Færeyskt rokk í 1. sæti danska vinsældalistans

  Síðustu ár hafa færeyskir popparar verið áberandi í skemmtibransanum í Danmörku.  Færeyskar söngkonur hafa hver á fætur annarri náð efstu sætum í söngvarakeppnum danska sjónvarpsins, þáttum á borð við X-factor og "Stjarna kvöldsins".   Eivör,  Teitur, hljómsveitin Týr,  Högni Lisberg og fleiri færeyskir tónlistarmenn hafa fína markaðsstöðu í Danmörku.  Eivör og Teitur hafa meðal annars landað verðlaunum í dönsku tónlistarverðlaununum. 

  Popp-pönkhljómsveitin The Dreams hefur náð ofurvinsældum í Danmörku.  Upphaf þess má rekja til þess að hljómsveitin tók þátt í dönsku "Músíktilraununum" fyrir nokkrum árum.  Þar náði hún 2. sæti en sló samstundis í gegn langt umfram vinningshljómsveitina.  Síðan hefur The Dreams raðað lögum í toppsæti danska vinsældalistans.  Lagið á myndbandinu hér fyrir ofan, Revolt,  situr í 1. sæti danska vinsældalistans núna (eins og sjá og heyra má í sjónvarpsstöðinni DR1). 

  Á dögunum setti umboðsmaður bandarísku popp-metal sveitarinnar Linkin Park sig í samband við liðsmenn The Dreams.  Erindið var að hann telur hljómsveitina smellpassa inn á bandaríska markaðinn núna.  Kauði vill ólmur gerast umboðsmaður The Dreams og teppaleggja bandaríska markaðinn með færeysku pönkurunum.  Þeir liggja nú undir feldi og eru að yfirfara ásamt lögfræðingum umboðssamninginn við þann bandaríska.  Á meðan skulum við hlusta á færeysku víkingarokkarana í Tý flytja sönginn um  Regin smið:

Athugasemdir

[Tommi (IP-tala skráð) 28.2.2010 kl. 13:15]

Ég held að þessi hljómsveit eigi eftir að meika það all-svakalega í Bandaríkjunum. Ekki ólíklegt að þetta verði vinsælasta sveit Norðurlandanna innan skamms.

[Sveinn Elías Hansson, 28.2.2010 kl. 14:26]

Þetta er alvöru mússikk , ekki þetta endalausa píkupopp sem tröllríður öllu allsstaðar.

[Auðjón (IP-tala skráð) 28.2.2010 kl. 20:42]

Ég var hálfdormandi með DR í bakgrunninum þegar þetta lag kom á skjáinn og vakti mig með látum, þvílíkt flott lag. Ég áttaði mig engan veginn að þetta væri frændur vorir the Dreams frá Færeyjum, það jók nú heldur betur á gleðina þegar ég uppgötvaði það.

Þeir á tonlist.is hafa lofað mér því að platan verði fáanleg þar innan skamms.

[Grefillinn Sjálfur - Koma svo! (IP-tala skráð) 1.3.2010 kl. 02:08]

Ég held ég flytji til Færeyja.

[Helga Kristjánsdóttir, 1.3.2010 kl. 18:29]

  Hlustaði á Dreams um leið og ég kíkti inn til þín.til að slappa af.  Þrusu gott ekki á þá logið.

[Jens Guð, 2.3.2010 kl. 05:55]

  Tommi,  þessi hljómsveit á alveg séns í að "meika það" vestan hafs.

[Jens Guð, 2.3.2010 kl. 05:56]

  Sveinn Elías,  þeir eiga til góða spretti,  þessir drengir.

[Jens Guð, 2.3.2010 kl. 05:57]

  Auðjón,  þeir hjá tónlist.is hafa verið nokkuð duglegir að setja færeyskar plötur í bankann hjá sér.

[Jens Guð, 2.3.2010 kl. 05:59]

  Bergur,  ég er alltaf á leiðinni að flytja þangað.  Hingað til hefur það þó aldrei orðið meira en skreppa til eyjanna 2 - 3 á ári.  Reyndar er ég með landakort af eyjunum húðflúrað yfir hægri framhandlegginn á mér.

[Jens Guð, 2.3.2010 kl. 06:00]

  Helga,  það er gaman að þú skulir hafa náð að slappa af við að hlusta á The Dreams.