta sér detta þetta í hug.  Hvað þá að krefjast þessa af dagblaði.

  Í annan stað er frumlegt af markaðsráðgjafa stærstu fjölmiðlasamsteypu landsins að krefjast þess af litlu dagblaði úti í bæ að framkvæma lágkúruna. 

  Útsjónarsemin liggur í einhverju sem ég átta mig ekki á.  En næsta víst er að þetta markaðsátak hlýtur að skila fjölmiðlum 365 fjölmennum hópi nýrra áskrifenda og ennþá fjölmennari hópi auglýsenda.   

Buxnalaus lögreglumaður

  Í um það bil þrjá áratugi hefur setið í hausnum á mér sjón sem bar fyrir augu fyrir þetta löngu.  Og ekki aðeins það sem ég sá heldur enn fremur spurningin um það hvað var í gangi.  Þannig var að snemma morguns mætti ég í strætisvagnamiðstöðina við Hlemm.  Þar beið ég eftir strætisvagni og við blasti Lögreglustöðin á Hverfisgötu,  gengt strætóstöðinni.  Fjöldi annarra var á staðnum í sömu erindagjörðum.  Skyndilega kom kurr á hópinn.  Að lögreglustöðinni gekk lögregluþjónn í fullum skrúða,  með korða (eða kannski frekar kylfu við belti) og hatt.  Hann var einnig í sokkum og skóm.  En buxnalaus.  

  Á þessum árum var lögregluskrúðinn virðulegri og valdmannslegri en í dag.  Og einhvern veginn allt sem að lögreglu snéri var formfastara og stífara.  Fyrir bragðið var sjónin súrrealískari sem því nemur.

  Ég tók ekki nógu snemma eftir lögregluþjóninunum til að vita hvort hann kom á bíl að Lögreglustöðinni eða gangandi lengri leið.  

  Einhverra hluta vegna hef ég grun um að maðurinn hafi einfaldlega verið utan við sig og gleymt að fara í buxurna.  Aðrir möguleikar koma til greina.  Til að mynda að óhapp hafi hent buxurnar á leið mannsins til vinnu;  þær rifnað utan af honum er hann klöngraðist yfir gaddavírsgirðingu eða eitthvað slíkt.

Nakinn lögreglumaður í ofsaakstri

Bestu plötur ársins 2011 - III. hluti

  Nú streyma í hús áramótauppgjör hinna ýmsu popptónlistartímarita.  Einkum er forvitnileg niðurstaða þeirra um það hvaða plötur,  útgefnar á árinu,  skara fram úr.  Ég hef þegar birt á þessum vettvangi lista bresku tónlistarblaðanna Uncut og New Musical Express,  ásamt danska blaðinu Gaffa.  Í tilfelli Gaffa og NME byggir niðurstaðan á mati lesenda.  Í Uncut eru það gagnrýnendur og aðrir blaðamenn blaðsins sem settu listann saman. 

  Um þetta má lesa með því að smella á eftirfarandi hlekki:  

http://www.jensgud.blog.is/blog/jensgud/entry/1208332/ 

http://www.jensgud.blog.is/blog/jensgud/entry/1210264/

.

 Hér er áramótauppgjör annars af stóru bandarísku poppblöðunum,  Spin (hitt er Rolling Stone)

.

1. Fucked Up, David Comes to Life

.

.

2. PJ Harvey, Let England Shake
3.EMA, Past Life Martyred Saints
4.Kurt Vile, Smoke Ring for My Halo
5.Girls, Father, Son, Holy Ghost
6.Danny Brown, XXX
7.The Rapture, In the Grace of Your Love

8.G-Side, The One...Cohesive
9.Wild Flag, Wild Flag
10.Lykke Li, Wounded Rhymes
11.Stephen Malkmus and the Jicks, Mirror Traffic
12.Telekinesis, Desperate Straight Lines
13.The Weeknd, House of Balloons/Thursday
14.Bon Iver, Bon Iver
15.The Men, Leave Home
16.Das Racist, Relax
17.Dum Dum Girls, Only in Dreams
18.SBTRKT, SBTRKT
19. M83, Hurry Up, We're Dreaming
20.Shabazz Palaces, Black Up
21.Youth Lagoon, The Year of Hibernation
22.Drake, Take Care
23.Iceage, New Brigade
24.Deer Tick, Divine Providence
25.Cass McCombs, Wit's End/Humor Risk
26.Liturgy, Aesthethica

27.Big K.R.I.T., Return of 4Eva

28.Tim Hecker, Ravedeath, 1972
29.Lady Gaga, Born This Way

30.tUnE-yArDs, w h o k i l l

31.Yuck, Yuck (Deluxe Edition)
32.Hayes Carll, KMAG YOYO (& other American stories)

33.Fleet Foxes, Helplessness Blues
34.St. Vincent, Strange Mercy
35.Washed Out, Within and Without
36.The Black Keys, El Camino
37.The Field, Looping State of Mind
38.Zola Jesus, Conatus
39.Beyonce, 4
40.Jay-Z and Kanye West, Watch the Throne

  Svo er það listi bandaríska netmiðilsins About.com Alternative Music: 

1. Julianna Barwick'The Magic Place'

.

2. Panda Bear 'Tomboy'

3. Gang Gang Dance 'Eye Contact'

4. EMA 'Past Life Martyred Saints'

5. PJ Harvey 'Let England Shake'

6. Tune-Yards 'Whokill'

7. Destroyer 'Kaputt'

8. Bon Iver 'Bon Iver'

9. James Blake 'James Blake'

10. Active Child 'You Are All I See'

39. Björk 'Biophilia'

Einkennileg uppákoma leigubílstjóra

  Ég fékk karöflu í skóinn í morgun.  Það lagðist frekar illa í mig.  Ég taldi mig hafa hagað mér vel.  En svo tók ég gleði mína á ný þegar ég fór að fá mér matarbita á Umferðarmiðstöðinni.  Í anddyrinu mættust tveir vel fullorðnir eldri leigubílstjórar í góðum holdum.  Annar sagði:  "Ég var að frétta af því að þú hafir setið undir gamalli konu í gær á tröppum í Hlíðunum."

  Hinn:  "Helvítið hann Guðmundur.  Ég sagði honum þetta í trúnaði.  Hann er búinn að kjafta þessu út um allt."

  Leigubílstjóri #1:  "Hvað var í gangi?"

  Hinn:  "Ég var að hjálpa fótafúinni gamalli og feitri kellingu út úr bílnum.   Svo datt ég aftur fyrir mig með hana í fanginu á tröppurnar.  Ég er sjálfur svo slæmur til fótanna að ég gat mig hvergi hreyft.  Gamla konan ekki heldur.  Ég sat þess vegna með hana í fanginu á tröppunum í töluverðan tíma þangað til að gangandi vegfarandi hjálpaði okkur á fætur.  Þetta var afskaplega vandræðalegt og ekkert til að gera grín að." 

Bráðfyndnar og undarlegar gamlar ljósmyndir

  Tímarnir breytast og mennirnir með.  Það sem þótti eðlilegt og var algengt fyrir 100 árum kemur undarlega fyrir sjónir í dag.  Sumt meira að segja svo undarlega að ómögulegt er að átta sig á því hvað var í gangi.  Hér eru nokkur skemmtileg sýnishorn.  Á myndinni hér fyrir ofan má sjá brosandi barn í tágarkörfu.  Þetta var fyrir daga fjöldaframleiddra tauburðarrúma eða hvað það allt heitir í dag.

  Í dag hneyksla ljósmyndir af palestínskum og ísraelskum börnum með eftirlíkingar af drápstólum í hönd.  Á fyrri hluta síðustu aldar taldist það vera fallegt og þjóðernislegt fyrir vestan haf að stilla börnum upp með drápstól í annarri hendi og fánann í hinni.  Eða beina byssunni að öðrum börnum. 

???

???

  Skoskur kvenboxari?

  Um miðja síðustu öld voru börn gerð fullorðinslegri á myndum með því að stinga sígarettu í munnvikið á þeim.

.

  Reffileg feðgin.  Í dag væri þeim stillt öðru vísi upp í myndatöku.

  Uppstillingin er sígild.  Það er bara textinn á tunnunni sem vekur upp spurningu?  "Við ættum að hafa áhyggjur."

1001 gamansaga

  Bókmenntaáhugi Íslendinga er aðdáunarverður.  Það hefur þó lengi háð þeim að þurfa að vinna á daginn og stunda heimilisstörf á kvöldin.  Nú hefur verið bætt úr þessu vandamáli.  Skilningsríkir verslunareigendur eru farnar að hafa búðirnar opnar um nætur.  Menn geta því sinnt bókainnkaupum alla nóttina.  Sem þeir eru einmitt duglegir við.  Ég minni í leiðinni á háspennubókina  Djöflanýlenduna  sem gerist að hluta á Íslandi.

  Í fyrra kom út bráðskemmtileg bók sem heitir  1001 gamansaga.   Það er Helgi Seljan sem tók sögurnar saman.  Þær eru flestar sannar.  Reyndar vantar upp á hvað gaman er að hlusta á Helga Seljan segja sjálfan frá.  Hann er einstaklega skemmtilegur sögumaður.  Sögurnar lifna við þegar hann segir frá.  Það er upplagt að lauma bókinni með í jólapakkana.  Hér eru nokkrar sögur úr henni:

Ekkjan kom til listmálara og bað hann að mála mynd af

eiginmanninum sáluga. Hún átti bara gamla, óskýra mynd

af honum, en fór að lýsa honum eins vel og hún gat. Svo

var myndin máluð og konan kom til að líta á hana: „Mikið

er þetta góð mynd af honum en mikil ósköp hefur hann

samt breyst.“

 

Dýralæknir var kallaður til gamallar konu sem hafði

áhyggjur af hvítu kisunni sinni sem virtist eitthvað lasin.

Dýralæknirinn sagði henni að kisa væri komin að því

að gjóta, en sú aldraða sagði það ekki geta verið, kisu

hleypti hún aldrei út og enginn högni hefði komið nálægt

henni. Í sama bili gekk bröndóttur fress inn á gólfið og

dýralæknirinn sagði þarna komna skýringuna. Þá sagði

gamla konan: „Nei, það getur ekki verið, þetta er bróðir

hennar.“

 

Þeir komu að kistulagningu föður síns og kom saman

um að karl faðir þeirra þyrfti einhvern farareyri. Tveir

bræðranna lögðu hvor sinn þúsundkallinn í kistuna, en

sá þriðji sagðist bara vera með ávísanahefti, skrifaði

ávísun upp á þrjú þúsund, lagði í kistuna og gaf sér báða

þúsundkallana til baka.

 

Dómarinn: „Þú ert sakaður um að hæðast að lögreglunni.

Hverju svararðu því?“ „Jú, herra dómari, lögreglumaðurinn

hellti sér svoleiðis yfir mig með óbótaskömmum og

svívirðingum að mér fannst eins og konan mín væri að tala

við mig og þá sagði ég ósjálfrátt: Já, já, elskan.“

 

Trúboðinn, fullorðin kona, kemur inn á fjölmennan

vinnustað með plastbox undir hendinni og spyr þann fyrsta

sem hún hittir: „Þekkir þú Jesúm, vinur minn?“ Maðurinn

kallar inn í vinnusalinn. „Er einhver Jesús sem vinnur hér?

Mamma hans er komin með nestisboxið hans.“

 

  Ég ítreka og minni í leiðinni á háspennubókina  Djöflanýlenduna  sem gerist að hluta á Íslandi.

Bækur seljast upp á nóttunni

Íslenskt jólarokk

  Frumsamin íslensk jólarokklög eru ekki á hverju strái.  Reyndar ótrúlega sjaldgæf með hliðsjón af því að jólin njóta vinsælda og margir Íslendingar hafa unun af rokkmúsík.  Hér er skemmtilegt dæmi um íslenskt jólarokk.  Flytjendur eru:  Þórður Bogason (söngvari Foringjanna,  Þreks,  Skyttnanna,  Rickshow),  Gústi (trommari Start og EC),  Guðmundur Höskuldsson (gítarleikari EC og Álbandsins),  Vignir Ólafsson (gítar) og Kjartan Guðnason (bassi).  Reyndar er þetta frekar rólegt rokklag.  Enda engin ástæða til að vera með mikinn æsing um jólin.

Frábær útvarpsþáttur: Plötuskápurinn á rás 2

  Rás 2 hefur lengi búið að þeirri gæfu að þar hafa safnast saman dagskrárgerðarmenn með góða þekkingu á tónlist og hæfileika til að miðla sínum fróðleiksmolum til hlustenda.  Nægir að nefna Óla Palla,  Guðna Má,  Andreu Jónsdóttur,  Magnús Einarsson,  Frey Eyjólfs,  Kristján Pálsson,  Matta,  Þossa,  Ásgeir Eyþórs,  Arnar Eggert og marga sem ég er að gleyma í augnablikinu.  Nema þó ekki snillingnum Andra Frey og Gunnu Dís.  Móðir mín á níræðisaldri sagði mér að hún sé alveg "hooked" á Þessum morgunþætti.  Andri Freyr sé svo fyndinn og konan hafi sig alla að halda aftur af honum.  "Það er ævintýralega líflegt og yndislegt að hlusta á þau," sagði mamma sem vill alltaf hafa hasar í öllu.  Og ekki lýgur hún.  Né heldur vissi hún að ég hef þekkt Andra Frey frá því að sá grallari fæddist,  son eins  besta vinar míns.  Trommuleikara Frostmarks,  Jarla og fleiri hljómsveita.  Viðars Júlí Ingólfssonar á Reyðarfirði,  vinsælasta plötusnúðar (DJ) á Austurlandi.

  Nú hefur hafið göngu sína á rás 2 meiriháttar góður þáttur sem heitir Plötuskápurinn.  Þar fara þeir Gunnlaugur Sigfússon,  Sigurður Sverrisson og Halldór Ingi Andrésson á kostum.  Hver um sig er alfræðiorðabók í músík.  Þátturinn er á dagskrá á föstudagskvöldum.  En það er einnig hægt að hlusta á hann hlaðvarpi.  Jafnvel aftur og aftur.

  Í kvöld fjallaði Halldór Ingi Andrésson um forvera Bobs Dylans,  Dylan sjálfan og sporgöngumenn hans.  Frábær þáttur.  Hægt er að hlusta með því að smella á http://www.ruv.is/frett/plotuskapurinn/ahrif-dylans-og-ahrifavalda

  Hér fyrir ofan flytur Bob Dylan lag sitt  Like A Rolling Stone.  Ég ætla að mér yngra fólk átti sig ekki á því hvað þetta var nýstárlegur og framandi hljóðheimur á sínum tíma.  Þetta var sleggjuhögg.  Algjört dúndur.

Jólahlaðborð á BSÍ

  Ég er dálítið í því þessa dagana að kíkja á jólahlaðborð.  Jafnframt smakka ég á því sem þar er í boði.  Það er svo gaman.  Og bragðgott.  Á Umferðarmiðstöðinni í Vatnsmýri,  BSÍ (Bifreiðastöð Íslands) er veitingastaður sem heitir Fljótt og gott.  Staðurinn stendur undir nafni.  Þar er daglega hægt að velja úr fjölda heimilislegra rétta á verðinu frá 1290 kr. til um það bil 2000 kr.  Réttirnir eru afgreiddir tilbúnir úr hitaborði.  Meðlæti er að finna í salatbar.  Innifalið í verði er súpa og kaffi. 

  Þetta er alveg ljómandi góður kostur. 

  Þessa dagana býður Fljótt og gott daglega upp á jólahlaðborð til klukkan 16.00.  Það kostar 2490 kall og er eins og sameinað jólahlaðborð Húsasmiðjunnar og Byko.  Um þau jólahlaðborð má léttilega lesa með því að smella á þessa slóð:  http://www.jensgud.blog.is/blog/jensgud/entry/1204452/

  Á jólahlaðborði Fljótt og gott er úrval síldarrétta.  Þar er einnig graflax og reyktur lax.  Til samanburðar við sjávarrétti Húsasmiðjunnar er í tilfelli Húsasmiðjunnar reyktur lax,  rækjur og túnfiskur.  Gallinn er sá að laxinn klárast fljótt og nýr sjávarréttabakki er ekki borinn fram fyrr en túnfiskurinn og rækjurnar eru einnig búin.   Það er því hending (og heppni) að ná laxbita.  Á BSÍ er engin hætta á slíku.  Það er alltaf til nóg af laxi.

  Eins og í Húsasmiðjunni og Byko er á BSÍ boðið upp á heita pörusteik.  Eins og í Húsasmiðjunni er einnig í boði byonskinka og heitar partýpylsur.  Þær eru betri á BSÍ.  Ég held að þær séu steiktar en ekki soðnar eins og í Húsasmiðjunni. 

  Allir staðirnir eru með sykraðar kartöflur.  Eins og í Bykó er á BSÍ hangikjöt,  soðnar kartöflur og jafningur.  Það sem Fljótt og gott hefur umfram hina staðina er heitar litlar kjötbollur og reykt nautstunga.  Hún er lostæti.

  Eins og í Byko er á BSÍ er "ris a la mande" í eftirrétt.  Að auki er á BSÍ ostaterta í eftirrétt. 

  Niðurstaðan er sú að örlítið dýrara jólahlaðborð Fljótt og gott í samanburði við Húsasmiðjuna og Byko er fyllilega þess virði.  Samanburðurinn er samt ekki alveg sanngjarn.  Húsasmiðjan og Byko nota (og niðurgreiða) jólahlaðborð sín til að lokka viðskiptavini á staðinn.  Þaðan fara þeir út hlaðnir vörum sem viðskiptavinir kaupa þar í leiðinni.  Sjálfur hef ég ósjaldan mætt þangað í jólahlaðborð og gengið út með skrúfjárn,  ofnlykil,  málningarvörur,  leikföng,  úlpu og sitthvað fleira.  Eitthvað sem ég ætlaði ekki að kaupa þegar mætt var á staðinn.  Bara eitthvað sem ég hef rekist á og gripið með mér í leiðinni.  Ég hef horft upp á aðra maula jólamat með troðfullar innkaupakerrur sér við hlið.

  Í dag var - að ég held - jólahlaðborð í Kænunni í Hafnarfirði á 1900 kall.  Ég ætlaði að kíkja á það en gleymdi því og var allt í einu pakksaddur á BSÍ.  Sæll og sáttur.

  Næst ætla ég að mæta á jólahlaðborðið á Hótel Loftleiðum. 

Besta hljómsveit ársins, besta plata ársins, besta myndband ársins...

 

  Nú eru áramótauppgjör gagnrýnenda og lesenda hinna ýmsu tónlistartímarita farin að skila sér í hús.  Það er margt spennandi í þeim dæmum.  Meðal annars að Björk kemur víða við sögu í þessum áramótauppgjörum.  Ekki aðeins vegna einnar af bestu plötum ársins 2011 og eins af bestu plötuumslögum ársins heldur einnig fyrir eitt af bestu myndböndum ársins.

  Útbreiddasta tónlistarblað Danmerkur heitir Gaffa.  Það er vandað fríblað með litmyndum.  Í gær (8. des) stóð Gaffa fyrir veglegri verðlaunaafhendingu í Bremen leikhúsinu í Kaupmannahöfn.  Næstum 10 þúsund lesendur blaðsins greiddu atkvæði í áramótauppgjöri blaðsins.  Úrslitin eru þessi:

Besta myndband ársins

- Björk: "Crystalline" (Michel Gondry)

Besta plata ársins

- Adele: "21"

Besta hljómsveit ársins

- Coldplay

Besta danska rokkplata ársins
- Hatesphere: "The Great Bludgeoning"

Besta danska hljómsveit ársins
- Malk de Koijn

Besta danska poppplata ársins
- Malk de Koijn: "Toback To The Fromtime"

Ævintýralegar glæsikerrur

  Sem unglingur var ég með netta bíladellu.  Ég átti Ford Torino GT Super Sport.  Hann var ´71 módel,  búinn ýmsu sem þá þótti nýstárlegt og framandi en varð síðar algengt í bílum.  Til að mynda rafdrifnar rúður,  stefnuljós sem blikkuðu þrjú í röð í þá átt sem beygja átti.  Framljós sáust ekki fyrr en kveikt var á þeim.  Þá opnaðist "grillið" eins og augnlok.  Á hliðum hans var sjálflýsandi rönd.  Það gerði bílinn dálítið flottan þegar skyggni var lélegt. 

  Á þriðju efstu myndinni hér fyrir ofan er ég lengst til vinstri.  Því næst Viðar Júlí Ingólfsson á Reyðarfirði,  trommari í Frostmarki og Jörlum.  Margir sjá sterkan svip með honum og Andra Frey á rás 2.  Þeir eru feðgar. Svo er það Stebbi bróðir,  trommari í Hljómsveit Svanhildar.  Lengst til hægri er Guðmundur Rúnar Ásmundsson (Bauni),  eigandi Benzins.  Benzinn endaði sína daga þegar Guðmundur ók honum ölvaður á góðri ferð fram af bryggja í Nauthólsvík.  Bíllinn sveif glæsilega fram af bryggjunni og mölbrotnaði á grjóti í fjörunni.  Guðmundur vatt sér út úr bílnum og kallaði til okkar sem horfðum á í forundran:  "Allir út að ýta!"  En bíllinn var í klessu og ekki hægt að ýta í neina átt.  Andlát þessa bíls kom í fréttum dagblaða. 

  Á fjórðu myndinni er Viðar lengst til vinstri.  Sigurður H. Einarsson þar fyrir framan.  Stebbi fyrir aftan.  Ég og Guðmundur lengst til hægri.

  Tórinóinn minn vakti mikla athygli og var af sumum (kannski aðallega mér) talinn flottasti bíll landsins á þeim tíma.  En það eru til fleiri flottir bílar:

  Þetta er ekki lengsti skráður fólksbíll.  En assgoti flottur:  Með skyggðum hliðarrúðum og hurðum sem opnast upp.

  Þessi er skráður í heimsmetabók Guinnes sem lengsti fólksbíllinn (vörubílar með tengivagna eru ekki taldir með).  Bílastæðismál eru honum erfið.  Sem og snarpari beygjur. 

  Þetta er einn bíll.  Rauði fólksbíllinn er ljósmynd límd á þann svarta.

  Hér er um að ræða tilþrifamikla túlkun á sjávarfangi og sjóstemmningu.

  Hér er ennþá lengra gengið í að því tengja sjávarstemmnginu við bílinn.

  Humarhúsið toppar. 

Bestu jólalögin?

  Vinsælasta tónlistarblað heims,  hið bandaríska Rolling Stone,  leitaði á dögunum til lesenda sinna.  Erindið var að fá þá til að velja bestu jólalög allra tíma.  Viðbrögðin létu ekki á sér standa.  Lesendur brettu upp ermar í hasti og einhentu sér í verkefnið.  Niðurstaðan er áhugaverð þó ekki sé hægt að segja að hún komi verulega á óvart.  Nema kannski vegna þess að öll lögin eru ensk eða bandarísk.  Það er eins og lagahöfundar annarra landi séu algjörlega óhæfir þegar kemur að því að semja og flytja jólalög.

 

.

1. John Lennon - 'Happy Xmas (War Is Over)

  Þetta lag er ekki til á þútúpunni í flutningi Johns sjálfs.  Eða, jú, það er til en merkt þannig að vegna höfundarréttar plötufyrirtækisins Emi sé spilun á því óheimil á Íslandi.

.

2. The Pogues & Kirsty McColl - 'Fairytale Of New York'

3. Queen - 'Thank God It's Christmas'

4. Mariah Carey - 'All I Want For Christmas Is You'

5. Bruce Springsteen - 'Santa Claus Is Coming to Town'

Falskar nauðgunarkærur

  Mér ofbýður að lesa á fésbók og víðar orðbragð fólks sem sakar 18 ára stúlku um falskæru til að ná sér í auðfenginn pening frá Gilz. Árlega koma inn á borð Stígamóta og systursamtaka þeirra í öðrum landshlutum (Aflið,  Sólstafir) um 350 - 400 nauðgunarmál. Kærðri nauðgun fylgir langt og strangt erfitt ferli fyrir kæranda (og sakborning). Innan við 2% þessara mála enda með sakfellingu. Í sumum tilfellum er sakfellt í héraðsdómi en sýknað í Hæstarétti. Í mörgum tilfellum er kærandi metinn trúverðugur. En gegn neitun stefnda er niðurstaðan skilgreind orð á móti orði. Þó að framburður hans þyki misvísandi, reikull og ótrúverðugur.

  Það eru meiri líkur fyrir stefnanda að vinna i bingói í Vinabæ en að fá pening fyrir kærða nauðgun. Þetta gera kærendur nauðgana sér ljóst. Þeirra afstæða ræðst oftar af því að koma þeim skilaboðum á framfæri að nauðgun sé glæpur og ekkert grín (öfugt við grínpistla um nauðganir).

  Vissulega eru til dæmi um falskærur um nauðgun.  Örfá.  Kannski ein á ári eða svo og jafnan auðhrakin. Þar er yfirleitt um andlega veikar manneskjur að ræða. Er til dæmi um að á Íslandi hafi verið ranglega dæmt fyrir nauðgun? Jú,  hér í athugasemd fyrir neðan er bent á eitt slíkt. Sönnunarbyrði er þannig háttað hérlendis að þetta á að vera nánast útilokað í dag.  Meðal annars vegna þess að núna eru allir dómar fyrirliggjandi á domstolar.is og haestirettur.is.  Þar getum við,  almenningur,  lesið dómsskjöl og ráðið í trúverðugleika þeirra röksemda sem fram koma varðandi sekt eða sýknu.

  Umrætt tilvik varðandi Gilz er á frumstigi. Aðvitað get ég ekkert kveðið upp úr um framhaldið frekar en þið. En kærandi á sama rétt á því og Gilz að vera ekki dæmd(ur) á þessu stigi sem skúrkur, gullgrafari eða annað sem hún hefur verið kölluð.

  Annað: Fullyrt er að meintur nauðgari þurfi ekki að nauðga vegna kvenhylli. Staðreyndin er sú að fæsta nauðgara skortir kynlíf með kærustum eða eiginkonum. Karlar nauðga af öðrum ástæðum: Það er að beygja fólk undir sig. Það á einnig við um barnaníðinga eins og Ólaf Skúlason.

www.stigamot.is

www.aflidak.is

www.solstafir.is

Kærir fyrir nauðgun

Stórfurðuleg mál: Vill hin raunverulega Lísa María Presley standa upp?

 

 

  Undarleg málaferli eru hafin í Bandaríkjum Norður-Ameríku - aldrei þessu vant.  Dánarbúi og helstu erfingjum vinsæls þarlends söngvara,  Elvisar Presleys, hefur verið stefnt fyrir dómstóla.  Aðal núlifandi erfinginn er lögformleg dóttir hans,  Lísa María Presley.  Stefnandi er engin önnur en önnur dóttir hans.  Sú er að sögn hin eina sanna og raunverulega Lísa María Presley,  blóðdóttir rokksöngvarans. 

.

  Elvis lést 1977,  rösklega fertugur að aldri.  Hann var skærasta stjarnan af fyrstu kynslóð bandarískra rokkara á seinni hluta sjötta áratugarins.  Rokk hans var blúsaðra en annarra hvítra söngvara og hann beitti óspart flottum öskursöngstíl.  Slíkt var einsdæmi meðal hvítra söngvara fram til þess.  Þar fyrir utan var hann stórkostlegur söngvari.  Líka þó hann sýndi önnur blæbrigði í raddbeitingu en öskursöngstílinn.  Hann var að auki með flotta og áhrifamikla sviðsframkomu sem á þeim tíma þótti ósiðleg og klæmin vegna mjaðmahnykkja.  Hann innleiddi mótorhjóladress (leðurfatnað) inn í rokkið sem síðar hefur fylgt rokkinu.  Klæðnað sem hann yfirfærði úr unglingauppreisnarkvikmynd með Marlon Brando.  Þannig samtengdi Elvis unglingabyltingu rokksins og kvikmynda þess tíma. Fyrir þann tíma var fyrirbærið unglingur ekki til. 

.

  Fyrir 13 árum kom út bókin   I,  Lisa Marie:  The True Story of Elvis Presley´s Real Daughter  (Ég,  Lísa María:  Sannleikurinn um hina raunverulegu dóttir Elvisar Presleys).  Bókin er ævisaga Lísu þeirrar sem nú hefur kært dánarbú og erfingja.

  Lísa er ekki óvön kærumálum.  Skömmu eftir útkomu bókarinnar kærði útgefandinn hana.  Kæruefnið var að Lísa neitaði að sanna faðerni sitt með DNA rannsókn.  Hún treysti ekki áreiðanleika slíkra prófa.

.

  Í dag segist Lísa vera búin að fá faðernið sannað með DNA.  Hún muni leggja það sönnunargagn fram við réttarhöldin sem nú eru að hefjast.

.

  Ástæðan fyrir því að Lísa leitar réttar síns nú er að hún hefur fengið sig full sadda á leiðindum í sinn garð í Gracelandi,  dánarheimili föður hennar.  Þar andar köldu til hennar frá starfsfólki.

.

  Saga Lísu er þessi:  Þegar Elvis dó greip um sig mikill ótti um að líkinu yrði rænt og einnig einkadóttur hans,  Lísu Maríu.  Til öryggis var stelpan flutt til Svíþjóðar og látin taka upp sænskt eftirnafn,  Johansen. 

..

  Ævisaga Lísu fékk afleita dóma,  vakti litla athygli og seldist illa. 

  Það sem Lísa hefur með sér er að hún hefur alla tíð verið lík Elvis:  Sama haka,  sömu kinnar,  augnsvipur og svo framvegis. 

.

.

  Þá stendur eftir spurningin:  Ef Lísa Johansen er hin raunverulega Lísa María Presley hver er þá sú sem trúlofaðist og giftist mönnum eins og Michael Jackson,  Nicolas Cage,  Danny Keough,  John Oszajca,  Michael Lockwood...?  Hvers vegna býr hún í Englandi í stað Bandaríkjanna?

  Hún hefur alla tíð líkst Elvis ekki síður en Lísa Johansen.

.