Bráðskemmtileg bók

10.11.2013 | 22:31

Fyrir tæpum áratug kom út létt og fjörleg vísnabók eftir Akureyringinn Magnús Geir Guðmundsson. Sú heitir Geiravísur. Áður var Magnús Geir þekktur sem flottur blaðamaður hjá dagblöðunum Tímanum og Degi. Þar skrifaði hann um dægurlagamúsík og hélt úti plötugagnrýni. Ég keypti þessi blöð fyrst og fremst til að fylgjast með skrifum Magnúsar Geirs.

Nú var Magnús Geir að senda frá sér aðra vísnabók, Limrurokk. Nafnið bendir til þess að hún innihaldi limrur. Vísbendingin er rétt.

Eins og algengt er með limrur þá ræður kímni víða för í limrum Magnúsar. Þær eru flestar ortar í tilefni einhverrar fréttar eða einhvers atburðar. Þar á meðal er ort um fjölda nafngreindra íslenskra og erlendra stjórnmálamanna, tónlistarmanna, boltasparkara og fjölda annarra. Samtals eru limrurnar hátt á annað hundrað. Hverri limru fylgir frásögn af tilurð hennar. Frásögnin hefur mikið að segja. Hún útskýrir margt og gefur limrunni dýpt.

Þannig rifjar Magnús Geir upp þegar höfundur þessa bloggs vakti 2007 athygli á einelti sem átti sér stað á Veðurstofunni. Sýndist þar sitt hverjum og upphófst heilmikið þref. Þá varð Magnúsi að orði:

Jens minn, þú stendur í ströngu,

ert stöðugt í baráttugöngu.

Með kjafti og klóm

og kraftmiklum róm,

að greina hið rétta frá röngu!

Vert er að geta skemmtilegrar hönnunar á bókakápu. Höfundur hennar er Jakob Jóhannsson.

Það er óhætt að mæla með Limrurokki, hvort heldur sem er til jólagjafa eða til eigin brúks. Limrurnar laða fram bros. Það er upplagt að hafa bókina á náttborðinu og renna yfir nokkrar blaðsíður fyrir svefninn. Þá svífur maður með bros á vör inn í draumaheim.

Meginflokkur: Bækur | Aukaflokkar: Ljóð, Menning og listir, Spaugilegt | Breytt 11.11.2013 kl. 02:10 | Facebook

Athugasemdir

Þetta er klárlega eiguleg bók og vonandi að akureyreyringar sérstaklega verði duglegir að kaupa hana til jólagjafa.

Stefán (IP-tala skráð) 11.11.2013 kl. 08:28

Ég keypti fyrri bókina hans Geirs, og þótti þær skemmtilegar. Sammála, grínir sjaldan langt burtu og svo segir hann gjarnan sögurnar sem vísurnar verða til við, svo við fáum skemmtilegra inngrip í þær. Sannarlega vel virði þess að kaupa hana.

Ásthildur Cesil Þórðardóttir, 11.11.2013 kl. 16:05

Fyrir áhugasama, þá má nálgast skrudduna hjá Smekkleysu, Laugavegi 35 í Reykjavík, í Skagfirðingabúð á Sauðárkróki, verslun Tunnunnar á Siglufirði og í Eymundsson á Akureyri. Sjá einnig: meistarinn.blog.is.

Magnús Geir (IP-tala skráð) 11.11.2013 kl. 20:28

Þú myndir ef til vill senda mér hana í póstkröfu Magnús minn áritaða, og ég greiði inn á reikning.

Ásthildur Cesil Þórðardóttir, 11.11.2013 kl. 21:19

Stefán, já, vonandi fá margir bókina í jólagjöf. Þetta er gott andlegt fóður.

Jens Guð, 11.11.2013 kl. 21:43

Ásthildur Cesil, það er limra um þig í bókinni. Ort í tilefni af því að Jóna Ingibjörg kallaði þig Ástargyðju þegar hún kastaði á þig afmæliskveðju. Magnús hafði einnig í huga hvað þú gefur mikið af þér til barna og barnabarna.

Hennar já ómæld er iðja,

alltaf að hjálpa og styðja.

Enda dæmalaust dáð,

sem dýrlegust náð

Ásthildur ástargyðja.

Jens Guð, 11.11.2013 kl. 21:47

Magnús Geir, takk fyrir upplýsingarnar.

Jens Guð, 11.11.2013 kl. 21:49

Snildar gleðigjafi þessi bók. Ég er ekki mikill bókaormur en LIMRUROKK er á náttborðinu mínu áfram þó ég sé búinn að lesa hana til uppörvunar í skammdeginu takk Maggi.

Ingvi Þór Björnsson (IP-tala skráð) 11.11.2013 kl. 21:55

Takk fyrir þessar upplýsingar Jens, ekki hafði ég glóru um það, en er ánægð með limruna.

Afskaplega falleg finns mér.

Ásthildur Cesil Þórðardóttir, 11.11.2013 kl. 22:13

Ingvi Þór, ég er ekki búinn með bókina. Ég les nokkrar limrur undir svefninn og "smjatta á þeim". Læri þær næstum utan að.

Jens Guð, 11.11.2013 kl. 22:29

Ásthildur Cesil, við þekkjum ýmsa fleiri Magnús Geir yrkir um. Til að mynda Kolbrúnu Stefáns. Hún vildi að breyta græna Framsóknarlitnum á búningi Breiðabliks í fallega Frjálslynra bláann. Um það orti Magnús Geir:

Víst er hún Kolla já kná

kona og hýr á brá.

Næstum elskuð af öllum,

einkum þó köllum.

Falleg og frjálslega blá.

Jens Guð, 11.11.2013 kl. 22:36

Já haha hann er flottur hann Magnús Geir.

Ásthildur Cesil Þórðardóttir, 12.11.2013 kl. 00:53

Þetta var eitthvað klaufalega orðað hjá mér. Það átti að vera: "Við þekkjum ýmsa fleiri sem Magnús Geir yrkir um. Til að mynda Kolbrúnu Stefáns. Hún vildi breyta græna..."

Jens Guð, 12.11.2013 kl. 01:02

Náði inntakinu

Ásthildur Cesil Þórðardóttir, 12.11.2013 kl. 11:24

Þakka ykkur kærlega góð orð, þér aftur kærlega fyrir skrifin félagi Jens, Stebba fyrir hvatninguna og Ingva dáðadreng og brosbolta fyrir þessi skemmtilegu orð. Og síðast en ekki síst þér frú Ásthildur þakka ég, get með ánægju sent þér eintak, viltu kilju eða innbundið?

Magnús Geir (IP-tala skráð) 12.11.2013 kl. 22:42

Kilju eins og Geiravísurnar takk Magnús minn, gefðu mér bara upp númer til að leggja inn á og ég vil fá hana áritaða eins og síðast.

Ásthildur Cesil Þórðardóttir, 12.11.2013 kl. 22:54