Yfirburðir færeysku kartöflunnar niðurægja íslenskar kartöflur

  Færeyingar kalla kartöflur epli.  Um það hef ég áður skrifað.  Líka hversu snilldarlega Færeyingar rækta kartöflur.  Um það má lesa með því að smella á þennan hlekk:  http://jensgud.blog.is/blog/jensgud/entry/1303680/

  Færeyskar kartöflur eru stærri og bragðbetri en þær íslensku.  Stærsta færeyska kartaflan í ár vegur 711 grömm.   Hún er 18 cm löng og 20 cm í þvermál.  Það er reisn yfir færeyskum kartöflum í samanburði viö lambaspörð íslensku kartöflunnar. 

Er forsprakki Sleep Shepherd geðveikur?

 

  Færeyskir fjölmiðlar hafa verið að rifja upp gömul viðtöl við Paul Watson stofnanda og forsprakka Sea Shepherd - eða Sleep Shepherd eins og fyrirbærið er kallað eftir að liðsmenn samtakann sváfu af sér hvalveiðar í Færeyjum á dögunum. Sitthvað bendir til þess að maðurinn gangi ekki heill til skógar.

  Á sínum tíma var Paul Watson rekinn úr Greenpeace.  Hann fór ekki eftir reglum Greenpeace.  Hann fór ekki eftir neinum reglum.  Hann var skilgreindur af Greenpeace sem of geggjaður og skaðlegur málstað Grænfriðunga.

   SS-liðar staddir i Færeyjum hafa verið frekar kurteisir á spjallsíðum.  Þeir hafa eins og stillt sig inn á stemmninguna sem yfirvegaðir Færeyingar leiða í umræðunni.  En Paul Watson er kjaftfor og ögrandi.  1986 sökkti Paul eða menn á hans vegum tveimur íslenskum hvalveiðiskipum.

  Paul Watson segist hafa verið sem barn ættleiddur af amerískum indíánum.  Hann náði sambandi við "Andann mikla".  Hann fór að sjá sýnir,  tákn,  um að honum væri ætlað það hlutverk í lífinu að bjarga villtum dýrum frá því að vera veidd og drepin.  Fyrsta sýnin sem honum birtist ítrekað var af sléttuúlfum.  Það voru auðskilin fyrirmæli um beita sér gegn hvalveiðum.

  1985 skýrði Paul Watson frá því að hann hefði náð andlegu sambandi við hval.  Sá sagði honum ævisögu sína og frumsamda smásögu í leiðinni.  Þetta skráði Paul Watson samviskusamlega niður og sagðist ætla að gefa út í bók.  Vandamálið var að hvalur hugsar ekki né tjáir sig alveg á sama hátt og manneskja.  Þess vegna hefur Paul ekki tekist að reka smiðshöggið á bókina.

     

Hvaða þjóðir eru duglegastar að reykja kannabis?

  Sameinuðu þjóðirnar hafa rannsakað og tekið saman lista yfir þær þjóðir heims sem eru lang duglegastar við að reykja marijúana.  Þjóðr heims eru eitthvað á þriðja hundrað svo að það er töff að vera þar ofarlega á lista.

  Í fljótu bragði mætti ætla að sigurvegarinn sé íbúar Jamaíka.  Ímynd Jamaíka er samofin við hassreykjandi reggí-tónlistarmenn sem aðhyllast trúfélag sem kallast rastafarian.  Rastarnir reykja hass (kaya) allan sólarhringinn af trúarástæðum.  Þeir vitna til Biblíunnar um það.  Þegar guð birtist Móse á fjallinu (til að ræða um boðorðin 10 eða 20) leið þykkt reykský út um vit hans.  Það var hassreykur.  

 

  Rastarnir þurfa ekki frekari vitna við.  Þeir reykja hassið (kaya),  fara á flug (feel high) og ná góðu og nánu sambandi við himnafeðgana.  

  Skekkjan í dæminu er að reggí-rastarnir á Jamaíka eru aðeins um 20 þúsund.  Jamaíska þjóðin telur um 2 milljónir.  En reggí rastanna er stór þáttur í heimstónlistinni.  Bob Marley heitinn er eina ofurstjarna 3ja heimsins.  Fjöldi annarra jamaískra reggí-rasta eru sömuleiðis stór nöfn á alþjóðamarkaði:  Peter Tosh,  Bunny Wailer,  I-Roy,  U-Roy,  Sly & Dunbar,  Rita Marley,  Ziggy Marley,  Burning Spears...

 

  Hassreykingar eru bannaðar á Jamaíka.  Tæp 10% þjóðarinnar reykja hass.  Jamaíkanar eru í 10. sæti yfir mestu hassreykingaþjóðir heims.    

  Í 9. sæti eru Ástralir.  Rösklega 10% þeirra svæla hass þrátt fyrir að það sé stranglega bannað.

  Spánverjar eru í 8. sæti.  10,6% þeirra er í hassinu.  Þar er refsilaust að reykja en ólöglegt að rækta kannabis, selja eða nota á almannafæri.   

  Kanada er í 7. sæti.  Rúmlega 12% Kanadabúa eru hassneytendur.  Þeir virðast vera dálítið heilsulitlir vegna þess að einungis má reykja í lækningaskini.  

  Í Nígeríu reykir 14,3% þjóðarinnar hass - þrátt fyrir að það sé kolólöglegt.  

  Ný-Sjálendingar eru í 5. sæti.  14,6% eru skökk - þvert á lög.  

  Ítalir eru í 4. sæti.  Engu að síður er sama hlutfall þeirra reykjandi,  14,6%.  Sennilega er eitthvað minna prósentubrot sem greinir Ný-Sjálendinga og Ítala að.  Á Ítaliu er bannað að rækta og selja hass en refsilaust að brúka það.  

  Bandaríkjamenn eru í 3. sæti.  14,8% Kana eru dáldið í hassinu.  Það er löglegt í 2 ríkjum.  Í 22 öðrum ríkjum er það löglegt í lækningaskini.   

  Zambía er í 2. sæti.  Þar er þetta stranglega bannað.  Samt sem áður reykja 17,7% íbúa hassið.

  Vinningshafinn er:  Ísland!   Í 1. sæti á þessu sviði eins og svo mörgum öðrum.

  18,3% Íslendinga reykir hass.  1 í hverjum 5 manna hópi.  Og dregur hvergi af sér.  Lætur sem ekkert sé.  Jú,  þetta er bannað samkvæmt íslenskum lögum.  En hver tekur mark á íslenskum lögum?

  Ræktun á kannabis er hvergi meiri en á Íslandi ef frá eru talin lönd þar sem jurtin vex villt.  Ræktun á Íslandi er svo stórtæk að hún er langt umfram innlenda eftirspurn.  Stór hluti framleiðslunnar er útflutningur til nágrannalanda og út yfir alla Evrópu.  Allt til Eystrasaltslanda.  Þannig verður til gjaldeyri til að borga fyrir harðari eiturlyf sem eru flutt til Íslands.

   Til að forðast misskilning þá hef ég 0% löngun í hass.  Ég hef þrívegis fengið mér smók.  Víman er kjánaleg og ekki fyrir minn smekk.  Föroya Bjór Gull er málið!

   En ég sé enga þörf á því að glæpavæða hassreykingar.  Nema síður sé.  

 

Hvaða tónlistarmenn eru gáfaðastir, skarpastir og með mesta félagsgreind?

  Byrjum á frægum brandara.  Spurt er:  Hvað er kvenkyns grúppía?  Svar:  Stelpa sem eltist við og sefur hjá karlkyns tónlistarmönnum.  Spurt er:  Hvað er karlkyns grúppía?  Svar:  Trommuleikari.

 

  Brandarinn er dæmi um staðlað viðhorf til tónlistarmanna;  persónuleika sem ræður því hver velur sér hvaða hljóðfæri til að spila á eða tekur að sér hlutverk söngvarans.  Bassaleikarinn er skilgreindur sem þögla feimna týpan.  Það skarast þegar hann er jafnframt söngvarinn.  Söngvarinn er iðulega framvörður hljómsveitarinnar.  Hann er einskonar leiðtogi og andlit hljómsveitarinnar.  Oft ásamt sólógítarleikaranum.  Þannig mætti áfram telja.

  Það er sitthvað til í þessu.  En ekki algild regla.  Skekkjumörkin eru til að mynda þau að tónlistarmenn velja sér ekki í öllum tilfellum sjálfir sitt hlutverk.  Dæmi um það er að Paul McCartney vildi ekki vera bassaleikari Bítlanna.  Hann vildi vera sólógítarleikari og hljómborðsleikari.  Eftir fráfall bassaleikarans Stus Sutcliffes var samt ekki um annað að ræða.  John Lennon var ágætur gítarleikari en afleitur bassaleikari (það heyrist m.a. glöggt í laginu "Long And Winding Road").  George Harrison var töluvert betri sólógítarleikari en Paul.  Paul sat uppi með hlutverk bassaleikarans.   Til mikillar gæfu fyrir Bítlana.  Hann er frábær bassaleikari sem innleiddi í rokkið söngrænan (melódískan) bassaleik.    

  Vísindalegar rannsóknir (ein sænsk, önnur bandarísk og sú þriðja bresk) á persónuleika og gáfum tónlistarmanna sýna sömu niðurstöðu:  Trommuleikarinn er gáfaðastur, skarpastur og sá sem hefur mesta félagsfærni.  Trommuleikarinn er jafnframt hamingjusamastur og með hæsta sársaukaþröskuldinn.  

  Velta má fyrir sér orsökum og afleiðingum eða öðrum skýringum.  Trommuleikarinn er eini hljóðfæraleikarinn sem þarf að stjórna fjórum útlimum samtímis og láta þá skila sínu án truflunar frá (ósjálfráðum) viðbrögðum hvers annars.  Trommuleikarinn þarf jafnframt að samhæfa takta og áherslur við það sem bassaleikari og rythmagítarleikari eru að gera.  Að auki þarf hann að tengja sveiflu frá versi til viðlags með "breiki".  Trommuleikarinn verður að tengja sig nánar öllum öðrum í hljómsveit en hinir í bandinu.  Hann hefur mest að segja um áferð tónlistarinnar;  hvort að hún sé mjúk og fínleg eða hörð og hávær.  Hann hefur mest að segja um það hversu vel áherslur í framvindu lagsins komast til skila.    

  Trommuleikarar eru oft og tíðum málamiðlarar í stormasömu andrúmslofti innan hljómsveita. Þökk sé færni þeirra í mannlegum samskiptum.  Ring Starr er gott dæmi um það.  Þegar Bítlarnir voru á lokasprettinum,  allt logaði í pirringi,  síðan málaferlum og harðvítugum illindum átti Ringo góð samskipti við alla.  Á meðan George og öllu fremur Paul höfðu horn í síðu Yoko þá hefur Ringo alla tíð átt góð samskipti við hana.  Meðal annars fylgir hann henni oftast til Íslands þegar Friðarsúlan er tendruð.   

  Í einni rannsókninni fékkst sú niðurstaða að það eitt,  að læra trommuleik og spila á trommur,  hækkar greindavísitölu viðkomandi.  Heimskasta fólk getur orðið bráðgáfað ef það er duglegt að spila á trommur.   

 

Sleep Shepherd í bráðri lífshættu undir ógnandi byssuhlaupi í Færeyjum

 

  Á laugardaginn,  um kvöldið,  kom marsvínavaða (grind) upp í fjöru í Sandi á Sandey.  Þá varð "grindboð",  útkall.  Mótorbátar umkringdu vöðuna og þjálfaðir hvalveiðimenn slátruðu 33 marsvínum (grind).  Án sársauka fyrir dýrin,  vel að merkja.  Þau deyja á sekúndubroti við stungu í mænu.

  14 SS-liðar reyndu að trufla veiðina og flæma dýrin út á haf.  Þeir voru umsvifalaust handteknir af lögreglunni og færðir í járnum til Þórshafnar.  Eftir það gekk allt sinn vanagang.

  Í yfirheyrslum hjá lögreglunni lýsa sakborningar atburðarrás á þann hátt að ljóst er að sumir eru veruleikafirrtir.  Til að mynda segist ein daman hafa verið í bráðri lífshættu.  Henni hafi verið hótað undir byssukjafti lífláti.  Enginn annar varð var við byssu á svæðinu.  Né heldur hróp með hótunum.

  Flestir af handteknu SS-liðum koma fyrir dómara 25. sept.  Hald var lagt á þrjá SS-spíttbáta.  Þar á meðal einn sem er gerður út af bandarískum sjónvarpsþátta- og kvikmyndaleikara,  Charlie Sheen.  Sá ku vera einna frægastur fyrir ofbeldi gegn konum,  konulemjari.  En andvígur hvalveiðum.  Færeyingar hafa bent á þetta sem eitt af ótal dæmum um tvöfalt siðgæði SS-liða.    

   

Viðbjóðsleg framkoma íslenskra embættismanna gagnvart Færeyingum

 Færeyskt skip, Næraberg,  lenti í nauð. Vélarbilun við makrelveiðar í grænlenskri lögsögu.  Það náði að skrölta til Íslands á fjögurra hnúta hraða. Móttökurnar á Íslandi voru til skammar.  Þær einkenndust af embættismannahroka og rembingi.  Framkvæmdastjóri aðgerðarsviðs Landhelgisgæslunnar, Ásgrímur Ásgrímsson,  bannfærði skipið með það sama.  Bannaði alla þjónustu við skipið.  Skipsverjar máttu ekki einu sínni fara frá borði.  Þeir máttu hvorki kaupa vistir né eldsneyti í íslenskri höfn.   

  Sjávarútvegsráðherra lýsti yfir ógildingu á banninu. En fylgdi því ekki eftir af neinum þunga.  Hrokafull afstaða íslenskra embættismanna fékk að leika lausum hala dögum saman.  Viðbrögð íslensks almennings voru þau að hátt í 14 þúsund manns studdi á Fésbók afsökunarbeiðni til Færeyinga.  Sömuleiðis tóku einstaklingar upp á því að færa áhöfn Nærabergs hamborgara og gosdrykki.  Það var niðurlægjandi fyrir alla aðila - þó að reisn væri yfir uppátækinu út af fyrir sig.  

  Allt bull um lög frá 1998 um samskipti við Færeyinga höfðu og hafa ekkert gildi eftir að fríverslunarsamningur við Færeyinga 2006 gekk í gildi.   

   Framkoma íslenskra embættismanna í garð Færeyinga er viðbjóður.  Næsti bær við hrokafullt erindi Ölgerðarinnar,  kröfu um að frábært Föroya Bjór Gull sé tekið af markaði.  Styðjið Færeyinga í verki með því að kaupa Föroya Bjór Gull og sniðgangið vörur frá Ölgerðinni. 

  Ég fordæmi  hroka og yfirgangssemi íslenskra frekjuhunda í garð Færeyinga.  Ég er búinn að setja viðskiptabann á Ölgerðina Egil Skallagrímsson.  Óþverrafyrirtæki.  

   

Færeyska skipið farið frá Íslandi

Færeyingar pökkuðu Sleep Shepherd saman

 

  Það var rétt ákvörðun hjá bandarísku hryðjuverkasamtökunum Sleep Shepherd að framlengja dvöl sinni í Færeyjum.  Og þar með framlengja átakið "Grind Stop 2014".   Átakið var orðið hræðilega pínlegt.  Ekkert gerðist í allt sumar.  Enginn hvalur í allan júní og allan júlí.  En í gær bar til tíðinda.  Þá var "Grindboð".  Útkall á Sandey.  Marsvínavöðu smalað upp í fjöru.  

  14 SS-liðar brugðust við og reynda að fæla hvalina á haf út.  Sumir reyndu að fæla þá með því að vaða út í fjöruna.  Aðrir mættu á þremur spíttbátum í sama tilgangi.

  Lögreglan tók málið snöfurlega föstum tökum.  Handtók þegar í stað 14-menningana og flutti þá handjárnaða með þyrlum beinustu leið í fangelsi.  Hald var lagt á bátana.

  14-menningarnir verða færðir fyrir dómara 25. september.  Sem þýðir að dvöl þeirra í Færeyjum verður lengri en upphaflega var áætlað.  Hugsanlega verða spíttbátarnir gerðir upptækir til frambúðar.  

  Hvalveiðarnar gengu að öðru leyti snurðulaust fyrir sig.  Staðan eftir atburði gærdagsins er Færeyingar gegn SS 1:0.

  Hitt er annað mál að áróðursstaða SS á alþjóðavettvangi fékk byr í seglin eftir tíðindaleysi sumarsins.  Áróðurs- og spunameistarar SS hafa nýtt sér átökin í botn.  Fjöldi stuðningsmanna SS víða um heim hafa boðað komu sína til Færeyja.  Að því er virðist til að fylla upp í skarð 14-menninganna.   

  Út af fyrir sig er það bara ágætt fyrir ferðamannaiðnað Færeyja að þangað komi sem flestir túristar.  Þeir koma með gjaldeyri til eyjanna og efla verslun og viðskipti í Færeyjum.  Kaupa þar mat og vistir,  leigja bíla o.s.frv.  Til viðbótar blogga túristarnir og skrifa statusa á Fésbók og twitter um fagurt landslag eyjanna og hrósa Færeyingum fyrir gott og hlýlegt viðmót - þrátt fyrir ágreining um marsvínaveiðar.   

  Gott dæmi um ávinninginn er að kanadísk-bandaríska leikkonan Pamela Anderson heimsótti Færeyjar til stuðnings átaki SS "Grind Stop 2014".  Í Færeyjum heillaðist hún af neðansjávarljósmyndum Færeyings.  Keypti af honum myndir og sýndi þær á Fésbók sinni og víðar.  Það varð ljósmyndaranum góð auglýsing.  Hann náði inn á heimsmarkað með myndir sínar.

  Annar frægur leikari kom til Færeyja í sama tilgangi og Pamela.  Sá er stjarna úr unglingasápuóperu sem heitir Beverly Hills (og einhver talnaröð fylgir).  Ég veit ekkert meira um þann mann né sápuóperuna.  Þess vegna fór framhjá mér allt sem tengdist heimsókn hans til Færeyja.

  Aftur á móti er annar frægur bandarískur leikari og dópisti,  Charlie Sheen,  búinn að blanda sér í baráttu SS í Færeyjum.  Mér skilst að hann geri þar út einn SS bátinn og blaðri sitthvað um "Grind Stop 2014" á samfélagsmiðlum,  hvort sem er Fésbók eða twitter.      

  Þegar upp er staðið mun herferðin "Grind Stop 2014" verða Færeyjum öflug ferðamálakynning.  Allt þetta fræga fólk sem skiptir sér af herferðinni vekur athygli á því að Færeyjar séu til.  99% af fylgjendum þeirra vissi ekki af tilvist Færeyja í sumarbyrjun.  Sama má segja um þá SS-liða sem dvarlið hafa í Færeyjum í sumar.  Þeir vissu ekkert um Færeyjar áður en þeir komu þangað.  Núna hafa þeir upplýst vini sína og vandamenn um allan heim daglega um Færeyjar á Fésbók,  twitter o.s.frv.  Í það heila í þrjá mánuði og sér hvergi fyrir enda á.  Þetta er rosalega öflug kynning á Færeyjum.   

 

 

Falsanir Sleep Shepherd

 Það eru ekki aðeins uppbelgdir og hrokafullir íslenskir embættismenn sem níðast á Færeyingum þessa dagana. Bandarísku hryðjuverkasamtökin Sleep Shepherd fara einnig mikinn.  Forsprakki SS,  Paul Watson,  er töluvert yfirlýsingaglaðari og kjaftforari en aðrir SS-liðar.  SS hafa staðið vakt í Færeyjum í allt sumar án tíðinda. Í gær klúðraðist vaktin vegna þess að SS-liðar sváfu á meðan hvalur var veiddur fyrir framan trýnið á hrjótandi hópnum. Í dag kom upp smá órói þegar hvalur var veiddur.  Það gekk samt allt ljúft fyrir sig. SS-liðar voru handjárnaðir og fjarlægðir snöfurlega.

  Forsprakki SS,  Paul Watson,  heldur því fram að fullyrðingar Færeyinga um að veiðar á marsvínum (grind) sé sjálfsbjargarviðleitni en ekki í ábataskyni standist ekki skoðun.   Máli sínu til stuðnings birtir hann ljósmyndir úr kjötborði færeyskrar matvöruverslunar.  Þar sést glöggt að til sölu er hvalkjöt merkt hvalbiff.  Það sem Paul og félagar fatta ekki er að hvalbiff er norkst heiti á hvalkjöti.  Þetta er norskt hvalkjöt.  Ekki færeyskt.  

 

Aulagangur hrokafyllstu Íslendinga ríður ekki við einteyming

  Skammt er stórra högga á milli í keppni hrokafyllstu Íslendinga í ókurteysi, yfirgangssemi og frekju í garð Færeyinga.  Fyrst gekk fram Andri Þór,  forstjóri Ölgerðarinnar Egill Skallagrímsson.  Með verulega ókurteisu,  frekjulegu og yfirgangssömu bréfi til Föroya Bjór hótaði hann öllu illu ef Föroya Bjór Gull yrði ekki umsvifalaust tekið af markaði.  Krafan var ósanngjörn,  heimskuleg og óraunhæf.  Frekjukast án innistæðu.

  Frekjuhundurinn gerði sig að athlægi.  Og ekki í fyrsta skipti.  Aulalegt frekjukast hans skilaði því að sala á Föroya Bjór Gull óx um 1200% á Íslandi í síðustu viku.  Á sama tíma sór fjöldi Íslendinga þess heit að kaupa engar vörur frá Ölgerðinni fyrr en hrokafulla frekjukast Andra Þórs rjátlaðist af honum.

  Næst gerist það að færeyskt skip,  Næraberg,  lendir í vandræðum. Bilun og nær með erfileikum að koma sér í íslenska höfn.  Þá tekur á móti ríkisrekinn embættismaður hjá Landhelgisgæslunni,  Ásgrímur Ásgrímsson.   Hann belgir sig út og neitar um alla aðstoð. Bannar skipsverjum landgöngu,  bannar afgreiðslu á eldsneyti, bannar liðsinni við viðgerð.  

  Embættismaðurinn útbelgdi ber titilinn framkvæmdastjóri aðgerðarsviðs Landhelgisgæslunnar.  

  Þökk sé Óðni og Þór að hann fer ekki með alræðisvald.  Seint og síðar meir tókst stjórnvöldum að gera hann afturreka með rembinginn.   Næraberg fær þá aðstoð sem þarf.  Framkvæmdastjóri aðgerðarsviðs Landhelgisgæslunnar grætur sig í svefn í kvöld.  Niðurlægður. 

 

   

Vandar Íslendingum ekki kveðjurnar

Sea Shepherd-liðar sváfu af sér hvalveiðar í Færeyjum

  Í allt sumar,  alveg frá júníbyrjun,  hafa 100 félagar í bandaríska hryðjuverkahópnum Sea Shepherd haldið úti vöktum í Færeyjum. Starað dag og nótt út á haf í því hlutverki að koma auga á hval.  Þeir eru í herferð gegn hvalveiðum Færeyinga.  Átakið kallast Grind Stop 2014.  Margt spaugilegt hefur borið til tíðinda.  Það helst að vöktun SS-liðanna hefur verið tíðindalaus í allt sumar.  Hvalurinn hefur ekki látið á sér kræla.  Það er fyrir löngu síðan orðin verulega vandræðaleg staða fyrir Sea Shepherd. Sú er ástæðan fyrir því að dvölin í Færeyjum var framlengd.  Vaktin átti að standa fram í miðjan ágúst en stendur enn.  

 

  Í Fésbókarfærslum SS-liða hefur borið á ólund yfir aðgerðarleysi í Færeyjum,  tilbreytingarleysi og einhæfri stöðu að stara á haf út á vöktum heilu og hálfu dagana.

 

 Í morgun bar til tíðinda að loksins sást til nokkurra hvala uppi í fjöru í Hvalba.  Hvalveiðimenn héldu af stað.  Þeir óku framhjá bíl þriggja Sea Shepherd vaktmanna.  Þeir reyndust allir vera steinsofandi í bílnum og hrutu eins og sögunarverksmiðja í Brazilíu.  Illar tungur herma að þeir hafi reykt of stíft af hassi.  Kannski rangt.  Kannski rétt.

 

  Af tillitssemi við svefn,  hrotur og drauma sofandi SS-liðanna var haft hljótt um hvalrekann.  Öfugt við það sem venja er þegar mótorbátar eru ræstir út og herkvaðning með látum.  Þess í stað voru hvalirnir vegnir í kyrrþey í fjörunni og hvalkjötinu skipt á milli íbúa Hvalba.  Heldur betur góð búbót.   

 

  Eins og oft áður eru SS-liðar gríðarlegt aðhlátursefni í Færeyjum. Í þetta sinn fyrir að hafa hrotið í draumförum á meðan hvalur var veiddur og veginn fyrir framan trýnið á þeim steinsofandi og afvelta inni í eftirlitsbíl.   Héðan í frá kalla Færeyingar SS-samtökin aldrei annað en Sleep Shepherd.  

 

 

Sea Shepherd-liði laminn í Færeyjum

 

  Bandarísku hryðjuverkasamtökin Sea Shepherd hafa haldið til í Færeyjum í sumar.  Þar eru þau í herferð gegn hvalveiðum.  Herferðin kallast Grind Stop 2014.  Hún hófst í byrjun júní og átti að standa fram í miðjan ágúst.  Einhverra hluta vegna hafa 100 Sea Shepherd-liðar orðið þaulsætnari í Færeyjum en upphaflega var ætlað.

  Svo óheppilega vildi til að á dögunum lamdi Færeyingur einn Sea Shepherd-liða.  Sá síðarnefndi stóð vaktina,  góndi út á haf í heilan dag og skimaði eftir hval.  Rétt eins og aðrir SS-liðar gera alla daga í Færeyjum.  En ekkert gerist.  Nema það að þegar komið var undir miðnætti þá lamdi ofurölvi Færeyingur manninn tvívegis í höfuðið.  Sá segir SS-liðann hafa áreitt sig og föður sinn,  hvalveiðimann.  

  Færeyingar eru ósáttir við þessa uppákomu.  Þeir eru friðsamir og leggja mikið upp úr friðsamlegum samskiptum við allt og alla.  Réttilega telja þeir þetta vera fordæmanlega framkomu í garð gests í Færeyjum.   Þar fyrir utan færir þetta Sea Shepherd öflugt áróðursvopn upp í hendur.  Núna stillir Sea Shepherd sér upp sem hópi fólks með fallega hugsjón,  hetjum sem standi vaktina í að vernda "mannréttindi" hvala þrátt fyrir gróft ofbeldi og annað mótlæti sem þær sæta.     

  Sea Shepherd hefur þegar nýtt sér uppákomuna í botn.  Sent heimspressunni frásögn af barsmíðunum ásamt ljósmyndum af fórnarlambinu.  Þær eru ljótar:

 

 Sea Shepherd kærði líkamsárásina þegar í stað.  Ofbeldismaðurinn viðurkenndi sök sína undanbragðalaust.  

  Við tók einkennileg atburðarrás.  Ljósmyndir Sea Shepherd passa ekki við lýsingu á því sem gerðist. Einhverjir sem þekkja betur en ég til áverka eftir tvö högg í höfuðið fullyrða að litur á mari sé ekki svona strax eftir höggin.  

  Fórnarlambið segir að árásarmaðurinn hafi margbrotið fingur hans.  Þess vegna sé hann í fatla.  

  Þeir sem eru mér fróðari um svona segja að fingurbrot kalli á gifsumbúðir.  Umbúðirnar á myndinni eru hinsvegar losarlega vafið sárabindi.   

  Þar fyrir utan vekur upp spurningar hvers vegna maður sem telur sig sitja uppi með margbrotna fingur leitar ekki til slysavarðstofu heldur býr sjálfur um margrotna fingur með sárabindi.  Eðlilegast væri að fá röntgenmynd af fingurbrotunum til að leggja fram fyrir dómi vegna árásarkærunnar.  

  Þrátt fyrir þetta hafa margir af SS-liðum í Færeyjum vitnað á Fésbók um undrun sína á því hvað Færeyingar almennt eru hlýjar og góðar manneskjur.  Það þekkjum við Íslendingar sem farið hafa til Færeyja heldur betur.  Meira að segja formaður SS,  Paul Watson,  hefur á Fésbók vitnað um elskulegheit Færeyinga.  

  Paul Watson hefur þó ekki komið til Færeyja í sumar.  Hann hefur samt látið sem svo sé.  Hann birtir með Fésbókarfærslum sínum ljósmyndir af sér í Færeyjum frá árinu 2011.  Í færslunum verður ekki annað ráðið en að hann sé í Færeyjum.

Sprenging í sölu á Föroya Bjór Gulli

 

  Íslendingar kunna vel að meta hinn bragðgóða færeyska bjór Föroya Bjór Gull.   Í vörulista Áfengis- og tóbaksverslunar ríkisins (ÁTVR) er honum lýst þannig:  "Gullinn,  ósætur,  meðalfylling,  meðalbeiskja.  Korn,  baunir,  malt,  humar."  Ég lýsi bragðinu sem skörpu,  ósætu og að eftirbragð sé gott.  Hann kippir vel í,  um 6%.  

  Það er stutt síðan Íslendingar almennt vissu af tilvist Föroya Bjór Gulls.  Þó hefur hann verið framleiddur í hálfan fjórða áratug og verið seldur á Íslandi lengst af.  Lengst af þeim tíma hefur hann verið seldur á Íslandi.  Hinsvegar hefur aldrei verið gert neitt átak í kynningu á honum.  Það hafa helst verið Færeyingar á Íslandi sem sótt hafa í heilsudrykkinn,  svo og Íslendingar sem hafa heimsótt Færeyjar.

  Í síðustu viku brá svo við að Föreyja Bjór Gull barst í tal í íslenskum fjölmiðlum.  Ástæðan var afskaplega hrokafullt og ósvífið bréf sem forstjóri Ölgerðarinnar Agli Skallagrímssyni sendi forstjóra Föroya Bjór.  Við þau tíðindi rann á Íslendinga Gull-æði.  Sala á Föroya Bjór Gulli á Íslandi óx um 1200%.  Söluaukningin hefði orðið ennþá meiri ef hann hefði ekki selst upp í sumum vínbúðum.  Þar toguðustu menn á um síðustu dósirnar þannig að víða lá við stimpingum.  Mörg dæmi voru um að menn keyptu Föroya Bjór Gull tvo og upp í þrjá daga í röð.  Þá hafa margir lýst því yfir á Fésbók og á bloggsíðum að héðan í frá kaupi þeir engan bjór annan en Föroya Bjór Gull.  Þetta sé besti bjór í heimi.  

  Samkvæmt upplýsingum á heimasíðu ÁTVR eru í dag til örfáar kippur í aðeins þessum þremur verslunum:  Heiðrúnu (20 kippur + 1 dós),  Akureyri (26 kippur) og Hafnarfirði (51 kippa + 5 dósir).    

   

Kaupum ekkert frá Ölgerðinni Agli Skallagrímssyni

 

  Staðreynd númer 1:  Til margra áratuga hafa skandínavískir bjórframleiðendur auðkennt tilteknar bjórtegundir með nöfnum eins og Pilsner,  Stout,  Lite, Gull og svo framvegis.

  Staðreynd númer 2:  Fyrir hálfum fjórða áratug hóf færeyska Föroya Bjór framleiðslu á Föroya Bjór Gull samkvæmt þessum skandinavísku stöðlum á bjór.

  Staðreynd númer 3:   Níu árum síðar hóf Ölgerðin Egill Skallagrímsson framleiðslu á Egils gull.  Bragðdaufum pissbjór.  Það er aukaatriði.  Gárungar kalla hann Egils sull.  

   Færeyski Föroya Bjór Gull er góður.  Virkilega góður.  

  Á útrásarárum íslensku geðveikinnar fyrir bankahrun fór Ölgerðin fram á það að kaupa Förya Bjór.  Óskaði eftir nákvæmum upplýsingum um allt sem snéri að markaðsmálum Föroya Bjór.  Því var hafnað en af vinsemd boðið upp á samvinnu.  

  Staðreynd númer 4:   Ölgerðin fann sér færeyska heildsölu sem kann ekkert á færeyska bjórmarkaðinn.  Kann ekkert á dreifingarkerfi bjórs í Færeyjum til vínveitingastaða, pöbba eða annarra sem selja bjór í Færeyjum.  Ráðamönnum Föroya Bjór þótti það undarlegt uppátæki.  Og spaugilegt.  Föroya Bjór hefði af vinsemd alveg getað bætt bjór Ölgerðarinnar inn í sitt góða og öfluga dreifingarkerfi á bjór.   Það var einungis jákvæðni gagnvart því.  Vegna þess hvaða aulalegu leið Ölgerðin fór er hún aðhlátursefni í Færeyjum.  

  Staðreynd númer 4:  Fyrir þremur árum fékk Ölgerðin nafnið "Egils gull" skrásett vörumerki.  

  Staðreynd númer 5:  Fyrir þremur vikum eða svo sendi Ölgerðin bréf til Föroya Bjórs.  Í því var ekki óskað eftir viðræðum eða neitt slíkt.  Erindið var afskaplega hrokafull skipun um að Föroya Bjór taki Föroya Bjór Gull af markaði.  Frestur var gefinn til 18. ágúst.  Ef að færeysku skrælingjarnir yrðu ekki við skipun herraþjóðarinnar þá muni Föroya Bjór Gull verða sett út af markaðnum fyrir tilstilli dómsstóla.     

  Ósvífin skipun Ölgerðarinnar er forkastanleg.  Þar ræður hrokinn ríkjum.   Þrátt fyrir fráleita kröfuna hefði samt verið eðlilegri framsetning að óska eftir viðræðum.  Ekki þetta:  Þú skalt hlýða mér eða að öðrum kosti verður þú dreginn á rassgatinu fyrir dómsstóla.

  Hroki Ölgerðarinnar er fyrirlitlegur.  Ölgerðin hefur enga möguleika á að vinna málið.  Löng hefð er fyrir því að tiltekin bjórtegund sé kennd við gull.  Meira að segja finnski Lapin Kulta þýðir Lapin Gull.  Þó að einhver fái skrásett vörumerkið Egils Pilsner þá veitir það viðkomandi ekki einkarétt á orðinu Pilsner.  Né heldur Lite eða Stout eða öðrum fjölþjóðlegum og alþjóðlegum heitum sem skilgreina bjórtegundir.     

  Ég hef þegar sett viðskiptabann á Ölgerðina og hvet alla til að taka þátt í viðskiptabanninu.  Þetta er óþverrafyrirtæki á meðan hrokafullir skrattakollar ráða þar ríkjum.  

  Færeyingar eru bestu og nánustu vinir Íslendinga. Þeir björguðu okkur þegar engir vildu lána okkur gjaldeyri í kjölfar bankahrunsins.  Yndislegt fólk.  Yndisleg þjóð.  Ölgerðin er andstæðan:  Hrokafullir frekjuhundar.  

  

 

Sprenging í sölu á Føroya-Gulli

Nýjar spennandi íslenskar plötur

 

  Synthadelia Records er sjálfstæð (independent) íslensk plötuútáfa. Hún kynnir með stolti þrjár nýjar útgáfur ásamt tveimur endurútgáfum frá áttunda og níunda áratugnum.

  Nýjustu útgáfurnar eru smáskífan "Praise Of The Saints" með íslenska tónlistarmanninum Indigo sem kom út í vikunni og markar upphaf nýrrar plötu sem Ingó vinnur nú að. Platan “Grúska Babúska” er með samnefndri hljómsveit vinkvenna.  Hún hefur að geyma tíu áður útgefin lög af tveimur EP plötum. Síðast en ekki síst má nefna blús plötuna “3^rd”með gamla Utangarðsmannapönkaranum Michael Dean Odin Pollock og  munnhörpuleikaranum Sigurði Sigurðssyni. Siggi er jafnframt upptökustjórinn.  Þetta er síðasta platan í þríleik dúettsins.

  Endurútgáfurnar eru tvær. Má þar fyrst nefna plötuna “Angeli Daemoniaque Omnigena Imbecilli Sunt" með goðsagnakennda gjörningabandinu Inferno 5 frá árinu 1996. Hljómsveitina skipa: Birgir Mogensen, Guðjón Rúdólf Guðmundsson, Ómar Stefánsson, Óskar Thorarensen, Örn Ingólfsson og Jafet Melge.  Þeir sömdu og frömdu sérútbúinn gjörning með sem fylgdi hverju lagi af plötunni. Var þessi útgáfa tekin upp live í gamla Rósenbergkjallaranum dagana 30.05 og 10.10 árið 1996.

  Hin endurútgáfan er platan "Rise 2B Free" með hinni umdeildu pönkhljómsveit Sjálfsfróun frá árinu 1990. Hljómsveitin sló eftirminnilega í gegn og gerði garðinn frægan í mynd Friðriks Þórs Friðrikssonar, “Rokk í Reykjavík”.  Þessi plata er tekin upp á síðari hluta ferils þeirra, eftir að Bjarni "Móhíkani" lést og Frikki “pönk” gekk til liðs við hljómsveitina. Aðrir meðlimir Sjálfsfróunnar eru þeir Jónbjörn Valgerisson og Siggi “Pönkari”. Á plötunni má finna 30 hráar lo-fi demó upptökur frá hljómsveitaræfingum þeirra félaga ásamt Hljóðversupptökum og ýmsu öðru aukaefni.

   Synthadelia Records sérhæfir sig í útgáfu á tónlist í rafrænu formi. Úgáfan var stofnuð á jóladag árið 2010 þegar Vilmar Pedersen og Jón Schow gáfu út sitt eigið lag, “Let the partý start” undir sama nafni og útgáfan. Nýverið bættust fleiri félagar í Synthadeliu-hópinn.  Olga Jenný, Ýmir Einarsson og Árni Briem hafa verið hópnum innan handar á árinu. Nú þegar hefur Synthadelia Records gefið út yfir 50 plötur eftir fjölmarga hæfileikaríka tónlistarmenn.

   Synthadelia Records dreifir tónlist á netinu, í hinar ýmsu búðir og streymisveitur eins og Spotify, iTunes, tonlist.is og fjölda annarra búða ásamt því að kynna hana vel með því að nýta internet-markaðssetningu,  þannig að hún er á öllum helstu samfélagssíðum á netinu.

  Synthadelia Records leitar að gömlum plötum/óútgefnu efni með hljómsveitum og tónlistarfólki sem enn á eftir að endurútgefa og koma á netið og miðla til almennings.Áhugasöm bönd og tónlistarfólk vinsamlegast sendi email á [e-mail]  

 

http://synthadeliarecords.bandcamp.com/

https://www.facebook.com/synthadeliarecords

Dópaðir Sea Shepherd-liðar í Færeyjum

 

 

 

 

 

 

  Hundrað manna hópur frá bandarísku hryðjuverkasamtökunum Sea Shepherd hefur haldið til í Færeyjum í sumar.  Frá júníbyrjun og til dagsins í dag.  Að vísu ætlaði hópurinn að vera í Færeyjum fram að miðjum ágúst.  En virðast hafa framlengt dvölinni vegna Sjómannadagsins.  Hann stendur yfir til sunnudags.  

  Erindi Sea Shepherd í Færeyjum er að hindra hvalveiðar heimamanna.  Svo spaugilega vill til að ekkert hefur sést til hvals í Færeyjum í sumar.  Það hefur áður gerst.  Síðast 2008.  Sea Shepherd-liðar hafa þess vegna farið sneypuför til Færeyja í sumar.  Þeir eru aðhlátursefni.  

  Hitt er verra að þetta lið hefur farið ránshendi um eyjarnar.  Og byrjaði strax að stela úr matsalnum á Norrænu á leið til eyjanna.  Í kjölfar stal það áfengi úr verslun í Nolsey og öllu steini léttara úr ferðamannaskýli í Sandey.  Þar á meðal heilsársbirgðum af klósettpappír.  

  Í fyrrakvöld kom lögreglan á Suðurey auga á grunsamlegan bíl.  Hann var stöðvaður.  Í honum voru þrír Sea Shepherd-liðar.  Þeir voru í annarlegu ástandi.  Þeir ranghvolfdu í sér blóðhlaupnum og skilningssljóum augum.  Lögreglan hóf leit í bílnum.  Þar fannst dálítið magn af eiturlyfjum.  Þrímenningarnir voru handteknir og færðir á lögreglustöðina.  Einn þeirra viðurkenndi dræmlega að eiga dópið.  Hann verður væntanlega rekinn frá Færeyjum.

  Í yfirlýsingu frá Sea Shepherd vegna atviksins er fullyrt að hryðjuverkasamtökin hvetji ekki sérstaklega til dópneyslu.     

 

 

 

 

 

 

 

   Nú er mig farið að gruna að eiturlyf hafi komið við sögu í þessu atviki:  http://jensgud.blog.is/blog/jensgud/entry/1420693/

Færeyskir hljómleikar annað kvöld (Þórsdagur 21. ágúst)

  Annað kvöld verða heldur betur spennandi djasshljómleikar í Bæjarbíói í Hafnarfirði.  Húsið er opnað klukkan 20:00.  Hljómleikarnir hefjast klukkan 21.00.   Tvær magnaðar hljómsveitir stíga á stokk:  Annarsvegar færeyski Magnus Kvartett.  Hinsvegar íslenska hljómsveitin Skarkali.  Miðinn kostar aðeins 2000 kall.  Honum fylgir frábær sólódiskur með Magnúsi Johannessen,  forsprakka Magnus Kvartetts.  Stakur kostar diskurinn í búð 3200 kr.  

  Forsala á hljómleikana er á www.midi.is.  Diskurinn er afhentur við hurð,  eða kannski örlítið innan við dyrnar. 

  Magnús er píanóleikari.  Hann semur ljúfa og áferðarfallega djasstónlist með söngrænum (melódískum) laglínum.  Þetta er samt enginn dinnerdjass.  Alls ekki.  Þetta er áleitinn norrænn djass eins og hann gerist bestur.  2001 var Magnús nefndur til Norrænu tónlistarverðlaunanna.  

 Með því að smella á þennan hlekk má heyra sýnishorn af eyrnakonfekti Magnúsar:  http://www.magnusjohannessen.com/Listen.html

  Hljómleikarnir eru samvinnuverkefni Menningar- og listafjelags Hafnarfjarðar,  Jazzklúbbs Hafnarfjarðar og Bæjarbíós.   

 

Viðskiptabann á Ölgerðina Egil Skallagrímsson

  Ég hvet til þess að við,  Íslendingar,  látum af öllum viðskiptum við Ölgerðina Egil Skallagrímsson.  Einkum og sér í lagi sniðgöngu á Egils sulli (vörumerki Egils gull).  Ástæðan er ærin og liggur í dónalegu bréfi frá Andra Þór Guðmundssyni, forstjóra Ölgerarðinnar,  til Föroya Bjór í Færeyjum.  Þar segir meðal annars:  

  "Ef Föroya Bjór hættir ekki þegar í stað allri sölu og markaðssetningu á Íslandi - og öllum innflutningi til Íslands á færeyskum Gull-bjór,  þá hefur forstjórinn,  Andri Þór Guðmundsson, engin önnur úrræði en að leita réttar síns fyrir dómsstólum."

  Ofstopinn,  dónaskapurinn og frekjan í þessum texta er til skammar.   Þar fyrir utan er krafan út í hött.  Föroya Bjór Gull hefur verið á markaði mun lengur en Egils sullið.  Jafnframt er Föroyja Bjór Gull úrvals góður bjór en Egils sullið ómerkilegt skólp.  Egils sullið hefur stórskaðað viðskiptavild Föroya Bjór Gull með því að gera út á rótgróið nafn úrvals bjórs.

  Þetta er góði færeyski Gull-bjórinn:

 

  Ekki rugla honum saman við Egils sull. 

 

 

 

 

 

 

 

 

 

 

 

--------------------------------------------------------------------------------------

Sea Shepherd-liðar halda áfram að stela í Færeyjum

  Sem kunnugt er þá hafa bandarísku hryðjuverkasamtökin Sea Shepherd haldið til í Færeyjum frá því í júníbyrjun.  Þau gefa sig út fyrir það að vera hugsjónafólk með sterka réttlætiskennd.  Það sé siðferðislega rangt að veiða hvali.  Þeir séu gáfaðir og leggi mikið upp úr sterkum fjölskyldutengslum.  Hvorutveggja er della. Hvalir eru heimskir (meira að segja heimskari en gullfiskar).  Fjölskyldubönd ná ekkert út fyrir nýborna kálfa.

  Athygli vakti að þegar SS-liðar mættu til leiks í Norrænu,  skipi Smyril Line.  Þar voru þeir staðnir að stórfelldum þjófnaði á matvælum í matsal skipsins.  Þeir beittu fagmannlegum sjónhverfingum er þeir fylltu heilu ferðatöskurnar af stolnum matvælum. 

  Komið til Færeyja hélt þetta pakk áfram að stela.  Rændi bjór úr verslun í Nolsey.  Færeyingar gerðu góðlátlegt grín að þessu.  SS-liðarnir þykjast vera boðberar réttlætis eru í raun siðlausir þjófar. 

  Færeyingar eru óvanir þjófnaði.  Þeir skilja hús sín eftir ólæst.  Meira að segja þegar þeir fara í 6 vikna sumarfrí til útlanda þá læsa þeir ekki húsum sínu.  Færeyingar stela ekki.  Ef að þú kemur að húsi í Færeyjum þá er þar engin dyrabjalla eða bankbúnaður. Þú gengur inn í húsið og leitar uppi heimilisfólk.  Ef að enginn er heima þá er þér velkomið að kíkja í ísskápinn og finna þér bjór eða matarsnarl.  Að vísu á það bara við um þá sem koma lengra að.  Nágrannar sækja ekki í ísskápinn.  Það væri dónaskapur. 

  Víkur þá sögu að Sandey.  Þar er opið mannlaust skýli fyrir ferðamenn.  Þeir geta áð þar,  farið í sturtu, notað salernisaðstöðu og svo framvegis.  Þessa aðstöðu hafa liðsmenn bandarísku SS-hryðjuverkasamtakanna misnotað gróflega.  Þeir fóru ránshendi um skýlið.  Stálu þar öllu steini léttara.  Þar á meðal öllum klósettpappírsbirgðunum.  Svona ósvífni er Færeyingum framandi nýlunda. 

  Bæjarstjórinn á Sandi hefur brugðið á það ráð að banna SS-hryðjuverkahópnum gengi að skýlinu.  Til áréttingar hefur þessi texti verið settur upp við skýlið:

  Meira um þjófa SS:  http://jensgud.blog.is/blog/jensgud/entry/1405591/   

  Upphaflega ætluðu SS-liðar að vera í Færeyjum fram í miðjan ágúst.  Þeir virðast ætla að dvelja þar lengur.  Sennilega vegna þess að á morgun hefst Sjómannadagurinn í Klakksvík.  Hann stendur í sex daga.  Meðal dagskrárliða er að skera marsvín (grind).  Kenna ungu fólki handbrögð við það.  Þetta þýðir að sækja þarf hval út á sjó.  SS-hryðjuverkahópurinn er grunaður um að ætla sér hlutverk í því dæmi.  Hefur kallað út hraðskreiðan mótorbát.  Dönsk herskip eru mætt á svæðið til verndar færeyskum hvalveiðibátum.   

Ósvífin frekja í garð færeysks framleiðanda

  Færeyskur bjór er sá besti í heimi.  Ekki síst Föroya Bjór GULL.  Hann hefur notið gríðarlegra vinsælda víða um heim í hálfan fjórða áratug.  Þar af hefur hann verið seldur íslenskum aðdáendum í 33 ár.  Öllum til mikillar gleði og ánægju.  

 

  Færeyskur bjór er svo góður að fyrir mörgum árum lét ég húðflúra merki Föroya Bjór (nafnið og myndina af færeyska hrútnum) yfir allan vinstri framhandlegginn á mér.  Alltaf þegar ég sé húðflúrið þá sleiki ég út um.

 

  Fyrir örfáum árum tók íslenskt fyrirtæki,  Ölgerðin Egill Skallagrímsson,  upp á því að gera út á viðskiptavild Föroya Bjór GULL.  Föroyja Bjór sá ekki ástæðu til að amast við því.  Þvert á móti þótti mönnum þar á bæ það bara broslegt.  

 

  Verra er að Egils gull er ómerkilegur bjór.  Sérstaklega í samanburði við Föroya Bjór GULL.  Egils gull skaðar á þann hátt viðskiptavild "GULLS".

 

  Ráðamenn hjá Ölgerðinni kunna ekki að skammast sín.  Núna barst Föroya Bjór hótunarbréf frá Ölgerðinni.  Þar er Föroya Bjór skipað að hætta þegar í stað að selja Föroya Bjór GULL.  Að öðrum kosti verði gripið til harkalegra aðgerða og þeim bjór bolað út af íslenskum markaði.  

 

  Eðlilega þykir Færeyingum þetta undarleg og smekklaus framkoma.  Ef þeim sýnist svo geta þeir kært Ölgerðina fyrir að stela "GULL" nafninu,  látið dæma nafnið af henni og farið fram á háar skaðabætur fyrir tjónið sem Egils sullið hefur valdið Föroyja Bjór GULLinu.  Áður vonast þeir þó til að frekjukastið renni af ráðamönnum Ölgerðarinnar.    

 

   

Veitingaumsögn

 

  - Réttur:  Íslensk kjötsúpa 

  - Staður:  Warm Farmer´s Soup

  - Staðsetning:  Skólavörðuholt

 

  - Verð: 690 - 990 kr.

 

  - Einkunn: *** (af 5)

 

  Warm Farmer´s Soup er súpubíll.  Súpan er afgreidd út um bílalúgu.  Á gangstéttinni fyrir utan eru nokkur ódýr tréborð,  tréstólar og plaststólar. 

  Kjötsúpan er seld í frauðplastskál.  Plastskeið fylgir með.  Minni skálin tekur á að giska 400 ml.  Sú stærri um það bil 700 ml.  

  Ég fékk mér stærri skálina.  Í ljós kom að ekki er um hefðbundna íslenska kjötsúpu að ræða.  Þessi er þykk og ógegnsæ.  Af yfirborðinu sést ekkert hvað er í súpunni.  Hún er bragðskörp og bragðgóð.  Ég taldi mig finna bragð af rauðpipar (chili)  og engifer.

  Ég kafaði ekki á botn skálarinnar heldur fleytti af yfirborðinu.  Það var ekki fyrr en komið var niður að botnfylli sem vart varð við örfáa litla kjötbita,  þrjá litla gulrótarbita og tvo smáa bita af sætri kartöflu (að ég held fremur en gulrófu).  Þetta er stóri mínusinn við súpuna:  Kjöt og grænmeti er skorið við nögl.  Þetta er matarrýrasta kjötsúpa sem ég hef fengið.  Sæki ég þó stíft í kjötsúpu hvar sem hún er í boði.  Þegar hugurinn hvarflar að íslenskri kjötsúpu blasir fyrir hugskotsjónum mynd á borð við þessa (sem er töluvert frábrugðin súpunni hjá Warm Farmer´s Soup):

 

Síðustu 10 veitingaumsagnir:

Dirty Burger & Ribs:  http://jensgud.blog.is/blog/jensgud/entry/1425792/

Salatbarinn:  http://jensgud.blog.is/blog/jensgud/entry/1320816/

Hótel Cabin:  http://jensgud.blog.is/blog/jensgud/entry/1309370/

Grillmarkaðurinn:  http://jensgud.blog.is/blog/jensgud/entry/1298062

Ruby Tuesday:  http://www.jensgud.blog.is/blog/jensgud/entry/1296771/

Grill 66:  http://www.jensgud.blog.is/blog/jensgud/entry/1296313/

Prikið:  http://www.jensgud.blog.is/blog/jensgud/entry/1288948/

Noodle Station:  http://jensgud.blog.is/blog/jensgud/entry/1287104

Benzin Café:  http://www.jensgud.blog.is/blog/jensgud/entry/1284984/

Pizza King:  http://www.jensgud.blog.is/blog/jensgud/entry/1282151/