Plötuumsögn

 

 

  - Titill:  LIVE in Garðabær

  - Flytjandi:  Marel Blues Project

  - Einkunn:  ****

 

  Er Marel ekki framleiðandi tækjabúnaðar í Garðabæ fyrir fiskvinnslur?  Ég hélt það.  En Marel er líka blúshljómsveit í Garðabæ.  Tilviljun?  Veit það ekki.

  Liðsmenn Marel Blues Project eru:  Brynjar Már Karlsson (bassi),  Haukur Hafsteinsson (trommur og söngur), Haraldur Gunnlaugsson (gítar og söngur) og Jóhann Jón Ísleifsson (gítar).  Platan er skráð sem hljómleikaplata (live).  Og það í Garðabæ.  Fjölmennasta kaupstað landsins án pöbba,  skemmtistaðar eða annarrar aðstöðu til skemmtanahalds.  Það er hvergi hægt að kaupa bjór í þessum 14 þúsund manna bæ.  Jú,  reyndar er hægt að kaupa sænskan bjór með mat í IKEA.  

  Á móti aðstöðuleysinu og bjórleysinu vegur þessi fína blúshljómsveit,  Marel Blues Project.  Hún ræðst ekki á garðinn þar sem hann er lægstur heldur spreytir sig á mörgum af þekktustu perlum blússögunnar.  Það segir kannski eitthvað að næstum því öll lögin á plötunni eru til í "orginal" útgáfu í mínu fátæklega blúsplötusafni (innan við 100 plötur).    

  Platan hefst á ballöðunni "Three O´Clock Blues" eftir BB King.  Sagt hefur verið um BB King að hann segi meira með einum teygðum gítartóni en allir hríðskotagítaraleikarar heims til samans með sínum hraðskreiðustu tónstigaklifrum.  Þetta vita Makrel Blues Project liðar og halda sig blessunarlega við útfærslu BB King (þeir Eric Clapton afgreiddu þetta líka á dúettplötu sinni "Riding With The King").  Hafsteinn syngur af innlifun og fer vel með.  Hljómurinn á plötunni er hreinn og tær.  Lifandi flutningurinn er eins og best verður á kosið.

  Næsta lag er "29 Ways" eftir Willie Dixon.  Hraðskreiður djassaður rythma-blús.  Andrea Gylfa syngur kröftuglega, smá hás og "töff".  Hún fer á kostum.  Sigurður Perez Jónsson blæs í saxafón og Sævar Garðarsson í trompet.  Stuðlag.  Blásararnir setja skemmtilegan og djassaðan svip á flutninginn.

  Því næst er það "Meaning Of The Blues".  Ég þekkti þetta lag bara sem ljúfan djass.  Með heimavinnu (leit á youtube) fann ég útfærslu Joe Bonamassa á laginu.  Hún er auðheyranlega fyrirmynd Marel Blues Project.  Þetta er í humátt að metal-blús. Söngvari er Einir Guðlaugsson og Sveinn Ingi Reynisson er á orgel.  Einir hefur sterka söngrödd og beitir öskursöngstíl í áreynslumeiri köflum.

  Í fjórða laginu taka ljúfmennska og mildi við.  Rakel María Axelsdóttir syngur "Bring It On Home To Me" eftir Sam Cook. Þetta lag er víðfrægt í flutningi The Animals,  Bítlabræðranna Jóns Lennons og Páls Magnússonar,  svo og bandaríska blúsdúettsins sem talaðist ekki við en starfaði (í óvild) saman áratugum saman,  Brownie McGhee og Sonny Terry.  Aftur setja blásararnir áðurnefndu sterkan ballöðusvip á flutninginn.  Rakel María syngur lagið vel. Af látleysi til að byrja með (og inn á milli) en gefur svo bærilega í þegar á líður.  

  Við tekur "Ain´t Doin´ Too Bad" eftir Deadric Malone.  Brynhildur Óskarsdóttir syngur.  Hratt rytma-blús lag. Enn og aftur setja blásarnir sterkan svip á lagið.  Brynhildur afgreiðir lagið með stæl.  

  Sjötta lagið er "Crossroads" eftir Robert Johnson.  Þetta er virkilega bratt dæmi.  Eric Clapton hefur gert því góð skil í hálfa öld.  M.a. með The Cream, Derek & The Dominos og ótal sólóhljómleikum. Marel Blues Project gefur engan afslátt.  Valgarð Thoroddsen syngur af öryggi og innlifun.  

  Þá er röð komin að Billie Holiday "djass-standardinum" "Lady Sings The Blues".  Engin afgreiðir það betur en Andrea Gylfadóttir.  Virkilega glæsilegt.  Hún er á ljúfu tónunum framan af en sveiflar sér síðan snyrtilega í hása koktóna í bland. Yndislegt.       

  Margir hafa spreytt sig á "Stormy Monday" eftir T-Bone Walker.  Þar á meðal íslenska hljómsveitin Eik á áttunda áratugnum.  Hér syngur Brynhildur Oddsdóttir það í ballöðu-stíl.  Allt notalega lágstemmt. Engu að síður kraumar kraftur undir handan við hornið. Saxinn er á góðu flugi.  Trompetinn blíðkar áhersluna þegar fram vindur.      

  "Give Me Some Reason" eftir Tracy Chapman er eitt girnilegasta og sterkasta blúslag síðustu áratuga. Það rífur í.  Marel Blues Project heldur sig við upprunaútgáfuna.  Sem er gott.  Það voru sérkenni hennar;  hrynjandinn og stemmningin,  sem sveipuðu lagið þeim heillandi ljóma sem stimplaði það inn.  Rakel María syngur.  Þetta er uppáhasldslag mitt á plötunni.  Til gamans má geta að á þútúpunni (youtube) má finna skemmtilega afgreiðslu höfundar,  Tracy Chapman,  og Eiríks Klappmanns (Eric Clapton) á laginu.   

  Óvænt er mætt til leiks lagið "Personal Jesus" úr smiðju bresku tölvupoppsveitarinnar Depeche Mode.  Ég er tvístígandi varðandi þetta lag.  Sem ekki aðdáandi Depeche Mode en hrifinn af flutningi Jóns Reiðufés (Johnny Cash) á laginu þá,  já,  í flutningi MBP er það ekki að gera mikið fyrir mig.  Söngur Snorra Þorkelssonar er samt alveg ljómandi góður.  Kannski er þetta lag ágætt hvað varðar fjölbreytni plötunnar?

  "Mama Talk To Me" eftir JB Lenoir er afturhvarf til gamla blúsins.  Haraldur Gunnarsson syngur. Töluvert rokkaðra en "orginalinn".

  Margoft hef ég heyrt gítarleikara stæra sig af því að geta spilað Jimi Hendrix alveg eins og Jimi Hendrix. Þá gleymist að Hendrix var frumkvöðull í gítarleik.  Hann kom með nýja afstöðu til gítarleiks.  Það er alveg hægt að herma eftir gítarleik hans.  En snilli hans lá í nýrri útfærslu á gítarleik.  Hann var líka góður lagahöfundur og frábær túlkandi.  Það toppar enginn Jimi Hendrix.  Marel Blues Project veit það. Afgreiðir "Purple Haze" lipurlega í Hendrix-stíl.  Söngvari er Einir.

  Svipað má segja um Janis Joplin.  Andrea Gylfa og MBP afgreiða "Piece Of My Heart" glæsilega.  Andrea er ekki að herma eftir Janis.  En fylgir stemmningunni.  Er á mildum nótum þar sem við á,  hás á réttum stöðum og fer nálægt öskursöngstíl í átakamestu köflum.          

  Lokalag plötunnar er "My Man" eftir Hauk Hafsteinsson.  Rakel María syngur. Billie Holiday-djössuð lágtempruð sveifla.  

 Heildarniðurstaða:  Virkilega áheyrileg og vel heppnuð blúsplata. Allir hljóðfæraleikarar eru góðir og söngvarar eru hver öðrum ekki bara góðir heldur frábærir.  Stemmningin er "lifandi flutningur".  Þannig er góður blús.

 

           

                    

  

  

            

       

Vinsælasta bókin á Íslandi í dag

  Fyrir viku eða svo spáði ég því á þessum vettvangi að jólapakkinn í ár yrði "Árleysi árs og alda".  Annað kom ekki til greina.  Pakkinn samanstendur af frábærri ljóðabók verðlaunahöfundarins Bjarka Karlssonar og hljómplötu með 21 sönglagi.  Þar eru söngvar Bjarka afgreiddir af Skálmöld,  Blaz Roca,  Vinum Dóra,  Megasi,  Steindóri Andersen og svo framvegis.  Frábær plata.  Í pakkanum er einnig hljóðbók á geisladiski.  Ljóðabókin er myndskreytt bráðskemmtilegum teikningum Margrétar Matthildar Árnadóttur.  Hún var aðeins 13 ára þegar hún teiknaði flottu myndirnar.

  Spá mín um vinsældir pakkans hefur gengið eftir.  Hann er í 1. sæti yfir söluhæstu bækurnar á Íslandi í dag.  Ef pakkinn væri skilgreindur sem hljómplata þá er hann söluhæsta platan í dag.

  Fyrri færslan: 

 http://jensgud.blog.is/blog/jensgud/entry/1517452/

 

   

Dóri DNA lýgur

  Á Rás 2 er daglega boðið upp á gríninnskot frá grínistanum Dóra DNA.  Steypuvélin kallast "sketsarnir".  Þeir eru alveg ágætlega fyndnir.  Það vantar ekki.  Í nýlegu innskoti dregur Dóri DNA nafngreinda dagskrárgerðarmenn Rásar 2 sundur og saman í góðlátlegu háði.  Ekkert að því.  Í niðurlaginu segir:  "Við ætlum að hlusta á fáránlega slappt færeyskt lag sem mun aldrei "meika" það.  Okkur drullusokkunum á Rás 2 finnst það bara einum of krúttlegt."  

  Að þessu sögðu er "Ormurin langi" með færeysku hljómsveitinni Tý spilað.  Það er haugalygi að þetta lag muni aldrei "meika" það.  Hérlendis var þetta vinsælasta lagið 2002.  Seldist í 4000 eintökum.  Og er ennþá að seljast hér.  Á sama tíma var það vinsælasta lagið í Færeyjum.  

  Hljómsveitin Týr er í dag stórt nafn á alþjóðamarkaði víkingametals.  Hún kemur fram á stærstu þungarokkshátíðum heims.  Hún fer einnig létt með að túra um heiminn sem aðalnúmer hvort sem er í Evrópu eða Ameríku.  Fyrir nokkrum árum náði Týr 1. sæti ameríska CMJ vinsældalistans.  Hann mælir spilun í öllum framhaldsskólaútvarpsstöðvum í Bandaríkjunum og Kanada.  CMJ er iðulega hérlendis kallað "bandaríska háskólaútvarpið".  

  Það er sama hvort að kíkt er í plötubúðir í Þýskalandi,  Finnlandi eða Hollandi.  Plötur Týs er þar að finna í annars fátæklegu úrvali sem samanstendur einungis af allra vinsælustu plötum allra vinsælustu flytjanda.

  Myndbönd með Tý njóta hylli.  "Sinklars Visa" hefur verið spilað 2 milljón sinnum.  "Hold The Heathen Hammer Hig" hefur verið spilað næstum 4 milljón sinnum.  Þetta kallast að vera búinn að "meika" það. 

  Skamm, skamm, Dóri DNA; að gera lítið úr vinsældum, afrekum og sterkri stöðu Týs hérlendis og á heimsmarkaði. 

 

  

Dóri DNA lætur Rás 2 heyra það

Andri á Færeyjaflandri - leiðrétting - útskýring

 

  Sjónvarpsþáttaserían Andri á Færeyjaflandri hefur heldur betur slegið í gegn.  Situr sem fastast á Topp 10 yfir það sjónvarpsefni sem flestir horfa á hverju sinni.  Enda bráðskemmtileg og fróðleg.   Á Fésbókinni hneykslast óþarflega margir á því að samtöl Andra við Færeyinga fara fram á ensku.  

 

  Förum yfir það.  Áratugum saman stunduðu margir Færeyingar sjó við Íslandsstrendur.  Áratugum saman hlustuðu Færeyingar til sjós og í Færeyjum á íslenska útvarpið. Færeyingar skildu íslensku. það var auðvelt fyrir Færeyinga að spjalla við Íslendinga á íslensku.  

  Þetta breyttist 1991.  Þá fauk langbylgjumastur íslenska útvarpsins út í veður og vind.  Íslenska útvarpið datt út.  Í kjölfarið lengdi færeyska útvarpið dagskrá sína úr stuttri daglegri útsendingu yfir í langa útsendingu.  Að auki hömstruðu Færeyingar gervihnattadiska og fóru að fylgjast með mörgum útlendum sjónvarpssendingum.

 

  Þegar ég fór fyrst til Færeyja,  1993,  var auðvelt að ræða við Færeyinga á íslensku.  Þeir skildu mig og ég skildi þá.  

 

  Á þessari öld hefur orðið mikil breyting.  Færeyska hefur færst hratt frá íslensku.  Útlendu sjónvarpsefni er kennt um.  Líka því að Færeyingar sækja í æ ríkari mæli framhaldsnám til Danmerkur.  Náminu fylgir iðulega lengri búseta í Danmörku áður en aftur er snúið heim til Færeyja (oft með dönskum maka). 

 

  Ungir Færeyingar skilja í dag ekki íslensku.  Íslendingar skilja í dag ekki færeysku.  

 

  Færeyskir fjölmiðlar hafa oft samband við mig.  Vilja ræða tiltekin fréttnæm mál eða hafa almennt viðtal.  Ég skil færeysku ágætlega.  Ég tala líka einfalda færeysku. En alltaf setja Færeyingarnir þennan fyrirvara:  "Til að forðast misskilning skulum við spjalla á ensku."  Vissulega eru ótrúlega mörg orð þau sömu í færeysku og íslensku en hafa ólíka merkingu. Ég þekki mörg dæmi þess.  

 

  Andri Freyr talar dönsku. Færeyingar eru nánast tvítyngdir.  Þeir tala dönsku eins og innfæddir.  Málið er að helmingur Færeyinga hefur andúð á dönskum yfirvöldum,  dönskum embættismönnum og dönsku. Nýleg skoðanakönnun í Færeyjum leiðir í ljós að ungir Færeyingar hafna dönskunámi og vilja að enska sé tekin upp sem annað tungumálanám í staðinn.   

 

   

  

  

     

Snobb og heimska

  Ég átta mig ekki að öllu leyti á fólki sem borgar á aðra milljón króna fyrir úr.  Né heldur á fólki sem borgar á sjöunda hundrað króna fyrir eftirlíkingu af Rolex-úri. Ég hef aldrei átt úr sem kostar meira en 10 þúsund kall. Ég veit að vísu ekki hvað úrið kostaði sem ég fékk í fermingargjöf fyrir 44 árum. Það var ekkert dýrt.  Í dag á ég ekki úr.  Bara farsíma sem kostaði 4000 kall.  

  Úr er bara lítið tæki sem sýnir manni hvað klukkan er.  Útlit þess skiptir litlu máli.  Ef hægt er að kaupa úr á 2000 kall og það dugir í 10 - 15 ár þá er það góður kostur.  Það er bull að kaupa milljón króna úr sem endist ævilangt.

 Fyrir nokkrum áratugum pantaði kunningi minn sér frá Tælandi ódýra eftirlíkingu af Rolax úri.  Þegar hann hitti ókunnugt fólk var hann stöðugt að taka um úrið,  líta á það og best fannst honum ef tíminn barst í tal.  Þá sagði hann:  "Rolaxinn segir að klukkan sé...".  Ég varð aldrei var við að nokkur manneskja áttaði sig á því í hvað hann var að vísa.  Að minnsta kosti nefndi enginn úrið við hann.  

 Fyrir aldarfjórðungi eða svo kom á markað bílasími.  Hann var stór hlunkur með mörgum ljósum og var áberandi í innréttingu bílsins.  "Rolex" vinurinn keypti þá ódýra eftirlíkingu.  Ég giska á að miðað við verðlag í dag hafi hún kostað kannski 10.000 - 15.000 kall.  Ljósin á eftirlíkingunni voru áberandi.  En eftirlíkingin var ekki sími.

  Það er kannski gróft að kalla svona snobb heimsku.  Viðkomandi er ekki heimskur.  En snobb er ekki gáfulegt.  Og það er dýrt.  

    

Sá strax að úrið var falsað

Ekki er allt sem sýnist

  Bandarísk kona,  nánar tiltekið í Kaliforníu,  vann til margra ára sem bakari í bakaríi er sérhæfði sig í klámfengnum og erótískum kökum.  Hún varð vör við að kúnnar sóttu í sætabrauð en vildu telja sjálfum sér í trú um að þeir væru meira fyrir heilsusamlegra fæði.  Menn toguðust á um sætabrauð ef sykurskraut á því líktist gulrótasneiðum eða öðru grænmeti eða ávöxtum.     

  Kella fékk þá góða hugmynd:  Að opna bakarí með sætabrauði sem lítur út eins og holl máltíð. Viti menn.  Þetta sló í gegn svo um munaði.  Allar ljósmyndir hér fyrir neðan sýna sætabrauð hennar sem virðist vera eitthvað annað og hollara.  Þetta er allt saman sætabrauð.

  Einn kúnni sem hefur borðað svona sætabrauð í öll mál í 5 ár heldur sér nokkurn veginn í þyngd.  Hann hefur ekki bætt á sig nema 26 kg.  Sem er ekki mikið hlutfallslega vegna þess að hann var 158 kg á meðan hann borðaði bara "venjulegan" mat.  Hann er sprækur sem lækur.  Fer allra sinna ferða lipurlega á rafmagnshjólastól.   

 

 

Athyglin er "of" dreifð fyrir nýja rokkbyltingu

  Um miðjan sjötta áratuginn kom rokkið til sögunnar af miklum þunga.  Þetta var alvöru bylting.  Bylting sem aðgreindi kynslóðir.  Það hafði ekki áður gerst í tónlistarsögunni.  Skyndilega varð til bandaríks tónlistartegund,  rokk,  sem höfðaði til svo gott sem einungis til ungs fólks.  Skoðanakönnun í Bandaríkjum-Norður Ameríku leiddi það í ljós.  

  Rokkið fór eins og stormsveipur um heimsmarkaðinn (eða að minnsta kosti vestræna hluta hans).  Þetta var "æði".  Rokkkvikmyndir fóru mikinn og voru sýndar undir lögregluvernd.  Líka á Íslandi.  Þetta þótti geggjun.  Margir höfðu áhyggjur af ástandinu.  Bandarísku rokkararnir urðu stærstu stjörnur heims.  Og eru enn í hávegum:  Bill Haily,  Elvis Presley,  Chuck Berry,  Jerry Lee Lewis,  Little Richard...  Eldra fólki þótti villimennska út í eitt að hvítir söngvarar væru að farnir að beita öskursöngrödd og skaka mjöðmum  

  Á þessum árum voru fáar útvarpsstöðvar og ennþá færri sjónvarpsstöðvar.  Á Íslandi var engin sjónvarpsstöð og ein útvarpsstöð.  Þegar rokkkvikmynd var sýnd í kvikmyndahúsi á Íslandi þá fjölmenntu ungmenni. Þegar rokklag var spilað í íslensku útvarpi lögðu ungmenni við hlustir.  Rokkæðið fór ekki framhjá neinni ungri manneskju.  Ekki heldur eldra fólki.  Það fordæmdi villimennskuna.

  Næst gerist það að ensk hljómsveit,  Bítlarnir,  koma bratt til leiks 1963.  Þeir voru ennþá geggjaðri en bandarísku rokkararnir.  En sóttu margt í smiðju bandarísku frumherja rokksins.  Bítlarnir voru svo aðsópsmiklir að talað var um Bítlaæði.  Það var ekkert smá.  Bítlarnir lögðu undir sig markaðinn svo rækilega að aldrei verður endurtekið. Sem dæmi um Bítlaæðið má nefna að í júní 1964 áttu þeir 6 af 6 vinsælustu lögum á bandaríska vinsældalistanum.  Þetta verður aldrei endurtekið. Í árslok kom í ljós að 60% af allri plötusölu í Bandaríkjunum var sala á Bítlaplötum.  

  Bresku Bítlarnir opnuðu fyrir flóðgáttir á enskri "bítlatónlist".  Ómar Ragnarsson söng samantekt á Bítlaæðinu

  Bítlaæðið ól af sér hipparokk,  þungarokk og framsækið tilraunarokk (prog).  Svo færðist þreyta yfir markaðinn er leið undir miðjan áttunda áratuginn.  Þá,  1976,  spratt fram breska pönkið.  Því fylgdi svokölluð nýbylgja.  Pönkið stokkaði öllu upp. Það urðu kynslóðarskipti. Forystusveitirnar voru Sex Pistols og The Clash.       

 

Bestu plötur ársins 2014

  Blaðamenn breska tónlistartímaritsins Mojo hafa tekið saman lista yfir bestu plötur ársins 2014.  Það orkar tvímælis að taka svona árslista saman þegar tveir mánuðir eru eftir af árinu.  Væntanlega eiga margar góðar plötur eftir að koma út til viðbótar áður en árið 2015 gengur í garð.  Á móti kemur að þeir fjölmiðlar sem fyrstir birta árslista sinn njóta um tíma meiri athygli en þeir sem standast freistinguna og hinkra framundir áramót.  

 Þessar plötur raða sér í efstu sætin hjá Mojo:

1  Beck - Morning Phase   

 

2  The War On Drugs - Lost In The Dream

 

3  Sleaford Mods - Divite And Exit

4  Jack White - Lazaretto

5  St. Vincent - St. Vincent

6  Steve Gunn - Way Out Weather

7  Julie Byrne - Rooms With Walls And Windows

8  Damon Albarn - Everyday Robot

9  FKA Twigs - Lp1

10 The Bug - Angels And Devils

 

.

Jólapakkinn í ár

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

  Í fyrra kom út mögnuð ljóðabók,  Árleysi alda,  eftir Bjarka Karlsson.  Svo brá við að hún seldist og seldist og seldist ítrekað upp.  Ég veit ekki hvað oft þurfti að endurprenta hana til að svara eftirspurn.  Að mig minnir sjö sinnum.  Í hvert sinn sem ný eftirprentun kom í búðir var togast á um hvert eintak.  

  Fáum kom á óvart þegar bókin hlaut Bókmenntaverðlaun Tómasar Guðmundssonar.  Annað kom ekki til greina.

  Nú bætir Bjarki Karlsson um betur.  Heldur betur.  Út er kominn veglegur,  óvenju glæsilegur pakki;  Árleysi árs og alda.  Hann er allt í senn:  Fagurlega myndskreytt ljóðabók,  hljómplata og hljóðbók.

  Pakkinn er á stærð við myndbandsspólu (VHS vídeó). Fyrirferðarmest er 127 blaðsíðna ljóðabókin (ásamt upplýsingum um tónlistina).  Hljómplatan inniheldur 21 sönglag.  Meiriháttar flott safnplata.  Hún hefst á óvenju fallegum og áhrifamiklum flutningi víkingarokkaranna í Skálmöld og Stúlknakórs Reykjavíkur á kvæðinu Helreið afa.  Ég var dolfallinn af hrifningu er ég heyrði það fyrst og elska að endurspila lagið aftur og aftur.  Skálmöld blastar öllum sínum bestu sérkennum af list og Stúlknakórinn bætir um betur.  Setur Skálmaldarrokkið í nýtt hlutverk.  Útkoman er stórkostleg.

  Næsta lag er blús; túlkun blússveitarinnar Vina Dóra á kvæðinu Eitthvað suðrá bæi.  

  Til að gera langa upptalningu á flytjendum stutta stikkla ég á stóru:  Megas,  Erpur,  séra Davíð Þór Jónsson,  Ásgerður Júníusdóttir,  Jón "góði" Ólafsson,  Guðmundur Andri Thorsson,  Steindór Andersen og margir aðrir.  Fjölbreytni er óvenju mikil.  Samt rennur platan lipurlega og eðlilega í gegn sem heilsteypt verk.  Einskonar tónlistarstjóri plötunnar er alsherjargoði Ásatrúarfélagsins, Hilmar Örn Hilmarsson.  Allt sem hann kemur nálægt í tónlist er gæðastimpill af hæstu gráðu.  Hann afgreiddi á sínum tíma bestu plötur Bubba,  Megasar og fleiri.  Og hlaut verðskuldað evrópsku kvikmyndaverðlaunin Felix fyrir tónlistina í Börnum náttúrunnar.

  Ljóðabókinni er lyft á hærri stall með faglegum og skemmtilegum teikningum Matthildar Margrétar Árnadóttur.  Lipur teiknistíllinn kallast á við myndskreytingar Halldórs Péturssonar í Skólaljóðunum (sem við um sextugt munum eftir).  Það er góð skemmtun að skoða líflegar og hugmyndaríkar teikningar Matthildar Margrétar. Þær eru virkilega flottar.   

 Þegar allt er samantekið er pakkinn Árleysi árs og alda óvenju innihaldsríkur og glæsilegur:  Frábær kvæði,  frábær og fjölbreytt tónlist,  frábærar myndskreytingar og frábær gjafapakkning.  Þetta er jólagjöfin í ár.

                    

Byssan er saklaus

  Byssur drepa engan.  Þessu halda margir fram í kjölfar þess að hafa sett upp spekingslegan svip og tekið í nefið.  Ef vel er að gáð er það alveg rétt að byssur drepa engan.  Ekki fremur en handsprengjur,  kjarnorkusprengjur,  eldflaugar,  eiturefnavopn eða rafmagnsstóllinn.  Það er ástæðulaust að agnúast út í þetta dót.  Drápstækin eru saklaus uns sekt er sönnuð.  Sökin liggur hjá manneskjunum sem misnota leikföngin.  Svo geta alltaf orðið slys.  Eins og gengur.  Þau gera ekki boð á undan sér.

 

    

Skotinn til bana fyrir slysni

Mest spennandi áfangastaðurinn 2015

  

 

 Túristar í ár vita alveg upp á hár hvert skal næst halda.  Þess vegna efndi útlend tímarit til könnunar á því hvert eigi að ferðast 2015.  Ritið er gefið út á 40 tungumálum í samtals 6,8 milljón eintökum.  Til viðbótar eru netsíður tímaritsins lesnar spjaldanna á milli.

  Ritið heitir National Geographic. Lesendur sammæltust um að Færeyjar verði áfangastaðurinn 2015.

  Hvað veldur því að útlendingar hafa uppgötvað ævintýraeyjurnar Færeyjar?  Fyrir nokkrum árum vissu útlendingar ekki af tilvist eyjanna. Ekki einu sinni Íslendingar vildu neitt af Færeyjum vita.  

  Síðan hefur tvennt gerst:  Annarsvegar hefur færeyskt tónlistarfólk farið í víking um heiminn með glæsilegum árangri:  Eivör,  Týr,  Teitur,  Högni Lisberg,  200,  Hamferð,  Lena Andersen,  Evi Tausen og fleiri hafa farið mikinn á útlendum vinsældalistum og rakað til sín tónlistarverðlaunum og öðrum viðurkenningu.  Þessum árangri hefur fylgt mikil og góð landkynning í ótal fjölmiðlum.

  Hinsvegar reyndist barátta bandarísku hryðjuverkasamtakanna Sea Shepherd gegn hvalveiðum Færeyinga í sumar vera öflugur hvalreki fyrir færeyskan ferðamannaiðnað.  Samtals stóðu 500 SS-liðar vaktina í Færeyjum í 4 mánuði í sumar. Þeir komu frá ýmsum löndum og voru duglegir við að lýsa á samskiptamiðlum (Facebook, twitter...) daglegu lífi sínu í Færeyjum með tilheyrandi ljósmyndum af vettvangi. Sumt af þessu fólki er heimsfrægt,  svo sem Pamela Anderson.  Myndir af Færeyjum birtust í helstu fjölmiðlum heims.  Að auki fylgdust milljónir manna með heimasíðum SS.  Þar voru stöðugt birtar nýjar fréttir af Færeyjum. 99% af útlendingum sem fréttu af Færeyjum í gegnum SS vissi ekki af tilvist Færeyja áður.  

 Það var ekki ætlun SS með átakinu Grindstop 2014 að stimpla Færeyjar inn sem heitasta áfangastað ársins 2015.  En sú hefur orðið raunin. Heldur betur.  Það er skollin á sprengja í túrisma til Færeyja.     

 

Hverjir eru duglegastir að reykja?

 

 

 

 

 

 

 

 

 

 

 

 

 

 

 

  Norðurlandaráð var að senda frá sér ársskýrsluna 2014.  Þar er fátt nýtt og merkilegt að sjá. Nema listann yfir þá sem reykja.  Mig grunar að þar sé átt við sígarettureykingar - fremur en reykingar á hassi,  marijuana,  ópíum, heróíni og hangikjöti.

  Kynin eru ekki að öllu leyti samstillt í reykingum.  Þessir karlmenn eru duglegastir við að reykja:

1  Færeyingar 27%

2  Finnar 21%

3  Danir 17%

4 - 5  Íslendingar 15%

4 - 5  Norðmenn 15%

  Engar tölur eru frá Svíþjóð og Grænlandi. Ef ég þekki Grænlendinga rétt er næsta víst að þeir láta ekki sitt eftir þegar kemur að reykingum. 

  Þessar konur eru duglegastar að reykja:

1  Færeyskar 28%

2  Finnskar 18%

3  Danskar 17%

4  Norskar 14%

5  Íslenskar 13% 

  Íslendingar eru ekki að standa sig.  

Tónlistarmaðurinn Charles Manson

  Þetta má ekki hljóma eins og ég sé að upphefja bandaríska nasistann Charles Manson.  Að sjálfsögðu fyrirlít ég hann og hans glæpagengi.  Framhjá hinu verður ekki litið:  Að hann er hluti af sögu rokksins.  Hann var í slagtogi með brimbrettahljómsveitinni The Beach Boys.  Hún gaf út plötu með sönglagi hans Never Learn Not To Love.

  Hljómsveitin Guns N' Roses krákaði (cover song) lag CM Look At Your Game,  Girl á plötunni Spaghetti Incident.  

  

  Gothrokkarinn Marilyn Manson kennir sviðsnafn sitt við Charles Manson og róttæka anti-rasistann Marilyn Monroe.  Hann hefur sent frá sér sönglag Charles My Monkey.  

 

 

  Frægasta rokklag tengt CM er Bítlalagið Helter Skelter.  CM taldi það vera skilaboð til sín um að blökkumenn væru að gera byltingu í Bandaríkjum Norður-Ameríku og taka þar yfir.  Þar með réðist hann til atlögu.  Fékk gengi sitt til að drepa fólk og skrifa á veggi með blóði fórnarlambanna slagorð sem áttu að virka eins og þau væru skrifuð af blökkumönnum.  Það átti að æsa hvítt fólk upp og fá það til að ráðast gegn hörundsdökkum.     

 

Ást blóðþyrsta brjálæðingsins

Kækur lygara

  Raðfréttir af embættismanni kristins safnaðar Fíladelfíu; raðlygara sem reynir eftir getu að venja sig af lygaáráttunni og kenna börnum sínum að ljúga ekki, rifja upp símtal sem ég átti við 6 ára systurson minn fyrir margt löngu.  

 Tekið skal fram að ég er fylgjandi því að bæði lygarar og sannsöglir kenni börnum sínum að ljúga lítið sem ekkert.  Og aðallega lítið.

  Ég hringdi í Svandísi systir mína á Akureyri.  Systursonur okkar svaraði í símann.  Hann sagðist vera í pössun hjá Svandísi ásamt bróður sínum.  Ég spurði hvort að þeir bræður væru ekki stilltir og þægir í pössuninni.  Stráksi svaraði að þeir væru það.  Nema að Svandís væri ósátt við að þeir ættu það til að róla sér á hurðum hjá henni.  Þá yrði hún alltaf reið.  Ég sagði: "Þið verðið að hætta því."  Sá 6 ára svaraði:  "Já,  ég er að reyna að venja mig af því!"

 

Bað Sigríði um upplýsingar um Omos

Ofbeldi og níðingsháttur

  Fyrir nokkrum árum bloggaði ég ítrekað um deilu tónlistarmannsins Hebba Guðmunds við nágranna sína í sömu raðhúsalengju við Prestbakka.  Sjá m.a. http://jensgud.blog.is/blog/jensgud/entry/1226373/ Vegna þessa máls fer Hebbi í gjaldþrot í komandi jólamánuði ljóss og friðar. 

  Eins og sést á stöðu innheimtumáls vegna ósanngjarnar kröfu um þátttöku Hébba í þakviðgerðum nágranna sinna er hann nú krafinn um næstum 11 milljónir króna. Þar af eru dráttarvextir næstum 4 millur + vextir af kostnaði 630 þús kr.  Innheimtuþóknun er 530 þús kall.  Og svo framvegis.  Sjálf krafan er 3,6 millur.  En þegar öllu hinu hefur verið smurt ofan á er upphæðin komin í 10,6 millur.  Svona er Ísland í dag.  Þetta er geggjað. Þetta er ofbeldi.    

 

 

 

 

 

 

 

 

 

 

 

 

 

 

 

 

 

 

___________________________

  Þetta var vinsælasta lagið á Íslandi á sjötta áratugnum.  

Kvikmyndarumsögn

 

 

 - Titill:  Dumb and Dumber To

 - Leikstjórar:  Peter og Bobby Farrelly

 - Leikarar:  Jim Carrey og Jeff Daniels

 - Einkunn: **1/2 (af 5)

 Fyrir tuttugu árum kom á markað bandarísk gamanmynd,  Dumb and Dumber.  Hún var fersk og innihélt nokkrar eftiminnilegar fyndnar senur.  2003 leit dagsins ljós myndin Dumb and Dumberer.  Hún á að hafa gerst á undan Dumb and Dumber og sýna persónurnar yngri.  Með öðrum leikurum og öðrum leikstjóra.  Dumb and Dumberer var og er misheppnuð og ófyndin gamanmynd.

 Nú er komin á hvíta tjaldið myndin Dumb and Dumber To.  Hún skartar sömu aðalleikurum og Dumb and Dumber.  Jafnframt eru leikstjórar þeir sömu.

 Söguþráðurinn skiptir litlu máli.  Hann skapar engar væntingar um framvindu né spennu (en á samt að framkalla spennu).  Stöku brandarar, skondin tilsvör og leikur hins kanadíska Jims Carreys bera myndina uppi. Ofleikur Jims er skemmtilegur og allt að því "sannfærandi".  Ofleikur Jeffs Daniels er ósannfærandi en venst er líður á myndina.

 Fjöldi brandara er þokkalega fyndinn.  Enn fleiri eru nær því að vera broslegir.  Með slæðist bull, della og aulahúmor sem höfðar til barna en ekki fullorðinna.  Það sýndi sig af viðbrögðum áhorfenda í salnum. Börn og fullorðnir hlógu ekki undir sömu senum í myndinni.

  Handritshöfundar eru sex.  Áreiðanlega flestir í því hlutverki að semja brandara fremur en bæta þunnan söguþráð.  Myndin gengur, jú, út á brandarana.   

 Takturinn í myndinni er þægilega hraður og jafn út í gegn. Það er alltaf stutt í næstu spaugileg tilsvör og aðra brandara. Margar senur eru allt að því endurtekning á senum úr fyrstu myndinni. Einnig er nokkuð um leiftur (flash back) úr þeirri mynd.  Upphafslagið er hið sama,  Boom Shack-A-Lack með indverskættaða spaugfuglinum Apache Indian.  Flott ragga-muffin lag með blús-hljómagangi.

 

        

Heimskur, heimskari á toppinn

Plötuumsögn

 

 

 

 

 

 

 

 - Titill:  Með söng í hjarta

 - Flytjandi:  Gæðablóð

 - Útgefandi:  Amböguklúbburinn

 - Einkunn: ****

  

  Hljómsveitin Gæðablóð er söngvarinn og söngvaskáldið Kormákur Bragason;  gítarleikararnir Eðvarð Lárusson og Magnús R. Einarsson;  bassaleikarinn Tómas M. Tómasson;  trommuleikarinn Jón Indriðason;  og slagverksleikarinn Hallgrímur Guðsteinsson.

  Upphafslag plötunnar er Zanzibar.  Samnefnt afrískri eyju.  Þar fæddist söngvari Queen,  Freddy Mercury.  Eyjan tilheyrir Tanzaníu.

  Í texta Kormáks er ljúft líf (ferðamanns) á Zanzibar mært af söknuði úr fjarlægð.  Útsetningin ber meiri keim af ljúfu brazilísku bossanova en afrískri stemmningu.  Söngurinn er lágstemmdur.  Í hljóðfæraleik ber mest á liprum gítarleik. Eðvarð og Magnús fara á kostum plötuna út í gegn.  Heitt (live) andrúmsloft spuna einkennir gítarleikinn.

  Næsta lag, Mér finnst verst,  er úr smiðju rússneska söngvaskáldsins Vladimir Vysotskij. Það er vægur þýskur kabarett-andi í útsetningunni; jafnvel smá Kurt Weill fremur en rússneskt kósakafjör. Texti Kormáks er þunglyndi.  Hann kallast skemmtilega á við fagra lýsingu á Paradísinni í Zanzibar.

  Þriðja lagið er lauflétt kántrý-skotin sveifla við kvæði V-Íslendingsins Káinns,  Ægisdætur.  Lagið er eftir Kormák.  JJ Cale og KK koma upp í hugann.  Líka í sönglögum Kormáks  Í dag er okkar dagur og Fiðrildi.

  Breiðavíkurblús liggur nálægt Road To Hell með Chris Rea.  Samt mildari blús.  Þó þenur höfundurinn,  Kormákur, sig töluvert í söng á köflum. 

  Ég vaknaði í veröldinni er "talking blues" kántrý að hætti bandaríska Woody Guthrie.

  Ég geng í myrkri er vinaleg róleg blúsuð ballaða. Textinn er eftir Braga Sigurjónsson.  Lagið eftir Kormák.

  Stjarnan er notalegur dinner-djass.  Lag og texti eftir Kormák,  eins og Ógæfukonan.

  Lokalagið, Með sorg í hjarta,  er eftir bandaríska kántrý-boltann Buck Owens. Textinn eftir Kormák.  Útsetningin er meira í ætt við blágresi (blue grass) en kántrý.

  Án þess að geta neglt það nákvæmlega niður þá framkallar platan hughrif í átt að Tom Waits.  Kannski hefur það eitthvað með söngstíl Kormáks að gera?  Samt er sitthvað fleira Tom Waits-legt undirliggjandi.  

  Þó að mest beri á stjörnugítarleik snillinga þá er allur annar hljóðfæraleikur eins og best verður á kosið.  Platan er fjölbreytt í músíkstílum.  Engu að síður er heildarsvipurinn sterkur.  Þetta er skemmtileg plata,  hlý og þægileg.  Það er dálítið eins og hljómsveitin sé lágstemmd inni í stofu hjá manni.  

  Til gamans má geta að stundum kíki ég á bítlabarinn Ob-La-Di.  Þá bregst ekki að margir heilsa mér með virktum sem Kormáki. Án þess a ég sé með hatt.   

  

Lögreglan treður ruslfæði ofan í unglinga

 

  Hamborg er nafn á þýskri hafnarborg.  Næst fjölmennustu borg Þýskalands.  Hún er frægust fyrir að hafa fóstrað frægustu og áhrifamestu hljómsveit heims,  Bítlana,  í árdaga;  í upphafi sjöunda áratugarins.  Það var áður en Bítlarnir slógu í gegn á heimsvísu.

  Ástmar heitinn,  vinur minn (bróðir Röggu Gísla), var líklega einn fárra Íslendinga til að heyra í Bítlunum í Hamborg.  Hann var að vísu ekki 100% viss.  Hann slæddist inn á skemmtistað.  Þar spilaði ensk unglingahljómsveit öll uppáhalds bandarísku rokk og ról lög Ása.  Söngvararnir skiptust á að öskursyngja lögin.  Það sem var ennþá skemmtilegra var að á milli laga grínuðust þeir mikið hver við annan og voru rosalega fyndnir.  Þýskir áheyrendur skildu kannski ekki enskuna.  En Ási skemmti sér konunglega.  

  Bítlarnir átu meira af dópi en hamborgurum í Hamborg.  Þýskir iðnaðarmenn snæddu hinsvegar hamborgara. Það er að segja hveitibrauðssamloku með kjötbollu á milli.  Þannig gátu þeir snætt nestið sitt án hnífapara.

  Þegar ég fór fyrst til Færeyja, 1993,  ásamt syni mínum þá var keyptur hamborgari.  Hann var hveitibrauðssamloka með kjötbollu á milli.  Þegar undrun var nefnd yfir þessari útfærslu á hamborgara var vísað til þess að svona væri ekta hamborgari að hætti iðnaðarmanna í Hamborg.

  Vestur í N-Ameríku þróaðist hamborgarinn yfir í að kjötbollan varð flöt.  Þannig passar hún betur við hveitibrauðið.  

  Hveitibrauðssamloka með flatri bollu úr kjöthakki er skilgreind sem ruslfæði.  Sósum er sullað með. Mörgum þykir hamborgari vera bragðgóður skyndibiti.  Hampa því að í dag er snifsi af salatblaði með.  Jafnvel rauðlaukur,  tómatsneið og ostur.

  Í Prince Albert í Kanada stendur lögreglan nú fyrir sérkennilegri tilraun.  Þar er fylgst með ungu fólki.  Þau ungmenni sem sýna af sér góða hegðun eru verðlaunuð af löggunni með hamborgara. Til að mynda ef sést til unglings taka upp rusl og henda í ruslafötu.  Eða þegar unglingur virðir rautt ljós við gangbraut.  

  Lögregluþjónn sem verður vitni að slíku stekkur fram og gefur unglingnum inneignarmiða á hamborgara.  Hugmyndin er áhugaverð.  Tilgangurinn er góður:  Þetta er hvatning til góðrar hegðunar ungmenna.  Þetta er einnig jákvætt átak til að skerpa á skilningi á því að lögregluþjónar séu þjónar fólksins og samfélagsins;  einnig í þágu góðrar hegðunar.  Spurning er hinsvegar sú hvort að heppilegt sé að troða ruslfæði ofan í fyrirmyndarunglinga.  

   

 

 

 

Nýr og stærri flugvöllur

  Síðustu ár hefur borið töluvert á heitri umræðu um mögulegan brottflutning á Reykjavíkurflugvelli.  Hvernig og hvert er jafnan óljóst.  Líka kostnaður við flutning.  Enginn veit heldur hvert sækja á fjárfúlgur þær sem flutningur mun kosta.  Það er ekki endalaust hægt að hækka matarskattinn. 

  Þorri Reykvíkinga og nánast allir aðrir landsmenn eru hlynntir hinni heppilegu staðsetningu á flugvellinum í Vatnsmýri.  Það eru eiginlega bara spaugararnir í borgarstjórn sem tala fyrir flutningi.  Það er miklu ódýrara að flytja þá úr Reykjavík en flugvöllinn.

  Í Færeyjum er aðeins einn flugvöllur.  Það er vandamál.  Oft þarf að aflýsa flugi til Færeyja vegna þoku.  Jafnframt hafa við flugvöllinn orðið flugslys með dauðsföllum.  

  Færeyingar hafa varið háum upphæðum í leit að öðru flugstæði.  Án árangurs.  Nú hafa menn fundið lausn.  Hún felst í því að fjölga eyjunum úr 18 í 19.  Nýja eyjan yrði flugvöllur og höfn.  Hún verður reist á milli Austureyjar og Straumeyjar,  rétt fyrir utan höfuðborgina,  Þórshöfn.  

  Neðansjávargöng verða lögð til og frá eyjunni.   

  Þetta mun styrkja samkeppnishæfi Færeyinga gríðarlega á mörgum sviðum.  Til að mynda geta togarar þá landað fiski beint um borð í flugvélar.  Fiskurinn er kominn spriklandi ferskur á fiskmarkaði um alla Evrópu 2 - 3 tímum eftir að hann er veiddur.  

  Eyjan hefur þegar fengið heitið Airport-19.  Hún verður fljót að borga sig upp.   

Færeyjar samkeppnishæfari utan EES

Lennon og Marley eru pöddur

  Í Brasilíu er að finna allskonar skordýr.  Þar á meðal ýmsar skemmtilegar köngulær.  Ein tegundin heitir Bumba Lennoni.  Jú,  rétt.  Hún er nefnd í höfuðið á forsprakka bresku Bítlanna,  Jóni Lennon.

  

  Önnur köngulóartegund heitir Aptostichus Bonoi.  Hún gengur undir gælunafninu Joshua Tree Trapdoor köngulóin.  Heitið hefur eitthvað með írska söngvarann Bono (U2) að gera. 

  Enn ein köngulóartegundin heitir Loureedia Annulipes.  Hún er kennd við söngvaskáldið bandaríska Lou Reed.

  Það er líka til sjávarlúsartegund sem heitir Gnathia Marleyi.  Nafn hennar er sótt í höfuðið á jamaíska reggí-goðinu Bob Marley.

  Skelfiskstegund sem dó út fyrir 300 milljónum ára kallast Amaurotoma Zappa.  Bæði hún og fílapenslabakterían Vallaris Zappia eru nefnd eftir bandaríska háðfuglinum og tónlistarmanninum Frank Zappa.

  Egypskt vatnasvín þykir bera munnsvip líkan breska blúsrokksöngvaranum Mick Jagger.  Þess vegna heitir tegundin Jaggermeryx Naida.