Heildarlistinn yfir greind og trúhneigð

 

  Ég hef raðað hér upp þjóðum heims eftir meðalgreind þeirra.  Greindarvísitalan er fyrir aftan nafn landsins.  Í sviganum þar fyrir aftan er hundraðshluti viðkomandi þjóðar sem ekki trúir á guð.  Þetta er nokkuð merkilegur og umhugsunarverður listi að skoða.  Þegar litið er yfir listann í fljótu bragði læðist að mér sá grunur að greindarvísitöluprófið (Raven) sé ónákvæmt.  Skekkjumörk þess séu í hag menntuðum Asíu- og Evrópu- og N-Ameríkuþjóðum en nái síður að mæla ýmsa hæfileika (greind) 3ja heims þjóða.

  Það kemur mér pínulítið á óvart hvað hlutfallslega margir trúa ekki á guð.  Þar gætu líka verið skekkjumörk.  Flestir Víetnamar eru búddistar.  Ég þekki búddisma ekki nógu vel.  Sumir skilgreina hann sem heimspeki fremur er trúarbrögð.  Þeir víetnömsku búddistar búsettir á Íslandi sem ég þekki iðka sinn búddisma líkt og trúarbrögð.  Hafa altari og stunda þar sínar daglegu "serimóníur",  "kirja" við brennandi reykelsi og þess háttar.

  Einnig kemur mér á óvart hvað margar þjóðir eru nánast altrúaðar,  eða 99,5%.

  Fyrri grein um sama efni er á http://jensgud.blog.is/blog/jensgud/entry/576172. 

1             Singapore         108     (13)

2             Suður-Kórea      106     (30)

3-5          Japan                105     (65)

3-5          Kína                  105     (12)

3-5          Tævan               105     (24)

6             Ítalía                  102     (6)

7-9          Ísland                101     (16)

7-9          Mongólía            101     (20)

7-9          Sviss                 101     (17)

10-13       Austurríki           100     (18)

10-13       Bretland             100     (41,5)

10-13       Holland              100     (42)

10-13       Noregur              100     (31)

14-21       Belgía                  99     (43)

14-21       Kanada                99     (22)

14-21       Eistland               99     (49)

14-21       Finnland               99    (28)

14-21       Þýskaland            99    (42)

14-21       Nýja-Sjáland         99    (22)

14-21       Pólland                99     (3)

14-21       Svíþjóð                 99    (64)

22-29       Ástralía                98    (26)

22-29       Bandaríkin            98    (10,5)

22-29       Danmörk              98    (48)

22-29       Frakkland             98    (44)

22-29       Lettland                98    (20)

22-29       Spánn                  98    (15)

22-29       Tékkland              98    (61)

22-29       Ungverjaland         98    (32)

30-32       Hvíta-Rússland      97    (17)

30-32       Rússland              97   (27)

30-32       Úkraína                97    (20)

33-36       Moldavía              96    (6)

33-36       Slóvakía               96    (17)

33-36       Slóvenía               96    (35)

33-36       Úruguay               96    (12)

37-38       Ísrael                   95    (15)

37-38       Portúgal               95    (4)

39-43       Armenía               94    (14)

39-43       Georgía                94    (4)

39-43       Kazakhstan          94    (12)

39-43       Rúmenía              94    (4)

39-43       Víetnam               94    (81)

44-45       Argentína             93    (4)

44-45       Búlgaría               93    (34)

46-48       Grikkland             92    (16)

46-48       Írland                   92    (5)

46-48       Malasía               92    (0,5)

49-52       Brunei                 91    (0,5)

49-52       Kambódía            91    (7) 

49-52       Litháen                91    (13)

49-52       Tæland                91    (0,5)

53-56       Albanía                90    (8)

53-56       Chile                    90   (2)

53-56       Króatía                 90   (7)

53-56       Kyrgystan            90   (7)

57-58       Kosta Rica           89   (1)

57-58       Laos                    89   (5)

59-60       Ecuador               88   (1)

59-60       Mexíkó                 88   (4,5)

61-68       Azerbaijan            87   (0,5)

61-68       Bólivía                  87   (1)

61-68       Brasilía                87    (1)

61-68       Indónesía             87    (1,5)

61-68       Írak                     87    (0,5)

61-68       Tajikistan             87    (2)

61-68       Turkmenistan       87    (2)

61-68       Uzbekistan          87    (4)

69-70       Kúveit                  86    (0,5)

69-70       Filippseyjar          86    (0,5)

71-74       Kúba                   85    (40)

71-74       Perú                    85    (1)

71-74       Trinidad                85   (9)

71-74       Jemen                  85   (0,5)

75-85       Afganistan            84   (0,5)

75-85       Kólumbía              84   (1)

75-85       Íran                      84   (4,5)

75-85       Jórdanía               84   (0,5)

75-85       Morocco              84    (0,5)

75-85       Pakistan              84    (0,5)

75-85       Panama               84    (1)

75-85       Sameinaða Arabíska furstadæmið  84   (0,5)

75-85       Sádi-Arabía          84    (0,5)

75-85       Paraguay             84    (1)

75-85       Venesúela           84    (1)

86-90       Algería                83    (0,5)

86-90       Líbya                  83    (0,5)

86-90       Oman                 83    (0,5)

86-90       Sýrland               83    (0,5)

86-90       Túnis                  83    (0,5)

91-95       Bangladesh         82    (0,5)

91-95       Dóminíska lýðveldið   82  (7)

91-95       Indland                82    (3)

91-95       Líbanon               82    (3)

91-95       Madagaskar         82   (0,5)

96-98       Egyptaland          81    (0,5)

96-98       Hondúras             81   (1)

96-98       Níkaragúa            81   (1)

99           El Salvador           80   (1)

100-101   Gvatemala            79   (1)

100-101   Sri Lanka             79    (0,5)

102         Nepal                   78    (0,5)

103         Máritanía              76    (0,5)

104         Úganda                73    (0,5)

105-107   Kenya                  72    (0,5)

105-107   Suður-Afríka         72    (1)

105-107   Tansanía              72    (0,5)

108-110   Ghana                 71     (0,5)

108-110   Jamaíka              71     (3)

108-110   Zambía                71     (0,5)

111-115   Benin                  70     (0,5)

111-115   Botswana            70     (0,5)

111-115   Namibía               70     (4)

111-115   Rwanda               70     (0,5)

111-115   Togo                    70     (0,5)

116-121   Búrundi                69     (0,5)

116-121   Cote d´lvoire         69     (0,5)

116-121   Malawi                 69     (0,5)

116-121   Malí                     69     (0,5)

116-121   Niger                    69    (0,5)

116-121   Nígería                 69     (0,5)

122-125   Angóla                 68     (1,5)

122-125   Burkina Faso        68     (0,5)

122-125   Chad                    68     (0,5)

122-125   Sómalía                68     (0,5)

126-128   Guinea                  67     (0,5)

126-128   Haíti                      67     (0,5)

126-128   Líbería                   67     (0,5)

129-131   Gambía                 66     (0,5)

129-131   Senegal                 66     (0,5)

129-131   Zimbabwe              66     (4)

132-137   Kamerún                64    (0,5)

132-137   Mið-Afríska lýðveldið  64  (1,5)

132-137   Kongó                    64    (2,7)

132-137   Ethíópía                  64    (0,5)

132-137   Mósambik               64    (5)

132-137   Sierra Leone            64    (0,5)

Hér eru efstu sæti þeirra þjóða þar sem fæstir trúa á guð:

1             Víetnam                  81%    (greind 94)

2             Japan                     65%    (greind 105)

3             Svíþjóð                   64%    (greind 99)

4             Tékkland                61%    (greind 98)

5             Eistland                 49%    (greind 99)

6             Danmörk                48%    (greind 98)

7             Frakkland               44%    (greind 98)

8             Belgía                    43%    (greind 99)

9             Þýskaland              42%    (greind 100)

10           Bretland                 41,5%  (greind 100)

11           Kúba                      40%    (greind 85)

12           Slóvenía                  35%    (greind 96)

13           Búlgaría                  34%    (greind 93)

14           Ungverjaland            32%    (greind 98)

15           Noregur                   31%    (greind 100)

16           S-Kórea                  30%    (greind 106)

17           Finnland                  28%    (greind 99)

18           Rússland                 27%    (greind 97)

19           Ástralía                   26%    (greind 98)

20-22      Tævan                     22%    (greind 105)

20-22      Kanada                    22%   (greind 99)

20-22      Nýja-Sjáland             22%   (greind 99)

23-25      Mongólía                  20%   (greind 101)

23-25      Lettland                   20%    (greind 98)

23-25      Úkraína                    20%   (greind 97)        

Plötuumsögn

 

Titill:  Cover Up

Flytjandi:  Ministry

Einkunn: **** (af 5)

  Bandaríska hljómsveitin Ministry hefur í áratugi verið í fararbroddi svokallaðra "industrial"  þungarokkssveita.  Ég veit ekki hvaða íslenskt orð er best að nota yfir "industrial".  Það er óheppilegt að kalla þetta iðnaðarrokk vegna þess að hérlendis höfum við í áratugi notað orðið iðnaðarrokk yfir músík hljómsveita á borð við Journey,  Styx, REO Speedwagon,  Boston,  Toto,  Foreigner og slíkra.  Enskumælandi kalla músík þeirra "arena rock",  melódískt hard rock eða "US Faceless rock". 

  "Industrial" þungarokkið er allt annað.  Það einkennist af hljóðvegg sem svipar til hávaða á iðnaðarsvæði þar sem menn eru að saga,  negla,  fræsa og öðrum drunum og sargi. 

 

  Á þessari nýjustu plötu Ministry kráka (covera) Al Jourgensen og félagar uppáhaldslögin sín.

  Stærsta vandamálið við svona krákuplötur er að þar eru tekin fyrir lög sem notið hafa vinsælda vegna vel heppnaðs flutnings höfundanna.  Þegar reynt er að fylgja frumútgáfunni verður útkoman sjaldnast betri en þokkaleg karókí-útfærsla.  Ef farin er önnur og ólíkari leið er hætta á því að "sjarmi" frumútgáfunnar skili sér ekki því hann liggur jafnan í útsetningunni.

 

  Ministry fara bil beggja.  Al og félagar halda í flestum tilfellum tryggð við frumútgáfuna en bæta við "industrial" sérkenni sínu. Í fyrstu lögum plötunnar þykir mér Ministry halda sig um of við frumútgáfurnar:  "Under My Thumb" (Rolling Stones),  "Bang a Gang" (T. Rex.  Enskt glam-rokk dúó sem mér þótti/þykir afskaplega leiðinlegt.  Leiðinlegt lag og lítið skemmtilegra með Ministry),  "Radar Love" (hollenska Golden Erring) og "Space Truckin´" (Deep Purple).

  Platan fer á gott skrið með "Black Betty" (Leadbelly).  Þar er auðheyranlega tekið mið af flottum flutningi Ram Jam á laginu (sem heyra má meðal annars á plötunni "Rokkland 2007").  Næstu lög eru líka flott:  "Mississippi Queen"  (Mountain),  "Just Got Paid" (ZZ Top),  "Roadhouse Blues"  (Doors) og "Supernaut" (Black Sabbath).

  Toppurinn eru tvö síðustu lögin:  "Lay Lady Lay" (Bob Dylan) og "What a Wonderful World" (þekktast í flutningi Louis Armstrongs og Páls Óskars).  "Lay Lady Lay" er tekið af gamalli plötu með Ministry.  Hljómurinn í því lagi er allur "hreinni" og "grynnri" en á öðrum lögum plötunnar.  En aldeilis frábær flutningur. 

  "What a Wonderful World" hefst á rólegum nótum en skiptir síðan yfir í góðan og harðan rokksprett. Svipar á þann hátt til "My Way" í flutningi Sids Vicious og Nínu Hagen og "Lily Marlene" með Das Kapital.

 

  Verra er að "falin" aukalög á plötunni eru tvær útgáfur af þessu lagi.  Sú fyrri er rólega útgáfan.  Sú seinni er harða rokkútgáfan.  Þessum tveimur aukalögum er illa ofaukið.  Lagið er flott eins og það er sem lokalag plötunnar. 

  Það er til önnur útgáfa af plötunni sem ég á ekki.  Hún inniheldur Bítlalagið "She´s So Heavy",  óð Johns Lennons til Yokoar Ono.  Ég hefði gjarnan viljað eiga plötuna með því magnaða lagi,  einu því besta frá Bítlunum og ég get alveg heyrt fyrir mér að Ministry afgreiði það með stæl. 

  Ministry er fyrst og fremst Al Jourgensen,  flóttamaður frá Kúbu.  Framan af var Ministry fullskipuð hljómsveit en í áranna rás hefur flísast úr henni.  Al hefur lengi verið djúpt sokkinn í eiturlyfjaneyslu.  Dópið hefur þó ekki svo merkt verði komið niður á músíksköpun hans.  Andúð hans á Brúski forseta hefur sömuleiðis veitt honum mikinn innblástur á fyrr plötum Ministry. 

  Á þessari plötu er Ministry fyrst og fremst Al í slagtogi við liðsmenn frægra hljómsveita á borð við Fear Factory,  Revolting Cocks,  Prong o.fl.

  Ég gef fyrri hluta plötunnar 3 stjörnur og seinni hlutanum 5 stjörnur. 

Stórfurðulegar nágrannaerjur

 

  Þetta gerðist fyrir nokkrum árum á sólríkum sumardegi.  Ég var að skutla dóti til kunningja míns í smáíbúðarhverfi.  Þar sem við stóðum í útidyrunum hjá honum renndi nágranni hans í hlað.  Kunningi minn kastaði glaðlega kveðju á hann en var svarað með fúkyrðum.  Ég varð eitt spurningarmerki af undrun.

  Kunningi minn útskýrði málið.  Það er rétt að taka fram að þetta er rösklega sextugur maður en mjög ör.  Klárlega það sem kallast ofvirkur.  Hann talar og framkvæmir hluti áður en hann hugsar.  Og er alltaf á fullu.  Situr aldrei kyrr,  hvorki þegar hann horfir á sjónvarp eða fer til kirkju.  Hann sprettur ítrekað á fætur undir öllum kringumstæðum til að senda sms eða sækja penna út í bíl til að punkta eitthvað hjá sér og svo framvegis.

  Hann útskýrði fyrir mér framkomu nágrannans eitthvað á þessa leið:  "Um síðustu helgi tók ég garðinn minn í gegn.  Sló hann,  snyrti blómabeð og bjó til þetta fallega kúlulaga mynstur með jöfnu millibili á limgerðið.  Þetta var rosalega skemmtilegt enda fátt skemmtilegra en dútla í gróðri og mold.  Ég gleymdi mér algjörlega og rankaði allt í einu við mér þegar ég var einnig farinn að taka til hendi í þessum samliggjandi garði nágrannans.  

  Nágranninn var á sólarströnd erlendis og ekki væntanlegur fyrr en síðar í vikunni.  Ég sá fram á að bið yrði á að hann gæti sinnt sínum garði.  Það er lítið varið í að hafa minn garð fínan og snyrtilegan en þurfa að horfa upp á óhirtan garð nágrannans.  Þannig að ég bretti betur upp ermar og tók garðinn hans rækilega í gegn.  Þar var ekki vanþörf á grænum fingrum.  Ég stakk upp blómabeð og endurraðaði blómunum til að ná fram skemmtilegri litasamsetningu.  Sérðu þrepin þarna?  Þetta var óreglulegur grjótbingur.  Sitthvað fleira lagaði ég og samræmdi kúlulaga mynstur á limgerði hans og mínu.

  Þegar nágranninn kom frá útlöndum þá trylltist hann.  Hann ásakaði mig um ósvífni,  frekju,  yfirgang,  afskiptasemi og ég veit ekki hvað og hvað.  Ég hafði frekar reiknað með fagnaðarlátum,  miklu þakklæti og jafnvel McCinTosh dollu.  Sennilega var hann ósofinn eftir flugið og pirraður þannig að ég var ekkert að rífast við hann.  Ég ráðlagði honum bara að leggja sig.  Hann er búinn að vera með ólund síðan.  Þú heyrðir hvernig hann hreytti í mig ónotum.  Það er allt annað en gaman að búa við svona skapstirðan nágranna."   

Hver er söngkonan dularfulla sem borgarstjórinn bauð til þátttöku á Menningarnótt?

 

  Fyrir nokkrum dögum sló færeyska dagblaðið Dimmalætting (= dimmu léttir = árblik) því upp að borgarstjóri Reykjavíkur,  Ólafur F.  Magnússon,  hafi boðið söngkonunni Sölvu Ford að skemmta á Menningarnótt í Reykjavík ásamt undirleikara hennar.  Í kjölfarið höfðu íslenskir blaðamenn og útvarpsdagskrármenn samband við mig.  Þeir spurðu hver færeyska söngkonan Sölva Ford sé.

  Mér vafðist tunga um fót.  Ég kannaðist ekki við þetta nafni.  Samt sem áður fylgist ég þokkalega vel með færeysku músíksenunni.  Ég á allar helstu færeyskar plötur og hef verið duglegur að sækja færeyskar músíkhátíðir,  allt frá Ólavsvöku og G!Festivali til Asfalt.

  Ég vatt mér í það að rannsaka málið.  Heimildum mínum ber ekki saman um það hvort stúlkan heitir Sölva (sem þýðir föl eða guggin og grá) eða Sólvá (sem er hliðstæða við íslenska nafnið Sólveig).  Þegar leitað er í skriflegum heimildum skilar nafnið Sólvá Ford fleiri niðurstöðum en Sölva Ford. 

  Sölva Ford mun hafa fyrst getið sér gott orð er hún sigraði í keppni sem kallast "Ársins söngrödd 2000".  Eins og nafnið gefur til kynna er það söngvarakeppni og að ég held unglingasöngvarakeppni.

  Sölva keppti í færeysku músíktilraununum Prix Föroyar með hljómsveitinni Tám og einnig í karókíkeppni í Þórshöfn 2006.  Í karókíkeppninni komst hún í endanleg úrslit.  Í kjölfarið var hún fengin til að sitja í 21.  manna dómnefnd sem valdi besta færeyska lagið í keppni sem AME (Atlantic Music Event) stóð fyrir.  Þar bar lag eftir Eivöru sigur úr bítum. 

  Sölva hefur sungið með ýmsum dansiballahljómsveitum.  Ein þeirra er krákubandið (= "cover" lög) Ford Siesta. 

  Sölva er ekki stórt né þekkt nafn í Færeyjum,  eins og sést á því að nafn hennar er á reiki.  Hinsvegar er hún sögð vera góð söngkona með mikla útgeislun á sviði. 

  Borgarstjóri Reykjavíkur,  Ólafur F.  Magnússon,  er mjög áhugasamur um að höfuðborgin okkar sé lifandi borg með iðandi mannlífi.  Hann hefur gengið framfyrir skjöldu með að bjóða borgarbúum upp á lifandi músík,  samanber hljómleika Mezzoforte í Hljómskálagarðinum á dögunum og "hljómleikum aldarinnar" með Björk,  Sigur Rós,  Ghostdigitals og Ólöfu Arnalds í Laugardalnum núna á laugardaginn.  Það er fagnaðarefni að borgarstjórinn sé áhugasamur og vakandi fyrir því hvernig megi gæða Menningarnótt Reykjavíkur sem litríkastri dagskrá.  Það er ekkert kappsmál að dagskráin samanstandi af frægum og þekktum tónlistarmönnum heldur miklu fremur áhugaverðum og áheyrilegum,  eins og tekist hefur svo vel til hjá Airwaves.  Ég fagna því að borgarstjórinn skuli hafa uppgötvað góða færeyska söngkonu sem hann telur eiga erindi á Menningarnótt Reykjavíkur í ágúst.  Það er aldrei nóg af færeyskum söngvurum á Íslandi.

Greind og trúhneigð - merkileg rannsókn

  Í Kristilega dagblaðinu í Danmörku fer fram áhugaverð umræða um merkilega niðurstöðu samanburðarrannsóknar 3ja virtra háskólaprófessora.  Þeir báru saman hlutfall trúaðra í 137 löndum og meðalgreind viðkomandi þjóða.  Beint samhengi er á milli þess að þeim mun hærri sem meðalgreindin (IQ) er þeim mun lægra hlutfall þjóðarinnar trúir á guð.  Þetta hefur kallað á ýmsar vangaveltur í Kristilega dagblaðinu.

  Þó að í víðu samhengi sé niðurstaðan þessi þá er staðreynd að margt trúrækið fólk er bráðgáfað og hæfileikaríkt.  Vegnar ákaflega vel í lífinu og það allt.  Sömuleiðis er ekkert sem bendir til þess að fólk sem tekur trú með aldrinum verði grunnhyggnara við það.  Niðurstaða rannsóknarinnar kveikir þess vegna fleiri spurningar en hún svarar.  Hugsanleg skýring getur legið í sögu og menningu þjóðanna 137. 

  Það væri gaman að heyra skoðun ykkar á þessu - án upphrópana.  Það er skemmtilegra að hafa umræðu um þetta á kurteislegum og yfirveguðum nótum,  eins og hjá Kristilega dagblaðinu.  Fyrir þá sem nenna að "gúgla" þessa rannsókn þá heita prófessorarnir Richard Lynn, Helmuth Nyborg og John Harvey.

Takið þátt í spennandi skoðanakönnun

  Fyrir nokkrum dögum leitaði ég álits hjá ykkur um það hvaða íslenskar söngkonur séu flottastar.  Nú hef ég stillt nöfnum þeirra helstu upp í formlega könnun hér til hliðar.  Ég hvet ykkur til að kjósa og gaman væri að fá "komment" frá ykkur um ástæðu þess hvernig atkvæðinu var varið. 

  Þegar ég tala um flottustu söngkonuna þá er ekki átt við útlit heldur söngstíl og týpuna.  Ég er ekki að leita eftir bestu karókí söngkonunni eða þeirri sem hefur fagurfræðilega bestu raddbeitingu.  Valið er bundið við popp- og rokksöngkonur.  Þess vegna eru flottar vísnasöngkonur eða óperusöngkonur ekki með. 

  Könnunin stendur þangað til 500 atkvæði hafa skilað sér í hús - nema ef mjög mjótt verður á efstu sætum. 

Rasmus Rasmussen - færeyskur Hörður Torfa

 

  Rasmus Rasmussen er ungur færeyskur rokkari.  Hann er einn besti gítarleikari Færeyja.  Hann hefur sjálfstæðan og einstaklega flottan gítarstíl og hefur sem slíkur sett mark sitt á færeyska rokktónlist.  Hann hefur spilað með flestum helstu þungarokkshljómsveitum Færeyja,  svo sem Diatribes,  Hatespeech og Makrel.

  2002 kom hann með Makrel til Íslands og tók þátt í Músíktilraunum.  Makrel hreppti bronsverðlaun og Rasmus var óumdeilanlega kosinn besti gítarleikarinn.

  Síðan hefur Makrel tvívegis komið til Íslands og spilað á hljómleikum á Nasa og Grand Rock.  Lög með Makrel hafa komist inn á spilunarlista rásar 2 og plöturnar þrjár með Makrel hafa selst ágætlega á Íslandi.  Rasmus hefur jafnframt sent frá sér 3 sólóplötur.  Tékkið á þeim á www.myspace.com/rasmusrasmussen.

  Rasmus er samkynhneigður.  Samkynhneigðir Færeyingar hafa jafnan flutt frá Færeyjum og/eða farið hljótt með sína kynhneigð.  Fordómar gagnvart samkynhneigðum eru miklir í Færeyjum.  Staða samkynhneigðra þar eru svipuð og var á Íslandi fyrir meira en 30 árum.  Við þekkjum öll söguna af því þegar Hörður Torfason varð að flýja land eftir að hafa opinberað í tímaritsviðtali á áttunda áratugnum að hann væri samkynhneigður.

  Rasmus hefur ekki farið í felur með kynhneigð sína og það hefur aldrei truflað vinahóp hans.  Það leiddi þó til þess að haustið 2006 var hann laminn í klessu á skemmtistað fyrir það eitt að vera samkynhneigður.  Þegar á reyndi kom í ljós að samkvæmt færeyskum lögum var ekki hægt að vernda hann gegn ofsóknum vegna þess að þær voru á grundvelli kynhneigðar.

  Rasmus fékk taugaáfall og lenti inn á geðdeild.  Eflaust hjálpaði honum að hann var ein helsta rokkstjarna Færeyja.  Unga fólki í Færeyjum og rokksenan stóð með honum.  Íslenska alþingiskonan Rannveig Guðmundsdóttir tók mál hans upp á vettvangi Norðurlandaráðs.  Fleiri íslenskir stjórnmálamenn létu sig mál hans varða.  Meðal annars alþingiskonan Guðrún Ögmundsdóttir og Geir Haarde.

  Mál Rasmusar hlaut heimsathygli.  Dönsk sjónvarpsstöð gerði sérstakan þátt um málið sem vakti mikla athygli og umræðu.  Einnig var málinu gerð skil í þýsku og bresku sjónvarpi ásamt íslenskum sjónvarpsstöðvum.

  Þrýstingur á færeysk stjórnvöld var mikill.  Á færeyska lögþinginu var borið fram frumvarp um að ekki megi ofsækja samkynhneigða.  Það mætti gífurlega mikilli andstöðu í Færeyjum.  Einkum frá kristilegum prestum og talsmönnum sem töldu bráðnauðsynlegt að lemja homma með Biblíunni.  Vikulegar bænavökur voru haldnar í færeyskum kirkjum þar sem guð var beðinn um að styðja ofsóknir gegn hommum. 

  Leikar fóru þannig að færeyska lögþingið samþykkti frumvarpið um að ekki megi ofsækja homma.  Þann dag flögguðu kirkjur Færeyja í hálfa stöng og töluðu um svartasta dag í sögu Færeyja. 

  Næsta föstudag er þrjátíu ára afmælisfagnaður Samtakanna 78 á Íslandi í Hafnarhúsinu.  Þar heldur Rasmus hljómleika.  Sýnum mannréttindabaráttu Færeyinga samstöðu með því að mæta og hlusta á flotta músík Rasmusar þar.  Ásamt því að samfagna að Íslendingar eru í fararbroddi þjóða heims að láta sig engu varða kynhneigð fólks.  Fólk þarf ekki að vera svart á hörund til að "digga" Bob Marley.  Fólk þarf ekki að vera konur til að "digga" Patti Smith.  Fólk þarf ekki að vera samkynhneigt til að "digga" Rasmus Rasmussen.    

Afmælishátíð Samtakanna 78

  Á bloggi mínu bulla ég stundum heilu ósköpin.  Bæði um samkynhneigð,  gagnkynhneigð og hvað sem er.  Þegar ég bulla um samkynhneigð eiga sumir til að móðgast fyrir hönd samkynhneigðra.  Sjaldnast held ég eða vona að samkynhneigðir sjálfir taki því illa.  Enda aldrei illa meint.  Mér þykir bara allt í lagi að skrifa í léttum dúr um flesta hluti.  Ég styð samkynhneigða í öllum þeirra baráttumálum.

  Í ár fagna Samtökin 78 þrjátíu ára afmæli.  Á föstudaginn bjóða Samtökin 78 til afmælisveislu í Hafnarhúsinu.  Meðal þeirra sem fram koma eru færeysku rokkarnir Rasmus Rasmussen - þekktastur sem gítarleikari þungarokkssveitarinnar Makrel,  og Líggjan Ólsen úr framsæknu hljómsveitinni Deja Vu.  Í næstu færslu segi ég sögu Rasmusar. 

  Að öðru leyti hvet ég ykkur til að kynna ykkur afmælishátíðina á www.samtokin78.is.

Ósvífin heimtufrekja

 

  Stjórnendur Flugfélags Íslands eru heldur betur farnir að færa sig upp á skaftið.  Heimtufrekjan og tilætlunarsemin eru að sprengja af sér alla ramma.  Í gær auglýstu þeir í Fréttablaðinu eftir bílstjóra í flugfraktina á Reykjavíkurflugvelli.  Bílstjórinn er sagður eiga að sjá um akstur með sendingar til og frá viðskiptavinum,  sendiferðir fyrir félagið og þess háttar.

  Um hæfniskröfur segir að bílpróf sé skilyrði.  Þetta skilyrði útilokar fjöldann allan af góðum bílstjórum frá möguleika á umsókn. 

  Hvað er í gangi?  Er verið að bæta ímynd félagsins út á við?  Eða er verið að hækka standarðinn?  Hvað næst?  Verður farið að krefjast þess að flugmenn félagsins séu með flugpróf?

Ekki missa af þessu

  Á morgun (mánudag) klukkan 8 mætir Rannveig H,  virkasti blogglesari landsins,  í viðtal hjá Markúsi Þórhallssyni á Útvarpi Sögu.  Þátturinn er síðan endurspilaður klukkan 3 eftir hádegi.  Og jafnvel oftar.  Rannveig H.  bloggar einnig á www.rannveigh.blog.is.  Hún hefur sterkar skoðanir á mönnum og málefnum.  Þetta verður áreiðanlega skemmtilegt spjall.

Gullkorn úr minningargreinum

  Minningargreinarnar í Morgunblaðinu eru merkilegar fyrir margra hluta sakir.  Þær eru greinilega flestar skrifaðar af fólki sem er óvant að tjá sig á prenti.  Engu síður reyna sumir að setja sig í skáldlegar og háfleygar stellingar án þess að ráða við formið.  Útkoman vill þá verða nokkuð brosleg.  Eftirfarandi tilvitnanir eru allar úr raunverulegum minningargreinum.  Allar komnar vel til ára sinna.  Þær eiga því ekki að koma neinum illa í dag.  Nöfnum er samt breytt: 

"Gönguferðin þeirra varð styttri en menn vonuðu. Banvænn sjúkdómur beið hennar bak við stein og sló hana fljótt til jarðar."

"Hún hafði það sterka skapgerð að smá rigningarsuddi setti hana ekki úr jafnvægi."

"Hann var sannur Íslendingur og dó á 17. júní."

"Þrátt fyrir góða greind gekk hún aldrei í kvenfélag."

"Það er löngu vitað mál að bestu og skemmtilegustu vinina eignast maður í lúðrasveitum."

"Hann skrapp úr vinnunni til að fara í þrekpróf hjá Hjartavernd, en kom þaðan liðið lík."

"Ég bið þann sem lífið gaf að hugga, styrkja og bæta aðstandendum skaðann."

"Tók hann fráfall konu sinnar mjög nærri sér vegna barnanna."

"þar voru m.a. Ásta Gunnarsdóttir og Guðríður Bjarnadóttir frá Folafæti. Enda þótt Ásta væri þá hálfslæm í fæti lék hún við hvern sinni fingur."

"Sigríður lést þennan dag kl 16. Sigríður hafði ætlað að eyða deginum í annað."

"Í dag kveðjum við kæran samstarfsmann og félaga. Hann tók sér tveggja daga frí til að kveðja þennan heim."

"Og má segja að hún setti ekki svo skál af tvíbökum á borð að ekki stafaði af því mýkt og listfengi."

"Orð þessi eru skrifuð til að bera hinum látna kveðju og þakkir frá tengdafólki hans og ekki síður frá tengdamóður hans þótt nú nálgist 20.árið frá fráfalli hennar."

"Hún bjó manni sínum gott heimili og ól honum 9 hraust börn, þar af tvö á sjómannadaginn."

"Ágústa giftist ekki og eignaðist ekki börn í venjulegum skilningi þess orðs."

"Á þessum fjölbreytta lífstíl sínum kynntist Jóhann mörgum mönnum af ýmsum þjóðernum, þ.á.m. Indjánum og Kínverjum. Hann lærði tungumál þeirra að minna eða meira leyti, einkum ensku og norðurlandamálin."

''Persónulega, góði vinur, þakka ég og konan mín þér fyrir innileg samskipti á umliðnum árum. Guð varðveiti þig. Vertu sæll, ég kem bráðum.”

“Bréf barst að heiman, það færði mér fréttina: Nonni frændi er dáinn. Það hlýtur að hafa verið gott að vera kind í fjárhúsunum hans Nonna frænda.”

“Drottinn minn gefðu dánum ró og hinum líkin sem lifa.”

“Nú á morgun, þegar Jónas tekur tösku sína fulla af góðum fyrirbænum og þakklæti og hefur sig til flugs af brautinni, rísum við samstarfsmenn úr sætum og veifum til hans og þökkum samverustundirnar.”

“Þeir sem guðirnir elska deyja ungir. Þessi orð koma mér í huga þegar ég minnist afa. Hann var 93 ára þegar hann lést."

  Svo er hér eitt gullkorn til viðbótar,  sem prentvilla ber ábyrgð á:

"Hann giftist eftirlifandi eiginkonu sinni og átu þau tvö börn."

Spaugilegur bakgrunnur á myndum

  Allir kannast við það að þegar ljósmynd hefur verið framkölluð þá leynist eitthvað í bakgrunni sem átti ekki að vera þar.  Hér eru nokkur skemmtileg dæmi. 

 

Bestu lög Davíðs

  Enski tónlistarmaðurinn Davíð Bowie hefur verið að í röska fjóra áratugi.  Hann hefur verið kallaður kamelljónið vegna þess hve oft hann hefur tekið óvæntar stefnur í músíksköpun sinni ásamt útlitsbreytingum.  Enska músík og kvikmyndablaðið Uncut fékk marga af helstu lagahöfundum poppsins til að finna út hvaða lög Davíðs eru best.  Af mörgu er að taka því eftir Davíð liggja um þrír tugir platna. 

  Meðal þátttakanda í þessu vali á bestu lögum Davíðs Bowies eru liðsmenn REM,  Rolling Stones,  Massive Attack,  Foo Fighters,  Led Zeppelin,  New Order og Depeche Mode ásamt Morrisey,  Miami Steve Van Sandt,  Rufus Wainwright,  Marc Almond,  Slash,  Robert Wyatt og fleiri.

  Niðurstaðan er þessi og gaman væri að heyra skoðun ykkar á henni:

1   Heroes (1977)

  Sigur þessa lags kemur ekki á óvart.  Í því fléttast saman á áhrifaríkan hátt endurkastandi (feedback) gítarleikur Roberts Fripps,  syndandi tölvuhljómborðsleikur Brians Enos og krátrokk (Davíð bjó í Þýskalandi á þessum árum).  Þetta magnaða lag er eftir Davíð Bowie og Brian Eno.  Aðstæður voru Davíð óhagstæðar 1977.  Breska pönkbyltingin sem hófst ´76 hafði tekið yfir.  Hún einkenndist m.a. af andúð á poppstjörnum,  hetjum og leiðtogum.  Hugmyndafræðin var Do-It-Yourself.  No More Heroes með The Stranglers kom út á sama tíma (sept. ´77) og Heroes með Bowie.  Það var tímanna tákn að pönkslagarinn flaug inn á Topp 10 (8.  sæti) en Hetju-slagarinn náði ekki einu sinni inn á Topp 20 (24. sæti).  Heroes hefur samt staðist tímans tönn með glæsibrag og verið krákaður af King Crimson,  Nico,  Wallflowers og fjölda annarra.   

2   Ziggy Stardust (1972)

  Af plötunni The Rise and Fall of Ziggy Stardust and the Spiders from the Mars.  Skrítið nafn á plötu og framandi stemmning.  Peter Buck í bandarísku rokksveitinni REM minnist þess hve hann hreifst að gítarleik Micks Ronsons í þessu lagi og öðrum á plötunni.  Hann stakk rækilega í stúf við klisjur gítarhetja þessa tíma.   

3   Fame (1975)

  Fönkað lokalag plötunnar Young Americans,  samið með hjálp frá John Lennon.   Fyrsta lagið með Bowie til að komast á topp bandaríska vinsældalistans.

4   Starman (1972)

  Síðasta lagið sem Bowie samdi fyrir Siggy Stardust-plötuna.  Þegar á reyndi vantaði smáskífulag til að kynna plötuna,  Bowie settist þá niður og samdi Starman.  Lagið náði 10.  sæti breska vinsældalistans.

5   Space Oddity (1969)

  Fyrsta lagið með Bowie sem náði árangri á breska vinsældalistanum.  Náði 5.  sætinu.  Sex árum síðar var það endurútgefið og fór þá á toppinn. 

6   Ashes to Ashes (1980)

  Annað lag Davíðs í röðinni sem náði toppsæti breska vinsældalistans.  Af plötunni Scary Monsters og smellpassaði inn í nýrómantísku tölvupoppbylgjuna.

7   Rebel Rebel (1974)

  Af plötunni Diamond Dogs.  Fór í 5.  sæti breska vinsældalistans.

8   Changes (1971)

  Af plötunni Hunky Dory.  Bæði lagið og platan kolféllu í sölu.  Keith Richards telur Changes vera besta lag Bowies.  Keith tekur þó fram að hann sé enginn Bowie aðdáandi - þrátt fyrir að þeir hafi gengið í sama myndlistaskóla.  Keith segir Bowie vera lítið annað en ljósmyndafyrirsætu. 

9   Life on Mars (1971)

  Einnig af Hunky Dury og náði betri árangri en Changes.  Fór í 3ja sæti breska vinsældalistans.

10  Let´s Dance (1983)

  Af samnefndri plötu.  Fór á toppinn bæði í Bandaríkjunum og Bretlandi.

11  The Jean Genie (1973)

  Af plötunni Aladdin Sane.  Náði 2.  sæti breska vinsældalistans,  sem var besti árangur Bowies til þessa.  Johnny Marr,  gítarleikari The Smiths,  segir lagið prýða alla kosti þess sem í upphafi fékk hann til að heillast af rokki. 

12  All the Young Dudes (1974)

  Þetta lag er einungis til í hljómleikaútgáfu með Bowie,  á plötunni  David Live.  Hljómsveitin Mott the Hoople kom því hinsvegar í 3ja sæti breska vinsældalistans.  Robert Wyatt hrífst að því hvernig Bowie hleður spennu í viðlagið með því að láta hina eiginlegu sönglínu ekki fara í gang fyrr en á 3ja hljómi.   Robert kallar viðlagið jafnframt einn af bestu "fótbolta-fjöldasöngs" slögurum sögunnar. 

13  Dimond Dogs (1974)

  Af samnefndri plötu.

14  John,  I´m only Dancing (1972)

  Kom út á smáskífu og vakti upp umræðu um tvíkynhneigð Bowies.

15  Sound & Vision (1977)

  Af plötunni Low.  2ja mín.  spilaður krátrokk-inngangur með grípandi gítarleik og Mary Hopkin syngur bakrödd. 

16  The Man Who Sold The World (1971)

  Titillag 3ja plötu Bowies.  Nirvana krákuðu lagið á plötunni frábæru  MTV Unplugged in N.Y.  og héldu sig við útsetningu Bowies og félaga. 

17  Young Americans (1975)

  Af samnefndri plötu.

18  Rock ´N´ Roll Suicide (1972)

  Af plötunni um Ziggy Stardust.

19  Oh!  You Pretty Things (1971)

  Af plötunni Hunky Dory.

20  Letter to Hermione (1969)

  Kom fyrst út á plötunni  Man of Words/Man of Music  sem var sérútgefin í Bandaríkjunum.  Tilgangurinn var að koma Bowie á kort þar.  Það tókst ekki í þeirri atrennu.  Þremur árum síðar var lagið endurútgefið á plötunni Space Oddity.

Frábær útvarpsþáttur - ekki missa af honum

  Frískasti útvarpsþátturinn um þessar mundir er Litla hafmeyjan,  þáttur sem fór í loftið núna klukkan 19.00 á rás 2.  Þetta er í þriðja skipti sem þátturinn er í loftinu.  Það var svo gaman að fyrri þáttunum tveimur að ég geng út frá því sem vísu að þátturinn í kvöld verði jafn skemmtilegur.

  Þátturinn er í höndum Andra Freys og Dodda litla.  Þeir eru báðir vel þekktir úr útvarpi.  Aðallega rokkstöðvum á borð við X-ið og Reykjavík FM.  Gott ef Doddi var ekki á Effemm957 líka - sem að vísu eru ekki meðmæli.

  Andri Freyr er einnig þekktur sem fyrrum gítarleikari með Bisund,  Botnleðju og Fidel.  Doddi skemmti sömuleiðis undir nafninu Love Gúrú.   

  Venjulega stendur þátturinn Litla hafmeyjan til klukkan 22.00.  Í kvöld er hinsvegar eitthvað söluátak fyrir varasalva í gangi á rás 2.  Það hefst klukkan 21.00.  Þátturinn verður því styttri sem því nemur í kvöld.  Ekki missa af honum. 

Hverju reiddust goðin?

  Ég vissi ekkert hver Sindri Sindrason fréttamaður er.  Fyrr en í dag.  Hvar sem ég kom í dag var spurt:  "Sástu þegar Geir missti sig við Sindra Sindrason?"  Fyrst vissi ég ekki við hvað var átt.  Svo komst ég að því og fékk útskrift á atburðinum.  Þannig gekk þetta fyrir sig:

  Eins og venja er með fréttamenn beið Sindri Sindrason fyrir utan Stjórnarráðið.  Geir Hahaharde renndi í hlað og steig þungfættur út.  Sindri gekk til móts við hann og sagði glaðlega:

 - Jæja,  komdu sæll Geir.  Jæja,  hvar eru peningarnir sem þurfa að komast inn í landið?

Geir (pirraður):  Á þetta að vera viðtal?

Sindri:  Já,  ég hefði viljað aðeins að heyra um þetta.

Geir (hrokafullur og skipandi):  Hafa samband fyrirfram.

Sindri:  Geir,  þjóðin náttúrlega bíður eftir aðgerðum frá ríkisstjórninni.  Geturðu ekki gefið okkur smá "komment"?

Geir (að springa úr pirringi):  Ég skal gera það,  Sindri,  ef þú hagar þér ekki svona dónalega.  Þá myndi ég tala við þig.

Sindri:  Hvers vegna er dónalegt að bíða eftir forsætisráðherra?

Geir skellir hurðinni á nefið á Sindra sem segir í forundran:

 - Þar hafið þið það.

  Á einhverju bloggi,  sem ég týndi strax í ógáti - sá ég fullyrt að Geir hafi ekki kallað Sindra dóna.  Það er kjánaleg hártogun.  Þegar einhver er sakaður um að vera dónalegur liggur í hlutarins eðli að verið er að skilgreina viðkomandi dóna.

  En látum það vera.  Miklu áhugaverðara er að komast að því hvers vegna Geir missti sig.  Svona pirringur ku vera þekktur á vinnustöðum þar sem karlar dvelja langdvölum kvenmannslausir.  Þetta kallast brundfyllisgremja.  Þegar svona pirringur hendir konur er það afsakað með því að þær séu á túr.  En þegar þetta hendir forsætisráðherrann,  ja,  kannski... og þó...nei...?

Ný skoðanakönnun - takið þátt!

  Ég var að ýta úr vör nýrri skoðanakönnun.  Þar er spurt hver sé mesta,  besta og flottasta söngkona heims.  Þegar óvefengjanleg niðurstaða liggur fyrir vind ég mér í næstu könnun.  Þar verður spurt:  Hver er flottasta íslenska poppsöngkonan í dag?  Í fljótu bragði dettur mér í hug að stilla þar upp Björk,  Andreu Gylfa,  Heiðu "í Unun",  Ellen Kristjáns,  Lay Low,  Ragnheiði Gröndal,  Röggu Gísla,  Dísu,  Ólöfu Arnalds...  Mér er áreiðanlega að yfirsjást einhver nöfn sem koma til greina.  Kannski á Diddú heima í þessum flokki?   

Nemendamótið á Steinsstöðum

  Flest okkar mættu í Steinsstaði á föstudagskvöldinu.  Margir gistu í skólahúsinu og sumir í "gamla fjósinu".  Ýmsir tjölduðu eða gistu í húsbíl.  Við röltum á milli til að kanna hverjir voru hvar.  Víða urðu fagnaðarfundir.  Svo brast á með söng inn á milli.  Nokkuð var liðið á nótt þegar kyrra tók og gengið var til náða.

  Á laugardeginum hófst dagskrá klukkan 1 eftir hádegi.  Veðrið var dásamlegt alla helgina.  Veðurfræðingar höfðu spáð rigningu.  Ég hef aldrei kynnst jafn þurri og sólríkri rigningu.  Guðni ljósmyndari og öryggisvörður í Mjódd hélt glæsilega ljósmyndasýningu fyrir utan skólahúsið.  Síðan var rölt um svæðið og alla leið til Varmalækjar þar sem nývígð reiðhöll Bjössa var skoðuð hátt og lágt.

  Aðal dagskráin hófst með borðhaldi klukkan 8 í Árgarði.  Hópurinn taldi um 100 manns.  Rúnar frá Sölvanesi var veislustjóri.  Hann fór á kostum og rúmlega það.  Reitti af sér brandara og lék á alls oddi.  Einnig las hann sitthvað upp úr blogginu mínu.  Það endaði með því að ég var klappaður upp á svið.  Þar rifjaði ég upp skrítnar minningar úr skólanum. 

  Maturinn,  framreiddur af listakokkum í Lýtingsstaðahreppi,  var alvöru veisla.  Að borðhaldi loknu var slegið upp dansleik og dansað fram á rauða nótt.  Þó að dansleikur tæki enda var haldið áfram að spjalla og rölt um svæðið fram á morgun.  Sunnudagurinn var hvíldardagur.       

 

 

Ísbjarnalaus Skagafjörður

  Síðustu daga hef ég dvalið í Skagafirði í þeim erindagjörðum að leita uppi ísbirni og sefa ótta Skagfirðinga og ferðamanna þarna um slóðir við bangsa.  Ég skimaði eftir ísbjörnum hátt og lágt.  En það var engan að sjá.  Ég kallaði og skipaði birninum að gefa sig fram undanbragðalaust ef hann væri einhversstaðar.  Viðbrögð urðu þau ein að Björn Sveinsson á Varmalæk í Lýtingsstaðahreppi gaf sig fram en sagðist vera hættulaus.  Jafnframt hafði hann gilda ástæðu til að vera þarna vegna þess að hann var að vígja nýja og glæsilega reiðhöll.

  Svo skemmtilega vildi til að um helgina var nemendamót á Steinstöðum.  Nemendur í Steinstaðaskóla á árunum 1961 til 1971 hittust og rifjuðu upp gömlu góðu dagana.  Ég var þarna í "gaggó" - eins og 9.  og 10.  bekkur í grunnskóla var kallaður - á þessum árum.  Það var meiriháttar gaman að hitta þennan frábæra hóp.  Á morgun skrifa ég færslur um nemendamótið.  Margir gamlir nemendur áttu ekki heimangengt og ég ætla að nudda þeim upp þeirri frábæru skemmtun sem þeir misstu af.

  Vegna nemendamótsins á Steinstöðum leitaði ég sérstaklega vel að ísbjörnum þar um slóðir.  Ég rölti um gólfvöllinn hans Friðriks Rúnars (Lalla) í Laugahvammi og gægðist inn í glæsilega sumarbústaði þarna í grennd.  Fékk grillaða pylsu og drykk hjá höfðingjunum Rögnu og Gunnari og rölti veginn framhjá Lambatjörn.  Það var ekkert lamb í tjörninni fremur en fyrri daginn er við krakkarnir í Steinstaðaskóla skautuðum þar á svelli á sínum tíma.  Og enginn var þar ísbjörninn.

  Skammt frá Lambatjörn er kominn góður fótboltavöllur.  Hann er hálfur kílómeter á breidd en 20 metrar á lengd.  Ég hef ekki fylgst með fótbolta undanfarna áratugi.  Þegar ég var í Steinstaðaskóla þótti okkur krökkunum heppilegra að hafa fótboltavöllinn þokkalega langan en héldum breiddinni í lágmarki.  Eitthvað hefur breyst síðan.

  Skagfirðingar óttast ísbirni ekki eins mikið og ég hélt.  Ég róaði þá sem voru hræddastir.  Það voru ferðamenn og annað aðkomufólk.  Til að stríða því fólki samt pínulítið var gengið í það þarfa verk að merkja leiðina yfir Þverárfjall með táknmynd af ísbirni og textanum "Varúð!".    

Eldri árgangar urðu kvöldsvæfir á nemendamótinu. 

 

Farinn

  Margur góður Skagfirðingurinn sefur órótt þessa dagana.  Ástæðan er ótti við að ísbjörn bíði í leyni,  langsoltinn og grimmur.  Ennþá fleiri og ennþá betri Skagfirðingar sofa órótt á nóttunni.  Ástæðan er sú sama.  Ofan á þetta bætist ótti um að nýdrepni ísbjörninn muni ganga aftur og ofsækja alla Skagfirðinga og alla þeirra ættingja um ókomna framtíð.  Líka fjarskylda.

  Mér rennur blóðið til skyldunnar.  Sem gamall Skagfirðingur legg ég nú land undir fót og þeysi norður í Skagafjörð.  Þar mun ég leggja mig fram um að sefa ótta og hjálpa fólki að ná góðum og heilsusamlegum svefni.  Til viðbótar ætla ég að leita af mér allan grun um að fleiri ísbirnir hafi gengið á land fyrir norðan og reyna einhvernvegin að hindra frekari landgöngu þeirra.  Ísbjarnalaus Skagafjörður 2009 er markmiðið.

  Ég kem aldrei aftur.  Eða ekki fyrr en þessi mál eru til lykta leidd. 

Hver hefur ávinning af því að löggan rafbyssuvæðist?

  Undanfarna mánuði hafa íslenskir fjölmiðlar lofsungið kosti rafbyssu sem kallast Taser.  Gazman,  10-11 lögregluþjónninn og Björn Bjarnason eru mjög áhugasamir um að lögreglan fái að leika sér við að gefa unglingum með "kjaft" og vörubílstjórum gott rafstuð.

  Minna fer fyrir upplýsingum Amnesty International og fleiri um að rafbyssur hafi þegar valdið dauða mörg hundruð manna.  

  Hvers vegna eru íslenskir fjölmiðlar duglegir við að hampa kostum Taser-byssunnar en áhugalausari um að vekja athygli á því að Taser-byssan er pyntingartæki í höndum sadískra lögreglumanna og morðtól?

  Það er augljóst að einhver hefur hagsmuna að gæta.  Hver getur það verið?  Og hvernig getur hann haft þessi áhrif á hlutdræga umfjöllun fjölmiðla?

  Umboðsmaður Taser á Íslandi heitir Kristófer Helgason.  Hann er starfsmaður fjölmiðlarisans sem á Fréttablaðið,  DV,  Bylgjuna,  Stöð 2 og fjölda annarra tímarita,  útvarpsstöðva,  sjónvarpsstöðva og svo framvegis.     

  Það yrðu heldur betur uppgrip hjá þessum vinsæla dagskrárgerðarmanni ef Björn Bjarnason stofnar varalið (hvítliðasveit),  leyniþjónustu,  her og rafbyssuvæðir allan pakkann ásamt Gazmanni,  10-11 lögregluþjóninum og lögreglusveitum allt í kringum landið.  Ekki viljum við hafa feit umboðslaun af duglegum dagskrárgerðarmanni.  En kíkið samt á www.prakkarinn.blog.is.  Þar er væn úttekt á Taser og fjörleg umræða.