Þetta vissir þú ekki

5.4.2015 | 00:53

Saga rokksins er ekki öll þar sem hún er séð og skráð. Á seinni hluta sjöunda áratugarins sló hljómsveitin Facon frá Bíldudal í gegn með laginu "Ég er frjáls (eins og fuglinn)". Síðar sendu Bítlarnir frá sér annað lag undir svipuðu nafni, "Free as a Bird". Það var stuldur frá Facon.

Það er þó ekki leyndarmálið heldur hver trommaði á plötu Facons. Skráður trommari var fastur úti á sjó þegar platan var hljóðrituð. Í skarðið var fenginn trommari Hljóma, Pétur Östlund. Hans er hvergi getið á plötuumslagi. Pétur er einn besti trommari heims. Eðlilega hrósuðu plötugagnrýnendur tommuleiknum. Einn hvatti hann til að drífa sig suður í trommunám hjá Pétri Östlund. Hann væri það efnilegur.

Hver á trommuleikinn í sívinsælum ofursmelli Hebba Guðmunds, "Can´t Walk Away"? Það er trommuleikari The Rolling Stones, Charlie Watts. Þetta er leyndarmál.

1964 sló breska söngkonan Marianne Faithfull í gegn með fyrsta alvöru góða frumsamda lagi The Rolling Stones, "As Tears Go By". Lagið var flutt af Maríönnu en ekki Stóns til að byrja með. Fáir vita að gítarplokkið var í höndum Jimmy Page (Led Zeppelin).

Jimi Hendrix sló í gegn í árslok 1966 með laginu "Hey Joe". Röskum tveimur árum áður spilaði hann á gítar í öðru vinsælu lagi, "Mersy Mersy" með Don Convay. Það náði toppsæti bandaríska soul-listans og 35. sæti almenna vinsældalistans. Plötugagnrýnendur sáu ástæðu til að vekja athygli á nýstárlegum og ferskum gítarleik í laginu - án þess að nefna nafn Hendrix (enda kom nafn hans hvergi fram á plötuumbúðum). Ef vel er lagt við hlustir má þekkja gítarstíl kappans.

Lagið ku hafa hrifið liðsmenn The Rollin Stones. Mick Jagger er sagður hafa reynt að stæla söngstíl Convays. Af markaðsástæðum var hönnuð spenna og togstreita á milli Stóns og Bítlanna. Á bak við tjöldin var hinsvegar kært á milli þessara hljómsveita. Bítlarnir komu Stóns á plötusamning, sömdu fyrir þá vinsælt lag, "I Wanna Be Your Man", kenndu þeim að semja lög og hjálpuðu til við röddun. Í laginu "We Love You" sjá Bítlarnir um annan söng en forsöng Jaggers.

1977 sendi The Clash frá sér lagið "Janie Jones". Það fjallaði um kabarettsöngkonu sem naut vinsælda á sjöunda áratugnum. Glansinn fór af Janie Jones í lok áttunda áratugarins þegar hún var dæmd til sex ára fangelsisvistar fyrir að reka vændishring. Vegna góðrar hegðunar var henni sleppt út eftir þrjú ár. Þá var hún staurblönk og enga vinnu að fá. The Clash hljóp undir bagga og gerði með henni smáskífu. Einhverra hluta vegna var framtaki hljómsveitarinnar haldið leyndu. Á umbúðum er hljómsveitin skráð The Lash.