Rás 2 er frábært útvarp

  Öll fyrirtæki hafa gott af því að ganga í gegnum allsherjar endurskoðun.  Þess vegna - meðal annars - ber að fagna kreppu og grófum samdrætti.  Þumalputtaregla er að fyrirtæki stofnað í aðdraganda kreppu eða eftir að kreppa er skollin á verði langlífari og blómstri betur en fyrirtæki sett á laggir í góðæri.

  Kreppa og samdráttur kalla á hagræði.  

  Fyrstu viðbrögð eru jafnan að segja upp þeim sem skúrar og þrífur klósettin.  Æðstu stjórnendur með margföld laun þess sem skúrar slá skjaldborg um sín 16 milljón króna árslaun,  jeppa,  síma og það allt.  Hjá Rúv eru 11 æðstu stjórnendur með hátt á annað hundrað milljón króna launakostnað.  Þegar aðrir yfirstjórnendur eru meðtaldir er talan - að mig minnir - um 260 milljónir króna.  

  Þetta er svo sem ekki há tala.  Ríkiskirkjan er með 4000 milljónir.  Domino´s var verðlaunað sem markaðsfyrirtæki ársins 2013 eftir 2000 milljón króna afskriftir (eða voru þær bara 1000 milljónir?).  Morgunblaðrið:  4000 milljónir, 

  Ég kann ekki nöfnin á öllum þeim Björgúlfum sem hafa fengið afskrifaðar svo margar milljónir að ég get ekki talið núllin án þess að ruglast í talningunni.

  Víkur þá sögu að Rúv og Rás 2.  Rás 2 hefur gegnt stóru hlutverki í íslenskri tónlist.  Rás 2 er ábyrg fyrir þeirri sterku stöðu sem íslensk tónlist gegnir innanlands og ekki síður erlendis.  Með tilheyrandi gjaldeyristekjum íslenska ríkisins (sameiginlegum sjóði landsmanna) - ef menn vilja meta dæmið út frá krónutölu.  Sem er þó ekki eftirsóknarverðasti þáttur í menningu og listum.  Að næra sálina er nauðsynlegra en að telja aura.

  Rás 2 og Rúv hafa sinnt sínu hlutverki frábærlega vel. Hljómsveitin Kukl varð til í útvarpsþætti á Rúv.  Kukl var þúfan sem velti stórum steini.  Kukl varð Sykurmolarnir.  Sykurmolarnir urðu heimsfræg hljómsveit. Söngkona Sykurmolanna,  Björk,  varð frægasti Íslendingur sögunnar.  Heimsfrægð Bjarkar lagði grunn að því að útlendum ferðamönnum til Íslands fjölgaði úr 80.000 í 600.000.  Þegar á leið með fulltingi Sigur Rósar,  Of Monster and Men og fleiri.  

  Hvar og hvenær sem eitthvað er um að vera í íslenskri tónlist þar er Rás 2.  Hvort heldur sem eru Músíktilraunir,  Airwaves,  Menningarnótt,  17. júní eða annað.  Ferill Of Monster and Men hófst með sigri í Músíktilraunum og fór á flug á Airwaves.   

  Rás 2 býr að þeirri gæfu að þar hefur safnast saman hugsjónafólk sem leggur sig fram um að styðja íslenska tónlist.  Dagskrárgerðarmenn sem hafa metnað, elju, ástríðu og ákafa  í að sinna þessu hlutverki:  Óli Palli,  Andrea Jóns,  Guðni Már,  Matti Matt,  Doddi litli,  Andri Freyr og Gunna Dís, Ásgeir Eyþórs,  Þossi,  Valli Dordingull og fleiri.  Ég er að gleyma svoooo mörgum.

  Í áranna rás hef ég af og til stússað í kringum tónlist með íslenskum og útlendum tónlistarmönnum.  Flestar - nánast allar - músíkútvarpsstöðvar eru lok, lok og læs.  Nema Rás 2.  Meira að segja þegar "Ormurin langi" með færeysku hljómsveitinni Tý seldist í 4000 eintökum á Íslandi var hann einungis spilaður á Rás 2.  Sama var þegar Eivör seldi 10 þúsund eintök af Krákunni.  Hún var aðeins spiluð á Rás 2.  Þannig mætti áfram telja.  

  Rás 2 stendur öllum tónlistarstílum opin.  Engu er hafnað á þeirri forsendu að það falli ekki að lagalista stöðvarinnar.  

  

Adolf Inga sagt upp

Athugasemdir

[Axel Jóhann Hallgrímsson, 28.11.2013 kl. 03:30]

Takk fyrir þennan pistil Jens, orð í tíma töluð og svo sönn!

[Stefán (IP-tala skráð) 28.11.2013 kl. 08:21]

Til hamingju með 30 ára afmælið Rás 2 í myrkum niðurskurðardal. Ég hef virkilega notið þessarar faglegu útvarpsstöðvar, eitthvað annað en þegar ég eignaðist píanódisk með Illuga Gunnarssyni. Það fannst mér ekki fagleg spilamennska og diskurinn fór fljótlega í ruslið. Nú er það Illugi sem hendir RUV og Rás 2 í ruslið og líklega gleðst enginn meira yfir því en Vigdís Hauksdóttir, eða hvað ?  

[Jón Kristjánsson (IP-tala skráð) 28.11.2013 kl. 12:57]

Flottur pistill Jens, sammála hverju orði!! Vil svo nota tækifærið og þakka þér fyrir frábæra og launfyndna pistla!!

[Stefán (IP-tala skráð) 28.11.2013 kl. 14:00]

Páll Magnússon kallaði undirmann sinn Helga Seljan ,, óþverra " í viðurvist annarra undirmanna sinna á fundi á RUV í morgun. Alveg dásamlegt komment hjá honum Páli eða hitt þá heldur og það á 30 ára afmæli Rásar 2. Maður spyr sig hvort slíkur yfirmaður eigi ekki bara að segja sjálfum sér upp næst og taka íþróttafréttakonuna umdeildu, dóttir sína með sér ?  Lifi Kastljós RUV með Helga, Sigmari og Þóru og vonandi taka þau aldrei Illuga G og Vigdísi H í viðtöl !  

[Grímur (IP-tala skráð) 28.11.2013 kl. 14:04]

"Fyrstu viðbrögð eru jafnan að segja upp þeim sem skúrar og þrífur klósettin."

Því miður eru þetta oft einu viðbrögðin

og þó - forstjóri Eimskips setti fyrirtækið á hvínandi kúpuna og fór svo fram á hundruðir miljóna vegna ákvæða í ráðningarsamningi
sem hann og "vinir" skjalfestu

[Jens Guð, 28.11.2013 kl. 21:57]

  Axel Jóhann,  takk fyrir það.

[Jens Guð, 28.11.2013 kl. 21:59]

  Stefán (#2),  ég er kannski heppinn að hafa aldrei heyrt neitt af disknum.  Hann virðist lítið vera spilaður á útvarpsstöðvum. 

[Jens Guð, 28.11.2013 kl. 22:00]

  Jón,  kærar þakkir.  Það er hvetjandi að fá svona umsögn. 

[Jens Guð, 28.11.2013 kl. 22:05]

  Stefán (#4),  forstjóri gerir sjálfan sig umsvifalaust óhæfan um leið og hann ræðst með svona svívirðingum á starfsmann sinn.  Helgi er snillingur.  Páll er eitthvað allt annað. 

[Jens Guð, 28.11.2013 kl. 22:08]

  Grímur,  það er íslenski stíllinn:  Menn hlaða inn í ráðningasamninga hvers annars starfslokasamningum upp á margföld ævilaun óbreyttra. 

[Siggi Lee Lewis, 29.11.2013 kl. 18:15]

Ég stofnaði Gunnar í miðri kreppu og hann er enn á hraðri uppleið!

[Jens Guð, 29.11.2013 kl. 19:27]

  Enn ein staðfestingin á þumalputtareglunni.