Augnablikið fangað - broslegar ljósmyndir

  Það er galdur að smella af ljósmyndavél á réttu augnabliki.  Útkoman getur orðið brosleg.  Um það vitna þessar ljósmyndir:

  Hér er drengurinn næst lengst til hægri að stökkva ofan í sundlaug.  Hann er rétt við það að snerta yfirborð vatnsins.  Fyrir bragðið er engu líkara en hann sé að ganga á vatninu.  Til gamans má geta að frægur bandarískur sjónhverfingamaður sýndi í sjónvarpsþætti er hann gekk á vatni.  Ég man ekki nafnið á þeim fræga náunga.  Hann er einn sá frægasti í bransanum.  Íslenskur sjónhverfingamaður var staddur við upptöku á þeim þætti.  Hann sagði mér frá galdrinum:  Rétt undir yfirborði vatnsins var lagt glært plexígler.  Töframaðurinn sem virtist vera að ganga á vatni gekk eftir þessu glæra plexígleri. 

  Tunglið í fyllingu er í baksýn í mörg hundruð kílómetra fjarlægð.  En svo virðist sem náunginn á myndinni sé að lenda á tunglinu. 

  Fuglinn skyggir á þotu sem myndar þrýstiloftsrendur.

  Kannski er hér um "fótósjopp" að ræða.  En þó getur þetta verið mynd sem tekin var á réttu augnabliki.

  Tveir leikmenn rétta út hendur í sömu átt.  Engu er líkara en sá í miðið sé með extra langan handlegg.

 

Grænlenskar pönnukökur

  Grænlenskar pönnukökur eru bestu pönnukökur í heimi.  Því eru allir sammála sem smakkað hafa.  Og jafnvel fleiri.  Mestu munar um fyllinguna.  Því eru allir sammála.  Svo skemmtilega vill til að það er alveg hægt að matreiða grænlenskar pönnukökur á Íslandi.  Það eina sem til þarf er eftirfarandi: 

• 2 egg
• 49 g bráðið smjör  
• 205 g hveiti
• 1/2 lítri mjólk
• 1/2 teskeið vanilludropar 

  Mikilvægt er að sykur sé fjarri góðu gamni.  Öllu öðru en hveitinu er hrært saman.  Síðan er hveitinu bætt út í hægt og bítandi og svo laumulega að nærstaddir taka varla eftir því.  Þegar deigið er orðið jafnt og laust við kekki er það látið standa í 37 mínútur áður en pönnukökubaksturinn hefst.  Þannig verða pönnukökurnar þéttari og þykkri.  Grænlenskar pönnukökur eru nefnilega heldur matarmeiri en þær íslensku.

  Daginn fyrir pönnukökubaksturinn er lagaður grænlenskur jafningur.  Í hann þarf eftirfarandi:

• 16 g hveiti
• 88 g fisksoð  
• 17 g smjörlíki
• smávegis salt
• smávegis pipar

  Þetta er hrært vel saman og síðan hitað í potti þangað til suða kemur upp.  Þá er jafningnum í rólegheitum hellt í glerskál og geymdur í ísskáp.  

  Þegar pönnukökurnar hafa verið bakaðar er beðið með frekari aðgerðir þangað til þær eru kaldar.  Þá er rykið dustað af jafningnum og 2 matskeiðar af honum settar á hverja pönnuköku.  Yfir jafninginn er stráð dilli og 77 g af pílaðri grænlandsrækju (má vera íslensk).  Pönnukökunum er rúllað upp og 2 settar hlið við hlið á eldfastan disk.  Ofan á þær er sett smjörklípa (um helgar og á hátíðisdögum.  Á virkum dögum er smjörinu sleppt) og rifnum osti stráð yfir.  Herlegheitin eru hituð í 213 g snarkandi heitum ofni í 11 mínútur,  eða þangað til osturinn er vel bráðnaður.

  Áður en veislumaturinn er snæddur skal kreista sítrónu yfir hann.  Svo er bara að reima á sig smekkinn,  hella köldu hvítvíni í glas,  setjast í snjóskafl og hefjast handa.  Til að skerpa enn frekar á grænlensku stemmningunni er upplagt að fá Grænlending til að syngja og spila trommudans skammt frá. 

Eldri borgari bregður á leik og reddar málunum

  Þessa sögu fékk ég senda.  Ég hef að vísu lesið hana einhversstaðar áður.  En það skiptir ekki máli.  Sagan er jafn góð fyrir því.  Hinsvegar veit ég ekki um sannleiksgildi sögunnar.  Og það er kannski aukaatriði.  Svona staða gæti alveg komið upp hérlendis.  Svona miðað við ástandið.

  Phillip Hewitson, eldri maður frá Norwich í Englandi, var á leið í rúmið eitt kvöldið þegar konan hans sagði honum að hann hefði skilið ljósið í garðinum eftir logandi.  Hún gat séð það út um svefnherbergisgluggann.  Hann opnaði bakdyrnar og ætlaði að slökkva ljósið en sá þá að það var þjófagengi úti að stela úr garðinum hans. 
  Hann hringdi í lögregluna sem spurði hvort það væri einhver óboðinn inni í húsinu.
“Nei,” sagði sá gamli,  "en  það er þjófagengi í garðinum mínum, að stela frá mér. 
    Þá fékk hann það svar að allir lögreglubílar væri uppteknir, hann skildi læsa öllum hurðum og lögreglan kæmi þegar hún væri búin í þeim verkefnum sem hún væri að sinna.
“Okay,” sagði sá gamli.
Hann lagði tólið á og taldi upp að 30 og hringdi þá aftur í löggustöðina.
“Halló. Ég hringdi í ykkur fyrir smá stund því það var fólk að stela hlutum úr garðinum mínum. En þið þurfið ekki að hafa áhyggjur af því máli meir því ég skaut fólkið.”  Svo lagði hann tólið á.  Innan 5 mínútna komu 6 löggubílar, sérsveitin, þyrla, tveir slökkviliðsbílar, læknir og sjúkrabíll. Þetta lið handtók þjófana á staðnum og setti þá í handjárn.
Einn lögregluþjónanna sagði við þann gamla:  "Ég hélt að þú hefðir sagst hafa myrt þjófana"

Gamli svaraði:  "Ég hélt að mér hafi verið sagt að það væri ekkert lögreglulið á lausu."
 

Bestu þungarokksplöturnar

  Á netsíðu breska tónlistarblaðsins New Musical Express stendur nú yfir kosning um bestu plötur þungarokkssögunnar.  Þetta er skemmtilegur og forvitnilegur samkvæmisleikur.  Eins og staðan er í dag er það klassíska þungarokkið sem hefur yfirhöndina.  Þannig lítur listinn út (hann er ekki endanlegur. Kosning er enn í gangi og plötur að skipta um sæti.  Eins og sést á einkunnum er munur lítill á milli sæta):

1. Black Sabbath - Paranoid

Einkunn: 7.97

2. Rage Against The Machine - Rage Against The Machine

Einkunn: 7.95

3. Metallica - Master Of Puppets

Einkunn: 7.94

4. AC/DC - Back In Black

Einkunn: 7.72

5. Black Sabbath - Black Sabbath

Einkunn: 7.69

6. Iron Maiden - The Number Of The Beast

Einkunn: 7.67

7. Metallica - Ride The Lightning

Einkunn: 7.65

8. Guns N' Roses - Appetite For Destruction

Einkunn: 7.56

9. Black Sabbath - Master Of Reality

Einkunn: 7.55

10. AC/DC - Highway To Hell

Einkunn: 7.41

11. Black Sabbath - Sabbath Bloody Sabbath

Einkunn: 7.32

12. Nine Inch Nails - The Downward Spiral

Einkunn: 7.08

13. Black Sabbath - IV

Einkunn: 7.04

14. Slayer - Reign In Blood

Einkunn: 7.03

15. Motorhead - Ace Of Spades

Einkunn: 7.01

16. System Of A Down - Toxicity

Einkunn: 6.89

17. Rage Against The Machine - Battle Of Los Angeles

Einkunn: 6.88

18. Iron Maiden - Powerslave

Einkunn: 6.79

19. Iron Maiden - Iron Madiden

Einkunn: 6.69

20. Pantera - Vulgar Display Of Power

Einkunn: 6.45

Kvikmyndarumsögn

Titill:  Kurteist fólk

.

Leikarar:  Stefán Karl Stefánsson,  Eggert Þorleifsson,  Hilmar Snær Guðnason,  Ágústa Eva Erlendsdóttir,  Halldóra Geirharðsdóttir,  Benedikt Erlingsson...

.

Handrit:  Ólafur Jóhannesson og Hrafnkell Stefánsson

.

Leikstjóri:  Ólafur Jóhannesson

Einkunn: **1/2  (af 5)

  Verkfræðingur (Stefán Karl) í Reykjavík gengur í gegnum skilnað og flytur vestur í Búðardal.  Að ósk föður síns á dánarbeði vindur hann sér í að hjálpa sveitastjóranum (Eggert Þorleifsson) að endurreisa sláturhúsið á staðnum.  

  Myndin kemur ágætlega til skila sérkennum fámenns íslensks þorps. Íbúarnir tengjast meira og minna í gegnum framhjáhald, baktjaldamakk og hnífstungur í bakið.  Nýja kjötinu í bænum (verkfræðingurinn) er kippt upp í rúm með það sama. 

  Fram kemur að hliðstæður mórall viðgangist líka í höfuðborginni.  Ástæða skilnaðar verkfræðingsins er sú að kona hans heldur við yfirmann hans.    

  Gallinn við myndina er að frekar fátt mikilsvert ber til tíðinda.  Og það litla sem ber til tíðinda er fyrirsjáanlegt. 

  Myndin er ekki leiðinleg.  Alls ekki.  En það vantar margt í hana.  Þar á meðal fleiri brandara,  meiri spennu,  þéttari klippingar og tilþrifameiri sögu.  Flestar persónurnar koma kunnuglega fyrir sjónir en ná ekki almennilega til áhorfandans.  Manni er nokkuð sama um örlög þeirra,  hver svindlar á hverjum,  hver nær árangri og hverjum mistekst.

  Það er ekki við leikarana að sakast.  Þeir standa sig hver öðrum betur.  Eggert Þorleifsson á stjörnuleik.  Hann er skemmtilega sannfærandi í hlutverki slóttuga stjórnmálamannsins, spillta embættismannsins,  bisnessmannsins sem stýrir framkvæmdum í sveitarfélaginu út frá hagsmunum síns fyrirtækis.   

  Myndin skilur eftir marga lausa enda.  Dæmi:  Verkfræðingurinn brýst í tvígang inn í einu matvörubúðina í Búðardal.  Þar rænir hann mat og drykk.  Í seinna skiptið í félagi við sveitastjórann.  Það kemur ekkert fram um að þessi innbrot hafi eftirmála.  Fyrir bragðið virðist sem það sé ofur eðlilegt að miðaldra menn brjótist inn í matvöruverslanir úti á landi utan opnunartíma til að ræna samlokum, drykkjum og þess háttar. 

  Einhverra hluta vegna eru bakdyrnar í matvörubúðinni ólæstar þegar sveitastjórinn tekur þátt í innbrotinu.  Engin skýring kemur á því.  En atriðið er broslegt í kjölfar þess að verkfræðingurinn klöngrast upp eftir uppreistri pallettu og skríður inn um glugga.

  Það er allt í lagi að kíkja á þessa mynd.  Bara ekki gera sér of miklar væntingar.  Hinsvegar nær myndin að skilja eftir sig vangaveltur um spillingu, smákónga og siðferði, sem og hroka borgarbúans í garð dreifbýlisfólks og ofurtrú dreifbýlisfólks á nýja spámanninn að sunnan.  Úr raunveruleikanum höfum við fjölda dæma um aula með allt niðrum sig úr höfuðborginni sem hafa flutt í sveitina.  Þar gefa þeir sig út fyrir að vera sá sem allt viti og kunni og muni rífa sveitarfélagið upp úr öldudal og breyta í sæluríki.  Niðurstaðan hefur jafnan orðið sú að sveitarfélagið stendur eftir sem rjúkandi rúst.  Og "reddarinn" að sunnan jafnvel fluttur í járnum inn á Litla-Hraun.

  .

 

Nauðsynlegt að vita um Happaþrennur

  Ég rölti framhjá sjálfsala sem glennti framan í mig Happaþrennur.  Á einni þeirra stóð eitthvað er mátti skiljast sem hægt væri að fá 13 milljónir króna út á hana.  Mig langaði í þessar 13 millur.  Ég þarf nefnilega að kaupa mér nýjan bíl eftir að sá gamli var klessukeyrður af ókunnugum manni að flýta sér.  Kennara sem var orðinn aðeins of seinn í kennslustundina.

  Happaþrennan kostaði 200 kall.  Ég hugsaði með mér:  "Það er góð fjárfesting að fá 13 milljón krónur fyrir 200 kall.  Það er óábyrg meðferð á 200 krónum að sleppa þessu tækifæri."

  Eitthvað fór úrskeiðis.  Er ég hafði skafið af Happaþrennunni kom í ljós að það vantaði eina tölu sem á stóð "13".  Á miðanum stendur:  "Ef talan 13 kemur þrisvar sinnum upp fást 13.000.000 í vinning."  Hvernig sem ég leitaði fann ég töluna 13 aðeins á tveimur stöðum á skaffleti miðans.  

  Ég sá í hendi mér að ég þyrfti að breyta miðanum.  Koma þessu eintaki af "13" sem vantaði inn á skafflötinn svo þar væri tríó af henni.  Á meðan ég velti því fyrir mér hvernig best væri að breyta miðanum varð mér litið á bakhlið hans.  Þar segir svo um leikreglur:

  "Miði er ógildur ef honum hefur verið breytt."

  Mér er ljúft og skylt að koma þessu á framfæri.  Ég er ekki viss um að fólk viti þetta. 

Áskorun: Láttu reyna á athyglisgáfuna!

  Nú reynir á athyglisgáfuna og innsæið.  Iðulega er með lagni hægt að lesa margt út úr útliti fólks,  klæðaburði,  fasi,  hári og svo framvegis.  Til að mynda tónlistarsmekk,  stjórnmálaviðhorf og sitthvað fleira.  Getur þú fundið karlmanninn á ljósmyndunum hér fyrir neðan?  Þarna eru 12 persónur og ein þeirra er karlmaður.  Hver er það? 

  Skilaðu inn svari og láttu fylgja með hvað kveikti á perunni hjá þér.

 

Brúðkaup aldarinnar - klúður!

 

  Það er ekki sjálfgefið að allt gangi fyrir sig eins og vel smurð vél þegar fólk setur stefnu á að ganga í hjónaband.  Einkum er eins og hlutir vilji fara úr skorðum þegar markið er sett hátt varðandi brúðkaupsveisluna og allt sem henni fylgir.  Þannig fór fyrir pari sem hér verður sagt frá.  Leikar fóru þannig að parið skiptist á málsóknum í stað þess að skiptast á giftingarhringum þegar stóra stundin var við það að renna upp.  Brúðguminn væntanlegi hafði frumkvæði af því að aflýsa brúðkaupinu er hann uppgötvaði að tilvonandi eiginkonan hafði stofnað til útgjalda upp á 100.000 dollara (næstu 12 milljóna íslenskra kr.) við undirbúning brúðkaupsins í Illinois í Bandaríkjum Norður-Ameríku. 

.  Honum var svo brugðið við þessa uppgötvun að hann harðneitar að vera ábyrgur fyrir útgjöldunum.  Þess í stað hefur hann farið í mál við konuna og krefst endurgreiðslu frá henni fyrir giftingarhringum þeirra.  Þeir kostuðu 45.000 dollara (röskar 5 milljónir íslenskra kr.).  Sennilega er kostnaðurinn við hringana inni í 100.000 dollara tölunni (þó það komi ekki fram í fréttum af málinu).  Konan hefur á móti stefnt manninum til að standa skil á þessum 100.000 dollara útgjöldum sem þegar eru að hluta fallin í gjalddaga.  Enda kannast hún ekki við að maðurinn hafi sett nein skilyrði fyrir að skorið væri við nögl við undirbúning brúðkaupsins. 

  Hugsanlega má leysa þetta á ljúfu nótunum:  Skila hringunum,  brúðardressinu og afpanta veislusalinn,  hljómsveitina,  matinn,  skreytingar,  myndatökur,  hárgreiðsluna og svo framvegis.  Einhver kostnaður er þegar fyrirliggjandi,  svo sem prentun og póstgjald vegna boðskorta í veisluna.  Sá hængur er á að það er hlaupin illska í málið.  Parið,  sem nú er fyrrverandi par,  talast ekki við nema í gegnum lögfræðinga sína.  Lögfræðingar þeirra beggja vilja sækja málin af fullum þunga og telja sig,  hvor um sig,  vera með unnið mál í höndunum fyrir sinn skjólstæðing.  Hver sem niðurstaðan verður er næsta víst að drjúgur lögfræði- og málskostnaður eigi eftir að bætast ofan á upphæðirnar sem málið snýst um.  Spurningin er á hvoru þeirra fyrrverandi tilvonandi hjónakorna kostnaðurinn lendir þegar upp er staðið. 

Nauðsynlegt að vita um kjötfars

 

  Ég kom við í versluninni Nóatúni í dag.  Mig langaði í Malt.  Í leiðinni datt mér í hug að vita hvort til væri súrsað hvalkjöt.  Fyrir framan kjötborðið stóð öldruð kona.  Hún virti fyrir sér tvo bakka með kjötfarsi.  Annar var kyrfilega merktur "Nýtt kjötfars".  Hinn var merktur "Saltað kjötfars".  Þetta vakti forvitni konunnar.  Hún spurði kjötafgreiðslumanninn:

  - Hver er munurinn á nýju kjötfarsi og söltuðu kjötfarsi?

  Afgreiðslumaðurinn útskýrði það samviskusamlega:

  - Nýtt kjötfars er nýtt.  Saltað kjötfars er saltað.

  Sú gamla var nú mun fróðari en áður og átti auðvelt með að taka ákvörðun:

  - Já,  þá líst mér betur á nýja kjötfarsið.  Láttu mig fá eins og 600 grömm af því.

 

 

Fyrirmyndar foreldrar?

  Fyrir nokkrum dögum birti ég myndasyrpu af foreldrum sem settu börn sín í varhugaverðar og / eða sérkennilegar aðstæður.  Sannarlega ekki til fyrirmyndar.  Hér eru fleiri dæmi:

  Á skiltinu er varað við varasömum og þunnum ís.  Faðirinn telur þetta þó vera upplagt leiksvæði fyrir börnin.

  Kannski ekki alveg kjöraðstæður að leggja frá sér ungbarn í burðarrúmi úti á akbraut.

  Krakkarnir sitja á raftæki sem er rækilega merkt "Varúð!  Háspenna!".

  Er gata með þungri bílaumferð réttur vettvangur fyrir barn á þríhjóli?

  Pabbinn skemmtir sér vel.  Það leynir sér ekki.

  Og líka hér í spilasalnum.

  Þröngt mega sáttir sitja.  Þetta er þó kannski "too much".

  Þröngt á þingi aftan á pallbíl.

  Og aftan á reiðhjóli.

Áhugaverðar gestabókarfærslur

  Í síðustu viku var ég veðurtepptur vestur á fjörðum í nokkra daga.  Það var bara gaman.  Kafaldsbylur og "kósý".  Að vísu var ekki margt hægt að gera undir þeim kringumstæðum.  Ég hélt mig innan dyra á notalegu gistiheimili;  hlustaði á útvarp,  horfði á sjónvarp,  sötraði kakó og las gestabók.  Það er gaman að lesa gestabækur á gistiheimilum landsins. 

  Miðaldra og eldra íslenskt ferðafólk er duglegt að skrá hvernig veðrið var er það mætti á staðinn;  hvernig veðrið var á meðan á dvöl stóð og hvernig veðrið var daginn sem það hélt á brott.  Svona gestabækur eru gullnáma fyrir áhugasama um veður síðustu ára.  Fyrir aðra eru þannig gestabókarfærslur einhæfar.  Það er yfirleitt frekar kalt og snjór yfir vetrartímann.  Á sumrin skín sól á milli þess sem rignir.

  Þetta sama fólk kvittar fyrir að gistihúsið sé notalegt,  hreint og snyrtilegt.  Það er gott að fá staðfest að manns eigin skynjun á gistihúsinu rími við upplifun annarra.

  Miðaldra og eldri útlendir túrhestar láta sig veðrið varða,  eins og þeir íslensku.  En aðallega virðast þeir undrast kuldann.  Hér eru dæmigerð sýnishorn:

  "I didn´t really expect this coldness in Iceland."

    Yuko from Japan

   "I give a lot of props to Icelanders for coping with the weather and driving condition."

    Benny,  Canada

   "Iceland sure is cold (+ windy)."

   Maggie & Will,  Detroit,  Michigan,  USA

  Gestabókarfærslur ungra ferðalanga eru skemmtilega frábrugðnar.  Þeir virðast hugsa um eitthvað allt annað en veðrið og ástand gistihússins.  Hér eru 3 sýnishorn:

  "Þetta reddast eftir að okkur var hent út af hótelinu."

    Jón M. Jónsson 050884-xxxx 

  "I was thrilled by the state of the women in Icefjord.  They are wild.  I´m no longer a virgin."

    Nick Sullenberger

 "We´ve just arrived here 4 girls.  We´ve discovered in "the only one club" from here that in Iceland only exist a lot of sheeps and some boys and the 4 of us."

    Clara,  Barcelona

 

Rosalegir hádegistónleikar í dag (Týsdag)

  Á slaginu klukkan 12.15 í hádeginu í dag (Týsdag 22. mars) hefjast glæsilegir hljómleikar í Íslensku óperunni.  Óperurnar  Öskubuska  (eftir Rossini),  Brúðkaup Fígarós  (eftir Mozart) og  Ástardrykkurinn  (eftir Donizetti) eru í forgrunni á efnisskránni. Flytjendur eru allir í fremstu röð ungra íslenskra einsöngvara: Bragi Jónsson (bassi), Erla Björg Káradóttir (sópran), Magnús Guðmundsson (barítón), Rannveig Káradóttir (sópran), Rósalind Gísladóttir (mezzó-sópran) og Sibylle Köll (mezzó-sópran).  Antonía Hevesí leikur á píanó.  Sérlegur gestasöngvari á tónleikunum er hinn vinsæli tenórsöngvari Garðar Thór Cortes.

  Aðgangseyrir á tónleikana er sprenghlægilegur 1500 kall.  Gestir geta keypt veitingar í anddyri Íslensku óperunnar fyrir og eftir tónleikana.  Heyrst hefur að þar sé um að ræða besta skyndibitann í bænum.  Þvílíkt fjör!  Þetta verður dúndur!

Minningarljóð um Pál Jacobsen

  Nýverið féll frá,  langt fyrir aldur fram,  faðir Eivarar,  Páll Jacobsen.  Ég vona að það virki ekki ósmekklegt af mér að birta hér á þessum vettvangi fallegt ljóð dóttur hans,  Elinborgar,  til minningar um föður sinn. Virkilega fallegt og hjartnæmt ljóð sem segir svo margt í knöppu formi.  Páll var af öllum dáður fyrir elskulegheit og glaðværð og þekktur fyrir að vera einstaklega góður sögumaður.  Yndislegur og skemmtilegur maður. 

  Í íslenskri þýðingu er minningarljóð Elinborgar eitthvað á þessa leið:

.

Sakna þín sérhvern dag

.

  Þegar ljósin slökkna að kveldi og hugsanir fara á flug

þá sakna ég þín.

  Ég varðveiti minningarnar og mun aldrei gleyma þér.

.

    Allt sem við áttum saman er nú liðin tíð.

  En í hjarta mínu áttu fastan samastað.

  Núna ertu fjarri mér og þá sakna ég þín

- sérhvern dag.

.

    Svo hrífandi,  svo sterkur og svo vís.

  Ég sakna þín,  kæri pabbi.

  En ég veit að við hittumst aftur

undir stóra fossinum. 

 

  Frumtextinn er þannig:

 

Sakni teg hvønn dag

.

  Tá ljósini slókna um kvøldið, og tankarnir flúgva avstað.

Tá sakni eg teg.

  Havi bert minnini her hjá mær, aldri eg gloymi teg.

.

 

Alt vit gjørdu saman, tað er nú søga.

Men tú fert altíð at vera her, við mina lið.

  Og sjált um tù ert á øðrumstað, so sakni eg teg - hvønn dag.

.

 

So stuttligur so sterkur og so vísur

Eg sakni teg- góði babba....

Men eg veit at vit síggjast aftur

Undir stóra fossinum.

 

Forsetinn er írskur

  Þjóðsagan kennir okkur að forseti Bandaríkja Norður-Ameríku,  Barack Hussein Obama,  hafi fæðst í jötu í Honolulu á eyjunni Hawai í Hawai-eyjaklasanum.  Faðir hans og alnafni var frá Kenía í Austur-Afríku.  Hann átti leið um Hawaii og fór að leika sér við stelpuskottið Ann Dunham.  Hún giftist manni frá Jakarta í Indónesíu.  Þar var Barack Hussein Obama alinn upp.  Það er að segja Hussein yngri.  Sá eldri var alinn upp í Kenía.

  Vegna uppruna og æskuára Husseins yngri hefur löngum vakið undrun ásókn hans í írska tónlist,  írska river-dansinn,  írskar sögur,  írskan bjór og svo framvegis.  Þá hefur verið eftir því tekið hvað vel Hussein lyndir við þá Íra sem á vegi hans verða. 

  Nú hefur gátan varðandi þetta verið leyst.  Ættfræðingar hafa rakið uppruna Husseins til Írlands.  1850 flúði 19 ára Íri hungursneyð í föðurlandi sínu og hélt vestur um haf;  til Bandaríkja Norður-Ameríku.  Hann eignaðist eina dóttur.  Henni var gefið nafnið Ann.  Þegar hún varð gjafvaxta tók hún saman við mann sem bar ættarnafnið Dunham.  Afkomendur Ann Dunham teljast vera 28 (í lauslegri talningu án DNA prófunar).   Þeirra á meðal móðir Husseins og alnafna ömmu sinnar.

  Fyrir ættfróða Íslendinga hljómar undarlega hversu algengt er að Norður-Ameríkanar séu lítt að sér um uppruna sinn langt aftur í ættir.  Hinsvegar er það svo að Bandaríkin eru litríkt fjölmenningarsamfélag.  Eins og dæmið um Hussein sýnir eiga margir Bandaríkjamenn uppruna að rekja til svo margra þjóða og landa að þeir eiga nóg með að kannast við hvar foreldrar þeirra og afi og amma voru fædd. 

  Annar þekktur forseti Bandaríkjanna var líka af írskum ættum.  Hann hét John F. Kennedy en staldraði stutt við í embætti. 

 

Bestu bresku söngvarnir

  Í nýjasta hefti breska tónlistartímaritsins Q er ekki einungis fjölbreytt umfjöllun um íslenska músík.  Það er fleira áhugavert í blaðinu.  Til að mynda hefur blaðið fengið alla helstu lagahöfunda breska poppsins til að leggja saman í púkk og finna út hverjir eru helstu sérbresku söngvarnir (ultimate British songs).  Þessir söngvar urðu hlutskarpastir:

1.   Underworld:  Born Slippy

2.   Robert Wyatt:  Shipbuilding

  Fyrir þá sem ekki þekkja til má geta þess að  Shipbuilding  er eftir Elvis Costello.  Lagið er samt lang þekktast í þessum flutningi Roberts Wyatts.  Lengi vel átti það met yfir hvaða lag dvaldi lengst á toppi óháða breska vinsældalistans (indie).  Kannski stendur það met ennþá.  Hljómsveitin Suede krákaði þetta lag fyrir nokkrum árum.  Hún fékk ágæta útvarpsspilun. 

  Robert Wyatt var trommuleikari og söngvari bresku djass-rokk sveitarinnar Soft Machine.  Svo stökk hann í sukkpartýi út um glugga á 3ju hæð.  Eftir það hefur hann verið bundinn lamaður við hjólastól og snúið sér í meira mæli að söng en trommuleik.  Hann hefur m.a. sungið með Björk (á Medúlla) og Pink Floyd. 

3.   The Libertines:  Up The Bracket

  Dópistinn knái Pete Doherty sló fyrst í gegn með The Libertines.  Síðan stofnaði hann The Babyshamles og dópaði ennþá meira.

Íslendingar áberandi í útlendu poppblaði

  Það er töluvert gaman að fletta nýjasta hefti breska tónlistarblaðsins Q.  Íslenskir tónlistarmenn eru áberandi í því.  Framarlega í blaðinu er listi yfir lög sem blaðið býður lesendum sínum að hlaða niður.  Lögunum er raðað upp og númeruð eftir mikilvægi.  Lag númer 1 er með hljómsveit bassaleikarans Árna Árnasonar,  The Vaccines.  Því fylgir stór ljósmynd af hljómsveitinni.  Til að hlaða lögunum niður þarf aðeins að smella á www.qthemusic.com/q50. 

  Örfáum blaðsíðum aftar í blaðinu er opna þar sem Ellie Coulding telur upp 9 merkustu gripina í sínu plötusafni.  Hver plata er kynnt í löngu máli og með mynd.  Fyrsta platan sem Ellie telur upp er  Debut  með Björk.  Sú plata er það sem Ellie skilgreinir ævintýralegustu plötuna í safninu.  Aðrar plötur á lista Ellie eru m.a.  Rage Against the Machine  með samnefndri hljómsveit (platan sem hrelldi mömmu Ellie mest) og  Ten  með Pearl Jam.  Ellie er með fínan músíksmekk.

  Aftar í blaðinu er grein um barnastjörnur.  Þar er ljósmynd af 11 ára gamalli Björk og sagt frá fyrstu plötunni sem hún söng inn á á þeim aldri hér á landi á (svo gripið sé til orðalags Hallbjarnar Hjartarsonar).

  Aftarlega í Q er dómur um plötuna  Puzzle  með Amiina.  Dómurinn er afskaplega jákvæður en úthlutar plötunni þó "aðeins" 3 stjörnur af 5.

  Gagnrýnendur Q eru ennþá hrifnari af plötu The Vaccines,  What did you expect from The Vaccines?.  Hún fær 4 stjörnur,  heila blaðsíðu undir umfjöllunina og aðra blaðsíðu undir ljósmynd af hljómsveitinni.

  Þetta allt saman staðfestir að Íslandsdeildin er orðin fyrirferðamikil á alþjóðamarkaðnum. 

Kvikmyndaumsögn

 - Titill:  Okkar eigin Osló

 - Handritshöfundur:  Þorsteinn Guðmundsson

 - Leikstjóri:  Reynir Lyngdal

 - Leikendur:  Þorsteinn Guðmundsson,  Brynhildur Guðjónsdóttir,  Laddi,  Lilja Guðrún Þorvaldsdóttir,  Hilmar Snær Guðnason og fleiri.

.

 - Tónlist:  Helgi Svavar Helgason,  Valdimar Guðmundsson og Memphismafían

. 

 - Einkunn: ***1/2  (af 5)

.

  Nafnið á myndinni,  Okkar eigin Osló,  segir fátt.  Það er fráhrindandi fremur en hitt.  Reyndar hefst myndin í Osló.  Hugsanlega er það skýringin á nafninu.  Þar hittast og kynnast íslensk bankastarfskona (Brynhildur Guðjónsdóttir) og íslenskur starfsmaður Marels (Þorsteinn Guðmundsson).  Þau dvelja á sama hóteli.  Að sjálfsögðu hoppa þau umsvifalaust saman upp í rúm,  eins og Íslendingar gera alltaf þegar þeir hittast í útlöndum.  Þau klúðra málum með því að halda áfram að hittast eftir að heim til Íslands er komið.  Það eiga Íslendingar aldrei að gera í kjölfar skyndikynna í útlöndum. 

.

  Osló virðist vera falleg og notaleg borg með laufguðum trjám.  Innisenurnar í Osló eru "kósý".  Þökk sé hlýlegri lýsingu.  Munurinn er sláandi - og dæmigerður fyrir söguna - þegar klippt er yfir á Reykjavík.  Reykjavík er grá og guggin og kuldaleg. 

.

  Parið heldur í sumarbústað á Þingvöllum með barnungum syni konunnar og misþroska systir mannsins.  Allur seinni hluti myndarinnar gerist í og við sumarbústaðinn.  Áhorfandinn kynnist parinu hægt og bítandi á sama tíma og parið kynnist hvort öðru.

.

  Söguþráðurinn skiptir litlu máli.  Hann er einfaldur og fyrirsjáanlegur.  Það er aðeins eitt atriði í honum sem kemur rækilega á óvart.  Ekki síst fyrir mig.  Það er eins og klippt út úr smásögu eftir mig.  Hana birti ég hér á blogginu þegar ég var nýbyrjaður að blogga 2007.  Ég mun síðar gera betri grein fyrir þessu og endurbirta söguna þegar fleiri hafa séð myndina.   

.

  Styrkur myndarinnar liggur í nettum lúmskum húmor.  Hann er undirliggjandi allan tímann.  Svo gægist hann upp á yfirborðið af og til.  Ekki með látum þannig að áhorfandinn springi úr hlátri.  Maður hlær meira svona innra með sér.  En,  jú, jú,  það var líka hlegið upphátt undir fyndnustu senunum.  Það er hvergi dauður punktur.  Myndin heldur dampi til enda.

.

  Okkar eigin Osló ber sterk höfundareinkenni Þorsteins Guðmundssonar.  Hann er í kunnuglegu hlutverki hins brjóstumkennanlega;  dálítið seinheppna, allt að því lúðalega örlítið sérvitra en hjálpsama góðviljaða manns.

.

  Leikararnir standa sig allir með prýði.  Sérstaklega má tiltaka Maríu Hebu Þorkellsdóttur í hlutverki misþroska stúlkunnar.  Hún á stjörnuleik.

.

  Ég mæli með  Okkar eigin Osló.  Þetta er ljúf - allt að því - fjölskyldumynd fyrir þá sem vilja eiga huggulega kvöldstund. 

Einkennilegt samtal

  Ég var staddur á matsölustað í dag.  Aldrei þessu vant.  Þar snæddi ég fisk í góðu yfirlæti.  Hópur ungmenna mætti á staðinn og settist við næsta borð.  Unga fólkið fékk matseðla í hendur og byrjaði að spá og spekúlera í því sem stóð til boða.  Ég var ekkert að fylgjast með þeirri umræðu.    Þangað til ein stelpan sagði - og var ekkert að grínast miðað við undirtektir hinna:

  "Þessi sósa bragðast alltaf æðislega vel þegar ég er nýbúin að taka geðlyfin.  Annars er hún ekkert sérstök."

Fyndnasti brandari sögunnar

  Ítrekað hafa farið fram rannsóknir víða um heim þar sem leitað er eftir fyndnasta brandaranum.  Niðurstöður hafa jafnan orðið þær að kímnigáfa er misjöfn á milli landa og þjóða og heimsálfa.  Mér segir svo hugur að kímnigáfa sé meira að segja mismundi eftir landshlutum á Íslandi.  Eftirfarandi brandari er í þingeyska héraðsfréttablaðinu Skarpa sagður vera sá fyndnasti sem þorrablótsgestir í Kelduhverfi höfðu heyrt:

  "Meira illgresið þessi skógargerfill,  fullur sturtuvagn.  Hendum þessu í garðinn hjá Gaukunum.  Þeim veitir ekki af skjólinu eins og þeir eru nú illa fiðraðir greyin."

Foreldrar ársins - eða þannig

  Takið eftir barninu sem maðurinn situr á.  Hann virðist ekki taka eftir því.  Auðsjáanlega ekki þægileg staða fyrir barnið.

  Hvað er í gangi?  Er verið að hlífa barninu fyrir svifryki?

  Krökkum þykir gaman að leika sér í byssó.  Ég minnist þess frá mínum æskuárum.  En eitt er að leika sér í byssó og annað að vera nánast á bleyjunni þjálfaður í alvöru Suðurríkjastemmningu.

  Krakkinn sér um innkaupakerruna fyrir bjórinn.  Lofar góðu.

  Já,  hvers vegna að rölta um með barnavagninn þegar hægt er að draga hann á eftir mótorhjólinu?

 

  Það verður að leyfa krakkanum að ná "kontakt" við hættulegu dýrin á dýrasafninu.  Það er enginn vandi að kippa krakkanum upp ef dýrið bítur. 

  Ég man ekki hvað það heitir þetta rafknúna hjólatæki.  En það sparar sporin þegar krakkinn er viðraður.