Ást í háloftunum

  Ég brá mér á pöbb.  Þar var ung kona.  Við erum málkunnug.  Við tókum spjall saman.  Hún var í flugnámi og ætlaði að taka próf daginn eftir.  Hún var með bullandi prófskrekk.  Sú var ástæðan fyrir pöbbarölti hennar.  Hún var að slá á skrekkinn.  

  Við höfðum ekki spjallað lengi er ungur maður settist við borðið hjá okkur.  Hann þekkti okkur ekki en var hress og kátur.  Hann sagðist vera nýskilinn að Vestan og það væri eitthvað eirðaleysi eða einmannleiki í sér. Tal beindist fljótlega að prófskrekknum.  Maðurinn sagði að prófið væri ekkert mál.  Hann væri flugmaður og gæti leiðbeint konunni daginn eftir.  Tók hún þá gleði sína og skrekkurinn fjaraði út.  Vel fór á með þeim og að lokum leiddust þau út í leigubíl.

  Nokkru síðar sagði bardaman mér að snurða hafi hlaupið á hjá skötuhjúunum.  Konan hafði komið grátandi á barinn og sagt farir sínar ekki sléttar.  Þau höfðu að vísu átt góða nótt.  En að lokinni heimaleikfimi um morguninn flýtti maðurinn að klæða sig.  Hann sagðist vera of seinn út á flugvöll.  Hann þyrfti að sækja konuna sína þangað.

  Bólvinkonan benti honum á að hann hefði sagst vera fráskilinn að Vestan.  "Ég var bara að vitna í dægurlag með Önnu Vilhjálms," svaraði hann hlæjandi.  "En hvað með flugprófið?"  spurði hún.  "Það var spaug,"  svaraði hann.  "Ég veit ekkert um flugvélar.  Ég er strætóbílstjóri!"    

Athugasemdir

[Stefán (IP-tala skráð) 14.1.2023 kl. 15:09]

Trúgjarn einfeldningur blessuð daman. Myndi alveg smellpassa inn í þingflokk VG.

[Jens Guð, 14.1.2023 kl. 19:22]

Stefán,  góður að vanda!

[Guðjón E. Hreinberg, 15.1.2023 kl. 09:09]

Einu sinni fór maður nokkur á eftir kærustunni sinni í tiltekinn klefa aftast í flugvélinni. Hún hafði haft orð á að hana langaði í háloftaklúbbinn, svo hann ákvað að koma henni skemmtilega á óvart. Þegar þau komu út úr klefanum, fáeinum mínútum síðar, stóð fluffa (áður flugfreyja) nærri klefanum, leit á þau og brosti síðan samsærislega. Kærastan eldroðnaði og fór hjá sér, en jafnaði sig.

Varist fólk sem óttast samsæri, þau missa af öllu þessu skemmtilega.

Já, þetta er sönn saga en ég man ekki hvaðan.

[Jens Guð, 15.1.2023 kl. 11:27]

Guðjón,  takk fyrir skemmtilega sögu.  Mín saga er líka sönn.