Smásaga um ofbeldi

 Maður á fertugsaldri var í morgun dæmdur í níu mánaða fangelsisvist.  Þar af átta skilorðsbundna.  Um var að ræða afar gróft og hrottalegt ofbeldi án tilefnis.  Eða öllu heldur vegna neyðarlegs misskilnings.  Árásarmaðurinn réðist fyrirvaralaust á fórnarlambið er þeir mættust á gangstétt.  Sló hann í andlitið með þeim afleiðingum að hann rotaðist.  Þá stappaði árásármaðurinn á höfði hans og sparkaði víðsvegar í líkamann.  Afleiðingarnar urðu höfuðkúpubrot,  nefbrot,  brotinn kjálki,  brotin rifbein,  varanlegar sjóntruflanir,  þrálátur höfuðverkur og skemmt bak. 

  Dómarinn er elsti starfandi dómari landsins.  Hann er 72ja ára.  Það voru gerð við hann starfslok fyrir 12 árum.  Hann hélt þó áfram að mæta til vinnu á hverjum virkum degi.  Líka þegar frídaga ber upp á virka daga.  Þá mætir hann á slaginu klukkan 10.  Hann bankar fyrst lengi á dyr og hamast á dyrahúninum.  Þegar líður á dag byrjar hann að sparka í dyrnar.  Undir lok dags fer hann að góla formælingar ætlaðar meintu starfsfólki innan dyra.  Á slaginu klukkan 15.00 snýr hann heim á leið og heldur áfram formælingum.

  Dómshald vegna líkamsárásarinnar gekk hratt og vel fyrir sig.  Það voru lögð fram læknisvottorð og öllum bar saman um atburðarrás.  Hrólfur hrotti kvaðst iðrast gjörða sinna sárlega og lofaði að gera þetta ekki aftur. Hann hafði tekið feil á Palla pylsu og systur sinni.  Þau eru nefnilega bæði ljóshærð.  Eini munurinn er sá að systirin er með sítt krullað hár en Palli pylsa krúnurakaður.  Hrólfur gat ekki vitað nema systirin hefði farið í klippingu.  Þar fyrir utan var Palli pylsa í svipuðum jakka og systirin.  Bara smá litamunur.  Jakkinn hans Palla var stuttur og bleikur en jakki systurinnar hvítur frakki. 

  Hrólfur taldi sig eiga óuppgerðar sakir við systur sína.  Hún hafði reynt að sannfæra kærustu Hrólfs um að hann væri rangeygur og með stór útstæð eyru.  Þar fyrir utan skuldaði hún honum tvær sígarettur.  Hann taldi brýnt að kæfa endurgreiðslufælni hennar á sígarettum niður áður en hún yrði kækur.  Dómarinn hafði skilning á þessu sjónarmiði.  Hann gætir þess vandlega sjálfur að láta engan skulda sér neitt.  Hann rifjaði upp fyrir dómsal þegar skólabróðir hans í barnaskóla skilaði honum ekki snjóbolta sem hann lánaði honum einn daginn.  Skólabróðirinn bar því við að allur snjór hefði horfið af jörðu nóttina eftir lánið.  Þess vegna væru ekki hægt að endurgjalda snjóboltann.  Dómarinn tók fram og lagði þunga áherslu á að skilvísi ætti að ganga fyrir öllu.  Að skýla sér á bak við afsakanir væri ódrengilegt.  Hann hefði neyðst til þess að beita skólabróðir sinn dagsektum.  Þær fólust í því að borða nestið hans á hverjum skóladegi.  Skólabróðirinn var ósáttur við þetta.  Innheimta dagsekta kostaði fyrir vikið fantaleg slagsmál alla dagana.  En undan henni var ekki komist.  Það hjálpaði að aldursmunur var á drengjunum.  Sá skuldugi var 3 árum yngri.  Það munar um 3 ár þegar annar er 9 ára og hinn 6 ára.  Þetta var eldri drengnum engin skemmtun.  Fjarri því.  Ekki nema fyrstu tvær vikurnar.  Eftir það fékk hann leiða á einhæfu nesti stráksins.  Alltaf rúgbrauð með kæfu.  Hann gaf stráknum ströng fyrirmæli um að fá foreldrana til að hafa nestið fjölbreyttara.  Fyrirmælin voru virt að vettugi.  

  Á meðan dómarinn rifjaði söguna samviskusamlega upp eftir bestu vitund myndaðist kurr í salnum.          Frammíköll og annar hávaði setti dómarann út af laginu.  Hann komst í uppnám og tapaði andlegu jafnvægi.  Snöfurlega kvað hann upp dóminn:  "Palli pylsa er dæmdur í níu mánaða fangelsi.  Þar af átta skilorðsbundna.  Hann skal borga allan útlagðan kostnað við dóm þennan."  Dómarinn sló hamrinum í borðið og hljóp þegar í stað út úr dómssalnum.  Hávaðinn og köllin í viðstöddum mögnuðust.  Allt rann saman í einn klið.  Þetta var eins og fuglabjarg.  Dómarann langaði til að kaupa sér pylsu í Bæjarins bestu og hlakkaði til.  Þess vegna var asi á honum.

  Áður en hann slapp úr húsi náðu saksóknari,  lögfræðingur,  og dómvörður að króa hann af.  Saksóknarinn henti sér á gólfið,  hékk í hempu dómarans og hrópaði:  "Þú dæmdir vitlausan man til fangelsisvistar!"

  "Hann er ekkert svo vitlaus," mótmælti dómarinn.  "Ég var miklu vitlausari á hans aldri."

  "Palli pylsa er fórnarlambið.  Þú áttir að dæma Hrólf hrotta í fangelsi!"  staglaðist saksóknarinn á og aðrir tóku undir.

  "Við getum ekkert hringlað með dóma," útskýrði dómarinn og baðaði út höndum í æsingi.  "Það myndi rýra traust almennings á dómstólum landsins. Trúverðugleiki embættisins er í húfi."

  Viðstaddir sáu í hendi sér að þetta var rétt.  Skoðanakannanir sýndu að traust almennings á dómstólum stóð höllum fæti.  Eins og staðan var kom ekki annað til greina en reyna að gera gott úr þessu.  

  "Við sjáumst þá bara á Frímúrarafundinum klukkan átta í kvöld,"  sagði saksóknarinn,  snérist á hæl og fór að blístra lagið um hamingjusamasta hund í heimi..    

----------------------------------------

Fleiri smásögur og leikrit:

 - Hvalkjöt

   http://jensgud.blog.is/blog/jensgud/entry/1310514/         

  - Bílasaga

http://jensgud.blog.is/blog/jensgud/entry/1303801/

 - Barátta góðs og ills

http://jensgud.blog.is/blog/jensgud/entry/1221278

- Skóbúð

http://jensgud.blog.is/blog/jensgud/entry/1195115

- Rómantísk helgarferð

http://www.jensgud.blog.is/blog/jensgud/entry/1289612/

- Álfar

http://jensgud.blog.is/blog/jensgud/entry/1167432/

.

- Bóndi og hestur

 http://www.jensgud.blog.is/blog/jensgud/entry/1122498/

.

- Í plötubúð:

http://jensgud.blog.is/blog/jensgud/entry/260037

.

 - Gömul hjón

http://jensgud.blog.is/blog/jensgud/entry/1098829/

.

 - Hnefaleikakeppni aldarinnar:

http://www.jensgud.blog.is/blog/jensgud/entry/1077689/

.

 - Peysuklúbburinn

http://www.jensgud.blog.is/blog/jensgud/entry/1059543/

.

 - Vinalegur náungi:

http://jensgud.blog.is/blog/jensgud/entry/1041105

.

 - Gamall einbúi

 http://jensgud.blog.is/blog/jensgud/entry/1036775

.

- Saga af systrum

http://www.jensgud.blog.is/blog/jensgud/entry/1017021/

.

 - Jólasaga

http://www.jensgud.blog.is/blog/jensgud/entry/1008279/

.

- Á rjúpnaveiðum:

http://www.jensgud.blog.is/blog/jensgud/entry/988782/

.

- Ólétta nunnan:

http://www.jensgud.blog.is/blog/jensgud/entry/978349/

.

- Gullfiskur:

http://jensgud.blog.is/blog/jensgud/entry/965433

.

- Flugvélamódel:

http://jensgud.blog.is/blog/jensgud/entry/955702

.

- Miðaldra maður:

http://jensgud.blog.is/blog/jensgud/entry/944608

.

- Leyndarmál stráks:

http://jensgud.blog.is/blog/jensgud/entry/928198

.

- Ættleiðing:

http://jensgud.blog.is/blog/jensgud/entry/916687/

.

- Strákur með sög:

http://jensgud.blog.is/blog/jensgud/entry/903540

.

- Hundur:

http://jensgud.blog.is/blog/jensgud/entry/863130

.

- Boltabulla:

http://jensgud.blog.is/blog/jensgud/entry/718347

.

- Skokkari:

http://jensgud.blog.is/blog/jensgud/entry/606929

.

- Strákur skiptir um gír:

http://jensgud.blog.is/blog/jensgud/entry/538649

.

- Morðsaga:

http://jensgud.blog.is/blog/jensgud/entry/320299

.

- 27 ára:

http://jensgud.blog.is/blog/jensgud/entry/299380

.

- Um borð:

 http://jensgud.blog.is/blog/jensgud/entry/278812

.

- Matarboð í sveitinni:

http://jensgud.blog.is/blog/jensgud/entry/266411

Athugasemdir

[Sigurður I B Guðmundsson, 7.10.2013 kl. 19:37]

Jæja Jens, alltaf í boltanum!!!

[Stefán (IP-tala skráð) 8.10.2013 kl. 08:36]

Burt séð frá þessari sögu, þá ætti alveg að banna það að frímúrarar séu ráðnir dómarar.  Held að það sé ekki bannað hér, en frímúrarar eru svo steyptir saman að dómari sem er frímúrari ætti klárlega í mesta basli með að dæma annan frímúrara á sanngjarnan hátt. Veit ekki hvernig er með prestastéttina í dag, en lengi vel var nánast annar hver prestur hér frímúrari. Meistari Mozart var frímúrari og Töfraflautan fjallar svo frjálslega um frímúrara að sú saga komst á kreik í Vín á sínum tíma að frímúrarar hefðu komið Mozart fyrir kattarnef. Persónulega finnst mér fátt jafn hallærislegt og frímúrarar að pukrast um á leynilegum fundum í kjólfötum. Svona leynireglur í vestrænum lýðræðisríkjum nútímans eru að mínu mati algjör tímaskekkja.       

[Þjóstólfur (IP-tala skráð) 8.10.2013 kl. 09:37]

Hahahhaha.... Bráðskemmtileg saga!

[sæunn guðmundsdóttir (IP-tala skráð) 8.10.2013 kl. 13:04]

hehehe snilld

[Þorgeir Ragnarsson (IP-tala skráð) 8.10.2013 kl. 13:39]

Félagafrelsi er bundið í stjórnarskrá og sjálfsagður réttur allra að stofna félög eða að ganga í félög sem vilja taka við þeim.

Félagafrelsið er ekki tímaskekkja, nær væri að álykta að þeir sem vilji afnema það séu tímaskekkjur.

[Jens Guð, 9.10.2013 kl. 00:07]

  Sigurður I.B.,  það er ekki annað hægt.  Boltinn er út um allt!

[Jens Guð, 9.10.2013 kl. 00:10]

  Stefán,  ég held að frímúrarar séu á hverfandi hveli.  Einmitt vegna þess hvað þetta er hallærislegt fyrirbæri. 

[Jens Guð, 9.10.2013 kl. 00:11]

  Þjóstólfur,  takk fyrir það. 

[Jens Guð, 9.10.2013 kl. 00:11]

  Sæunn,  takk fyrir það.

[Jens Guð, 9.10.2013 kl. 00:20]

  Þorgeir,  þú ert sennilega að vísa til "komments" Stefáns.  Ég sé samt ekki að hann leggist gegn félagafrelsi heldur hvaða skilyrði hlutlausir dómarar þurfi að uppfylla.  Á þessu er mikill munur.  Ég er sammála honum um að það orki tvímælis að dómari sé í bræðrareglu þar sem félagar hafa gengist undir heit um að gæta hagsmuna hvers annars í hvívetna og setja þá ofar öllu.  Félagar í Hell Angels eru af sömu ástæðu óæskilegir í dómarasæti við héraðsdóm og Hæstarétt.  En mín vegna mega þeir vera í þessum mótorhjólaklúbbi. 

[Stefán (IP-tala skráð) 9.10.2013 kl. 08:16]

Meistari Wolfgang Amadeus Mozart sá greinilega ástæðu til að fjalla svolítið frjálslega um frímúrara í meistaraóperunni Töfraflautan, honum hefur greinilega blöskrað ýmislegt þar.  Rottur rotta sig saman í niðurföllum og undir borgum, en frímúrarar rotta sig saman á leynilegum samkomum í harðlæstum höllum, sem er auðvitað allt í góðu, en þeir rotta sig líka saman sem reglubræður miklu víðar í þjóðfélaginu og það getur haft þau áhrif að þeim sé langt í frá treystandi, ekki frekar en Hells Angels félögum.