Hvað þá með Færeyska fjölskyldudaga? Hápunkturinn er í kvöld!

  Gríðarlega undrun vekur hvað gestir þjóðhátíðar í Vestmannaeyjum eru prúðir og stilltir.  Það hafa ekki komið til kasta lögreglu nema 32 fíkniefnamál.  Kærðar líkamsárásir eru nokkuð færri.  Fjölmiðlar standa á öndinni yfir þessari friðsæld í Eyjum.  Hvernig er þá hægt að lýsa stemmningunni á Færeyskum fjölskyldudögum á Stokkseyri?  Þar hafa ekki komið upp nein mál:  Ekkert dóp,  engin slagsmál.  Það hefur ekki einu sinni komið upp sú staða að menn séu ósammála um eitt né neitt.  Þvert á móti.  500 gestir Færeyskra fjölskyldudaga eru algjörlega samstíga í að skemmta sér saman í glaðværð undir hverju frábæra tónlistaratriðinu á fætur öðru.

  Í kvöld er hápunktur Færeyskra fjölskyldudaga.  Hann hefst á hljómleikum Högna og hljómsveitar.  Högni sló rækilega í gegn hérlendis fyrir fjórum árum með laginu  Morning Dew.  Það var vinsælasta lagið á Íslandi vikum saman.  Vinsældunum fylgdi Högni eftir með fleiri lögum og hljómleikum á Íslandi.  Síðar spilaði hann tvívegis á Airwaves. 

  Högni nýtur velgengni í Danmörku,  Sviss og víðar.  Í heimalandinu,  Færeyjum,  er hann stórstjarna.  Þar var platan  Morning Dew  valin plata ársins.  Högni hefur a.m.k. tvígeis spilað á Hróarskeldu.  Og alltaf hlotið afbragðs góða dóma fyrir frammistöðuna.  Þrátt fyrir að plötur Högna séu góðar þá er hann ennþá betri á sviði.  Spilagleðin er svo mikil að meðspilarar og áheyrendur fara á flug.

  Hljómleikar Högna hefjast klukkan 9.  Eftir að þeim lýkur tekur við þjóðlagadanshljómsveitin Kvonn.  Þetta er mögnuð hljómsveit undir forystu 26 ára fiðlusnillingsins Angeliku Nielsen (nafnið Angelika þýðir kvönn). 

  Svo er komið að hljómleikum Eivarar og hljómsveitar.  Þau voru einnig með hljómleika í gær.  Meiriháttar frábæra hljómleika.  Ég hef sennilega verið á hátt í 30 hljómleikum með Eivöru.  Hún hefur aldrei verið betri og hljómsveitin hennar er stórkostleg.  Þau fóru á þvílíkum kostum að salurinn stóð ítrekað á öndinni hvort sem var undir ofurfallegum köflum eða þrusufössuðu gítarrokki þar sem rokkgírinn var settur í fluggír.  Er hljómleikunum lauk í gær mátti heyra marga segjast vera strax byrjaða að hlakka til hljómleikanna í kvöld.

  Dagskrá Færeyskra fjölskyldudaga lýkur með svokölluðum "All Star" dansleik.  Þar munu 16 færeyskir tónlistarmenn halda uppi þrumustuði fram á nótt.  Þeirra á meðal verða Eivör,  Högni,  Jens Lisberg, Hilmar Joensen,  Kristian Blak og Árni Andreasen.  Þetta verður einstakt tækifæri til að sjá Eivöru og Högna syngja allt öðru vísi stuðmúsík en fólk á að venjast með þeim. 

        

Óvenju þægir þjóðhátíðargestir

Athugasemdir

[Halldór Jóhannsson, 1.8.2010 kl. 18:00]

Já blessaðir fjölmiðlarnir gráta að geta ekki sagt eitthvað slæmt af gestum Þjóðhátíðar td..

Hefði svo sannarlega viljað að geta verið á Færeyskum dögum...

Bestu kveðjur..

[Ásdís Sigurðardóttir, 1.8.2010 kl. 19:40]

Var að setja mynd af Eivör og Bjarna mínum á bloggið mitt :)

[Sigurbjörg Sigurðardóttir, 1.8.2010 kl. 22:06]

Sé að þú syndir í Kampavíni með Færika músik,hafðu góða helgi. Ég því miður hef einga þekkingu á færisku menningu né músik,við tvö getum bara talað um rokkk  punk og alla músik.

[Rögnvaldur S Valbergsson (IP-tala skráð) 1.8.2010 kl. 23:00]

Sammála þér með Eyvöru, hlustaði á hana og hljómsveitina hennar á Græna hattinum á Akureyri í vor, engu öðru líkt, alveg frábært

[Hannes, 1.8.2010 kl. 23:53]

Ég held að ég láti það duga að hlusta á öfga kínverskt þjóðernsispopp og Paul Robeson í kvöld.

[Ómar Ingi, 2.8.2010 kl. 10:55]

Hannes alltaf hress að vanda

[Jens Guð, 2.8.2010 kl. 18:56]

  Halldór,  þú mætir bara næst.  Kátur og hress.

[Jens Guð, 2.8.2010 kl. 18:58]

  Ásdís,  þú varst ekki mikið að kasta kveðju á mig þarna.

[Jens Guð, 2.8.2010 kl. 19:01]

  Sigurbjörg,  það er pínulítið ónákvæmt að segja mig hafa synt í kampavíni.  Ég var meira í færeyska bjórnum.  Sérstaklega rabbabarabrjórnum,  Yðun.

[Jens Guð, 2.8.2010 kl. 19:02]

  Rögnvaldur,  þar varstu heppinn;  að komast á hljómleikana á Græna hattinum.  Það var uppselt á þá.

[Jens Guð, 2.8.2010 kl. 19:05]

  Hannes,  ekki vildi ég skipta við þig á músíkdagskránni í gær.  Enda gerði ég það ekki og upplifði meiriháttar skemmtun undir glæsilegri færeyskri tónlist af ymsu tagi.

[Jens Guð, 2.8.2010 kl. 19:05]

  Ómar Ingi,  Hannes er alltaf í stuði.

[Hannes, 2.8.2010 kl. 19:39]

Jens ekki ég heldur.

[Jens Guð, 2.8.2010 kl. 22:17]

  Mikið vorum við heppnir að vera á réttum stöðum til samræmis við músíkina sem í boði var.