Hvað segir músíksmekkurinn um þig?

  Margt mótar tónlistarsmekk.  Þar á meðal menningarheimurinn sem manneskjan elst upp í,   kunningjahópurinn og aldur.  Líkamsstarfsemin spilar stórt hlutverk.  Einkum hormón á borð við testósteron og estrógen.  Þetta hefur verið rannsakað í bak og fyrir.  Niðurstaðan er ekki algild fyrir alla.  Margir laðast að mörgum ólíkum músíkstílum.  Grófa samspilið er þannig:

  - Ef þú laðast að meginstraums vinsældalistapoppi (Rihanna, Justin Bieber...) er líklegt að þú sért félagslynd manneskja, einlæg og ósköp venjuleg í flesta staði.  Dugleg til vinnu og með ágætt sjálfsálit.  En dálítið eirðarlaus og lítið fyrir skapandi greinar. 

  - Rappheimurinn hefur ímynd ofbeldis og árásarhneigðar.  Engu að síður leiða rannsóknir í ljós að rappunnendur eru ekki ofbeldisfyllri eða ruddalegri en annað fólk.  Hinsvegar hafa þeir mikið sjálfsálit og eru opinskáir. 

  - Kántrýboltar eru dugnaðarforkar,  íhaldssamir,  félagslyndir og í góðu tilfinningalegu jafnvægi. 

  - Þungarokksunnendur eru blíðir,  friðsamir,  skapandi,  lokaðir og með frekar lítið sjálfsálit. 

  - Þeir sem sækja í nýskapandi og framsækna tónlist (alternative, indie...) eru að sjálfsögðu leitandi og opnir fyrir nýsköpun,  klárir,  dálítið latir,  kuldalegir og með lítið sjálfsálit.   

  -  Unnendur harðrar dansmúsíkur eru félagslyndir og áreiðanlegir.

  -  Unnendum klassískrar tónlistar líður vel í eigin skinni og eru sáttir við heiminn,  íhaldssamir,  skapandi og með gott sjálfsálit. 

  -  Djassgeggjarar,  blúsarar og sálarunnendur (soul) eiga það sameiginlegt að vera íhaldssamir,  klárir,  mjög skapandi með mikið sjálfstraust og sáttir við guði og menn.

 

 

Athugasemdir

[Sigþór Hrafnsson (IP-tala skráð) 20.10.2018 kl. 14:21]

Sæll Jens

Það síðasta sem þú sagðir plús Lee Morgan!  https://youtu.be/YmpznB6VMyY

[Helga Kristjánsdóttir, 20.10.2018 kl. 15:27]

Tónlist er undursamleg guðs gjöf. Þótt sæki fæsta viðburði í hljómleikasölum núorðið getur maður komið sér upp ágætis "græjum" og valið þá sem stemmir við geðslagið hverju sinni. Djassinn er í uppáhaldi og ég á það til að setja ´geisladiskinn Giant,s step - með John Coltrane á í bílnum; - þegar umferðin er endalaus bið.

[Sigurður Bjarklind (IP-tala skráð) 21.10.2018 kl. 07:48]

Hvað með okkur sem elskum vel raddaða karlakóra án undirleiks kyrja ættjarðarlög?

[Jósef Smári Ásmundsson (IP-tala skráð) 21.10.2018 kl. 08:37]

Dreg nú fastlega í efa að eg sé íhaldsamur þó ég hlusti á Klassíska tónlist. Eða kannski er áhuginn á prog-rokkinu sem heldur mér á floti í þeim efnum. En mér finnast óperur leiðinlegar og óperu söngvarar og konur ekki með spes rödd, þrátt fyrir að einn vinsælasti tenorinn í dag sé tengdur mér ættarlega. Karlakórar ekki mjög heillandi þegar þeir kyrja ættjarðarlögin og þar með er skilgreiningin komin með þá hlustendur, Sigurður Bjarklind ( Andstaðan við mig). Blandaðir kórar eru í miklu uppáhaldi,þ.e. þegar þeir eru vel þjálfaðir og taka ekki þátt í " Kórar íslands".Ömurlegir þættir. Og þá er þetta tæmt með mig, Jens. Er hægt að fá hjá þér sálræna,tónlistarlega skilgreiningu?

[Sigurður Bjarklind (IP-tala skráð) 21.10.2018 kl. 09:03]

Mér til varnar þá er Kim Larsen líka í miklu uppáhaldi. Blessuð sé minning hans. Kannski slepp ég með þetta.

[Sigurður I B Guðmundsson, 21.10.2018 kl. 10:39]

Hvað með þá sem að hlusta á "Baldur og Konna"!!!

[Stefán (IP-tala skráð) 21.10.2018 kl. 11:22]

Af ofantöldu, þá flokkast ég undir þungarokksaðdáanda, unnanda klassískrar tónlistar, blúsara og djassgeggjara. Á meðal minna uppáhalds platna eru plöturnar The Sidewinder og Search For The New Land með Lee Morgan, sem Sigþór Hrafnsson vitnar í hér að ofan og Giant's Step með John Coltrane sem Helga Kristjánsdóttir nefnir hér að ofan. Mitt mat er að tónlist sé list allra lista, æðst allra lista.

[Sigurður I B Guðmundsson, 21.10.2018 kl. 12:22]

Það komst eitthvað "að" inn í mína athugasemd. Líklega er eitthvað "að" hjá mér!!!!

[Jens Guð, 21.10.2018 kl. 19:58]

Sigþór,  ég deili með þér aðdáun á Lee Morgan:  https://www.youtube.com/watch?v=qJi03NqXfk8

[Jens Guð, 21.10.2018 kl. 20:02]

Helga,  virkilega gaman að þú deilir með mér smekk fyrir John Coltrane og "Giant Steps". 

[Jens Guð, 21.10.2018 kl. 20:03]

Sigurður Bjarklind,  það er eiginlega séríslenskt fyrirbæri sem útlendingar skoða ekki.

[Jens Guð, 21.10.2018 kl. 20:09]

Jósef Smári,  ef þú værir ekki íhaldssamur þá værir þú ekki að pósta á Fésbók þrítugum lögum með Jethro Tull,  Genesis, Pink Floyd...

[Jens Guð, 21.10.2018 kl. 20:10]

Sigurður Bjarklind (#5),  Larsen var flottur.

[Jens Guð, 21.10.2018 kl. 20:12]

Sigurður I B,  það er stór spurning.  Þegar ég var smákrakki þá sagði pabbi minn að annar þeirra tveggja væri frændi okkar.  Ég man ekki hvor. 

[Jens Guð, 21.10.2018 kl. 20:27]

Stefán,  ég veit ekki hvort að tónlist sé æðst listgreina.  Æðri en myndlist eða ritlist.  Tónlist hefur þó meiri áhrif á daglegt líf okkar en aðrar listgreinar.  Þar af sæki ég mest í pönkrokk (sem fellur undir þungarokk) og djass. 

[Sigþór Hrafnsson (IP-tala skráð) 21.10.2018 kl. 20:50]

Gaman að því Jens, ég hef ekki hitt marga íslendinga sem þekkja hann. Sidewinder er frábært lag, hoppar vel. Buddy Rich samplaði bítið og hluta hljómagangsins í Sidewinder þegar hann setti saman The Beat Goes On, svo setti hann Sonny of Cher textan ofan á. Ansi vel gert https://www.youtube.com/watch?v=Zblr8g3P7tw

[Jens Guð, 22.10.2018 kl. 16:38]

Sigþór (# 16),  takk fyrir fróðleikinn.

[Stefán (IP-tala skráð) 23.10.2018 kl. 21:07]

Hlustun á góða tónlist gæti hugsanlega minnkað mannhatur hjá fólki eins og t.d. Útvarps Sögu vininum Viðari Guðjohnsen ? Sumir vilja reyndar meina að maðurinn sé að hrópa á hjálp á málgagni sínu Útvarpi Sögu, en þá ráðlegg ég sérstaklega hlustun á góða klassíska tónlist, sem hefur margvísleg og góð áhrif. T.d. hefur komið í ljós að kýr mjólka meira við reglulega hlustun á tónlist eftir meistara Mozart. 

[Jósef Smári Ásmundsson (IP-tala skráð) 24.10.2018 kl. 08:29]

Ég held það sé ellin ,Jens, sem er að þjá mig. Rétt eins og þú með Byrds. En varðandi síðasta atriðið í skilgreininguna á unnendum klassíkinnar þá er ég bestur, lýgnastur, flottastur ,heiðarlegastur og gáfaðastur. Svo ég tali nú ekki um hógværðina. En hún er einnig á mjög háu stigi.

[Jósef Smári Ásmundsson (IP-tala skráð) 24.10.2018 kl. 08:38]

Tók eftir þessu með kýrnar Stefán þegar ég var að handmjólka þær í fjósinu á Austara- Hóli í den. En þær mjólka ekkert meira. Málið er bara að þær voru kyrrari því þær vissu: því fyrr, því betra. En ef tónlistin var ekki á þá var þeim slétt sama. Þær bara spörkuðu og létu öllum illum látum og stigu svo ofan í fötuna svo mjólkin fór beint í flórinn . Sú mjólk kom aldrei fram í Exelinu.