Örvhentir eru frumkvöðlar og sigurvegarar

  Ótrúlega fáar samanburðarrannsóknir eru til um mun á svokölluðum "rétthentum" og örfhentum.   Fyrir liggur að um 10% fólks er örvhent.  Rannsóknir hafa frekar beinst að því hvers vegna sumir eru örvhentir fremur en hvernig örvhentum vegnar í lífinu til samanburðar við "rétthenta".  

  Ég hef kennt um 30 þúsund manns skrautskrift á 35 árum.  Fljótlega varð ég var við að örvhentir eiga erfiðar með að ná tökum á skrautskrift á fyrstu stigum.  Nánast undantekningalaust ná þeir betri tökum á skrautskrift þegar líður á námskeiðið.  Þegar ég rifja upp ferilinn þá eru næstum allir bestu nemendur örvhentir.  Sumir hafa dúxað svo glæsilega að þeir hafa á miðju námskeiði farið fram úr mér.  Samt er ég mjög góður skrautskrifari.  Mun hærra hlutfall örvhentra nær framúrskarandi árangri í skapandi greinum en þau 10% sem þeir eru af samfélaginu.  

  Nærtækt er að skima tónlistarmenn.  Helmingur stærstu og merkustu hljómsveitar rokksögunnar,  Bítla, var örvhentur.  Bassaleikarinn frábæri Paul McCartney og trommarinn flotti Ringo Starr.  

 

  Til að nefna aðeins örfáa örvhenta í hópi annarra merkustu tónlistarmanna rokksins nægir að vísa til gítarhetjunnar Jimi Hendrix (sem bylti hugmyndum um gítarleik til frambúðar) og Kurt Cobain (sem skóp svokallaða gruggbylgju).  

 

  Ein kenning - sem ekki hefur verið sönnuð - er að örvhentir þurfi svo oft að kljást við tæki og tól hönnuð fyrir rétthenta að þeir þurfi að stöðugt að virkja ímyndunarafl til að finna lausn fyrir örvhenta.  Þetta örvi sköpunargleðina.  Sá hluti heila örvhentra sem vinnur með sköpunargleði sé virkari en hjá "rétthentum".   

 

10 staðreyndir um örvhenta

Bítill þambar íslenskt

 

  Bítlarnir og Ísland tengjast stöðugt og bratt nánari böndum.  Friðarsúla Johns Lennons í Viðey leikur stórt hlutverk.  Ljós er tendrað á henni 9. október ár hvert.  Það vekur heimsathygli.  Viðstödd eru jafnan ekkja Lennons,  Yoko Ono;  sonur þeirra,  Sean Lennon;  trommuleikari Bítlanna,  Ringo Starr og hans fólk;  ekkja sólógítarleikara Bítlanna,  George Harrisons.  Hún og George eru tengdaforeldrar íslenskrar konu,  dóttur Kára Stefánssonar í Íslenskri erfðagreiningu.  Hún er gift einkasyninum,  Dhani Harrison.  Bassaleikari Bítlanna,  Paul McCartney,  hefur sótt Ísland heim og ferðast um landið.  Í kjölfarið breytti hann texta lagsins "Why Don´t We Do It In The Road?" í "Why Don´t We Do It In The Fjörð?" og vísar til Ísafjarðar.    

  Til gamans má geta að mæðginin Yoko og Sean Lennon dvelja hérlendis mun oftar en þegar kveikt er á Friðarsúlu Johns Lennons.  Þau eru með annan fótinn á Íslandi allt árið.  

  Ég vona að ég sé ekki að rugla neinum saman þegar mig minnir að Þórunn Antonía Magnúsdóttir hafi verið eða sé í hljómsveit með Dhani Harrison.   

  Ringo Starr hefur tekið ástfóstri við íslenskt vatn,  Icelandic Glaciar Water.  Hann sést jafnan á ljósmyndum hampa því.

 

Veitingahússumsögn

 

 

 

 

 

 

 

 

 

 

 

 

  - Réttur: BBQ grísarif með frönskum og gosi

  - Staður:  Dirty Burger & Ribs

  - Staðsetning:  Við Miklabraut gengt Kringlunni

  - Verð:  1390

  - Einkunn: *****

  Veitingastaði með stóra langloku matseðla ber að forðast.  Enginn matreiðslumaður er jafnvígur á að töfra fram það besta í 100 réttum.  Allt frá sjávarréttum,  pastaréttum,  grænmetisréttum og kjötréttum sem spanna fuglakjöt (önd, kjúkling, kalkúna, strút...), naut, lamb, svín, hross, hreindýr, kengúru, krókódíl...  

  Því færri réttir á matseðli þeim mun betra.  Þeim mun líklegra að það séu einmitt réttirnir sem kokkurinn hefur best tök á.  Þess vegna veit það á gott að Dirty Burger & Ribs býður aðeins upp á tvo rétti,  grísarif og staðlaðan hamborgara.  

  Ég er ekkert fyrir hamborgara.  Því er öðru vísi varið með svínarif.  Hvar sem ég um heim fer þá leita ég þau uppi.  Hingað til hafa Hickory rif á veitingastað í úthverfi í Boston verið toppurinn í þeirri deild.  Þangað gerði ég mér erindi í 10 daga samfleytt eftir að ég slapp í þau í stuttri heimsókn fyrir nokkrum árum.  En nú hafa grísarifin á Dirty Burger & Ribs slegið þau út.  Bestu grísarif sem ég hef snætt.  Þau bráðna uppi í manni dásamlega bragðgóð.  Svooo góð að ég "óttast" að verða tíður gestur á Dirty Burger & Ribs.

  Ég er ekkert fyrir franskar kartöflur. Hinsvegar passa þær bærilega við rifin.  Þetta er, jú,  skyndibitastaður.  Á þeim forsendum er hæsta einkunn verðskulduð.  Verðið kemur vel út í samanburði við aðra matsölustaði sem bjóða upp á grísarif:  990 kall fyrir réttinn stakan;  1390 kall með frönskum og gosi.  

  Innréttingar staðarins eru sérlega töff og vinalegar.  Þær virka eins og gamlar:  Hrátt timbur og gamlar svart-hvítar ljósmyndir af Gvendi dúllara og fleiri litríkum Íslendingum frá fyrri tíð.  Svo og svart-hvít ljósmynd af Frank Zappa.  Hún er skorðuð smá skökk á veggnum.  Allskonar svona töff smáatriði skapa heillandi stemmningu.  Sæti eru barstólar með setum sem virðast vera af gömlum dráttarvélum frá fyrri hluta síðustu aldar.  Starfsfólkið er klætt svörtum bol með sömu ljósmyndum og skreyta veggi.

  Ég keypti rif til að taka með mér.  Út undan mér  sá ég að hamborgarinn hjá öðrum viðskiptavinum er vel troðinn og pattaralegur.  Áreiðanlega 140 gramma og allskonar meðlæti.  Þegar ég tók við pokanum með máltíðinni hugðist ég sprauta tómatsósu ofan í pokann með frönsku kartöflunum.  Drengur í afgreiðslunni stoppaði það af.  Sagði:  "Nei,  ekkert svona sull."  Svo rétti hann mér lúkufylli af tómatsósu í litlum plastöskjum með loki.  Þegar ég réðist á máltíðina uppgötvaði ég að þannig öskjur með tómatsósu höfðu þegar verið settar með í pakkann.  Ásamt auka BBQ sósu í samskonar öskjum.  Það veit alltaf á gott þegar maður verður áþreifanlega var við að ekki sé verið að skera við nögl heldur dekrað við viðskiptavininn.  Á meðan ég beið eftir afgreiðslu hljómaði í hátölurum ágætt létt-þungarokk.  

  Eigandi staðarins,  Agnar Sverrisson,  er verðlaunaður Michelin-kokkur í Bretlandi.   Eini Íslendingur sem hlotið hefur þann gæðastimpil.  

  Það breytir engu um frábær grísarif en ég set spurningamerki við nafn staðarins.  Ég á við að nafnið er á ensku.  Ef að rökin fyrir því eru þau að yfir milljón útlendingar sækja Ísland heim á ári þá kaupi ég þau rök.  Íslendingar eru aðeins 315 þúsund.  Líklegt er að útlendu túristarnir,  sem eru meira en þrisvar sinnum fleiri en Íslendingar,  leggi flestir leið sína í Kringluna og nágrenni.   Þeir þekkja ekki íslensk orð á borð við svínarif og hamborgara.  Við þurfum að kenna útlendingunum þessi orð.  Það er ekkert erfitt. Hver Íslendingur kennir á hverju ári þremur útlendingum þessi orð.  Það er samfélagsleg skylda.  

Síðustu 10 veitingaumsagnir:

Salatbarinn:  http://jensgud.blog.is/blog/jensgud/entry/1320816/

Hótel Cabin:  http://jensgud.blog.is/blog/jensgud/entry/1309370/

Grillmarkaðurinn:  http://jensgud.blog.is/blog/jensgud/entry/1298062

Ruby Tuesday:  http://www.jensgud.blog.is/blog/jensgud/entry/1296771/

Grill 66:  http://www.jensgud.blog.is/blog/jensgud/entry/1296313/

Prikið:  http://www.jensgud.blog.is/blog/jensgud/entry/1288948/

Noodle Station:  http://jensgud.blog.is/blog/jensgud/entry/1287104

Benzin Café:  http://www.jensgud.blog.is/blog/jensgud/entry/1284984/

Pizza King:  http://www.jensgud.blog.is/blog/jensgud/entry/1282151/

Ikea:  http://www.jensgud.blog.is/blog/jensgud/entry/1280116/

Skápahommar afhjúpa sig

 

  Ég, gagnkynhneigður karl á efri árum, hef aldrei látið kynhneigð fólks trufla mig.  Ekki fremur en húðlit,  augnlit,  kynþátt eða trúarafstöðu.  Fólk er allavega.  Fjölbreytni regnbogans gefur mannlífinu lit.  Þeir sem láta kynhneigð annarra trufla sig eru þeir einir sem eiga í vandræðum með eigin kynhneigð.  Skápahommar aðallega.  Aðrir eru ekkert að pæla í kynhneigð annarra.  Það segir sig sjálft.   Og ótal dæmi staðfesta það.  

  Það er ekkert nema kostur fyrir okkur gagnkynhneigða karla að sem flestir aðrir karlar séu hommar.  Þá eru þeir ekki að togast á við okkur um fallegar konur.  Á móti vegur þegar fallegar konur séu lesbíur.  Þá er málið að vera líka lesbía.   

   

Ótrúleg ummæli í athugasemdakerfum

Til verndar hagsmunum neytenda

 

  Eðalvörur ehf hafa tímabundið stöðvað dreifingu á Rauðu Eðal Ginsengi í núverandi umbúðum þess, sem fyrirtækið hefur notað í 25 ár, til að draga úr tjóni vegna ruglings við eftirlíkingaumbúðir Eggerts Kristjánssonar hf; sem sérframleiddar eru fyrir íslenskan markað. Í þessu felst ekki viðurkenning á eftirlíkingastarfsemi, þvert á móti er verið að vinna að þessum málum fyrir neytendayfirvöldum, sem tekur lengri tíma en ætlað var. Ekki er verjandi að selja jafn ólíkar vörur í jafn líkum umbúðum. Þess vegna er þessi tímabundna aðgerð nauðsynleg til að verja hagsmuni neytenda, sem oft hafa talið sig í góðri trú vera að kaupa Rautt Eðal Ginseng frá Kóreu.

  Þær góðu fréttir hafa nú borist frá Neytendastofu að hún hafi með bréfi dagsettu 9. júlí s.l. gert Eggerti Kristjánssyni hf: að greina frá uppruna svokallaðs “Kóresk Rauðs Ginsengs” , sem erlendur birgir vörunnar segir vera frá hálfri Asíu, t.a.m. Kína og Mongolíu en Eggert Kristjánsson hf. hefur engu að síður auglýst þessa vöru með sömu eiginleikum og Rautt Eðal Ginseng frá Kóreu.
Forsvarsmenn Eggerts Kristjánssonar hf. áttu að skýra sitt mál innan hálfs mánaðar frá dagsetningu bréfsins 9. júlí en báðu um frest.

  Ég fagna þessari rannsókn og það er einlæg von mín að hún megi fara fram ótrufluð og því fell ég frá ósk um að sameina hana eftirlíkingamálinu í bili. 

Sigurður Þórðarson

Hér er mynd af eftirlíkingavörunni:

  

Pamela Anderson lausgirt í Kaupmannahöfn

  Kanadísk-bandaríska leikkonan,  Pamela Anderson,  var sem kunnugt er í Færeyjum í síðustu viku.  Í þarlendum fréttamiðlum var hún oftar titluð sem klámdrottning eða klámleikkona.  Burt séð frá því þá gekk henni brösuglega að komast til og frá Færeyjum.  Þess vegna dvaldi hún lengur í Færeyjum en upphaflega var ætlað og sömuleiðis töluvert lengur í Kaupmannahöfn en áætlað var.  

  Í Kaupmannahöfn bjó hún á lúxushóteli með stórum svölum.  Það vakti athygli og undrun annarra hótelgesta hvað hún girti sig illa.  Margir gátu ekki setið strák sínum og smelltu mynd af klæðaburðinum.  Til að gæta velsæmis birti ég aðeins siðsömustu myndina.

  Í heimalandi Pamelu,  Bannríkjum Norður-Ameríku,  eru á sumum stöðum háar fjársektir og jafnvel fangelsun við því að vera illa girt.   

 

------------------------------------------------------------------

  

Prestur hengdi álf

  Álfar eru ofsóttir.  Það andar köldu til þeirra úr ýmsum áttum.  Til að mynda er iðulega níðst á þeim í krossgátum Morgunblaðsins.  Þar er orðið álfur notað sem samheiti við bjána og kjána.  Þetta er ósvífni í garð álfa.  Og ekki síður við þá Íslendinga sem heitið hafa og heita Álfur. Til að mynda Frikka Pönks,  söngvara Sjálfsfróunar,  Kumls og fleiri hljómsveita.  Hann heitir samkvæmt þjóðskrá Álfur.   

  Á Jótlandi er prestur,  Jón Knúdsen,  sem hvetur til þess að allir álfar verði reknir frá Danmörku.  Sjálfur náði hann fyrir nokkrum árum að handsama álf og hengdi hann með það sama.  Álfinum til háðungar og öðrum álfum til viðvörunar lét Jón álfinn dingla yfir kirkjudyrum.  Um háls álfsins hengdi hann yfirlýsingu:  "Við fordæmum djöfulinn og allar hans gjörðir og öll hans vandræði".    

  Jón segir gnóma vera versta allra álfa.  Gnómarnir séu illir andar frá djöflinum.  Það eru gnómarnir sem standa fyrir því að börn verða stundum lasin.  Þeir,  eins og aðrir álfar, geta gengið svo langt að valda fórnarlömbum sínum tímabundinni eða varanlegri geðveiki.  Gerviálfar eru alveg jafn varasamir og lifandi álfar.  

  Jón er á stöðugu flandri við að reka álfa út úr íbúðarhúsum.  Í mörgum tilfellum er um bráðatilfelli að ræða.  Hann kvartar undan því að lítið sem ekkert heyrist opinberlega frá öðrum álfahöturum.  Hann veit af mörgum þeirra og sárnar að þeir láti hann einan standa í baráttunni.  

  Góðu fréttirnar eru þær að Jón,  3ja barna faðir,  náði farsælum samningi við skólastjórnendur barna hans.  Þeir tóku vel í kröfu hans um að börnin þyrftu ekki í skólanum að eiga nein samskipti við álfa.  Þau þyrftu ekki einu sinni að syngja söngva um álfa.   Það telur.  

 

 

Spennandi mataruppskriftir

  Fátt er betra en hvalkjöt.  Einkum marsvín,  sem í Færeyjum er kallað grind.  Og bandarísku hryðjuverkasamtökin Sea Shepherd kunna ekki að meta sem mat.  Enda matvandir sérvitringar,  furðufuglar,  stórtækir þjófar og lélegir bílstjórar.  Geggjað lið í flesta staði og veruleikafirrt.  

  Marsvínakjötið er veislumatur snöggsteikt á pönnu.  Steikt þannig að þunnar sneiðar dökkni vel að utan en jaðri við að vera blóðugar að innan.

  Það má líka elda marsvínið í ofnskúffu.  Besta uppskriftin er þannig (fyrir um það bil fjóra í mat):

  1 kg marsvínskjöt

  2 dl borðedik

  1 lítri vatn

  2 laukar

  2 teskeiðar salt

  1 teskeið pipar

  50 grömm smjörlíki

  1 lítri vatn

  1 súputeningur

  Smá hveitimjöl 

  8 flöskur af rauðvíni 

   Kjötið er skorið í þunnar sneiðar og sett ásamt edikinu í vatnið degi fyrir neyslu.   Daginn eftir er ofnskúffan er smurð með klípu af smjörlíkinu.  Kjötið er þerrað með eldhúsbréfi og lagt snyrtilega á skúffuna.  Piparnum og saltinu er stráð yfir.  Ofninn er stilltur á 180 gráður og skúffunni skellt inn í hann.  Síðan skiptir sér enginn meira af honum í næsta hálftímann.  

   Þess í stað er laukurinn saxaður niður.  Hann er settur í lítinn pott ásamt afganginum af smjörlíkinu.  Laukurinn fær að malla á lágum hita þangað til hann brúnast.  

  Nú er lauknum sturtað kæruleysislega yfir kjötið.  Einnig vatninu sem kjötið lá í um nóttina.  Þetta fær að malla í klukkutíma.  Um biðbik tímans þarf að ausa vökvanum yfir kjötið.  

  Að þessu afstöðnu má búa til sósu úr vökvanum sem eftir er.   Þá er súputening blandað saman við ásamt smávegis hveitimjöli.  Það er smekksatriði hvað fólk vill þykkja sósuna mikið með hveitimjölinu.  Sumum þykir sósan fallegri með því að lita hana með soja olíu.

  Með þessum veislumat er gott að snæða soðnar kartöflur nýuppteknar í Þykkvabæ.   2 flöskur af rauðvíni á mann eru sötraðar með af áfergju.  Það fer best á því að spila færeyska músík á meðan góðgætinu er sporðrennt.  

 

  Önnur uppskrift fyrir 4:  

   1 kg marsvínakjöt

   3 matskeiðar salt

   203 gr selspik

   1 kg kartöflur

    Vatn 

   8 flöskur af rauðvíni 

   Kjötið er sneitt í þunnar sneiðar.  Það sett í pott og kaffært með vatni.  Látið sjóða á hellu.  Þegar suðan er komin upp er vatninu hellt af og nýtt vatn látið fljóta yfir kjötið. Áfram er soðið.  Er suðan hefst er fleytt ofan af og saltinu bætt við.  Þetta sýður í hálfan annan tíma.   Selspikið er skorið í litla bita og því ásamt kartöflunum skellt út í.  Þannig mallar það í hálftíma til viðbótar.  Þá er veislumaturinn til og honum skolað niður með rauðvíninu.  Oft gefst vel - upp á stemmninguna að gera - að klára fyrri rauðvínsflöskuna á meðan á matseld stendur.    

--------------------------------------------

 

      

Tortillur með parmaskinku og fetaostamulningi

Sea Shepherd aðhlátursefni

  Aulagangurinn á Sea Shepherd,  ranghugmyndir þeirra og framganga hefur skemmt Færeyingum rækilega og lengi.  Það er langt síðan Færeyingar hafa hlegið jafn mikið og jafn lengi í einu,  eða í næstum tvo mánuði samfleytt.  Enn bætti í þegar bíl Sea Shepherd var keyrt út af og ofan í skurð.  Við það komst styggð að bílstjóranum.  Hann fældist og hljóp gólandi út í móa.  Þar baðaði hann út höndum og fótum í geðshræringu og ráðaleysi.

  Færeyingar fylgdust með og tóku bakföll í hláturskasti.  Við það bráði af SS-manninum.  Hann færði sig varfærnislega aftur að bílnum og bað um aðstoð við að ná bílnum upp úr skurðinum.  Spurði hvort hægt væri að fá kranabíl í verkið.  Jafnframt afsakaði hann viðbrögð sín.  Sagðist hafa fengið ofsafengið hræðslukast við að bíllinn myndi velta ofan í skurðinn og hann sjálfur stórslasast og örkumlast í kjölfarið.   

  Af viðbrögðunum ætla menn að þarna hafi kauði þreytt frumraun sína í akstri utan malbikaðra breiðstræta New York borgar. 

  Honum var bent á að setja bílinn í bakkgír og bakka upp á veg.  Skurðurinn er grunnur,  grasi gróinn og hættulaus með öllu.  Bakkgírinn virkaði á bílnum.  Þetta var ekkert mál og gaurinn ók niðurlútur á brott undir hlátursköllum Færeyinga.  Reyndar hefði alveg eins mátt aka kraftmikla jeppanum áfram og upp á veg.  Eins og sést á myndunum voru aðstæður ekki jafn skelfilegar og vesalingurinn upplifði.  Áður en hann staulaðist taugaveiklaður upp í bílinn leitaði hann af sér allan grun með því að skríða undir bílinn og velta sér þar eins og afvelta rolla.  

  Grunur leikur á að bílstjórinn hafi verið að skima eftir marsvíni þegar honum fipaðist aksturinn.  Þrátt fyrir að hvergi hafi sést til sjós frá þessum sveitatroðningi.  

Pamela bjargar færeyskum hvölum

Pamela Anderson strandaglópur í Færeyjum

 

 

 

 

 

 

 

 

 

 

 

 

 

  Í júní ætluðu bandarísku hryðjuverkasamtökin Sea Shepherd að slá sér upp með árás á 48 þúsund manna samfélag í Færeyjum  Átakið kallast Grind Stop 2014.  Það gengur út á að stöðva veiðar Færeyinga á marsvínum (grind).  

 

  Eins og segir í afbökuðu orðatiltæki þá hefur allt farið afsíðis sem getur farið afsíðis.  Félagar í SS fjölmenntu til Færeyja.  Hluti þeirra var staðinn að stórtækum og grófum þjófnaði á matvælum í skipinu Norrænu og aftur í verslun í Nolsoy í Færeyjum.   Þar stálu hryðjuverkamennirnir bjór.  Trúverðugleiki um gott siðferði flaug út um gluggann.  Hafi hann verið til staðar.  Sem er óvíst.  Þess í stað urðu liðsmenn Sea Shepherd aðhlátursefni í Færeyjum.  

 

  Iðulega ná Færeyingar marsvínavöðum yfir sumartímann.  Þó er allur gangur á því.  Í sumar hefur fátt borið til tíðinda í þeim efnum.  Liðsmenn SS hafa staðið í erindisleysu í fjöru í Færeyjum,  gónt út á haf án þess að verða varir við hval.  Fyrr en í fyrradag.  Þá varð vart við marsvín úti fyrir Haraldssundi.  Veður var óhagstætt.  Þess vegna voru mótorbátar ekki ræstir út.  Hinsvegar sigldi skip SS til móts við hvalina og fældi þá úr sundinu.

 

  Sýslumaður Norðureyjanna hefur kært uppátækið.  Þar er um formlega stjórnsýsluaðgerð að ræða.  

 

  Til tíðinda dró um síðustu helgi.  Þá tilkynnti kanadíska leikkonan Pamela Anderson komu sína til Færeyja.  Erindið var að vekja athygli heimsins á (misheppnuðu) átaki SS gegn hvalveiðum Færeyinga.  

 

  Pamela er heimsfræg leikkona og Playboy fyrirsæta.  Líka fræg fyrir að hafa verið eiginkona trommuleikara glysrokksveitarinnar Mötley Crue,  Tommy Lee.  

 

  Pamelu gekk illa að komast til Færeyja.  Hún flaug til Danmerkur en komst ekki þaðan á auglýstum tíma.  Sem átti að vera fyrr í vikunni.  Hún slapp loks til Færeyja í dag og hélt þar blaðamannafund.    

  Ljóskan er illa að sér um samgöngur til og frá Færeyjum.  Færeyingar reka eitt flugfélag,  Atlantic.  Frábært flugfélag sem gaman er að ferðast með (ókeypis bjór).  Það er oft uppbókað.  Einkum í kringum hátíðir á borð við Ólafsvökuna sem fór fram í þessari viku.   

 

  Nú er Pamela strandaglópur í Færeyjum.  Ekkert laust flugsæti næstu daga.  

 

  Pamela grætur það ekki.  Á blaðamannafundinum í dag sagðist hún vera dolfallin yfir fegurð Færeyja.  Sjálf alin upp á eyju í Kanada og sé því eyjastelpa.

 

  Á fundinum hélt hún því fram að hvalir séu gáfaðar skepnur sem leggi mikið upp úr nánum fjölskyldutengslum.  Fjölskyldan sé hornsteinn í þeirra tilveru.

 

 Þetta er rangt hjá kellu.  Hvalir eru heimskir.  Jafnvel í samanburði við Tommy Lee.   Fjölskyldutengsl þeirra ná lítið út fyrir nýfædda kálfa.     

   

  Pamela leyfði fyrirspurnir á blaðamannafundinum.  Hún lýsti jafnframt yfir áhuga á að skiptast á skoðunum við færeyska hvalveiðimenn eftir blaðamannafundinn.   Allt gekk þetta lipurlega fyrir sig.  Allir voru kurteisir og yfirvegaðir.   Eins og Færeyinga er von og vísa.  Sjálf var Pamela ljúf sem lamb.  Hún sýndi viðmælendum sínum virðingu,  hlustaði á þeirra skoðun en hvikaði hvergi frá sínum viðhorfum.  

 

  Þrátt fyrir að ekki hafi náðst niðurstaða sameiginlegs viðhorfs þá skoraði Pamela prik með fagmannlegri og góðri framkomu.  Hún er atvinnuleikkona.   

   

 

Broslegar ljósmyndir teknar á hárréttu augnabliki

  Þegar ég var í Myndlista- og handíðaskóla Íslands á áttunda áratugnum var ein mánaðarönn lögð undir ljósmyndun.  Við nemendurnir þurftum staurblankir að kaupa rándýrar myndavélar.  Ekki var um annað að ræða.  Þetta var fyrir daga einnota myndavéla og farsíma með myndavél.  Það var allt dýrt í kringum þetta:  Filmur,  framköllunarvökvi,  ljósmyndapappír... 

  Eflaust gerði okkur myndlistanemendum gott að fá innsýn í heim ljósmyndarinnar.  Ein setning kennarans situr í mér.  Hún var á þá leið að besti ljósmyndarinn væri sá sem tæki margar myndir.  Fyrr eða síðar myndi hann fyrir tilviljun lenda á rétta augnablikinu.  Því náði sá sem tók mynd af þessum hestum.  Sá til hægri fer yfir og felur andlit manneskju.  Fyrir bragðið virðist hún vera með hestshaus.  Og kannski var hún það. 

 

 

  Páfagaukur gengur inn á myndina og auga hans hittir sem staðgengill auga mannsins. 

  Neðri hluti barborðsins er spegill.  Viðskiptavinurinn,  kona í pilsi,  virðist vera neðri hluti barþjónsins. 

  Skott kattanna mynda skemmtilegt hjartalaga mynstur. 

  Manneskjan sem klifrar á hæðinni virðist prumpa stóru skýi.  Kannski gerði hún það eftir að hafa komist í bakaðar baunir frá Mexíkó?

  Strákurinn virðist vera með tagl.  Þegar vel er að gáð má sjá í fótabúnað stelpu sem hleypur við hlið hans.  Hún er með taglið sem guttinn virðíst vera með. 

Misvísandi fréttir af Pamelu Anderson í Færeyjum

 

  Fyrir nokkrum dögum sendi kanadísk-ættaða bandaríska leikkonan Pamela Anderson frá sér yfirlýsingu um að hún væri á leið til Færeyja.  Gott ef afi hennar var ekki Finni.  Þaðan er allavega eftirnafn hennar,  Anderson, komið.  Einnig norrænt útlit þessarar heimsþekktu ljósku.  Hún er ekki múlatti.  Kannski er hún samt í raun með dökkt hár sem hún litar.

  Erindi kellu til Færeyja var að styðja og vekja athygli heimsbyggðarinnar á sumarátaki bandarísku hryðjuverkasamtakanna Sea Shepherd,  GrindStop 2014.  Átakið snýst um að koma í veg fyrir veiðar Færeyinga á marsvínum.        

  Átakið hófst með miklum látum í júní.  Bátur Sea Shepherd lagðist við bryggju í höfuðborg Færeyja,  Þórshöfn.  Blásið var til blaðamannafundar á bryggjunni.  Um 15 erlendir fjölmiðlamenn mættu á fundinn.  Síðan hefur ekkert gerst.  

  Nóg um það.  Um helgina sögðu fjölmiðlar frá því að Pamela Anderson væri komin til Kaupmannahafnar í Danmörku.  Síðan sögðu færeyskir fjölmiðlar að hún væri komin til Færeyja.  Núna segir mbl.is að hún sé veðurteppt í London.  

  Hvað er í gangi?   

  Sjá:  http://aktuelt.fo/ongin+paul+bara+pamela.html

         http://www.in.fo/news-detail/news/pamela-komin-at-hjalpa-sea-shepherd/

  Ég kannast vel við það á eigin skinni að flugsamgöngur til Færeyja eru stopular.  Þar er aðeins einn flugvöllur.  Þoka er landlæg í Færeyjum. Ég hef oft tafist um nokkra daga og allt upp í heila viku að komast til Færeyja. 

  Ef að fréttir um að Pamela væri komin til Kaupmannahafnar voru réttar þá átta ég mig ekki á því hvers vegna hún er strandaglópur í Englandi.  Það eru tíðar flugferðir á milli Danmerkur og Færeyja en fátíðar á milli Færeyja og Englands. 

  Hitt veit ég að Pamela var búin að bóka gistingu í lúxussvítunni á Hótel Hafnía í miðbæ Þórshafnar í Færeyjum. 

  Inn í þetta rugl má taka að Pamela er ekki með alla hluti á hreinu.  Á dögunum sagði hún að erindi sitt til Færeyja væri m.a. að forða forsprakka Sea Sheperd,  Paul Watson,  frá því að vera handtekinn í Færeyjum og framseldur til Costa Rica.  Þar biði hans dauðadómur.  Hið rétta er að Costa Rica er friðsamt ríki í Mið-Ameríku með siðferði á hærra stigi en svo að þar séu dauðarefsingar. 

  Pamela var um tíma í sviðsljósinu sem eiginkona trommuleikara léttpopps-glamrokksveitarinnar Mötley Crue, Tommy Lee.  Hann er heimskur en nokkuð góður trommari.  Verra er að hann lamdi Pamelu.  Blessunarlega var honum stungið í steininn fyrir uppátækið. 

 

  Uppfært 31. júlí:

  Grunur leikur á að aldrei hafi staðið til að Pamela kæmi til Færeyja.  Þetta hafi allt verið sviðsett leikrit.  Svo virðist sem allar skráðar flugferðir til Færeyja hafi gengið snurðulaust fyrir sig.  

  Þó er aldrei að vita.  Nú var hún að boða til blaðamannafundar í Færeyjum síðdegis á morgun. 

 

Pamela fór ekki til Færeyja

Megrunarvatn

  Eitthvað það hollasta sem við getum gert fyrir heilsuna er að byrja daginn á því að drekka 640 ml af vatni.  Það er ótrúlega erfitt.  Samt er enginn vandi að drekka þetta magn af bjór.  Það virkar ekki eins vel á fastandi maga.  Er samt skemmtilegra.  Næst er að fá sér máltíð eftir þrjú korter og drekka ekkert vatn í næstu tvo klukkutíma þar á eftir.  Það er ekkert erfitt.  

  Vatn er ekki sama og vatn.  Íslenskt kranavatn er eitt það besta í heimi.  Þeir sem hafa ekki sama aðgang að góðu vatni og við Íslendingar spyrja sig:  Hvaða vatn er best að drekka?  Svarið er:  Dietvatn.  Vatn sem inniheldur ekki kolvetni, hitaeiningar eða annað varasamt.  Nú fer diet vatn eins og stormsveipur um vatnsmarkaðinn.

 

  Dietvatn er byltingarkennd lausn á heilsuvandamálum heimsins.  

  Markaðssetning á vatni sem megrunarvatni er snilld. Hún virkar rosalega vel.  Diet er málið.  

  Þessu skylt er markaðssetning á hinni ýmsu matvöru fyrir grænmetisætur.   Matvöru sem inniheldur ekkert hráefni úr dýraríkinu.  Þar ber hæst gervisvínakjöt með kjúklingabragði:  

 

 

 

 

 

 

 

 

 

 

 

 

 

  Því næst er það grænmetiskjúklingur.  

 

Black Sabbath

 

   Tvær fyrstu plötur bresku blúshljómsveitarinnar Black Sabbath frá Birmingham komu út 1970. Þær skópu og mótuðu þungarokkið (heavy metal) til frambúðar.  Þungarokkið var eiginlega ekki orðið til á þeim tímapunkti en var að detta inn.  Tvær fyrstu plötur þjóðlagablússveitarinnar Led Zeppelin komu út 1969.  Plata Deep Purple "In Rock" kom út 1970.  A-þýsk-kanadísk-bandaríska hljómsveitin Steppenwolf sendi 1968 frá sér lagið Born To Be Wild.  En það náði ekki flugi fyrr en í kvikmyndinni "Eazy Rider" ári síðar.   

 

  Á þessum árum var að verða til músíkstíllinn þungarokk. Í texta "Born to be Wild" kemur fyrir setningin "heavy metal thunders".   Þar með var nýi blús-þungarokksstíllinn kominn með nafn:  "heavy metal" (þungarokk).

  Þungarokkið mótaðist hratt 1969-1970.  Fyrsta skrefið var tekið af bresku hljómsveitinni The Kinks 1964 með laginu  "You Really Got Me".   Svo og bandaríski (búsettur í Englandi) gítarleikarinn Jimi Hendrix 1966.   

 

 Black Sabbath kom til þungarokkssögunnar sem drungi og djöfull,  daður við djöfladýrkun og dauða.  Sándið var myrkara en áður heyrðist og boðskapurinn neikvæður. 

 

  Gítarleikari Black Sabbath,  Tony Iommi, var áður i Jethro Tull   Hann missti framan af fingrum vinstri handar í slysi.  Fyrir bragðið átti hann erfitt með að spila hreina hljóma.  Ráð hans var að ofkeyra gítarmagnara þannig að gítardrunur runnu saman í eitt.

  Söngvari Black Sabbath,  Ozzy Osbourne,   var og er sérkennilegur náungi.  Sem unglingur gekk metnaður hans út á það að verða fótboltabulla og krimmi.  Hann hellti sér út í innbrot.  Einhver stakk að honum því góða ráði að vera ætíð með hanska í innbrotum.  Hann keypti það en fannst meira töff að vera með grifflur.  Fattaði ekki að hanskar áttu að koma í veg fyrir fingraför.  Klúðrið kostaði hann fangavist.  

  Löngu síðar sat Ozzy í fangelsi í Bandaríkjunum.  Í það skiptið fyrir morðtilraun.  Hann reyndi að drepa Sharon,  eiginkonu sína.  Í fangelsi í Bretlandi dunda fangar sér við að láta húðflúra á sig rasísk og yfirlýsingaglöð húðfúr.  Ozzy lét húðflúra á sig barnalega broskalla á hnéskelarnar. 

   Bassaleikari Black Sabbath er grænmetisæta.  Hann hefur ekki borðað dýraafurð frá því að hann var barn.

  Trommuleikari Black Sabbath,  Bill Ward,  hefur sungið tvö lög inn á plötur Black Sabbath. 

 

  Þegar Black Sabbath hljóðritaði plötuna "Heaven and Hell" kveikti Tony Iommi í trommuleikaranum.  Sá þurfti að leggjast inn á spítala með 3ja stigs brunasár.  Móðir hans kunni ekki að meta grínið.  Hún hringdi þegar í stað í Tony og las honum pistilinn. 

  Trommuleikarinn Bill Ward hefur verið heilsulaus síðustu ár.  Fleira spilar inn í að hann var ekki með á síðustu plötu Black Sabbath,  13.   Einhver leiðindi í gangi sem rekja má til Sharonar,  eiginkonu Ozzys.

  Trommuleikari bandarísku hip-hopp-rapp-pönk-fönk-metal-sveitarinnar Rage Against The Machine var fenginn til að hlaupa í skarðið á 13.  Hann er snilldartrommari en ólíkur Bill Ward.  Heitir samt líku nafni,  Brat Ward.  Bill var búinn að tromma í nokkrum lögum í hljóðverinu.  Trommuleik hans var hent út og Brat trommar í öllum lögunum.

  Svo skemmtilega vildi til að Brat kunni öll lög Black Sabbath utan að frá A-Ö.  Hann var og er ákafur aðdáandi.  Eins og gítarleikari Rage Against the Machine,  Tom Morello.  Hann hefur skilgreint Rage Against the Machine sem "Black Sabbath mætir rapp-hipp-hoppi".     

 

Spaugilega misheppnaðar myndir af börnum

  Í dag eiga flestir farsíma eða snjallsíma með myndavél.  Það auðveldar foreldrum að varðveita í myndaformi skemmtileg augnablik með börnum sínum.  Þetta var öðruvísi fyrir nokkrum áratugum.  Þá pöntuðu foreldrar með góðum fyrirvara tíma á ljósmyndastofu.  Þangað var síðan mætt með barnið. 

  Það var heilög stund þegar sprenglærður ljósmyndarinn smellti mynd af barninu - eftir að hafa raðað upp ljósaskermum,  mælt ljósmagn,  stillt fókus og það allt saman.  Það var ekkert verið að smella af að óþörfu.  Filmur voru rándýrar.  Ljósmyndapappír líka.  Allt  þessu tengt var rándýrt.

  Mörgum dögum síðar var hringt frá ljósmyndastofunni og tilkynnt að búið væri að framkalla myndina.  Það var hátíð í bæ þegar myndin var komin í hús og allir fengu að skoða hana.  Svo var hún römmuð inn og hengd upp á vegg á áberandi stað í stofunni.

  Eins og gengur var ljósmyndurum mislagðar hendur.  Það var ekki öllum gefið að laða fram fallegasta bros barnsins.

  Einkum var það erfitt þegar börnin voru tvö.  Þá gat annað barnið sett upp sparisvip eitt augnablik.  Það augnablik var fangað.  En á kostnað hins barnsins.

   

  Vandinn tvöfaldast þegar börnin eru fjögur.

 

  Svo ekki sé talað um vandann þegar hópurinn er miklu fjölmennari. 

 

  Munum að vandamálið er líka til staðar þó að barnið sé aðeins eitt. 

 ---------------------------------------------

  Á upphafsárum rokksins á sjötta áratugnum voru margir hressir.  Þar á meðal Little Richard,  Elvis Presley,  Jerry Lee Lewis,  Chuck Berry,  Bunker Hill og Link Wray.  Link flutti síðar til Danmerkur og bjó þar fram á dauðadag (sem var fyrir nokkrum árum).  Hann starfaði m.a. með dönsku hljómsveitinni Sorte Sol.  En þarna á upphafsárum rokksins í Bandaríkjum Norður-Ameríku spilaði hann m.a. með Bunker Hill.  Textinn er snilld.  Bunker upplýsir að stelpan sem er umtöluð fyrir að kunna ekki að dansa sé kærastan sín.  

 

"Stolin frétt"

  Í síðasta mánuði,  júní,  breytti Sláturfélag Suðurlands,  SS,  uppskrift á vinsælustu pylsum á Íslandi, SS pylsunum.  "Íslendingar borða SS pylsur".  Í stað þess að hafa nautakjöt sem aðal hráefni var skipt yfir í ódýrt svínakjöt.  Beljukjöt var ennþá haft með í búðingnum en í miklu minna mæli.  Það var skyndilega blandað dönsku beljukjöti.

  Frá þessu skýrði ég á þessum vettvangi í síðustu viku.  Viðskiptablaðið tók málið upp þegar í stað. Síðan Fréttablaðið,  DV, mbl.is,  visir.is og útvarpsstöðvar.  Engin gat þess hvar málinu var "skúbbað". 

  Svona er þetta iðulega með "skúbbin" á þessari bloggsíðu.  Það er svo sem bara gaman að fylgjast með "skúbbunum" ná flugi í dagblöðum,  útvarpi og víðar.  Ég kann samt betur við það þegar fjölmiðlar geta þess hver uppgötvaði málið og vakti fyrstur athygli á því.  Annað er "stolin frétt".  Sumir gera það.  Stundum.    

  http://jensgud.blog.is/blog/jensgud/entry/1412501/

Skúbb! Íslendingar borða SS pylsur úr dönsku beljukjöti

 

  Sláturfélag Suðurlands,  SS,  er með sterka markaðsstöðu á Íslandi.  Þar af ráðandi stöðu um margt.  Til að mynda er SS pylsan með undirtökin á pylsumarkaðnum.  Skýringin er sú að hún hefur verið bragðbesta pylsan. 

  Fyrir 20 - 30 árum var minn kæri æskuvinur,  Helgi Gunn,  Kaupfélagsstjóri í Varmahlíð.  Þar er stórmarkaður,  veitingasala, bensínafgreiðsla og sjoppa.  Túrhestar keyptu sér pylsu með öllu og ís í sjoppunni.  Helgi veitti því athygli að margir kláruðu ekki pylsuna sína.  Dag hvern blasti við fjöldi pylsubita í ruslafötum staðarins. 

  Helgi gerði þjónustukönnun.  Hann dreifði til viðskiptavina spurningablaði.  Þar var m.a. spurt að því hvað mætti betur fara varðandi vörur og þjónustu í KS Varmahlíð.  Kúnnarnir fundu helst að pylsunni með öllu.  Hún væri ekki góð.  Um var að ræða KS pylsur.  Þær eru að vísu ágætar.  En ekki sem ein með öllu.

  Viðbrögð Helga voru að skipta yfir í SS pylsur.  Það var eins og við manninn mælt.  Allir kláruðu sína pylsu.  Engir pylsubitar sáust lengur í ruslafötunum.  Enginn kvartaði lengur undan pylsunum í þjónustukönnun Kaupfélagsins.

   Stjórnendur kjötvinnslu KS móðguðust.  Ráku upp ramakvein og klöguðu í yfirstjórn KS.  Helgi fékk fyrirmæli um að selja aðeins KS pylsur með öllu.  Hann neitaði.  Og var rekinn!

  Engum hefur tekist að skáka SS pylsunni.  Samt hafa auglýsingar um hana ekki alltaf verið klókar.  Eitt af lykilatriðum við slagorð er að ekki sé hægt að snúa út úr þeim á neikvæðan hátt.  Þegar SS tók upp á því að auglýsa "SS pylsur, þú þekkir þær, þessar bognu!" auglýsti Goði þegar í stað:  "Það er ekkert bogið við Goða-pylsur!"

  Síðustu ár hefur verið vel staðið að auglýsingum á SS pylsum.  Slagorðið "Íslendingar borða SS-pylsur" hljómar bæði trúverðugt og hvetjandi.  Það vinnur jafnframt vel með slagorðinu "SS 1944-réttir fyrir sjálfstæða Íslendinga."  

  Allir eru haldnir þjóðrembu af mismiklum ákafa.  Það virkar vel á Íslendinga að heyra orð eins og íslenskt og Íslendingar í auglýsingum.

  Þekkt og margtuggin klisja er á þá leið að á meðan allt gengur vel sé ekki ástæða til að breyta neinu.  Ef hluturinn er ekki bilaður þá þarf ekki að gera við hann.  Eins og sýndi sig í græðgisvæðingunni á síðasta áratug þá láta margir Íslendingar sér ekki nægja að allt gangi vel.  Þeir vilja græða ennþá meira.  Bankahrunið 2008 kenndi sumum - tímabundið - að kapp sé best með forsjá.

  Nú bregður svo við að vinsælasta pylsan á Íslandi,  SS pylsan,  bragðast ekki lengur eins og við eigum að venjast.  Með smá rannsóknarvinnu kemur í ljós að þetta er ekki lengur gamla góða SS pylsan eins og við þekkjum hana.  Græðgisvæðingin hefur breytt henni.  Breytingunni er laumað inn í skjóli nætur svo lítið ber á. 

  Áður var kindakjöt uppistöðuhráefnið.  Síðan nautakjöt og smá svínakjöt.  Svínakjöt er lang ódýrast.  Þess vegna er svínakjötið núna orðið uppistöðuhráefnið.  Ennþá fréttnæmara er að ódýru dönsku beljukjöti er nú blandað saman við pylsubúðinginn.  Íslendingar sem velja SS-pylsur velja þess vegna danskt beljukjöt héðan í frá.

  SS hefur ekki séð ástæðu til að upplýsa um breytinguna á heimasíðu sinni.  Það er ósvífið.  Þvert á móti er gömlu góðu innihaldslýsingunni hampað þar. 

  Kannski er þetta stærsta markaðsklúður síðan Kókakóla breytti uppskriftinni fyrir nokkrum árum.  En varð afturreka með breytinguna.  Eftir að hafa orðið aðhlátursefni og gefið keppinautum svigrúm til að auka markaðshlutdeild sína. 

  Heimasíða SS er að öðru leyti afspyrnu vond.  Það er önnur saga.  Samt.  Alltof mikið af flæðandi texta án myndefnis.  Notendur heimasíðu hafa enga löngun til að lesa langlokutexta.  Ljósmyndir gleðja.  Stykkorð virka betur en ritgerðir.  Það hefur ENGINN huga á forsögu.  Öllum er drullusama um það hvenær fyrirtæki var stofnað. 

---------------------------------------------

Vínarpylsur 10 stk lt

Vöruheiti :Vínarpylsur 10 stk lt

Vörunúmer : 5356017

Meðalþyngd vöru : 0.560 kg.

Innihald

Kinda-,nauta- og svínakjöt, vatn, undanrennuduft, kartöflumjöl, salt,krydd (m.a. sinnep), sojaprótín, bindiefni (E450,E451), kjötkraftur(snefill af sellerí), þráavarefni(E301 ),rotvarnarefni(E250).

 

Hver er tvífari þinn?

  Ótrúlegt en satt.  Og hefur verið fært til bókar og staðfest:  Nánast allt fólk á tvífara,  sér alls óskylda.  Að minnsta kosti óskylda í tíu ættliði.  En einhver fjarskyldari gen hljóta að koma við sögu lengra aftur í ættir og afgreiða tvífara.  Því er jafnvel haldið fram að ekki þurfi fjölmennara úrtak óskyldra (hljóta samt að vera fjarskyldra) ættingja en 500 manns til að finna tvífara.

  Hér er dæmi þar sem ekki hefur samt tekist að rekja saman skyldleika:

  Þessir herramenn eru kannski fjarskyldir.  Hafa verið rangfeðraðir eða eitthvað svoleiðis.  Þegar þeir urðu á vegi ljósmyndara voru þeir með samskonar derhúfu.  En ekki í skyrtu í sama lit.  Samt eru skyrturnar í sömu stöðu hjá þeim. 

 

  Vissulega er hárlitur þessara  "óskyldu" kvenna ekki sá sami.  En allt annað:  Augabrúnir,  augnsvipur, nef, kinnar,  tennur, haka...

  Þessar dömur eru ekki aðeins með sama andlitsfall.  Þær eru með sömu hárgreiðslu.  Nákvæmlega.  Mesta undrun ljósmyndarans vakti að þær voru í alveg eins skyrtubol. 

 

  Eins og annað fólk þá á fræga fólkið tvífara.  Margir tvífarar fræga fólksins hafa atvinnu af því að þykjast vera fræga manneskjan.

 

  Bandarískum kvikmyndaleikara,  Will Ferrell,  og trommuleikara rokkhljómsveitarinnar Red Hot Chili Peppers er oft ruglað saman.  Eins og með fleiri tvífara er fatasmekkur sá sami. Kvikmyndaleikarinn er liðtækur trommuleikari. 

Verulega vandræðaleg staða hryðjuverkasamtaka

    Bandarísku hryðjuverkasamtökin Sea Shepherd ætluðu að slá sér upp í sumar með átaki sem kynnt var undir yfirskriftinni GrindStop 2014.  Átakið átti að vekja athygli og aðdáun á baráttu samtakanna gegn hvalveiðum Færeyinga.  Jafnframt í kjölfarið að afla þeim vænum styrktarframlögum í beinhörðum peningum frá ríkum poppstjörnum,  kvikmyndaleikurum og öðrum auðmönnum.  Það lið "kaupir sér" á þann hátt tilgang í lífinu:  Með því að bjarga lífi hvala.  Það stendur í þeirri trú að hvalir séu gáfaðir.  Sem er alrangt.  Hvalir eru nautheimskir.  Enda náskyldir beljum.  Þar fyrir utan éta hvalir meira af öðrum lifandi sjávardýrum en nokkuð annað dýr. 

  Með veiði á einum hval er lífi þúsunda annarra dýra þyrmt.  Ef út í það er farið.  Fiskurinn sem hvalurinn sporðrennir hefur líka tilfinningar.  Á foreldra, systkini og aðra ástvini.

  Upphaf átaksins GrindStop 2014 fór vel af stað.  Blaðamannafundur á bryggju í Færeyjum dró að um 15 stóra fjölmiðla frá heimspressunni.  Þetta var í júníbyrjun. 

  Nú er hálfur annar mánuður liðinn frá upphafi átaksins.  Hver dagur verður æ vandræðalegri fyrir SS.  Nákvæmlega ekkert hefur borið til tíðinda allan þennan tíma.  Liðsmenn SS sem standa vaktina í Færeyjum eru meira að segja farnir að væla á Fésbók undan aðgerðarleysi og tilbreytingaleysi.  Frá sólarupprás til sólarlags standa þeir 3 og 3 saman og stara út á haf.  Þeir reyna að koma auga á marsvínavöðu (grind) í sjávarmálinu.  Þeir bíða eftir því að firðir fyllist af mótorbátum sem smala marsvínum upp í fjöru.  Ekkert slíkt hefur gerst.  Það hefur ekkert gerst í hálfan annan mánuð.  Átakinu lýkur eftir hálfan mánuð.

  Færeyjarnar eru 18.  Færeyskir firðir eru miklu fleiri.  SS-liðar hafa ekki aðstöðu til né rænu á að vakta þá alla.  Það er ekki útilokað að hvalveiðar hafi átt sér stað í einhverjum þeirra án þess að SS-liðar yrðu þess varir.  Þegar útlendingar eru í grennd láta Færeyingar lítið bera á hvalveiðum.     

  Fjölmiðlar heimsins hafa fyrir löngu síðan misst allan áhuga á átakinu GrindStop 2014.   Átakið hefur ekki skilað SS neinum fjárframlögum frá auðmönnum.  Það eina sem átakið hefur skilað er að gera félaga SS að fíflum. 

  Hvað er bjánalegra en að standa í fjöru frá sólarupprás til sólarlags daglega í 2 mánuði,  góna út á haf og ekkert gerist? 

  Athygli Færeyinga vekur að SS-liðarnir sem stara á hafið með augun mött klæðast fóðruðum leðurjökkum og eru í leðurskóm.  Sumir eru með leðurbelti í buxnastreng.  Er hráefnið í þessum klæðnaði af sjálfdauðum dýrum?  Eða dýrum sem hafa verið drepin gagngert til að fólk,  þar á meðal SS-liðar, geti klæðst skinnvöru?   

  Um rænandi SS-liða og fleira má lesa með því að smella á þennan hlekk:  http://jensgud.blog.is/blog/jensgud/entry/1405591/

  Færeyingar hafa skemmt sér konunglega við að hlæja að vandræðagangi SS.  Enda gott grín. 

Japanskt og spaugilegt

  Japönum þykir margt einkennilegt og spaugilegt í siðum og hegðun Íslendinga.  Okkur þykir jafnframt margt einkennilegt og spaugilegt í menningu og siðum Japana.  Japanskur stjórnmálamaður sem varð uppvís að spillingu grét með hljóðum af innlifun í japanska sjónvarpinu.  Þannig viðbrögðum eigum við ekki að venjast af íslenskum stjórnmálamönnum.  Þegar þeir eru staðnir að spillingu rífa þeir kjaft og kenna öðrum um um.  Sá japanski sagði af sér eftir grátkastið.  Íslenskir stjórnmálamenn segja ekki sjálfviljugir af sér.  Þeir örfáu íslensku sem hafa sagt af sér hefur í raun verið sparkað úr embætti af öðrum. 

  Fyrir einhverjum áratugum kom hópur japanskra ferðamanna til Íslands.  Þegar þeir versluðu í Fríhöfninni í flugstöðinni í Keflavík lögðu þeir frá sér peningaveski á meðan úrvalið var skoðað.  Mörgum veskjum var stolið.  Áreiðanlega af Íslendingum.  Þetta kom Japönum í opna skjöldu. Í Japan er seðlaveskjum ekki stolið.

  Leikurinn endurtók sig á Hótel Esju.  Þar dvöldu Japanirnir.  Þeir sem ennþá voru með sitt seðlaveski lögðu það frá sér á klámbekk hér og þar á hótelinu.  Öllum var stolið.  Þá urðu Japanir meira undrandi en áður.  Í Japan er það þannig að þjófur færir skömm yfir alla ættingja.  Líka fjarskylda.  Í kjölfar eru þeir útskúfaðir úr stórfjölskyldunni sem situr uppi með sameiginlega skömm.  Skömmin er mikil og ristir djúpt.

  Almennt vitum við Íslendingar lítið um japanska menningu.  Ef frá er skilið að á allra síðustu árum hafa japanskir réttir sem kallast suzhi orðið tískufyrirbæri hérlendis.  Þetta eru dýrir smáréttir.  Að uppistöðu til hvít hrísgrjónaklessa með hrárri fisksneið.  Oft fylgir spriklandi hringormur með svo lítið ber á. 

  Minna hefur farið fyrir japanska suzhi með öðrum og stærri skordýrum.  Kannski vegna þess að þau eru vandfundin hérlendis.  En njóta vinsælda í Japan.

  Japanir búa þröngt.  Landsvæði er af mjög svo skornum skammti.  Fyrir bragðið eru til að mynda golfvellir í Japan þeir dýrustu í heimi.  Lóðin er svo dýr.  Aðeins auðmenn í Japan hafa aðgang að golfvelli.  "Þétting byggðar" er óþekkt slagorð í Japan.   Þröngt mega sáttir sitja og sofa er ekki heldur slagorð þar.  Þetta er raunveruleiki sem ekki verður flúinn.

  Þvers og kruss um Japan eru gistiheimili sem leigja út það sem við getum kallað gistiskápa.  Japanir vanir þrengslum kunna vel að meta gistiskápana.   

 

  Margir Japanir eru það sem kallast einstæðingar.  En þrá samvistir við annað fólk.  Í Japan blómstrar svokölluð fjölskylduleiga.  Einstæðingar geta leigt sér ókunnuga fjölskyldu yfir helgi eða lengri tíma.  Ókunnuga fjölskyldan mætir heim til einstæðingsins og lætur eins og hún sé fjölskylda hans.  Ódýrari útgáfa er koddi sem lítur út eins og kvenmannskjalta.  Önnur útgáfa er koddi með gervihendi.   

 

Sá hágrátandi segir af sér