Höfundur geisladisksins fallinn frá

  Norio Ohga var söngvari og starfsmaður japanska fyrirtækisins Sony,  eins og rithöfundurinn Ólafur Jóhann Ólafsson.  Norio ól með sér þann draum að hanna plötu,  geisladisk,  sem myndi aldrei eyðast við núning plötunálar eins og vinylplötur.  Diskurinn væri jafn nýr eftir að hafa verið spilaður 100 sinnum og þegar hann væri spilaður í fyrsta skipti.  Geislar myndu lesa af honum músík án þess að snerta diskinn.  1979 fékk hann hollenska fyrirtækið Philips í lið með sér til að hanna þetta fyrirbæri.  Svo ótrúlegt sem það hljómar mætti uppátækið gríðarlegu andstreymi.  Gömlu rótgrónu plötufyrirtækin fundu þessu uppátæki allt til foráttu. 

  Fyrstu geisladiskarnir komu á markað 1982.  Bandaríski plötuiðnaðurinn barðist á móti þessari nýjung á hæl og hnakka.  Um svipað leyti tókst honum að knésetja DAT segulbandsspólur sem voru að sumu leyti fyrirrennari geisladisksins.  Það er lásu af segulböndunum án þess að um núning við lesarann væri að ræða.

  Mig minnir að það hafi verið um 1985 sem bandaríski plötuiðnaðurinn gafst upp á baráttu gegn geisladisknum.  Ég var þá staddur í Bandaríkjunum og fylgdist með baráttunni gegn geisladisknum þar.  Fyrstu ár á eftir voru geisladiskar í Bandaríkjunum pakkaðir í umbúðir sem voru tvöfalt stærri en sjálfur geisladiskurinn.  Hugmyndafræðin var sú að stærð geisladisksins sem var aðeins fjórðungur af stærð vinylplötu myndi slátra plötunni sem heppilegri stærð í gjafaumbúðum til jólagjafa. 

  Í mörg ár voru geisladiskar í Bandaríkjunum aðeins framleiddir í þessum stóru umbúðum.

  Fyrsta geislaplata á almennum alþjóðamarkaði var "The Visitors" með Abba-viðbjóðnum.  Hinsvegar man ég að einn af fyrstu íslenskum geisladiskum var "Frelsi til sölu" með Bubba.  Ég sá um markaðssetningu þeirrar plötu.  Hún seldist í næstum 20 þúsund eintökum með öllum þeim markaðssetningarráðum sem ég kunni best á þeim tíma.

  Norio féll frá í vikunni 81 árs gamall.   

Níðingslegt athæfi

  Í fjölmiðlum helgarinnar hefur ekkert lát verið á fréttum af tveimur mönnum sem sæta ákæru fyrir sölu á marijúana.  Meginþunginn í fréttunum snýr að þeirri staðreynd að glæpamennirnir seldu Akureyringum marijúana.  Af fréttaflutningnum verður ekki annað ráðið en að ákæruvaldinu þyki það einstaklega níðingslegt og ósvífið að selja Akureyringum marijúana; það verði metið glæpamönnunum til refsiþyngingar að hafa ekki frekar selt Dalvíkingum tóbak.

.

Furðulegt uppátæki í plötuverslun

 

  Það getur verið assgoti gaman að skoða sig um í plötubúðum.  Ekki síst í plötubúðum þar sem starfsfólkið þekkir illa til þeirra platna sem á boðstólum eru.  Í ónefndri plötubúð í Stóru hryllingsbúðinni (eins og Pétur Þorsteinsson,  prestur Háóða safnaðarins,  kallar Kringluna) er rekki undir þungarokksplötur.  Hann er kyrfilega merktur "Þungarokk".  Úrvalið er frekar fátæklegt.  Fremst í röð platna með flytjendum hvers nafn byrjar á E trónir ljúf kántrý-plata með bandaríska kántrý-boltanum og heróín-fíklinum Steve Earle. 

  Þessi plata,  Copperhead Road,  er frá níunda áratugnum og vel kunn flestum sem fylgjast eitthvað með dægurlagamúsík.  Meðal annars er platan fræg vegna þess að breska þjóðlagahljómsveitin frábæra The Pogues sér að hluta um undirleik.  Það örlar þess vegna á írskum keim á plötunni.  Einnig er platan þekkt fyrir það að Jón Reiðufé (Johnny Cash) krákaði (cover song) af henni lagið  The Devil´s Right Hand.  Sama lag skreytti kúrekamyndina  Brokeback Mountain.

  Grunur leikur á að starfsfólk plötubúðarinnar í Kringlunni þekki lítið sem ekkert til helstu nafna í kántrýi og þungarokki.  Annars myndi það staðsetja vinsæla kántrýplötu annarsstaðar en í þungarokksrekka.  Til dæmis í kántrý-rekkann.

  Ef smellt er á myndbandið að ofan birtist hugsanleg vísbending um ástæðu þess að kántrý-plata sé flokkuð sem þungarokk.  Þarna sést framhlið umslagsins.  Hvað dettur fáfróðum í hug þegar þeir sjá hauskúpu og leggi glenna sig á plötuumslagi?  Aha,  þetta hlýtur að vera þungarokk.  Aftan á umslaginu er ljósmynd af síðhærðum Steve Earle.  Það þarf ekki frekar vitnanna við.  Það þarf ekki einu sinni að hlusta á plötuna né "gúgla" hana eða flytjandann. 

  Steve Earle er lunkinn söngvahöfundur og mikið krákaður í bandarísku kántrý-deildinni.  En ekki í þungarokksdeildinni.  Þar er frekar sótt í Slayer.  Og þar bregður ósjaldan fyrir hauskúpum og síðu hári.

  Ef þið smellið á þessi myndbönd til skiptist má heyra að það er blæbrigðamunur á kántrýi og þungarokki.  Afsakið hvað fyrra Slayer-lagið endar bratt.  Það er ekki mér að kenna. 

Óvenjulegt töfrabragð

  Ég kom við í Melabúðinni í dag til að kaupa mér Malt.  Þegar ég yfirgaf búðina stóð háaldraður maður aleinn með staf á gangstéttinni og virtist eiga erindi yfir Hofsvallagötuna.  Hann stóð við gangbrautina.  Bílaumferð var þung í báðar áttir.  Enda hádegistími.  Sá gamli skipaði höstuglega með hásri og kraftlítilli gamalmannsröddu:  "Stoppið!  Leggið bílunum!  Hleypið mér yfir götuna!  Stoppið!  Leggið bílunum!  Ég krefst þess að þið stoppið þegar í stað!  Leggið bílunum,  segi ég!"

  Það var eins og við manninn mælt.  Þó bílstjórarnir í bílunum hafi áreiðanlega ekki heyrt í þeim gamla þá stoppuðu þeir.  Allir sem einn.  Þetta voru töfrabrögð.

  Kannski hjálpaði að þarna eru umferðarljós sem skiptu um lit í sama mund.  Að minnsta kosti virtist það ekki skemma fyrir.  

Eivör í toppsæti danska vinsældalistans?

  Í dag kom á markað ný plata,  Engle Eller Dæmoner,  með vinsælasta rappdúett Danmerkur,  Nik & Jay.  Titillagið er að hluta lag Eivarar,  Tröllabundin.  Nik & Jay eru í hópi allra vinsælustu poppara í Danmörku.  Þarlendir poppfræðingar ganga út frá því sem vísu að platan fari í 1. sæti danska vinældalistans.  Plötudómar þarlendra eru sammála um að titillagið sé það bitastæðasta á plötunni.  Ef spár ganga eftir verður þetta í fyrsta skipti sem færeyskur söngtexti toppar danska vinsældalistann.  Þetta er spennandi dæmi.

  

Gott og einfalt ráð til að kýla niður rafmagnsreikninginn

  Á flestum íslenskum bæjum fer drjúgur hluti orkunotkunar heimilisins í að sjóða kartöflur.  Kartöflur eru soðnar fyrir hádegisverð og annar skammtur fyrir kvöldmat flesta daga.  Á sumum bæjum eru kartöflur reyndar aðeins soðnar einu sinni á dag.  Þessi stöðuga suða á kartöflum telur sig saman í háa upphæð fyrir rafmagn á ársgrundvelli.  Hefðin er sú að sjóða kartöflurnar í 43 mínútur.

  Þessum kostnaði má auðveldlega ná verulega niður á eftirfarandi hátt:  Helltu fyrst sjóðandi heitu vatni úr rafmagnskatlinum yfir kartöflurnar í pottinum.  Kveiktu síðan á hellunni undir pottinum.  Suðan kemur fljótlega upp.  Leyfðu henni að halda sér í 16 mínútur.  Þá slekkur þú á hellunni en lætur pottinn standa þar óhreyfðan með loki á í 32 mínútur.  Þá eru kartöflurnar snyrtilega soðnar,  ferskar og góðar.  Það sem mestu máli skiptir er að hýðið er ósprungið.

  Eitt það vitlausasta sem nokkur manneskja gerir er að salta kartöflur fyrir suðu.  Saltið nær ekkert að smjúga inn í kartöflurnar nema saltmagnið sé nánast til jafns við kartöflurnar og hýðið springi.

  Til gamans má geta að á færeysku heita kartöflur epli.  Það sem Íslendingar kalla epli heitir á færeysku súr epli.  Fólk reynir að ruglast ekki á þessu.

 

Sérkennileg nýlunda

  Það er furðuleg lenska hjá íslenskum matsölustöðum að afgreiða vín og bjór undir borðið.  Kannski er þetta arfleifð frá bannárunum svokölluðu.  Í lyftunni i Perlunni er auglýsing frá veitingastað á fjórðu hæð.  Þar er tekið fram - að gefnu tilefni - að bjór og vín séu einungis seld yfir borðið.  Mér varð svo um að ég keypti nokkrar geislaplötur á neðstu hæð.        

Kynningarmyndbandið með Eivöru, Nik & Jay

  Í síðustu viku upplýsti ég kátur og hress á þessum vettvangi að vinsælustu rapparar Danmerkur,  Nik & Jay,  hafi óskað eftir liðsinni færeysku álfadrottningarinnar,  Eivöru,  við gerð titillags væntanlegrar plötu dúettsins.  Þá færslu má lesa með því að smella á þessa slóð:  http://www.jensgud.blog.is/blog/jensgud/entry/1160277/ 

  Nú er komið á Þútúpuna kynningarmyndband fyrir plötuna.  Þar má heyra hvernig lag Eivarar,  Tröllabundin,  er fléttað saman við lag Niks & Jay,  Engle eller Dæmoner.  Poppfræðingar í Danaveldi reikna með því að lagið fái gríðargóða útvarpsspilun og platan fari á topp danska vinsældalistans.  Gangi það eftir verður það í fyrsta skipti sem færeyska hljómar á metsöluplötu í Danmörku. 

  Hér er kynningarmyndbandið:

Bestu hljómsveitirnar leiða saman hesta sína

  Það verður heldur betur hátíð og fjör á Freyjudaginn í næstu viku (Frjádag 29. apríl) á Nasa við Austurvöll.  Topparnir í rokkinu taka þar saman höndum og halda STÓR-hljómleika með þjóðlegu og kraftmiklu rokki sem snertir taugar hins venjulega Íslendings ekki síður en hörðustu þungarokkara.  Þetta eru hljómsveitirnar Skálmöld og Sólstafir.

  Skálmöld ruddist fram á sjónarsviðið á síðasta ári og hafði þá verið að í rúmlega ár. Fyrsta plata þeirra, Baldur, hefur nú þegar selst í þúsundum eintaka hér heima og heillað ólíklegasta fólk upp úr skónum. Platan segir sögu víkings sem missir allt sitt í árás, hvernig hann ferðast yfir ófærur til að hefna og allt fram yfir dauða. Textar Skálmaldar hafa vakið sérstaka athygli, kjarnyrtir og dýrt kveðnir, og sækja innblástur í þjóðararfinn.

  Sólstafir hafa vakið mikla athygli fyrir frumlegt indí-skotið og epískt síð-þungarokk á seinustu árum. Síðasta plata þeirra, Köld  frá árinu 2009, hlaut hvarvetna mikið lof gagnrýnenda.  Í kjölfarið túruðu Sólstafir um gjörvalla Evrópu nokkrum sinnum og spiluðu á flestum af stærstu rokkútihátíðum Evrópu, svo sem Hróaskeldu og Wacken, en Skálmöld mun einmitt spila á þeirri síðarnefndu í ár. Sólstafir eru þekktir fyrir sveitta og kraftmikla en þó um leið tilfinningaþrungna og yfirþyrmandi tónleikaframkomu. Sólstafir munu hefja upptökur á nýrri plötu í maí.

  Báðar hljómsveitirnar hafa nýlega skrifað undir plötusamninga erlendis og er heilmikil spilamennska framundan það sem eftir lifir ári hér heima og utan. Velgengninni þykir því rétt að fagna með þessum stórtónleikum þar sem ekkert verður til sparað.

  Miðasala fer fram á www.midi.is og miðinn kostar aðeins 2.500 kall.

Einkennilegt samtal á fésbók

  Í gærkvöldi kíkti ég rétt sem snöggvast á fésbók,  eftir að hafa skemmt mér konunglega í fermingarveislu (nei,  það var ekki verið að ferma mig heldur frænku mína).  Ég var ekki fyrr búinn að skrá mig inn á fésbókina en góðkunningi minn kastaði á mig kveðju á lokuðu spjallrásinni.  Hann var blindfullur,  eins og gengur.  Og langdrukkinn að auki.  Það er að segja var búinn að hella hraustlega í sig alveg frá því að vinnudegi lauk á föstudaginn.  Þannig að hann var orðinn töluvert ringlaður.

  Eftir að hafa kastað á mig kveðju og talið upp þær vínflöskur og bjórdósir sem hann var búinn að slátra sagðist hann vera að spjalla við tiltekna manneskju á fésbók.  Og bætir við:  "Við erum búin að ræða heilmikið um þig."

  Ég spurði:  "Hvað í ósköpunum getið þið rætt um mig?"

  Hann svaraði:  "Ég er nú eiginlega ekki alveg klár á því ennþá.  Við tölum nefnilega undir rós.  Við höfum ekki nefnt þig á nafn.  Það getur verið að við séum að tala um einhvern annan.  Ég held samt að við séum að tala um þig." 

Skúbb! Íslensk hljómsveit á Brasilíumarkað

  Brasilía er eitt stærsta markaðssvæði rokkmúsíkur í heiminum á eftir Bandaríkjunum,  Indlandi,  Evrópu og Kína.  Kínverjar eru 1400 milljónir.  Indverjar röskar 1000 milljónir.  Kanar 310 milljónir.  Gott ef íbúar Brasilíu eru ekki einhversstaðar þar í grennd.  200 milljónir eða svo.

  Fyrir tveimur árum fékk einn af helstu plötuútgefendum Brasilíu ofur áhuga á íslensku pönksveitinni Q4U.  Hann fann ekki netfang Q4U eða aðrar upplýsingar um hljómsveitina í tvö ár.  Q4U er nefnilega ekki í símaskránni.  Nú hefur kauði loks náð sambandi við Q4U og vill ólmur gefa út plötu með Q4U í Brasilíu.  Hann vill hafa á plötunni ný lög í bland við eldri lög hljómsveitarinnar.

  Kappinni kemur til Íslands í vor til að taka upp myndbönd með Q4U í samhengi við plötuútgáfuna í Brasilíu.

  Til gamans má geta að Q4U er nafn í Þýskalandi.  Þar á hún harðsnúinn hóp dyggra aðdáenda.  Útgáfa á plötu með Q4U í Brasilíu þýðir sölu upp á tugþúsunda upplag.  Brasilíski markaðurinn nær jafnframt yfir til nágrannalanda og Portúgals.

Skúbb! Eivör á rappplötu

  Síðustu árin hefur dúettinn Nik & Jay verið stærsta nafnið í dönsku rappsenunni.  Og reyndar eitt stærsta nafnið í dönsku músíkflórunni í það heila,  ásamt rokksveitinni Nephew.  Nik & Jay hafa átt fjölda laga og platna í efstu sætum danska vinsældalistans og farið heim með verðlaunagripi frá Dönsku tónlistarverðlaununum.  Alveg eins og færeyska álfadrottningin Eivör.  Það er skemmtileg tilviljun.  Fyrir mánuði fékk Eivör nefnilega beiðni um að gera lag með Nik & Jay.  Um er að ræða titillag næstu plötu drengjanna,  Engle eller Dæmoner. 

  Ekki nóg með það.  Hugmyndin er að flétta lagi Eivarar,  Tröllabundin,  inn í  Engle eller Dæmoner.  Samstarfið verður á jafnréttisgrundvelli.  Eivör hefur jafn mikið að segja um útfærsluna og drengirnir.  Þetta er samvinnuverkefni fremur en að Eivör sé gestasöngvari í lagi hjá Nik & Jay. 

  Eivör tók erindi Nik & Jay vel.  Þegar hefur verið ákveðið að fara lengra með samstarfið.  Til að mynda er áhugi fyrir því að Eivör taki þátt í hljómleikum Niks & Jays í sumar. 

  Í fyrra kom Eivör fram á fjölda hljómleika vinsælustu hljómsveitar Danmerkur,  Nephew,  og einnig vinsælustu vísnahljómsveit Noregs,  Vamp.  Að auki söng Eivör á plötu Vamp.  Hvorutveggja vakti mikla athygli og var góð kynning fyrir Eivöru.  Næsta víst er að svo mun einnig verða með samstarf hennar og Niks & Jays. 

Ótrúlega kurteisir og þolinmóðir Svíar

  Þegar komið er til Svíþjóðar vekur strax athygli hvað allir eru kurteisir og tillitssamir.  Hvergi sést troðningur eða annarskonar frekjuleg framkoma.  Þess í stað mega engir tveir koma á sama stað í sömu erindagjörðum á sama tíma án þess að mynda röð.  Báðir aðilar leggja sig þá fram um að bjóða hinum að vera á undan sér í röðinni.  Það hefur stundum leitt til stimpinga og jafnvel slagsmála.

  Sá sem endar aftar í röðinni gætir þess síðan vandlega að sýna engin merki um óþolinmæði og haggast hvergi fyrr en sá framar í röðinni hefur örugglega lokið sínu erindi og horfið á braut.  Þetta er ekki síst áberandi meðal hunda í Svíþjóð.

Broslegt úr fermingarfræðslu

  Núna stendur fermingarundirbúningur barna sem hæst.  Liður í honum er svokölluð fermingarfræðsla.  Á dögunum var einn tími fermingarfræðslunnar lagður undir fyrirlestur um skaðsemi áfengis og ólöglegra vímuefna.  Foreldri eins fermingarbarnsins beið frammi á meðan en lagði jafnframt við hlustir.  Fyrirlesturinn var nefnilega áhugaverður.  Fulltrúi frá fíkniefnadeild lögreglunnar fór skipulega og ítarlega yfir skaðsemi og hættur hvers vímuefnis fyrir sig.  Börnin hlustuðu hljóð á. 

  Er fyrirlestrinum lauk sté presturinn fram og spurði börnin:  "Náðuð þið þessu öllu?  Spyrjið endilega ef eitthvað er óljóst."

  Einu viðbrögðin voru að drengjarödd í mútum heyrðist kalla:  "Það er nú ekki eins og þetta séu einhver geimvísindi!" 

Ósvífið svindl

  Ég átti erindi til Hafnarfjarðar í dag.  Í nágrenni við Fjarðarkaup rak ég augu í skilti með merkingunni "Ódýrt bensín".  Bensínið sem ég hef keypt undanfarin ár hefur verið okurdýrt.  Ég hugsaði mér gott til glóðarinnar.  Ég hef ekki rekist á ódýrt bensín í áraraðir.  En nú var lag.  Þannig að ég brá við skjótt og fyllti á bílinn þetta sem var auglýst ódýrt bensín.  Þegar á reyndi kom í ljós að hið svokallaða "ódýrt bensín" kostaði um 230 kall lítrinn. 

  Er það ódýrt bensín?  Í minni brengluðu verðvitund er það dýrt bensín.  Rándýrt.  Er þetta Hafnarfjarðarbrandari?

Álagið hið lægsta frá hruni

Einn léttur

  Ljóskan vann 600 milljónir í lottói.  Á mánudeginum mætti hún á skrifstofu lottósins til að sækja vinninginn.  Henni var tjáð að áður en hún fengi vinning greiddan út yrði hún að sækja sérstakt námskeið fyrir vinningshafa svo stórrar upphæðar.  Þar myndu fjármálaráðgjafar,  sálfræðingar og aðrir slíkir fara yfir málin með henni.  Jafnframt væri þetta hár vinningur ekki greiddur út á einu bretti heldur myndi hún fá 100 milljónir afhentar 1. maí næstu sex ár.

  Viðbrögð hennar urðu þau að segja:  "Þetta er svindl.  Ef ég fæ ekki mínar 600 milljónir afhentar strax þá mun ég slíta hér og nú öllum viðskiptum við fyrirtækið,  skipta aldrei við það framar,  og stefna ykkur til að endurgreiða mér lottómiðann undir eins!"

Góð úrslit í Söngkeppni framhaldsskólanna

  Ég var svo heppinn að sjá fyrir tilviljun í Stöð 2 síðasta hluta Söngkeppni framhaldsskólanna.  Ég er ekki með áskrift að Stöð 2 og vissi ekki af keppninni.  Ennþá síður vissi ég að hún væri send út í opinni dagskrá.  Ég hef ekki lagt mig eftir að fylgjast með Söngkeppni framhaldsskólanna undanfarin ár.  Það er eins og mig minni að vinningslögin séu yfirleitt einhverjir væmnir vellusöngvar.  Kannski er það rangminni.  Hvort sem er þá er ég ánægður með vinningshafann í ár.  Sá heitir því flotta nafni Dagur Sigurðsson og keppti fyrir hönd Tækniskólans með uppáhalds Bítlalaginu mínu,  Helter Skelter.

  Samkvæmt reglum keppninnar eru einungis söngtextar á íslensku gjaldgengir.  Það er góð regla.  Hana mætti endilega taka upp í Músíktilraunum.  Íslenski textinn hans Dags kallast  Vitskert vera.  Með Degi er kominn fram á sjónarsvið þróttmikill rokksöngvari sem er til alls vís.  Hljómsveitin að baki honum var hinsvegar full session-leg.  En fín út af fyrir sig.  Vantaði bara smá greddu í rokkið hjá þeim. 

http://www.visir.is/section/MEDIA99&fileid=CLP3381

Dagur vann Söngkeppnina

Spennandi te-leginn ufsi

  Fyrir nokkrum dögum birti ég hér uppskrift af grænlenskum rækjupönnukökum.  Það vakti mikla gleði og hamingju.  Einkum meðal þeirra sem prófuðu uppskriftina.  Þó að grænlensku pönnukökurnar séu sælgæti er hætta á að þær verði leiðigjarnar þegar þær eru snæddar í öll mál alla daga.  Nú er svo komið að fólk er farið að biðja um aðra uppskrift til að fá æskilega fjölbreytni í mataræðið.  Þá er upplagt að fá sér færeyskan te-leginn ufsa.

  Það sem til þarf er 211 gr ufsaflak,  roðlaust og beinlaust.  Síðan er blandað saman 7 og hálfri matskeiðum af salti,  3 af sykri og 1 og hálfri af Earl Gray te-i (ekki í tepoka).  Blöndunni er nuddað vel á allt ufsaflakið.  Afganginum er stráð á fat sem rúmar flakið.  Flakið er lagt þar ofan á.  Því næst er sellofón-plastfilma strengd yfir fatið.  Það er látið standa óhreyft í ísskáp í 14 klukkutíma og 7 mínútur.  Þá er flakið skorið í þunnar sneiðar og notað sem álegg ofan á brauð.  Það er gott að setja smávegis af graflaxsósu með.  Ufsinn bragðast nefnilega glettilega í humátt að graflaxi.   

  Einnig er við hæfi að setja með á brauðið salatblöndu úr gulum baunum,  kjúklingabaunum,  papriku og púrrulauk.

Vandræðalegur misskilningur

  Ég biðst velvirðingar á að textinn virkar ekki á íslensku.  Þar fyrir utan á góður brandari eitt sameiginlegt með lifandi froski;  ef hann er krufinn þá deyr hann.  En vegna þess að lesendur hafa mismikla eða -takmarkaða enskukunnáttu er þó rétt að upplýsa að enska orðið "escort" er annarsvegar nafn á vinsælli bílategund og hinsvegar heiti yfir fínni vændiskonu (fylgdarkonu).

  Maðurinn á myndinni virðist vera ítalski folinn Berlusc-horny (Berlusconi).

Gott ráð fyrir fólk í dreifbýlinu

  Undanfarna áratugi hef ég ferðast eins og jó-jó (nei, ekki söngvarinn sem spilar á gítar í Kolaportinu) þvers og kruss um landið.  Það er gaman.  En það er ekki eins gaman að fylgjast með íbúafækkun í hinum ýmsu þorpum og sveitum.  Einkum er dapurlegt þegar brottfluttir þurfa að yfirgefa verðlaus hús sín sem standa síðan auð.  Að vísu eru þessi hús börnum til skemmtunar.  Þau grýta steinum í rúðurnar og skríða síðar inn í húsið til að reykja marijúana.

 

  Það kostar marga peninga,  svita og tár að byggja hús.  Það er gríðarmikið fjárhagslegt tjón fyrir húseiganda að yfirgefa óselt hús.  Auð hús setja ljótan blett á litlu þorpin. 

  Við þessu er til ráð.  Ráðið felst í því að fólk úti á landi hætti að byggja jarðföst hús. Þess í stað fái það sér hjólhýsi eða annarskonar færanlegt hús.  Þegar kvótinn er seldur úr þorpinu þá er minnsta mál í heimi að grípa húsið með sér þangað sem atvinnu er að fá.  Fjármögnun á nýju húsi á nýjum stað er úr sögunni.  Líka að pakka niður búslóðinni.  Hún er á sínum stað inni í húsinu.  Meira að segja mjólkurfernan í ísskápnum.  

  Annar kostur við færanleg hús er þegar hætta er á snjóflóði,  grjótskriðu eða öðrum náttúruhamförum:  Þá er bara að hóa krökkunum í götunni saman til að halda á húsinu í öruggt skjól.  Þeir hafa gaman að því.  Það þarf einungis að gefa þeim brjóstsykur eða kandísmola fyrir.