Lulla frænka í stimpingum

 Lulla föðursystir mín var ekki eins og fólk er flest.  Hennar andlega heilsa var ekki sem best.  Hún sagði og gerði margt óvenjulegt.  Oft var það eitthvað broslegt.  Hún var ljúfmenni og vildi öllum vel.  Okkur í fjölskyldunni þótti vænt um hana.  Það var ætíð gleðiefni að fá hana í heimsókn.

  Lulla ók allra sinna ferða;  hvort sem hún var með ökuskírteini í lagi eða ekki.  Það var allur háttur á.  Og aldrei borgaði hún sektir sem hlóðust upp í þykkum bunkum.  Hún fylgdi ekki alltaf umferðareglum.  Fyrir bragðið var bíll hennar jafnan dældaður á öllum hliðum.  Hún kippti sér ekkert upp við það.  Þess vegna vakti undrun þegar hún tók afar nærri sér að sjá dæld farþegamegin á bíl móður minnar.  Hún var alveg miður sín.  

  Svo bar við að þær mágkonur fóru til Dalvíkur á jarðarför.  Er þær nálguðust kirkjuna gaf Lulla mömmu ströng fyrirmæli um að leggja bílnum þannig að enginn sæi dældina.  Að útför lokinni óskaði kona nokkur eftir að fá far með þeim.  Lulla tók því illa.  Sagði að það væri lykkja á leið þeirra,  þær væru að flýta sér og þetta hentaði ekki.  Mamma hinsvegar tók vel í ósk konunnar og bauð hana velkomna í bílinn.  

  Er konan hugðist ganga að bílnum farþegamegin stökk Lulla í veg fyrir hana.  Var hún þó stirð til gangs.  Lulla tók á henni og hrinti í aftursætið bílstjóramegin.  Mömmu dauðbrá og reyndi að gera gott úr þessu með því að ræða eitthvað skemmtilegt við konuna.  Skutlið var innan Dalvíkur og tók stutta stund.  Er konan hafði yfirgefið bílinn spurði mamma Lullu:  "Hvers vegna í ósköpunum lentuð þið í stimpingum?"  Hún kveikti sér í sígarettu og svaraði síðan sallaróleg:  "Ég vildi akki að hún sæi dældina."    

Athugasemdir

[Sigurður I B Guðmundsson, 4.12.2020 kl. 12:14]

Minnir mig á þegar einhverjir áttsettir Kínverjar máttu ekki sjá Falun Gong meðlimi mótmæla veru þeirra hérna á landi. 

[Jens Guð, 4.12.2020 kl. 13:31]

Sigurður I B,  ég man eftir þessu.  Íslensk stjórnvöld bugtuðu sig og beygðu eins og ræflar fyrir duttlungum harðstjóranna. 

[Birgir Freyr Lúðvígsson (IP-tala skráð) 5.12.2020 kl. 12:21]

Þetta er frábær saga!

[Jens Guð, 5.12.2020 kl. 15:10]

Birgir Freyr,  takk fyrir.

[Tobbi (IP-tala skráð) 5.12.2020 kl. 15:46]

Hvernig er annars heilsan, ágæti Hrafnhælingur?

[Þorsteinn Siglaugsson, 5.12.2020 kl. 21:52]

Eru allir ættingjar þínir svona skrítnir?

[Jens Guð, 6.12.2020 kl. 11:26]

Tobbi,  ég tóri.

[Jens Guð, 6.12.2020 kl. 11:27]

Þorsteinn,  ég skilgreini þá frekar sem litríka.  Sjálfur er ég hinsvegar töluvert skrítinn.

[Þorsteinn Siglaugsson, 6.12.2020 kl. 20:42]

Já, þú varst meðtalinn. Enda ertu vitanlega skyldur þér, ekki satt?

[Jens Guð, 6.12.2020 kl. 21:25]

Þorsteinn (# 9),  rifjast þá upp þegar einkavæðinganefnd - eða álíka fyrirbæri - skilaði af sér niðurstöðu þess efnis að Björgólfsfeðgar væru óskyldir.  Doddsson benti á að það væri vandræðalegt fyrir mömmu Björgólfs Thors.  

[Þórður Bogason (IP-tala skráð) 10.12.2020 kl. 08:51]

Góð saga :)

[Jens Guð, 10.12.2020 kl. 16:28]

Þórður,  takk fyrir það.  Nú er kominn sá árstími að brýnt er að spila "Biðin eftir aðfangadegi".  https://youtu.be/vDomUj8whjM