Breytir öllu í gull

  Fyrst var hann flautuleikari á Reyðarfirði.  Svo gítarleikari þungarokkshljómsveitarinnar Bisund(ar). Hún kom, sá og hreppti 2. sæti í Músíktilraunum 1999.  Bróðir hans,  Birkir Fjalar í Bisund,  var kosinn besti trommuleikari Músíktilrauna. Hann gerði síðar garðinn frægan með Stjörnukisa, Gleðisveitinni Döðlunum, I Adapt,  Hellvar(i) og Celestine.  

  Andri Freyr sló í gegn í útvarpsþættinum Karate á X-inu.  Hann trompaði það rækilega með þættinum "Freysa" á sömu stöð.  Það var svakalegur þáttur sem gekk út og suður yfir fínu línuna. Langt yfir. Var kærður þvers og kruss. Fékk á sig handrukkara,  vinslit og allskonar til viðbótar.  Hann lét allt vaða og fór yfir öll mörk.  

 Um svipað leyti var Andri Freyr gítarleikari Botnleðju.  Spilaði með þeirri hljómsveit út um allan heim,  meðal annars með Blur.  Hann var líka í hljómsveitinni frábæru Fidel.

  Mörgum kom á óvart þegar þessi hressi og kjaftfori þungarokkari var ráðinn sem morgunútvarpshani á Rás 2.  Það þótti djarft og bratt.  En morgunþáttur hans og Gunnu Dísar,  Virkir morgnar,  stal senunni.  Sá eða sú sem tók þá glannalegu ákvörðun að ráða þau í morgunþáttinn hitti beint í mark.

  Í framhjáhlaupi - eða kannski áður - man það ekki - fór hann á kostum með Ómari Ragnarssyni í dagskrárliðnum "Ómar og Andri á flandri" á Rás 2.  Líka kvöldþættinum "Litlu hafmeyjunni" með Dodda litla á Rás 2.  Þar talaði hann frá Danmörku. Síðar með vinsælum sjónvarpsþáttunum "Andri á flandri".  Þeir sjónvarpsþættir nutu mikilla vinsælda í norrænum sjónvarpsstöðvum.  Svo mjög að til að mynda í Noregi þá tæmdust götur á útsendingatíma þáttanna.  Snilldar þættir.

  Eðlilega hafa fjölmiðlafyrirtæki sótt í kappann og togast á um hann.  Framleiðslufyrirtækið Republik hefur nú ráðið hann sem yfirmann innlendrar dagskrárgerðar.  Spennandi verður að fylgjast með.  Allt sem hann snertir breytist í gull. 

    

Andri Freyr ráðinn til Republik

Útvarp Saga - vinsælasta útvarpsstöðin!

 

 

 

 

 

  Að undanförnu hefur lesendum  boðist að taka þátt í skoðanakönnun.  Þar er spurt:  "Hver er uppáhalds útvarpsstöðin þín?"  Takið eftir því að ekki er spurt um það á hvaða útvarpsstöð viðkomandi hlusti mest eða oftast.  Þetta þýðir til dæmis að taka að einhverjir geta haft mest dálæti á Rás 1 vegna tiltekinna dagskrárliða þar - en hlustað utan þeirra oftast á aðrar stöðvar.

  Núna hafa á þriðja þúsund atkvæða skilað sér í hús.  Niðurstaða lá reyndar fyrir strax eftir þátttöku 100 - 200 manns.  Það er að segja að röðin á útvarpsstöðvum hélst óbreytt þaðan í frá og fram á síðasta dag.

  Rétt og skylt er að taka fram að þátttakendurnir eru gestir bloggsíðunnar (en ekki þverskurður af þjóðfélaginu).  Ætla má að þeir séu að uppistöðu til komnir til vits og ára.  30+ í það minnsta.  Sennilega flestir um eða vel yfir miðjan aldur.  Músíkstöðvar sem gera út á barnaskap og gelgju komast vart á blað þar af leiðandi.

  Niðurstaðan er þessi (og sjá má einnig hér til vinstri á síðunni):

1  Útvarp Saga 27,4%

2  Rás 2 20,9%

3  X-ið 18,9%

4  Rás 1 17,3%

5  Bylgjan 6%

6  Vinyl 3,8%

7  Fm957 3,2%

8  Gullbylgjan 0,8%

9  Xtra 0,4%

10-11 Léttbylgjan 0,3%

10-11 Lindin 0,3% 

12-13 Flashback 0,2%

12-13 K100 0,2%

14-15 Kiss 0,1%

14-15 Retro 0,1%

Gargandi snilld! Allt á sama stað.

  Í stærri bæjarfélögum og borgum eru götur og hverfi skipulögð af yfirvöldum.  Sum hverfi eru skilgreind íbúðarhverfi.  Önnur iðnaðarhverfi.  Enn önnur verslunarhverfi.  og svo framvegis.  Í einhverjum tilfellum er þess gætt að atvinnusvæði séu blönduð.  Fjöldi veitingahúsa er takmarkaður ásamt fjölda hótela,  skemmtistaða,  verslana og íbúðarhúsa.

  Eðlilega leitar starfsemi á heppilegustu staðsetningu.  Einkar vel hefur tekist með það í Flatahrauni 5 í Hafnarfirði.  Í sama húsi eru hlið við hlið bjórkráin Ölstofa Hafnarfjarðar og Útfararstofa Hafnarfjarðar.  Hagkvæmara getur það ekki verið.  Í sama húsi er matsölustaðurinn Burger-inn.  Ekki nóg með það.  Þessi snilldar samsetning leiddi rökrétt til þess að Félag aldraðra í Hafnarfirði er flutt í næsta hús við hliðina,  Flatahraun 3.  

Magnaðar myndir

  Íþróttafólk og íþróttaáhorfendur koma oft einkennilega fyrir á ljósmynd.  Ja,  og reyndar bara yfirleitt.  Hér eru nokkur frábær skot frá Ólympíuleikunum í Ríó í Brasilíu.  Sjón er sögu ríkari. Smellið á myndirnar til að stækka þær.  Þannig eru þær MIKLU áhrifaríkari.  Betur sjá augu en eyru. 

 

 

Þetta er ekki toppurinn

Af hverju eru keppendur á Ólympíuleikunum með rauða bletti?

 

 

 

 

 

 

 

 

 

 

 

 

 

 

 

 

 

 

 

 

 

 

 

  Margir hafa tekið eftir því að bandarískir keppendur á Ólympíuleikunum í Ríó í Brasilíu eru með dökkrauða hringlaga bletti.  Sumir á öxlunum.  Aðrir á bakinu.  Þessu svipar til pepperóni á pizzu.  Hvað veldur?  Er þetta afleiðing neyslu tiltekinna örvandi efna?  Löglegra eða ólöglegra?  Hið rétta er að þetta er fylgifiskur kínverskrar aðferðar sem byggir á svokölluðum orkupunktum (acupuncture);  sömu punktum og kínverska nálastungan gengur út á.

  Þetta er þannig að glerkrukkum er komið fyrir á orkupunktunum.  Kveikt er á kerti á botni þeirra (sem snýr upp).  Við það myndast þrýstingur sem býr til sogblett á húðinni.  Þetta á að virkja og jafna orkuflæði líkamans.  Það er eins og við manninn mælt: Mestu vesalingar verða skyndilega þvílíkir orkuboltar að þeir vinna til verðlauna á Ólympíuleikunum.       

 

 

Allir að gefa henni illt auga

Trump vitnar í fróðan Færeying

 

 

 

 

 

 

 

  Kosningabaráttan um embætti forseta Bandaríkja Norður-Ameríku er í hæstu hæðum um þessar mundir.  Kjördagurinn er í nóvember.  Baráttan stendur á milli Hillary Clinton og Dóna Trumps.  Eitt framboðsefnið til viðbótar er þó að sækja í sig veðrið.  Sá heitir Gary Johnson.  Hann er frjálshyggjumaður og nýtur góðs af andúð margra á hinum frambjóðendunum.

  Nánustu ættingjar og venslafólk tekur virkan þátt í kosningabaráttunni.  Það þarf ekki að koma á óvart.  34ra ára dóttir Dóna,  Ivanka Trump, er ekki eftirbátur annarra á því sviði.  Hún styður pabba sinn.  Á heimasíðu hennar á netinu slær hún upp mynd af heillaráði Færeyingsins Hans Fróða Hansen.  Það er á ensku og hljómar svo:

  "People inspire you or they drain you. Pick them wisely."  

  Á íslensku getur það útlagst:  "Fólk veitir þér innblástur eða tærir þig.  Vandaðu valið."

  Vísdómsorðin merkir Trump með Tweet myllumerkinu #WiseWords from Hans F. Hansen. Surround yourself with inspiring people.

  Hversu þungt gullkornið frá Hans Fróða kemur til með að vega í kosningabaráttunni er óvíst.  Hugsanlega gerir það útslagið.

  Margir Íslendingar kannast við Hans Fróða.  Hann spilaði fótbolta hérlendis til margra ára í upphafi þessarar aldar.  Þar á meðal spilaði hann með Fram,  Breiðabliki og Víkingi.

 

Mögulega lögsóttur vegna FL-viðskipta

Rándýr athyglisþörf

  Ljúflingnum Dónaldi Trump,  frambjóðanda til embættis forseta Bandaríkja Norður-Ameríku, er margt til lista lagt.  Hann er laginn við að vekja á sér athygli.  Það er kostur fyrir manneskju sem þráir athygli meira en allt annað.  Hitt er verra;  að hann skortir viðskiptavit.  Eftir hann liggur löng slóð gjaldþrota fyrirtækja.  Fjöldamargir sem hafa unnið fyrir hann sitja eftir með sárt enni.  Jafnvel svo að þeir hafa sjálfir orðið gjaldþrota.

  Hann hefur þar fyrir utan svínað sem mest hann má á allflestum verktökum og öðrum sem hann á viðskipti við.  Það er honum skemmtilegur leikur að trampa sem rækilegast á þeim. 

  Dónald erfði ógrynni fjár eftir föður sinn.  Sá var óvandaður pappír en hafði það umfram forsetaframbjóðandann að kunna að ávaxta sitt pund.  Þegar hann féll frá var hann auðmaður á heimsvísu.  Framreiknað á núvirði hefur forsetaframbjóðandanum tekist að tapa um það bil helmingnum af föðurarfinum.  Það er lofsvert afrek.  Sér þar hvergi fyrir enda á.  

  Athyglissjúki forsetaframbjóðandinn hefur í kosningabaráttunni stórskaðað fyrirtæki sín fjárhagslega.  Með glannalegum yfirlýsingum,  ruddaskap og allskonar hefur hann fælt frá sér viðskiptavini í svo ríkum mæli að telur.  Tekjutapið er að meðaltali 1/7 á degi hverjum.  

  Fyrrum innanbúðarfólk Dónalds segir þetta vera þvert á áform hans.  Uppskriftin var sú að framboðið yrði Trumps-veldinu ódýr auglýsing.  Kallinn situr uppi með ranghugmyndir um markaðslögmálin.  Góðu fréttirnar eru þó þær að hann fær eitthvað af athyglinni sem hann þráir meir en allt annað.  Háar fjárupphæðir mega tapast í skiptum fyrir hana.

  Framan af var frjálshyggju- og tepokalið - ásamt Ku Klux Klan, Putin og Kim Jong-Un - hliðhollt framboði Trumps. Munaði þar nokkru um að hin knáa Sara Pálína lýsti yfir eindregnum stuðningi við kauða og áform hans um að einangra Bandaríkin;  múra þau inni með tollamúrum og steinsteyptum vegg.  Nú er öldin önnur.  Þekktir frjálshyggjufulltrúar snúa við honum baki.  Hérlendis hafa Hannes Hólmsteinn og Áslaug Arna fordæmt kallinn.  Meiri athygli vekur að bandaríski frjálshyggjupönkarinn Mojo Nixon sendir kaldar kveðjur.  Meint kynferðisbrot Trumps hafa einhver áhrif á viðhorf til hans.  Um þau má lesa H É R    

 

     

Baráttan bitnar á eignunum

Missti af Herjólfi

  Þeir kalla ekki allt og alla ömmu sína í Vestmannaeyjum.  Enda yrði það fljótlega ruglingslegt.  Vestamannaeyingar eru harðgerðir afkomendur víkinga og þræla.  Í gærkvöldi bar svo við að lögreglumaður Eyjanna missti - fyrir hlálegan misskilning - af fari með bátnum Herjólfi.  Hann gerði sér þá lítið fyrir og synti frá Eyjum til lands.  Lagði af stað laust fyrir miðnætti og náði landi við Landeyjahöfn um hálf sjö í morgun.   

  Þegar þangað var komið uppgötvaðist að hann hafði sparað sér 1320 króna fargjald.  

 

Synti 11 km leið frá Eyjum

Mjólkurþamb

  Fyrsta verk splunkunýrra, farsælla og ástsælla forsetahjóna,  Guðna Th. Jóhannessonar og Elizu Reid,  var að heimsækja Sólheima.  Þar er rekið vistheimili fyrir skemmtilegt fólk með allskonar þroskafrávik. Að óreyndu mátti ætla að með þessu væru forsetahjónin að votta vistmönnum virðingu sína.  Sem áreiðanlega var meiningin.  

  Þá bregður svo við að tvær þekktar fatlaðar konur fordæma heimsóknina.  Lýsa henni sem svo að vistmenn á Sólheimum séu gerðir að sýningargripum og blessun lögð yfir aðskilnað fatlaðra frá "heilbrigðum".  Sjónarmið út af fyrir sig.

  Í fréttum Stöðvar 2 var sagt frá heimsókninni.  Vistmaður var inntur eftir því hvernig honum lítist á nýju forsetahjónin. Svarið var þetta vel rímaða gullkorn: "Gott fólk sem drekkur mikla mjólk!"

  

Breytingar á Bessastöðum

Sítt að aftan

  Á níunda áratugnum blossaði upp tískufyrirbæri sem kallast "sítt að aftan".  Það var útþynnt afsprengi tónlistarfyrirbærisins "nýbylgju" (new wave) sem spratt upp úr bresku pönkbyltingunni.  Afsprengið gekk undir rangnefninu "ný-rómantík".  Hérlendis kallað "kuldarokk".  Þetta var léttvægt tölvupopp.  Ekki alltaf vont.  En oft.  Flytjendur iðulega stelpulegir strákar með andlitsfarða og blásið hár; sítt í hnakka en styttra að framan og um eyru.  Erlendis heitir það "mullet".

  Breski bítillinn Paul McCartney var frumherji "sítt að aftan" tískunnar á seinni hluta sjöunda áratugarins.  Landi hans,  David Bowie,  tók skrefið lengra.  Ýkti stílinn.  Eflaust voru "ný-rómanarnir" undir áhrifum frá Bowie án þess að ganga eins langt.

 

  Á tíunda áratugnum varð fjandinn laus.  Þá fór "sítt að aftan" eins og stormsveipur um suðurríki Bandaríkja Norður-Ameríku.  Rauðhálsarnir (red necks) kunnu sér hvergi hóf.  Kántrý-boltarnir fóru þar framarlega í flokki.  Það er góð skemmtun að fletta upp á ljósmyndum frá þessu tímabili.  

   

Frægðarljómi hryðjuverkamanna

  Þegar fólk er myrt í hryðjuverkaárás,  fjöldamorðum eða af raðmorðingja og borin eru kennsl á gerandann þá verður hann frægur.  Ljósmyndir af honum eru birtar í öllum fréttablöðum,  dag eftir dag.  Nafn hans er á allra vörum.  Í flestum tilfellum sýna ljósmyndirnar myndarlega manneskju.  Þetta sveipar óþokkann ævintýraljóma.  Hann er upphafinn á stall með ríka, fína og fræga fólkinu:  Poppstjörnum,  kvikmyndaleikurum,  konungsfjölskyldum,  forsetum og bankaræningjum.  Augljósast var þetta þegar söluhæsta músíkblað heims,  bandaríska Rolling Stone,  birti forsíðumynd af morðingjanum sem hlaut gælunafnið Boston-bombarinn.  Að öllu jöfnu prýða frægustu rokkstjörnurnar forsíðuna.

 

 

 

 

 

 

 

 

 

 

 

 

 

 

 

 

  Upphefð af þessu tagi sendir veiklunduðum vesalingum vond skilaboð.  

  Norski fjöldamorðinginn í Útey heillaðist af af væntanlegri frægð.  Hún kitlaði. Áður en hann myrti tugi ungmenna þá reyndi hann að laða fram sitt allra besta útlit og ljósmyndaði sig í ýmsum stellingum.  Þessar ljósmyndir hafði hann tilbúnar handa fjölmiðlum.  Alveg eins og hann vissi þá voru þetta myndirnar af honum sem fjölmiðlar heims slógu upp.  

  Þessu þarf að breyta.  Ef fjölmiðlar birta ljósmynd af vondu fólki þá eiga þeir að leita með hraði uppi ljótar myndir af því.  Helst myndir sem túlka illa innrætið.  Til dæmis má laða það fram með teiknimynd.

  Fjölmiðlar ættu jafnframt að forðast sem mest að hampa nafni óþokka. Þess í stað væri heppilegt að uppnefna kvikindið umsvifalaust;  tala um Úteyjar-illmennið og eitthvað svoleiðis.

    

Neita að jarða árásarmanninn

Hillary Clinton með geðröskun

  Samkvæmt frétt á mbl.is er fullyrt að Hillary Clinton,  forsetaframbjóðandi demókrata í Bandaríkjum Norður-Ameríku, sé með geðröskun.  Henni er lýst innhverfri.  Í málgagni bandarískra geðlækna 2010 er innhverfa skilgreind.  Meðal einkenna eru eftirfarandi:  

- Er stöðugt að tala við sjálfan sig

- Með lágan blóðþrýsting

- Sækir stíft í að sitja við borðenda.  Forðast eins og heitan eld að sitja fyrir miðju borði.

- Snillingur á einu sviði en vanmáttug á öllum öðrum sviðum 

- Gerir ekki neitt tímunum saman.  Situr bara og horfir út í loftið.

- Þolir ekki að spjalla um eitthvað sem skiptir engu máli

- Hefur ekki áhuga á að kynnast nýju fólki

- Er í sínum heimi þrátt fyrir að vera í mannfagnaði með vinum og ættingjum

- Þolir illa áreiti en tekur eftir allskonar smáatriðum sem fara framhjá öðrum

- Umhverfið skiptir engu máli.  Það bara er þarna.

 

Innhverf og með löngun til að þjóna

Heitt íste

  Ég kom við í kaffihúsi í miðbæ Reykjavíkur.  Þangað kom líka par sem talaði - að ég held - frönsku áður en það fór að skoða matseðilinn.  Svo pantaði það sér drykki í hálfgerðum tungumálaörðugleikum.  Strákurinn spurði á bjagaðri ensku hvort að hægt væri að fá heitt íste (Ice Tea).  Þetta hljómar eins og mótsögn.  Ég er ekki nógu mikill heimsborgari né vel að mér í tedrykkju til að átta mig á því hvort að tedrykkjufólk tekur almennt svona til orða.

 

Smásagan Veiðiferð. Bönnuð börnum!

  Hvað er betra í heiminum en að vera aleinn uppi í óbyggðum í heila viku;  með veiðistöng og nóg af köldum bjór?  Þetta hugsar Brandur um leið og hann sporðrennur ljúffengri nýgrillaðri bleikju.  Klukkutíma áður synti hún hamingjusöm í nálægum lækjarhyl ásamt nánustu ættingjum og æskuvinum.

  Brandur stendur upp, ropar og skolar mataráhöld í hylnum.  Hann gengur frá grillinu og kemur því fyrir í farangursgeymslu húsbílsins.  Það fer að rökkva innan skamms.  Þrátt fyrir bjór í maga þá sest hann undir stýri og ekur af stað.  Hann verður hvort sem er ekki kominn til byggða fyrr en upp úr miðnætti.

  Ferðin gengur eins og í sögu.  Hann leggur í bílastæðið fjarri húsinu.  Konan er greinilega sofnuð.  Myrkur grúfir yfir.  Hann vill ekki vekja hana.  Læðist hljóðlega inn,  afklæðist og leggst upp í rúm þétt við frúna.  Svefninn sækir strax á.  Hjónarúmið er miklu mýkra og betra en beddinn í húsbílnum.  Í þann mund sem hann er að svífa inn í draumaland þá vaknar lostakústur.  Eftir vikufríið vill hann sitt.  Í svefnrofanum hlýðir Brandur kallinu og bregður sér á bak.  Það er hvorki tölt né brokkað heldur þeysireið á harðastökki með kröftugum rykkjum og hnykkjum í allar áttir.  Hamagangurinn er slíkur að stæðilegt rúmið leikur á reiðiskjálfi.

  Að leik loknum leggst Brandur á bakið og blæs eins og hvalur.  Hann er alveg búinn á því.  Munnurinn er þurr og þorsti sækir á.  Hann læðist fram í eldhús og fær sér vatnssopa.  Út undan sér tekur hann eftir veikum bláum bjarma í hálflokuðum stofudyrunum.  Hann læðist að og stingur höfði varlega inn um dyragættina.  Við stofuborðið situr eiginkonan.  Hún er með fartölvu fyrir framan sig.  Hún kemur strax auga á Brand, rífur af sér heyrnartól og kallar hálf hvíslandi:  "Hæ, elskan!  Ég heyrði þig ekki koma.  Amma í Kanada kom áðan í heimsókn.  Hún ætlar að vera hjá okkur í nokkra daga áður en hún fer norður.  Hún er orðin svo hrum,  97 ára,  skökk og stirð og bakveik að ég leyfði henni að sofa í hjónarúminu. Við sofum bara í gestaherberginu á meðan." 

 

 

 

 

 

 

 

 

 

_______________________

  Fleiri smásögur HÉR.

   

              

Heimska fólkið fer á kostum

  Það er ekki öllum gefið að hafa verksvit.  Sumir synda í gegnum lífið eins og hálf sofandi.  Lengst af er líkt og þeir gangi ekki á öllum "cylindrum". Eða eins og máltækið segir:  "Margur er sljór þó hann sé mjór."  Þetta á ekki síst við í flatbökubransanum þar sem almúganum er selt ítalskt fátækrafæði á uppsprengdu verði.  Kátínu vakti um verslunarmannahelgi auglýsing um opnunartíma einnar flatbökusjoppunnar.

 

 

 

 

 

 

 

 

 

 

 

 

 

 

 

 

  Önnur flatbökugerð komst í kastljósinu.  Skjáskot af netsamtali gengur manna á meðal.  Flatbökusalinn ruglar saman nöfnunum Sighvatur og Frank.  Það er eðlilegt.  Bæði nöfnin innihalda sjaldgæfu stafina a og r. Til að sjá textann betur þarf að smella á skjáskotið.

 

 

 

 

 

 

 

 

 

 

  Margir hafa ofnæmi fyrir jarðhnetum.  Þess vegna er á umbúðum sumra matvæla merkt að þau innihaldi jarðhnetur.  Til að ekkert fari á milli mála hefur þótt ástæða til að merkja við jarðhneturekka í matvöruverslun að jarðhnetur innihaldi jarðhnetur.  Í Bandaríkjum Norður-Ameríku er ástæða til að passa upp á svona lagað.  Kæruglaðar lögfræðistofur gera út á að hanka verslanir sem gulltryggja sig ekki með bæði belti og heilgalla. 

  Vínberalaus vínber.  Heimskinginn hefur líkast til ætlað að koma því á framfæri að vínberin séu steinlaus. 

 

Allt samfélagið hagnast á rokkhátíðinni G!Festivali

   Þriggja daga útirokkshátíðin G!Festival er gríðarleg innspýting í hagkerfi Götu í Færeyjum.  Eða eiginlega fjögurra daga.  Hún hefst á fimmtudegi og stendur yfir fram til klukkan fjögur að morgni sunnudags.  Þessa daga breytist litla 1000 manna Götuþorpið í glaðværan 4500-7500 manna kaupstað.  Iðandi mannlíf hvert sem litið er.  Hópurinn þarf að nærast.  Allan tímann er stappað af viðskiptavinum í litlu bensínsjoppunni, matvörubúðinni og í fjölda sölutjalda sem setja sterkan svip á hátíðarsvæðið.  Í þeim eru seldar hljómplötur,  bækur,  fatnaður,  minjagripir og ýmislegt matarkyns.  

  Ætla má að hver gestur versli mat og drykk fyrir að minnsta kosti 30-40 þúsund kall.  Við það bætist miðaverð, gisting og sitthvað fleira.  Til að mynda bensín,  hljómplötur og leiga á sundfötum og handklæðum.  Þegar allt er saman talið eru heildarútgjöld gests farin að slaga í 100 þúsund kallinn.  

  Hátt hlutfall þorpsbúa fær launaða vinnu festivalsdagana og margir dögum og vikum saman fyrir og eftir.  Það þarf að smíða og taka niður svið,  sölutjöld,  heitapotta og allrahanda aðstöðu.      

  Hluti af heildarveltunni fer til sveitarfélagsins í formi útsvars og til ríkissjóðs í formi skatta.  

  Stærsti ávinningurinn eru ruðningsáhrifin.  Reynslan hefur sýnt að erlendu skemmtikraftarnir eru öflug auglýsing fyrir Götu og Færeyjar.  Milljónir aðdáenda út um allan heim fylgjast með póstum þeirra á samfélagsmiðlum á borð heimasíður,  blogg,  Fésbók, Twitter, Instigram og hvað þetta allt heitir.  Í næstu fjölmiðlaviðtölum segja poppstjörnurnar frá ánægjulegri upplifun á G!Festivali.  

  Fjölþjóða festival á borð við þetta laðar að tugi ef ekki hundruð fjölmiðlafólks og útsendara annarra tónlistarhátíða.  Athyglin beinist að færeysku flytjendunum.  Þetta er stóra tækifæri þess.  Tónlist þeirra er lýst í erlendum tónlistarblöðum og stórum dagblöðum.  Útvarps- og sjónvarpstöðvar taka viðtöl og spila músíkina.  Í kjölfar tekur sala á tónlist þess kipp svo og spilun á henni á þútúpunni.  Þetta skilar sér í fjölgun ferðamanna til Færeyja og bókunum á færeyskum tónlistarmönnum á tónlistarhátíðir ðí útlöndum.

  Bara svo eitt dæmi sé nefnt:  Útsendari Airwaves uppgötvaði þarna færeysku tónlistarkonuna Konni Kass og réði hana þegar í stað til að spila á Airwaves í haust.  Í dag þekkja Íslendingar ekki Konni Kass.  Í haust munu margir Íslendingar kynna sér músík hennar - og kunna vel að meta.  

  Ég þurfti ekki að hafa neitt fyrir því að finna umfjöllun um G!Festival 2016 utan Færeyja.  Sjá:  H É R  og  H É R  og  H É R  og  H É R  og  H É R 

G!Festival í Götu

  Eins og stundum áður brá ég mér á G!Festival.  Það er haldið í neðri hluta þorpsins Suður-Götu á Austurey í Færeyjum.  Um ferðina og hátíðina má lesa á visir.is með því að smella H É R.  Ástæða er til að smella á myndirnar þar - og á þessari síðu - til að stækka þær.

  Suður-Gata er eitt þriggja samliggjandi þorpa sem mynda í sameiningu þúsund manna þorpið Götu.  Hin eru Norður-Gata og Götukleif (Götugjógv).  Á þessari mynd er Suður-Gata (410 íbúar) næst okkur og Norður-Gata (565 íbúar) fjærst.  Götukleif (52 íbúar) er á milli.  Þar er grunnskólinn,  kirkjan og félagsheimilið.  Það er hagkvæmt.

 

 

 

 

 

 

 

 

  Hérlendis er Gata þekkt vegna orðatiltækis um Þránd í Götu.  Þegar hindrun er í vegi er sagt að þar sé Þrándur í Götu.  Þrándur var uppi 945-1035.  Hann var frumherji í menntun í Færeyjum og barðist gegn skattgreiðslum Færeyinga til Noregs og kristnitöku.  Hann var mikill trúmaður og aðhylltist ásatrú. Í Götu er myndarleg stytta af honum.  Þar stendur hann bísperrtur láréttur;  snilldar túlkun á því hve þver og fastur fyrir hann var.

 

 

 

 

 

 

 

 

 

  Meðal skemmtikrafta á G!Festival var færeyska tónlistarkonan Konni Kass.  Hún kemur fram á Airwaves í haust.

  Á föstudeginum var ljúft að sjá og hlýða á kvæðarokksveitina Hamradun.  Hljómsveitin Týr kom upp í hugann.  Kannski ekki skrýtið.  Söngvarinn,  Pól Arni,  söng á sínum tíma lögin með Tý sem Íslendingar kynntust fyrst.  Þar á meðal gömul kvæðalög á borð við "Ormurin langi" og "Ólavur Riddararós".  Við nánari hlustun á Harmadun kemur í ljós að hljómsveitin hefur fundið sinn eigin heillandi stíl.  

   Annika Hoydal hefur átt hug og hjörtu Færeyinga í hálfa öld.  Að vísu bar skugga á þegar hún kom fram nakin í danskri bíómynd á hippaárunum.  Þá bannaði færeyska ríkisútvarpið lag með henni.  Það var sagt vera ósiðlegt.  En þetta gekk hratt yfir.  Í dag tekur fjöldinn hraustlega undir söng Anniku.  Það er gaman að sjá hvað vinsældir hennar ganga þvert á alla aldurshópa. 

  Eivör hefur tekið þátt í G!Festivali frá upphafi, 2002.  Aðeins örfáu sinnum hefur hún ekki komið því við að mæta.  Hún er á heimavelli í Götu í bókstaflegri merkingu.  Þar fæddist hún og ólst upp.  Þar búa systkini hennar,  móðir,  amma og æskuvinirnir.  Hún er drottning í Færeyjum og DrottningIN í Götu með stórum  staf og ákveðnu8m greini.  

  Færeyskir rokkunnendur unnu heimavinnuna fyrir G!Festival.  Þeir höfðu greinilega kynnt sér tónlist íslenska bandsins á hátíðinni,  Agent Fresco;  sungu með í þeim lögum sem oftast eru spiluð á þútúpunni. 

  Gæsla var fjölmenn og áberandi í sjálflýsandi vestum.  Einnig hjúkrunarfræðingar og læknir.  Hópurinn var á stöðugu rölti um allt hátíðarsvæðið.  Þegar á vegi urðu unglingar sem greinilega höfðu sloppið í bjór var staldrað við;  vatni hellt í glas og viðkomandi hvattir til að sturta því í sig.  Hlaut það hvarvetna góðar undirtektir.  

  Á VIP svæðinu (fyrir fjölmiðlamenn,  útsendara plötufyrirtækja og tónlistarhátíða,  tónlistarfólkið og annað starfsfólk) var útibú frá skemmtistaðnum Sirkusi í Þórshöfn.  Sá staður er nákvæm eftirmynd af skemmtistaðnum Sirkusi sem stóð við Klapparstíg í Reykjavík.,  Eigandi Sirkus er Sunneva Háberg Eysturstein.  Hún er einnig þekkt sem vinsæll plötusnúður og stjórnmálamaður.

  Bróðir Sunnevu,  Knut Háberg Eysturstein,  er líka vinsæll plötusnúður.  Hann hefur sent frá sér nokkrar sólóplötur og spilað í ýmsum hljómsveitum,  til að mynda á G!Festivali með Sakaris.

.  

Hættuleg þróun

  Gríðarmikill vöxtur er í neyslu metamfetamíns á Íslandi.  Það kemur glöggt fram í dómum.  Á síðustu tíu árum hefur metamfetamín komið fyrir 76 sinnum.  Þar af þriðjungur á síðasta ári.  Dómarnir hlaðast bratt upp á þessu ári.

  Þetta bendir sterklega til þess að metamfetamínið sé framleitt hérlendis.  Nokkur dæmi hafa komið upp þar sem augljóst er að menn lögðu drög að því að hefja framleiðslu.  

  Flestir sem neyta metamfetamíns hérlendis sniffa jöfnum höndum amfetamín.  Þeir þekkja ekki muninn.  Vita ekki einu sinni af honum.  Efnin,  metamfetamín og amfetamín,  eru ekki nefnd á nafn í dópheimi heldur kölluð samheitinu "speed" (framborið "spítt").

  Megin ástæðuna fyrir þróuninni má rekja til tískufyrirbæris sem kallast "Speed dating".  Það gengur þannig fyrir sig að hópi karla og kvenna er stefnt saman.  Hópurinn er svo ör ("speed" er rosalega örvandi) að hver karl "deitar" dömu í fimm mínútur.  Þá snýr hann sér að þeirri næstu.  Þannig koll af kolli.  Af þessu er dregið orðið skyndikynni.

    

Útvarp Saga - skemmtilegt og gott útvarp

  Ef ég væri einræðisherra þá myndi ég banna næstum því allar íslenskar útvarpsstöðvar.  Lagaval þeirra er hræðilega vont. Ég "sörfa" á milli stöðva og staldra hvergi við. Músíkin er viðbjóður hvar sem borið er niður.  Næstum því.  Undantekningar eru fáar.  

  Jú,  ég heyri áheyrilega músík á X-inu.  En þegar þar er minnst á boltaleiki þá legg ég á flótta. Það hendir of oft.

  Þá er gott að stilla yfir á Útvarp Sögu.  Hún er talmálsstöð.  Dagskráin þar er fjölbreytt og skemmtileg.  Meðal sérlega áhugaverðra dagskrárliða má nefna "Slappaðu af" með Rúnari Þór Péturssyni.  Hann spjallar við helstu rokkstjörnur sjöunda áratugarins.  Það er virkilega gaman og fróðlegt að heyra liðsmenn Hljóma, Flowers, Dáta og Roof Tops rifja upp ferilinn.  

  Annar þáttur á Útvarpi Sögu kallast "Gömlu góðu lögin".  Þar ræðir Magnús Magnússon (kenndur við diskótekið Dísu) við rokkstjörnur sjötta áratugarins: Liðsmenn Lúdó, Ragga Bjarna, Geirmund Valtýs,  Garðar Guðmundsson...  Líka Helgu Möller.  Í leiðinni dekrar hann hlustendur með súkkulaðitertum,  bóni á bílinn og allskonar.   

  Guðmundur Óli Scheving fer á kostum í þætti um meindýr og varnir.  Virkilega fróðlegir og forvitnilegir þættir um silfurskottur og veggjalýs.  Í bland spilar hann áheyrileg frumsamin lög.  Ber þar hæst lagið "Ég sigli".  Flott lag.  Alveg furðulegt að það fæst hvergi spilað nema á Útvarpi Sögu.  Ekki einu sinni á Rúv.  Ekki einu sinni á Sjómannadaginn.

  Uppistandarinn Rökkvi Vésteinsson og Jói Kristjánsson eru með fjölbreyttan þátt um grín og fleira.  Jói er einnig með morgunþátt ásamt Markúsi frá Djúpalæk á milli klukkan 7 - 9. Það er svo fjölskrúðugur og áheyrilegur þáttur að morgunþættir annarra útvarpsstöðva sitja á hakanum. 

  Í síðdegisþáttum Útvarps Sögu er rætt við fólk úr öllum áttum: Múslima,  ríkiskirkjupresta,   stjórnmálamenn allra sjónarmiða og allskonar. Sérlega gaman er að heyra spjall við Hauk Hauksson sérfróðan um Rússland.  Einnig hagfræðingana Ólaf Ísleifs og Ólaf Arnalds.  Svo og Ómar Ragnarsson,  Erík Jónsson og ótal fleiri virkilega áhugaverða og fræðandi.

  Fyrir hádegi - á milli klukkan 9-12 - er opinn símatími á Útvarpi Sögu. Þjóðin talar og þjóðin hlustar.  Þetta er lýðræðislegasti útvarpsþáttur í íslensku ljósvakaflórunni.  Allir fá að viðra sína skoðun án ritskoðunar.  

    

Gagnrýnir aðförina að Útvarpi Sögu

Túrhestarnir bjarga sér

  Ljósmyndir sem Garðar Valur Hallfreðsson tók á bílaþvottaplani á Egilsstöðum hafa vakið athygli.  Þær hafa farið eins og hvítur stormsveipur um netheima.  Á þeim sjást kviknaktir erlendir ferðamenn skola af sér ferðarykið,  gestum og gangandi til skemmtunar og nokkurrar undrunar.  

  Fyrir nokkrum dögum átti ég erindi að bensínstöð Neins í Fossvogi.  Ég þurfti að yfirfara loftþrýsting í dekkjum.  Á bílaþvottaplaninu birtist bíll eins og þruma úr heiðskýru lofti.  Út snöruðust tveir ungir menn.  Þeir töluðu útlensku.  Þeir báru út á planið handfylli af óhreinum borðbúnaði:  Djúpum og grunnum glerdiskum, skálum í ýmsum stærðum,  glös,  bolla,  hnífapör,  ausur, sleifar,  sax og sitthvað fleira.  Jafnframt stóran tóman bala.  Svo hófust þeir handa:  Tóku bílaþvottaburstana og skrúbbuðu leirtauið hátt og lágt.  Balann fylltu þeir af vatni og sprautuðu uppþvottasápu í.  Þangað stungu þeir uppvaskinu að þvotti loknum.  Að endingu skoluðu þeir allt og þurrkuðu samviskusamlega.  

  Túrhestarnir bjarga sér.  Þeir þurfa ekki uppþvottavél.

  Einn kom inn í kaffihús á dögunum og pantaði heitt íste (Can I have a hot ice tea?).