Frábær kvöldskemmtun til fjáröflunar fyrir Ingó og hans fjölskyldu

 

 

 

 

 

 

 

 

  Tilefni fjáröflunarhljómleika í kvöld fyrir Ingó og hans fjölskyldu var og er dapurlegt.  Ingó greindist með bráðahvítblæði í októberbyrjun.  Síðan hefur hann gengið í gegnum þrjár erfiðar meðferðir til að kveða sjúkdóminn niður.  Án árangurs.  Meðferð hefur verið hætt.

  Í kvöld komu 600 vinir Ingós saman í Norðurljósum í Hörpu.  Um 100 þeirra stóðu fyrir fjölbreyttri dagskrá ásamt fylgdarliði (róturum, hljóðmönnum, ljósameisturum og svo framvegis).  500 vinir Ingós fylltu Norðurljósasalinn.  Mér er til efs að margir einstaklingar í öllum heiminum (að meðtalinni vetrarbrautinni) eigi jafn marga góða vini og Ingó.  Allir sem kynnast Ingó eignast umsvifalaust kæran og traustan vin,  frábæran húmorista og grallara,  einstakt góðmenni sem má ekkert aumt sjá,  hjálplegan náunga sem allt vill fyrir alla gera og upptalningin á mannkostum Ingós er óendanleg.

  Ég er svo lánssamur að hafa haft Ingó sem ferðafélaga mörgum sinnum til Færeyja og á Færeyska fjölskyldudaga á Stokkseyri.  Frábærari ferðafélaga er ekki hægt að hugsa sér.  Hann er svo fyndinn, jákvæður og elskulegur í alla staði.  Hver samverustund með Ingó er gulls ígildi.  Það er góð skemmtun frá A-Ö.  Allir sem kynnast Ingó elska hann sem sinn besta vin.

  Það kom ekki á óvart að vinahópur Ingós fyllti Norðurljósasal Hörpu í kvöld.  Né heldur hvað margir tónlistarmenn voru áhugasamir um að leggja fjáröflun fyrir Ingó og hans fjölskyldu lið með því að mæta.  Vandamálið var og er að Ingó hefur lengst af starfað sem "free lance" ljósmyndari (marg verðlaunaður sem slíkur).  En þegar honum var skyndilega kippt út af vinnumarkaði sat hann og hans fjölskylda uppi með ýmis föst útgjöld sem hann áður gat staðið skil á með vinnu sem "free lance" ljósmyndari (húsaleiga, afborganir af vinnutækjum og þess háttar).

  Hljómleikarnir í kvöld í Norðursal Hörpu tókust glæsilega vel í alla staði. Óperusöngvarar Óp-hópsins hófu dagskrá.  Síðan tók við nýrokkssveitin Nóra.  Sú hljómsveit gaf út á síðasta ári eina af bestu plötum ársins 2012.  Seyðandi og dulmagnað krúttpopp með skemmtilegri stigmögnun fallegs hljómagangs og dálitlum látum í framvindu laga.   Nóra er ennþá skemmtilegri (og hrárri) á sviði en á plötu.  Samt er nýjasta plata Nóru frábær:   http://jensgud.blog.is/blog/jensgud/entry/1273485/

  Næstir á svið voru Hrafnar.  Sú hljómsveit á rætur í Vestmannaeyjum.  Kynnirinn,  Hörður Torfason,  skilgreindi Hrafna sem Logandi Papa (les= Logar + Papar).  Hrafnar spila írskættaða órafmagnaða pöbbaslagara.  Banjó, mandólín,  munnharpa...  Skemmtileg hljómsveit sem grallaðist í kynningum á lögum og liðsmönum.

  Á eftir Hröfnum spilaði KK tvö ljúf og róleg lög.  Ari Eldjárn uppistandari tók við og afgreiddi nokkra brandara út frá dagskrá KK.  Þar með afhjúpaði hann hversu naskur hann er á það fyndna í stemmningu augnabliksins.  Hann samdi brandara á staðnum.  Í endursögn eru brandarar hans ekki eins fyndnir og þegar hann segir þá.  Ari hefur frábært vald á því sem á ensku kallast "timing" (að skynja stemmningu augnabliksins og tímasetja þagnir og framhald á tali.  Þetta hefur líka eitthvað að gera með raddblæ og framsetningu).  Ari var svo stórkostlega fyndinn að hann þurfti ítrekað að gera hlé á sínum texta á meðan áheyrendur lágu í hláturskasti. 

  Á eftir virkilega fyndnu uppistandi Ara tók við Ný dönsk.  Ný dönsk er séríslenskt fyrirbæri í músíkflóru.  Dálítið hippalega hljómsveit í aðra rönd en á sama tíma líka eitthvað í átt að því sem á sínum tíma var skilgreint sem nýbylgja í víðustu merkingu.   

  Eftir hlé tók harða og pönkaða rokkið við:  Hellvar,  Bodies,  Q4U,  Fræbbblarnir og Dimma.  Fyrir minn smekk voru það bestu konfektmolarnir.  Ég elska Hellvar.  Ég elska Bodies.  Lagið "Where Are The Bodies" er eitt allra flottasta lag íslensku rokksögunnar.  Það er jafn ferskt og hrífandi í dag og fyrir þremur áratugum.

   Fræbbblarnir eru flottari og magnaðri með hverju ári.  Yfir heilu línuna eru Fræbbblarnir eiginlega í dag svo gott sem flottasta hljómsveit íslensku rokksögunnar.  Með fullri virðingu fyrir öðrum frábærum hljómsveitum af kynslóð "Rokks í Reykjavík".

  Q4U flutti fjögur lög.  Ingó var kallaður upp á svið og spilaði á gítar í síðasta lagi Q4U.  Þá ætlaði allt um koll að keyra.  Ingó hefur verið gítarleikari Q4U síðustu áratugi.  Egill Viðarsson í Nóru leysti Ingó af á þessum hljómleikum en svo spiluðu þeir báðir á gítar í laginu "Creeps".      

  Þegar dagskrá var tæmd sté Ingó á svið og þakkaði fyrir sig.  Hann var að venju fyndinn og orðheppinn.  Gaf Ara Eldjárn eiginlega ekkert eftir á því sviði.  

  Fjölmennið í Norðurljósum, bæði áheyrendur og þeir sem gáfu vinnu sína á svið, staðfesti að Ingó á fleiri góða og trygga vini en nokkur önnur manneskja í heiminum.  Það er eðlilegt fyrir okkur í hans vinahópi.  

  

„Þetta verður að skoða“

Athugasemdir

[Stefán (IP-tala skráð) 1.3.2013 kl. 11:47]

Frábært framtak - alltaf er það tónlistarfólk sem er duglegast við að hjálpa bágstöddum og hjálparþurfi. Mættu aðrar stéttir taka þá sér til fyrirmyndar.  Hvenar heyrir maður t.d. af því að ofdekrað og oflaunað starfsfólk banka og fjármálastofnana rétti nokkrum hjálparhönd, eða þá lögfræðingar sem eingöngu virðast hugsa um eigin hag ?  Nei, líklega er það fólk hvort sem er svo leiðinlegt og sjálfhverft að það gæti hvergi opnað munninn á góðgerðarsamkomum nema að drepa viðstadda úr leiðindum.  Eða finnst einhverjum gaman að fara í banka og lögfræðistofur ?

[Valgarður Guðjónsson, 1.3.2013 kl. 12:33]

Já, þetta var mjög sérstakt kvöld, undarleg blanda af frábærri dagskrá og óendanlega sorglegum veikindum. Og takk fyrir jákvæði ummæli...

[Steini (IP-tala skráð) 1.3.2013 kl. 14:18]

Hvað varð um Skálmöld? Þeir voru auglýstir á þessum styrktarhljómleikum.

[Ásthildur Cesil Þórðardóttir, 1.3.2013 kl. 21:01]

Alltaf gaman að heyra af þegar fólk leggur sig fram um að hjálpa öðrum, það einhvernveginn er svo þakklátt og gefur Pétri og Páli aka mér svo mikið, þó ég þekki ekkert til.

[Jens Guð, 1.3.2013 kl. 22:50]

  Stefán,  það er margt til í þessu hjá þér.

[Jens Guð, 1.3.2013 kl. 22:50]

  Valli,  takk fyrir frábæra skemmtun.

[Jens Guð, 1.3.2013 kl. 22:55]

  Steini,  það kom upp einhver misskilningur varðandi Skálmöld.  Skálmöld var bókuð með hljómleika á Vestfjörðum í gær.  Hinsvegar sendu liðsmenn Skálmaldar kveðju sem var sýnd á stóru tjaldi.  Þar sýndu þeir skyrtubol sem er í framleiðslu og fer í sölu innan skamms.  Á honum er merki Skálmaldar og ljósmynd af Ingó.  Glæsilegt uppátæki.

[Jens Guð, 1.3.2013 kl. 22:57]

  Ásthildur Cesil,  ég tek undir það. 

[Ásthildur Cesil Þórðardóttir, 2.3.2013 kl. 00:31]

JÁ  Þannig er þetta bara samhjálpin gerir krafaverk á þeim sem gefa.