Veitingahús - umsögn

 

Veitingastaður:  Langbest,  Hafnargötu 62,  Keflavík

Réttur:   Lambasteik

Verð:  1750 kr.

Einkunn: ***1/2 (af 5)

  Ég hafði aldrei tekið eftir þessum stað fyrr en nú.  Þó hef ég oft átt erindi til Keflavíkur.  Merkingar eru sem sagt ekki mjög áberandi.  Staðurinn er víst um það bil 15 til 20 ára.  Þessu komst ég að þegar ég nefndi við innfædda Keflvíkinga að ég hafi prófað að borða á nýjum stað.  Jafnframt fékk ég að vita hvernig nafn staðarins kom til:   Aðstandendur hans voru að velja nafn úr fjölda tillagna.  Einn sagði að honum þætti tiltekið nafn langbest.  Öðrum þótti annað nafn langbest.  Þeim þriðja þótti þriðja nafnið langbest.  Þegar þeir tóku eftir því að allir notuðu orðið langbest er þeir lýstu sinni skoðun varð að samkomulagi að kalla staðinn Langbest.  Gott nafn.

  Langbest er í milliflokki.  Uppistaða á matseðli eru hamborgarar og flatbökur (pizzur).  En einnig steikur,  djúpsteiktur fiskur og gratíneraður fiskur.  Ég pantaði lambasteik.  Þegar ég rétti afgreiðslumanninum kortið mitt sá ég að hann stimplaði inn 1945 kr.   Ég gerði athugasemd:

  - Á matseðlinum stendur að lambið kosti 1750 kall.

  - Það er rétt.

  - En þú stimplar 1945 kall.

  - Já,  vegna þess að gosið kostar 195 kall.

  - Pantaði ég gos?

  - Viltu ekki gos með matnum?

  - Getur verið að ég myndi panta gos ef ég vildi gos en ég myndi ekki panta gos ef ég vildi ekki gos?

  - Ég get alveg mínusað gosið ef þú vilt ekki gos.  Viltu sleppa gosinu?

  - Hvað heldur þú?

  - Þú ræður.  Ef þú vilt ekki gos þá mínusa ég það bara.

  Og þannig fóru leikar.  Afgreiðslumaðurinn mínusaði gosið sem ég hafði ekki pantað.

  Með lambagrillsteikinni fylgdu 2 stórar bakaðar kartöflur.  Sennilega voru þær forsoðnar.  Þær voru það mjúkar og safaríkar.  Kartöflur sem eru einungis bakaðar eru yfirleitt þurrari og mjölkenndar.  Þessar voru engu að síður bragðgóðar.  Með þeim fylgdi sitthvort smjörstykkið.  Á borð vantaði pipar.  Þar var bara salt og kartöflukrydd fyrir franskar.  Kartöflukrydd passar ekki með bökuðum kartöflum.  Það gera aftur á móti pipar og salt.

  Vænn skammtur af berneisósu fylgdi í sósuskál.  Hún var mjög líklega upphituð.  Hún var það þunn og yfirborðið frauðkennt.  Engu að síður góð sósa.  Einnig fylgdi ferskt salat sem samanstóð af iceberg,  agúrkum og tómötum.  Ágætur skammtur.

  Lambasteikin var alveg mátulega léttsteikt,  meir og léttkrydduð.  Hún var steikt með mjög þunnt skornum sveppum.  Þannig eiga sveppir með lambasteik að vera.   

  Innréttingar eru frekar "sjoppulegar" eða skyndibitalegar.  Bólstraðir dökkbláir bekkir minna meira á vinnustaðamötuneyti en veitingastað innréttaðan samkvæmt góðri markaðsfræði.  Þetta skiptir mig þó engu máli.  Meira máli skiptir að hálfur lítri af bjór er á 650 kall sem er ágætt milliverð.

  Myndin er ekki frá Langbest.

Aðrar umsagnir um veitingahús:

- Icelandic Fish & Chips

http://jensgud.blog.is/blog/jensgud/entry/643187

 - American Style

http://jensgud.blog.is/blog/jensgud/entry/630463

 - Pítan

http://jensgud.blog.is/blog/jensgud/entry/590495

 - Hrói höttur

 http://jensgud.blog.is/blog/jensgud/entry/641856

Athugasemdir

[Ómar Ingi, 21.9.2008 kl. 00:24]

Djöfull verður þú feitur með þessu áframhaldi

[Þorsteinn Briem, 21.9.2008 kl. 00:32]

Langbest er greinilega langverst.

Var styttan af Leirfinni uppivið?

Þú varst heppinn að drekka ekki gosið. Annars værirðu örugglega dauður.

[Helga Guðrún Eiríksdóttir, 21.9.2008 kl. 01:35]

Eitt sinn fékk ég sæmilega borgað fyrir svona skrif. Vona að þú fáir eitthvað fyrir þinn snúðsa líka, dúllsi minn.

[Jens Guð, 21.9.2008 kl. 02:11]

  Ómar,  ég held ekki heimili og nenni ekki að elda fyrir mig einan.  Í flest mál borða ég á BSÍ eða Múlakaffi.  Inn á milli rúlla ég og kútveltist inn á önnur veitingahús. 

  Um daginn bloggaði ég fyrir rælni um heimsókn á Pítuna.  Þá uppgötvaði ég óvænt að í kunningjahópnum eru margir matgæðingar sem höfðu gagn og gaman af að lesa bloggfærsluna.  Sumir til samanburðar við eigin reynslu.  Aðrir fögnuðu ábendingu um eitthvað sem þeir ættu að prófa.

  Í fjölskyldu minni eru að auki margir áhugasamir kokkar.  Þrjú systkini mín hafa starfað sem kokkar.  Þar af ein systir mín hámenntuð í matreiðslu af ýmsu tagi og rekur morgunverðarstað.  Einn mágur minn er sömuleiðis lærður matreiðslumaður og fyrrverandi mágur minn er kokkur.  Enn einn mágur minn er með matsölu í bensínsjoppu sem hann rekur.  Afi minn og amma ráku líka matsölu.  Þannig mætti lengi lengi telja.  

  Sjálfur er ég fyrst og síðast bara viðskiptavinur matsölustaða.  Hef enga bakgrunnsþekkingu á matreiðslu.  Enda er ég ekki að blogga um annað en það sem snýr beint að mér sem óbreyttum neytanda - án þess að fara út í tæknilegu atriðin.  Þau koma mér ekkert við. 

  Viðbrögðin við þessum bloggfærslum mínum um veitingahús hafa verið það góð að ég hef færst í aukana.  Mér þykir gaman að skrifa um mat og ennþá skemmtilegra þykir mér að fólki þyki gaman að lesa þau skrif.

  Ég fitna ekki af matnum sem ég borða.  Aftur á móti er ég á fullu í að reyna að koma mér upp bjórístru.  Það gengur vel.  Og ég stend betur af mér rok þegar bjórístran veitir viðnám.

  Steini,  ég sá ekki styttuna af Leirfinni.

[Þorsteinn Briem, 21.9.2008 kl. 02:31]

Það er nú gott að þú ert ekki breyttur neytandi, Jensinn minn. Bara óbreyttur neytandi. So far, anyways.

Hvar á þessi morgunverðarstaður systur þinnar sér stað?

[Jens Guð, 21.9.2008 kl. 02:35]

  Helga Guðrún,  minn kæri sveitungi og hálfbannaði moggabloggari,  ég fer slippur og snauður frá þessum skrifum.  Reyndar var mér fyrir tveimur dögum boðið á matsölustað gegn því að blogga um veitingarnar en ég afþakkaði boðið.  Ég tek þó fram að boðið var sett fram í hálfkæringi í léttu spjalli um viðskipti sem snéru að öðru.  Mitt svar var það að ég ætli einungis að blogga um veitingar sem ég kaupi sjálfur eins og hver annar ókunnugur viðskiptavinur og fólkið sem afgreiði matinn hafi ekki hugmynd um að ég muni skrifa um hann. 

[Jens Guð, 21.9.2008 kl. 03:05]

  Steini,  systir mín er með morgunverðarstað í Gautaborg í Svíþjóð.

[Jens Guð, 21.9.2008 kl. 03:19]

  Og Steini,  af því að þú þekkir til þá rekur Kristján Þorsteinsson,  mágur minn frá Uppsölum,  Olís-stöðina á Dalvík. 

[Þorsteinn Briem, 21.9.2008 kl. 09:59]

Sómafólk, allt það fólk. Mér líst vel á þetta allt saman hjá þér, Jensinn minn.

Þeir neyðast hins vegar til að loka stöðunum eftir að ég fjalla um þá. Þó dreg ég mjög úr öllum lýsingum.

[Linda Linnet Hilmarsdóttir, 21.9.2008 kl. 16:30]

Knús á þig elsku vinur og bestu kveðjur inn í nýja viku

[Auður Ösp (IP-tala skráð) 21.9.2008 kl. 16:44]

Takk fyrir að hjálpa mér með því að klikka á þennan link:

[Auður Ösp (IP-tala skráð) 21.9.2008 kl. 16:45]

Kannski betra ef linkurinn fylgir:

 http://tjarnargotupesinn.wordpress.com/2008/09/21/takk-fyrir-a%C3%B0-lesa-%C3%BEetta/