Veitingahús - umsögn

 

Veitingahús:  IKEA

Réttur:  Helgarsteik

Verð:  595 krónur

Einkunn: *** af 5

  Sænska húsgagnaverslunin IKEA í Garðabæ býður þessa dagana upp á svokallaða helgarsteik.  Það er Londonlamb með grænum baunum,  rauðkáli,  sósu og kartöflum.  Í auglýsingum er gefið upp að kartöflurnar séu brúnaðar (sykraðar).  Í dag voru kartöflurnar þó aðeins vatnssoðnar.

  Vegna óvildar breskra stjórnvalda í garð Íslendinga síðustu daga er ótækt að kenna léttreykt lambið við London.  Við skulum frekar kalla það Frelsislamb (freedom lamb) eða Nýja lambið (sbr.  Nýi Glitnir,  Nýi Landsbankinn,  Nýja Kaupþing,  Nýja fjósið á Hvanneyri...). 

  Verðið á þessum helgarmat er til fyrirmyndar.  Skammturinn er líka vel útilátinn:  3 sneiðar og meðlætið ekki skorið við nögl. 

  Á unglingsárum snemma á áttunda áratugnum vann ég í álverinu í Straumsvík.  Vatnsbragð einkenndi svo gott sem hverja máltíð þar.  Ágætur matur út af fyrir sig en einkenndist af vatnsbragði stórs vinnustaðamötuneytis.  Skorti á alúð við matreiðsluna. 

  Helgarsteikin í IKEA ber sömu einkenni.  Það hefði munað um auglýstu brúnuðu kartöflurnar í stað hinna vatnskenndu soðnu kartaflna.  Rabbbarasulta hefði sömuleiðis hjálpað til að skerpa aðeins á bragðinu.  Kjötið var hinsvegar alveg ljómandi gott.  Temmilega reykt,  blessunarlega lítið salt og vel þétt.

  Umhverfið skiptir mig ekki máli.  Ódúkuð borð,  opið rými og vinnustaðalegur hráleiki. 

  Gaman var að heyra á næsta borði þegar hjón/foreldrar stóðu upp frá borði ásamt á að giska 12 ára dóttir og sú stutta sagði:  "Takk fyrir mig."

  Verra þótti mér að heyra til manns sem kom þarna með tvær stelpur á aldrinum 5 - 6 ára.  Ég heyrði ekki hvað stelpurnar sögðu en maðurinn sagði:  "Nei,  þið eruð ekkert svangar.  Þið fenguð pylsur í bílnum í morgun.  Munið þið ekki?  Farið og leikið ykkur í bangsahorninu á meðan ég fæ mér að borða."  Ég hef grun um að stelpurnar hafi viljað fá sér eitthvað í svanginn en kallinn ekki tímt að splæsa á þær.

Aðrar umsagnir um veitingahús:

- Langbest

http://jensgud.blog.is/blog/jensgud/entry/648245

- Icelandic Fish & Chips 

http://jensgud.blog.is/blog/jensgud/entry/643187

- American Style

http://jensgud.blog.is/blog/jensgud/entry/630463

- Pítan

http://jensgud.blog.is/blog/jensgud/entry/590495

- Hrói höttur

 http://jensgud.blog.is/blog/jensgud/entry/641856

Athugasemdir

[Guðríður Hrefna Haraldsdóttir, 19.10.2008 kl. 23:23]

Líst vel á Frelsislamb, múahahahahah

[S. Lúther Gestsson, 19.10.2008 kl. 23:44]

Nú finnst mér krepan vera farin að gera vert við sig hjá Jens, farin að borða í Ikea.

[Steingrímur Helgason, 20.10.2008 kl. 00:22]

Frikkadillurnar hafa nú oftlega bjargða geðheilzu minni í IKEA ferð.

[Jóna Kolbrún Garðarsdóttir, 20.10.2008 kl. 00:42]

Frelsislamb! 

[Ómar Ingi, 20.10.2008 kl. 02:22]

Zorglúb Hafnarförður eða Garðabær ?

same shit diferent name

[Þorsteinn Briem, 20.10.2008 kl. 03:11]

Þetta er betra en í KEA.

[Linda Linnet Hilmarsdóttir, 20.10.2008 kl. 13:55]

Knús á þig elsku Jensinn minn

[Gylfi Björgvinsson, 20.10.2008 kl. 15:27]

"Frelsislamb"  hummm ... hljómar svolítð trúarlega Hvað heldur þú Jens að afa þínum  í Hjaltadalnum  hefði fundist um þessa nafngift?

[Jóhannes (IP-tala skráð) 20.10.2008 kl. 23:43]

Elegant.

[Jens Guð, 20.10.2008 kl. 23:57]

  Gurrí,  mér líka.

  Sigurður Lúther,  nú ríður á að hafa allar klær úti.  Reyndar vildi þannig til að ég átti erindi í IKEA.  Í leiðinni ætlaði ég að fá mér þar lax.  En rakst þá á þessa ágætu helgarsteik.

  Sigurður Helgi,  takk fyrir að leiðrétta staðsetninguna.  Ég ætla að laga hana í færslunni.

  Steingrímur,  já,  eru sænsku kjötbollurnar kallaðar frikkadillur eins og færeysku kjötbollurnar?

  Jóna,  mér datt þetta í hug með tilvísun í það þegar bandarískir veitingamenn fóru að kalla frönsku kartöflurnar Freedom Fries í kjölfar þess að Frakkar tóku ekki þátt í innrásinni í Írak.

  Ómar,  já,  er þetta ekki nokkurn veginn sama tóbakið?

  Steini,  það var nú oft góður matur í kjallaranum í KEA hótelinu.  Margur góður Akureyringurinn stóð lengi í þeirri trú að IKEA væri Í KEA.

  Linda mín,  knús á þig.

  Gylfi,  afi hafði andúð á "helvískum Tjöllunum".   Þegar ég ungur drengur fékk leikfang merkt "Made in England" varð afa að orði:  "Ekki spyr ég að.  Made in England er stærsta versksmiðja í heimi.  Hún framleiðir þvílíkt úrval af hinum ólíkustu tækjum og tólum."

  Jóhannes,  elegant.

[Þorsteinn Briem, 21.10.2008 kl. 00:47]

Jamm, oft hefur maður nú farið á Teríuna, Jensinn minn.