Allir voru þátttakendur í veislunni

  Ó,  þeir gömlu góðu dagar þegar Íslendingar voru aðal töffararnir.  Það var sama hvað hlutirnir kostuðu.  Upphæðin skipti ekki máli.  Það eina sem skipti máli var að gera hlutina með nógu miklum stæl.  Toppa allt og alla og hvergi gefið eftir.  Hér er topp 13 listinn yfir flottheitin:

*   Hannes Smárason og Jón Ásgeir í Gumball kappakstrinum.

*   Tom Jones að syngja fyrir veislu útrásarvíkinga um áramót í London.

*   Elton John í afmæli Ólafs Ólafssonar.

*   Existabræður á þyrlunni að kaupa pylsu.

*   Þegar Fréttablaðið kaus Hannes Smárason sem markaðsmann ársins.

*   50cent í partíi Björgólfs yngri í Karíbahafinu.

*   Tónleikar Stuðmanna í Albert Hall.

*   Galaveisla Glitnis í Laugardalshöll.

*    Þegar forseti Íslands veitti Baugi útflutningsverðlaun forsetans.  Jafnvel þótt Baugur flytji ekkert út, nema fjármagn.

*   Kynningarfundurinn í London þegar næstum því var búið að selja
orkulindirnar í hendurnar á Hannesi, Jóni Ásgeiri og Bjarna Ármannssyni.

*   Partíin  á Thee Vikings snekkjunni.

*   Uppboðið þar sem selt var ómálað verk eftir Hallgrím Helgason fyrir 20
milljónir.

*   Laugardagarnir í stúkum íslensku bankanna og fjármálafyrirtækjanna á
enskum knattspyrnuvöllum.

Þú varst ekki viðstödd/staddur en færð samt að vera þátttakandi í leiknum með því að borga fyrir hann..

Allir eru sekir

Plötuumsögn

 -  Titill:  Með kærri kveðju

 -  Flytjandi:  André Bachmann

 -  Útgefandi:  André Bachmann

 -  Einkunn: ****1/2  (af 5)

  Gleðigjafinn André Bachmann hefur skemmt landanum með söng,  trommuleik,  glaðværð og góðmennsku í áratugi.  Hann hefur gert út húshljómsveitir á Hótel Sögu,  Þórskaffi og víðar og haldið uppi fjöri þvers og kruss um landið.  Undanfarin ár hefur André látið trommurnar eiga sig og einbeitt sér að söngnum. 

  Ég held ég fari rétt með að þetta sé önnur sólóplata André.  Hann hefur að auki tekið lagið á safnplötum.  Ekki það að hann sé að trana sér.  Það gerir André ekki.  Hinsvegar hefur hann staðið að útgáfu safnplatna til styrktar Sjálfsbjörgu,  Styrktarfélagi vangefinna og fleiri.  Aðrir sem lagt hafa þar hönd á plóg hafa einfaldlega krafist þess að André sé með í músíkinni á plötunum.  Enda út í hött að jafn fínn söngvari og André haldi sig til hlés á plötum sem hann sjálfur á veg og vanda að.

  André hefur sömuleiðis verið duglegur að standa fyrir jólaskemmtunum fyrir fatlaða,  Barnaspítala Hringsins og fleiri.  Hann hefur valið sér það hlutverk í lífinu að gleðja aðra.  Ekki síst þá sem eiga um sárt að binda.

  André er,  já,  fínn söngvari.  Hann hefur góða söngrödd en kann þá list mörgum betur að halda aftur af sér.  Syngja frekar á mjúku nótunum og fara sparlega með að herða í.  Söngstíllinn er persónulegur.  André syngur af innlifun og skilar afbragðs vel anda lags og texta. 

  Tónlistin er rómantísk kokkteilmúsík.  Við getum líka kallað hana vandaða dinnermúsík.  Til að átta sig á hughrifum hennar skulum við ímynda okkur að við séum stödd á fínum veitingastað með dúkuðum borðum og dempruðum ljósum.  Á þeim standa blómavasar með lifandi blómum og kerti loga.  Gestir dreypa á rauðvíni með matnum og njóta augnabliksins undir notalegum,  hlýlegum og djössuðum flutningi hágæða hljómsveitar á kunnum söngperlum:  "Án þín" eftir Jón Múla og Jónas Árnasyni,  "Tondeleyó" og "Dagný" eftir Sigfús Halldórsson við texta Tómasar Guðmundssonar,  auk erlendra laga við íslenska texta Þorsteins Eggertssonar og fleiri.  Þar á meðal "Brostu (þótt margt þig angri)" ("Smile" eftir Chaplin) og "Ég er kominn heim" eftir T-Kalmann. 

  Síðarnefnda lagið hefur verið flutt af mörgum.  Þar á meðal Bubba og Birni Jörundi.  Flutningur André er einn sá allra besti.  Það er ekki á nokkurs færi að trompa magnaðan flutning Óðins Valdimarssonar.  André gerir jafntefli.    

  Við getum líka ímyndað okkur opnun glæsilegrar málverkasýningar.  Gestir ganga um með léttvínsglös, gæða sér á brauðsnittum,  virða fyrir sér listaverkin og hlusta á þægilega úrvalsmúsík.  Það er valinn maður í hverju hlutverki hljómsveitarinnar.  Fyrir utan söng André er Árni Scheving á bassa,  Einar Valur Scheving á trommur,  Kjartan Valdimarsson á hljómborð,  þungarokkarinn Sigurgeir Sigmundsson á gítar og Sigurður Flosason á blásturshljóðfæri. 

  Hljóðfæraleikurinn er aldrei áreitinn þó margt sé fagurlega afgreitt og svipsterkt,  svo sem saxófónsóló í "En sú indælis jörð" (What a Wonderful World) og skældur kántrý-gítar í "Hafnarljós" (Harbor Lights).

  Það er stundum auðvelt að afgreiða söngtexta Þorsteins Eggertssonar sem kæruleysislega orta.  Hann á engu að síður auðvelt með að túlka stemmningu lags og flytjenda.  Hér er hann á spariskónum og staðfestir hvers vegna hann er einn eftirsóttasti textahöfundur íslenskrar dægurlagmúsíkur.   

Ný skoðanakönnun - takið þátt!

  Ný skoðanakönnun var að svífa í gang.  Þar er spurt um hvaða tímabil íslensku rokksögunnar hafi verið frjóast og gefið mest af sér;  hvenær gróskan var mest og sköpunargleðin í hámarki.  Það er spurning hvort mér hafi yfirsést eitthvert gjöful rokkbylgja í upptalningu á þeim möguleikum sem gefnir eru upp.  Gaman væri að heyra rökin fyrir því hvernig þið greidduð atkvæði.

Bestu hljómsveitaforsprakkar rokksins

  Lesendur breska poppblaðsins New Musical Express hafa að undanförnu setið sveittir við að velja besta hljómsveitaforsprakka (front person) rokksins.  Viðkomandi er gefin einkunn frá 1 upp í 10 og meðaleinkunnin ræður niðurstöðunni.  Gaman væri að heyra viðhorf ykkar til úrslitanna.  Þau bera þess glöggt merki að kjósendur eru breskir.

1.   Robert Smith í The Cure,  einkunn 9,17

2.   Liam Gallagher í Oasis,  8,71

3.   Johnny Rotten í Sex Pistols og PIL,  6,54

4.   John Lennon í Bítlunum,  6,14

5.   Kurt Cobain í Nirvana,  6,00

6.   Jimi Hendrix í The Jimi Hendrix Experience,  5,99

7.   Freddie Mercury í Queen,  5,79

8.   Joe Strummer í The Clash,  5,67

9.   Robert Plant í Led Zeppelin,  5,55

10. Jim Morrison í The Doors,  5,54

11. Ian Curtis í Joy Division,  5,53

12. Thom Yorke,  Radiohead, 5,42

13. Morrissey í The Smiths,  5,39

14. Mick Jagger í The Rolling Stones,  5,32

15. Marc Bolan í T. Rex,  5,30

16. Matt Bellamy í Muse,  5,29

17. Roger Daltrey í The Who,  5,12

18. James Dean Bradfield í Manic Street Preachers,  5,10

19  Iggy Pop í The Stooges,  4,97

20. Jack White í The White Stripes, 4,96

Færeyska innrásin skollin á

  Hér fyrir neðan sagði ég frá fyrirhugaðri færeyskri tónlistarhátíð sem átti að vera á Stokkseyri um helgina.  Hún fauk út í buskann,  eða réttara sagt þá komust færeysku tónlistarmennirnir ekki frá eyjunum í gær né fyrradag vegna hvassviðris.  En þeir brutust til Íslands í dag.  Í kvöld spilar poppsöngkonan Guðrið Hansdóttir á Hressó í Reykjavík og þjóðlagahljómsveitin Kvonn spilar fjörug og dansvæn lög á Dubliner.  Sjá nánar um Guðriði og Kvonn á http://jensgud.blog.is/blog/jensgud/entry/668297.

  Færeysku tónlistarmennirnir voru ekki fyrr lentir á Reykjavíkurflugvelli en þeir fóru á búðarráp.  Vegna hruns íslensku krónunnar er færeyska krónan verðmikil í íslenskum verslunum.  Lengst af var ein færeysk króna jafngildi 10 íslenskra króna.  Í dag er færeyska krónan jafngildi um 20 íslenskra króna.  Færeyingarnir hafa nýtt sér þessa breytingu með því að versla tölvur,  fatnað og fleira á hálfvirði. 

Frábær útvarpsþáttur - tékkið á honum

 

  Einn allra besti af mörgum góðum útvarpsþáttum er  Litla hafmeyjan  á rás 2.  Umsjónarmenn eru snillingarnir Doddi litli og Andri Freyr.  Þeir kunna þann galdur að þyrla upp stuði og stemmningu sem er engu lík.  Báðir þrautreyndir í útvarpi á hinum ýmsu útvarpsstöðvum.  Jafnframt frægir og margreyndir stuðboltar á skemmtistöðum.  Hafa staðið fyrir ótal vel heppnuðum skemmtunum,  bæði sem plötusnúðar og skemmtikraftar af ýmsu tagi. 

  Sumir kannast við Dodda litla sem Love Guru.  Aðrir kannast við Andra Frey sem gítarleikara Botnleðju,  Fidel,  Bisundar og fleiri hljómsveita.  Einnig sem Freysa,  þann sem setti allt á annan endann á X-inu fyrir nokkrum árum.  Ófáar útsendingar Freysa enduðu sem lögreglumál.  Margir muna einnig eftir honum síðan hann drakk sig blindfullan í beinni útsendingu í Kastljósi fyrir nokkrum árum. 

  Þeir Doddi litli og Andri Freyr eiga það sameiginlegt að taka sig ekki of hátíðlega sem útvarpsmenn en hafa engu að síður þann metnað að skila góðu útvarpsefni.  Koma hlustendum í gott skap og koma sífellt á óvart.

  Þú mátt ekki missa af síðasta þætti.  Hann var gleðiþáttur og honum ætlað að rífa fólk upp,  kæta og hressa núna í blábyrjun kreppunnar.  Smelltu á slóðina  http://dagskra.ruv.is/streaming/ras2/?file=4442557.  Eins og skrúfað sé frá krana eru gleðigjafarnir Hemmi Gunn,  Bjartmar Guðlaugsson,  Raggi Bjarna og Þorgrímur Þráinsson búnir að hífa upp gleði og glens,  eins og þeim einum er lagið og gleðipinnarnir Doddi litli og Andri Freyr fara á kostum.  Svo var ég skyndilega farinn að gefa góð ráð í þættinum um hvernig fólk getur sparað á krepputímum.  Þá var ég hissa.

Einfaldur skilnaður - ekkert vesen

  Hver kannast ekki við hjónaskilnað sem endar með því að lögfræðingar og skiptastjóri fá bróðurpartinn af peningunum?  Það er að segja þeim peningum sem eftir eru þegar skiptastjórinn hefur selt allar eignir á spottprís.   Hann valdi ólíka leið 42ja ára bóndinn í Kambódíu sem skildi við sína frú til næstum tveggja áratuga.  Hann gekk hreint til verks:  Sagaði hús þeirra í tvennt og gætti fullrar sanngirni.  Skipti hnífjafnt.  Sinn part flutti hann á vörubílspalli heim til foreldra sinna og klambraði honum utan á íbúðarhús þeirra.  Þar býr hann nú.  Konan býr aftur á móti í sínum helming af húsinu þar sem það stóð. 

  Aðrar eigur heimilisins skipti maðurinn jafnt í fjóra hluta sem skiptust á milli hjónanna og tveggja ungra barna þeirra.

  Þó það komi málinu lítið við þá var það maðurinn sem átti frumkvæði að skilnaðinum.  Hann sakaði konuna um að hugsa ekki nógu vel um sig.  Hann hafi verið vanræktur eftir að hann veiktist andlega. 

Hátíðinni aflýst - en ekki hljómleikunum í Reykjavík

  Færeyskri tónlistarhátíð sem halda átti á Stokkseyri um helgina hefur verið endanlega aflýst.  Færeysku tónlistarmennirnir komust ekki til landsins í gær.  Það var of hvasst á flugvellinum í Vogum í Færeyjum.  Í dag var sama sagan.  En vonir standa til að þeir komist til Íslands á morgun.  Þeir munu þó ekki koma fram á Stokkseyri að sinni heldur spila á Dubliner í Reykjavík annað kvöld.

Brosleg saga

  Þegar ég las um ágætar tillögur stjórnarmanna í Lögreglufélagi Reykjavíkur um að félagsgjöld verði felld niður tímabundið rifjaðist upp fyrir mér brosleg saga sem kona nokkur sagði.  Sagan er þannig í frásögn konunnar: 

  "Ég var bara í 5 mínútur inni í búðinni og þegar ég kom út var djöfulsins andskotans löggukarl að skrifa sektarmiða.  Ég gekk að honum og hreytti ákveðin út úr mér: "Heyrðu félagi, hvernig væri að gefa fólki smá sjéns?"  Hann leit ekki á mig og hélt áfram að skrifa sektarmiðann.  Þá brýndi ég röddina og kallaði hann heimskan blýantsnagandi nasista.  Hann leit snöggt á mig og byrjaði að skrifa annan sektarmiða um leið og hann hvæsti á mig að dekkin undir bílnum séu of slitin.  Ég öskraði að hann væri rolluríðandi heilalaus fáráðlingur og fífl. Hann lauk við að skrifa miða nr. 2 og setti hann á bílinn með fyrsta miðanum. Svo byrjaði hann að skrifa þriðja miðann án þess að segja orð.  Þannig gekk þetta í meira en korter.  Ég svívirti hann með öllum ljótustu orðum sem ég kunni og hann bætti tveimur sektarmiðum við.                                           

  Mér var í raun andskotans sama, en þið hefðuð átt að sjá svipinn á honum þegar ég fór yfir götuna að bílnum mínum,  settist inn og keyrði burt."

Vilja leggja tímabundið niður félagsgjöld

Snúið rútunum við!

  Í færslu hér aðeins fyrir neðan er sagt frá veglegri færeyskri tónlistarhátíð sem átti að hefjast í kvöld á Stokkseyri og standa fram á sunnudagskvöld.  Þessi hátíð hefst ekki í kvöld.  Ástæðan er sú að engin flugvél hefur getað lent í Færeyjum í dag.  Hátt í þrjátíu færeyskir tónlistarmenn hafa setið aðgerðarlausir á flugvellinum í Vogum í Færeyjum í allan dag og starað örvæntingarfullir á auða flugbrautina.  Nú er útséð með að þeir komist til Íslands í dag.

  Góðu fréttirnar eru þó þær að einn færeyskur bassaleikari og einn færeyskur fiðluleikari eru komnir til landsins.  Vondu fréttirnar eru að hljóðfærin þeirra eru ennþá í Færeyjum.

Færeysk stórhátíð á Stokkseyri

 

  Veglegasta færeyska tónlistarhátíð sem boðið hefur verið upp á hérlendis verður haldin á Stokkseyri núna um helgina,  dagana 10. - 12.  október.  Og ekki aðeins verður fjörleg og fjölbreytt færeysk tónlist í boði heldur verður gestum líka boðið að smakka á færeyskum mat framreiddum af færeyska meistarakokknum Birgi Enni,  færeyskum bjór og færeyskar ullarvörur verða til sölu á lágu kynningarverði sem og færeyskir geisladiskar og færeyskir DVD.

  Birgir Enni var í fyrra krýndur "Færeyingur ársins" sem besti sendiherra Færeyja á alþjóðavettvangi (Eivör var áður krýnd "Færeyingur ársins".  Sama manneskja getur bara einu sinni hlotið titilinn).  Hróður Birgis sem listakokks hefur borist víða um heim.  Enginn íslenskur matreiðslumaður hefur fengið jafn víða og jafn góðar umsagnir í heimspressunni og Birgir Enni.  Það er alltaf mikil tilhlökkun að snæða veislumat hans.  Sjálfur kafar Birgir eftir hráefninu sem að sjálfsögðu er sjávarfang. 

  Dagskráin hefst í Draugasetrinu á Stokkseyri klukkan 23.00 annað kvöld (föstudag).  Fyrst stígur á stokk margverðlaunuð poppsöngkona,  Guðrið Hansdóttir,  og hljómsveit.  Fyrir utan að vera stórt nafn í Færeyjum nýtur Guðríð vinsælda í Danmörku.  Klukkan korter í miðnætti tekur þjóðlagahljómsveitin Kvonn við.  Að lokum leikur rokkhljómsveitin Spaðar 5 fyrir dansi frá hálf eitt til 3.  

  Daginn eftir,  laugardag,  hefst dagskrá klukkan 19.00 með leik þjóðlaga-djassrokk sveitarinnar Yggdrasil undir forystu píanóleikarans og tónskáldsins Kristians Blak.  Dagskrá þeirra kallast "Heygar og Dreygar" og stendur í klukkutíma.   Við af þeim tekur Guðrið Hansdóttir með dagskrána "Sleeping with Ghosts".  Korter í 21.00 er matarhlé og gestum boðið að smakka færeyskan mat framreiddan af Birgi Enni.  Hálftíma síðar flytur hljómsveitin Kvonn dagskrána "Álvastakkur".  Klukkan hálf 23.00 er það færeyski hringdansinn,  "Ólavur Riddararós".  Frá miðnætti til klukkan 3 heldur rokksveitin Spaðar 5 uppi fjörinu.

  Sunnudaginn 12. október flytja Guðrið Hansdóttir og hljómsveitin Kvonn blandaða dagskrá á milli klukkan 16.00 og 18.00.

  Á sunnudagakvöldið spilar hljómsveitin Kvonn einnig á Dubline í Reykjavík. 

www.kristianblak.com

http://www.myspace.com/gudridhansdottir 

Ótrúlega merkileg spá Nostradamusar

 

  "Það hefur verið stritað á Íslandi í þúsund ár.  Það er ekki fyrr en stritið er skynsamlega skipulagt sem það fer að skila ávöxtun.  Þessa skipulagningu og hagræðingu annast forstjóranir, framkvæmdastjóranir og fjármagnseigendurnir. Þeir eru dráttarklárar atvinnulífsins.  Með harðnandi samkeppni um fjármagnið verða mistök einstakra forstjóra fljótar leiðrétt, ólíkt því sem áður var. Við eigum að samgleðjast forstjórunum, framkvæmdastjórunum og fjármagnseigendunum í stað þess að öfunda þá."

Hannes Nostradamus Hólmsteinn Gissurarson 2004  

Hryðjuverkalög gegn Landsbanka

Myndir frá nemendamótinu á Steinstöðum í Skagafirði

  Þessar myndir birtust mér í draumi.  Ég sé ekki betur en þær sýni sitthvað frá nemendamóti í Steinsstöðum í Skagafirði í sumar.  Það getur verið gaman að vera svona berdreyminn.

Ég átta mig ekki á hver hún er daman lengst til vinstri í bleiku peysunni.  Yfir öxlina á mér horfir hann Lalli frábæri í Laugahvammi.  Við hlið hans stendur Sindri frábæri frá Steintúni.  Lengst til hægri er Hrefna frábæra frá Saurbæ.  Ég átta mig ekki á hverjar konurnar eru í hvítu peysunum né heldur hvaða hendi kemur frá vinstri og virðist hafa einbeittan vilja til að hrinda mér á andlitið af fautaskap ofan í mölina.

Ekki kveiki ég á perunni hver hann er maðurinn lengst til vinstri á myndinni.  Rósa frábæra frá Korná er fyrir miðju og Böddi frábæri frá Þorsteinsstöðum til hægri.  Ég sé ekki betur en að þau hafi laumast í bjór.  Það er ekki nógu sniðugt svona á miðjum degi.

 

Lengst til vinstri er Jobbi frábæri Ásmundsson úr Fljótunum.  Mér sýnist Þórhallur frábæri bróðir hans vera lengst til hægri.  Miðpunktur alheims er Magga frábæra frá Sölvanesi.  Hún klippir Sauðkrækinga sundur og saman af mikilli list.  Hægra megin við hana er Rögnvaldur frábæri organisti frá Ketilási í Fljótum.

Mér sýnist Hörður frábæri frá Saurbæ vera til vinstri og Maggi frábæri frá Vindheimamelum í miðið.  Maggi var að opna leiksvæði þar sem fólk skýtur málningarkúlum (paint ball) hvert á annað.  Það er litrík skemmtun og vinsæl.  Maggi rekur jafnframt í framhjáhlaupum Hestasport,  Rafting og sitthvað fleira.  Ég hef grun um að það sjái aftan á Skarphéðinn frábæra júdómeistara frá Hofi.

Þarna hef ég sennilega haft þungar áhyggjur af því að Rósa frábæra frá Korná myndi villast ef hún myndi rölta ein um svæðið.  Ábyrgðartilfinning hefur blossað upp í mér og ég ákveðið að fylgja henni þétt eftir til að hún týni sér ekki á gangi.  Ég tek hlutverkið svo hátíðlega að mér stekkur ekki bros á vör vegna kvíðakasts yfir að valda ekki verkefninu.

Lengst til vinstri sést í fjarska glitta í Gunnu frábæru frænku mína frá Hlíð.  Í rauða jakkanum er Hrefna frábæra frá Saurbæ.  Með bjórdós stendur Jobbi frábæri Ásmunds.  Bakvið hann stendur Lalli frábæri í Laugahvammi.  Til hægri er Rögnvaldur frábæri tónlistarkennari og er furðu kátur miðað við að bjórglasið hans er tómt.

Í baksýn sést Maggi frábæri frá Vindheimum lengst til vinstri.  Fremst á myndinni standa Rósa frábæra frá Korná og Gunna frábæra frænka mín frá Hlíð sitthvoru megin við Rögnvald frábæra kórstjóra frá Ketilási.

Þarna sátum við Rögnvaldur frábæri snemma dags,  þömbuðum maltöl og spáðum því að krónan myndi hrynja endanlega í október og Ísland yrði sósíalískt ríki.  Davíð Oddsson myndi þjóðnýta einkabanka þeirra kumpána Jóns Ásgeirs og Björgólfs og opna öll hlið upp á gátt fyrir Rússagull sem myndi flæða um allar gáttir.  Íslandi yrði stýrt af fjármálaeftirliti ríkisins og Davíð Oddsson stofna til stríðs við bresk stjórnvöld.  Það er með ólíkindum ruglið sem manni dettur í hug í óráði svona nývaknaður og enn á milli draums og vöku. 

  Ef smellt er á myndirnar birtast þær stærri og skýrari.

  Guðirnir og allar góðar vættir blessi Ísland.

Sparnaðarráð - sparið tugi þúsunda!

 

  Núna á tímum óvæntra þrenginga í efnahagsmálum er nauðsynlegt fyrir landsmenn að skiptast á öllum þeim sparnaðarráðum sem þeir luma á.  Og jafnvel ennþá fleirum.  Ég læt ekki mitt eftir liggja fremur en fyrri daginn og slæ hvergi af.  Bensínkostnaður er mörgu heimilinu þungur baggi.  Svo þarf þó ekki að vera.  Það er hægt að dæla bensíni á bíl á bensínstöð og aka burt án þess að borga krónu fyrir.  Samkvæmt upplýsingum Andrésar Magnússonar framkvæmdastjóra Samtaka verslunar og þjónustu er hægt að komast upp með þetta.  Orðrétt sagði Andrés við blaðamann Morgunblaðsins:

  "Lögreglan sinnir þessu ekki og segir einfaldlega að þeir geti ekki átt við þetta.  Jafnvel þó mynd af númeraplötu og viðkomandi ökumanni hafi náðst á öryggismyndavél.  Þetta gerist trekk í trekk,  en lögreglan segist ekkert geta gert."  

Fleiri góð sparnaðarráð:

http://jensgud.blog.is/blog/jensgud/entry/640833

http://jensgud.blog.is/blog/jensgud/entry/530712

http://jensgud.blog.is/blog/jensgud/entry/537968

http://jensgud.blog.is/blog/jensgud/entry/501251

Kvikmyndarumsögn

Titill:  Reykjavík - Rotterdam

Handrit:  Óskar Jónasson og Arnaldur Indriðason

Leikstjórn:  Óskar Jónasson

Helstu leikendur:  Baltasar Kormákur,  Ingvar E.  Sigurðsson,  Þröstur Leó Gunnarsson,  Ólafur Darri Ólafsson,  Lilja Nótt og Jörundur Ragnarsson

Einkunn: **** (af 5)

  Myndin segir frá blönkum fjölskyldumanni (Baltasar) sem smyglar spíra til landsins að undirlagi fláráðs "vinar" (Ingvar E.).  Framvindan er að mestu fyrirsjáanleg en blönduð óvæntum atburðum.  Einhversstaðar sá ég myndinni lýst sem spennu-grínmynd.  Grínið fór framhjá mér.  Ég veit ekki hvar það átti að vera.  En spennan var í fínu lagi.

  Samtöl eru óvenju eðlileg miðað við aðrar íslenskar kvikmyndir.  Leikur,  persónur og senur eru trúverðugar.  Samt var ég ekki alveg að kaupa vonda kallinn,  hrottann (Jóhann,  ég man ekki hvers son).  Hann er aðeins of vinalegur á svipinn.  Ég var heldur ekki að kaupa upprisu konu smyglarans (Lilja Nótt) eftir að hún átti að hafa verið myrt.

  Smygl á spíra hljómar eins og eitthvað sem er komið framyfir síðasta söludag.  Er einhver að smygla spíra í dag?  Er spíri ekki of fyrirferðarmikill til að slíkt borgi sig á tímum landabruggs og nettra dóppakkninga?

  Þessar aðfinnslur mega ekki hljóma eins og mínus er skiptir einhverju máli.  Alls ekki.  Þetta eru léttvæg atriði.  Myndin er góð skemmtun;  hröð,  æsileg,  viðburðarík og vel heppnuð í flesta staði.  Ég mæli eindregið með henni sem góðri haustupplyftingu í efnahagsþrengingum Jóns Ásgeirs og Björgólfs.

Leiðinlegasta íslenska hljómsveitin - úrslit í skoðanakönnun

  Að undanförnu hefur staðið yfir á síðunni minni skoðanakönnun um leiðinlegustu íslensku hljómsveitina.  Spurningin sem brunnið hefur á allra vörum er:  "Hvaða hljómsveit fer mest í taugarnar á þér?"  Þannig var að þessu staðið að fyrst óskaði ég eftir tillögum.  Skilyrðið var að hljómsveitin hefði starfað á þessari öld.  Þeim hljómsveitum sem fengu flestar tilnefningar var stillt upp í formlega skoðanakönnun. 

  Þessi listi hefur ekkert að gera með minn persónulega smekk.  Á listann lentu uppáhaldshljómsveitir mínar,  Mínus og Sigur Rós.  Í stað þeirra hefði ég viljað sjá Stjórnina á listanum.  En þetta er ekki listi yfir þær hljómsveitir sem pirra mig heldur langaði mig til að fá að komast að því hvaða hljómsveitir fara mest í taugarnar á landsmönnum.

  Ein ástæðan fyrir því að ég loka skoðanakönnunni núna er að tvívegis hefur verið unnið á henni skemmdarverk með "hakki".  Í fyrra skiptið var 50 atkvæðum skellt á Sprengjuhöllina á nokkrum sekúndum.  Í seinna skiptið var 100 atkvæðum skellt á sömu hljómsveit á jafn stuttum tíma.  Ég get ekki leyft svoleiðis svindli eyðileggja niðurstöðuna.  Þess vegna hef ég dregið 150 atkvæði frá Sprengjuhöllinni og fært hana úr 1.  sæti niður í 5.  sæti.

  Í mínum kunningjahópi er fullyrt að það samrýmist húmor strákanna í Sprengjuhöllinni að reyna með svindli að ná titlinum leiðinlegasta íslenska hljómsveitin.  Á það er bent að ný plata sé að koma á markað og öll athygli hjálpi.  Ég ætla ekki að vera með getgátur um hvort þessi kenning sé rétt eða röng.  Ég frábið mér svindl af þessu tagi hvað sem fyrir mönnum vakir.  Ef þessi skemmdarverk hefðu ekki komið til hefði ég leyft könnunni að standa lengur til að verða marktækari.  Þá á ég einkum við varðandi hljómsveitirnar sem fæst atkvæði fengu.  Tölurnar á bakvið efstu sætin eru marktæk.

  Þegar þetta með Sprengjuhöllina hefur verið leiðrétt eru leiðinlegustu íslensku hljómsveitirnar þessar:

1.   Mercedes Club  20,9%

2.   Á móti sól  12% 

3.   Sálin hans Jóns míns  10,1%

4.   Sigur Rós  9,8%

5.   Sprengjuhöllin  9,5%   

  Rétt er að taka fram að allan tímann sem könnunin stóð yfir voru Sálin og Sigur Rós iðulega samstíga með 9,9% atkvæða báðar.  Stundum fór Sálin aðeins upp fyrir og þannig er staðan núna þegar könnunni lýkur. 

  Ég ætlast ekki til að neinn taki könnunni illa.  Þetta er bara léttur og saklaus samkvæmisleikur sem enginn á að taka hátíðlega.  Hæ, hæ, hó, hó og jibbí-jei!

  Gaman væri að heyra viðhorf þitt til þessarar niðurstöðu.

--------------

Hvaða hljómsveit fer mest í taugarnar á þér?

Á móti sól 12,0%

Í svörtum fötum 2,7%

Land & synir 3,0%

Mercedes Club 20,9%

Mínus 1,6%

Sálin hans Jóns míns 10,1%

Sign 2,7%

Sigur Rós 9,8%

Skítamórall 2,6%

Sprengjuhöllin 22,6%

Stuðmenn 7,9%

Veðurguðirnir 4,0%

1148 hafa svarað

Allt um Geirfinn - er vitað hvað varð um hann?

 

  Svokallað Geirfinns- og Guðmundarmál snýst um hvarf tveggja manna á áttunda áratugnum með þessum nöfnum.  Lögreglan kunni ekki að leysa gátur um mannshvörf á þessum tíma.  Nokkrir alræmdir síbrotaunglingar voru teknir,  pyntaðir og látnir játa á sig morð á Geirfinni og Guðmundi þó ekki stæði steinn yfir steini í niðurstöðunni sem púslað var saman.

  Á bloggsíðunni www.mal214.blog.is eru 15.000 blaðsíður er varða Geirfinns- og Guðmundarmálið.  Þar á meðal fullyrðingar Guðrúnar Magneu um að Geirfinnur hafi verið dysjaður í Garðabæ.   

  Myndin sýnir Sævar Ciesielski ásamt ömmu sinnu skömmu áður en honum var stungið í 2ja ára einangrunarvist,  meinað um svefn,  sviptur sængurfötum vikum saman,  dælt í hann allrahanda lyfjum,  strekktur í handjárn,  kaffærður í vatni og laminn af lögregluþjónum og fangavörðum.  Er strákurinn losnaði úr prísundinni var hann svo gott sem mállaus og þurfti að læra að tala upp á nýtt.      

Plötuumsögn

 

Titill:  Land

Flytjandi:  Hljómsveitin Týr

Útgefandi:  Napalm Records

Einkunn: ****1/2 (af 5)

  Ferill færeysku víkingarokkaranna Týs hófst glæsilega.  Ekki síst hérlendis og í Færeyjum.  Túlkun Týsaranna á "Orminum langa" stimplaði hljómsveitina svo rækilega á kortið að hérlendis þyrlaði hún upp því sem kallað var  færeyska bylgjan  2002.  Opnaði upp á gátt dyr fyrir holskeflu færeyskra tónlistarmanna í hæsta gæðaflokki.  Nægir þar að nefna Eivör,  pönksveitina 200,  Högna Lisberg,  harðkjarnasveitina Makrel,  djasssveitina Yggdrasil,  Teit,  Hanus,  Högna Restrup,  Lenu Andersen,  Rasmus Rasmusen og fjölda annarra. 

  Í upphafi voru Týsarar undir áhrifum frá Metallica og Dream Theatre.  Nú hefur hljómsveitin fundið sinn eigin stíl.  Hann er mögnuð og vel heppnuð blanda af færeyskri/norrænni þjóðlagamúsík og þungu rokki.  Færeyskt folk-metal með gotneskum keim.  Hágæða víkingarokk.

  "Land" er fjórða plata Týs.  Gefin út af þýska metal-fyrirtækinu Napalm Records sem er stórt innan metal geirans.  Týr er áberandi á alþjóðlegum þungarokkshátíðum og lög með Tý dúkka upp á safnplötum með hljómsveitum eins og Sepultura og Soulfly. 

  "Land" er frekar seintekin plata.  Þar eru engir léttir og auðmeltir poppsmellir heldur tilþrifameiri lög sem þarfnast nokkurrar yfirlegu áður en glæsileiki þeirra nær tökum á hlustandum.  Þau tök eru þannig að platan er sett á endurspilun aftur og aftur.  Hún verður skemmtilegri við hverja hlustun og ekkert örlar á því að maður fái leiða á neinu lagi.

  Þetta er heilsteypt plata sem nýtur sín best þegar hlustað er á hana í heild (fremur en pikka út stök lög).  Vel útfærður samsöngur er áberandi einkenni plötunnar.  Samsöngur af því tagi sem við munum eftir frá "Orminum langa".  Heillandi færeysk stemmning svífur yfir vötnum og undir kraumar þungt rokkið.  Eitt lagið er íslenskt,  "Brennivín". 

  Allir liðsmenn Týs eru á heimsmælikvarða sem hljóðfæraleikarar.  Fyrir þá sem hafa áhuga á fingralipurð er gítarleikur Hera eyrnakonfekt. 

  "Land" er besta plata Týs til þessa.  Þessi plata mun gegna mikilvægu hlutverki í sögu Týs.  Mitt ráð til Týsara er að hafa eitthvað á næstu plötu aðeins poppaðra án þess að víkja langt frá þeim frábæra stíl sem hljómsveitin er búin að marka sér.  Þá er næsta víst að staða Týs á alþjóðamarkaði mun styrkjast til muna.

  Plötur Týs fást í verslunum Pier hérlendis og eflaust í almennum plötubúðum. 

Fyrri plötur Týs:

How Far to Aasgard 2002 (inniheldur "Orminn langa") ****

Eric the Red 2003 (inniheldur "Ólavur Riddararós" og "Wild Rover") ***1/2

Ragnarök 2006 (inniheldur "Torsteins kvæði") ****

  Á bresku tónlistarsíðunni www.allmusic.com fá allar plötur Týs 4 stjörnur af 5 nema "Eric the Red" fær 4 og hálfa.

  Á morgun (sunnudag) er Týr með hljómleika í TÞM (Tónlistarþróunarmiðstöðinni) vestur á Granda klukkan hálf 7.  Trassar,  Gone Postal,  Hostile og Palmprint in Blood koma þar einnig fram.  Ekkert aldurstakmark.

Varúð!

 

  Fyrr á þessu ári keypti ég ísskáp í verslun sem heitir Heimilistæki og er á Suðurlandsbraut í Reykjavík.  Frá fyrsta degi hefur þessi ísskápur verið dyntóttur.  Ýmist kælir hann ekki nógu vel eða of mikið.  Þegar fór að rökkva núna í haust uppgötvaði ég hver ástæðan er.  Hún er sú að hurðin á skápnum lokar honum ekki alveg.  Hún hallar niður þannig að í gegnum smá rifu sést að ljós logar stöðugt í skápnum.

  Varist að kaupa ísskáp sem heitir Scan Cool. 

Kind dauðans

 

  Mér hefur borist njósn af því að í Fjarðarbyggð sé tekin til starfa blúshljómsveit sem talin er vera ein sú allra besta á landinu.  Í henni er söngkonan Jóhanna Seljan,  trommuleikarinn Pétur Hallgrímsson (oft kenndur við hljómsveitina þjóðsagnakenndu Amon Ra og plötubúðina Tónspil) og gítarleikararnir Guðmundur Höskuldsson (var í þungarokkssveitinni Þreki og blúshljómsveitinni EC) og Jón Hilmar Kárason.  Bassaleikari er Sigurður Ólafsson.

  Jón Hilmar er talinn í hóp með bestu gítarleikurum heims. 

 

  Jóhanna er dúndurfín söngkona.  Í tónspilaranum mínum hér á síðunni er hægt að heyra hana syngja "Ætlarðu að hringja á morgun?"

 

  Einn liðsmanna þessarar nýju hljómsveitar er alræmdur fyrir að vera sjúklega hræddur við kindur.  Það mun vera afleiðing þess að lambhrútur stangaði hann sem barn.  Hljómsveitin er skýrð í höfuðið á þessari kindafælni og kallast Kind of Death.  Mikilvægt er að orðið kind sé borið fram á íslensku en ekki ensku (kænd).   Hljómsveitir sem kenna sig við kindur eru nefnilega alltaf góðar,  samanber pönksveitina frábæru Rollu. 

.

  Myndin hér að ofan sýnir kind dauðans.  Hún stangaðist á við sjálfa sig og fékk glóðarauga.  Hún þurfti að ganga með sólgleraugu næstu daga.  Rifjaðist þá upp fyrir mér þegar einn af sonum Björns á Löngumýri kýldi mig í auga á unglingsárum í Varmahlíð og ég fékk svona kindarlegt glóðarauga.  Það var hressandi.

  Myndin hér fyrir neðan er af Jóhönnu Seljan.