7.9.2009 | 22:38

Hugljúf og örstutt saga af miðaldra manni

áð í fjallgöngu

  Líf Palla var eins og tilvera uppvaknings.  Hann þurfti ekki að hugsa.  Þess vegna sleppti hann því.  Á hverjum degi endurtók hann án hugsunar sömu hluti og hann hafði áður gert í áratugi.  Hann vaknaði á morgnana,  fékk sér kókópöffs á meðan hann renndi í gegnum Fréttablaðið.  Um leið og hann lagði frá sér blaðið var hann búinn að gleyma hvað stóð í því.  Svo var mætt í vinnuna.  Þar stóð Palli við færibandið og endurtók sömu handtökin allan daginn.  Á kvöldin sofnaði Palli yfir heimskulegum þáttum á Skjá 1 sem eru alveg eins og allir hinir þættirnir.

  Um helgar lá Palli yfir myndum sem hann leigði í Skjábíói.  Margar þeirra hafði hann áður séð.  Það skipti ekki máli.  Hann mundi lítið eftir þeim. 
  Tilvera Palla breyttist í haust.  Einn úfinn mánudagsmorgun í miðri viku vaknaði Palli við að hann var orðinn skólataska í ritfangaverslun.  Honum þótti það kjánalegt og skammaðist sín dálítið.  Skömmu síðar kom menntaskólastelpa og keypti töskuna.  Við vinkonur sínar sagði stelpan:  "Djöfull er þetta ljót og asnaleg taska.  Mig hefur alltaf langað að eiga virkilega ljóta tösku."  Palla sárnaði þessi orð.  Á móti kom upp í honum stolt yfir að seljast svona fljótt.  Hann fann til fyrirlitningar í garð skólataskanna sem voru óseldar í búðinni.  Hann sendi þeim tóninn í huganum:  "Þvílíkir lúserar.  Þið seljist sennilega ekki fyrr en á útsölu og þá fyrir einhverja smáaura."
  Síðan Palli var seldur hefur hann komið á marga staði sem hann hafði ekki áður komið á.  Hann hefur hitt miklu fleira fólk en áður.  Og það allra besta er að nú er stöðugt verið að troða í hann námsbókum.  Það hafði ekki tekist áður.   

skólataska1


Meginflokkur: Bækur | Aukaflokkar: Heilbrigðismál, Menning og listir, Spaugilegt | Breytt 8.9.2009 kl. 14:31 |

« Síðasta færsla | Næsta færsla »

Athugasemdir

1 identicon

Minnir svolítid á Hamskiptin.

Gjagg (IP-tala skráð) 7.9.2009 kl. 23:07

2 Smámynd: Jens Guð

  Gjagg,  hvað er það?  Ég kveiki ekki á perunni.  Þekki ekki þetta nafn  Hamskiptin.  Er ég að ómeðvitað að stela hugmynd?

Jens Guð, 7.9.2009 kl. 23:14

3 identicon

http://is.wikipedia.org/wiki/Hamskiptin

Gjagg (IP-tala skráð) 7.9.2009 kl. 23:25

4 Smámynd: Jens Guð

  Gjagg,  takk fyrir þessar upplýsingar.  Ég hef áreiðanlega heyrt um  Hamskiptin  án þess að vera meðvitaður um það.  Hugmyndin hjá mér var sú að búa til sögu sem héti  Maðurinn sem breyttist í skólatösku.  Þá var ég með í huga lokasetninguna um að viðkomandi hafi verið vakinn upp frá því að vera einskonar "zombie" og öðlast nýtt líf sem móttækilegur fyrir námsbókum.   Mér þótti hinsvegar upphaflegt nafn á sögunni upplýsa um of framvinduna og hætti við það.  Í aðra röndina er gaman að fleiri hafi verið fengið hliðstæða hugmynd um að láta söguhetjuna fá gjörólíkt hlutverk.   

Jens Guð, 8.9.2009 kl. 00:07

5 identicon

Vá! Maður fer í vímu við að lesa þessar sögur.  Er ekki bók á leiðinni?

Jóhannes (IP-tala skráð) 8.9.2009 kl. 00:29

6 Smámynd: Jens Guð

  Jóhannes,  reyndar er ég með tvö tilboð frá bókaforlögum um að eitthvað af bulli mínu komi út á bók.  Í öðru tilfellinu er þegar frágengið að kafli eftir mig mun koma út í bók í haust sem kallast  Íslenskar gamansögur.  Það er ófrágengið með hvað verður um annað.  Sjálfum þykir mér úrval smásagna og leikrita eftir mig ekki vera orðið nógu stórt til að gefa það skásta út á bók. 

Jens Guð, 8.9.2009 kl. 00:43

7 identicon

Hamskiptin eftir Franz Kafka er reyndar alveg mögnuð skáldsaga, sem kom út árið 1915. Þar varð sögupersónan að ómerkilegri pöddu, en þarna verður sögupersónan að skólatösku, sem fyllist af skólabókum og fróðleik. Öllu merkilegra hlutskipti það. Af því að Jens var nýlega að hneykslast á þeirri ómerkilegu, útvötnuðu músík sem Einar Bárðar býður upp á í Kannanum, þá sé ég á www.dv.is að Dr Ggunni er á alveg sama máli. Dr Gunni heldur því reyndar fram þar að músíkin á FM957 sé mun skemmtilegri en sú sem boðið er upp á í Kananum. Ég spyr: Hvenar hefur Einar Bárðar svo sem boðið upp á góða og skemmtilega tónlist ?  

Stefán (IP-tala skráð) 8.9.2009 kl. 08:48

8 Smámynd: Ásdís Sigurðardóttir

 Takk fyrir

Ásdís Sigurðardóttir, 8.9.2009 kl. 14:36

9 Smámynd: Guðni Þór Björnsson

Flott, mun lesa hinar síðar.....

Guðni Þór Björnsson, 9.9.2009 kl. 15:54

10 Smámynd: Jens Guð

  Stefán,  ég þekki engin dæmi þess að Einar Bárðar hafi boðið upp á annað en vonda músík.  En ég þekki hans feril samt ekki svo gjörla.

Jens Guð, 10.9.2009 kl. 00:01

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband