Getur komið sér vel að vita

 

  Margir Íslendingar senda ættingjum sínum og vinum,  búsettum erlendis,  harðfisk,  hangikjöt,  kæsta skötu,  kæstan hákarl og súrsaða hrútspunga.  Aðallega ber á þessu um eða fyrir sólrisuhátíðina,  jólin, ár hvert.  En líka á Þorra.  Vandamálið er að embættismenn á tollpóstsstofu í viðtökulandinu kunna þessu misjafnlega vel eða illa.  Þeir telja sig þurfa að vernda þjóð sína gegn þessum hugsanlega stórhættulegu matvælum.  Þeir þefa af matnum.  Lyktin staðfestir ranglega gruninn um skemmdan og skaðlegan mat.  Þá er ekki um annað að ræða en farga óþverranum samkvæmt kúnstarinnar reglum undir eftirliti.

  Viðtakandi jólapakkans fær svo loks í hendur heldur rýran kost.  Stundum með athugasemdum um að pósthúsið lykti ennþá til mikilla óþæginda fyrir starfsfólk.

  Það er til einfalt ráð til að koma hátíðargóðgætinu á áfangastað.  Það þarf einungis að merkja matvælin rækilega - og fylgiskjöl með pakkanum - sem kattafóður.  Reglur um dýrafóður eru mun rýmri en reglur um matvæli til manneldis.  

  Þetta skal einnig hafa í huga þegar íslenskur ferðamaður tekur áðurnefnd matvæli með sér í ferðatösku til útlanda.  

Athugasemdir

[Sigrún Aðalsteinsdóttir, 20.11.2012 kl. 11:17]

Þetta er ágætis lausn. Það er mjög áríðandi að senda íslenskum gæludýrum slíkt hnossgæti um jólin og verða þau örugglega öfunduð af manneskjum sínum :)

[Ásthildur Cesil Þórðardóttir, 20.11.2012 kl. 14:41]

Set þetta bak við eyrað.

[Stefán (IP-tala skráð) 20.11.2012 kl. 15:35]

Sigrún, er ekki einhver fyrrum borgarstjóri hér sem þyggur ölmusur og gjafir eins og gæludýr frá manneskjum sínum ?   Hugum að ,, smælingjunum " fyrir Jólin.

[E (IP-tala skráð) 20.11.2012 kl. 16:22]

Hvenær ætla íslendingar að hætta að éta úldinn og skemmdan mat?

[Jens Guð, 20.11.2012 kl. 18:16]

  Sigrún,  blessuð heimilisdýrin mega ekki gleymast á jólunum.  Þegar mín börn voru ung var hundur á heimilinu.  Hann var ekki síður spenntur að opna pakka en krakkarnir.  Það var spaugilegt að fylgjast með því hve ákafur hann var við að fjarlægja jólapappírinn utan af pökkunum sínum.

[Jens Guð, 20.11.2012 kl. 18:16]

  Ásthildur Cesil,  það er gott að vita af þessu.

[Jens Guð, 20.11.2012 kl. 18:17]

  Stefán,  jú, það eru einhverjar staðfestar sögusagnir um gjafasníkjur smælingjans.

[Jens Guð, 20.11.2012 kl. 18:19]

  E,  það verður aldrei.  Þetta er svo mikið sælgæti.  Og hollt.

[Sigrún Aðalsteinsdóttir, 21.11.2012 kl. 21:48]

Ég er nú hrædd um að Freddý minn Zanzibar sé dekraður á jólunum sem aðra daga. Þá fær hann að sjálfsögðu pakka og er alveg einstaklega hjálpsamur við pakkaofnun annarra heimilismeðlima. Svo (soldið sem hneykslar marga :) ) Hann fær matinn sinn á sparistellinu - það eru nú bara jól einu sinni á ári :)