Af hverju keypti Bjarni Ármanns nammi í skóinn?

  Ég er alltaf að rekast á vikurit sem heitir Séð og heyrt.  Það er í lit og liggur frammi á öllum sólbaðsstofum.  Þetta blað gerir lífið skemmtilegra,  að sögn.  Helstu hjónaskilnaðir fræga fólksins eru tíundaðir samviskusamlega.  Í nýjasta hefti Séð og heyrt er fullyrt í frétt að Bjarni Ármannsson hafi birst á bensínstöð og keypt þar nammi í skóinn handa börnum sínum.

  Þetta eru tíðindi sem vekja upp áleitnar spurningar:  Af hverju keypti Bjarni nammi í skóinn?  Sniðgengur jólasveinninn heimili hans?  Ef svo er hvers vegna?  Var Bjarni að kaupa nammi í skóinn handa sjálfum sér?  Jólasveinninn gefur fullorðnum ekki í skóinn.  Bjarni er nammigrís.  Svo mikill nammigrís að hann keypti í fyrra heila nammiverksmiðju.     

    

  Það varð óhapp í jólahlaupinu í ár.  Kannski liggur þar svar við spurningunum varðandi kaup Bjarna á nammi í skóinn.  Hljóp Bjarni á sig?  Eða jólasveininn?

Af hverju leggja konur bílnum sínum svona?

 

 

 

 

 

 

 

 

 

 

 

 Einhverra hluta vegna leggja sumar konur bílnum sínum allt öðru vísi en annað fólk.  Og skilja ekkert í því að fólki þyki bílnum einkennilega lagt.  Þessar konur standa í þeirri trú að þeirra bíl sé lagt alveg eins og öðrum bílum. 

Hvernig fannst þér áramótaskaupið?

  Hvað segið þið um áramótaskaupið?  Mér þótti það ágætt.  Ekki það allra besta en samt ágætt. Hrifnastur var ég af stuttu bröndurunum: Þegar spurt var um kattatungur og starfsmaður vísaði á kjötborðið. Líka þegar spurt var í verslun um drullusokka og vísað á Landsbankann. Einnig þegar "Bjarni Ármanns" þakkaði þjóðinni árangur í maraþonhlaupi hlaupandi undan reiðri þjóð. Svo og þegar tölvupóstur var sendur á Alla Reynis = alli.r = allir@.  Að ógleymdu þegar fálkaorða fylgdi hverjum kassa af morgunkorni. 

  Ég veit ekki hversu snjallt var að leggja í skaupinu út af kvikmyndinni  The hangover.   Ég hef orðið var við að margir hafa ekki séð þá ágætu grínmynd og föttuðu því ekki tilvísanir í hana.  En fyrir þá sem hafa séð þessa mynd gaf það skaupinu tiltekna vídd. 

  Halldór Einarsson,  aðalhöfundur skaupsins,  þarf ekki að flýja land.  Þetta var ágætis skemmtun.  Hvað fannst þér?

  Smá upprifjun frá skaupinu í fyrra:

Árið kvatt með ljósum

Kvikmyndarumsögn

 - Titill:  Bjarnfreðarson

 - Leikstjóri:  Ragnar Bragason

 - Handrit:  Ragnar Bragason,  Jón Gnarr,  Pétur Jóhann Sigfússon,  Jörundur Ragnarsson og Jóhann Ævar Grímsson

 - Einkunn:  ****1/2 (af 5)

  Flestir kannast við sjónvarpsþættina  Næturvaktina,  Dagvaktina og Fangavaktina.  Þetta eru einhverjir albestu gamanþættir sem framleiddir hafa verið og sýndir í íslensku sjónvarpi (öfugt við  Martein  sem er versta "gaman"myndasería í íslensku sjónvarpi).  Kvikmyndin  Bjarnfreðarson  er einskonar lokapunktur aftan við sjónvarpsþættina.  Afskaplega vel heppnaður lokapunktur. 

  Kvikmyndin kemur á óvart.  Það er mun meiri dýpt í henni en sjónvarpsþáttunum,  meira drama og hún er vandaðri í alla staði;  meira í hana lagt.  Framvindan tekur nokkra óvænta vinkla,  sagan gengur vel upp og fær farsælan endi. 

  Eins og nafn myndarinnar gefur til kynna er sjónum einkum beint að Georgi Bjarnfreðarsyni.  Við fáum að kynnast æsku hans,  mömmu hans,  afa og ömmu.  Hægt og bítandi fær áhorfandinn skilning á því hvers vegna Georg hefur orðið þessi brenglaði maður sem hann er.  Áður en myndin er á enda örlar jafnvel á því að maður vorkenni Georg pínulítið.

  Góðkunningjar Georgs,  Ólafur Ragnar og Daníel,  úr vaktaseríunum eru í stórum hlutverkum sem fyrr.  Það er ekki sanngjarnt að segja að neinn steli senunni en Ólafur Ragnar á fyndnustu senurnar.  Já,  þetta er gamanmynd.  Mynd sem ég mæli með fyrir alla aldurshópa sem virkilega góðri skemmtun.  Hún á eftir að verða klassík.

Rokkarar láta gott af sér leiða

  Sem kunnugt er varð 17 ára gamall slagari,  Killing in the Name,  með bandarísku þungarokkshljómsveitinni Rage Against the Machine óvænt jólalagið í Bretlandi í ár.  Yfir hálf milljón eintaka af laginu seldist síðustu vikuna fyrir jól,  meira en 50 þúsund eintökum betur en lagið sem varð í 2. sæti.  Sjá:  http://jensgud.blog.is/blog/jensgud/entry/994808/

  Liðsmenn Rage Against the Machine hafa sent frá sér yfirlýsingu þess efnis að heildarinnkoma vegna sölunnar á laginu muni renna óskipt til neyðarskýla fyrir útigangsmenn í Bretlandi.

Bono og félagar búskuðu

Sigurvegarar ársins

  Færeysku tónlistarverðlaunin Planet Awards eru hápunktur ársins í færeysku tónlistarlífi.  Síðustu vikur fyrir afhendingu verðlaunanna snýst umræðan í Færeyjum meira og minna um verðlaunin.  Söluhæsta dagblað Fjáreyja,  Sósialurin,  lagði 16 síðna kálf undir verðlaunin um jólin.  Þau voru síðan afhent við hátíðlega athöfn í fyrradag.

  Svo skemmtilega vill til að við Íslendingar könnumst við flesta sigurvegarana.  Eivör,  Brandur Enni og Guðrið Hansdóttir hafa til að mynda öll spilað á Íslandi.  Eivör og Brandur hafa meira að segja notið mikilla vinsælda hérlendis og átt lög og plötur í efstu sætum íslenskra vinsældalista. 

  Þannig er staðið að færeysku tónlistarverðlaununum að sérstök dómnefnd (mig minnir 8 manna; þar af 2 útlendingar.  Það er hernaðarleyndarmál hverjir sitja í dómnefndinni) tínir saman 30 - 40 nöfn í hvern flokk.  Með útilokunaraðferð er nöfnum fækkað í 5.  Almenningur greiðir síðan atkvæði með sms úr farsímum.  

  

Söngkona ársins:  Eivör

Söngvari ársins:  Brandur Enni

Hljómsveit ársins:  Páll Finnur Páll

Lag ársins:  Under the Sun  með The Dreams

  The Dreams byrjaði sem pönksveit og gerði út á gömul færeysk lög.  Svo sló þessi hljómsveit í gegn í Danmörku er hún tók þátt í þarlendri hljómsveitakeppni.  Mig minnir að The Dreams hafi hafnað í 2. sæti en náði 1. sæti danska vinsældalistans aftur og aftur með sitthverju laginu.  Með tímanum hefur hljómsveitin poppast verulega,  söng á tímabili texta á dönsku en er byrjuð að syngja á ensku til að ná út fyrir danska og færeyska markaðinn.

Plata ársins:  The Sky is Opening með Guðrið Hansdóttir

Guðrið á vinsældum að fagna í Danmörku.  Ég man ekki betur en hún hafi tekið þátt í einhverri þarlendri söngvarakeppni og lent í 2.  sæti.  Eins og aðrir sigurvegarar í færeysku tónlistarverðlaununum Planet Awards 2009 semur hún sína söngva sjálf.

  

Söngkona ársins í Færeyjum

Rokkveisla ársins

   Nú verður í annað sinn haldin á Íslandi undankeppni fyrir alþjóðlegu hljómsveitakeppnina Wacken Metal Battle. Wacken er nafnið á smábæ í Norður-Þýskalandi sem á hverju sumri umturnast í einn allsherjar risa þungarokksbæ þegar Wacken : Open : Air hátíðin er haldin. Fyrstu helgina í ágúst þjarka þar inn fyrir bæjarmörkin 80.000 gestir hvaðanæva úr heiminum til að hlusta á kanónur þungarokksins spila. Hefur þessi hátíð verið haldin sleitulaust síðan 1991 og verður því 2010 hátíðin sú 21. í röðinni en Wacken er af mörgum talin Mekka allra þunga-rokkshátíða.

  Á síðustu árum hafa skipuleggjendur hátíðarinnar gefið fjöldanum öllum af ungum og efnilegum hljómsveitum tækifæri til að koma og spila á þessari hátíð. Í því skyni settu þeir á laggirnar hljómsveitakeppnina Wacken Metal Battle árið 2004. Sigursveit keppninnar hlýtur m.a. að launum alþjóðlegan hljómplötusamning, fullt af græjum og hljóðfærum og auðvitað heiðurinn af því að spila að ári fyrir mörg þúsund manns á mun betri stað í prógramminu á Wacken. Þeim er auk þess boðið að spila á hinum ýmsum undankeppnum næstu Metal Battle keppni út um allan heim!

Í ár munu 26 þjóðir halda undankeppnir í sínu landi. Sigursveit hvers lands fyrir sig fær þátttökurétt í lokakeppninni sjálfri á Wacken hátíðinni í ágúst.

Fyrirkomulag keppninnar - erlend aðkoma

  Hljómsveitir senda inn umsókn um að fá að vera með, og fer sérstök nefnd yfir umsóknirnar og velur 6 sveitir til að taka þátt í keppninni. Einungis eitt kvöld verður haldið, ólíkt öðrum hljómsveitakeppnum sem farið hafa fram hér á landi. Í keppninni sjálfri mun dómnefnd sjá um að velja sigurvegara. Erlendir aðilar sitja í henni ásamt Íslendingum. Meðal þeirra sem koma er blaðamaður frá einu stærsta metal-tímariti Evrópu, Aardschok magazine. Hann er einnig með sitt eigið bókunar- og umboðsskrifstofufyrirtæki, sem sér um að bóka tónleika fyrir fjöldann allan af hljómsveitum sem eiga leið um Benelux löndin á tónleikaferðalögum sínum og skipulagningu eins stærsta metalfestivals Hollands, Eindhoven Metal Meeting. Frá sama fyrirtæki kemur líka annar aðili sem er burðarás hjá fyrirtækinu.

  Sannarlega kanónur hér á ferð og það er því ekki annað hægt að segja en að vera þessa manns hér er mikill fengur fyrir þær sveitir sem þær eiga eftir að berja augum. Möguleikar sveitanna til að láta á sér kræla á einum stærsta markaði þungarokks í heiminum, Evrópu, munu ekki gera neitt annað en að aukast.

Wacken Open Air – Hópferð Íslendinga

  Wacken er stórglæsileg hátíð, þar sem aðbúnaður, aðstaða, öryggi, almenn framkvæmd og utanumhald er til fyrirmyndar. Það kom því ekki á óvart að hátíðin hlaut Live Entertainment Awards verðlaunin í flokknum Festival of the Year í Þýskalandi 2008. Slíkt er sérlega eftirtektarvert í ljósi þess að um 500 tónlistarhátíðir eru haldnar í landinu á ári hverju. Það hefur verið uppselt á þessa hátíð síðan 2006 og fyrir síðustu hátíð var svo komið að það var þegar orðið uppselt á hana heilum 7 mánuðum áður en hátíðin er haldin.

  Síðan 2004 hefur hópur Íslendinga fjölmennt á þessa hátíð í sérstakri hópferð sem danska fyrirtækið Livescenen stendur fyrir með sérstakri milligöngu Restingmind Concerts á Íslandi. Slíkt er að sjálfsögðu einnig tilfellið fyrir 2010 hátíðina og ættu áhugasamir einmitt að setja sig í samband við Restingmind ef þeir vilja skella sér með.

Verðlaun keppninnar

Sveitin sem stendur uppi sem sigurvegari Metal Battle á Wacken hlýtur eftirfarandi:

* Fyrstu verðlaun: Hljómplötusamningur við Wacken Records sem gildir fyrir allan heiminn. Samið verður við sigursveitina sérstaklega um ákvæði samningsins.

* Eins árs stuðningssamning (endorsement) við Washburn gítarframleiðandann og Eden bassamagnararisann. Sveitin hlýtur að auki tvo gítara, Eden 2x440W bassamagnarahaus og tvö 4x10 bassabox. Hún hlýtur einnig Mapex Meridian Maple Go-Large trommusett, eitt stk Marshall JVM 210 H gítarmagnara og 5 stk symbala frá Paiste.

Sveitirnar sem vinna sína undankeppni og fara á Wacken hljóta einnig eftirfarandi:

* 1 stk Black Panther 14" x 5.5" sneriltrommu frá Mapex og sérstakan "Friends of Washburn" samning og "Friends of Eden" samning. Þessir samningar gera sveitunum kleift að kaupa Washburn og Eden græjur á alveg sérstökum kjörum í eitt ár.

* Íslenska sveitin fær að ferðast frítt með hópferð Íslendinganna frá Kaupmannahöfn og beint á Wacken í boði Livescenen.

Umsóknarfrestur og skráning

  Þær sveitir sem hafa áhuga á að taka þátt í þessu skrá sig með því að senda kynningarpakka á Restingmind Concerts. Þær samþykkja um leið reglur keppninnar sem má finna á www.metal-battle.com. Hægt er að skrá sig á tvo vegu:

1) Með því að senda:

* CD með a.m.k. 3-4 lögum

* Mynd af sveitinni

* Upplýsingar um sveitina (bio)

* Contact info

á póstfangið:

WOA Metal Battle Ísland

c/o Þorsteinn Kolbeinsson

Rafstöðvarvegur 33

110 Reykjavík

　2) Skráning á netinu: Sveitir senda epk (electronic press kit) í gegnum vefsvæðið sonicbids.com. Nánari upplýsingar um þetta í netfanginu hér að neðan.

Umsóknarfrestur er til 20. janúar með innsendingaraðferð 1), en 8. janúar með 2). Athugið að ekki komast allar sveitir að sem senda inn umsóknir, þannig að það borgar sig að vanda sig við gerð umsóknanna.

Stærsti þungarokksviðburður ársins

Það er líklega ekki vanmat að segja að þessi viðburður sé einn stærsti þungarokksviðburður ársins (sem ekki inniheldur erlenda artista), ef ekki sá stærsti. Það er ekki á hverjum degi sem íslenskar þungarokkssveitir munu koma fram á Wacken Open Air, eins og verður einmitt afleiðing þessarar keppni.

Keppnin mun fara fram á Sódóma Reykjavík, laugardaginn 13. mars 2010.

Óvæntustu krákur sögunnar

  Vefmiðillinn WeirdWorm hefur tekið saman lista yfir óvæntustu (eða undarlegustu) krákur (cover songs) sögunnar.  Í inngangi segja þeir að þetta séu krákur sem fá hlustandann til að hrökkva við og hrópa furðu lostin/n:  "Hvurn djöfulinn eru þeir eiginlega að pæla?"

  Hér er listinn:

1.  Raggi Bjarna:  Smells like Teen Spirit

  Þeir hjá WeirdWorm völdu reyndar krákuna með Paul Anka.  En afgreiðsla þeirra Ragga og Pauls er á svipuðu róli.  Raggi að vísu alltaf flottari.  Hér fyrir neðan er upphaflega útgáfan af laginu með höfundum þess,  bandarísku grugg-sveitinni Nirvana.

2.  Sid Vicious:  My Way

  Sid var skráður bassaleikari bresku pönksveitarinnar Sex Pistols.  Sjálfur hélt hann að hann væri bassaleikari Kynhólkanna.  Hið rétta er að Chris Spedding spilaði á bassann án vitneskju Sids.  Sid kunni ekki á bassa en var hafður á sviðinu af því að hann var svo klikkaður.  Sid sótti bassagítarnám hjá Lemmy (Motorhead).  Lemmy hefur aldrei kynnst nemanda sem var jafn gjörsneyddur skilningi á bassaleik.

  Hér syngur Sid sjálfur lagið  My Way.   Skömmu síðar stakk hann auga úr bróðir tónlistarkonunnar Patti Smith,  myrti kærustu sína og dó af of stórum skammti af heróíni.

  My Way  er gamalt franskt lag en iðulega skráð á Paul Anka sem samdi enska textann.  Paul þann hinn sama og á krákuna í 1. sætinu. My Way  er sennilega þekktast í flutningi Geirs Ólafs eða Franks Sinatra.  Fyrir neðan flytur Frank þetta lag með aðstoð Pavarotti(s):

3.  Rolf Harris:  Stairway to Heaven 

  Rolf Harris er ástralskur söngvari,  þekktastur fyrir lagið  Walzing Mathilda (á Íslandi þekktara sem  Ísland úr Nató!).  Fyrir neðan er lagið í flutningi höfundanna,  bresku folk-blús sveitarinnar Led Zeppelin.

4.  Pat Boone:  Enter Sandman

  Á myndbandinu fyrir ofan er búið að blanda saman frumflutningi dansk-bandarísku málmsveitarinnar Metallica,  höfunda lagsins,  og hörmulegum flutningi raularans Pat Boone.  Reyndar er hljóðfæraleikurinn fínn.  Lagið væri áheyrilegt í þessari útsetningu án söngs.

  Pat var á sjötta áratugnum þekktur fyrir að misþyrma sprækum rokk og ról lögum með því að fletja þau út í gelt skallapopp.

5.  Scissor Sisters:  Comfortably Numb

  Hommapopp er músíkstíll sem,  ja...  Sko,  það er bara svona.  Scissor Sisters,  Bee Gees,  Village People,  Bronski Beat... Kynhneigð fólks skiptir ekki máli frekar en húðlitur eða... Andúð á píkupoppi hefur ekkert að gera með viðhorf til smástelpna eða andúð á skallapoppi til sköllóttra.  Fyrir neðan er frumútgáfa Pink Floyd á þessu ágæta lagi.

Angurvær og hátíðlegur jólasálmur

  Nú þegar liðið er á jólasteikina hellist andagiftin yfir.  Áður en ég vissi af var skáldagyðjan búin að færa mér upp í hendur án fyrirhafnar þennan hátíðlega jólasálm.  Hann verður tekinn upp í kirkjum landsins þegar Gunnar Þórðarson og Atli Heimir verða búnir að semja lag við hann.  Í allra síðustu línunni er bein tilvísun í kveðju jólasveinsins.

  Heims um ból halda menn jól;

heiðingjar,  kristnir og Tjallar.

  Uppi á stól stendur í kjól

stuttklipptur prestur og trallar:

  Tra-la-la-la-la,

tra-la-la-la-ló.

  Tra-la-la-la-la,

tra-la-la-hó-hó!

Steikinni brennt í ræktinni

Fallegasta útgáfan af Heims um ból

  Fólk má alveg leyfa sér að vera töluvert væmið á jólunum.  Leggjast til að mynda yfir hátíðlegan flutning á þvældustu jólasálmunum.  Jólin eru ekki komin fyrir alvöru fyrr en guðspjallasveitin ljúfa Testament fer í sinn fínasta skrúða og afgreiðir notalega útgáfu af  Heims um ból.  Þetta rifjar upp fyrir mér æskuárin í dómkirkjunni á Hólum í Hjaltadal.  Þar sat ég hverja einustu messu og heyrði alltaf fyrir mér sálmana flutta á nákvæmlega þennan hátt.  Að vísu hefði ég viljað heyra eitt bjölluslag úr Hólaturninum annað hvort í upphafi eða enda lagsins.  Það vandamál leysi ég sjálfur með því að slá hnífsblaði léttilega utan í bjórglasið mitt.  Bæði í upphafi og enda lagsins.  

  Fegurðin í þessum flutningi Testament birtist best ef hljóðstyrkur hátalaranna er þaninn í botn.  Þá umvefur fegurðin hlustandann í kærleik og jólagleði.

 

 

Jólasveinninn í önnum

Bestu tónskáld sögunnar

  Tímaritið Listverse hefur birt ansi merkilegan lista yfir bestu tónskáld sögunnar.  Þar tróna ekki efst John Lennon eða Paul McCartney.  Þetta er öðru vísi listi. Þegar öllu er á botninn hvolft er ekki auðvelt að hrekja niðurstöðuna.  Listinn lítur þannig út:

1.  Jóhann Sebastian Bach (þýskur).  Fúgu meistari allra tíma.

 

2.  Wolfgang Amadeus Mozart (austurískur).  Melódíumeistarinn.  

3.  Lúðvík van Beethoven (þýskur)

 

 

4.  Ríkharður Wagner (þýskur gyðingahatari).  Á myndbandinu flytja mormónar  Pílagríma kórinn  úr  Tannhauser.  Trúbrot kallaði kráku (cover) sína  Elskaðu náungann.    Ævintýri kallaði sína kráku  Frelsarinn.

 

5.  Franz Schubert (austurískur).  Hér flytur Kiri Te Kanawa  Nacht und Träume.  Umboðsmaður hennar heitir Einar Bárðarson.

6.  Róbert Schuman (þýskur)

7.  Friðrik Chopin (pólskur)

8.  Franz Liszt (ungverskur)

9.  Jóhannes Brahms (þýskur)

10. Giuseppe Verdi (ítalskur)

 

Útdráttur úr bókinni Allir í leik - annar hluti

  Í gær birti ég útdrátt úr bókinni frábæru  Allir í leik  eftir Unu Margréti Jónsdóttur.  Það vakti svo mikla lukku að ég get ekki annað gert en birta meira.  Enda er það bara gaman. 

  Erlendis hafa sippleikir tíðkast lengur en hér og þar hefur verið algengt að fara með rím eða taktfastan texta um leið og sippað var, t.d. er til bandarísk bók sem heitir „101 sipprím“. Í samanburði við það er ekki um auðugan garð að gresja hér á landi því að ég hef aðeins fundið þessi tvö sipprím hér sem auk þess eru nauðalík eins og tvö erindi í sama kvæði. En það þýðir ekki að bera sig saman við stórþjóðir og íslensku sipprímin eru skemmtileg og sérstæð. Ég hef ekkert fundið líkt þeim hjá enskumælandi þjóðum.

  „Mamma segir“ er enn mjög vinsæll leikur sem flestar litlar stelpur þekkja og líka margir strákar þótt þeir sippi sjaldnar. Seinna erindið, „Amma segir,“ er ekki eins algengt, en það virðist hafa komið um svipað leyti og „Mamma segir“ og ég man vel eftir því frá bernskuárum mínum 1970-80. Ég hef spurt Svend Nielsen, sem rannsakað hefur danska leikjasöngva, um sipprím í Danmörku, en hann kannaðist ekki við neitt slíkt þar. Í Færeyjum er hins vegar til mjög svipað sipprím og er það svohljóðandi:

Mamma rópar systir inn.

Tú skal fá ein slikkepind.

Kom so inn.

Pabbi rópar systir út.

Tú hefur brotið ein rút.

Kom so út.

(Mamma kallar á systu inn. „Þú skalt fá sleikipinna, komdu inn.“ Pabbi kallar á systu út. „Þú hefur brotið rúðu. Komdu út.“)

Heimild: Stúlka og drengur í Færeyjum, fædd 1991 og 1994. Hljóðritað 2004 þegar þau voru 13 og 10 ára.

Færeyjar: Bamse, bamse

Texti: Höfundur ókunnur.

Bamse, bamse, løb nu ind.

Bamse, bamse, tag din sten.

Bamse, bamse, stræk dine arme.

Bamse, bamse, stræk dine ben.

Bamse, bamse, stræk dig ud.

Bamse bamse, tag din sten.

Bamse, bamse, løb nu ud.

(Bangsi, bangsi, hlauptu inn. Bangsi, bangsi, taktu upp steininn þinn. Bangsi, bangsi, teygðu úr handleggjunum. Bangsi, bangsi, teygðu úr fótunum. Bangsi, bangsi, teygðu úr þér. Bangsi, bangsi, taktu upp steininn þinn. Bangsi, bangsi, hlauptu út.)

Heimild: Stúlka og drengur (systkini) í Færeyjum, fædd 1991 og 1994. Hljóðritað í ágúst 2004 þegar þau voru 13 og 10 ára.

Í þessum snú-snú-leik, sem ég fann í Færeyjum, er barnið, sem hoppar, kallað bangsi og því er sagt að gera alls konar kúnstir um leið og það hoppar yfir snú-snú-bandið: teygja úr handleggjunum, taka upp stein og fleira slíkt. Leikurinn er ekki á færeysku heldur dönsku, en krakkarnir báru hann ekki fram með dönskum framburði, þetta er svokölluð „götudanska,“ sögðu foreldrarnir mér. Leikurinn er líka til í Bandaríkjunum: Teddy Bear, Teddy Bear, og er þar mjög svipaður. Ég hef einnig séð hann í svissneskri leikjabók.

Bestu bílar ársins 2010

  59 blaðamenn á bílatímaritum í 23 löndum tóku þátt í vali á "Bíl ársins 2010".  Ég veit lítið um bíla og bílamarkaðinn og ég fatta ekki hvernig menn geta úrskurðað hvaða bílar verða þeir bestu á næsta ári.  Fjölmiðlar leita ætíð álits míns á bestu plötum ársins sem er að líða eða fyrri ára.  En aldrei á bestu plötum komandi árs.  En þetta urðu úrslitin í vali bíladellumanna á bestu bílum ársins 2010:  Opel Astra lenti í 3ja sæti með 221 stig.  Toyota IQ í 2. sæti með 337 stig.  Vinningshafinn reyndist vera VW Polo með 347 stig. 

.   Pólóinn er þá sennilega betri en VW Caddy-inn minn.  Annarri eins druslu hef ég ekki kynnst.  Alltaf að bila.  Og ef hann bilar ekki þá dældast hann við minnsta núning utan í aðra bíla eða ljósastaura. 

.  Ja,  það segir sig reyndar sjálft að VW hlýtur að vera betri en VW Caddy.  Annars hefðu báðir bílarnir hafnað í 1. sæti með jafn mörg stig.

.  23 danskir blaðamenn á þarlendum bílatímaritum stóðu einnig fyrir vali á "Bíl ársins 2010".  Sigurvegarinn þar var sá sami.  Opel Astra lenti í 2. sæti og Citroen Picasso nr. 3.  Ekki veit ég hvað danskir blaðamenn hafa út á Toyota IQ að setja.  Kannski hefur það eitthvað að gera með viðhorf til Þyrlu-Manga frá Vestmannaeyjum?

Schumacher gerir samning við Mercedes

Verðsamanburður á skötuveislum

  Í dag og á morgun snæða flestir kæsta skötu í öll mál.  Það er góður og hollur siður nú á sólstöðum og hátíð ljóssins;  þegar við fögnum hækkandi sól.  Fjöldi veitingastaða býður upp á skötuveislu,  ýmist í dag eða morgun eða báða dagana.  Ég hef tekið saman verðið hjá þeim veitingastöðum sem ég sæki á þessum tíma ársins.  Sumir þeirra hafa verið með skötuna á boðstólum í nokkra daga.  Svona er listinn:

Sægreifinn  við Reykjavíkurhöfn (Geirsgötu)  1700 kr.

Hafberg, Gnoðavogi  1890 kr.

Sjávarbarinn,  Grandagarði  2400 kr.

Catalína,  Hamraborg  2700 kr.

Múlakaffi  2950 kr.

Skútan,  Hólshrauni,  Hafnarfirði  3000 kr.

Lionsklúbbur Kópavogs  og Coctail veisluþjónusta Auðbrekku (Lundur)  3500 kr.

Turninn, Kópavogi  3500 kr.

Kringlukráin  3950 kr. 

Grand Hótel  4400 kr.

.

  Fljótt og gott á Umferðamiðstöðinni býður upp á skötu á morgun.  Síðast þegar ég vissi var ekki búið að ákveða verðið en skotið á að það yrði á bilinu 2500 - 2700 kr.  Potturinn og pannan,  Fjörukráin,  Hafið Hlíðarsmára, og Gallerí fiskur bjóða einnig upp á skötuveislu.  Ég hef ekki kíkt til þeirra í ár og veit því ekki verðið.  Þau eru heldur ekki gefin upp á heimasíðum þeirra.  Ef þið vitið verðið þar eða vitið um fleiri staði sem eru með skötuveislu væri gaman að fá þær upplýsingar í pottinn.  Mér og ykkur til gagns.

.

  Það er að sjálfsögðu misjafnt hvað veislan er fjölbreytt og vegleg eftir stöðum.  Glæsilegasta skötuveislan er hjá Sjávarbarnum.  Þar er um alvöru hlaðborð að ræða með margvíslegri útfærslu á skötunni,  auk ýmissa annarra sjávarrétta og meðlæti.

  Þar fyrir utan slær ekkert út skötuveislunni hjá Rannveigu Höskuldsdóttur síðasta laugardag.  Hafi hún bestu þökk fyrir.  Verst að myndavél var fjarri góðu gamni.  Annars hefði verið gaman að sýna ykkur frá fjörinu.

 

Útdráttur úr bókinni Allir í leik

  Í gær sagði ég frá leikjabókinni bráðskemmtilegu  Allir í leik  eftir Unu Margréti Jónsdóttur (sjá síðustu færslu).  Fólk er gríðarlega spennt fyrir þessari bók.  Mér rennur blóðið til skyldunnar að gefa frekari sýn inn í bókina.  Því miður hef ég ekki yfir "skanner" að ráða og af þeim gögnum sem ég kemst yfir í netheimum tekst mér ekki að afrita og skeyta nótur af laglínunni á meðfylgjandi lagi.  En það er allt í lagi.  Nóturnar eru í bókinni.  Meðfylgjandi sýnishorni er fyrst og fremst ætlað að leyfa ykkur að sjá efnistök.  Eftirfarandi er leikur sem Færeyingar syngja þegar vel liggur á þeim (til gamans má geta að Færeyingar geta ekki sagt orð sem byrjar á hr.  Þess vegna tala þeir um  ring  þar sem átt er við  hring):

Kráka situr á steini

Lag: Færeyskt þjóðlag. Texti: Höfundur ókunnur.

Heimild: Páll Danielsen, f. 1964, æskustöðvar Þórshöfn og Eiði, Færeyjum, og Vár B. Danielsen, f. 1965, alin upp

í Húsavík á Sandoy og í Þórshöfn. Einnig börn þeirra, Bára Berghamar Danielsen, f. 1991, og Ári Berghamar

Danielsen, f. 1991. Hljóðritað í Þórshöfn í Færeyjum sumarið 2004.

(Einnig Johannesen, bls. 90, og Alfagurt ljóðar mín tunga, bls. 74.)

.

Kráka situr á steini

hakkar í beinið

fyrsta var eitt pottabrot,

annað var eitt útskot í ringi,

triðja var ein rövari á tingi.

Nú skal (Bára) venda sær í ringi.

.

Þýðing: Kráka situr á steini, kroppar í beinið. Fyrst var brot úr potti. Annar var

auladansari (útskot – ræfill; ringi – færeyskur dans (hringur)). Þriðji var ræningi á

þingi. Nú skal (Bára) snúa sér í hringnum.

.

  Þegar ég var á ferð í Færeyjum sumarið 2004 rakst ég á færeyskan dans: „Kráka situr

á steini“ – sem er í sama anda og „Vindum, vindum, vefjum band,“ en allt annað lag

og texti. Færeysk fjölskylda dansaði hann fyrir mig í stofunni heima hjá sér. Hann er í

færeyskum þjóðdansastíl, en sá sem er nefndur á nafn í síðustu hendingunni snýr sér við.

Í lokin er sagt að nú skuli allir snúa sér við og er það gert.

Í færeyskri leikjabók má sjá að dans þessi var vinsæll meðal barnanna þar á árum

fyrri heimsstyrjaldar og hugsanlega fyrr.1)

.  Ljóst er að textinn er gamall því í bók Jóns Samsonarsonar, Kvæði og dansleikir, kemur fram að hluti úr honum var notaður í íslenska þulu fyrr á öldum. Þulan er höfð eftir sr. Friðriki Eggerz (1802-1894) og brotið, sem líkist færeyska textanum, er á þessa leið:

Einn pottur var brotinn,

annar útskotinn,

þriðji var þar ryðgaður við síðu.

Og síðar segir:

Hvör er sá á þinginu sem bjóða skal? 2)

Tilvísanir:

1. Johannesen, bls. 90.

2. Jón Samsonarson I, bls. ccxvi-ccxvii. Vitnað er í handrit Lbs. 936 4to, bls. 316-317.

Flottasta bókin á jólamarkaðnum

  Ein lang flottasta bókin á jólamarkaðnum heitir  Allir í leik.  Í henni er lýst fjölda sunginni leikja og birtar nótur laglínanna.  Þetta eru leikir sem ömmur og afar,  mömmur og pabbar og börn eldri en sex ára þekkja.  Óvíst er að allir þekki alla leikina.  Þeim mun skemmtilegra er að læra þá.  Nokkrir leikir eru frá Færeyjum og Grænlandi.  Þeir eru frábærir.  Það er Una Margrét Jónsdóttir sem safnaði leikjunum saman.   

  Þetta er bók sem passar flestum bókum betur í jólapakka handa fólki á öllum aldri yfir sex ára.

Risa kjaftshögg á X-factor

  Undur og stórmerki hafa átt sér stað í Bretlandi.  17 ára gamalt bandarískt þungarokkslag,  Killing in the Name  með Rage Against the Machine,   valtaði yfir splunkunýtt lag með nýkrýndum X-factor sigurvegara á breska vinsældalistanum.  Síðarnefnda lagið seldist í 450.838 eintökum í liðinni viku.  Killing in the Name  seldist 51.834 eintökum betur,  eða samtals í 502.672 eintökum.  Þar með er  Killing in the Name  jólalagið 2009 í Bretlandi,  það er að segja prýðir toppsæti breska vinsældalistans um jólin.

  Í Bretlandi er mikið gert úr jólalagi hvers árs.  Því er hossað í þarlendum fjölmiðum og spilað út í eitt í útvarpi og sjónavarpi yfir jólin.  Simon Cowell,  maðurinn á bak við söngvarakeppnina X-factor var búinn að lýsa því yfir að ef lagið með X-factor sigurvegaranum yrði jólalagið í ár myndi það breyta öllu til frambúðar.  Nú hafa þær vonir orðið að engu.  Sigur  Killing in the Name  yfir X-factor laginu hefur einnig afgerandi þýðingu.  Hann er sigur rokkunnenda yfir verksmiðjuframleiddu skallapoppi í niðursuðudósum og atburðarás hannaðri samkvæmt uppskrift markaðsfræðinnar um hjarðhegðun;  þar sem hjörðinni er stýrt í réttirnar eins og uppvakningum.´

  Hundruð milljónum króna var varið í að tryggja X-factor laginu 1. sætið.  Ekki ein króna var sett í að bakka  Killing in the Name  upp.   

  Í netheimum loga breskar bloggsíður í umræðu um jólalagið í ár.  Sumir eru ósáttir en flestir afar ánægðir.  Sigur  Killing in the Name  er ein aðalfréttin í breskum ljósvaka- og netmiðlum í dag og verður á forsíðum dagblaðanna á morgun.  Breska ríkisútvarpið BBC er í vandræðum vegna jólalagsins í ár.  Einhverra hluta vegna er bannað að segja vinalega orðið "fuck" í BBC.  Í viðlagi  Killing in the Name  segir  "Fuck you,  I won´t do what you tell me".  Í morgun áttaði tæknimaður BBC sig ekki nógu fljótt á hvað sagt er í texta lagsins.  4 "fuck" sluppu í loftið áður en tæknimaðurinn skrúfaði niður í laginu.  BBC sendi í kjölfar frá sér yfirlýsingu þar sem beðist er afsökunar á þessu.

  Síðar í dag hafa aðrir bútar úr laginu en þeir sem innihalda "fuck" verið spilaðir í BBC og Sky.  Reyndar er vandamálið varðandi þetta ekki stærra en svo að yfir 4 mínútur eru liðnar af laginu áður en kemur að "fuck-unum". 

  Killing in the Name var vinsælasta lagið á mörgum breskum pöbbum í kvöld.  Þar sungu gestir hástöfum með í "Fuck you" kaflanum.  Á fréttasíðum breskra netmiðla hefur fréttin af jólalaginu verið ein mest lesna og oftast áframsenda fréttin í dag.  Margir Bretar segja að með þessum úrslitum hafi jólin í raun gengið í garð.

  Jólalagið í fyrra var  Hallelujah  með Alexöndru Burke.

  Sigur  Killing in the Name  hefur vakið athygli víða um heim.  Ekki síst í Bandaríkjunum,  Enda er Rage Against the Machine frá Los Angeles og ein vinsælasta hljómsveit Bandaríkjanna.  Plötur hennar hafa verið í áskrift að 1. sæti bandaríska vinsældalistans.

  Meira um þetta hér:  http://www.jensgud.blog.is/blog/jensgud/entry/994066/

  Hér er  Killing in the Name  í flutningi Audioslave með Chris Cornell við hljóðnemann:

   

 

R.A.T.M. náði fyrsta sæti

Smá spaug

  Íslensk þýðing fyrir þá sem kunna ekki sænsku:

1  Fyrst þarf að láta vínið anda.

2  Það andar ekki.  Hvað er til ráða?

3  Þá er nærtækast að grípa til björgunaraðgerða og beita "munn við munn" lífgunaraðferðinni!

Dúndur skemmtileg bíómynd - kvikmyndarumsögn

 -  Titill:  Anvil! The Story of Anvil

 -  Einkunn:  ***** (af 5)

 -  Sýningarstaður:  Háskólabíó

.

  Þetta er grátbrosleg heimildarmynd um tvo vini í Toronto í Kanada.  Þeir byrjuðu að spila þungarokk saman sem unglingar 1973.  Í dag eru þeir komnir á sextugsaldurinn og eru enn á fullu.  Þeir hafa fengið fleiri og stærri tækifæri en flestir tónlistarmenn til að slá í gegn á alþjóðavettvangi.  Hljómsveit vinanna,  Anvil,  var frumkvöðull hraðkeyrslu- og þrass-málmsins (speed/thrash) og fyrirmynd hljómsveita á borð við Metallica,  Megadeath,  Slayer,  Pantera og Overkill.  Einnig má nefna Anthrax sem hefur krákað (cover) lög frá Anvil.   Liðsmenn þessara hljómsveita eru einlægir aðdáendur Anvil,  eins og fjöldi annarra frægra þungarokkara.

.       

  Myndin hefst á því að margar af helstu rokkstjörnum heims hlaða hrósyrðum á Anvil í bak og fyrir.  Síðan tekur alvaran við.  Hljómsveitin hefur túrað með flestum stærstu nöfnum þungarokksins,  svo sem Iron Maiden,  Whitesnake,  Motörhead,  Scorpions,  Bon Jovi og þeim sveitum sem áður eru nefndar.  Hún hefur spilað á mörgum heimsins stærstu þungarokkshátíðum,  sem eru umsetnar rokkmúsíkblaðamönnum,  öðru fjölmiðlafólki,  plötuútgefendum og umboðsmönnum.  

.

  Allt kemur fyrir ekki.  Anvil hefur aldrei náð að "meika það".  Plötur hljómsveitarinnar eru orðnar 13.  Þær seljast ekkert.  Anvil er ekki nógu stórt nafn til að halda sjálfstæða hljómleika nema á litlum pöbbum.  Það er "happa og glappa" hvort hljómsveitin fær borgað fyrir að troða upp.  Liðsmenn hennar eru sífellt staurblankir.  Þeir eru í óþrifalegri dagvinnu til að sjá sér farborða.  Hljómsveitin er bara útgjaldaliður og hobbý.

.  

  Það er dagamunur á því hvort vinirnir eru fullir bjartsýni eða hvort örvæntingin er við völd.  Tíminn vinnur gegn þeim.  En þeir neita að gefa drauminn um að "meika það" og verða alvöru rokkstjörnur upp á bátinn.  Fjölskyldur þeirra hafa mismikinn skilning á þráhyggjunni.  Ein konan segir eitthvað á þessa leið:  30 ára ferill og 13 plötur án þess að nokkuð gerist eru sterk skilaboð um hver staðan er.  Sumir eru ekki raunhæfir.

.

  Forsendur fyrir því að "meika það" voru fyrir hendi framan af ferlinum.  Svo sannarlega.  Fyrstu plötur þeirra eru fínar og voru spennandi er þær komu út.  En vinirnir eru lúðar.  Þeim sást ekki fyrir í þránni eftir að verða alvöru rokkstjörnur.  Þeir klæddu sig kjánaleg á sviði.  Líktust léttpoppuðum stelpulegum glam-rokkurum í hár-metal deildinni (Posion,  Mötley Crue,  Hanoi Rocks...) og rökuðu sig undir höndum og bringuna.  Málið er að aðdáendur þyngra og harðara rokks þola illa hár-metal poppið og stelpulegt útlit hár-metalistanna.  Öðrum vinanna þótti líka voða flott að spila á gítarinn með gervityppi.  Hörmulega hallærislegt.

.

  Aulaháttur vinanna er svo mikill að um tíma voru þeir með umboðsmann,  konu frá A-Evrópu,  sem kunni varla ensku.  Það litla sem hún kunni kom ekki að gagni vegna illskiljanlegs framburðar.  

  Myndin kemur þessu öllu vel til skila á hlýlegan hátt,  virðingu fyrir viðfangsefninu og næmu auga fyrir spaugilegu hliðinni.  Vinirnir eru óhemju ánægðir með kvikmyndina.  Þeir átta sig áreiðanlega ekki á því hvað þeir eru kjánalegir. 

 .

   Að mörgu leyti svipar myndin til fyndnu leiknu grínmyndarinnar The Spinal Tap.  Vegna þess að "Anvil! The Story of Anvil" er heimildarmynd um raunverulega tónlistarmenn er hún miklu fyndnari.  Hún snertir líka áhorfandann.  Það er ekki hægt annað en vorkenna vesalingunum. 

  Ég mæli eindregið með þessari mynd.  Frábær kvöldskemmtun.  Hún er jafn skemmtileg hvort sem fólk "fílar" á þungarokk eða ekki.  Það eru aldrei spilaðir nema örstuttir bútar af músík hljómsveitarinnar.  Mér þótti það galli því ég kann vel við músík hennar.  En átta mig á að þessi háttur er hafður á til að allir hafi gaman af myndinni.  Ég er dálítið fyrir þennan músíkstíl og kannaðist við nafnið Anvil en hafði aldrei heyrt í þessari hljómsveit svo ég muni eftir.  Þykir þó líklegt að ég eigi lag með henni á safndisk/um án þess að gefa því gaum.  Nenni ekki ganga úr skugga um það.  Hinsvegar kannast ég við hljómsveitina Overkill sem fyrrum gítarleikari Anvil fór í.  Hún er töluvert betur þekkt.  Hvað um það.  Þetta er ein besta mynd ársins sem er liðið í aldanna skaut eftir örfáa daga.   

.

      

                  

Allt á suðupunkti í Bretlandi - gífurleg spenna

  Fyrir viku sagði ég frá undarlegu stríði í Bretlandi.  Það snýst um jólalagið í ár.  Þá er ekki verið að tala um eiginlegt jólalag þar sem sungið er um jólin heldur hvaða lag verður í 1.  sæti breska vinsældalistans yfir jólin.  Samkvæmt áætlun aðstandenda X-factors söngvarakeppninnar á sigurvegari hennar í ár að eiga jólalagið og undirstrika þannig vinsældir og áhrifamátt þáttarins.  Þetta lagðist illa í andstæðinga X-factors.  Þeir hófu herferð fyrir því að 17 ára gamalt bandarískt þungarokkslag,  Killing in the Name  með Rage Against the Machine myndi bregða fæti fyrir X-factor lagið. 

  Ástæðan fyrir valinu á  Killing in the Name  er að í viðlagi er sungið:  Farðu til fjandans,  ég vil ekki gera eins og þú segir!  (Fuck you,  I won´t do what you tell me).  Mjög óvænt brást breskur almenningur einstaklega vel við.  600 þúsund manns skráðu sig á lista undir slagorði viðlagsins.  Fjölmiðlar hafa velt sér upp úr þessum slag,  poppstjörnur tjáð sig um hann og aðstandendur X-factors leggja allt undir til að ná sínu fram.

  Jólalagið ræðst af sölu yfir tímabilið frá aðfaranótt síðasta sunnudags til miðnættis annað kvöld.  Eins og staðan er hefur  Killing in the Name  17% forskot á X-factor lagið.  Það hefur selst í 254 þúsund eintökum en X-factor lagið í 217 þúsund eintökum.  Morgundagurinn verður hinsvegar stærsti söludagur vikunnar og allt getur gerst.  Aðstandendur X-factors voru með 500 þúsund eintök tilbúin á lager til að ekkert gæti klikkað.  Það er allt á útopnu hjá þeim í að koma laginu út.  X-factor batteríið hefur yfir miklu meiri fjármunum að spila.  Forskot  Killing in the Name  hefur komið aðstandendum X-factors úr jafnvægi.  Maðurinn á bak við X-factor,  Simon Cowell,  froðufellir af reiði í fjölmiðlum og á Fésbók.  Það verður hvergi gefið eftir.  Mikið er í húfi fyrir þáttinn.  Það yrði hrikalegt kjaftshögg að lúta í lægra hald fyrir 17 ára gömlu bandarísku þungarokkslagi.

  Úrslitin liggja fyrir á sunnudaginn.

  Hér má heyra  Killing in the Name  og lesa nánar um þennan slag:  http://jensgud.blog.is/blog/jensgud/entry/991842/

 

Sir Paul styður Rage í jólaslagnum