Bestu og verstu bílstjórarnir

  Breskt tryggingafélag,  1st Central,  hefur tekið saman lista yfir bestu og verstu bílstjórana,  reiknað út eftir starfi þeirra.  Niðurstaðan kemur á óvart,  svo ekki sé meira sagt.  Og þó.  Sem menntaður grafískur hönnuður og skrautskriftarkennari hefði ég að óreyndu getað giskað á að myndlistamenn og hverskonar skreytingafólk væru öruggustu bílstjórarnir.  Sömuleiðis mátti gefa sér að kóksniffandi verðbréfaguttar væru stórhættulegir í umferðinni,  rétt eins og í vinnunni.   

Bestu bílstjórarnir

1.  Myndlistamenn/skreytingafólk

2.  Landbúnaðarfólk

3.  Fólk í byggingariðnaði

4.  Vélvirkjar

5.  Vörubílstjórar

Verstu bílstjórarnir

1.  Verðbréfasalar/fjármálaráðgjafar

2.  Læknar

3.  Lyfsalar

4.  Tannlæknar

5.  Lögfræðingar 

Athugasemdir

[Stefán (IP-tala skráð) 22.4.2018 kl. 10:39]

Verstu bílstjóranir eru þá í raun banka og annað fésýslufólk, sem kemur ekki á óvart. Slíkt fólk kom Íslandi á hausinn og er greinilega hvergi treystandi. Ekki fremur en lögfræðingum sem þarna eru líka ofarlega á lista yfir verstu bílstjórum í hópi með öðrum hálaunastéttum. Það má því ganga út frá því að fólk sé verri bílstjórar eftir því sem það er tekjuhærra. 

[Sigurður I B Guðmundsson, 22.4.2018 kl. 18:06]

Á hvorum listanum ætli eldri borgarar lendi???

[Ómar Ragnarsson, 22.4.2018 kl. 18:58]

Mest áberandi staðreyndin er sennilega sú, að konur valdi fjórum sinnum færri alvarlegum slysum og banaslysum en karlar. 

Þótt karlar séu kannski eitthvað fleiri í umferðinni en konur, er þetta miklu meiri munur en svo að þeir séu svona miklu fleiri undir stýri. 

[Stefán (IP-tala skráð) 22.4.2018 kl. 19:45]

Tekjuháir valdamenn á rándýrum jeppum haga sér oft barnalega og hættulega í umferðinni, láta frekju ráða ferð. 

[Guðmundur Jónsson, 23.4.2018 kl. 10:05]

Ómar Ragnarson. Þetta er ekki staðreynd heldur bull fullyrðing frá rannsakendum sem eru ófærir um að greina tölfræði.

Karlar valda færri slysum en konur á ekna mílu í bandaríkjunum á líftímanum, þeir aka hinsvegar um 3 sinnum lengri vegalend á líftímanum en jafnaldra þeirra af hinu kyninu og eru oftar á stórum þungum farartækjum sem eru líklegri til að valda alvarlegri slysum.

Karlar undir 22 ára minnir mig valda hinsvegar fleiri slysum en konur á ekna mílu en eftir það fer að halla á konur. Og það er ekki vegna þess að þær séu verri bílstjórar eftir 22 ára aldur heldur vegna þess að þær æfa sig minna.

[Jens Guð, 23.4.2018 kl. 18:11]

Stefán,  mér þykir athyglisvert að auk kóksniffandi verðbréfagutta og lögfræðinga skuli starfsmenn í heilbrigðisgeiranum fylla hin efstu sætin yfir verstu bílstjóra.

[Jens Guð, 23.4.2018 kl. 18:18]

Sigurður I B,  þegar ég lærði á bíl þá var ég varaður við gömlum bílstjórum með hatt.  Þeir þóttu sérlega varasamir.  Þetta var fyrir 45 árum.  Í dag eru gamlir kallar ekki lengur með hatt.  Þess vegna er erfiðara að vara sig á þeim í umferðinni. 

[Jens Guð, 23.4.2018 kl. 18:28]

Ómar,  takk fyrir upplýsingarnar.  Ég veit að í dag valda Kínverjar og Bandaríkjamenn flestum umferðaróhöppum á Íslandi.  Jafnframt valda edrú bílstjórar mun fleiri umferðaróhöppum en ölvaðir.

[Jens Guð, 23.4.2018 kl. 18:35]

Stefán (#4),  á síðustu öld bjó ég í Ásgarði í Reykjavík.  Á virkum morgnum þurfti ég að keyra inn á Bústaðaveg.  Þar var ætíð þétt og hálfstífluð umferð.  Fasta reglan var sú að jeppaguttarnir hleyptu mér aldrei inn á Bústaðaveg.  Hinsvegar mátti alltaf stóla á bílstjóra á litlum og gömlum fólksbílum.

[Jens Guð, 23.4.2018 kl. 18:40]

Guðmundur,  þetta eru athyglisverðar tölur.