Hversu lengi geymist drykkjarvatn?

  Fyrir nokkrum dögum birti ég á þessum vettvangi stórfenglegar ljósmyndir af vatni.  Nokkrir fróðleiksmolar um vatn fylgdu með.  Þetta má sjá með því að "skrolla" niður síðuna eða smella á eftirfarandi hlekk:  http://www.jensgud.blog.is/blog/jensgud/entry/1222012/ .  Vatn er svo frábært fyrirbæri að þarna verður ekki látið staðar numið. 

  Allir kannast við aðstæður sem þessar:  Þú ert að keyra á bíl langt frá mannabyggð.  Þorsti hellist yfir þig.  Enginn lækur í augsýn.  Þá manstu skyndilega eftir flösku sem þú keyptir í fyrra með átöppuðu vatni og hefur verið ósnert í hanskahólfi bílsins síðan.  Þú teygir þig í flöskuna en sérð að dagsetningin á eftir "Best fyrir:" er útrunnin.  Hvað er til ráða?

  Svar:  Dagsetningin er bull.  Hún er eitthvað sem möppudýr í embættismannakraðaki hafa náð að setja í lög.  Forsendurnar eru ekki fyrir hendi.  Vatnið breytist ekkert í flöskunni næstu áratugi eða jafnvel árhundruð.  Norskur vatnssérfræðingur, Truls Krogh,  getur staðfest þetta.

  Reyndar geta einhverjir bent á að dagsetning á eftir orðunum "Best fyrir:" sé leiðbeinandi.  Hún þýðir ekki að varan sé óhæf til neyslu eftir þá dagsetningu.  Alltof margir halda að "Best fyrir:" þýði "síðasti neysludagur".  Þetta á ekki aðeins við um vatn.  Það er dapurlegt að vita af því hvað matvöruverslanir henda miklu magni af matvöru í góðu lagi vegna dagsetningar á eftir "Best fyrir". 

 Truls Krogh fullyrðir að vatn sé jafn gott þó að flaskan áðurnefnda hafi verið opnuð þegar hún var keypt og dreypt á vatninu þá.  Sama á við um það ef kranavatn er geymt opnu glasi í ísskáp.  Það er í fínu lagi að drekka það ári síðar.  

  Snjór er vatn í föstu formi.  Samspil vatns í lausu formi og föstu formi geta myndað fagurt landslag.     

Athugasemdir

[Theódór Gunnarsson, 12.2.2012 kl. 01:47]

Þegar ég var í sveit í gamla daga kom fyrir að mjólkin hljóp í kökk. Þá var hún tekin og hrært út í hana sykri og vanilludropum, og e.t.v. mjólk, eða rjóma.  Allavega var hún étin og þótti góð.  Núna er rjómanum hent ef dagsetningin segir svo, eða ef vottar fyrir því að hann sé að skylja sig.  Djöfull er ég orðinn gamall!

[Sólrún (IP-tala skráð) 12.2.2012 kl. 03:45]

http://www.youtube.com/watch?v=O4n-rw6vq-4

[V.Jóhannsson (IP-tala skráð) 12.2.2012 kl. 15:29]

Víst getur vatn fúlnað og fer eftir snefilefnum sem fynnast í því. Gott dæmi um snefilefni eru rakatæki sem notuð eru í fyrirtækjum t.d. prentsmiðjum. Á Íslandi fyllast þessi tæki af gróðurmyndun eða einhverskonar slýi og þarf að hreinsa þau með jöfnu millibili. Erlendis þarf aldrei að þrífa tækin. Þarna spilar sýrumagn örugglega inn í dæmið, enda er Íslenska vatnið með annað Ph gildi en vatn erlendis.

[Jens Guð, 12.2.2012 kl. 16:22]

  Theódór,  ég man líka eftir þessu úr sveitinni.  

[Jens Guð, 12.2.2012 kl. 16:27]

  Sólrún,  takk fyrir þetta skemmtilega myndband.

[Jens Guð, 12.2.2012 kl. 16:29]

  V.  Jóhannsson,  ég kannast við þessi rakatæki.  Þar er vatnið óvarið í heitum húsakynnum.  Allskonar ryk og óhreinindi svífa um loftið og komast í vatnið.