Almenningur styður mótmælendur

 

  Val hlustenda rásar 2 á söngvaranum,  gítarleikaranum,  söngvaskáldinu og leikstjóranum Herði Torfasyni sem manni ársins er vísbending um að almenningur á Íslandi styðji mótmælafundina sem Hörður hefur staðið fyrir.  Atkvæðin dreifðust yfir á 130 manns.  Hörður fékk 20% atkvæðanna.  Hann hefur alltaf hvatt til þess að mótmælin fari friðsamlega fram.

  Í öðru sæti var handboltalið sem líka mætti á útifund.  Þar var það blessað af forsetanum,  borgarstjóranum og ýmsum stjórnmálamönnum.  Þar á meðal menntamálaráðherra,  Þorgerði Katrínu Gunnarsdóttur.  Hún fékk 1 atkvæði í valinu á manni ársins.

  Næstir boltaköllunum í atkvæðamagni voru meðal annars Vilhjálmur Bjarnason, formaður Samtaka fjárfesta;  Björk Guðmundsdóttir og Ólafur F.  Magnússon,  fráfarandi borgarstjóri.   

.

.

Mótmælin áttu að vera friðsamleg

Gjöfulasta tímabil íslensku rokksögunnar - Úrslit í skoðanakönnun

  Að undanförnu hef ég haldið úti skoðanakönnun um besta og frjóasta tímabil íslensku rokksögunnar.  Röðin á tímabilunum hefur ekkert breyst frá því greidd atkvæði voru innan við 100.  Nú hafa 580 atkvæði skilað sér í hús og engin ástæða til að halda könnunni lengur í gangi.  Niðurstaðan er þessi:

 1.  Bubba-byltingin/Rokk í Reykjavík (Utangarðsmenn, Fræbbblarnir, Tappinn...) 32,2%

 2.  Hippatímabilið (Trúbrot, Náttúra, Eik...) 20,9%

 3.  Bítlatímabilið (Hljómar, Dátar, Óðmenn...) 18,4%

 4.  Upphafsárin á sjötta áratugnum (KK, Siggi Johnny, Þorsteinn Eggerts, Raggi Bjarna...) 14,8%

 5.  Harðkjarninn (Mínus, Bisund, I Adapt,  Gyllinæð...) 5,2%

 6.  Gruggið (Botnleðja, Noise...) 4,8%

 7.  Rappið (Rottweiler, Quarashi, Sesar A...) 3,6%

  Þarna var ekki verið að velja hljómsveitirnar sem slíkar heldur tímabilið.  Nöfn hljómsveitanna eru einungis höfð með til að auðvelda kjósendum að staðsetja tímabilið.  Gaman væri að heyra viðhorf ykkar til útkomunnar.

  Næst set ég inn skoðanakönnun um besta íslenska jólalagið.  Þið ykkar sem hafið ekki þegar komið með tillögu um besta jólalagið megið endilega nefna uppáhalds jólalagið ykkar.  Lagið verður að vera íslenskt.  Lög úr nýafstaðinni jólalagakeppni rásar 2 eru ekki gjaldgeng.

Bestu plötur ársins 2008

  Fréttablaðið fékk nokkra tónlistarmenn og áhugafólk um tónlist til að velja bestu íslenskar plötur ársins 2008.  Útkoman er verulega áhugaverð.  Ekki síst vegna þess að nokkrar íslenskar plötur sem komu út á árinu eru jafnframt áberandi í áramótauppgjöri helstu tónlistarblaða heims.  Samkvæmt niðurstöðu Fréttablaðsins eru eftirfarandi plötur þær bestu sem komu út hérlendis 2008:

1.   Sigur Rós:  Með suð í eyrum við spilum endalaust

2.   FM Belfast:  How to make Friends

3.   Dr.  Spock:  Falcon Christ

4.   Lay Low:  Farewell Good Night´s Sleep

5.   Mammút:  Karkari

6.  Sin Fan Bous:  Clangour

7.  Emilíana Torríni:  Me and Amini

8.  Retro Stefson:  Montana

9. - 10.  Celstine:  At the Borders of Arcadia

9. - 10.  Reykjavík!:  The Blood 

11.  Bang Gang:  Ghosts from the Past

12. - 13.  Bragi Valdimar & Memfismafían:  Gilligill

12. - 13.  Jeff Who?:  Jeff Who?

14.  Morðingjarnir:  Áfram Ísland!

15. - 17.  Bob Justman:  Happiness and Woe

15. - 17.  Motion Boys:  Hang on

15. - 17.  The Viking Giant Show:  The Lost Garden of the Hooligans

  Gaman væri að hlera viðhorf ykkar til bestu platna ársins 2008.  Ég var einn af álitsgjöfum Fréttablaðsins og er afar sáttur við niðurstöðuna.  Hún er mjög svo til samræmis við mína skoðun á bestu plötunum.  Ég veit ekki alveg hvernig á að meta eða taka því að ég er lang elstur álitsgjafanna.  Kominn vel á sextugsaldur á meðan hinir álitsgjafarnir eru nýlegar fermdir krakkar.  En samt gaman að fá að vera með. 

  Ég kvitta glaður undir allar plöturnar í 10 efstu sætunum.  Ég ætlaði að hafa plötu Celestine á mínum lista.  En klúðraði því.  Ég hef grun um að platan hafi ekki verið í Plötutíðindum þannig að mér yfirsjást hún þegar á reyndi.  Þeim mun meira gaman er að hún skuli hafa náð inn á Topp 10.  Frábær hljómsveit og frábær plata.

  Plata Dr.  Spock var í 1.  sæti hjá mér og plata Sigur Rósar nr.  2.  Spockararnir eru yndislega hressilegir og pönkaðir rokkarar.  Ég er mikill Sigur Rósar aðdáandi en fyrir minn smekk poppaðist hljómsveitin um 1 gráðu með nýju plötunni.  Samt ekki um of.  Stórkostleg hljómsveit á heimsmælikvarða.  Og platan er hjá mér inni á Topp 5 lista yfir bestu plötur heims ársins 2008.

  Í DV í dag var birtur listi yfir bestu plöturnar 2008. Hann var skemmtilega samhljóða listanum í Fréttablaðinu.  Ég hlakka til að sjá lista Morgunblaðsins yfir bestu plöturnar.  Mér segir svo hugur að hann verði sömuleiðis til samræmis við lista Fréttablaðsins.

Maður ársins á Útvarpi Sögu

  Undanfarna daga hefur staðið yfir á Útvarpi Sögu áköf leit að manni ársins.  Rétt í þessu var Arnþrúður Karlsdóttir,  útvarpsstjóri Útvarps Sögu,  að tilkynna niðurstöðuna.  Valið á manni ársins kemur manni ekki í opna skjöldu.  Í fyrra margvaraði hann við bankakreppunni og lýsti þá ítrekað yfir þeirri atburðarrás sem nú hefur átt sér stað.  Stjórnvöld hefðu betur hlustað á viðvaranir Þorvaldar Gylfasonar,  mann ársins samkvæmt vali Útvarps Sögu.

Ólafur F. Magnússon - maður ársins á rás 2

  Á rás 2 stendur nú yfir leit að manni ársins 2008.  Hlustendur hringja inn og greiða atkvæði.  Gríðarlega öflug stemmning er fyrir því að Ólafur F.  Magnússon,  fráfarandi borgarstjóri,  verði kosinn maður ársins.  Stuðningurinn við að Ólafur F.  verði maður ársins er algjörlega þverpólitískur.  Fólk - meira að segja hátt sett - úr öllum flokkum vill á þennan hátt þakka Ólafi F.  fyrir staðfestu og seiglu við að standa vörð um flugvöllinn í Vatnsmýri.  Sömuleiðis fyrir skelegga vörn hans gegn því að hin ágæta sorphirða Reykjavíkur færi í rugl. 

  Þeir sem kjósa Ólaf F.  Magnússon mann ársins 2008 þurfa að hringja í síma 5687123.  Aðrir geta hringt eitthvað annað.  Til dæmis í 0001234.  Eða bara eitthvað.

Flottasti söngvari heims átti flottasta afmæli heims

  Írsk-ættaði Lundúnarbúinn, þjóðlagapönkssöngvarinn, söngvasmiðurinn og banjóleikarinn Shane MacGowan átti afmæli í fyrradag.  Að óreyndu hélt ég að íslensku dagblöðin myndu gera kauða góð skil á afmælisdaginn.  En það var öðru nær.  Þau komu ekki einu sinni út.  Það kemur því í minn hlut að heiðra afmælisbarnið.  Það er ekki á hverjum degi sem Shane MacGowan verður 51.  árs.

  Shane er best þekktur sem söngvari þjóðlagapönkssveitarinnar The Pogues.  Í aðdraganda jólanna varð ég var við að margir bloggarar settu inn á blogg sitt jólalagið  The Fairytale of New York  með The Pogues.  Höfundur þess er Shane MacGowan.  Þetta lag hefur verið krákað (coverað) með íslenskum texta af Fálkum,  Ragnheiði Gröndal og Sigurður Guðmundssyni.  Ég er ekkert að setja það lag inn hér heldur smá bút af viðtali sem Shane ætlaði að veita finnskum sjónvarpsmanni eftir vel heppnaða hljómleika.  Eins og algengt er með slík viðtöl brast Shane á með söng.  Tönnum hefur fækkað til muna í gómum Shanes síðan þessi upptaka átti sér stað.

   Hér flytja Shane og The Pogues lagið  Dirty Old Town.  Þrátt fyrir að þetta lag megi finna á flestum plötum merktum vinsælustu írsku pöbbasöngvum er höfundur þess skoskur.  Hann hét Ewan McColl og er þekktastur sem höfundur lagsins The First Time Ever I Saw Your Face.  Bandaríska söngkonan Roberta Flack kom því á topp bandaríska vinsældalistans fyrir margt löngu.  Ótal margir aðrir hafa sungið það inn á plötur.  Meðal annars Elvis Presley og George Michael.  Lagið samdi Ewan um bandaríska eiginkonu sína,  Peggy Seeger.  Bróðir hennar,  Pete Seeger,  er einn merkasti söngvahöfundur Bandaríkjanna.  Meðal þekktra laga eftir hann má nefna  Where Have All the Flowers Gone (Kingston Trio og flutt með íslenskum texta af Ragnari Bjarnasyni,  Elly Vilhjálms,  Savanna Tríói og pönksveitinni Mosa frænda),  Turn,  Turn,  Turn  (The Byrds) og  We Shall Overcome  (Joan Baez,  Louis Armstrong og kántrýpönkssveitin Green on Red).

  Dóttir Ewans,  Kirsty McColl,  tók iðulega lagið með The Pogues,  bæði á hljómleikum og á plötum.  Hún söng m.a.  í laginu  Fairytale of New York.  Hún syngur einnig í myndbandinu hér að neðan.

  Joe Strummer,  söngvari og gítarleikari The Clash,  gekk í The Pogues eftir að Shane MacGowan datt blindfullur út um bílglugga um árið.  Hljómsveitin var í miðju hljómleikaferðalagi en Shane lenti rúmfastur á sjúkrahúsi.  Hann var rekinn tímabundið úr hljómsveitinni.

  Joe hafði oft spilað með The Pogues fyrir þennan atburð,  kunni öll lögin og átti létt með að leysa Shane af.  Í myndbandinu hér að neðan sést Joe vinda sér með í leikinn.

  Í upphafi bresku pönkbylgjunnar þakti stór ljósmynd af blóðugum Shane forsíðu poppblaðsins NME.  Hún var tekin á einum af fyrstu hljómleikum The Clash.  Þar hafði annað eyrað af Shane rifnað hraustlega í fjörinu í áhorfendaskaranum. 

  Joe,  Kirsty og Ewan McColl eru öll fallin frá.  Shane er hinsvegar sprelllifandi og sprækur - þó hann deyi oft og iðulega áfengisdauða. 

Skemmtileg eldamennska fyrir stórfjölskylduna

  Hvað er skemmtilegra um jól og áramót en að stórfjölskyldan komi saman og allur hópurinn skipti með sér verkum við að elda einiberjakryddað lúxus lambalæri?  Einn,  til að mynda aðal töffarinn í hópnum,  hefur leik á því að versla með tilþrifum og þokkalegum stæl eins og eitt stykki af einiberjakrydduðu lambalæri.  Einhver annar sviðsetur fjörlegan leik við að finna á umbúðum þyngd lærisins.  Þriðja manneskjan þarf að kunna á vasareikni,  vinsælustu fermingargjöf áttunda áratugarins. 

  Viðkomandi slær inn á vasareikninn þyngd lærisins og margfaldarann x 44 mínútur á hvert kíló.  Útkoman úr því dæmi sýnir hvað lærið þarf lengi að malla í skúffu eldavélarinnar.

  Á meðan skenkir fjórða manneskjan heimilisfólkinu og gestum rauðvín.  Fimmta manneskjan laumar - svo lítið ber á - skotum af Jameson viskýi (má einnig vera Jack Daniels) á liðið.  Sjötta manneskjan þarf að vera í jólasveinabúningi og dreifir jólabjór og syngja:  "Hó, hó hó!" (nema fólk sé statt í Ástralíu.  Þar er bannað með lögum að segja:  "Hó,  hó,  hó!".  Ástæðan er sú að í enskuframburði Ástrala er ekki munur á orðinu hóra og "Hó").  Í bakgrunni er heppilegast að hafa plötuna  Never Mind the Bollocks  með Sex Pistols.  Það er best að hafa hana á rúmlega meðalstyrk.  Til tilbreytingar má líka spila plötur með Fræbbblunum.

  Það skerpir á stemmningunni að att sé keppni í loftgítar.

  Á meðan lærið mallar kemur vel út að smjörsteikja niðurskornar kartöflur (eða epli,  eins og Færeyingar kalla kartöflur) og sjóða blandað grænmeti svo snöggt að sú eldamennska líkist töfrabrögðum - með tilheyrandi handahreyfingum galdrakarls. 

  Ef einhver er nógu edrú til að treysta sér í að útbúa sósu þá er uppskriftin þannig:

6 dl. kjötsoð (soð úr skúffunni, vatn og kjötkraftur)
5-6 einiber
1 tsk steinselja
2 dl rjómi
1 msk   hunang
Salt og pipar

Setjið kjötsoð, einiber og steinselju saman í pott og sjóðið í 8 mín. Bætið í rjóma og hunangi og bragðbætið með salt og pipar. Þykkið sósuna með sósujafnara.  Syngið á meðan yfir pottinum "Jólamaðurinn kemur í kvöld" (sjá tónspilara).  Gætið að því að bera fram orðið "jólamaðurinn" sem "jólameavurinn".

Öðruvísi útgáfa af Jólamanninum með Geir Ólafs

 

  Í tónspilaranum hér til vinstri á bloggsíðunni er að finna flutning Geirs Ólafs og mín á laginu  Jólamaðurinn kemur í kvöld  við undirleik stórsveitar Vilhjálms Guðjónssonar.  Lag sem Geir Ólafs söng með færeyskum texta nú fyrir jólin og færði Færeyingum að gjöf sem þakklætisvott fyrir að Færeyingar lánuðu Íslendingum 6 milljarða króna í erlendum gjaldeyri eftir að íslenska krónan ónýttist.

  Upptakan á laginu í tónspilaranum er úr beinni útsendingu síðasta laugardag í þætti Halldórs E.  og Markúsar Þórhallssonar,  Í vikulokin,  á Útvarpi Sögu.  Eins og heyra má kunni ég hvorki lag né texta.  Sem gamall pönkari lét ég slag standa þegar á mig var skorað.  Málið var að gera fremur en  þekkja verkefnið.  Þetta var óæft og falskt eftir því.  Mig munar aldrei neitt um að gera mig að fífli - við hvaða tækifæri sem er.  Enda þaulvanur slíku.  Geir var á hinn bóginn á heimavelli og syngur með stæl,  eins og alltaf.

Af hverju er jólakveðja Friðar 2000 skreytt merki Mercedes Benz?

  Jólakveðja samtaka sem kenna sig við friðinn er ríkti árið 2000 (Peace 2000) vekur undrun.  Eins og sjá má hér fyrir ofan er jólakveðjan skreytt ljósmynd af logandi kertum sem mynda merki þýsku bíltegundarinnar Mercedes Benz.  Mercedes Benz bílar eru ekki friðsamir.  Einn vinur minn átti Mercedes Benz.  Sá bíll var stöðugt að efna til ófriðar.  Hann ýtti við öðrum bílum,  nuddaði sér utan í þá og var mjög ögrandi í alla staði.  Að lokum brunaði hann fram af bryggju í Nauthólsvík og mölbrotnaði þar í stórgrýti.  Flestum þótti það mátulegt á kvikindið.      

Upphaf bresku pönkbylgjunnar VI

  Fátt er betra á jólum en smá pönk.  Í færslunni um fyrsta breska pönklagið kom fram að í Bandaríkjunum var til pönkhreyfing fyrir daga breska pönksins.  Þar var ekki um heiti á músíkstíl að ræða heldur samheiti yfir ólíkar hljómsveitir sem spiluðu á þáverandi djassklúbbi í New York,  CBGB´s.  Svo skemmtilega vildi til að ein þessara hljómsveita,  The Ramones,  smellpassaði inn í þann músíkstíl sem varð til í Bretlandi 1976 og hlaut heitið pönk.  Eftir það varð breska skilgreiningin á pönki ofan á í heimsbyggðinni.  Líka í Bandaríkjunum.   

  Það ruglaði margan góðan manninn,  ekki síst margan góðan pönkarann,  að framan af var í Bandaríkjunum pönkhreyfing sem náði yfir hljómsveitir sem gátu engan veginn fallið undir bresku skilgreininguna á pönki.  Sumir eiga jafnvel enn í dag erfitt með að skilja það dæmi.  Sú er ástæðan fyrir því að ég tíunda þetta núna aftur.  En einnig geri ég það vegna þess að The Ramones blandaðist svona vel inn í breska pönkið.  Fyrsta plata The Ramones,  samnefnd hljómsveitinni,  kom út sumarið 1976.  Sú plata og nokkrar smáskífur sem hljómsveitin sendi frá sér náðu á þeim tíma ekki að gera neinn skurk.  Í mars 1977 kom hinsvegar út plata með The Ramones,   Leave Home,  sem náði í 45.  sæti breska vinsældalistans.  Að vísu var vandræðagangur með þá plötu.  Eitt lagið,  Carbone Not Glue,  þótti hvetja til vímuefnaneyslu og var þá fjarlægt af plötunni.  Hér eru tvö lög af plötunni:  Babysitter  (efra myndbandið) og  California Sun.

Fyrri færslur um upphaf bresku pönkbylgjuna:

V:   http://www.jensgud.blog.is/blog/jensgud/entry/750862/

IV:  http://jensgud.blog.is/blog/jensgud/entry/747161

III:  http://www.jensgud.blog.is/blog/jensgud/entry/746033/

II:  http://jensgud.blog.is/blog/jensgud/entry/744949

Fyrsta breska pönklagið:  http://www.jensgud.blog.is/blog/jensgud/entry/743999/

  Bandaríska ljóðskáldið - og síðar Íslandsvinurinn - Patti Smith var oft kölluð pönkdrottningin.  Það var út frá upphaflegri skilgreiningu í Bandaríkjunum á pönki.  Músík Pattíar var strax í upphafi og alla tíð síðar frekar róleg músík.  Ljóð hennar og/eða textar voru óheflaðir - jafnvel kjaftforir - og nýstárlegir.  Þeir lönduðu strax hlutverki í bandarískum skólaljóðum og voru sungnir inn á plötu hjá hinum sérstæða róttæka últra-hægri sinnaða bandaríska þungarokkara Todd Rundgren og plötur bandarísku þungarokkssveitarinnar Blue Oyster Cult.  Samkvæmt þáverandi skilgreiningu bandarískra fjölmiðla féll sú hljómsveit einnig undir pönk.  Framan af flutti Patti ljóð sín við píanóundirleik Bobs Dylans en stofnaði svo Patti Smith Group með hljóðfæraleikurum sem einnig spiluðu í Blondie og Television. 

  Fyrsta plata Pattiar Smith,  Horses,  kom út 1975.  Hún náði 47.  sæti bandaríska vinsældalistans.  Síðar náði Patti 5.  sæti breska vinsældalistans með laginu  Because the Night.  Það fór í 13.  sæti bandaríska vinsældalistans.  Þetta lag samdi hún með Bruce Springsteen.  Hún kom fleiri plötum inn á Topp 20 vinsældalista Bandaríkjanna og Bretlands. 

  Í mars 1976 sendi Patti frá sér smáskífuna  Gloria/My Generation.  Hér flytur hún síðarnefnda lagið.  Það örlar á Gyllinæðar-stemmningu.  Nema að engin kveikti í sér og fáum hljóðfærum var slátrað:

Bert ein lítil jólaheilsan

  

  Eg vil nýta hetta høvið at ynskja øllum mínum kæru, ætt, vinum, kenningum og lesarum á sjógvi og landi eini gleðilig og hugnalig jól. Og eitt gott nýggjár og takk fyri tað brátt farna.

Kærar heilsanir.

Hamborgarhryggur

Algjör lúxusútgáfa af sígildum rétti.  Hentar best á aðfangadagskvöldi en næst best á öðrum jóladögum.  Það verður enginn hryggur sem fær lúxusútgáfu af hamborgarhrygg um jól og áramót.

1 stk	Hamborgarhryggur
2 l	Rammíslenskt kranavatn
4 flöskur	Rauðvín
1 stk	Laukur
1 stk	Sellerístilkur
10 stk	Svört piparkorn
4 stk	Negulnaglar

• Setjið hamborgarhrygginn í vatn ásamt 2 dl af rauðvíni, gróft söxuðu grænmeti, pipar og negul. Látið suðu koma rólega upp og sjóðið við vægan hita í 38 mín.  Sötrið 2 - 3 glös af rauðvíni á meðan.
• Takið hrygginn úr soðinu, látið kólna í 22 mín og sötrið 1 - 2 glös af rauðvíni á meðan.

Hunangsgljái

2 msk	Sætt sinnep
2 msk	Hunang
2 msk	Púðursykur
1 msk	Edik

• Blandið hráefnunum í hunangsgljáann og penslið hrygginn með honum. Setjið í 180°C heitan ofn í 16 mín.  Sötrið 1 glas af rauðvíni á meðan.
• Berið fram með rauðvínssósu, brúnuðum kartöflum, rauðkáli og rauðvíni.

Rauðvínssósa

7 dl	Soð úr potti
40 g	Hveiti
40 g	Smjörlíki
1 dl	Rauðvín
1 msk	Rauðvínsedik
1 msk	Rifsberjahlaup
1 dl	Rjómi

Svínakjötskraftur

• Fleytið og sigtið soðið. Látið suðuna koma upp.
• Lagið smjörbollu úr smjörlíki og hveiti. Hrærið soðið rólega út í.
• Bætið út í rauðvíni, ediki, rjóma og hlaupi. Látið sjóða í nokkrar mín.
• Bragðbætið með svínakjötskrafti ef þurfa þykir.
• Sötrið rauðvín af yfirvegun á meðan sósan er löguð og á meðan veislunnar er neytt en af áfergju eftir það.

Lausn á getraun

 

  Ekki í síðustu færslu heldur þeirri næstu á undan birti ég ljósmynd af torkennilegu fyrirbæri.  Það líktist dálítið flötum eða eins og teygðum kolsvörtum broskalli með skærbláan munn og augu.  Það skrítna var að fyrirbærið sást úti í skógi.  Kíkið á þessa mynd áður en þið flettið upp á hlekk sem Óskar Þorkelsson setti inn sem svar og sýnir einmitt svarið á skemmtilegan hátt: http://www.metacafe.com/watch/314370/crazy_birds_island_p/

Þetta eru jólabækurnar sem ég mæli með

  Fátt er skemmtilegra og meira við hæfi um jól en næra andann með lestri ljúfra bóka.  Ég er þegar búinn að lesa nokkrar bækur nú á litlu jólunum.  Mér er ljúft og skylt að miðla af minni reynslu.  Með gleði í hjarta get ég mælt með eftirfarandi bókum sem áhugaverðum og ánægjulegum.  Tekið skal fram að myndastærðin af kápum bókanna hefur ekkert með annað að gera en í hvaða stærð ég á þær tiltækar.

  Í  Gullstokkur gamlingjans  rekur Vilhjálmur Hjálmarsson hugljúfar og margar skondnar æskuminningar úr Mjóafirði.  Sjá nánar:  http://www.jensgud.blog.is/blog/jensgud/entry/713864/

  Sá einhverfi og við hin  eftir Jónu Á.  Gísladóttur er safn notalegra frásagna af einhverfum syni hennar.  Sjá: http://jensgud.blog.is/blog/jensgud/entry/736914

 

  Töfrum líkast - Saga Baldurs Brjánssonar töframanns  er skráð af Gunnari Kr.  Sigurjónssyni.  Baldur var og er fremsti töframaður Íslands.  Sjá:  http://jensgud.blog.is/blog/jensgud/entry/732693

  Tabú - Ævisaga Harðar Torfa  segir frá mannréttindafrömuðinum,  baráttumanninum,  tónlistarmanninum,  leikaranum og leikstjóranum sem breytti og er enn að breyta gangi sögunnar.  Skrásetjari er Ævar Örn Jósepsson.  Sjá:  http://www.jensgud.blog.is/blog/jensgud/entry/729597/

  Ég hef nú sjaldan verið algild - Ævisaga Önnu á Hesteyri  er skemmtilegasta bók sem ég hef lesið til margra ára.  Sjá:  http://jensgud.blog.is/blog/jensgud/entry/751586

  Eric Clapton - Sjálfsævisaga  á ekki mikið erindi til annarra en músíkdellufólks og aðdáenda Erics Claptons.  En þeir fá hér fyllri mynd af gítarsnillingnum sem er óvenju mikið þjakaður af allskonar "komplexum" og sálarflækjum.

 

Getraun

  Hvað er þetta svarta með bláa mynstrinu sem sést þarna til hliðar við fuglinn?  Spreytið ykkur.  Leyfið hugmyndafluginu að fara á flug.  Giskið ef þið vitið ekki betur.  Svar við gátunni verður birt síðdegis á morgun (þriðjudag).

Einn léttur

  Afi og amma sátu saman í stofusófanum.  Þau sögðu yfirleitt ekki neitt við hvort annað nema þegar þau þurftu að nöldra yfir einhverju.  Þess í stað sátu þau þegjandi og létu tímann líða.  Skyndilega slær amma afa utan undir með flötum lófa.  Afa er brugðið og horfir í forundran á ömmu.  Þegar hann hefur jafnað sig spyr hann:  "Hvað átti þetta að þýða?"

  Amma svarar ofur rólega:  "Þetta er fyrir að hafa aldrei veitt mér almennilegt kynlíf í öll þau 60 ár sem við höfum verið saman frá fermingaraldri.  Bara alltaf þetta sama lélegasta kynlíf í heimi."

  Afi þegir niðurlútur og skömmustulegur.  Að nokkrum tíma liðnum slær hann ömmu utan undir með flötum lófa.  Amma hrekkur við og spyr:  "Hvað er að þér maður?  Ertu orðinn vitlaus?  Hvað á þetta að þýða?"

  Afi svarar:  "Þetta er fyrir að þú skulir þekkja muninn."

Bókarumsögn

 - Titill:  Ég hef nú sjaldan verið algild - Ævisaga Önnu á Hesteyri

 - Höfundur:  Rannveig Þórhallsdóttir

 - Útgefandi:  Hólar bókaútgáfa

 - Einkunn: **** (af 5) 

  Faðir Önnu á Hesteyri og afi minn voru bræður.  Ég hef þekkt Önnu frá því ég fæddist.  Þessi frábæra kona verður áttræð á næsta ári.  Hún er einstakt náttúrubarn.  Hún hefur sterkar skoðanir sem sumar koma stundum skemmtilega á óvart.  Spjall við Önnu er ætíð uppspretta kátínu og gleði.  Eitthvað sem gaman er að segja öðrum frá.

  Í áratugi hafa ættingjar okkar Önnu skiptst á ævintýralegum sögum af henni.  Oft hefur þá verið nefnt að einhver verði að safna þessum sögum saman og gefa út á bók. 

  Í fyrravor er ég byrjaði að blogga hef ég rifjað upp nokkrar sögur af Önnu.  Það skiptir ekki máli hvort fólk þekkir Önnu eða ekki.  Sögurnar eru jafn skemmtilegar fyrir ókunnuga.

  Það var mikið fagnaðarefni þegar fréttist af því að Rannveig Þórhallsdóttir,  bókmenntafræðingur,  væri farin að skrásetja ævisögu Önnu.  Bók um Önnu gat ekki orðið annað en bráðskemmtileg.  Eina áhyggjuefni ættingjanna var að broslegar sögur af Önnu kæmu ekki almennilega til skila hvað þetta er merkileg manneskja.  Að þær myndu draga upp mynd af Önnu sem "fígúru" sem er hlegið að á kostnað þess að sögurnar séu afgreiddar þannig að hlegið sé með Önnu.

  Rannveigu hefur tekist virkilega vel að draga upp rétta mynd af Önnu.  Koma til skila hversu heilsteypt og áhugaverð þessi manneskja er.  Manneskja sem auðvelt er að bera mikla virðingu fyrir.  Um leið og bókin er sneisafull af sprenghlægilegum sögum.      

  Þegar ég fékk bókina í hendur fletti ég henni fram og til baka og greip niður í hana hér og þar.  Allsstaðar kom ég niður á mergjaðar smásögur.  Síðan las ég bókina í tvígang frá upphafi til enda.  Eftir það hef ég nokkrum sinnum haldið áfram að glugga í hana og rifja upp broslegar frásagnir.

  Þetta er bók sem fólk á að kaupa handa sjálfum sér til að komast í gott skap um jólin.  Og líka til að gleðja vini sína.  Bókin er í 5.  sæti yfir söluhæstu ævisögur.  Mér skilst að hálft sjötta þúsund eintaka af bókinni séu komin í dreyfingu.  Þar af séu um 5000 eintök seld.  Það þýðir að margir munu skemmta sér konunglega við lestur þessarar bókar um jólin um hið kostulega náttúrubarn,  Önnu á Hesteyri.  Ekki láta bókina framhjá þér fara.

Krúttlegar ljósmyndir

  Þessar sætu og hugljúfu ljósmyndir rifja upp þegar íslenska þjóðin tók bónusgrísinn í fóstur.  Hann var munaðarlaus.  Var hvorki úr ranni Kolkrabbans né SÍS.  Íslenska þjóðin fóstraði bónusgrísinn frá fyrsta degi og nærði hann við brjóst sér.  Hann var alltaf hreinn og strokinn.  Fóstran sá um að sleikja hann daglega hátt og lágt. 

  Nú er bónusgrísinn orðinn fullveðja og sér um sig sjálfur.  Eða þannig.  Það eru engar myndir af því.

Kalla á heildarendurskoðun á samkeppnisumhverfinu

Færeyski vinsældalistinn

  Það væri gaman að koma lagi með íslenskum flytjanda inn á færeyska vinsældalistann.  Í framhaldi af vangaveltum um það fór ég að skoða vinsældalistann og hvernig staðið er að atkvæðagreiðslu á honum.  Þá kom í ljós að mér tekst ekki að skrá nein lög í númeruð sæti heldur einungis aukalög. 

  Þið sem hafið þekkingu á tölvutækni:  Getur verið að hægt sé að "blokkera" þátttöku utan Færeyja í þessari atkvæðagreiðslu?  Eða tekst ykkur að skrá lög í númeruðu sætin?  Slóðin er http://www.kringvarp.fo/15bestu/atkvodur.asp

Upphaf bresku pönkbyltingarinnar V

  Framan af ferli Sex Pistols var hljómsveitin leitandi og breska pönkið var ekki orðið til.  Sex Pistols krákaði (coveraði) lög frá The Who,  Small Faces,  Chuck Berry og fleirum.  Iðulega hitaði Sex Pistols upp fyrir pöbbaband söngvarans og gítarleikarans Joes Strummers,  101´Ers.  Um miðjan maí 1976 var Sex Pistols hinsvegar búin að finna sinn tón og kom þannig fram á hljómleikum með tveimur öðrum - í dag - gleymdum hljómsveitum.

  Á þessum hljómleikum varð Joe Strummer fyrir vitrun.  Þarna var kominn sá tónn sem hann vildi fylgja.  Hann "slúttaði"  101´Ers og stofnaði The Clash.  Þessar tvær pönkhljómsveitir,  Sex Pistols og The Clash,  fylgdust að um tíma.  Fastir fylgihnettir voru The Damned og The Buzzcocks ásamt fleiri hljómsveitum sem slæddust með.

  Á auglýsingaveggspjöldum voru nöfn Sex Pistols og The Clash skrifuð jafn stórum stöfum.  Nöfn hinna hljómsveitanna voru skrifuð minni stöfum.  Er leið á árið 1977 varð The Clash stærra nafn.  Það var allt í vandæðagangi hjá Sex Pistols.  Illindi við plötufyrirtæki og annað í þeim dúr.

  Seinni part mars mánaðar sendi The Clash frá sér fyrstu smáskífuna,  White Riot.  17 dögum síðar kom út fyrsta stóra plata The Clash,  samnefnd hljómsveitinni.   White Riot  náði 38.  sæti breska vinsældalistans.  Sama sæti og smáskífa Sex Pistols,  Anarchy in UK,  áður. 

  Stóra platan með The Clash var ekki aðeins fyrsta breska pönkplatan til að ná inn á Topp 30 breska vinsældalistann heldur fór hún alla leið inn á Topp 15 og hafnaði þar í 12.  sæti.  Þar með var bresk pönkhljómsveit komin í hóp vinsælustu hljómsveita í Bretlandi.  Pönkið var ekki lengur neðanjarðarhreyfing og jaðarmúsík.  Pönkið var orðið það stórt dæmi að bresku plötubúðirnar kepptust við að stilla plötunni vinsælu með The Clash út í glugga,  útvarpsstöðvar komust ekki hjá því að spila lög af plötunni,  almenn poppblöð og slúðurblöð fjölluðu um The Clash,  rétt eins og rokkblöðin. 

  Ennþá merkilegra var að platan seldist í 100.000 eintökum í póstsendingum til Bandaríkjanna.  Hún er enn í dag sú plata sem selst hefur í hæstu upplagi á þann hátt. 

  The Clash tók mið af pönkstíl Sex Pistols en var þó með sterkan eigin stíl.  Takturinn í White Riot var hraðari en í pönki annarra hljómsveita þess tíma.  Til viðbótar kynnti The Clash til sögunnar nýjan músíkstíl:  Pönkað reggí. Eftir það varð reggí hluti af pönkinu.  Utangarðsmenn og Fræbbblarnir komu því bærilega til skila hérlendis.

   White Riot varð einskonar þjóðsöngur pönksveita.  Það lag var krákað (coverað) af Sham 69,  Angelic Upstarts og ótal öðrum pönksveitum.  The Clash flytja það í myndbandinu að ofan.  Í myndbandinu að neðan er sýnishorn af því hvernig hljómsveitin kynnti reggí-pönkið til sögunnar.

  Fyrri færslur um upphaf breska pönksins: 

IV:  http://jensgud.blog.is/blog/jensgud/entry/747161

III:  http://www.jensgud.blog.is/blog/jensgud/entry/746033/

II:  http://jensgud.blog.is/blog/jensgud/entry/744949

Fyrsta breska pönklagið:  http://www.jensgud.blog.is/blog/jensgud/entry/743999/