Ráð til að verjast ormum í sushi

  Á síðustu áratugum hafa Íslendingar frekar viljað vera án orma í skrokknum en ekki.  Á þessu hefur upp á síðkastið mátt greina breytingu.  Íslendingar eru farnir að úða í sig við öll tækifæri hráan fisk í bland við soðin og klesst hrísgrjón.  Þannig blanda gengur undir nafninu sushi,  en mætti kallast ormakonfekt.  Hrár fiskur er iðulega iðandi í ormum.  Það getur verið erfitt að koma auga á bölvaðan orminn.  Hann lætur sjaldan mikið fyrir sér fara.  Ennþá minna fer fyrir ormaeggjunum.  Þau eru örsmá og klekjast út í maganum á sushi-ætunni. 

  Út af fyrir sig er að mestu skaðlítið að vera með spriklandi orm í mallakútnum.  Hringormurinn er ólíklegur til að gera mikinn usla.  Bandormurinn er herskárri.  Hann getur dreift sér um líkamann.  Það veldur kláða og óþægilegum fiðringi.

  Sumar sushi-ætur hafa ekki hugmynd um að ormar leynist í fiski.   Ennþá síður grunar þær að lifandi ormar leynist í hráum fiski.  Til að forðast spriklandi orma í heimalöguðu sushi er ráð að djúpfrysta fiskinn.  Við það fær ormurinn lungnabólgu og deyr.  Eftir það er hann ekki upp á marga fiska.  

  Síðan er bara að muna eftir því að þíða fiskinn áður hann er notaður í sushi.     

Athugasemdir

[Ásthildur Cesil Þórðardóttir, 26.9.2014 kl. 18:22]

Hahaha hef einmitt verið að spá í þessa orma eftir fréttina um bandorminn.

[Jens Guð, 27.9.2014 kl. 22:52]

Ásthildur Cesil, ég hef orðið var við að margir efast um sannleiksgildi fréttarinnar með röntgenljósmyndunum af ormakallinum. Málið er að margir halda að bandormur sé bara og aðeins þessi langi ormur sem oft sést á myndum. Hið rétta er að bandormur er samheiti yfir margar tegundir af ormum. Þar á meðal eru algengir ormar sem eru ekkert langir. Bara alveg eins og ormarnir á röntgenmyndunum.

[Stefán (IP-tala skráð) 29.9.2014 kl. 14:12]

Augljósar ormagryfjur: framsókn, KS, MS ...

[Jens Guð, 11.10.2014 kl. 21:58]

Stefan, margt til í thví.