Plötusala og tónlistarmenn blómstra

  Plötusala hefur vaxið og vex ennþá frá einum áratug til annars.  Þannig hefur það verið alveg frá upphafi plötuframleiðslu og plötusölu.  Þetta á við um plötusölu hérlendis,  jafnt sem erlendis.  Á þessum tíma hefur sala á plötum tekið allskonar hliðarspor.  Á tímabili kom kassettan sterk inn og náði nokkurri markaðshlutdeild í plötusölu.  Svokölluð 8 rása teip urðu líka vinsæl.  Einkum í Bandaríkjunum.  Svo leysti geisladiskurinn vinylplötuna af hólmi.  Um 15 ára skeið eða svo var geisladiskurinn allsráðandi.  Að undanförnu hefur sala á vinylplötum aukist aftur jafnt og þétt.

  Á sama tíma hefur sala á tónlist í stafrænu formi tekið stóran og ört vaxandi bita af kökunni.  Sá markaður er ennþá í mótun.  Hann á eftir að taka miklum breytingum eins og hingað til.  Músíkveitur á borð við tonlist.is og spotify.com selja stök lög og heilar plötur í gegnum niðurhal.  Sömuleiðis selja tónlistarmenn lög (og plötur) beint til neytandans af sínum eigin netsíðum.  Líka í gegnum erlendar netsíður á borð við amazon.com og play.com.  Sala á þessum síðum telur ekki í opinberum gögnum um sölu á íslenskum plötum.    

  Jafnframt hefur færst í vöxt að músík íslenskra tónlistarmanna sé gefin út af erlendum plötufyrirtækjum.  Sala á þeirra músík telur ekki í opinberum tölum um sölu á íslenskri tónlist.

  Þrátt fyrir þetta var í fyrra sala á tónlist gefinni út af íslenskum plötufyrirtækjum svipuð og árin 2009 og 2010.  Salan 2011 og 2012 var meiri.  

  Á síðustu fimm árum eru tónlistarmenn að selja plötur á Íslandi í stærra upplagi en áður þekktist.  Mugison og Ásgeir Trausti eru að selja 30 og 40 þúsund eintök af stakri plötu.  Of Monsters and Men kemur fast á hæla þeirra.

  Jaðarmúsík er að seljast vel.  Skálmöld selur sinn víkingametal í þúsunda upplagi.  Mammút,  Lay Low,  Valdimar,  Kaleo,  Blússveit Þollýjar og fleiri eru á góðu róli.  Hebbi selur um og yfir 6000 eintök af hverri plötu sinni. 

  Bestu fréttirnar eru þær að söluhæstu plötur síðustu ára eru góðar plötur.  Þetta eru plötur sannra listamanna sem leggja sálina í tónlist sína.  Sköpunargleði, metnaður og einlægni ráða för.  Þessir tónlistarmenn njóta virðingar fyrir að standa með sjálfum sér sem listamenn.  Það skilar sér í vinsældum og góðri plötusölu.  Ólöglegt niðurhal styrkir sölu á bitastæðri tónlist.  Rannsóknir í Bretlandi og Frakklandi hafa staðfest það.  Niðurhalarar eru stórtækustu plötukaupendurnir.  Vegna áhuga og ástríðu fyrir tónlist nota þeir allar leiðir til að kynnast sem mestu magni af tónlist.  Svo kaupa þeir rjómann af því sem best lætur í eyrum.     

  Íslendingar sem hafa fulla atvinnu af sinni tónlist eru mun fjölmennari en áður.  Góð og heiðarleg íslensk tónlist og íslenskir tónlistarmenn blómstra sem aldrei fyrr.  Líka í kynþokka.  

 

Kynþokkafyllstu íslensku söngvararnir

Athugasemdir

[Stefán (IP-tala skráð) 7.2.2014 kl. 08:21]

Alveg snilldarinnlegg hjá þér Jens til mótvægis við uppgjafarvælið í gamla skallapopparanum honum Bubba Morthens í málgagni sínu, Fréttablaðinu í gær. Staðreyndin er einfaldlega sú að þeir seljast sem nenna að gera frambærilega tónlist sem höfðar til tólistaráhugafólks og já, margir frábærir íslenskir tónlistarmenn mokseljast líka erlendis sem aldrei fyrr. Bubbi Morthens reyndi að koma sér á framfæri erlendis á sínum tíma en fékk ekki nokkurn hljómgrunn, ekki frekar en klisjukennt jólavæl hans sem floppaði núna síðast. Auk þess er manngreyið búið að mála sig svo gjörsamlega út í horn gagnvart almenningi með útrásarvíkingadekri sínu að hann á væntanlega aldrei afturhvæmt inn á tónlistar-sölulista. Ekki nema þá syngjandi með Björgvini Halldórs sem virðist vera nýjasta skottið sem hann kýs að hanga í, kanski eina haldreipið í dag  ,, Ég er löggiltur hálfviti, hlusta á HLH og Brimkló ".

[Grrr (IP-tala skráð) 7.2.2014 kl. 13:25]

Þegar að einhver hefur selt vel, ár eftir ár, og svo kemur flopp á eftir floppi - þá er auðveldara að kenna öðrum um frekar en sjálfum sér.

En það þarf engan snilling til að sjá að vara sem að fáir hafa áhuga á, er einfaldlega ekki söluvænleg vara.

Sérstaklega þegar að þetta er sett í samhengi við aðra listamenn með áhugaverða vöru. Eins og þessi bönd sem að eru nefnd í færslunni.

Árinni kennir illur ræðari, á vel við hér og það mætti bæta við að þessi ræðari kennir veðrinu, bátnum, hitastiginu, fiskunum... um sitt eigið klúður.

[Jens Guð, 8.2.2014 kl. 21:54]

  Stefán,  án þess að persónugera dæmið - frekar almennt talað;  þegar poppari rennur út á dagsetningu þá reynir á að vera búinn að selja sig í skjól þess sem getur látið mola af borði hrynja niður til hans. 

[Jens Guð, 8.2.2014 kl. 21:56]

  Grrr,  svoooo rétt. 

[sæunn (IP-tala skráð) 14.2.2014 kl. 08:15]

það er miklu auðveldara að kenna öðrum um , heldur en lita í eigin barm, sumir eru bara fallnir úr vinsældarsætinu og það fyrir mörgum árum .

[Jens Guð, 20.2.2014 kl. 22:54]

  Sæunn,  nákvæmlega!