Íslensk hjarðhegðun

  Íslendingar eru hópsál.  Auðteymd í allar áttir.  Hjarðhegðun einkennir þjóðarsálina.  Þegar ný verslun er opnuð þarf ekki mikið til að smala hjörðinni í hús.  Ókeypis kleinuhringur eða 5% afsláttur á fimm stykkjum af skrúfjárni dugir.  Biðröð myndast degi fyrir opnun.  Hjörðin bíður ofan í svefnpoka eftir opnun búðarinnar.  Þeir fremstu í röðinni upplifa sig sem hetjur.  Ekki ætla ég að kalla þá eitthvað annað.  

 Þegar ekki er um opnun á nýrri verslun að ræða þá dugir til að mynda bílaumboði að auglýsa ókeypis kaffisopa.  Þá myndast örtröð.  Ef auglýstar eru ókeypis kleinur með þá bruna menn frá Keflavík,  Borgarnesi og Selfossi til Reykjavíkur.      

  Ég rakst á kunningja frá Hveragerði sem gerði sér ferð í bæinn.  Ástæðan var sú að IKEA auglýsti smakk á smákökum.  Smakkið átti að hefjast klukkan 13.00.  Vinurinn náði ekki að mæta fyrr en 13.30.  Þá var ekki byrjað að gefa smakk.  Einhver bið var í það.  Hvergerðingurinn var gráti nær yfir þessum "svikum".

  Ég benti honum á að aksturinn til og frá Hveragerði kostaði hann sennilega á annað þúsund kr.  Fyrir þann pening gæti hann keypt í næstu matvörubúð 100 eða 200 smákökur í stað þessarar einu smáköku sem hann ætlaði að smakka í IKEA.

  Hann horfði ringlaður á mig í nokkrar sek.  Svo muldraði hann um leið og hann settist upp í jeppann og ók á brott:  "Þær eru náttúrulega ekki nýbakaðar."

   

Fyrstu mættu í röðina í nótt

Athugasemdir

[bjarni (IP-tala skráð) 15.11.2015 kl. 08:09]

já þetta birtist reyndar víðar í samfélaginu, það er ekki langt síðan

menn hlupu til að ná sér í hlutabréf í gömlu bönkunum, það var ekki nein

sérstök hugsun á bak við það, bara af því hinir gerðu það líka. Í pólitík

ertu ekki sannur flokksmaður nema þú dansir í takt við hin hjarðdýrin,

sem jarma eftir forystusauðnum sem er oftar en ekki haldinn leiðtogakomplexa.

Já sjálfstæð hugsun og gagnrýnin hugsun eru illa séð víða í samfélaginu.

[Jens Guð, 15.11.2015 kl. 19:58]

Bjarni,  þetta er alveg rétt hjá þér.  

[Stefán (IP-tala skráð) 16.11.2015 kl. 08:14]

Mikið rétt Bjarni þetta með hlutabréfin í gömlu bönkunum. Ég var hluti af þessari hjörð sem lét sjálfskipaða sérfræðinga í bönkunum teyma sig á asnaeyrunum varðandi hlutabréfakaup. Ég tók reyndar fljótt eftir því að þessir sjálfskipuðu sérfræðingar voru upp til hópa siðlausir og hinir mestu sauðir að auki, en eru þó væntanlega enn í vinnu í bankakerfini margir hverjir.