2. hluti - Hvað verður um ungt fólk sem hlustar á þungarokk á unglingsárum?

 

  Barátta bandarísku Verndarsamtaka foreldra,  PMRC,  gegn þungarokki á níunda áratugnum gekk út á að þungarokkið stæði fyrir ofbeldi, sado-masókisma, djöfladýrkun,  klám og sjálfsmorð.  Þessi afstaða byggði ekki á öðru en tilgátum.  Röngum tilgátum.  Hún var ekki studd neinum rannsóknum.  Þess í stað var vísað á örfá plötuumslög og afmörkuð dæmi án samanburðar við þá sem hlusta á aðra músíkstíla.

  Seinni tíma rannsóknir hafa leitt í ljós að Verndarsamtök foreldra fóru villu vegar. 

  Reyndar þarf engar rannsóknir til.  Hérlendis höfum við langa reynslu af þungarokkshátíðinni Eistnaflugi í Neskaupstaði.  Um og yfir 2000 gestir hafa aldrei sýnt af sér annað en góða hegðun.  Þar er ekkert ofbeldi.  Engir þjófnaðir.  Engar nauðganir.  

  Til samanburðar höfum við skallapoppshátíðir á borð við Þjóðhátíð í Eyjum um verslunarmannahelgina.  Þar er aldrei spurt um það hvort að einhverri manneskju hafi verið nauðgað eða hvort einhver hafi verið laminn.  Þar er aðeins spurt um fjölda nauðgana og barsmíða.

  Stærsta árleg þungarokkshátíð í Evrópu,  Wacken í Þýskalandi, telur 80 þúsund gesti.  Þar hafa aldrei komið upp vandamál.  Engar nauðganir.  Engar barsmíðar.  Enginn þjófnaður.

  Nú hefur verið birt í tímaritinu Self and Identidy niðurstaða rannsóknar á þungarokkurum.  Niðurstaðan passar við allar aðrar alvöru kannanir.  Hún staðfestir að ungir þungarokkarar eru almennt hamingjusamari en jafnaldrar sem hlusta á aðra músík.  Þeir eru heiðarlegri og í betra andlegu jafnvægi.  Gáfaðri og með meiri félagslega færni. Þungarokkarar spjara sig betur í lífinu en þeir sem hlusta á aðra músíkstíla.    

  Rannsóknin nær aftur til ársins 1980 (hálfan fjórða áratug).  Þá voru þungarokkarar að hlusta á Iron Maiden og Metallica.  

  Á síðasta ári voru þungarokkarar virkustu notendur Spotify.  Á síðasta ári toppaði rokkmúsík aðra músíkstíla í plötusölu í Bandaríkjunum.

  Heimska fólkið stillir á FM957 og Léttbylgjuna.   

http://www.visir.is/section/MEDIA98&fileid=CLP37654

Athugasemdir

[Stefán (IP-tala skráð) 16.7.2015 kl. 08:31]

Heyr, heyr, þungarokk og þungarokkarar lifi !  En ekki skemmir nú nokkurn mann að hlusta meðfram á það besta úr öðrum músíkstílum líka, sama hvort það er popp, country, funk, soul, klassík eða jazz. Það hlýtur að lúta sömu lögmálum og matur, þar sem fólki er ráðlagt að borða sem fjölbreyttastan mat til að lifa sem heilbrigðustu lífi. Ég þekki t.d. grænmetisætur sem líta út eins og fölnuð strá í haustvindum og þeim veitti sko ekki af góðum fisk og kjötbitum. Útvarpsstöðin FM 95,7 er mér vitanlega ætluð börnum og unglingum, þannig að það hæfir því þeirra þroska og ekki nema gott að bjóða þeim aldri upp á sérstaka útvarpsstö. Hverjir hlusta hinsvegar á Léttbylgjuna veit ég ekki eða hverjum sú útvarpsstöð er ætluð.

[Grrr (IP-tala skráð) 16.7.2015 kl. 11:44]

Ég er hissa að nokkur stilli á 957 nema af slysni.

Það gerðist einu sinni hjá mér og ég þurfti á sálfræðihjálp á að halda eftir það klúður.

[Jens Guð, 16.7.2015 kl. 19:45]

Stefán,  það er áreiðanlega í góðu lagi að hlusta á fleira en þungarokk í bland.    Bara ekki hvað sem er.  

[Jens Guð, 16.7.2015 kl. 19:46]

Grrr,  fleiri hafa lent í þessu klúðri með sömu afleiðingum .