Rasistar í löggunni

  Ég á marga vini.  Það er gaman.  Einn vina minna flutti til Íslands sem flóttamaður frá Víetnam fyrir mörgum árum.  Hann talar ágæta íslensku.  Eins og frægt og nýlegt myndband úr Smáralindinni sýnir þá mæta Íslendingar af asísku bergi brotnir stundum dónaskap af hálfu Íslendinga með evrópskan svip.  Það eru rasistar á Íslandi. 

  Vinur minn þessi sem nefndur er til sögunnar var eitt sinn stoppaður af lögreglunni þegar hann ók í rólegheitum eftir Dalvegi í Kópavogi.  Lögreglumaðurinn ávarpaði hann með spurningunni:  "Talar þú íslensku?" 

  "Já, dálítið," svaraði vinurinn í hógværð.

  "Þú verður að læra íslensku almennilega ef þú ætlar að vera á Íslandi, drengur,"  skipaði lögreglumaðurinn.  Og það valdsmannlega.  Því næst spurði hann háðskur:  "Kanntu að lesa?"

  Jú,  vinurinn kannaðist við það undanbragðalaust.  Þá spurði lögreglumaðurinn:  "Af hverju keyrir þú þá á yfir 50 km hraða þegar á skiltinu þarna stendur 50?"

  Vinurinn sagðist vita hver væri hámarkshraði þarna og að hann hafi talið sig vera á löglegum hraða.  Hann hafi þó ekki fylgst með hraðamælinum.  Honum hafi þótt hraðinn vera um eða undir hámarkshraða og ekkert verið að pæla í því.  Hann fylgdi aðeins hraða annarra bíla þarna.

  Hann gerði engan ágreining við hraðamælingu lögreglunnar.  Það var skrifuð skýrsla og allt gekk sinn vanagang.  Nema að þegar kom að því að ganga frá sekt þá kom í ljós að í skýrsluna var skráð að hann hafi ekið örlítið of hratt á Dalbraut í Kópavogi.  Það er engin Dalbraut í Kópavogi.  Það er til Dalbraut í Reykjavík,  á Dalvík, á Akranesi og víðar.  Leikar fóru þannig að skýrslan var úrskurðuð ómarktæk og sektin felld niður.

  Lögreglumaðurinn valdmannslegi og háðski hafði lesið vitlaust á götumerkingu á Dalvegi. 

  Spurning er hvort að lögreglumaðurinn hefði ávarpað mann með vestrænt útlit á sama hátt?  Skipað honum að læra almennilega íslensku,  spurt hvort að hann væri læs og kallað mann á fertugsaldri dreng?  Ég held ekki.  Ég held ekki heldur að íslenskir lögreglumenn séu almennt rasistar  Margir lögregluþjónar eru gott fólk.   

„Hættu að vera dónalegur“

Skúbb! Eivör með fjórfalda platínusölu í Noregi og vinyl!

  Í áratug eða svo hefur færeyska söngkonan Eivör verið ástsælasti erlendi tónlistarmaður á Íslandi.  Einstakar plötur með henni hafa verið að seljast í allt að 10 þúsund eintökum.  Jafnframt hefur Eivör margoft verið tilnefnd þegar kemur að Íslensku tónlistarverðlaununum og íslensku leiklistarverðlaununum Grímunni.  Hún hefur landað ófáum verðlaunum.

  Færri gera sér grein fyrir því hvað Eivör er stórt nafn á hinum Norðurlöndunum.  Einkum í Noregi og Danmörku.  Hún hefur margoft hlotið tilnefningar og unnið til verðlauna í Dönsku tónlistarverðlaununum.  Lag með Eivöru og danska rappdúettnum Nik & Jay náði 1. sæti danska vinsældalistans.  Í Noregi er Eivör ennþá stærra nafn.

  Í gær fékk Eivör viðurkenningu fyrir metsöluplötu í Noregi.  Fjórfalda platínusölu.  Samtals hafa selst þar 120 þúsund eintök af plötu með hljómsveit hennar Vamp,  Liten Fuggel.  Platan hefur setið í efsta sæti norska sölulistans vikum saman.  Á plötunni syngur Eivör m.a. gullfallegt lag sitt um systur sínar,  Elísabeth og Elinborg. 

  Við sama tilefni var nýjasta sólóplata Eivarar,  Room,  gefin út á vinyl.  

Grænmetisrækt hefst á tunglinu strax á næsta ári

  Þetta hljómar eins og grín.  En þetta er ekki grín.  Á næsta ári hefja Kínverjar ræktun á fjórum tegundum grænmetis á tunglinu.  Til að byrja með verður grænmetið ræktað á 300 fermetrum.  Það nægir til að grænmetið framleiði súrefni sem dugir fjölda manns til að dvelja á tunglinu án þess að þurfa á súrefnisgrímum að halda.  Grænmetið kemur jafnframt í stað nestispakka.  Fólkið þarf ekki að taka nein matvæli með sér frá jörðinni.  Þess í stað jórtrar það á ferska grænmetinu sem vex á tunglinu.

  Grænmetisræktin er algjörlega sjálfbær.

  Ef allt gengur að óskum mun tunglið leysa offjölgunarvandamál Kínverja og takmarkað landrými þessa fjölmennasta ríkis heims.  Þetta gerist ekki 1, 2, 3.  Á næstu árum munu aðeins tugir Kínverja dvelja á tunglinu.  Því næst einhver hundruð.  Á seinni hluta þessarar aldar verður komin upp myndarlegur kínverskur kaupstaður.  Annað hvort á þessari öld eða þeirri næstu munu jarðarbúar sjá með berum augu að hluti tunglsins verður grænn.  Þá verður talað um að tunglið sé úr grænum osti eða gráðosti.

  Hvar Huang Nupo kemur inn í dæmið vita fáir.  

   

Bestu plötur ársins 2012

  Spin er næst söluhæsta bandaríska popptónlistarblaðið á eftir Rolling Stone.  Rolling Stone er söluhæsta músíkblað heims.  Selst í um 2 milljónum eintaka.  Það er dálítið skrítið að Rolling Stone er til sölu í öllum helstu blaðsöluvögnum í Bandaríkjunum ásamt öllum helstu bresku poppmúsíkblöðum.  Spin er aðeins selt í stærstu bókabúðum í Bandaríkjunum en yfirleitt ekki í blaðsöluvögnum.  Samt er Spin nokkuð stórt (útbreitt) músíkblað í Bandaríkjunum og víðar.  Styrkur Spin byggir á áskriftarsölu.

  Spin hefur opinberað lista yfir bestu plötur ársins 2012.  Hann er þannig:

1  Frank Ocean:  Channel Orange

2  Kendrick Lamar:  Good Kid - Lamar, M.A.A.D. City

3  Japandroids:  Celebration Rock

4  DJ Rashad: Teklife Vol 1 - Welcome to the CHI

5  Miguel:  Kaleidoscope Dream

6  Bad for Lashes:  The Haunted Man

7  Swans:  The Seer

8  Killer Mike:  R.A.P. Music

9  Ty Segall:  Twins

10 Santigold:  Master of my Make-Believe    

Ósvífinn hrekkur

  Þrír bandarískir hermenn horfðu ofan í hyldýpi og ræddu um hversu hættulegt væri að standa þarna fremst á klettabrún í Færeyjum.  Sá í miðið brá á leik og hrópaði hátt og óvænt í eyra þess sem fremstur stóð:  "Böh!"  Þá voru eftir tveir.  Húmoristinn í miðið skammaðist sín dálítið eftir á.  En það var,  jú,  seinni heimstyrjöldin í gangi og margt spennandi að gerast.  Seinni heimsstyrjöldin gekk ekki áfallalaust fyrir sig.  

Sendiherra framdi sjálfsvíg

Skammaður eins og hundur af þriggja ára krakka

  Ég bý í Reykjavík.  Systir mín og hennar fjölskylda búa á Norðurlandi.  Um helgina hringdi systir mín í mig.  Yngstu börn hennar voru heima við og ömmustelpan hennar var í heimsókn.  Sú er á fjórða ári.  Eftir að hafa rætt við systir mína í dágóðan tíma heyri ég ömmustelpuna kalla og spyrja við hvern hún sé að tala.  Amman svaraði:  "Jens, bróðir minn."

  Stelpan hrópaði ákveðin:  "'Eg þarf að tala við Jens!".  Ég varð dálítið undrandi að heyra þetta því að hún þekkir mig ekki.  Komin með síma ömmunnar í hendur sagði hún ábúðafull og skipandi við mig:  "Jens,  þú verður að bursta tennurnar!  Ekki hlusta á Karíus og Baktus!  Hlustaðu á mömmu þína!"    

  Stelpan sá nýverið leikritið um Karíus og Baktus.  Í hennar huga er greinilega bara einn Jens til.  

Þegar bragðið af eplum tók kollsteypu. Dularfullt.

  Fyrst þegar epli bárust til Íslands þá brögðuðust þau eins og hráar kartöflur.  Það þótti lítið varið í þau.  Engu að síður var ævintýraljómi yfir þessum framandi ávexti.  Íslendingar létu sig því hafa það að maula á þessum eplum upp á sportið.  Það þótti næsti bær við að vera kominn til útlanda að japla á epli.

  Grunur leikur á að fyrstu epli sem bárust til Íslands hafi í raun verið rauðar kartöflur.  Hin meintu epli bárust til Íslands fyrir milligöngu danskra kaupmanna í Færeyjum.  Í Færeyjum heita kartöflur epli.  Í Færeyjum heita epli súr epli.  

  Það varð kúvending á bragði af eplum þegar þau voru seint og síðar meir flutt inn beint frá Hollandi.  Þau epli brögðuðust ekki eins og hráar kartöflur heldur eins og óþroskaðar perur.  Þá náði ævintýrið nýjum hæðum.  Síðan hafa Íslendingar verið sólgnir í epli. 

  Til gamans má geta að orðið appelsína þýðir "epli frá Kína".  Á hollensku heita appelsínur "sína appel" (kína epli)

Langveikt barn skammað fyrir tölvunotkun

  Langveik stúlka flutti ásamt fjölskyldu sinni til Akureyrar fyrir tveimur árum.  Hún verður 12 ára eftir mánuð.  Hún fór í Brekkuskóla.  Þar hefur hún sætt einelti.  Það var mjög erfitt fyrir hana að koma úr fámennum sveitaskóla - þar sem kennarar og nemendur eru eins og ein stór fjölskylda - og fara í fjölmennan skóla,  þekkja enga þar og mæta verulega neikvæðu viðmóti.  Ofan á veikindin. 

   Þrátt fyrir veikindin er stúlkan einstaklega jákvæð, glaðlynd og margt til lista lagt.  Í síðustu viku var hún enn og aftur veik heima.  Gat ekki mætt í skólann.  Skólasystkini hennar var á fésbók,  sá að stelpan var þar líka og klagaði í kennarann.  Þegar hún mætti í skólann skammaði kennarinn hana fyrir að hafa verið á fésbók.  Sagði að veikt barn eigi að hafa hljótt um sig og ekki vera á fésbók.

  Stelpan var miður sín yfir þessu.  Og líka fyrir að vera skömmuð fyrir framan óvinveitt skólasystkini sem leita að öllum veikum blettum á langveiku barninu.  Þetta hafði þegar í stað neikvæðar félagslegar afleiðingar.  Kennarinn var þannig þátttakandi í einelti.

  Skólastjórinn segist ekki vilja tjá sig um einstök mál.  Atvikið verði rannsakað.  Hugsanlega snúist málið um aldursmörk notenda fésbókar.  Vonir standa til að niðurstaða rannsóknarinnar liggi fyrir ekki síðar en í apríl.  Það er rosalega flókið að rannsaka svona mál.  Aðallega vegna þess að það þarf að spyrja kennarann um atvikið. 

  Þetta vekur upp margar spurningar.  Veik börn mega tala í síma.  Þau mega fá heimsóknir.  Þau mega teikna.  Þau mega spila á hljóðfæri.  En þau mega ekki vera á fésbók.

  Skólasystkinið sem klagaði,  jafnaldri,  mátti vera á fésbók - að því er virðist átölulaust.  Enda ekki langveikt barn.  

  Er það hlutverk skólasystkina og kennara að ráða því hvernig veikt barn styttir sér stundir heima?  Ef skólasystkini og kennari finna sig knúin til að ráðskast með það er þá ekki eðlilegra að tala við foreldrana fremur en ráðast að barni - sem á erfitt uppdráttar í skólanum - með niðurlægjandi hætti?

  Meira má lesa hér um málið:  http://www.akureyrivikublad.is/akvbl/frettir/2012/12/01/skommud-fyrir-tolvunotkun/ 

Jón góði biður Bubba griðar

  Jóni góða og Bubba greinir á um það hvort kráka (cover song) þess síðarnefnda af sönglagi Johns Lennons,  "Across The Univers",  sé martröð.  Einhver meiri núningur hefur verið á milli þeirra vegna þessa.  Gott ef ekki út af klúðri varðandi höfundarrétt.  Bubbi hefur að eigin sögn aldrei áður á sínum 33ja ára ferli flutt lag eftir annan en sjálfan sig og kann þess vegna ekkert á höfundarrétt.  Aðrir hafa verið duglegir að flytja lög eftir Bubba alveg frá því snemma á síðustu öld.  Það er annað mál.

  Jón góði gjörþekkir lög Lennons og Bítlanna betur en flestir aðrir íslenskir tónlistarmenn.  Hann hefur stýrt ófáum hljómsveitauppsetningum á hljómleikum undir þeirra nafni.  Ég veit samt ekki hvort að rétt sé að túlkun Bubba á Lennon-laginu sé martröð.  Ég hef ekki heyrt hana og skilst að henni hafi verið kippt úr spilun á Bylgjunni.

  Hitt veit ég að Jón góði og glaðlegi er ekki kenndur við góðmennsku að ástæðulausu.  Á fésbókarsíðu sinni hefur hann nú hvatt til þess að Bubba sé ekki strítt á skrifblindu.  Orðrétt segir þar:

  "Þeir sem hafa gert gys að skrifblindu hans og annarra á opinberum vettvangi ættu að skammast sín."

  Það er ástæða til að láta áskorun Jóns berast víðar.  Og bæta við að það sé kannski sömuleiðis að mestu óþarfi að gera gys að öllu hinu. 

     

Ófyrirgefanlegt klúður hjá IKEA

 

 

  Húsgagnaverslunin IKEA í Hafnarfirði býður þessa dagana upp á þakkargjörðarhátíðarkalkún ásamt meðlæti.  Hugsanlega er tilefnið að á dögunum héldu Kanadamenn hátíðlegan haustfagnað Indíána, svokallaða þakkargjörðarhátíð.  Nokkru síðar héldu Bandaríkjamenn þennan sama haustfagnað hátíðlegan og kalla hann sömuleiðis þakkargjörðarhátíð.

  Á haustfagnaðinum er rótgróin hefð að hafa á borðum fylltan kalkún ásamt maís, trönuberjasósu og fleiru.  Þetta er jafn fastur siður og hangikjötið og jafningurinn á Íslandi á jóladag.

  Verðið á þakkargjörðarhátíðarkalkúninum hjá IKEA er 995 kr.  Húrra fyrir því.  Verra er að máltíðin stendur ekki undir nafni.  Jú,  skammturinn er alveg ríflegur.  En án trönuberjasultu.  Þakkargjörðarhátíðarkalkúnn er ekki þakkargjörðarhátíðarkalkúnn án trönuberjasulta.  Þetta er hneyksli!

  Mér var svo brugðið þegar engin var trönuberjasultan að matarlystin hvarf eins og dögg fyrir sólu.  Mér fannst kalkúnasneiðarnar ekki nógu þurrar.  Það var eins og þær væru vættar.  Kannski drógu þær svona í sig safann úr rauðkálinu.  Hann flaut.  

  Ég hef ekki oft né víða í Bandaríkjunum (og aldrei í Kanada) snætt hátíðarkalkún í heimahúsi.  En í þau skipti sem það hefur gerst eru hvorki rauðkál né brúnaðar kartöflur meðlæti. Brúnuðu kartöflurnar í IKEA passa engu að síður glettilega vel meðkalkúni.  Rauðkálið á sennilega að vera staðgengill trönuberjasultu.  En því er ekki saman að jafna.  Þetta er jafn fráleitt og að hafa franskar kartöflur með hangikjöti í stað soðinna kartafla í uppstúfi. 

  Fyrir ykkur sem matreiðið kalkún um jólin mæli ég eindregið með kryddblöndu sem heitir Best á kalkúninn.  Og í allra guðanna bænum hafið trönuberjasultu með.  Þannig og aðeins þannig verður kalkúnaveisla alvöru hátíðarmatur.

  Næst ætla ég að prófa hangikjötsréttinn í IKEA.  Ef hann er án jafnings verð ég fyrir jafn miklum vonbrigðum og með kalkúninn.  Hinsvegar verður spennandi að komast að því hvort hangikjötsmáltíðin kosti 895 kr. eins og stendur á auglýsingaspjaldi við innganginn í matsalinn eða 995 kr. eins og stendur á verðlista fyrir ofan matborðið.  Verulega spennandi.  Ég hlakka til og læt ykkur vita.

 

Skemmtilega frumleg kapella

  Í Norður-Karólínu í Bandaríkjum Norður-Ameríku þykir mörgum gott að fá sér hjartastyrkjandi brjóstbirtu.  En alls ekki öllum, vel að merkja.  Þeir sem sækja í hjartastyrkjandi heilsudrykkinn koma sér gjarnan fyrir á bekkjum í tilteknum almenningsgörðum.  Þar sötra menn drykkinn og láta sólina kyssa sig.  Eða einhverja aðra.

  Þegar rökkva tekur rölta menn heim á leið,  án þess að taka tómu flöskurnar með sér.

  Í Norður-Karólínu er fólk trúrækið og sækir sína kirkju undanbragðalaust.  Þessi tvö áhugamál,  sötrið og trúræknin,  eru sameinuð á skemmtilegan máta í kapellu í Norður-Karólínu.  Og vísar um leið á söguna af kappanum sem breytti vatni í vín.  Íslendingar gera einmitt mikið af því núna á tímum samfelldra verðhækkana.  Myndin af kapellunni á erindi til okkar.   

Besta hádegisverðartilboðið

  Nýverið tók Daði á sportbarnum Classic Rock (eða hvort staðurinn heitir í dag bara Classic?) í Ármúla 5 upp á því að bjóða spennandi hádegisverðartilboð.  Hægt er að velja á milli ostborgara,  steiktrar samloku eða pizzu á 1000 kall.  Innifalið í máltíðinni er gos eða ferskur ávaxtasafi.  Með ostborgaranum og samlokunni fylgja alvöru franskar kartöflur og kokteilsósa.  Ég hef prófað ostborgarann.  Hann er kjötmikill (120 gr) og allt eins og best er á kosið.

  Nú hefur Daði bætt um betur:  Hann býður upp á glæsilegan enskan morgunmat (Full English Breakfast) ásamt gosi eða ferskum ávaxtasafa á þessu þægilega tilboðsverði,  1000 kalli.  Þeirri máltíð gef ég hæstu einkunn.  Þetta er rífleg máltíð með pönnusteiktum kartöflum,  tveimur spældum eggjum,  ristuðu brauði og öðru tilheyrandi (beikoni, pylsum, bökuðum baunum...).  Ég er sérlega ánægður með ristaða brauðið.  Víða - þar sem boðið er upp á English Breakfast - klikka menn á því að hita brauðsneiðar aðeins á pönnunni án þess að þær brúnist.  Á Classic ristar listakokkurinn Kent Jensen brauðið þannig að það fær skarpan brúnan lit,  er stökkt en mjúkt.  Með fylgir smjör (sem vantar á mörgum veitingastöðum er bjóða upp á English Breakfast).

  Enski morgunverðurinn á Classic er besta hádegistilboð á markaðnum í dag,  þegar miðað er við verð og gæði.

  Til gamans má geta að Daði var í gamla daga gítarleikari hljómsveitarinnar Dáta.  Glettilega góður gítarleikari og hefur síðan spilað í einhverjum blúshljómsveitum minna frægum en Dátum.  Hann er blúsgeggjari.  Það er gaman að spjalla við hann um blús og rokk.  Rétt eins og við dætur hans og eiginkonu,  sem vinna á Classic.  Viktoría, dóttir þeirra hjóna, er vel heima í klassíska blúsrokkinu og spilar jafnan áhugaverða músík á barnum.  Líka með yngri rokkhljómsveitum og gömlum blúsjöfrum.  Það er góð skemmtun að kíkja á Classic í Ármúla 5.   

 

Galdurinn við að leggja á borð. Mikilvægt að vita og kunna!

  Þessa dagana hellast jólahlaðborð yfir heimili og fyrirtæki.  Svo taka skötuveislurnar við,  jólaboð,  gamlársveislur,  nýársveislur,  þrettándafagnaður,  þorrahlaðborð og þannig mætti áfram telja.  Það gera sér ekki allir grein fyrir því hversu miklu máli skiptir að vel og snyrtilega sé lagt á borð.  Þetta er sálrænt atriði.  Minnstu hnökrar á því hvernig borðbúnaður stendur og liggur á borðum eyðileggja algjörlega upplifun gesta af borðhaldinu.  Á sama hátt laðar snyrtilega uppraðaður borðbúnaður fram sterka tilfinningu fyrir veglegri veislu.

  Augað ræður miklu um upplifun af mat.  Það er svo AUG-ljóst að furðu sætir hvað margir klúðra jafn einföldum hlut. 

  Til að leggja snyrtilega á borð þarf aðeins tommustokk og snærispotta.  Með tommustokknum er passað upp á að nákvæmlega sama bil sé á milli allra diska, glasa og hnífapara.  Það má ekki skeika hálfum cm.  Með spottanum er þess gætt að borðbúnaðurinn sé í beinni röð.  Þaðan er komið orðið þráðbeint. 

 

Yfirgengileg drykkjuvandamál gamla fólksins

  Ég hef lengi reynt að benda á og vara við yfirgengilegu og brjálæðislegu ofdrykkjuvandamáli aldraðra Íslendinga.  En talað fyrir daufum eyrum.  Og jafnvel augum.  Staðreyndin er sú að það má ekki af þessu fólki líta né sleppa af því hendi; þá er það á augabragði búið að drekka frá sér ráð og rænu.  Með tilheyrandi látum.  Þeim mun eldra sem fólkið er því skæðara er það í drykkjulátunum.  Og reyndar allskonar óhollustu og uppátækjum.  

  Verstir eru gamlingjarnir þegar þeir komast út fyrir landsteinana.  Þá losnar um allar hömlur.  Þeir haga sér eins og beljur sem er hleypt út að vori:  Sletta ærlega úr klaufunum.

  Mér er minnistæður einn sem fór til Kanarí.  Hann drakk sig blindfullan hvern dag.  Það fyrsta sem hann gerði er hann vaknaði á morgnana var að spyrja ferðafélagana hvort hann hafi skemmt sér vel daginn áður.  Hann hafði ekki hugmynd um það sjálfur en varð þeim mun glaðari sem sögurnar af drykkjulátunum voru meira krassandi.  Hann hvatti ferðafélagana til að ljósmynda uppátækin.  Hann langaði til að sjá myndir af sér ælandi eða hálf rænulausum.  Þetta var fyrir daga digitalmyndavéla.  Kappinn var reyndar ekki kominn á aldur.  En byrjaður að æfa sig fyrir elliárin. 

  Algengt er að gamla fólkið komi tannlaust heim úr drykkjutúrum í útlöndum.  Gómarnir renna út úr því í ölvunarsvefni út um allt tún.  Eftir hverja hópdrykkjuferð aldraðra Íslendinga til útlanda er nágrenni hótelsins útbíað í tanngómum í reiðuleysi. 

 

  Margir stela reiðhjóli.  En komast sjaldnast á því lengra en út í næstu laut.  Þar sofna þeir ölvunarsvefni.

  Það þarf ekki hjólreiðatúr til.  Sumir fá sér kríu hvar sem er á milli þess sem þeir rangla blindfullir og stefnulaust um nágrenni hótelsins.

 

  Þegar gamlingjarnir eru í glasi verða þeir ruddalegir og ógnandi í framkomu.  Þá forðar yngra fólk sér á hlaupum undan þeim.

  Djöfladaður einkennir fulla gamlingja.  Þeir reyna stöðugt að koma djöflahornum á ferðafélagana,  Satani til dýrðar.

  Gamla fólkið skerpir á vímunni með aðstoð sjónauka.  Þá verður það glaseygt og þykir það gaman.

   Um og upp úr 100 ára aldri má fulla fólkið ekki sjá logandi ljós öðru vísi en kveikja sér umsvifalaust í hassvindli eða hvaða vindli sem er.

   Á drykkjuferðalögum í útlöndum rambar margur gamlinginn inn á húðflúrstofur.  Kann sér ekki hóf á neinu sviði.   Verður sér og sínum til skammar þegar heim er komið.  Það er tilhlökkun að vera að detta í þennan aldurshóp.  Alltaf fjör.  Og nú er byrjað að selja áfengi á elliheimilunum hérlendis.  Síðan gengur mikið á þar á bæ.

„Drukku frá sér ráð og rænu“

Kaldar kveðjur til brottrekinna

 

  Neinn er merkilegt fyrirtæki.  Stundum tapar það peningum án þess að kippa sér upp við það.  Það á vini á góðum stöðum sem afskrifa skuldir þegar svo ber undir.  Þannig að þetta er ekkert mál.  Einu sinni hef ég þó heyrt forstjóra Neins veina sáran.  Það var þegar hann tjáði sig um vörurýrnun vegna þjófnaðar á bensíni.  Bensíni hafði verið stolið frá Neinum fyrir næstum 30 milljónir króna.  Forstjórinn benti á að það væri virkilega erfitt og nánast óbærilegt að reka fyrirtæki sem býr við svona mikla vörurýrnun.  Undir það skal tekið.

  Nokkru síðar ræddi forstjórinn um tilraun Neins við að hasla sér völl á sviði bókaútgáfu.  Gefnar voru út tvær bækur,  hvor um sig í risaupplagi.  Þær voru auglýstar til samræmis við risaupplagið.  Leikar fóru þannig að uppistaðan af upplaginu endaði á haugunum.  Forstjórinn sagði tapið á bókaútgáfuævintýrinu skipta fyrirtækið engu máli.  Tapið væri ekki nema næstum 30 milljónir króna og fyrirtæki af stærðargráðu Neins finni hvergi fyrir svoleiðis smáaurum.

  Svo skemmtilega vildi til að þetta var sama upphæð og vörurýrnun vegna bensínþjófnaðar.

  Núna var Neinn að segja upp 19 starfsmönnum.  Forstjórinn segir það vera til þess að bæta þjónustu fyrirtækisins.  Birgjar jafnt sem starfsfólk sé yfir sig hamingjusamt með breytinguna.  

  Þetta verður ekki skilið öðru vísi en svo að þessir 19 brottreknu hafi dregið þjónustu Neins niður.  Þeir hafi háð rekstri Neins. 

Ævintýralegur ástar-átthyrningur. Ris og fall háttsettra.

  Ég er að reyna að átta mig á ástarmálum æðstu toppa í leyniþjónustu Bandaríkja Norður-Ameríku,  CIA; alríkislögreglu Norður-Ameríku,  FBI;  stríðshetja og leiðtoga bandaríska hersins í Írak og Afganistan;  fyrrverandi tilvonandi æðstráðanda yfir herjum NATO og ég veit ekki hvað og hvað. 

  Hvað höfðingjarnir hafast að er forvitnilegt.  Siðferði og heilindi á einu sviði segja eitthvað.  Bara eitthvað.  En það er atburðarrásin sem er safaríkasta sagan.  Það er hægur vandi að týnast í henni.  Allt fer í rugl.  Til að einfalda söguna fyrir mig og ykkur nota ég bara eftirnöfn þessa ágæta fólks og einkenni þau með sitthverjum litnum:

  Vel gift og hugguleg kona, Broadwell,  tekur upp á því að senda annarri vel giftri og huggulegri konu, Kelley í Flórida,  tölvupóst.  Eða öllu heldur dældi á hana tölvupóstum. Broadwell sakar Kelley um að eiga í ástarsambandi við tvo helstu ástmenn sína (les= ástmenn Broadwell), heiðviðra fjölskyldufeður sem megi ekki vamm sitt vita.  Séu í góðu og trúföstu hjónabandi. Það séu gróf og ófyrirgefanleg svik við hjúskaparheiður þeirra að Kelley stundi framhjáhald með þeim.  Annar heitir Petraeus.  Hinn heitir Allen. 

  Til að leggja áherslu á ásakir sínar hótar Broadwell henni Kelley öllu illu.  Jafnframt hótar hún Kelley því að upplýsa eiginmann hennar um þessi ómerkilegu óheilindi og kallar hana druslu fyrir að vanhelga hjónaband þeirra með framhjáhaldi. Broadwell hótaði Kelley ýmsu öðru. Kelley varð hrædd vegna ofbeldisfullra hótananna.  Enda með músarhjarta.  Svo hrædd varð hún að hún snéri sér til hryðjuverkadeildar FBI. 

  FBI hóf rannsókn á málinu.  Komst inn í tölvu Broadwell og fann þar ótal ástarbréf sem höfðu gengið á milli Broadwell og Petraeus.  Hann er á sjötugsaldri.  Hún er fertug.  Það er aukaatriði.  Ástin spyr ekki um aldur.  

  Sá sem Kelley snéri sér til hjá hryðjuverkadeild FBI hafði áhyggjur af þessu.  Ég verð að segja það.  Hann taldi öryggi Bandaríkjanna stafa hættu af stöðunni.  Petraeus var yfirmaður CIA.

  FBI-maðurinn kom áhyggjum sínum á framfæri við leiðtoga republikana í fulltrúadeild Bandaríkjaþings.  Einhverra hluta vegna var reynt að þagga málið niður.  Það var þæft.  Kannski vegna forsetakosninganna.  Allt komst þó upp um síðir.  

  Víkur þá sögunni að hinum grandvara fjölskylduföðurnum,  Allen.   Þeim sem Broadwell sakaði Kelley um að eiga í ástarsambandi við.  Hann var háttsettur hershöfðingi.  Samskipti hans og Broadwell hófust á því að Broadwell varaði hann við því að eiga í ástarsambandi við drusluna Kelley.  Hún væri ómerkilegur hjónadjöfull og samkvæmisljón.  

  Leikar fóru þannig að ástir tókust með þeim Allen og Broadwell.  Allen átti að verða næsti yfirmaður herafla NATO.  Í millitíðinni sendi hann Broadwell 30 þúsund ástarbréf.  Það var nánast full vinna.  Með bréfunum sendi hann Broadwell ljósmyndir af sér mismikið klæddum.  Eða réttara sagt mismikið nöktum.  

  Þrátt fyrir að allir þessir tölvupóstar á milli Broadwell og annars vegar Allens og hinsvegar Petraeusar hafi verið faldir - gerðir ósýnilegir í þeirra tölvum og "órekjanlegir" - þá tókst tölvusérfræðingum FBI að grafa þá upp.  Það eru góð meðmæli með tölvudeild FBI.  En ekki eins góð meðmæli með siðferði,  heilindum og hjúskapargildum Allens,  Petraeusar, Broadwell og Kelley.  Engu að síður er allur hópurinn kirkjurækinn,  íhaldssamur og sammála um að hjónabandið sé heilög stofnun,  hvort heldur sem er í augum guða eða manna.

  Hér er hin vel gifta, trygglynda og fertuga eiginkona,  Broadwell, ásamt eiginmanninum:

    

  Svo er það hinn trúfasti borðalagði og margheiðraðri eiginmaður til fjögurra áratuga,  Petraeus á sjötugsaldri,  ásamt eiginkonunni.  Kappsemi Petraeusar við að drepa Íraka og Afganista orsakaði tvímælis hjá undirmönnum hans.  Það er önnur saga og léttvægari:

  Því næst hin vel gifta Kelley ásamt eiginmanninum:

  Loks er það sá ljúfi Allen ásamt sinni ástkæru eiginkonu. Ef hún fengi flatlús gæti sú óværa endað hjá eiginmanni Broadwell eftir að hafa ferðast á milli Allens,  Kelley,  hennar eiginmanns og Petraesusar og þaðan til Broadwell.  Að lokum sæti eiginmaður Broadwell uppi með flatlús frá eiginkonu Allens.  Þá væri flatlúsin hissa eftir allt þetta ferðalag. 

Ástkonan er miður sín

Getur komið sér vel að vita

 

  Margir Íslendingar senda ættingjum sínum og vinum,  búsettum erlendis,  harðfisk,  hangikjöt,  kæsta skötu,  kæstan hákarl og súrsaða hrútspunga.  Aðallega ber á þessu um eða fyrir sólrisuhátíðina,  jólin, ár hvert.  En líka á Þorra.  Vandamálið er að embættismenn á tollpóstsstofu í viðtökulandinu kunna þessu misjafnlega vel eða illa.  Þeir telja sig þurfa að vernda þjóð sína gegn þessum hugsanlega stórhættulegu matvælum.  Þeir þefa af matnum.  Lyktin staðfestir ranglega gruninn um skemmdan og skaðlegan mat.  Þá er ekki um annað að ræða en farga óþverranum samkvæmt kúnstarinnar reglum undir eftirliti.

  Viðtakandi jólapakkans fær svo loks í hendur heldur rýran kost.  Stundum með athugasemdum um að pósthúsið lykti ennþá til mikilla óþæginda fyrir starfsfólk.

  Það er til einfalt ráð til að koma hátíðargóðgætinu á áfangastað.  Það þarf einungis að merkja matvælin rækilega - og fylgiskjöl með pakkanum - sem kattafóður.  Reglur um dýrafóður eru mun rýmri en reglur um matvæli til manneldis.  

  Þetta skal einnig hafa í huga þegar íslenskur ferðamaður tekur áðurnefnd matvæli með sér í ferðatösku til útlanda.  

Frábær uppástunga um jólagjafir

  Fyrir tæpum mánuði sagði ég á þessum vettvangi frá veikindum ungs listamanns.  Sá heitir Ingólfur Júlíusson.  Hann er best þekktur sem gítarleikari pönksveitarinnar Q4U annars vegar og hins vegar sem ljósmyndari,  margverðlaunaður út um allan heim.  Þarna fyrir tæpum mánuði greindist Ingó með bráðahvítblæði. 

  Hann var þegar settur í viðeigandi meðferð.  Heildar meðferðin tekur um sex mánuði.  Henni lýkur á mergskiptum úti í Svíþjóð.

  Í fyrsta kafla meðferðar sýna á milli 70 og 80% sjúklinga jákvæða svörun.  Því miður er ekki svo í tilfelli Ingós.  Þessi kafli meðferðarinnar hefur engum árangri skilað.

  Á fésbók Heiðu B. Heiðars sá ég góða uppástungu um jólagjafir.  Hún er sú að fólk fari inn á heimasíðu Ingós og kaupi þar ljósmyndir til jólagjafa.  Flottari ljósmyndir eru vandfundnar.  Um leið er fjárhagur Ingós styrktur, en Ingó er að mestu tekjulaus eftir að hafa verið kippt þetta óvænt út af vinnumarkaði. 

  Þetta er slóðin á heimasíðuna:  http://ingomedia.net/

  Ég vil bæta annarri uppástungu við.  Hún er sú að í stað þess að senda jólakort verði samsvarandi upphæð lögð inn á styrktarreikning Ingós.  Svo látið þið vita af þessari ákvörðun á fésbók.  Ég fullvissa ykkur um að allir vinir ykkar verða sáttari við að kostnaði við að kaupa og senda þeim jólakort í ár sé betur varið til styrktar Ingólfi.  Þið munið strax sjá það á "lækunum" við tilkynninguna.

  Nánari upplýsingar um aðstæður Ingólfs og styrktarreikning hans má lesa með því að smella á þennan hlekk:  http://www.jensgud.blog.is/blog/jensgud/entry/1265005/ 

Plötuumsögn

 

Flytjandi:  Högni Lisberg

.

Titill:  Con Man

Einkunn: ****1/2 (af 5)

.

  Færeyski tónlistarmaðurinn Högni Lisberg heldur áfram að koma á óvart.  Um leið og hann toppar sig.

  Högni varð fyrst þekktur hérlendis 2002 sem trommuleikari færeysku súpergrúppunnar Clickhaze.  Þessi frábæra trip-hopp hljómsveit hafði innanborðs einvalalið snillinga sem allir hafa verið áberandi í færeysku músíkflórunni.  Hérlendis er söngkonan Eivör þeirra frægust.  Hún er súperstjarna á Íslandi og nýtur mikilla vinsælda víða um heim.  Einkum í Noregi og Danmörku.

  Hljómborðsleikari Clickhaze er þekktastur hérlendis sem bassaleikari flottustu pönksveitar heims,  færeyska tríósins 200.

  Þannig mætti áfram telja.

  Högni hóf sólóferil með lágstemmdri plötu,  Most  Beatiful Things, 2003.  Plötu sem einkenndist af fallegum og ljúfum lögum.

  Næsta plata,  Morning Dew, kom út 2006 og var töluvert rokkuð.  Með henni sló Högni rækilega í gegn hérlendis.  Titillagið og nokkur önnur lög nutu vinsælda í íslenskum útvarpsstöðvum.  Högni kom fram á nokkrum hljómleikum á Íslandi í kjölfarið.  Meðal annars á Airwaves.  Hann er virkilega flottur sviðsmaður.  Fínn söngvari og spilar á gítar (og hvaða annað hljóðfæri sem er).  Morning Dew  var útnefnd besta færeyska platan það árið á Færeysku tónlistarverðlaununum AME.

  Þriðja sólóplata Högna var Haré! Haré!. Hún kom út 2008.  Þar hvað við nýjan tón.  Bæði í söngstíl og fönkuðum útsetningum.  Það var nettur Prince-keimur í sumum lögum.

  Eitt lag af plötunni sló í gegn í Bandaríkjunum.  Það heitir Bow Down.  Það var notað í heimsfrægum bandarískum tölvuleik, NBA 2K11.  Á Þútúpunni (youtube) hefur lagið verið spilað milljón sinnum.

  Fjórða sólóplatan,  Con Man, er að sumu leiti rökrétt framhald af Haré!Hare!.  En er töluvert rokkaðri.  Þetta er mögnuð plata.  Allt er afgreitt á yfirvegaðan hátt en samt að hluta til hrátt.  Herskáustu lög bera keim af Rage Against the Machine og jafnvel Atari Teenage Riot.  Það rifjar upp að framan af var Clickhaze dálítið á Rage Against the Machine línunni.  

  Con Man er að nokkru leyti tvískipt plata.  Framan af er hún rokkuð en þegar á líður taka ljúfu lögin við.  Allt góð lög sem venjast vel við ítrekaða spilun.  Þetta er plata sem gaman er að spila aftur og aftur og hún vex við hverja spilun.  

  Í færeyska dagblaðinu Dimmalætting fékk platan þá umsögn að hún sé besta færeyska platan til margra ára.  Það er ekki fjarri lagi.  Hún er að minnsta kosti ein besta færeyska platan til margra ára og samanburðarhæf við allar bestu plötur á heimsmarkaði 2012.    

.

Besta aðferð til að þrífa ketti og hunda

 

 Ég sá þessa góðu uppskrift á fésbókarsíðu Önnu Sigríðar Karlsdóttur.  Uppskriftin á erindi við alla sem halda ketti eða hunda sem heimilisdýr.  Þetta er borðliggjandi frábær aðferð þegar vel er að gáð.  Hún er svona og númeruð til að allt fari fram í réttri röð.  Það er mikilvægt:

1. Lyftið upp lokinu á klósettinu og hellið hálfum bolla af Aloe Vera sjampói ofan í skálina.
2. Takið köttinn upp og talið róandi við hann á leiðinni inn á salernið.
3. Setjið köttinn ofan í klósettið og lokið.  Standið ofan á klósettsetunni til að ekkert fari úrskeiðis.

4. Á þessum tímapunkti fer kötturinn að framleiða froðu ofan í skálinni.  Leiðið hjá ykkur lætin því kötturinn hefur gaman af þessu og er að komast í hreinlætisstuð.
5. Sturtið niður í klósettinu þrisvar sinnum.
6. Opnið útidyrahurðina og gætið þess að ekkert sé í veginum. 
7. Standið fyrir aftan klósettið og lyftið snöggt upp klósettlokinu.
8. Kötturinn skýst upp úr klósettinu og verður viðþolslaus að komast út úr húsi til að sýna öðrum köttum hvað hann sé hreinn og fínn.
9. Klósett og köttur eru skínandi hrein þegar hér er komið sögu.

 

    Það var hundurinn á heimilinu sem fann upp þessa aðferðin við að þvo ketti og hvíslaði henni að heimilisfólkinu.  Það sem hvutti veit ekki er að þetta hentar einnig við þrif á hundum.