Lauflétt smásaga

  Baddi boltabulla sækir alla fótboltaleiki sem hann veit af.  Reyndar bara þá sem ekkert kostar inn á.  Að öðru leyti skiptir það Badda boltabullu ekki máli hvort 4ðu deildar lið séu að keppa eða utandeildarlið. 

  Badda boltabullu er alveg sama hvaða lið keppa.  Hann stendur ýmist með öðru liðinu eða báðum ef liðin eru ekki í vel aðgreindum búningum.  Hann gerir hróp að leikmönnum.  Stundum með hvatningaorðum en oftast með skömmum.  Sakar þá um klaufaskap,  aulagang og að brjóta af sér í leiknum.  Hróp hans óma allan leikinn.  Hann tilkynnir rangstöðu,  hendi,   víti og annað sem honum þykir aðfinnsluvert.  Tilkynningarnar eru aldrei til samræmis við úrskurð dómarans.  Kannski er það þess vegna sem hann hellir spurningum yfir dómarann:  "Ertu blindur,  fíflið þitt?",  "Ertu sofandi,  heimski ræfill?",  "Ertu vangefinn?"

   Einstaka sinnum hleypur Baddi boltabulla inn á völlinn og eldsnöggt út af aftur.  Í þau skipti hefur hann hripað niður á blað orðsendingu til leikmanna.

  Um daginn hljóp hann að einum með bréf sem í stóð:

  "Lýður Hörður!  Þú ert ömurlegasti knattspyrnumaður sem ég hef séð.  Síðast þegar ég sá þig spila var ég svo heppinn að heyra dómarann kalla nafn þitt.  Ég var fljótur að skíra útikamarinn minn í höfuðið á þér.  Ef þú átt leið um Grímsnesið getur þú fundið kamarinn við sumarbústaðinn minn.  Kamarinn er merktur stórum gulum stöfum "Lýður Hörður".  Í mínum huga eru Lýður Hörður og kamar eitt og hið sama." 

  Undir þetta skrifaði Baddi stoltur fullt nafn sitt.

  Baddi boltabulla hristist af hlátri á meðan hann fylgdist með manninum lesa bréfið.  Hláturinn breyttist í forvitnissvip er maðurinn,  að loknum lestri,  dró upp blað og penna og byrjaði að skrifa á blaðið.

  Þegar leikurinn var flautaður af gekk hann framhjá Badda boltabullu og rétti honum blaðið.  Á því stóð:

  "Kæri Baldur.  Ég hef aldrei spilað fótbolta.  Þess vegna get ég hvorki verið ömurlegur knattspyrnumaður né góður.  Hinsvegar er ágætt að þú skulir hafa eytt tíma og málningu í að skrifa Lýður Hörður á kamarinn þinn.  Láttu það standa þar áfram.  Ég heiti ekki Lýður Hörður og dómarinn segir ekki Lýður Hörður þegar hann kallar til mín.  Hann segir línuvörður."

------------------

Fleiri kjánalegar smásögur:

- Matarboð í sveitinni

http://jensgud.blog.is/blog/jensgud/entry/266411

- Morðsaga

http://jensgud.blog.is/blog/jensgud/entry/320299

- Um borð

 http://jensgud.blog.is/blog/jensgud/entry/278812

- Í plötubúð

http://jensgud.blog.is/blog/jensgud/entry/260037

- 27 ára

http://jensgud.blog.is/blog/jensgud/entry/299380

- Strákur skiptir um gír

http://jensgud.blog.is/blog/jensgud/entry/538649

- Skokkari

http://jensgud.blog.is/blog/jensgud/entry/606929

Athugasemdir

[Þorsteinn Briem, 20.11.2008 kl. 14:35]

Það er gott að vita til þess að ekki hafa allir misst vitið í kreppunni.

[Rannveig H, 20.11.2008 kl. 16:01]

Ég er sko búin að tapa vitinu Steini og ekki nokkur leið hjá mér að finna það. En Jensin heldur sínu! Góð saga.

Er búin að fá bókina um Önnu frænku þína og hún skemmtir mér verulega.

[Ómar Ingi, 20.11.2008 kl. 16:33]

[Þorsteinn Briem, 20.11.2008 kl. 16:45]

Páfagaukurinn Fred lagðist í þunglyndi út af kreppunni og hann reitti því af sér allar hálsfjaðrirnar. Sömuleiðis tók hann upp á því að kinka kolli allan liðlangan daginn og það var rakið til depurðar hans.

Fuglinn hefur nú fengið sérstaka meðferð sem felst í því að tvisvar á dag er honum gefið í vökvaformi lyfið Clomicalm sem er fuglvæn útgáfa af gleðilyfinu Prozac.

[Jens Guð, 20.11.2008 kl. 21:47]

  Rannveig,  ég er ekki búinn að fá bókina.  Það er greinilega ekki sama hvar í Vesturbænum fólk býr.

  Ómar,  takk fyrir innlitið.

  Steini,  ég fór í banka í dag.  Starfsmaður þar - sem ég átti ekki erindi við - kinkaði til mín kolli.  Ég átta mig ekki á því hver hann er.  Hef verið að reyna að rifja upp hvort ég þekki hann eða hann sé að taka feil.  Núna fatta ég að hann kinkaði kolli út af depurð.