Áróður sem virkar ekki

  Til fjölda ára hefur allskonar áróður verið prentaður á sígarettupakka.  Þar er fullyrt að reykingar geti valdið hægfara og kvalafullum dauða,  valdið lungnasjúkdómum,  séu mjög skaðlegar fyrir þig og þá sem eru nálægt þér og svo framvegis.  Þessi háttur er ekki aðeins hafður á hérlendis heldur líka í útlöndum og víðar. 

  Rannsóknir sýna að þessar merkingar hafa ekkert varnargildi.  Þvert á móti.  Þær hafa hvetjandi áhrif í þá átt að fleiri vilja reykja og þeir sem þegar reykja vilja reykja meira.  Sálfræðingar kunna skil á ástæðum þess.  Ég ætla ekki að fara út í það heldur undrast að þessum merkingum sé haldið áfram eftir að umrædd vitneskja liggur fyrir.  Og þó.  Rannsóknir hafa sömuleiðis sýnt fram á að það er enginn munur á aksturshæfni bílstjóra eftir því hvort hann heldur á farsíma eða hvort hann notar handfrjálsan búnað.  Samt er stranglega bannað - að viðlögðum háum fjársektum - að ökumaður tali í farsíma án handfrjáls búnaðar. 

  Aftur á móti er refsilaust fyrir ökumenn að halda á og tala í talstöð.  Jafnvel einhverja bölvaða vitleysu.  Eðli málsins samkvæmt er enginn munur á því hvort ökumenn halda á talstöð eða farsíma.  Nema:  Annað er bannað.  Ekki hitt.

  Sumum finnst rosalega gaman að setja lög.  Banna hitt og þetta.  Hvort sem einhver glóra er í því eða ekki.  Núna síðast var Álfheiður Ingadóttir að banna fólki undir 18 ára aldri að fara í sólbað.  Lögreglan er að skipuleggja eftirlit með sólböðum í sumar.  Gestir á Ylströndinni í Nauthólsvík verða að hafa meðferðis nafnskírteini á sólríkum dögum.  Annars verða þeir sektaðir.  Sú hugmynd hefur þó einnig komið upp að loka Ylströndinni á sólardögum vegna þessa. 

 

Ómerktir sígarettupakkar

Meiriháttar flottar ljósmyndir af eldgosinu

  Fyrir tveimur árum (júní 2008) skrapp ég til Boston í Bandaríkjunum.  Svo einkennilega vildi til að á þeim tímapunkti fór þar á hausinn fríblað í eigu Íslendinga.  Mig minnir að það hafi heitið Boston News.  Það var í eigu Baugsfeðga.  Það kom mér á óvart að hljótt hafði farið um þetta blað í íslenskum fjölmiðlum.  Einnig þegar það fór á hausinn.  En í Boston gerðu "lókal"fjölmiðlar mikið úr örlögum þessa fríblaðs.

  Bostonbúar skildu hvorki upp né niður í þessu uppátæki Íslendinga að ryðjast inn á dagblaðamarkað í Boston.  Sögðu það ganga brjálæði næst.  Dæmið væri svo vonlaust. 

  Svo undarlega vildi til að í Boston rakst ég á fjölda Íslendinga.  Ég þekkti þá ekki alla með nafni.  En kannaðist við menn eins og Kára Stefánsson,  Geir Haaarde og Lúðvík Bergsveinsson (eða hvað hann heitir samfylkingargaurinn með öll bankalánin).  Þetta lið rölti um aðal verslunargötuna í Boston ásamt fjölda annarra Íslendinga.

  Áður en ég fór til Boston hef ég aðallega verið í suðurríkjum Bandaríkjanna.  Ólíkt suðurríkjamönnum eru Bostonbúar mjög evrópskir og fylgjast vel með heimsmálum.  Ég held að ég hafi ekki hitt neinn Bostonbúa sem var ekki neikvæður í garð Bush.  Jafnframt kom mér á óvart hvað margir þekktu til Íslands,  áttu plötur með Björk og Sigur Rós og voru bara vel á nótunum.  Töluvert annað en þegar rætt er við suðurríkjamenn.

  Hér er safn frábærra ljósmynda af eldgosunum á Íslandi birtar á boston.com (smelltu á slóðina):    http://www.boston.com/bigpicture/2010/04/more_from_eyjafjallajokull.html

Mun stærra íslenskt eldfjall „við það að springa“

Í sambúð með látinni konu

  Aldraður Dani hefur orðið uppvís af því að búa áfram með eiginkonu sinni sem lést fyrir fjórum mánuðum.  Karlinum þótti þetta vera eitt besta tímabil hjónabandsins.  Á þessum fjórum mánuðum nöldraði konan aldrei yfir bjórdrykkju mannsins, vindlareykingum né öðru sem hún var vön að kvarta undan í fari hans.  Þess í stað sat hún þæg við hlið hans á meðan hann fylgdist með fótbolta í sjónvarpinu sötrandi sinn bjór og reykjandi vindla.  Hann sagði henni grobbsögur af sér án þess að hún gripi fram í og reyndi að gera lítið úr sögunum.  Annað eftir því.

  Þau eiga enga nána ættingja á lífi.  Það voru nágrannar sem tilkynntu lögreglu um að ekkert hafi til konunnar sést í fjóra mánuði.  Þeir óttuðust að eitthvað saknæmt hefði átt sér stað því að fyrir þann tíma mátti oft heyra til öldruðu hjónanna rífast.  Niðurstaðan er sú að konan dó eðlilegum dauða.  

Af hverju er Geir svona hræddur við Davíð?

  Fæddur og uppalinn í sveit kannast ég við svipinn á lúbörðum hundum.  Þeir bera höfuð lágt og gjóa augum hræðslulega upp á við.  Þessi svipbrigði birtast á Geir Haaarde þegar minnst er á Davíð Oddsson.  Þetta vekur spurningu:  Hvers vegna er Geir svona hræddur við Davíð?  Í skýrslu rannsóknarnefndar Alþingis kemur ítrekað fram hvað Geir var hræddur við Davíð.  Meðal annars er haft eftir Davíð sjálfum að Geir hafi skolfið eins og lauf í vindi og ekkert vitað hvað hann átti eða mátti gera.

  Þetta er ekki eðlilegt.  Geir var formaður Sjálfstæðisflokksins og forsætisráðherra.  Geir var sá sem valdið hafði í raun.  Af hverju var hann þá eins og lúbarinn hundur í samskiptum við óhæfan bankastjóra Seðlabankans? 

  Ég er ekki nógu vel að mér í sálfræðinni sem snýr að heimilisofbeldi.  DOddsson hefur sagt frá því að hann notaði sérstaka aðferð til að tukta nemendur í,  ja,  var það ekki Verslunarskólanum?  DOddsson sló þá eldsnöggt í höfuðið með priki eða reglustriku.  Þá limpuðust ódælir nemendur niður.  Einhvernvegin á ég erfitt með að trúa því að DOddsson hafi lamið Geir með priki.  Ég held að hann hafi ekki einu sinni þurft að sparka í Geir til að framkalla þessa hræðslu og ráðaleysi.  Ráðaleysið er Geir sennilega í blóð borið.  Það er spurning með þessa ofurhræðslu við DOddsson.  

  Ekki voru kúlúlánadrottningin,  Þorgerður Katrín,  varaformaður Sjálfstæðisflokksins,  og Tryggvi Þór Herbertsson,  sérlegur efnahagsráðgjafi Geirs,  hrædd við DOddsson.  Þrátt fyrir tryllingskastið sem DOddsson tók á Tryggva.  Ég veit að gamla pönkarnum,  Tryggvi Þór,  hefur fremur þótt kast DOddssonar fyndið og súrrealískt.  Dáldið pönk.

   Verra er að í skýrslunni er haft eftir DOddssyni að Geir sé "idót".  Það er virkilega osmekklegt.  DOddsson hefur gott vald á íslensku máli þegar hann vill svo við hafa.  Það fer honum ekki að nota svona útlendar slettur.  Íslenskan býður upp á mörg rammíslensk orð "sem gera sama gagn".

  

„Skynjuðu að dansinum var að ljúka“

Smásaga um þjón

  Íbúar kaupstaðarins eru ekki á einu máli um þjónninn að sunnan.  Hann vinnur langar vaktir á vinsælasta veitingastaðnum.  Stelpunum þykir hann sætur.  Líka eldri konunum.  Þær viðurkenna það samt ekki allar.  Að minnsta kosti ekki svo karlinn þeirra heyri.  Karlinn er svo svakalega afbrýðisamur.  Og dyndóttur.

  Strákarnir eru ekki eins hrifnir af þjóninum.  Með nokkrum undantekningum.  Það sem strákarnir setja út á þjóninn er að hann kveður alla gesti með kossi.  Alla.  Ekki síst Alla Jóns. 

  Þetta er ekki mömmukoss á kinnina.  Nema þegar börn eiga hlut að máli.  Þjónninn er enginn perri.  Þeim mun meira leggur hann sig fram í kossaflensi við þá sem komnir eru af unglingsárum.  Hann fer í hörkusleik við þá.  Og fer ekki í manngreinaálit.  Hann gerir ekki upp á milli tvítugra stelpna og karla á níræðisaldri.  Að því frátöldu að hann leyfir öllum yfir áttrætt að borða frítt ef þeir eru í fylgd með foreldrum sínum.  Bara sínum.  Þess er vandlega gætt að þeir séu ekki í fylgd með foreldrum einhvers annars.

  Öldruðu gestunum þykir gaman að fara í sleik við þjóninn.  Eða ekki beinlínis gaman heldur þykir þeim kostur að í sleiknum þrífur hann allar matarleifar af gervigómunum þeirra.  Gamla fólkið veit ekki að þjóninum þykir þetta einnig hagkvæmt fyrir sig.  Hann fer aldrei svangur í rúmið og fær að smakka á helstu réttum veitingastaðarins hvern dag.  Hann skilgreinir þetta sem lið í gæðaeftirliti með kokkum staðarins.

  Þá sjaldan sem þjónninn lyftir sér upp og heimsækir íbúa kaupstaðarins fer hann einnig í sleik við gæludýrin er hann kveður.  Aðallega hunda og ketti.  Skiptir ekki máli.  Hann stendur sína plikt.  Samviskusemi er honum í blóð borin.  Þetta er góður þjónn. 

  Sumum þykir skrítið að út úr enni þjónsins stendur loftnet af gömlu útvarpstæki.  Þar hefur loftnetið verið síðan honum skrikaði eitt sinn fótur í ælu á gólfinu eftir matvandan gest.  Þjónninn flaug þá eins og sperrtur hani.  Því næst flaug hann beint á hausinn á útvarpstæki staðarins.  Í lendingunni stakkst loftnetið á kaf inn í ennið.  Um leið brotnaði það af útvarpstækin. 

  Þjóninum þykir flott að hafa loftnet á enninu.  Hann hefur alltaf hrifist af hyrndum kindum og kúm.  Honum þykir reisn yfir þeim.

  Í desember setur þjónninn jólaskraut á loftnetið.

-------------------------------------------------------------------------------------------

.

Fleiri smásögur og leikrit:

 - Gamall einbúi:

 http://jensgud.blog.is/blog/jensgud/entry/1036775

- Systur:

http://www.jensgud.blog.is/blog/jensgud/entry/1017021/

 - Jólasaga:

http://www.jensgud.blog.is/blog/jensgud/entry/1008279/

.

- Á rjúpnaveiðum:

http://www.jensgud.blog.is/blog/jensgud/entry/988782/

.

- Ólétt nunna:

http://www.jensgud.blog.is/blog/jensgud/entry/978349/

.

- Gullfiskur:

http://jensgud.blog.is/blog/jensgud/entry/965433

.

- Flugvélamódel:

http://jensgud.blog.is/blog/jensgud/entry/955702

.

- Miðaldra maður:

http://jensgud.blog.is/blog/jensgud/entry/944608

.

- Leyndarmál stráks:

http://jensgud.blog.is/blog/jensgud/entry/928198

.

- Ættleiðing:

http://jensgud.blog.is/blog/jensgud/entry/916687/

.

- Strákur með sög:

http://jensgud.blog.is/blog/jensgud/entry/903540

.

- Hundur:

http://jensgud.blog.is/blog/jensgud/entry/863130

.

- Boltabulla:

http://jensgud.blog.is/blog/jensgud/entry/718347

.

- Skokkari:

http://jensgud.blog.is/blog/jensgud/entry/606929

.

- Strákur skiptir um gír:

http://jensgud.blog.is/blog/jensgud/entry/538649

.

- Morðsaga:

http://jensgud.blog.is/blog/jensgud/entry/320299

.

- 27 ára:

http://jensgud.blog.is/blog/jensgud/entry/299380

.

- Um borð:

 http://jensgud.blog.is/blog/jensgud/entry/278812

.

- Matarboð í sveitinni:

http://jensgud.blog.is/blog/jensgud/entry/266411

.

- Í plötubúð:

http://jensgud.blog.is/blog/jensgud/entry/260037

Nú er tækifæri að ganga í ameríska herinn

  Nú er lag.  Láttu drauminn rætast!  Alvöru byssur og allt.

Hvenær byrja menn að neyta fíkniefna?

  Ég veit ekki af hverju síðustu færslur mínar fjalla um eiturlyf.  Kannski er undirmeðvitundin að búa mig undir að verða dópisti.  Eða þá að þetta er tilviljun.  Í Morgunblaðinu er frétt af breska píkupopparanum leiðinlega,  Robbie Williams.  Þar er sagt að hann hafi byrjað að neyta fíkniefna 1993.  Jafnframt er upplýst að áður en hann fór að neyta fíkniefna hafi hann verið í e-pillunni, spítti og sýru. 

  Einhverra hluta vegna rifjar þetta upp dómsorð í líkamsárásarmáli.  Þar sagði frá tveimur mönnum sem hittust á götu í Vestmannaeyjum.  Eftir rifrildi og hótanir fóru þeir að kýla og sparka í hvorn annan.  Síðan stóð í dómnum:  "Þessu næst fóru þeir að slást". 

Sólbaðslögga í uppsiglingu

  Það kitlar margan embættismanninn að setja lög til að siða skrílinn.  Stjórnsamur embættismaður grípur hvert tækifæri sem gefst til að stýra hegðun óþroskaðri einstaklinga.  Oft er ákafinn slíkur að til vandræða horfir.  Dæmi um það er þegar mikil "móðursýki" greip um sig er tveir franskir vísindamenn skrifuðu grein í fagtímarit um tilraun sem þeir gerðu á rottum.  Létu þær svamla vikum saman í tilteknum efnum sem finnast í sólvarnarkremum.  Með tíð og tíma greindu þeir krabbameinsmyndun í rottunum.

  Heilbrigðisyfirvöld,  einkum á Norðurlöndunum,  brugðust skjótt við og fóru í gífurlega herferð gegn sólkremum.  Svo rammt kvað að þessu að í Danmörku voru sólvarnarkrem tekin úr sölu.  Frönsku vísindamönnunum var brugðið.  Þetta var kolvitlaus túlkun á rannsókn þeirra.  Þeir sendu frá sér yfirlýsingu þar sem fólk var hvatt til að nota sólvarnarkrem.  Skammturinn af sólvarnarefnunum sem rotturnar svömluðu í var margmilljónfaldur á við það sem manneskja notar þegar hún ber á sig sólvarnarkrem.  Rann þá móður af embættismönnum og sólkrem voru aftur tekin í sölu. 

  Þetta var fyrir röskum áratug.  Aldarfjórðungi áður greip um sig svipuð taugaveiklun varðandi gosdrykkinn Fresca.  Hann var sagður baneitraður.  Þegar betur var að gáð þurfti að drekka daglega 37 flöskur af honum áður en ástæða var til að hafa áhyggjur.

  Nú eru embættismenn í kasti vegna sólbaða.  Hugmyndir eru uppi um að ungt fólk verði að framvísa skírteini sem sannar að það sé 18 ára eða eldra til að fá að liggja í sólbaði.  Það þarf að stofna sérstaka sveit sólbaðslögreglu til að fylgja eftir fyrirhuguðum lögum um að einungis fullorðnir einstaklingar megi njóta góðs af sólböðum.  Myndin hér fyrir ofan sýnir forvörn af þessu tagi.  Þarna var ekki víst að einstaklingur hefði náð 18 ára aldri er hann reyndi að fá sólarljós á kroppinn.

  Staðreyndin er sú að sólarljósið er forsenda lífs á jörðinni.  Áhrif sólarljóssins er okkur á Norðurhjara augljós.  Þegar sól hækkar á lofti að vori breytir náttúran um svip.  Tré laufgast,  blóm spretta út,  skordýr lifna við og mannlífið tekur á sig líflegan blæ.

  Sólarljósið er bráðhollt.  Sólbökuð húð framleiðir D-vítamín sem kemur af stað upptöku á kalki og styrkir bein,  tennur,  hár og húð.  Ljósið vinnur gegn ýmsum húðsjúkdómum,  svo sem exemi,  sóríasis,  bólum o.s.frv.  Ljósið framkallar gleðiboðefni í heilanum og vinnur þannig gegn þunglyndi.  Ljósið er einnig kynörvandi og dregur verulega úr líkum á krabbameini af flestu tagi.  Sólböð eru holl.  Virkilega holl.

  Hitt er annað mál að hægt er að ofbjóða sér með sólarljósi.  Alveg eins og með ofþambi á lýsi og inntöku á ýmsum vítamínum.  Það er önnur saga.

  

   

         

D-vítamín mikilvægara en talið var

Enn ein líkamsárás í útvarpi

 

 

  Það er skammt stórra högga á milli í húsakynnum íslenskra útvarpsstöðva.  Í fyrradag réðist rapparinn Móri á rapparann Blaz Roca (Erp Eyvindarson) í hljóðstofu útvarpsstöðvarinnar X-ins.  Móri var vopnaður hnífi,  byssu og hundi.  Nú gerðist það fyrir nokkrum mínútum að dagskrárgerðarmaður á Útvarpi Sögu varð fyrir líkamsárás hlustanda.

  Forsagan er sú að Guðmundur Franklín Jónsson var með gesti í hljóðstofu.  Hlustendum bauðst að hringja inn og ræða við fyrsta gestinn,  ungan útgerðarmann af Reykjanesskaga.  Eiríkur Stefánsson,  fyrrverandi verkalýðsforingi á Fáskrúðsfirði hringdi inn.  Hann vildi ræða við Guðmund en ekki gest hans.  Guðmundur sleit því símtalinu.

  Þessi gestur hvarf á braut og tveir aðrir komu í staðinn.  Þeir Illugi Gunnarsson, alþingismaður, og Grétar Mar, fyrrverandi alþingismaður og núverandi útgerðarmaður.  Þá barst inn á borð til Guðmundar miði.  Á honum stóð að Eiríkur Stefánsson væri mættur á staðinn og þyrfti að tala við hann.  Guðmundur var bundinn við þáttarstjórn og hafði ekki svigrúm til að sinna boði Eiríks.  

  Þegar þættinum lauk og Guðmundur gekk út úr hljóðstofu kastaði hann kveðju á Eirík sem sat þar á stól.  Guðmundur tilkynnti jafnframt að hann væri tímabundinn og gæti því ekki sest niður með Eiríki.  

  Við þessi tíðindi snöggfauk í Eirík.  Hann spratt á fætur,  sveif á Guðmund og keyrði hann á bakvið hurð.  Grétar Mar,  Illugi og Gunni "Byrds" brugðust skjótt við,  náðu að losa Guðmund úr krumlum Eiríks og héldu Eiríki í föstum.  Þeir eru allir þokkalega hraustir og Gunni að auki fyrrverandi dyravörður á skemmtistöðum.

   Þegar móðurinn virtist runninn að mestu af Eiríki reiða var samið við hann um að haga sér vel.  Eiríkur var fús til þess.  Lofaði að verða ljúfur sem lamb ef honum yrði sleppt lausum.  Það var ekki fyrr búið að sleppa honum en hann réðist aftur að Guðmundi.  Í þetta sinn náði hann að grýta tölvu Guðmundar í gólfið áður en þremenningarnir yfirbuguðu Eirík á ný.   Ekki þótti stætt á að sleppa Eiríki aftur fyrr en Guðmundur hafði forðað sér úr húsi.

  Guðmundur ætlar ekki að kæra Eirík.  Hinsvegar á eftir að koma í ljós hvert tjón hefur orðið á tölvunni.

Ákært vegna grófra ásakana um blýantsleysi

  Ríkissaksóknari hefur ákært Odd Eystein Friðriksson fyrir ærumeiðandi móðganir og aðdróttanir í garð forstjóra Sláturfélags Suðurlands,  Steinþórs Skúlasonar.  Ummæli Odds eru tekin af heimasíðunni www.slaturfelagid.com.  Þeirri skemmtilegu og fróðlegu síðu hefur nú verið lokað,  einhverra hluta vegna.

  Steinþór kærði síðuna til lögreglu.  Rannsókn hennar (lögreglunnar. Ekki síðunnar) leiddi til ákæru á hendur Oddi Eysteini.  Oddur þrætir fyrir aðkomu sína að síðunni.  Segist aldrei hafa átt nein samskipti við Steinþór og vísar til þess að ekkert í tölvum sem hann hafi aðgang að bendi til neinna tengsla við síðuna góðu.

  Ummælin,  sem kannski verða dæmd ómerk,  eru á þá leið að Steinþór sé húmorslaus og blýantslaus.  Hið rétta mun vera að Steinþór hefur húmor - þó fáir átti sig á þeim húmor.   Þá hefur hann aðeins einu sinni orðið blýantslaus.  Blýantsleysið stóð bara í örfáa daga.  Úr því var bætt  rækilega.  Síðan hefur Steinþór haft aðgang að tveimur blýöntum.  Einum ómáluðum og öðrum gulum.  Sá guli er með strokleðri.

  Saklausari ummæli á síðunni fljóta með í ákærunni til að gefa henni meiri þyngd.  Þar á meðal að Steinþór sé jafnan kallaður "forstjórafíflið" af starfsmönnum og sé sennilega leiðinlegasti maður í heimi - frá upphafi. 

  Það verður erfitt að meta að fullu þetta síðastnefnda.  Bæði er að þar er varnagli á með orðinu "sennilega",  svo og hitt að samanburður við forfeður okkar frá því maðurinn varð til er snúinn,  hvað þetta varðar.

  Steinþóri er kennt um vondan starfsanda innan fyrirtækisins.  Til hans er rakið að starfsmenn slást á árshátíðum,  þorrablótum og keilukvöldum fyrirtækisins.  Þetta getur ekki talist forstjóranum til lasts.  Það er alltaf gaman að sjá unga menn takast á og reyna sig í léttum áflogum.  Það er heilbrigt og hressandi á meðan enginn slasast verulega.  Að vísu hefur þetta leitt til nefbrots.  En hver hefur ekki gott af nefbroti einu sinni á ævinni?  Grétar á Goðdölum í Skagafirði nefbrotnaði tvisvar á ævinni og blés ekki úr nös eftir það.  En fór að taka í nefið til að hafa eitthvert not af því.

   Dómarar í þessu fjörlega meiðyrðamáli standa frammi fyrir fjölda vandamála.  Sönnunarbyrði um það hvort ummælin skuli dæmd ómerk er harðsótt.  Hvað ef ummælin reynast vera sönn og rétt?  Þá verður málið fyrst strembið fyrir alvöru.

.

    

Segist ekki bera ábyrgð á nafnlausum skrifum