Smásaga um gamlan mann

  Jói Jóns er 97 ára.  Hann er ern og sjálfbjarga.  Býr einn í hrörlegu einbýlishúsi.  Það er gamalt og kallar á stöðugt viðhald.  Jói er meðvitaður um það.  Honum þykir skemmtilegt að dytta að því.  Hann hefur hvort sem er ekki margt annað fyrir stafni.

  Að því kom að Jói þurfti að tjarga þakið til að verja það betur gegn vætu.  Er langt var liðið á verk missti hann fótanna á bröttu þakinu.  Sveif á hausinn.  Við aðrar aðstæður hefði hann rúllað fram af þakinu og kvatt þennan heim á stéttinni fyrir neðan.  Í þessu tilfelli límdist hann við blauta tjöruna.  Svo rækilega að hann gat sig hvergi hrært.  Hékk bara límdur á þakinu.  Það var frekar tilbreytingalaust.   Hann kallaði á hjálp.  Röddin var veik og barst ekki langt utan hússins.

  Kallinn kvartaði ekki undan veðrinu.  Það var honum hagstætt.  Nokkrum klukkutímum síðar áttu barnungir strákar leið framhjá húsinu.  Þeim þótti einkennilegt að sjá mann límdan við húsþak.  Komnir heim til sín sögðu þeir frá þessu sérkennilega þakskrauti.  Mamma eins þeirra hringdi í lögguna.  Löggan er þaulvön að bjarga köttum ofan úr trjám.  Henni þótti ekki meira mál að bjarga ellilífeyrisþega ofan af húsþaki. 

  Kominn niður af þakinu tók Jói staðfasta ákvörðun um að fara aldrei aftur upp á þak.  Hvorki á sínu húsi né öðrum. 

Athugasemdir

[Sigurður I B Guðmundsson, 28.8.2019 kl. 10:21]

Fyrst var það fiðlarinn á þakinu og nú tjargarinn á þakinu ný og spennandi mynd og leikrit eftir Jens Guð!!

[Sigurður Bjarklind (IP-tala skráð) 28.8.2019 kl. 10:53]

Æsispennandi saga í örfáum orðum. Þetta heitir að gera mikið úr litlu. Mig þyrstir í framhald en það eyðileggur söguna.

[Þorsteinn Siglaugsson, 28.8.2019 kl. 12:36]

Af þessari dæmisögu má læra margt:

1. Börn hafa gjarna athyglina í lagi.

2. Það er ekki svo mikill munur á köttum og gamalmennum eftir allt saman.

3. Maður á að læra af reynslunni.

[Jens Guð, 29.8.2019 kl. 09:50]

Sigurður I B,  takk fyrir það!

[Jens Guð, 29.8.2019 kl. 09:51]

Sigurður Bjarklind,  ég er sammála því að framhald myndi eyðileggja söguna.

[Jens Guð, 29.8.2019 kl. 09:51]

Þorsteinn,  takk fyrir góða greiningu á sögunni.

[Jósef Smári Ásmundsson (IP-tala skráð) 30.8.2019 kl. 08:04]

4. Aldrei að verða 97 ára gamall.

[Jens Guð, 30.8.2019 kl. 10:05]

Jósef Smjári,  þetta er gott ráð!