Plötuumsögn

 

Flytjandi:  Ylfa Lind

Titill:  Petit Cadeau

Einkunn: **** (af fimm)

  Fyrst verð ég að nefna netta andúð mína á því sem Idol-söngvarakeppni stendur fyrir.  Ég ætla ekki að fara náið út í það.  Flest sem að lýtur að Idol er fjarri flestu sem ég sækist eftir í músík.  Fyrir nokkrum dögum ræddum við Stefán bróðir minn um fordóma.  Svo virðist sem engin manneskja sé saklaus af fordómum.  Stefán vísaði á að ég sé með mikla fordóma gagnvart léttri poppmúsík.  Mér er ljúft að gangast við því.  Ég er öfgakall í andúð á léttri iðnaðarkenndri poppmúsík.

  Að óreyndu hefði ég ekki trúað upp á mig að kaupa plötu með Idol-söngvara.  Það gerði ég þó á dögunum þegar ég fjárfesti í Petit Cadeau með Ylfu Lind.

  Ástæðan fyrir því að ég keypti þessa plötu er tvíþætt:  Annars vegar hef ég heyrt á rás 2 lög af þessari plötu og kunnað vel að meta.  Hinsvegar að Ylfa Lind hefur tekið þátt í umræðu á blogginu mínu og haft þar margt áhugavert fram að færa.

  Þegar ég var kominn með plötuna í hendur uppgötvaði ég að ég á öll lögin á plötunni í frumútgáfum höfunda að undanskildu Vaki, vaki vinur minn eftir Loft Guðmundsson.  

  Ylfa Lind náði á sínum tíma inn í einhver af efstu sætum Idols.  Ég fylgdist ekki náið með framvindu mála.  En giska á að hún hafi verið í u.þ.b. 4.  sæti.  En ég man ekki og veit ekki hverjir urðu sigurvegarar í Idol það árið.  Enda skiptir það ekki máli.

  Ylfa Lind er góð söngkona og fínn túlkandi.  Hún er með hörkufínt band með sér:  Bigga Baldurs á trommur.  Hann er bara gæðastimpill;  Eðvarð Lárusson á gítar.  Hann er annar gæðastimpill; Og Jakob Smára Magnússon á bassa.  Enn einn gæðastimpillinn. 

  Það getur fátt farið úrskeiðis þegar þessir snillingar eru á ferð.  Mér heyrist sem upptaka sé meira og minna "live" í hljóðveri.

  Upphafslag plötunnar er As Tears Go By eftir Rolling Stones.  Ylfa Lind "raular" það virkilega vel og andi Cowboy Junkies svífur yfir vötnum. 

  Annað lag plötunnar er Bítlalagið Don´t Let Me Down.  Það er eitt af mínum uppáhalds Bítlalögum.  Lágstemmdur en samt áleitinn blús sem John Lennon öskraði listavel.  Þarna ræðst Ylfa Lind á háan garð.  Ég sakna þess að heyra ekki bregða fyrir öskursöngstílnum sem er svo heillandi í flutningi Bítlanna.  Samt afgreiðir Ylfa Lind þetta vel.  Fyrir minn smekk hefði hún mátt gefa betur í,  þenja sig ennþá betur en hún gerir undir lok lagsins. 

  Þriðja lagið er Glorybox eftir Portishead.  Hljómsveitin gefur vel í og líka Ylfa Lind í söngnum.  Eitt besta lag plötunnar.  Ég hefði kosið að heyra meira af svona hávaðalátum á plötunni.  Það jaðrar jafnvel við öskursöng hjá Ylfu Lind.  Endirinn á laginu er flott keyrsla.

  Fjórða lagið er Where The Wild Roses Grow eftir Nick Cave.  Andrea Gylfadóttir hleypur undir bagga.  Bara glæsileg afgreiðsla. 

  Fimmta lagið er Pain´t It Black eftir Rolling Stones.  Lágstemmd útfærsla sem hæfir heildarsvip plötunnar.

  Sjötta lagið er Touch Me eftir The Doors.  Stemmning The Doors fær að halda sér.

  Sjöunda lagið er White Room eftir The Cream.  Þarna eru smá læti, blús og rífandi gítarsóló.  En samt frekar mild afgreiðsla nema í niðurlagi.   Ég held að mig misminni ekki að á unglingsárum hafi ég sungið White Room með hljómsveitinni Frostmarki.  Að minnsta kosti vorum við Viðar Júlí Ingólfsson,  trommusnillingur,  með einhver Cream-lög á "prógrammi" hljómsveitarinnar.   

  Áttunda lagið er Three Little Birds eftir Bob Marley.   Yndislega fallegt lag flutt af einlægni og fegurð lagsins fær að njóta sín án þess að gengið sé inn í reggí-taktinn af fullum þunga.  Fyrir minn smekk er þetta flottasta lag plötunnar.  Þarna fer Ylfa Lind í soul-gír og lifir sig betur inn í lagið en í öðrum lögum.  Nær algjörlega að gera þetta að sínu lagi. Ég stend mig að því að setja þetta lag á "endurspilun".  Aldeilis mögnuð útgáfa.  Ég á þetta lag í flutningi margra.  Þetta er ein besta útfærslan.  Jakob Smári fer á kostum í humátt að "dub" bassaleik.  Snilld.

   Níunda lagið er Hard Rain Is Gonna Fall eftir Bob Dylan.  Það er ekki allra að taka þetta magnaða Bob Dylan lag.  Nýverið klúðraði Brian Ferry því með því að keyra það áfram í of hröðum takti.  Ylfa Lind nær hinsvegar réttu "tempói" með því að fanga stemmninguna,  galdurinn við að byggja upp stígandann.  Enn og aftur fer Jakob Smári á kostum.  Hann hefur einstaklega góða "tímasetningu" (timing) á því að hlaða undir framvindu lagsins.

  Lokalagið er Vaki,  vaki vinur minn eftir Loft Guðmundsson.  Ég þekki þetta lag ekki.  Það er fallegt og framkallar söknuð gagnvart því að fleiri lög á plötunni séu ekki sungin á íslensku.  Sömuleiðis söknuð gagnvart því að platan inniheldur ekkert frumsamið lag.  Eftir stendur að öll platan er góð.  Vel sungin og vel flutt lög í alla staði.

  Ég gef þessari plötu mín bestu meðmæli.  Þetta er klárlega besta plata sem Idol-söngvari hefur sent frá sér.  Reyndar hvet ég ykkur til að sniðganga (næstum) allar aðrar Idol-plötur.  En þessi plata er virkilega áheyrileg. 

Kastljós í heimsókn

  Núna er heill herskari frá Kastljósi í heimsókn hjá mér.  Það er með ólíkindum hvað margir vinna hjá þessu litla batteríi.  Helgi Seljan er búinn að spjalla við mig um heima og geima.  Síðan verður þetta klippt til og sent út á morgun.  Þetta verður víst klippt þannig til að ég verð hálf kjánalegur.  Eins og ég var samt gáfulegur í viðtalinu óklipptu.

Bloggverkfalli aflýst

  Í síðustu viku hóf ég bloggverkfall til að mótmæla því að kona sem heitir Jóhanna Vilhjálmsdóttir hætti í Kastljósi sjónvarpsins.  Ég hét því að blogga ekki á ný fyrr en Jóhanna kæmi aftur á skjáinn.  Nú hef ég unnið fullnaðarsigur í málinu.  Ekki einungis hefur verið frá því gengið að Jóhanna kemur aftur til starfa hjá sjónvarpinu heldur fer ég líka í Kastljós.  Sennilega strax á morgun.

 

Nú er það bara harkan sex - og hvergi gefið þumlung eftir!

  Ég mótmæli því harðlega að Jóhanna Vilhjálmsdóttir sé hætt hjá Sjónvarpinu.  Svo harðlega og harkalega og ákveðið að ég hef ákveðið að fara í bloggverkfall.  Ég mun ekki blogga á ný fyrr en Jóhanna sést aftur á skjánum.  Ég óska eftir aðstoð frá ykkur.  Sú aðstoð felst í því að láta mig vita ef Jóhanna lætur á sér kræla í sjónvarpssal.  Ég er nefnilega ekki með sjónvarp.  Og vissi reyndar ekki að þessi manneskja ynni hjá Sjónvarpinu.  Ég hélt að hún ynni á einhverri útvarpsstöð.  Mig rámar í að hafa heyrt í henni í útvarpi.  Gott ef það var ekki í dægurmálaútvarpi rásar 2.  Að vísu er nokkuð síðan.  Hugsanlega einhver ár. 

Kastljós og sonur og tengdadóttir Jónínu Bjartmarz

 Eftirfarandi pistil bað kunningi minn mig um að birta á blogginu.  Hann hefur mjög vonda reynslu af þjónustu Útlendingastofnunnar.  Vegna þess að hann reiknar með því að þurfa að leita oftar til stofnunarinnar þá vill hann ekki blogga um þetta sjálfur.

  Ung kona,  Lucia Celeeste Molina,  fékk íslenskan ríkisborgararétt á mettíma. Eftir aðeins rúmlega ársdvöl í landinu. Svona eins og íþróttamenn hafa fengið,  Fischer og fleiri góðir menn (man ekki eftir neinni konu).

  Hún þurfti að komast í lánasjóð íslenskra námsmanna. Seinna kom í ljós að hún var tengdadóttir Jónínu Bjartmarz fyrrverandi formanns allsherjarnefndar (sem afgreiðir flýtimeðferð á ríkisborgararétti) og þáverandi ráðherra. Auðvitað vissi Bjarni Benediktsson formaður allsherjanefndar ekkert um það.

Enginn vænir Bjarna og frú Bjartmarz um spillingu.

Nú vill unga konan þakka fyrir sig með því að fara í mál við Kastljós.  Hún vill fá 3,5 milljónir fyrir að þessi sjónvarpsþáttur upplýsti um flýtimeðferðina. Það er munur að eiga tengdaforeldra sem bæði eru lögfræðingar.

Vestur á Ísafirði bíður lítil stúlka þess að vera hent úr landi.  Hún er ekki með rétta pappíra.  Hún á ekki foreldra sem eru lögfræðingar og eiga sand af seðlum.

Starfsmenn Útlendingastofnunar koma dónalega fram við fólk sem þarf að leita eftir þjónustu hjá þessari stofnun.

Stofnunin svarar ekki bréfum, svarar ekki tölvupósti, starfsmenn koma dónalega fram við viðskiptavini.  "Málið er í vinnslu,"  segir einn starfsmaður.  Næstu viku á eftir segir annar starfsmaður að það sé ekki byrjað að vinna í málinu.  "Það verður hringt í þig eftir hádegi" sem er alltaf svikið (hvað annað?).

Að fá ferðamanna visa fyrir manneskju utan EES tekur 4 til 6 mánuði, ef þú ert ekki klár á kerfinu.  Útlendingastofnun þarf ekki að fara eftir stjórnsýslulögum nema þegar henni hentar. Að veita upplýsingar er eitthvað sem stofnunin gerir ekki.

Það er munur að þekkja rétta fólkið, vera giftur inn í réttu fjölskylduna og ekki síst að eiga nóg af peningum.

Megi allar tengdadætur og tengdasynir Íslands vera velkomin til landsins alveg sama hvort viðkomandi persóna er gift inn í ríka forréttindafjölskyldu með sterk pólitísk tengsl og góð tengsl inn í stjórnkerfið eða ekki.

Lay Low á toppnum

 

  Fyrir viku síðan spáði ég því að platan Ökutímar með söngkonunni Lay Low myndi ná toppsætinu í þessari viku.  Þetta hefur gengið eftir.  Ökutímar er söluhæsta platan á Íslandi í dag.  Það er sérstakt fagnaðarefni.  Ekki aðeins er platan hin áheyrilegasta,  eins og Lay Low er von og vísa,  heldur rennur allur ágóðahlutur Lay Low af sölu plötunnar óskiptur til Aflsins,  systursamtaka Stígamóta á Norðurlandi. 

  Þess vegna hvet ég alla þá sem eiga eftir að kaupa þessa plötu til að draga það ekki lengur.  Best er að kaupa nokkur eintök og gefa þau í afmælisgjafir og stinga þeim með í fermingarpakkana.  Með því er vakin athygli á þarfri starfsemi Aflsins og stutt við bakið á fjársveltum samtökum.  Um leið er vakin athygli á höfðinglegu framtaki Lay Low.  Það getur orðið öðrum hvatning til að styðja Aflið.  Og viðtakandi getur hlustað á fína plötu.

www.aflid.muna.is

www.myspace.com/baralovisa     

Ódýrasti skemmtikraftur landsins

  Ég reyni eftir fremsta megni að missa ekki af útvarpsþætti Sverris Stormskers og Halldórs Einarssonar á Útvarpi Sögu.  Hann er á dagskrá á milli klukkan 16:00 til 18:00 á miðvikudögum.  Þeir félagarnir eru bráðfyndnir og eiga létt með að koma viðmælendum sínum í góðan gír.  Í dag ræddu þeir við Gurrí Har og Árna Johnsen.  Þau eru reyndar jafnan í góða gírnum og voru það einnig í spjallinu í dag.

  Í spjallinu við Árna kom fram að hann hefur í áranna rás komið um 3000 sinnum fram sem skemmtikraftur.  Það kom mér ekki á óvart því að ég hef sennilega séð hann syngja og spila á Þjóðhátíð í Eyjum,  Færeyskum dögum í Ólafsvík og víðar að minnsta kosti 5 - 10 sinnum.  En það sem kom mér á óvart er að Árni tekur aldrei krónu fyrir að skemmta með leik og söng.  Ef um mikinn útlagðan kostnað er að ræða þá lætur Árni skemmtanahaldarann afgreiða hann.  En sjálfur rukkar Árni ekki neitt fyrir sitt framlag.

  Þetta eru góðar fréttir fyrir blanka skemmtanahaldara.  Fólk er að nurla saman 200 þúsund kalli fyrir hinn og þennan söngvarann til að syngja við brúðkaup,  jarðarfarir eða í fermingarveislum.  En svo er hægt að fá Árna Johnsen syngja alveg ókeypis um Þykkvabæjarkartöflur og Gölla Valdason.

Enn einn hatursglæpur vesalinga

   Að morgni sunnudagsins 19. mars sl. barst lögreglunni tilkynning um að verið væri að ganga í skrokk á manni á Laugavegi. Voru bæði árásarmennirnir og árásarþolinn farnir af vettvangi þegar þangað var komið. Í frumskýrslu lögreglu segir að þar hafi verið staddur B sem kvaðst hafa séð tvo menn kýla mann frá Marokkó margsinnis og hafi þeir sparkað í hann liggjandi. Kvað hann fórnarlambið hafa farið blóðugt upp í bifreið sem ók á brott.

  Lögreglan hafði uppi á bílnum við Njálsgötu. Árásarþolinn gaf sig á tal við lögregluna og segir í frumskýrslu lögreglu að hann hafi verið bólginn í andliti og á nefi, vinstri augabrún sprungin og hann skrámaður á líkama. Sagði hann að tveir menn hefðu kýlt hann og sparkað í hann þegar þeir gerðu sér grein fyrir því að hann talaði ekki íslensku.

  Skömmu síðar voru tveir menn handteknir á mótum Barónsstígs og Eiríksgötu. Annar aðilinn kom heim og saman við þá lýsingu sem B gaf á árásaraðilanum.

 Þriðjudaginn 21. mars lagði A fram kæru á hendur ákærðu fyrir líkamsárás. Kvaðst hann hafa gengið einn frá miðbænum, austur Laugaveginn. Ákærðu hafi gengið samsíða honum og ávarpað hann á íslensku. Kvaðst A ekki hafa skilið það sem þeir sögðu og hafi svarað á ensku. Hafi annar mannanna þá farið að ýta við honum og öskrað á hann að tala íslensku. Hinn maðurinn, sá stærri, hafi slegið til hans og höggið komið á vinstra auga hans. Við höggið hafi hann vankast verulega og dottið. Mennirnir hafi þá sparkað í hann og hann fundið höggin koma víðsvegar í líkama sinn, m.a. í axlir og brjóstkassa. Hafi tveir menn frá Marokkó stöðvað bifreið sína þegar þeir hafi séð árásina og tekið hann upp í bifreið sína.

  Jens Sigurðsson,  Hellubæ, Andakílshreppi, Borgarfirði, og Pétur Jónsson, Björk, Andakílshreppi, Borgarfirði, voru ákærðir fyrir líkamsárás gegn A. Þótti sannað að Pétur hefði slegið A tvö högg íandlitið og að báðir ákærðu hefðu sparkað í hann liggjandi. Hlaut A við þetta brot á efri kjálka og augnbotni vinstra megin auk þess sem tvær tennur brotnuðu og hann hlaut sár og mar víða um líkamann. Jens og Pétur voru samkvæmt þessu sakfelldir og við ákvörðun refsingar var litið til hinna alvarlegu afleiðinga árásarinnar og að allt benti til þess að megin hvati hennar hefði verið neikvæð afstaða til útlendinga svo og að brotið var framið í félagi.

  Í læknisvottorði segir: 

Við skoðun hafi komið í ljós sár yfir vinstri öxl utan- og framanvert og hafi sár verið um 3 cm að lengd. Neðan við hægra herðablað hafi verið roðablettur/marblettur u.þ.b. 5 cm í þvermál. Á miðju baki vinstra megin rétt neðan við herðablað hafi einnig verið roðablettur og rof í húð. Svæði þetta hafi verið um 5x8 cm að flatarmáli. Fimm cm neðan við það svæði hafi verið annar álíka blettur um 10 cm í þvermál. Hann hafi verið rauður og með rofi á húð. Á innanverðum vinstri upphandlegg hafi verið 5x5 cm mar. Ofan á vinstri framhandlegg hafi hann verið með sár sem hafi verið um cm að lengd. Þá hafi hann verið með sár á vinstri augabrún en þar undir hafi verið marbunga sem hafi verið u.þ.b. 2x2 cm að flatarmáli. Þá hafi hann verið með marbungu undir vinstri kinn sem hafi verið 3x4 cm að flatarmáli. Við skoðun á munnholi hafi 1. og 2. tönn í neðri góm og hægra megin frá miðju verið brotin. Brotnað hafi úr efsta hluta tannanna. Þá hafi hann verið með marbungu á hægri kinn sem hafi verið 3x3 cm að flatarmáli. Ljóst hafi verið að um alvarlega áverka væri að ræða og hafi verið tekin röntgen- og sneiðmynd af andlistbeinum sem hafi sýnt brot í fram- og hliðarvegg á vinstra kinnbeini. Brotið hafi verið ótilfært en einnig hafi verið brot í augntóftarveggnum hliðlægt og vinstra megin. Einnig hafi sést vökvi (blæðing) á vinstri kinnholu. Augu hafi verið blóðhlaupin.

Málið var höfðað með ákæru 3. október 2006, þar sem báðum ákærðu er gefið að sök að hafa á Laugavegi í Reykjavík að morgni sunnudagsins 19. mars 2006 ráðist saman á brotaþola, A, slegið hann margsinnis íandlitið og sparkað margsinnis í andlit hans og líkama eftir að hann féll í götuna. Við þetta hafi brotaþoli hlotið brot á efri kjálka og augnabotni vinstra megin, tvær tennur í neðri gómi hafi brotnað og hann hafi hlotið sár og mar víða um líkamann. Upplýst er að vitnið, B, kvaddi lögreglu á vettvang og ákærðu voru handteknir nokkrum mínútum síðar. Var brotaþoli þá með áverka í andliti.

Vitnið, B, kvaðst fyrir dómi hafa orðið var við stimpingar er hann var á leið framhjá vettvangi. Hafi hann stöðvað bifreið sína og fylgst með og séð að tveir menn létu höggin dynja á brotaþola, hann hafi fallið á gangstéttina og hafi mennirnir þá sparkað í hann. Nánar spurður kvaðst hann hafa séð annan árásarmanninn, ákærða Pétur, sem hafði sig meira í frammi, veita brotaþola tvö til þrjú „alvöru högg“ í andlit. Hinn, ákærði Jens, hafi verið meira í að „sparka og bakka". Brotaþoli kvað stærri manninn, Pétur, hafa slegið sig fyrsta höggið í andlitið, hann hefði fallið og þá fengið spörk í andlit og víða um líkamann. Hann kvaðst hafa fengið spark í andlitið og reynt að verja það með höndunum. Hann kvaðst viss um að báðir mennirnir hefðu lamið hann og sparkað í hann, sá hávaxni hefði þó haft sig meira í frammi. Ákærði Pétur kvaðst sennilega hafa slegið brotaþola tvö högg íhöfuðið og hent honum frá sér en neitaði því að hafa sparkað í hann. Ákærði Jens kvað meðákærða Pétur hafa kýlt brotaþola tvisvar og taldi hann höggin hafa komið í andlit brotaþola. Sjálfur hefði hann hvorki slegið né sparkað.

Refsing ákærða Péturs er ákveðin fangelsi í sex mánuði. Þegar til þess er litið að hann var tvítugur að aldri þegar brotið var framið og hefur ekki áður verið fundinn sekur um refsiverða háttsemi þykir mega staðfesta ákvörðun héraðsdóms um að skilorðsbinda refsinguna.

Ljóst er að ákærði Jens hafði sig minna í frammi við árásina en sannað þykir að hann tók þátt í henni með því að sparka í brotaþola. Refsing ákærða Jens er ákveðin fangelsi í þrjá mánuði. Þegar til þess er litið að hann var 21 árs þegar atvikið átti sér stað og sakarferill hans hefur ekki áhrif á refsingu, þykir mega staðfesta ákvörðun héraðsdóms um að skilorðsbinda refsingu

Brotaþoli, A, krefst skaðabóta að fjárhæð 944.085 krónur, sem er nánar sundurliðuð í héraðsdómi. Var á það fallist í héraði að ákærðu bæri óskipt að greiða honum 274.095 krónur í skaðabætur með vöxtum og dráttarvöxtum auk þess sem fallist var á kröfu hans um greiðslu 87.150 króna í lögmannskostnað. Í samræmi við niðurstöðu dómsins sendi lögmaður brotaþola innheimtubréf til ákærðu 3. janúar 2007 með kröfu um greiðslu á396.093 krónum, en innifalið í þeirri tölu var reiknað vinnutap í þrjá daga, kostnaður vegna tannviðgerða og læknishjálpar og lögmannskostnaðar auk þjáningar- og miskabóta. Ákærði Jens greiddi hina umkröfðu fjárhæð 12. janúar 2007 án fyrirvara.

Samkvæmt ákæru hlaut brotaþoli áverka á efri kjálka og augnbotni vinstra megin, brot á tönnum og sár og mar víða um líkamann. Á læknisvottorðum samkvæmt sjúkraskrá á slysa- og bráðadeild og sérfræðings á háls-, nef og eyrnadeild er talað um þríbrot í andliti, þ.e. í fram- og hliðarvegg vinstri kjálka og augntóftarvegg, auk tannbrota. Fram kemur að brotin hafi setið vel og því ekki þörf á aðgerð, en dofi hafi verið í andliti. Nefbrot er ekki nefnt í þessum samtímagögnum og ekki í upphaflegri kröfugerð brotaþola. Verður því ekki fullyrt að læknisvottorð sem lagt hefur verið fyrir Hæstarétt, þar sem getið er um nefbrot og aðgerð vegna þess, tengist árásinni að öðru leyti en því að þar er lýst viðvarandi doða í andliti.

Upplýst er að brotaþoli var frá vinnu næstu þrjá vinnudaga eftir árásina, sem átti sér stað snemma á sunnudagsmorgni. Fyrir liggur læknisvottorð sem gefur til kynna að hann hafi verið veikur í skilningi í fjóra daga án þess að vera rúmliggjandi og verður því fallist á að honum beri þjáningabætur í þann tíma 4.360 krónur. Þegar virt eru þau meiðsli sem brotaþoli hlaut og að leiða má af nýju læknisvottorði að hann finni enn fyrir doða í andliti, eru miskabætur ákveðnar 400.000 krónur. Að öðru leyti er með vísan til forsendna héraðsdóms staðfest niðurstaða hans um skaðabætur til brotaþola og lögmannskostnað. Samkvæmt þessu skulu ákærðu greiða A óskipt 550.345 krónur í skaðabætur og lögmannskostnað.

Fólskuleg hatursárás á nýbúa

  Sex piltar réðust að manni á þrítugsaldri við verslun í Kópavogi og gengu í skrokk á honum. Maðurinn er frá Portúgal en hefur verið búsettur hér um nokkurt skeið. Hann kærði líkamsárásina og að hún hefði verið gerð á forsendum kynþáttafordóma.

  Maðurinn fór í verslunina 10-11 við Engihjalla á laugardagskvöldi. Þegar hann kom inn í verslunina voru piltarnir þar fyrir. Þeir gerðu hróp að honum og hreyttu í hann ónotum og svívirðingum sem vörðuðu útlendingslegt útlit hans. Þeir skipuðu honum að snauta heim og viðhöfðu fleiri ummæli sem beindust að því að hann væri útlendingur og ætti að hafa sig á burt.

  Maðurinn fór við svo búið út úr versluninni. Piltarnir eltu hann og á planinu fyrir framan verslunarmiðstöðina réðust þeir að honum og gengu í skrokk á honum. Hann flúði aftur inn í verslunina, en þá hafði afgreiðslumaðurinn áttað sig á því að ekki væri allt með felldu og ýtt á öryggishnapp við kassann. Hnappurinn er beintengdur við lögregluna sem kom skömmu síðar á vettvang.

  Maðurinn á íslenska eiginkonu og barn hér á landi. Hann var marinn og lerkaður eftir árásina.

  Á dögunum féll dómur í málinu:

  1.  nóvember 2007 kærði lögreglustjórinn á höfuðborgarsvæðinu Bjarna Snorrason,  Prestastíg 1, Reykjavík, og Ara Þór Þrastarson, Reyrengi 2, Reykjavík, fyrir líkamsárás, með því að hafa aðfaranótt sunnudagsins 5. nóvember 2006, fyrir utan verslunina 10-11 í Engihjalla 8 í Kópavogi, veist að Helder Kin Fajal, þannig að hann féll í götuna  og hafi ákærði Bjarni þá kýlt hann í andlit og í höfuð en Ari í kjölfarið sparkað í fætur hans þar sem hann lá í götunni, með þeim afleiðingum að hann hlaut bólgu vinstra megin á enni og hrufl á vinstra eyra, bólgu yfir nefrót, glóðaraugu, roðablett á hálsi og í hársverði upp við hnakka, rispur yfir spjaldhrygg vinstra megin og þreifieymsli á hálsi, hnakka, herðum og niður með hryggvöðvum.

  Ákærðu játuðu brot sín. Sannað er með játningum ákærðu og öðrum gögnum málsins að þeir eru sekir um þá háttsemi sem þeim er gefin að sök í ákæru og er brot þeirra þar rétt heimfært til refsiákvæða.

 Ákærði Bjarni mótmælir bótakröfu í ákæru og krefst þess aðallega að henni verði vísað frá dómi þar sem hún hafi aldrei verið birt honum, hún sé vanreifuð og ekki studd gögnum.  Til vara krefst hann verulegrar lækkunar bótakröfu.

  Ákærði Ari mótmælir einnig bótakröfu með sömu rökum og Bjarni, en auk þess telur hann að ekki sé um að ræða afleiðingar af hans þætti í brotinu sem geti varðað bótagreiðslu hans.

  25. október 2006 var Bjarni dæmdur fyrir brot gegn 244. gr. almennra hegningarlaga, en ákvörðun refsingar var frestað skilorðsbundið í tvö ár. Fram hefur komið í málinu að sá dómur var ekki birtur ákærða fyrr en eftir að brot það sem nú er ákært fyrir var framið og verður því ofangreindur skilorðsdómur ekki tekinn upp hér. Telst hæfileg refsing ákærða 100.000 króna sekt sem honum ber að greiða í ríkissjóð innan fjögurra vikna frá dómsuppsögu en sæta ella 8 daga fangelsi.

  Ákærði Ari hefur ekki hlotið refsiviðurlög, en ákæru á hendur honum var frestað skilorðsbundið vegna brots á 247. gr. almennra hegningarlaga, 10. nóvember 2006. Telst hæfileg refsing ákærða Ara 80.000 króna sekt sem honum ber að greiða í ríkissjóð innan fjögurra vikna frá dómsuppsögu en sæta ella 6 daga fangelsi.

  Í bótakröfu frá brotaþola var krafist 60.000 króna bóta vegna tekjutaps, 350.000 króna í miskabætur, 67.000 króna í áætlaðan útlagðan kostnað, auk lögmannskostnaðar. Brotaþoli á rétt á miskabótum úr hendi ákærða Bjarna og þykja þær hæfilega ákveðnar 100.000 krónur og verður hann einnig dæmdur til að greiða 45.000 krónur vegna lögmannskostnaðar. Kröfur um tekjutap og áætlaðan kostnað eru ekki studdar gögnum og verður þeim hluta bótakröfu vísað frá dómi. Ekki er að sjá að ákærða Bjarna hafi verið kynnt bótakrafan fyrr en við þingfestingu málsins og verður ákvörðun um vexti af kröfunni miðuð við það.

-----------------------

  Eins og sjá má þá er dómsmálið tómt klúður.  Einungis var gefin út ákæra á 2 af 6 árásarmönnum. Þeim voru ekki birtar bótakröfur og í þær vantaði gögn.  Bjarni var á skilorði en með árásinni er hann ekki talinn hafa rofið skilorð vegna þess að það átti eftir að birta honum skilorðsdóminn.

  Í lýsingu á afleiðingum árásarinnar vantar þetta:  Grunur um heilahristing þar sem fram kemur minnisgloppur eftir árásina og hálstognun, mar er undir glæru á hægra auga. það gleymdist að fá læknisvottorð frá lækni sem hefur sinnt fórnarlambinu eftir árásina þar sem upplýst hefði verið um styttingu í hálsvöðum og miklar höfuðkvalir út frá því!

Hatursglæpir

  Þeir eru kallaðir hatursglæpir þegar ráðist er á ókunnugt fólk einungis vegna uppruna þess.  Árásarmennirnir eru að öllu jöfnu ungir vesalingar sem einfaldast er að skilgreina sem "lúsera".  Ómenntaðir,  heimskir og fáfróðir unglingar sem upplifa sig sem undirmálsfólk.  Vanhæft til að fóta sig í samfélaginu vegna þess að það kemur frá "brotnum" heimilum,  hefur orðið fyrir einelti sem börn eða kynferðislegu ofbeldi.  Ég get alveg haft samúð með þessum aumingjum um leið og ég fordæmi aðferðir þeirra til að heimfæra sína vanlíðan yfir á ofbeldishegðun gagnvart þeim sem vegnar betur.

  Það er sjálfsagt að hafa samúð með þessum illa stöddu einstaklingum.  Ennþá nauðsynlegra er þó að samfélagið sé varið fyrir þeirra brengluðu skilgreiningu á samfélaginu.  Þessir unglingar reyna að réttlæta sína vondu stöðu með því að kenna nýjum Íslendingum um sem hafa fært okkur velsæld sem mælist vera sú mesta í heimi. 

  Krakkakjánar í Reykjanesbæ hafa stofnað félagsskap sem þeir kalla Ísland fyrir Íslendinga,  ÍFÍ.  Talskona þess félagsskapar hefur stimplað sig rækilega inn sem verðlaunahafa í heimsku,  fáfræði og ranghugmyndum.  Ég votta henni samúð fyrir ömurlega æsku og brenglaða tilveru.

  14 ára rugludallur er víst búinn að opna einhverja hatursnetsíðu á myspace sem beinist gegn fjölmennum hópi Pólverja á Íslandi.  Strákgreyið ætti frekar að leita sér hjálpar hjá Stígamótum.  Vandamál hans er stórt og ég ætla ekki að ráða frekar í það að sinni. Hinsvegar ætla ég að fylgja frekar eftir umfjöllun um hatursglæpi grunnhygginna ræfla. 

  Það gerist æ oftar að íslenskir unglingahópar ráðast með barsmíðum á einn og einn nýbúa fyrir það eitt að viðkomandi er ekki innfæddur. 

  Ég er alltaf til í að taka þátt í málefnalegri umræðu um það hvað íslensk stjórnvöld hafa unnið illa - eða ekki - heimavinnu varðandi það hvernig taka átti á móti þeim fjölda útlendinga sem hingað hafa komið síðustu ár vegna skorts á vinnuafli.

Söluhæstu tónlistarmenn sögunnar

  Þessi listi er sóttur í smiðju Samtaka bandarískra hljómplötuútgefenda og mælir þess vegna einungis plötusölu í Bandaríkjunum.  En bandaríski plötumarkaðurinn er sá stærsti í heimi ásamt því að hafa mikil áhrif á heimsmarkaðinn.  Fjölmiðlar vítt og breitt um heim fylgjast með bandaríska músíkiðnaðinum,  birta bandaríska vinsældalista og fréttir. 

  Listinn speglar upp að einhverju marki hlutföll í heimssölu.  Á heimsmarkaði hefur selst röskur milljarður af plötum með Bítlunum.  Á heimsmarkaði er Presley næst söluhæstur.  Vinsældir kántrý-boltans Garths Brooks eru hinsvegar bundnar við bandaríska markaðinn.

  Þannig lítur listinn út.  Talan fyrir aftan nöfnin stendur fyrir milljónir eintaka.

1    Bítlarnir 170

2    Garth Brooks 128

3    Elvis Presley 118,5

4    Led Zeppelin 111,5

5    Eagles 98

6    Billy Joel  79,5

7    Pink Floyd 74,5

8   Barbra Streisand  71

9    Elton John 69,5

10  AC/DC 69

11  George Strait 67

12  Aerosmith 66,5

13  Rolling Stones 66

14  Bruce Springsteen 63,5

15  Madonna 63

16  Mariah Carey 61,5

17  Michael Jackson 60,5

18  Metallica 57

19  Van Halen 56,5

20  Whitney Houston 54

 

Músakjöt er gott

 

  Ég fagnaði nýju ári í gærkvöldi með vinafólki frá Víetnam.  Það vill heldur kalla nýja árið ár músarinnar en ár rottunnar.  Þess vegna var boðið upp á léttsteikt músakjöt.  Að vísu ekki sem aðalrétt vegna þess að á víetnömsku veisluborði er enginn aðalréttur heldur fjölbreytt úrval af smáréttum. 

  Músakjötið var frekar af skornum skammti því að það veiddust færri hagamýs en vonast var til.  Þar fyrir utan er örlítið minna kjöt á einni mús en til að mynda hrossi eða belju (hvað verður annars um allt beljukjötið á markaðnum?  Víða er boðið upp á nautasteik,  nautahakk,  kálfabjúgu o.s.frv.  en beljukjöt virðist hvergi standa neinum til boða).

  Músakjötið kom mér á óvart.  Það er veislumatur.  Bragðast einna líkast kjúklinga- og krókódílakjöti.  Er samt rauðleitara.  Þess vegna drukkum við rauðvín með.  Maður á nefnilega að drekka vín með mat og hafa það í sem líkustum lit og kjötið.  Það er líka gott að drekka mikið af því eftir matinn.  Og jafnvel töluvert daginn eftir.

Íslensk hljómsveit komin í lokaúrslit í alþjóðlegri lagakeppni

  Fyrir nokkrum dögum sagði ég frá því að íslenska hljómsveitin Soundspell væri komin í undanúrslit lagakeppninnar International Songwriting Competition í Bandaríkjunum (http://jensgud.blog.is/blog/jensgud/entry/428416).  Soundspell hefur vegnað heldur betur vel í keppninni því að núna eru hljómsveitin komin í lokaúrslit (13 finalists) með lagið Pound http://www.songwritingcompetition.com/ , en þeir voru einnig með lagið Her Favourite Colour Is Blue sem "semifinalists".

http://www.songwritingcompetition.com/winners.htm

Hver og einn getur kosið DAGLEGA um lögin á ofangreindri netsíðu út þennan mánuð.

Heppileg heppni

  Í Fréttablaðinu í dag er ítarleg frásögn af hrakningum manns á sextugsaldri sem skreið illa slasaður í klukkutíma eftir hjálp í kjölfar þess að hafa velt vélsleða við Landmannahelli í fyrrakvöld.   Maðurinn lenti undir sleðanum og fótbrotnaði illa á að minnsta kosti tveimur stöðum og eitt beinbrotið opið.  Þegar Flugbjörgunarsveitin á Hellu kom manninum til aðstoðar var hann örmagna.  Hann kom ekki upp orði heldur klóraði í ferðafélaga sína til að vekja þá.

  Slysið varð um miðnætti.  Lögreglu barst tilkynning um klukkan hálf tvö.  Þyrla Landhelgisgæslunnar fór í loftið tæpum klukkutíma síðar.  Hún gat hinsvegar ekki lent við Landmannahelli vegna óveðurs og vonds skyggnis.  Snjóbíll björgunarsveitarinnar var því keyrður að Búrfelli,  þar sem þyrlan gat lent og flaug með manninn á Borgarspítalann í Reykjavík. 

  Maðurinn gekkst undir aðgerð í gær en var það þrekaður að hann treysti sér ekki til að ræða við blaðamann Fréttablaðsins. 

  Í undirfyrirsögn Fréttablaðsins segir að heppnin hafi verið með manninum.  Vonandi fer ég ekki langt yfir strikið í ruddalegri kaldhæðni þegar ég þakka fyrir að vera ekki eins heppinn og þessi maður.  Ég óska honum alls hins besta og megi hann ná heilsu sem fyrst.

Færeysk hljómsveit slær í gegn í Danmörku

 

  Undanfarnar vikur hefur þátttaka og velgengni færeysku pönksveitarinnar The Dreams í dönsku söngvakeppninni Melodi Grand Prix vakið mikla athygli í Danmörku.  Sömuleiðis hafa Færeyingar fylgst vel með sínum mönnum.  The Dreams komst áfram í öllum þrepum keppninnar og endaði í lokakeppninni núna í fyrrakvöld. 

  Þar var það danskur súkkulaðistrákur sem sigraði.  Strákarnir í The Dreams eru síður en svo ósáttir.  Vegna þátttöku þeirra í keppninni hafa danskir fjölmiðlar slegist um viðtöl við þá,  lag þeirra "La' mig være"hefur fengið góða útvarpsspilun og einnig verið spilað á sjónvarpsstöðinni DR1.  Sem dæmi um árangurinn þá er The Dreams þegar bókuð á 15 danskar tónlistarhátíðir í sumar.  Það er meira en nokkur vinsæl dönsk hljómsveit getur státað af.

  Ég veit ekki hvernig staðið er að vali á sigurvegara í Melodi Grand Prix.  Ég hef grun um að sérstök dómnefnd hafi mikið vægi í niðurstöðunni.  Samkvæmt umsögn fjölmiðla náði The Dreams upp lang bestu stemmningunni á úrslitakvöldinu.  Tryllti lýðinn,  eins og sagt er.  Í skoðanakönnun á heimasíðu keppninnar veðja lang flestir - af þeim sem taka afstöðu - á sigur The Dreams. 

  Það er ekki alltaf vont fyrir alla Færeyinga að tilheyra danska markaðnum - þó að ég sé hlynntur "200% loysing".

Nýr og ótrúlega ódýr sænskur bíll að koma á markað

  Indverjar og Kínverjar setja von bráðar á heimsmarkað ótrúlega ódýra fólksbíla.  Bíla sem munu aðeins kosta í kringum 200 þúsund kall.  Sænski húsgagnaframleiðandinn Ikea ætlar að blanda sér í þennan slag um ódýra bíla af fullum krafti.  Til þess hyggst Ikea nota aðferðina sem hefur gert fyrirtækið að stórveldi á heimsmarkaði.  Aðferð sem felst í því að hönnun vörunnar er afar einföld og kaupandinn setur hana sjálfur saman.  Við það sparast verulegur hluti framleiðsluverðs ásamt því sem niðurpökkuð varan tekur mun minna rými.  Það sparar drjúgt í sendingarkostnaði og lagerplássi.   

  Til að sjá Ikea bílinn betur þarf að smella á myndina.  Þá stækkar hún og verður skýrari.  Rétt er að taka fram að þarna er þegar búið að setja "boddýið" saman á þeirri hlið bílsins sem snýr að okkur.  Það er bara gert til að fólk átti sig betur á því hvernig bíllinn kemur til með að líta út. 

Sjaldan fellur eggið langt frá hænunni

  Fyrir nokkrum árum gaf Gísli Marteinn Baldursson upp í bók að hann væri með prófgráðu í stjórnmálafræði.  Við nánari skoðun kom í ljós að þetta var ofmat.  Gísli Marteinn hafði ekki lokið prófi.  Hann bara hélt það.  Faðir Gísla Marteins,  Baldur Gíslason,  er skólastjóri Iðnskólans í Reykjavík.  Á dögunum fékk Baldur áminningu frá menntamálaráðherra.

  Fyrir hvað?  Jú,  Baldur hélt að nokkrir nemendur Iðnskólans hefðu tekið þar próf án þess að þeir hafi gert það.  Hljómar kunnuglegt,  ekki satt? 

Ólafur treystir Gísla Marteini

Skúbb! Dire Straits-liði semur músík fyrir íslenska kvikmynd

 

  Kvikmyndagerðarmaðurinn Villi Ásgeirs var að gefa út stuttmyndina Svartan sand á DVD.  Hún var tekin haustið 2006.  Með aðalhlutverk fara Jóel Sæmundsson og Anna Brynja Baldursdóttir.  Villi er mikill aðdáandi bresku hljómsveitarinnar Dire Straits.  Hann gerði sér því lítið fyrir og hafði samband við hljómborðsleikara Dire Straits,  Guy Fletcher,  og spurði hvort að hann væri til í að semja músík fyrir myndina.

  Guy tók erindinu vel,  hófst þegar handa og skilaði af sér músíkinni í fyrravor.  Núna í ársbyrjun sendi Guy nýja og endurbætta útgáfu af Black Sand Theme til Villa.  Þá útgáfu hefur Guy lokalag á fyrstu sólóplötu sinni,  Inamorata.  Hún kom út núna 28.  janúar.  Guy bauð Villa að nota hana einnig í myndinni,  sem var vel þegið.

  Villa þykir þetta eðlilega mikið ævintýri,  munandi eftir sér ungum dreng horfa á Guy Fletcher spila í myndbandinu Money for Nothing.  Guy gekk í Dire Straits vorið 1985.  Hljómborðsleikur hans setti strax sterkan svip á tónlist Dire Straits og var leiðandi í lögum á borð við Walk of Life,  Brothers in Arms og fleirum næstu árin.  Með stílsterkum hljómborðsleik Guys náði Dire Straits loks efsta sæti bandaríska vinsældalistans,  bæði með smáskífum og stórum plötum.

  Áður en Guy gekk í Dire Straits var hann í Roxy Music með Brian Ferry og félögum.  Hann hefur einnig spilað inn á plötur með Tinu Turner,  Mick Jagger og mörgum öðrum stórlöxum.

www.oktoberfilms.com

www.vga.blog.is

www.guyfletcher.co.uk

  Guy Fletcher er þessi í rauðu skyrtunni á myndunum af Dire Straits efst.

Hann á afmæli í dag - kannski

  

  Margir héldu upp á afmæli bandaríska blúsistans Leadbellys í dag.  Meðal annars gerði Guðni Már Henningsson meistaranum góð skil á rás 2 í dag.  Hlustendum greinilega til ánægju.  Unga fólkið er að uppgötva Leadbelly.  Enda nauðsynlegt að þekkja hans framlag til rokksögunnar.  Já,  og blússögunnar eða bara dægurlagasögunnar.

  Fæðingardagur Leadbellys er reyndar á hreinu.  Samkvæmt sumum heimildum fæddist hann 20.  janúar 1889.  Aðrir heimildir gefa upp 23.  janúar 1888.  Enn aðrar 29.  janúar 1885.  Nákvæmur fæðingardagur hans verður áfram á reiki.

  Leadbelly var kvensamur skapofsamaður.  Ósjaldan lenti hann í illvígum slagsmálum og sat oftar en einu sinni fangelsi fyrir morð.  Hann var samanrekinn kraftaköggull og illvígur.  Dróg jafnvel upp hníf þegar kom til ágreinings.

  Leadbelly náði góðum tökum á 12 strengja gítar.  Spilaði á hann þannig að hljómaði eins og tveir gítarleikarar væru að verki.  Leadbelly er enn í dag kallaður "konungur 12 strengjanna". Hann lést 1949.  

  Leadbelly var/er einn af bestu söngvahöfundum Bandaríkjanna og hefur verið "coveraður" af mörgum helstu poppstjörnum heims.  Dæmi:

  Cotton Fields = The Beach Boys,  Creedence Clearwater Revival,  Árni Johnsen (Kartöflugarðarnir),  Lúdó & Stefán.

  Goodnight Irene = Jerry Lee Lewis,  Brian Wilson,  Van Morrison,  Brian Ferry,  Tom Waits,  The Weavers,  Michelle Shocked,  Siggi Björns,  Haukur Morthens...

  Rock Island Line = Johnny Cash,  Lonnie Donegan,  Little Richard,  Bubbi Morthens...

  Alberta = Eric Clapton

  Midnight Specials = Creedence Clearwater Revival,  Van Morrison,  ABBA...

  When Did You Sleep Last Night / In the Pines = Nirvana (Nirvana "coveruðu" 3 önnur lög eftir Leadbelly.  Skömmu fyrir sjálfsvíg sitt sagðist Kurt Cobain ætla að hætta hljómsveitarspili og gerast nútíma Leadbelly.  Hvað svo sem það átti að vera),  Mark Lanegan...

  Pick A Bale of Cotton = ABBA,  Bubbi...

  Burgeose Blues = The Rolling Stones (þeir kalla lagið When the Wips Come Down),  Bubbi...

  Gallis Pole = Led Zepplin (stafsettu það Gallows Pole á LZ III)

  Black Betty = Tom Jones,  The Ram Jam...

  Ég gæti haldið áfram langri upptalningu með Ry Cooder,  Greatful Dead,  The Doors,  Nick Cave...

  Til gamans má geta að The White Stripe,  The Hole og Siggi Lee Lewis enda jafnan hljómleika sína með Leadbelly lögum.   

  Ummæli:

  - Þetta byrjaði allt með Leadbelly.  Janis Joplin

  - Allt umlykjandi voru söngvarar eins og Leadbelly sem blönduðu saman allrahanda músíkstílum.  Roy Orbinson

  - Leadbelly var ekki einn af ahrifavöldunum.  Hann var áhrifavaldurinn.  Án hans væri ég ekki það sem ég er.  Van Morrison

  -  Fyrirmyndin er Leadbelly.  Curt Cobain

  - Hann (Leadbelly) var einn helsti drifkraftur minn á æskuárum.  Robert Plant

Frábært gæludýr

 

  Í DV í gær var viðtal við unga konu sem kvartaði undan silfurskottum í íbúð sem hún leigir.  Í sömu grein segist leigusalinn ætla að senda til hennar meindýraeyði síðar á árinu.  Heyr á endemi!  Meindýraeyði!  Silfurskottan er ekki meindýr fremur en hundar,  kettir,  páfagaukar,  naggrís eða gullfiskur.  Skrifin í DV eru ekkert annað en svívirðilegt níð um einstaklinga sem geta ekki svarað fyrir sig.

  Silfurskottan gerir engum mein.  Þvert á móti þá hjálpar hún til við að halda baðherberjum hreinum,  en þar er hún vön að halda sig.  Henni þykir rakinn þar notalegur,  sem og hitastigið.  Hún er kuldaskræfa.

  Silfurskottan má ekki sjá óhreinindi öðru vísi en reyna að hreinsa þau upp.  Hún borðar þau.  Þegar þið sjáið glansandi hrein og fín baðherbergi þá þarf ástæðan ekki að vera sú að húsbóndinn á heimilinu sé ofvirkur hreingerningakarl.  Það er alveg eins líklegt að vinalegar silfurskottur sjái um hreingerninguna.  Þær telja það ekki eftir sér.

  Vegna þess hvað silfurskottan er dugleg við að borða óhreinindi þá þarf ekki að fóðra hana sérstaklega.  Reyndar þykir henni vænt um að fá smá brauðmylsnu á hátíðisdögum.  En hún sníkir ekki.  Hún vill ekki láta hafa mikið fyrir sér.

  Silfurskottan er hljóðlát.  Svo hljóðlát að þó hún sé klipin með glóandi töng þá þykist hún ekki taka eftir því og gefur ekki frá sér múkk.  Lítið er vitað um gáfnafar silfurskottunnar.  Hún gegnir ekki nafni.  Það getur haft eitthvað með eyrnaleysi hennar að gera.

  Silfurskottan er einfari.  Henni þykir gaman að rölta alein fram og til baka um gólf.  Helst í rökkri.  Henni er illa við sviðsljósið.  Það gerir eðlislæg feimnin.  Hún er ekki jafn áhugasöm um kynlíf og til að mynda kanínur eða rykmaurar.  En slær svo sem ekki hendi á móti smá leik þegar önnur silfurskotta reynir við hana.  Á móti fjörlitlu kynlífi nær silfurskottan háum aldri,  á mælikvarða skordýra.  Við gott atlæti getur hún alveg komist á sjötta ár.  Þá er lengd hennar komin vel á annan cm og hún orðin feit og pattaraleg.   

  Í fljótu bragði er erfitt að finna jafn frábært gæludýr.  Það þarf ekkert fyrir silfurskottunni að hafa.  Það þarf aldrei að hleypa henni út.  Hún er ekki geltandi,  tístandi eða mjálmandi í tíma og ótíma.  Það þarf ekki að þrífa hana,  klippa hana eða neitt slíkt.  Hún er prýði á hverju heimili.  Kannski ekki stofustáss vegna þess að hún heldur sig á baðherberginu.  En gullfalleg.  Eða réttara sagt silfurfalleg og gljáandi.  Það ættu glysgjarnir Íslendingar að kunna að meta.