Smásaga um flugferð

  Haukur var háaldraður þegar hann flaug í fyrsta skipti með flugvél.  Tilhugsunin olli honum kvíða og áhyggjum.  Hann áttaði sig á að þetta var flughræðsla á háu stigi.  Til að slá á kvíðakastið leitaði hann sér upplýsinga um helstu ástæður fyrir flugslysum.  Það gerði illt verra.  Jók aðeins kvíðakastið.

  Áður en Haukur skjögraði um borð deyfði hann sig með koníaki sem hann þambaði af stút.  Það kom niður á veiklulegu göngulagi fúinna fóta.  Hann fékk aðstoð við að staulast upp landganginn.  Allt gekk vel.

  Nokkru eftir flugtak tók hann af sér öryggisbeltið og stóð upp.  Hann mjakaði sér hálfhrasandi að útihurð vélarinnar. Í sama mund og hann greip um handfangið stökk flugfreyja fram fyrir hann og kallaði höstuglega:  "Hvað heldurðu að þú sért að gera?"

  "Ég þarf að skreppa á klósett," útskýrði hann. 

  "Ef þú opnar dyrnar hrapar flugvélin og ferst!" gargaði flugfreyjan æstum rómi.

  Kalli var illa brugðið.  Hann snérist eldsnöggt á hæl og stikaði óvenju styrkum fótum inn eftir flugvélinni.  Um leið hrópaði hann upp yfir sig í geðshræringu:  "Hvur þremillinn!   Ég verð að skorða mig aftast í vélinni.  Þar er öruggast þegar vélin hrapar!"        

 

Athugasemdir

[Jóhann Elíasson, 2.4.2023 kl. 13:40]

Frábær saga.  Jú  þeir eru nokkrir sem flughræðslan hefur leikið grátt...... 

[Stefán (IP-tala skráð) 2.4.2023 kl. 13:55]

En hvar getur aumingja Kata skorðað sig þegar VG hrapar eða hverfur alveg ?

[Jens Guð, 2.4.2023 kl. 14:04]

Jóhann,  takk fyrir!

[Jens Guð, 2.4.2023 kl. 14:04]

Stefán,  þegar stórt er spurt verður lítið um svör.  

[Sigurður I B Guðmundsson, 2.4.2023 kl. 19:39]

Skeit hann þá í buxurnar??????

[Jens Guð, 3.4.2023 kl. 06:42]

Sigurður I B,  það hefur allt gossað!