Smásaga um bíleiganda

  Jóhann og frú Þuríður eiga gamlan fólksbíl.  Að því kom að ýmislegt fór að hrjá skrjóðinn.  Um miðjan janúar gafst hann upp.  Þuríður fékk kranabíl til að drösla honum á verkstæði.  Þar var hann til viðgerðar í marga daga.  Bifvélavirkjunum tókst seint og síðar meir að koma honum í lag.

  Verkstæðiseigandinn hringdi í frú Þuríði.  Tilkynnti henni að bíllinn væri kominn í lag.  Þetta hefði verið spurning um að afskrifa bílinn - henda honum ónýtum - eða gera hann upp með miklum kostnaði.  

  Verkstæðiseigandinn útlistaði þetta fyrir frú Þuríði.  Sagði:  "Öll viðvörunarljós lýstu í mælaborðinu.  Þú hlýtur að vita að rautt ljós í mælaborði kallar á tafarlausa viðgerð á verkstæði.  Annars skemmist eitthvað."

  Frú Þuríður varð skömmustuleg.  Hún svaraði með semingi:  "Fyrstu ljósin kviknuðu í október.  Þau voru appelsínugul.  Svo fjölgaði ljósunum í nóvember.  Þar bættust rauð við.  Hámarki náðu þau í desember.  Okkur Jóhanni þótti þetta vera í anda jólanna, hátíðar ljóss og friðar.  Þetta var eins og jólasería.  Við erum mikil jólabörn.  Við ákváðum að leyfa þeim að lýsa upp mælaborðið fram á þrettándann að minnsta kosti.  Blessaður bíllinn stóð sína plikt og rúmlega það.  Ekki kom á óvart að hann reyndi sitt besta.  Við gáfum honum nefnilega ilmspjald í jólagjöf."

   

Athugasemdir

[Sigurður Bjarklind (IP-tala skráð) 26.2.2019 kl. 16:16]

Hér er sönn smásaga: Kunningi minn átti frambyggðan rússajeppa. Eitt sinn sem oftar hrundi gírkassinn. Kunningi fór í umboðið og keypti heilan poka af tannhjólum. "Svo opnaði ég lokið á gírkassanum og mokaði upp nokkrum lúkum af brotnum tannhjólum og drasli. Sturtaði svo úr pokanum ofan í gírkassan, skvetti olíu yfir og setti lokið á aftur. Og það svínvirkaði".

[Sigurður I B Guðmundsson, 26.2.2019 kl. 18:32]

Var þetta bíll frá Procar????

[Stefán (IP-tala skráð) 2.3.2019 kl. 22:38]

Skemmtileg saga hjá þér Jens, en þar sem Hatari vann yfirburðasigur á Íslandi í kvöld, þá er ég tibúinn að koma til landsins og hjálpa Margréti Friðriks að pakka niður - Það veður góðverk mitt við föðurlandið í ár.

[Jens Guð, 2.3.2019 kl. 23:23]

Sigurður Bjarklind,  takk fyrir magnaða sögu!

[Jens Guð, 2.3.2019 kl. 23:27]

Sigurður I B,  það er næsta víst!

[Jens Guð, 2.3.2019 kl. 23:35]

Stefán,  keppnin fór alveg framhjá mér.  Í stað þess að fylgjast með henni þá fór ég á flotta hljómleika með Eik.  Var að koma af þeim í þessum skrifuðu orðum.  Þó ég hafi ekki heyrt keppnisframlag Hatara þá hef ég grun um að það sé hið ágætasta.  Ég hef heyrt ljómandi áheyrileg lög með þeim.  Hvert er Magga að flytja?