Bestu plötur ársins 2010

  Bandaríska poppmúsíkblaðið Rolling Stone hefur birt lista yfir bestu plötur ársins 2010.  Rolling Stone er söluhæsta músíkblað heims.  Það selst í næstum tveimur milljónum eintaka.  Eðlilega ber listinn þess nokkur merki að blaðamenn og plötugagnrýnendur Rolling Stone eru bandarískir.  Blaðið er jafnframt dálítið íhaldssamt og sinnir aðallega þekktum poppstjörnum fremur en jaðarmúsík og  þungarokki.  Gaman væri að hlera viðhorf ykkar til listans.  Ég er svona rétt la, la sáttur.  Þannig lagað.  Ég er meira fyrir pönk. 

  Svona lítur listinn út (í bláum sviga er staða sömu plötu í áramótauppgjöri helsta keppinautar Rolling Stone,  bandaríska poppmúsíkblaðsins Spin.  Í svörtum sviga þar fyrir aftan er staða plötunnar í uppgjöri bandaríska vefmiðilsins amazon.com): 

1.    Kanye West
My Beautiful Dark Twisted Fantasy  (1) (5)

2.    The Black Keys
Brothers  (30) (2)

3.    Elton John and Leon Russell
The Union  (-) (-)

4.    Arcade Fire
The Suburbs  (3) (4)

5.    Jamey Johnson
The Guitar Song  (5) (12)

6.    Vampire Weekend
Contra  (11) (10)

7.    Drake
Thank Me Later  (16) (-)

8.    Robert Plant
Band of Joy  (35) (-)

9.    Eminem
Recovery  (38) (-)

10.    LCD Soundsystem
This Is Happening  (4) (6)

11. The Dead Weather, Sea of Cowards  (-) (-)

12. John Mellencamp, No Better Than This  (-) (-)
13. Taylor Swift, Speak Now  (-) (-)
14. Robyn, Body Talk  (10) (19)

15. The National, High Violet  (26) (8)
16. Kid Rock, Born Free  (-) (-)
17. Beach House, Teen Dream  (17) (3)
18. Kings of Leon, Come Around Sundown  (-) (-)

19. M.I.A., Maya  (8) (-)
20. Neil Young, Le Noise  (28) (-)

Það er svo auðvelt að búa til ódýran og flottan sportbíl

  Sumir halda að það sé meiriháttar mál að búa til glæsilegan og að þvi er virðist dýran sportbíl.  Það er samt svo lítið mál að það er broslegt.  Og kostar svo lítið.  Hér er þetta sýnt stig af stigi.  Þetta er svo einfalt og auðvelt að við getum flokkað það undir sparnaðarráð.  Vindum okkur í þetta:

. 

  Það þarf aðstöðu í bílskúr eða bílakjallara fjölbýlishúss.  Eða þokkalega rúmgóða stofu með stórum útkeyrsludyrum.  Þetta gengur ekki upp í kjallara með venjulegum 60 cm breiðum dyrum.

  Einföldustu útgáfu af bílagrind og sætum.

 

  Dekk undan reiðhjólunum.

  Létta grind.

  Skera niður pappa til að átta sig á útlínum bílsins.

  Það er gott að hafa fyrirmynd til að átta sig á hlutföllum.

  

  "Boddý-ið" er búið til úr fisléttum og sveigjanlegum plaströrum.  Það er síðan þakið með venjulegu brúnu innpökkunarlímbandi.

  Ljósin þurfa að vera að sínum stað.  Það skiptir máli.

  Þetta er dáldið flott.  Bíllinn kominn á götuna með númeri.

  Þá er bara að bjóða farþega í bíltúr.

  Flottasti bíllinn í umferðinni.  Samsettur úr reiðhjóladekkjum og innpökkunarlímbandi.

 

1001 gamansaga - sýnishorn

  Í síðustu viku birti ég á þessum vettvangi útdrátt úr bókinni  1001 gamansaga  eftir Helga Seljan.  Það féll í góðan jarðveg.  Þess vegna er ekki eftir neinu að bíða með að birta hér annan skammt úr bókinni.  Ef smellt er á slóðina  http://www.jensgud.blog.is/blog/jensgud/entry/1121929/  má sjá fyrri færsluna og frekari upplýsingar um bókina. 

-------------------------------------------

  .Einu sinni var ég spurður af dóttursyni mínum hvort ég vissi hver væri munur á fjallabíl og hesti, en því gat ég ekki svarað. „Jú, fjallabíllinn er með farsíma en hesturinn með fax.“

  .Ég er þekktur að því að geta ekki sagt nei þegar ég er beðinn einhvers. Hönnu eiginkonu minni blöskrar eðlilega og einu sinni á hún að hafa sagt: „Það er gagn að þú ert ekki kvenmaður að geta ekki neitað neinum um neitt.“

  .Eitt sinn kom ég út á Eskifjörð og í kaffiboði þar sagði Regína Thorarensen við mig: „Mikið þykir mér vænt um þessar minningargreinar sem þú skrifar um Reyðfirðinga, annars vissi maður bara ekkert hver væri dauður þar.“

  .Vinkona mín bað mig eitt sinn að skrifa nokkrar gamansögur. Ég tók vel í það og sagðist skyldu vera með nokkrar góðar. Þegar hún var að ganga út sagði hún: „Helgi minn, viltu hafa gott bil á milli þeirra svo ég sjái hvar hver endar.“

  .Eitt sinn kom ég niður í þing eftir að ég hætti þar til að hitta Karvel Pálmason. Þá gengur Ragnar Arnalds fram hjá okkur og segir: „Já, á nú að fara að æfa – á nú að fara að syngja?“ Ég svara: „Jú, jú, nú vantar okkur bara það að þú semjir söngleik fyrir okkur.“ Þá ansaði Ragnar: „Já, og á hann altso að heita Bakkabræður?“

Trúfélag bað fyrir velgengni vændishúss

  Ég er byrjaður að lesa nýju bækurnar í jólabókaflóðinu.  Og reyndar er ég líka byrjaður að birta útdrátt úr einni þeirra,  1001 gamansögu,  sjá:  http://www.jensgud.blog.is/blog/jensgud/entry/1121929/ .  Kannski birti ég fljótlega eitthvað úr fleiri bókum.

  Ég var að lesa bókina Hið dökka man.  Það er ævisaga Catalínu,  lengi vel kenndri við Vestmannaeyjar og síðar við vændi og mansal (ætli samnefndur skemmtistaður í Kópavogi sé skýrður í höfuðið á henni?).  Bókin er skrifuð af Jakobi Bjarnari Grétarssyni og Þórarni Þórarinssyni.  Hún er forvitnileg,  athyglisverð og skemmtileg aflestrar.  Eitt af því skemmtilega við bókina er að hér og þar skjóta upp kolli litlir og skondnir gullmolar.  Það er ekkert verið að trufla söguna með því að hafa mörg orð um þessi litlu broslegu atrið.  Þau fljóta áreynslulaust með og létta textann.  Jakob Bjarnar og Þórarinn kunna þetta flestum öðrum betur.  Þeir fara á kostum hvað efnistök varðar.

  

  Dæmi um svona gullmola er sagan af því þegar Catalínu var að hefja rekstur vændishúss síns og var í Fíladelfíu-söfnuðinum.  Cata upplýsti söfnuðinn um að hún væri að hefja rekstur eigin fyrirtækis og bað söfnuðinn um að biðja fyrir honum.  Fíladelfía lét ekki á sér standa.  Þar var lagst á bæn og guð beðinn um þann litla greiða að fylgja fyrirtækinu úr hlaði með sérlegri blessun.

  Vændishúsið fékk fljúgandi start og mánaðarlaun Cötu urðu 12 millur með það sama. 

          

Saga um bónda og hest

 

  Óla vantar hálft ár í nírætt.  Hann verður ekki í vandræðum með að redda því.  Sveitungarnir kalla hann aldrei annað en Bóndann í Neðra-Koti.  Hann er bóndi í Efra-Koti.  Sveitungarnir eru dálítið ónákvæmir.  Fyrir áratug hélt Óli upp á áttræðisafmælið sitt með því að klippa stóra tölu af frakkanum sínum og sauma hana utan á hægri kinnina.  

  Óli er lágvaxinn,  nettur og fíngerður - ef frá er talin kryppan á bakinu.  Hún er klunnaleg.  Fagurgrátt og þykkt hárið stendur ógreitt í allar áttir.  Það er ekki klippt fyrr en það er farið að flækjast fyrir.  Eða ef gesti ber að garði.  Óli suðar og suðar í þeim að klippa sig þar til þeir láta undan og klippa sig.  

  Augabrýrnar á Óla eru loðnar og renna saman.  Þær eru að mestu huldar á bak við stór gleraugu með þykkri skærgrænni umgjörð.  Gleraugun ber Óli til að enginn fatti að hann sé orðinn blindur.  Af sömu ástæðu bregður Óli sér aldrei af bæ.  Nefið á Óla er mjótt og uppbrett með stórum útþöndum nösum.  Kinnbein eru há og útstæð;  eyrun smá og kuðluð að ofanverðu;  munnsvipurinn ófríður,  hakan breið og háls langur og mjór.  Samt styttri en á gíraffa.

  Axlirnar eru álútar.  Sérstaklega sú hægri eftir að heyblásarinn náði hendinni við öxl.  Höndin gerði síðar vart við sig á miðilsfundi í Efra-Koti.  Vildi láta vita að sér liði vel.  Það þótti Óla merkilegt.  Þó að miðilinn væri tíður gestur í Efra-Koti hafði Óli aldrei sagt honum frá handarmissinum. 

  Óli er útskeifur og gengur svokallaðan þúfnagang.  Það er eins og hann gangi stöðugt um þúfur.  Þúfnagangurinn magnaðist verulega um árið eftir að sláttuvélin náði vænum bita framan af vinstri fætinum.  Óla sárnaði við vélina.  Það situr enn í honum.

  Óli er með leðurkvenhanskablæti.  Það ágerðist eftir að hann varð ekkill.  Annað sem Óli sækir í er að bregða sér á hestbak.  Það gerðist einmitt í gær.  Tíð var góð.  Óli setti hnakk og beisli á Grána og lét hann brokka með sig um túnið.  Þar sem þeir þeystu um rennislétt túnið hugsaði Óli með sér:  "Þetta er lífið.  Þvílík sæla og frelsistilfinning að vera á hestbaki,  finna golu kissa kinn,  hlusta á hófadyninn.  Hvað í heiminum er betra en þetta nema nýsteiktar kleinur?"

  Óli náði ekki að hugsa þessa hugsun til enda þegar hann týndi Grána.  Það var sama hvernig Óli leitaði og velti við hverjum steini í túninu:  Ekki fannst Gráni.  Hann er ennþá týndur.  Líka hnakkurinn.  En beislið týndist aldrei.     

 ----------------------------------------------------------

       

Fleiri smásögur og leikrit:

.

- Í plötubúð:

http://jensgud.blog.is/blog/jensgud/entry/260037

.

 - Gömul hjón

http://jensgud.blog.is/blog/jensgud/entry/1098829/

.

 - Hnefaleikakeppni aldarinnar:

http://www.jensgud.blog.is/blog/jensgud/entry/1077689/

.

 - Peysuklúbburinn

http://www.jensgud.blog.is/blog/jensgud/entry/1059543/

.

 - Vinalegur náungi:

http://jensgud.blog.is/blog/jensgud/entry/1041105

.

 - Gamall einbúi

 http://jensgud.blog.is/blog/jensgud/entry/1036775

.

- Saga af systrum

http://www.jensgud.blog.is/blog/jensgud/entry/1017021/

.

 - Jólasaga

http://www.jensgud.blog.is/blog/jensgud/entry/1008279/

.

- Á rjúpnaveiðum:

http://www.jensgud.blog.is/blog/jensgud/entry/988782/

.

- Ólétta nunnan:

http://www.jensgud.blog.is/blog/jensgud/entry/978349/

.

- Gullfiskur:

http://jensgud.blog.is/blog/jensgud/entry/965433

.

- Flugvélamódel:

http://jensgud.blog.is/blog/jensgud/entry/955702

.

- Miðaldra maður:

http://jensgud.blog.is/blog/jensgud/entry/944608

.

- Leyndarmál stráks:

http://jensgud.blog.is/blog/jensgud/entry/928198

.

- Ættleiðing:

http://jensgud.blog.is/blog/jensgud/entry/916687/

.

- Strákur með sög:

http://jensgud.blog.is/blog/jensgud/entry/903540

.

- Hundur:

http://jensgud.blog.is/blog/jensgud/entry/863130

.

- Boltabulla:

http://jensgud.blog.is/blog/jensgud/entry/718347

.

- Skokkari:

http://jensgud.blog.is/blog/jensgud/entry/606929

.

- Strákur skiptir um gír:

http://jensgud.blog.is/blog/jensgud/entry/538649

.

- Morðsaga:

http://jensgud.blog.is/blog/jensgud/entry/320299

.

- 27 ára:

http://jensgud.blog.is/blog/jensgud/entry/299380

.

- Um borð:

 http://jensgud.blog.is/blog/jensgud/entry/278812

.

- Matarboð í sveitinni:

http://jensgud.blog.is/blog/jensgud/entry/266411

.

Prestur dæmdur fyrir barnaníð

  Enn einn presturinn.  Enn eitt fórnarlambið.  Enn eitt barnaníðið.  Ætlar þetta engan endi að taka?  Þetta er ekki bundið við kaþólsku kirkjuna - þó dæmin þaðan séu farin að skipta hundruðum.  Né heldur er þetta bundið við Ólaf Skúlason,  Gunnar Björnsson,  Guðmund í Byrginu,  Ágúst Magnússon eða Gunnar í Krossinum. 

  Nú eru Færeyingar felmtri slegnir.  Ekki er langt síðan að upp komst að þingmaðurinn og forstöðumaður trúfélags,  Jenis av Rana,  beitti þöggun í barnaníðsmáli innan trúfélagsins.  Færeyska dagblaðið Dimmalætting (dimmu léttir = árblik) hefur grafið upp að prestur í Norður-Hálogalandi í Noregi var í vor ákærður og sektaður fyrir barnaníð gagnvart dóttir sinni.  Presturinn er færeyskur.  Hann var áður prestur í Klaksvík í Færeyjum. 

  Presturinn var sektaður um 10.000 norskar krónur (um 200 þúsund íslenskar krónur).  Ástæðan fyrir því að málið barst til Færeyja er sú að presturinn hefur ekki staðið skil á sektinni heldur farið í felur.  Það er talið að hann sé jafnvel í felum í Færeyjum.

  Meðal gagna í málinu eru sms (síma-smá-skilaboð) og tölvupóstur.  Presturinn er fjögurra barna faðir.  Það var upplýst og sannað að hann beitti börn sín ofbeldi.  Þar á meðal dóttir undir 16 ára aldri kynferðislegu áreiti. 

1001 gamansaga

 

  Helgi Seljan er víðfrægur fyrir sínar skemmtilegu gamansögur.  Þær hefur hann á hraðbergi og er fyrir bragðið eftirsóttur veislustjóri og skemmtikraftur.   Það er fagnaðarefni að nú sé eitthvað af sögunum hans að koma út í bók.  Hún heitir  1001 gamansaga.  Ég hef fengið leyfi til að birta hér sýnishorn.  Sögurnar eru ekki aðgreindar heldur settar fram í belg og biðu.  Þannig eru þær einmitt sagðar af Helga. 

  Sami prestur þjónar bæði Reyðarfirði og Eskifirði, en á

heima á Eskifirði.

  Ég var eitt sinn meðhjálpari á Reyðarfirði og klerkur,

er þá var, kom oft í heimsókn og þáði góðar veitingar hjá

Hönnu, konu minni. Einu sinni ruggaði hann sér svo í

stofustólnum að hann datt aftur yfir sig og braut stólinn.

Öðru sinni sat hann á eldhússtól þar sem setan var skrúfuð

vel niður, en í látunum sprengdi hann allar skrúfurnar frá

stólnum og sat svo sjálfur á gólfinu. Þetta fréttist víða og

m.a. á bæ í sveitinni þar sem orðhvatur strákur átti heima.

  Nú kom prestur á bæinn og þá segir strákur við prest,

en hann vissi að hann átti heima á Eskifirði: „Það er meiri

vitleysingurinn þessi prestur á Reyðarfirði, hann er búinn

að mölva tvo stóla fyrir Helga Seljan.“ Sagt er að prestur

hafi horfið óðara á braut.

.

  Eftirlætisgamansaga Karvels Pálmasonar um mig var

sú að stuttu eftir að ég hafði náð í Hönnu konu mína hefði

vinkona Önnu tengdamóður minnar komið í heimsókn og

spurt tengdamömmu hvernig henni litist á nýja tengdasoninn.

Þá hefði Anna átt að svara: „Ja, ef hann væri sokkur væri ég

löngu búinn að rekja hann upp.“

.

  Einu sinni var ég að skemmta ásamt Sigurði Jónssyni

og Karvel Pálmasyni. Kynnirinn hóf sína kynningu þannig

í upphafsávarpi um dagskrána: „Fyrst koma skemmtilegir

skemmtikraftar, svo koma Helgi og Karvel.“

.

  Við endursendingar á pósti var áður merkt við ástæðu

endursendingar.

  Einu sinni kom Fréttabréf ÖBÍ endursent til mín með

tveim merkingum. Annars vegar var merkt við að maðurinn

væri látinn, en hins vegar: Farinn, ekki vitað hvert.

.

  Ég var að segja samstarfskonum mínum þrem hjá ÖBÍ gamansögu

af manninum sem spurður var af konu sinni hversu mikið

hann elskaði hana og nú lék ég þetta með nokkrum

tilþrifum: „Hversu heitt elskarðu mig?“ Þá kemur fjórða

samstarfskonan að og spyr furðu lostin: „Við hverja þeirra

ertu eiginlega að tala?“

Skúbb! Stórfrétt!

  Í íslensku pönkbyltingunni um og upp úr 1980 spruttu upp í öðrum hverjum bílskúr á landinu splunkunýjar ferskar og ötular pönksveitir.  Þær voru að springa úr sköpun og spilagleði.  Það var allt að gerast allsstaðar.  Menn höfðu ekki undan að sækja spennandi viðburði.  Það var hefð að margar hljómsveitir kæmu fram á hverjum hljómleikum.  Þegar mest var um að vera var ekki hjá því komist að sækja allt upp í þrenna eða ferna hljómleika í viku. 

  Ein allra skemmtilegasta og sprækasta pönkhljómsveit þessa tímabils var Sjálfsfróun.  Hún var skipuð yngstu liðsmönnum senunnar.   Blessunarlega náði kvikmyndin  Rokk í Reykjavík  að fanga stemmninguna að hluta og varðveita.  Sjálfsfróun var starfrækt í áratug eða svo.  Á seinni hluta ferilsins kom hún sjaldan fram.  En það voru þeim mun meiri tíðindi þegar það gerðist.  

  Ástæðan fyrir því að hljómleikar með Sjálfsfróun urðu fágætari með árunum var sú að liðsmenn hennar voru duglegir að stofna nýjar hljómsveitir á borð við Biafra Restaurant,  Ósóma og Beatnecks svo örfáar séu nefndar.  Jafnframt voru þeir í allskonar blaðaútgáfu,  greinarskrifum,  ljóðagerð og svo framvegis.

  Saga Sjálfsfróunar einkennist ekki af eintómum dansi á rósum.  Það var óregla á drengjunum.  Dáldið um lím"sniff" og þess háttar.  Það kom niður á heilsu þeirra.  Bassaleikarinn Pési "Pönkari" féll frá 1982.  Söngvarinn,  Bjarni "Móhíkani",  lést í bílslysi fyrir nokkrum árum.  Bjarni tók á sínum tíma við bassanum þegar Pési féll frá.  Bjarni spilaði einnig á bassa með Gyllinæð,  Alsælu (heyr í tónspilara hér til vinstri.  Bjarni er að vísu ekki kominn til leiks þar) og Haugi & Heilsubresti fyrir áratug,  jafnframt því að "trúbadúrast".  

  Nú eru þau undur og stórmerki að gerast að verið er að endurreisa Sjálfsfróun.  Það eru gítarleikarinn Siggi "Pönkari" og trommarinn Jómbi sem standa að því.  Þeir voru báðir stofnendur Sjálfsfróunar í upphafi og voru í hljómsveitinni allan tímann ásamt Bjarna "Móhíkana". 

  Á seinni hluta ferils Sjálfsfróunar spilaði Frikki "Pönk" á bassagítarinn.  Hann verður með í endurreisn hljómsveitarinnar.  Á þessum tímapunkti er óljóst hvernig söngur verður afgreiddur.  Bjarni sá að mestu um sönginn þó Siggi hafi sungið vinsælasta lag hljómsveitarinnar,  Lollipop.  Það er eins og mig rámi í að Frikki hafi einnig sungið eitthvað.  Hvorugur þeirra vill sjá um sönginn núna.  Þeir eru að leita að söngvara.  

  Hvað sem verður þá eru þetta stærsta frétt í íslensku rokksögunni til langs tíma:  Að verið sé að endurreisa Sjálfsfróun.  Ég hlakka meira til að heyra í þessari goðsagnakenndu hljómsveit á ný en til jólanna. 

--------------------

  Til gamans:

  -  Kunningi minn var við nám í Bandaríkjunum þegar kvikmyndin  Rokk í Reykjavík  var tekin þar til sýningar.  Hann lét sig ekki vanta í kvikmyndahúsið.  Það var að öðru leyti troðfullt af bandarískum pönkurum.  Þeir virtust láta sér vel líka.  Svo vel að þeir gátu ekki stillt sig um að fagna framlagi Sjálfsfróunar með dúndrandi lófaklappi.

  -  Mig minnir að það hafi verið Bítlavinafélagið,  fremur en einhver önnur hljómsveit Jóns "Góða",  sem á tímabili hóf hljómleika og / eða dansleiki sína á því að kráka  Lollipop  Sjálfsfróunar.   Svo nákvæmlega að gítarsóló Sigga "Pönkara" var afgreitt nótu fyrir nótu.  Enda eitt eftirminnilegasta gítarsóló íslensku pönkbyltingarinnar.

  -  Eitt sinn var ég staddur á Ísafirði þegar þar var haldin rokkhátíð sem mig minnir að hafi heitið  Rokkstokk.  Eða hvort hún hét Menntstokk og var undankeppni söngvarakeppni framhaldsskólanna.  Þetta rennur saman hjá mér vegna þess að ég hef mætt á nokkrar svona músíkhátíðir á Ísafirði.  Nema það að ein hljómsveitin krákaði blöndu af  Lollipop  Sjálfsfróunar og samnefndu útlendu lagi.  Það tókst vel og var gaman. 

  -  Varast ber að rugla saman Sigga "Pönkara",  gítarleikara Sjálfsfróunar,  og Sigga "Pönk",  söngvara Forgarðs Helvítis og DYS.  

Það sem þú vissir ekki um Bítlana

  Þessir fróðleiksmolar um Bítlana hér fyrir neðan eru flestir sóttir í samantekt breska poppblaðsins New Musical Express,  www.nme.com.  Þetta er söluhæsta breska poppblaðið.  Á undanförnum árum búið að hrista af sér önnur vikublöð á borð við Melody Makers,  Sound og Record Mirror.  Það er nokkuð merkilegt að breskt músíkblað skuli hafa haldið sjó sem vikulegt músíkblað á meðan helsti keppinauturinn,  bandaríska Rolling Stone,  er hálfsmánaðarblað. 

  Hér eru molarnir:

 - Paul og John djömmuðu síðast saman í svakalegu kókaínpartýi 1974.  Þetta var eftir að John og Paul höfðu skipst á eitruðum sendingum á plötum.  John með níðsöngnum "How Do You Sleep?" og Paul í laginu "Let Me Roll It".  Í millitíðinni sagði John að níðið í framangreindu lagi sínu hafi í raun verið um sig sjálfan.  Þeir hittust nokkrum sinnum eftir kókaínpartýið og spjölluðu stundum saman í síma.  En ekki alltaf í vinsemd.  Samt stundum.

.

.

 - 1967 keyptu allir Bítlarnir sitthverja eyjuna við Grikkland.  Þeir seldu þær nokkrum mánuðum síðar. 

 -  Bítlarnir sömdu fyrsta smell The Rolling Stone,  "I Wanna Be Your Man". 

 - George Harrison kom The Rolling Stones á plötusamning hjá Decca í upphafi ferils The Rolling Stones.

 - Bob Dylan hélt að Bítlarnir væru dópistar.  Þeir voru það reyndar.  En Dylan kynnti þeim fyrir hassi.  Hann hélt að viðlagið "I Can´t Hide" væri "I Get High".

.

  - John þoldi aldrei "strípaða" söngrödd sína.  Hann vildi alltaf láta breyta henni með söng"effectum".

  - Þegar Brian Wilson,  forsprakki The Beach Boys,  heyrði Bítlalagið "A Day In A Life" taldi hann daga The Beach Boys vera liðna og hljómsveitin ætti að hætta.

  - 2009 fyrirgáfu formlega páfinn og Vatikanið Bítlunum yfirlýsingu Lennons um að Bítlarnir væru vinsælli en Jesú.

 - Vinnutitill plötunnar "Abbey Road" var "Everest".

  - Bítlarnir þrættu á sínum tíma fyrir að lagið "Lucy In The Sky With Diamonds" væri LSD dópsöngur.  John þrætti alla tíð fyrir það.  Paul hefur hinsvegar viðurkennt að svo hafi verið.

  - John, Paul og George voru allir yfir meðalhæð.  Ringo var lítillega undir meðalhæð.

 -  Helmingur Bítlanna var örvhentur:  Ringo og Paul.

.

  -  Little Richard hélt framan af Bítlarnir væru svertingjar.  Honum þótti músík þeirra vera blökkumannamúsík.

  -  Plötufyrirtæki Decca hafnaði Bítlunum á sínum tíma með þeim rökum að tími gítarhljómsveita væri liðinn.  Bókun ráðamanna Decca um þetta hefur alla tíð síðan verið Decca til háðungar.

  - Áður en Bítlarnir slógu í gegn undir nafninu The Beatles hét hljómsveitin The Quarrymen, The Beatals,   Johnny & The Moondogs,  Long John & The Beetles,  The Silver Beats,  The Silver Beatles og The Beat Brothers.

.

  -  Lennon og McCartney bundust á sínum tíma í fóstbræðralag um að öll þeirra lög yrðu skráð á þá báða.  Óháð því hver væri höfundur lags.  Höfundarnafn væri skráð Lennon-McCartney.  Fyrir nokkrum árum fór Paul fram á að fá að breyta höfundarskráningu á laginu "Yesterday" í McCartney-Lennon.  Yoko,  ekkja Lennons,  hafnaði því á þeirri forsendu að einungis John gæti samið um endurskoðun á þessum fóstbræðrasamningi.  John var dáinn (myrtur) og ekki í ásigkomulagi til að breyta þessu.  Paul var og er ósáttur við Yoko.

  -  Eina Bítlalagið sem John gerði án annarra Bítla var "Julia".  Þar syngur hann til mömmu sinnar við undirleik frábærs gítarpikks.  Gítarpikks sem Paul einsetti sér síðar að ná tökum á og tókst - að eigin sögn.  Og eflaust með réttu.  Þannig var stemmningin á milli Pauls og Johns.  Ef annar gerði eitthvað flott hætti hinn ekki fyrr en honum tókst að gera eitthvað álíka flott.  

  -  Paul og John hittust fyrst 6.  júlí 1957 þegar John var blindfullur að spila með The Quarrymens.  Paul sagði að allir í Liverpool hafi vitað af John.  Hann var "the rebel" svæðisins.  Kjaftfori slagsmálahundurinn.  Síðar viðurkenndi John að hafa ekki verið sá "töffari" sem hann gaf sig út fyrir að vera.  Hann hafi alltaf verið skíthræddur þegar hann var að efna til slagsmála.  Var hálf sjónlaus en uppfullur af reiði út í allt og alla.  Einkum vegna þess að fullur lögreglumaður ók yfir og drap mömmu hans.  Hann vissi ekkert hvernig hann átti að vinna úr þeirri reiði.  Hún braust út í að efna til slagsmála.

  -  Í upphafi ferils Bítlanna í Hamborg í Þýskalandi ánetjuðust þeir eiturlyfjum.  Álagið var gríðarlegt.  Lítið um svefn.  Mikil vinna.  Lítið um mat.  En þeim mun meira framboð á pillum til að standa langar vaktir í spilamennsku.

  -  Síðasta skipti sem Bítlarnir unnu saman sem hljómsveit var 20.  ágúst 1969.  Þá hljóðrituðu þeir lagið frábær "I Want You (She´s So Heavy".  Það fjallar um ást Johns á Yoko.

  -  John hélt því fram að lagið "Ticket To Ride" væri eitt af fyrstu heavy metal lögum rokksögunnar.  Rangt. 

  -  Allir liðsmenn Bítlanna voru flughræddir. 

  -  Ringo var með annan fót á sjúkrahúsi alla sína barnæsku.

  -  Enginn Bítlanna var framhaldsskólagenginn.  Lennon var að vísu í myndlistanámi en lauk þar engri gráðu.

  -  John var alinn upp af móðursystur sinni,  Aunt Mimi.  Þegar hann fór að spila rokkmúsík sagði hún:  "Gítarspil er tomstundagaman.  En það aflar þér ekki tekna."

  -  Þegar Bítlarnir spiluðu í Bandaríkjum Norður-Ameríku 1964 gáfu þeir út yfirlýsingu um að áheyrendum yrði ekki mismunað vegna kynþáttar.  Þetta var byltingarkennd yfirlýsing á þeim tíma.

  -  Bítlarnir voru fyrstu alvöru stóru poppstjörnur til að gagnrýna hernað Bandaríkjanna í Vietnam.  Þvert á fyrirmæli umboðsmanns Bítlanna,  Brians Epsteins.  Það var George Harrison sem braut fyrstur gegn þessum fyrirmælum Brians.  Ekki John eins og margir halda í dag.

.

Tvífarar?

  Ég fékk þetta sent.  Og hló.  Tvíburar?  Jú,  það er svipur.  En ekki sömu gleraugu.

10 ástæður fyrir því að sumir karlar velja frekar golf

  Ef þið áttið ykkur ekki á hvað er hér í gangi þá er mér ljúft að upplýsa að þarna er um dúndur beinbrot að ræða.  Kíktu aftur á myndirnar.  Þetta er hrikalegt.

  Ég er farinn að ruglast í talningunni.  Er þetta 9 eða 10?

Stílistar rokksins

  Skoska mánaðarritið Clash hefur á undanförnum árum haslað sér völl sem eitt af helstu rokkblöðum heims.  Þetta er vinsælt blað og vandað að virðingu sinni.  Í nýjasta hefti blaðisins er birtur listi yfir helstu stíllista rokksins hvað klæðaburð varðar.  Eflaust má deila um þennan lista.  Ég geri athugasemd við að skautað sé framhjá að Elvis Prestley innleiddi í rokkið leðurklæðnað mótorhjólatöffarans Marlons Brandons.  En þannig er listinn hjá Clash:

1   Keith Richards.  Þessi gítarleikari The Rolling Stones hefur aldrei sett nafn sitt við neina merkjavöru.  Samt sem áður hefur klæðaburður hans orðið fyrirmynd kvikmyndaleikara og rokkstjarna.  Hvað heitir aftur kvikmyndaserían um sjóræningja sem Johnny Depp er frægur fyrir?  Í upphafi ferils tileinkaði Patti Smith sér klæðaburð Keiths.

  Keith hefur aldrei verið fyrir hálsbindi.  Hinsvegar sækir hann í að hengja um hálsinn allskonar glingur.  Lengst af var það til að smygla dópi í glingrinu á milli landa.  Síðar varð þetta ávani.  Á gamals aldri er Keith farinn að hengja jólaskraut og fleira í hárið á sér.

2  Paul Simonon.  Bassaleikari bresku hljómsveitarinnar The Clash.  Hann var ekki valinn í hljómsveitina út af hæfileikum heldur vegna þess að hann var flottur.  Hann varð reyndar síðar mega flottur bassaleikari.  En hann var valinn í The Clash út af töffaralegu útliti.  Á meðan aðrir pönkarar söfnuðu hanakambi og eða lituðu hár sitt rautt og grænt klæddist Paul iðulega gamaldags jakkafötum og bar hatt.  Hljómsveitin Egó tók Paul til fyrirmyndar á sinni fyrstu plötu,  Breyttir tímar.

3.  Debbie Harry.  Söngkona Blondie. 

4  David Bowie

5  Madonna

Er presturinn þinn alvöru prestur?

 

  Er presturinn þinn alvöru prestur?  Eða er hann gerviprestur?  Eða geimvera?  Hvernig veistu hvort presturinn þinn hefur lokið námi í guðfræði?  Eða hvort hann hefur verið formlega vígður til prests eftir kúnstarinnar reglum og óreglum?  Þessum spurningum óska nú margir eftir að hafa spurt sig og fleiri að.  Einkum 60 þúsund íbúar ítalska bæjarins Fane í útjaðri Verona. 

  20 undanfarin sumur mætti á svæðið "prestur" sem kynnti sig undir nafninu Faðir Tómatsósa (padre Tommaso).  Hann birtist ætíð á sama tíma í Fane og lóan birtist á Íslandi á vorin.  Allt sumarið og fram á haust sinnti hann starfi prests af ákafa og alúð á móti fastráðnum presti staðarins.  Faðir Tómatsósa leysti fastráðna prestinn eiginlega meira og minna af þessi sumur.  Enda veitti þeim fastráðna ekki af að teygja úr sér og viðra sig aðeins eftir hark vetrarins.

  Í fyrra var nýr og ungur prestur fastráðinn í bransann í Fane.  Það kom í hans hlut á dögunum að láta nánustu ættingja Tómatsósu vita af því að gamli maðurinn væri kominn á sjúkrahús.  Faðir Tómatsósa er orðinn 84.  ára og heilsan farin.  Á sjúkrahúsinu er verið að lappa upp á hann þannig að hann geti kannski skrölt um í hjólastól.

  Þegar nýi presturinn hóf leit að ættingjum gamla mannsins uppgötvaðist að kallinn heitir ekki Tómatsósa heldur Italo G.  Við nánari forvitni nýja prestsins kom í ljós að kallinn er ekki og hefur aldrei verið alvöru prestur.  Það var allt lygi og fals.  Einhverskonar sprell í gamla manninum til að gera sér eitthvað til dundurs eftir að hann varð löggilt gamalmenni og farinn af vinnumarkaði.

  Íbúar Fane eru felmtri slegnir vegna tíðindanna.  Þeir eru niðurbrotnir yfir að hafa í 20 ár sagt óvígðum manni í skriftarstól frá öllum sínum syndum.  Útlistað fyrir honum í smáatriðum frásagnir af tíðu framhjáhaldi og öðru kynlífi utan hjónabands.  Bæjarstjórinn er í áfalli eftir að hafa löngum stundum tíundað fyrir gerviprestinum samskipti við vændiskonur,  móttökur á mútufé og þess háttar.

  Áhyggjur bæjarstjórans og annarra bæjarbúa snúa fyrst og fremst að því hvort gervipresturinn hafi gefið þeim upp rangan fjölda af Maríubænum sem þarf að fara með til að verða syndlaus.  Það er hrikalegt fyrir þetta fólk ef það situr ennþá uppi með syndir vegna þess eins að hafa í einhverjum tilfellum farið með of fáar Maríubænir.

  Góðu fréttirnar eru þær að Italo G virðist ekki hafa gengið það langt í prestshlutverkinu að gerast barnaníðingur.        

Bestu lög Bítlanna

  Í síðustu færslu birti ég lista yfir vinsælustu lög Bítlanna.  Sá listi sýndi þau lög Bítlanna sem flestir keyptu á iTunes í vikunni.  Nú er bandaríska poppblaðið Rolling Stone að senda frá sér sérblað yfir 100 bestu lög Bítlanna.  Ég veit ekki hvernig sá listi er unninn.  Hvort þar liggur að baki álit ritstjórnar Rolling Stone eða hvort sá listi er unninn í samvinnu við þekktustu lagahöfunda rokksins. 

  Rolling Stone er söluhæsta poppblað heims.  Selst í um 2 milljónum eintaka og er prentað á þýsku og frönsku og kannski fleiri tungumálum.  Þetta er virt tímarit,  vandað að virðingu sinni og alveg ástæða til að líta á það sem marktækt.  Til gamans má geta að blaðamenn Rolling Stone hafa á síðustu árum fylgst náið með íslenskri músík.  Þeir sækja Iceland Airwaves og fleiri íslenska músíkviðburði.

  Á netsíðu RS hefur verið gefinn upp listi yfir þau lög Bítlanna sem raðast í 10 efstu sæti yfir bestu lög Bítlanna.  Hann lítur þannig út:

 

1   A Day in the Life

2   I Want to Hold Your Hand

3   Strawberry Fields Forever

4   Yesterday

5   In My Life

6   Something

7   Hey Jude

8   Let It Be

9   Come Together

10  While My Guitar Gently Weeps

.

Vinsælustu lög Bítlanna

  Á þriðjudaginn voru öll lög bresku Bítlanna,  The Beatles,  sett á iTunes.  Ég veit ekki hvað þetta iTunes er.  En svo virðist vera sem fólk með aðgang að tölvu og nettengingu geti sótt sér lög í gegnum þetta iTunes.  Sennilega þarf að borga eitthvað fyrir lögin.  Hvernig svo sem það allt saman er þá er gaman að skoða lista yfir hvaða lög Bítlanna njóta mestra vinsælda á iTunes.  Sá listi er dálítið gallaður.  Sum lög eru á fleiri en einum stað á listanum.  Ástæðan fyrir því er sú að þau lög er að finna á fleiri en einni plötu.  Hvert og eitt sæti fyrir sig gefur upp viðkomandi lag af aðeins einni plötu.

  Þannig er listinn:     

1   Hey Jude

2   Twist and Shout

3   Let It Be

4   Here Comes the Sun

5   Twist and Shout

6   Blackbird

7   In My Life

8   I Saw Her Standing There

9   Come Together

10  A Day In The Life

11  Hey Jude

12  Help!

13  Eleanor Rigby

14  I Am the Walrus

15  Let It Be

16  Lucy in the Sky With Diamonds

17  A Hard Day´s Night

18  Yesterday

19  Hey Bulldog

20  While My Guitar Gently Weeps

21  Yesterday

22  You´ve Got to Hide Your Love Away

23  Strawberry Fields Forever

24  Strawberry Fields Forever

25  With a Little Help From My Friends

26  In My Life

27  Norwegian Wood

28  Penny Lane

29  Sgt Pepper´s Lonely Hearts Club Band

30  The Long and Winding Road

.

  Allar stóru plötur Bítlanna (17 talsins með safnplötum) fóru með það sama inn á "Topp 50" á iTunes.  Þar af 3 inn á "Topp 10":  Abbey Road,  "Hvíta albúmið"  og  Sgt.  Pepper´s...  Til viðbótar er heildarsafn Bítlaplatna,  The Beatles Box Set,  inni á "Topp 10".  Þeir eru vinsælir þessir guttar.

Vekur upp spurningar...

  Læknir í þýska smábænum Paderborn var að hefja skurðaðgerð á 36 ára gömlum sjúklingi.  Þá rak læknirinn augun í húðflúr á handlegg sjúklingsins.  Húðflúrið var mynd af sitjandi erni og hakakrossi.  Vel þekktum táknum nasista.  Viðbrögð læknisins voru þau að tilkynna eiginkonu sjúklingsins að hann hefði ekki geð í sér né samvisku til að lappa upp á nasista.

  Það varð að kalla út annan skurðlækni til að framkvæma aðgerðina á nasistanum.  Læknirinn sem neitaði að afgreiða nasistann gæti verið í vondum málum.  Hann er - eins og aðrir læknar - bundinn af svokölluðum lækniseiði sem kenndur er við Hippokrates.   Þar segir eitthvað á þá leið að læknirinn leggi við drengskap sinn að beita allri sinni kunnáttu af fullri alúð og samviskusemi og láta sér ávallt annt um sjúklinga sína ÁN MANNGREINARÁLITS. 

  Það getur hinsvegar verið varasamt fyrir nasistann að draga lækninn fyrir dómstóla.  Samkvæmt þýskum lögum liggur 3ja ára fangelsi við því að bera nasistatákn á borð við örn og hakakross.     

The Byrds

  Þessi bloggfærsla er skrifuð í framhaldi af því að Heiðar Sigurðsson skrifaði í athugasemd hjá mér eftirfarandi:  "Persónulega hef ég aldrei skilið vinsældir The Byrds. Mér fannst tónlist þeirra og framkoma vera svo yfirgengilega væmin og lögin svo yfirborðsleg og illa samin að ég gat aldrei hlustað lengi þar til ég fékk meira en nóg."

  Heiðar mælir fyrir munn fleiri sem þekkja The Byrds aðeins af lögum á borð við  Mr.  Tambourine Man  og  Turn,  Turn,  Turn!.  Að vísu geri ég athugasemd við að þessi lög séu illa samin.  Þau eru það ekki.  Þarna er um að ræða lög sem náðu í flutningi The Byrds toppsætum á vinsælalistum og hafa verið krákuð af fjölda annarra en The Byrds.  Til að mynda fyrrnefnda lagið af Rúnari Júl og síðarnefnda lagið af Judy Collins,  Diesel Park West og Nina Simone.  Þessi lög eru ekki samin af liðsmönnum The Byrds heldur Bob Dylan og Pete Seeger.  Báðir óumdeilanlega í hópi bestu lagahöfunda rokksögunnar.  Um Bob Dylan þarf ekki að hafa mörg orð.  Hann var í helstu fjölmiðlum heims keppinautur bítilsins Johns Lennons um titilinn tónlistarmaður síðustu aldar. 

  Svo skemmtilega vill til að John Lennon var mikill aðdáandi bæði Bobs Dylans (sérstaklega) og Petes Seegers.  Annar bítill,  George Harrison,  var ekki síðri aðdáandi þeirra og taldi Pete vera besta söngvahöfund síðustu aldar.  Þriðji bítillinn,  Paul McCartney,  valdi lagið Turn,  Turn,  Turn!  sem smáskífulag fyrir söngkonu er hann tók að sér,  Mary Hopkins. 

  En förum yfir feril The Byrds.   

  Þessi hljómsveit kom fram á sjónarsvið sem fyrsta bandaríska bítlahljómsveitin 1965 með laginu  Mr.  Tambourine Man  eftir Bob Dylan.

    Lagið toppaði vinsældalista um allan heim.  Leikurinn var endurtekinn með  Turn,  Turn,  Turn!. 

   Söngvarinn Gene Clark var höfundur allra frumsömdu laganna á fyrstu 2 plötum The Byrds, Mr.  Tambourine Man  og  Turn,  Turn,  Turn!.  Þær kynntu til sögunnar nýjan músíkstíl,  folk-rokk.  Það brúaði bil bítlarokksins og vísnasöngva (þjóðlagatónlistar).  Stíll The Byrds einkenndist af klingjandi gítar (12 strengja Rickenbacker) og rödduðum söng.  Þessi stíll hafði mikil áhrif á Bítlana,  Bob Dylan og fleiri

  The Byrds var þannig skipuð 1965 og næstu ár:

  Roger McGuinn  (kallaði sig Jim á þessum árum):  Gítar,  söngur

  Gene Clark  (dáinn 1991):  Tambórína,  söngur

  David Crosby:  Gítar,  söngur

  Chris Hillman:  Bassi,  söngur

  Michael Clarke:  (dáinn 1993):  Trommur

.

  3ja platan,  Fifth Dimension  (útg. 1966),  er gjörólík.  Þar eru nýir og ferskir músíkstílar á borð við sýru,  geim-rokk,  raga-popp, djazz-popp,  alt-kántrý og það sem síðar var kallað hippa-rokk. 

  McGuinn er höfundur flestra laga (5),  Crosby er meðhöfundur 3ja þeirra og einn höfundur enn eins lagsins.  Clark er aðeins meðhöfundur eins lags,  Eight Miles High.  Enda hætti hann þarna í hljómsveitinni.  Tók þátt í flutningi bara 2ja laga á plötunni.  5 stjörnu plata.  Margir telja  Eight Miles High  vera eitt af merkustu lögum rokksögunnar.  Jafnvel það besta.

.

.

  Á 4ðu plötunni,  Younger Than Yesterday,  er nýr höfundur,  bassaleikarinn Chris Hillman, höfundur 5 laga.  Crosby og McGuinn leggja einnig til lög.  Þarna er haldið áfram með þá músíkstíla sem dúkkuðu upp á Fifth Dimension  og flower-power bætist við.  Lögin Fifht Dimension (fimmta víddin) og  Eight Miles High voru bönnuð vegna meintra tilvísana í dópneyslu.  Með réttu eða kannski síður röngu. Dópið var ráðandi,  hvort sem í textum var vísað til þess eða ekki.

.

 

  Upphafslag  Younger Than Yesterday,  So You Want To Be A Rock N´ Roll Star,  hefur verið krákað af mörgum.  Þar á meðal Patti Smith.  Lagið er eftir Hillman og McGuinn. 

  Í næst nýjasta hefti breska poppblaðsins Uncut viðurkenna liðsmenn Blue Oyster Cult að þeirra vinsælasti smellur;  (Don´t Fear) The Reaper,  sé í raun endurgerð á  So You Want To Be A Rock N´ Roll Star.  En ekki viljandi.  Málið var að þegar BOC var stofnuð þá spilaði hljómsveitin sig saman með því að kráka The Byrds lög.  Svo skemmtilega vill til að Patti Smith var í slagtogi með BOC,  samdi fjölda texta fyrir þá og söng einmitt á sömu plötu og inniheldur  (Dont Fear) The Reaper.  The Byrds áhrifin leyna sér heldur ekki í flutningnum á laginu:

.

.

  Á 5. plötunni,  The Notorious Byrd Brothers  (útg. 1968),   eru lögin meira og minna samin í sameiningu af Hillman,  Crosby og McGuinn.  Til viðbótar eru tvö lög eftir Carole King og Gerry Goffin.  David Crosby lagðist alfarið gegn þeim lögum.  Hann vildi að hljómsveitin héldi sig eingöngu við frumsamin lög.  Þessi ágreiningur leiddi til þess að Crosby tók poka sinn og stofnaði Crosby, Stills & Nash (síðar & Young). 

  Á þessari plötu heyrist í fyrsta skipti í stálgítar á The Byrds plötu.  Þar var tónn gefinn fyrir næstu plötu,  Sweetheart of the Rodeo  (útg. 1968).  Hún er "pjúra" kántrý-plata.

 

  Sweetheart of the Rodeo  kom eins og þruma úr heiðskýru lofti.  The Byrds hafði verið leiðandi í nýskapandi músíkstílum og öðru tilraunakenndu hippa-rokki.  Þeir höfðu daðrað við kántrý í einu og einu lagi á fyrri plötum.  Það kom vel út innan um hipparokkið.  Létti stemmninguna og gerði plöturnar auðmeltari við fyrstu hlustun.

  Á Sweetheart of the Rodeo  er annað upp á teningnum.  Platan inniheldur ekkert tilraunakennt og þungmelt hipparokk.  Aðeins kántrý.  Hreint og tært kántrý.  Að vísu rokkaðra en kántrý-unnendur áttu að venjast.  Kántrý-unnendur þoldu ekki þessa plötu.  Því síður hipparnir.  Platan seldist ekki neitt.  Hún passaði hvergi.  

  Einungis tvö lög voru frumsamin.  Bæði eftir nýjasta liðsmanninn,  hljómborðsleikarann og gítarleikarann Gram Parsons.  Önnur voru eftir Bob Dylan,  Woody Guthrie,  Merle Haggard eða gömul þjóðlög.

  Það liðu mörg ár áður en  Sweetheart of the Rodeo  hlaut uppreisn æru.  Í dag er hún talin vera ein af merkustu plötum rokksögunnar.  Hún lagði grunn að því sem kallast alt-kántrý (alternative country) og ól af sér hljómsveitir eins og Wilco,  Green on Red,  Long Ryders.

...

  The Byrds á Sweetheart Of The Rodeo:  

  Roger McGuinn:  Gítar,  söngur

  Chris Hillman:  Bassi,  söngur

  Gram Parsons (dáinn 1973):  Hljómborð,  gítar,  söngur

  Kevin Kelley:  Trommur   

.

.

  Kántrý-platan Sweetheart Of The Rodeo er að sumu leyti ranglega skilgreind sem hliðarspor VEGNA tilkomu Grams Parsons.  Jú,  vissulega setti Gram Parsons sterkan svip á þá plötu.  En í raun hafði Roger McGuinn einbeittan vilja til að gera blúgrass og kántrý-kennda plötu.  Þess vegna var Gram Parsons fenginn til leiks.  Án hans hefði platan ekki orðið eins "honky-tonk" leg og hún varð. 

.

  Sjöunda plata The Byrds,  Dr.  Byrds & Mr. Hyde,  er fyrsta plata The Byrds sem er hvorki 5 stjörnu plata né hálf fimmta stjörnu plata.  Gram Parsons er hættur og kominn í slagtog með The Rolling Stones.  Hann á þó tvö lög á plötunni,  Drug Store Truck Driving Man  (krákað af Joan Baez á Woodstock),  ásamt Roger McGuinn, og Nashville West,  einnig ásamt Roger McGuinn og líka trommuleikaranum Gene Parsons.  Gítarsnillingurinn Clarence White er orðinn fullgildur liðsmaður eftir að hafa aðstoðað á fyrri plötum.  Hljómsveitin var eins og hálf áttavillt eftir "flopp"  Sweetheart Of The Rodeo.  Plötunnar sem í dag fær allsstaðar 5 stjörnur en var á þeim tíma ennþá í skammarkróknum.

.

  The Byrds á Dr. Byrds & Mr. Hyde:

  Roger McGuinn:  Gítar,  söngur

  Clarence White (dáinn 1973):  Gítar,  söngur

  John York:  Bassi,  söngur

  Gene Parsons:  trommur,  söngur

.

.

  Áttunda plata The Byrds er Ballad Of Easy Rider.  Titillagið er samið af Roger McGuinn og Bob Dylan.  Það var jafnframt einkennislag kvikmyndarinnar Easy Rider  með þeim Peter Fonda og Dennis Hopper.  Þetta er fjögurra stjörnu plata sem inniheldur m.a. rokklagið  Fido  eftir Gene Parsons og Deportee  eftir Woody Guthrie.  Síðarnefnda lagið er sömuleiðis að finna á dúettplötu Gene(s) Clark(s) og Cörlu Olsen.  Frábært lag sem Bubbi söng við frumsaminn texta um Synettu,  skip sem fórst á Austfjörðum.

  Á plötunni er líka lagið  Jesus Is Just Allright  sem síðar varð frægt með Doobie Brothers.  Þegar hér var komið sögu - og reyndar nokkru áður - var Roger McGuinn og fleiri Byrdsarar orðnir áhugasamir um Jesú. 

. 

.

  Níunda The Byrds platan kallast Untitled.  Þetta var vel heppnuð tvöföld plata með hljómleikaupptökum af eldri lögum og ný hljóðverslög.  Góð plata.  Hún inniheldur m.a. 3 lög eftir nýjan bassaleikara,  Skip Battin.  Þarna er líka flott lag eftir Leadbelly,  Take A Whiff On Me.  Og annað til eftir Leadbelly á endurútgáfu. 

.

  The Byrds á  Untitled:

  Roger McGuinn:  Gítar,  söngur

  Clarence White:  Gítar,  söngur

  Skip Battin (dáinn 2003):  Bassi,  söngur

  Gene Parsons:  Trommur,  söngur

.

  Tíunda plata The Byrds,  Byrdsmaniax,  er þeirra slappasta.  Ekki beinlínis alvond en síðasta The Byrds plata sem fólk á að kaupa.  Upphafslagið er gospel-lagið  Glory,  Glory.  Allt í lagi.  Eins og önnur lög á plötunni.  En ekki þessi snilld sem fyrri The Byrds plötur geyma.  Tunnel Of Love  heitir ágætur blús eftir Skip Battin.  En þetta er varla 3ja stjörnu plata.  En Roger McGuinn er kátur með Jesú.

.

.

  Ellefta platan,  Farther Along,  er örlítið betri en  Byrdsmaniax.  En ekki mikið.  

  Tólfta og síðast hljóðversplata The Byrds var hálf misheppnuð endurreisn gömlu The Byrds.  Samnefnd hljómsveitinni.

.

  The Byrds á þeirri plötu:

  Roger McGuinn:  Gítar,  söngur

  Gene Clark:  Gítar,  söngur

  David Crosby:  Gítar,  söngur

  Chris Hillman:  Bassi,  söngur

  Michael Clarke:  Trommur

.

  Eins og sést á þessari samantekt hýsti The Byrds 11 liðsmenn á þeim 12 hljóðversplötum sem eftir hljómsveitina liggur,  útgefnum á árunum 1965 til 1973.  Þessar plötur höfðu mikil áhrif á framvinduna í rokksögunni á þessum árum og einstaklingarnir í The Byrds ekki síður í því sem þeir gerðu á öðrum vettvangi.  Eitt lítið dæmi:  Á meistarastykki Rogers McGuinns,  plötunni Cardif Rose,  er fyrsta The Clash lagið,  Rock And Roll Time. Lag sem kom út 1976,  ári á undan fyrstu plötu The Clash.  Hljómsveitir eins og R.E.M., Wilco og Long Ryders eru á fullu í að vinna úr arfleifð The Byrds ásamt 10.000 öðrum hljómsveitum.  Lagið Gamli grafreiturinn  með Klassart er einnig dæmi um það.       

  Flestir liðsmenn The Byrds áttu og / eða hafa átt farsælan feril á sólóferli eða með öðrum hljómsveitum.  Gott dæmi um það er Crosby,  Stills,  Nash & Young og The Flying Burrito Brothers.  Sú umfjöllun bíður betri tíma á þessum vettvangi. 

 

Blessuð börnin

  Þetta er fólkið sem tekur við af þeim sem ráða í dag.  Mun það standa sig betur?

Skemmtilegur samkvæmisleikur

  Fréttablaðið og Morgunblaðið eru bæði með skemmtilegan dálk sem fylgir birtingu þeirra á dagskrá helstu sjónvarpsstöðva.  Blaðamenn þessara dagblaða skrifa létta umsögn um sjónvarpsdagskrána.  Úr þessu má gera sér léttan samkvæmisleik.  Hann felst í því að við lestur dagblaðanna setur lesandinn fingur yfir höfund pistilsins.  Veit þannig ekki hver er höfundur pistilsins.  Leikurinn gengur út á það að giska á hvort kona eða karl skrifar pistilinn.  Svo skemmtilega vill til að nánast undantekningarlaust er hægt að átta sig á hvort karl eða kona skrifar pistilinn. 

  Ef vísað er til klæðaburðar einhvers í sjónvarpsþætti eða eitthvað er nefnt sem tengist sápuóperum er næsta víst að kona er höfundur pistilsins.  Ef hinsvegar fótbolti er nefndur eða eitthvað um pólitík er höfundurinn karl.

  Prófið þennan leik.  Í 99,9% tilfella er ágiskunin rétt um hvort karl eða kona er höfundur pistilsins.  Það skemmtilega við þennan leik er að hægt er að afgreiða hann án aðstoðar utanaðkomandi.   

Hver þarf sendibíl ef hann á hjól?

  Þegar flytja þarf eitthvað á milli staða,  eitthvað sem er stærra en lítill innkaupapoki úr matvöruverslun,  þá dettur fólki yfirleitt aldrei annað í hug en að hringja á sendibíl.  Helst með lyftu og trillu.  Þetta þekki ég vegna þess að ég ek um á sendibíl.  Staðreyndin er þó sú að það er miklu þægilegra að selflytja vörur á litlu og lipru hjóli.       

  Í fljótu bragði er ekki auðséð hvað hér er á ferð.  Við nánari skoðun kemur í ljós að þarna er verið að ferja stóran og glæsilegan spegil.